الطب إتقدم - تجربة شخصية

[se_ Elsyed]

يمكن الجميع يعلم بقصة مرض إبني علي الغريبة اللي حصلت من حوالي 3 شهور بالرغم من إن الاسباب كانت بسيطة إلا إن الحالة تطورت وبقت لا تسر عدو ولا حبيب .. لكن الحمد لله ربنا جاب الشفا في مصر ..

فلحد اليوم اللي سافرت فيه كان الولد لسه محجوز في مستشفى من أكبر مستشفيات الرياض وعنده جرح في ذراعه نتيجة عملية ثانية ولم يتم غلق الجرح بالغُرز خوفاً من حدوث تجمعات صديدية أخرى .. ونصحني الأطباء بعدم السفر وأستمرار العلاج هنا .. وكذلك فعل الأصدقاء .. لكن ما قدرتش لإن فرح أختي الصغيرة كان فاضل عليه 4 أيام وهي كل شوية تتصل وتعيط وتقولي إنها لغت الفرح طالما ما نزلتش وما أطمئنناش على علي .. وكذلك والدتي قلبتها مناحه وعاشت في دور أمينة رزق في فيلم " قلبي على ولدي إنفطر " .. وكان عندي مناحه تاني من أختي التي تليني والتي أرتبط معها بصداقة أكثر من الأخوه لإن الفرق بيننا 3 سنوات فقط وكنا بنروح المدرسة سوا وعقليتنا قريبه جداً من بعض .. ولكنها تزوجت أول ما أتخرجت من الجامعه وأستقرت منذ 6 سنوات في أوروبا هي وزوجها وأولادها وما بقناش نشوف بعض إلا في الأجازات وبقت هي سبب رئيس لقيامي بأي زيارة لمصر .. وكانت في مصر بالفعل وفاضل لها 15 يوم وتسافر ..

فتوكلت على الله ونزلت مصر وكتبت على نفسي إقرار للمستشفى بإني أتحمل مسئولية الولد ... ونصحني الطبيب المُعالج هنا بإستكمال العلاج عند أحد زملاءة والذي يعمل في مستشفى عين شمس التخصصي وهو إستشاري جراحة عظام وعنده عيادة خاصة ..

دورت على العيادة والحمد لله وصلت له ... المهم لقيت الراجل بيعتذر لي بكل أدب لإنه مسافر بعد يومين برضوا يقضي إجازته السنوية خارج مصر لمدة شهر .. لكن قالي زورني بكره في المستشفى أعرفك على زملاء أكفاء أخرين يتابعوا الحالة ..

المهم روحت البيت تقريباً الساعة 12 بالليل ونمت بدري من الزعل والإحباط ..

بس لقيت زوجتي بتصحيني الساعة 2 بالليل وبتقولي إن باباها في العربية تحت البيت وجاي ياخد علي يعرضه على دكتور يعرفه ... فقولت لها ده أحنا وش الفجر .. دكاترة إيه اللي بيشتغلوا للصبح دول ؟ والله مانا رايح .. الصباح رباح .. فقالت لي خلاص انا هاروح معاه ومع ماما وناخد علي وأهو عمر نايم .. وأنا كنت يأست وقولت مش هايعملوا حاجة ..

صبحت الصبح لقيت زوجتي بتحكي لي أعاجيب وغرائب وطرائف ..

أولاً : قالت لي إنهم راحوا العيادة لقوها زحمة موت ولا جميعة بتبيع فراخ من بتاعت توفيق عبد الحي ..

ثانياً : الدكتور ده أساساً عقيد دكتور وإستشاري عظام بالمستشفيات العسكرية ..

ثالثاً : خش على التقيل بقى .. الكشف عنده بـ 10 ج عادي و15 مستعجل !!!!!!

فقولت لها إنتي بتهرجي .. في حد كده اليومين دول .. ده ولا مستوصف الأمانة اللي بيبقى عبارة عن كُشك في مولد الحُسين والدكتور فيه بيبقى حلاق صحه ومعاه أدواته في شنطة حلاق والواحد بيعرفوا من على بُعد ..

فقالت لي أهو ده اللي حصل ..

إدخل بقى على الكورس وطريقة العلاج وصلي على رسول الله ..

يُتبع

[se_ Elsyed]

إبننا علي من وهو عنده شهر بيلعب بالمضادات الحيوية لعب لإن مناعته ضعيفة وأضطرينا نعمل له اللوز وهو عنده سنة ونصف تقريباً

وكان محجوز في المستشفى بقى له شهر وأخد كمية مضادات حيوية تكفية لحد الجامعة ... ومع إن مصاريف العلاج تجاوزت مثلاً مبلغ 50 ألف ريال تحملتها شركة التأمين إلا إنهم ما أعترضوش على ده كله وأعترضوا فقط على نوع معين من المضادات إضطرت المستشفى تكتبهوله لإيقاف إنتشار الجرثومة في ذراعه .. وقالوا إن النوع ده ثقيل جداً عليه ..

المهم أخونا العقيد أول حاجة قالها لزوجتي إنه توقف إستخدام المضاد الحيوي تماماً لمدة 3 أيام وبعدين نروح معمل البرج نعمل مزرعة من عينة الصديد ونشوف إيه نوع الجرثومة دي اللي ما ظهرتش مطلقاً خلال المزارع العديدة اللي عملناها في عدة مستشفيات ومعامل هنا في الرياض ..

فزوجتي أعترضت وقالت له أسفة .. ده الواد يموت كده والجرثومة ممكن تهاجمه تاني بشكل أكثر ضراوة زي ما حصل أخر مره لما الدكاترة خففوا له جرعة المضاد ..

فقالها على مسئوليتي .. قالت له والله لما تقول إيه ... وكانت قايمه ماشيه .. فالراجل قالها طب يرضيكي أكتب تعهد شخصي بخط إيدي بإني أتحمل المسئولية كاملة ( جزء من خطاب التنحي بتاع عبد الناصر :D ) فقالت له كده أوكي .. وفعلاً أعطاها تعهد شخصي منه .. وقال لها إن خلال الـ 3 أيام دول تيجوا العيادة نغير له على الجرح بـ " بيتادين " فقط ..

أنا كل ده بأسمع وفاتح بقي زي العبيط لإني شايف الجرح قدامي عمقه حوالي 2 سم ومفتوح على الجنبين وعامل زي قناة السويس بضفتيها الغربية والشرقية لدرجة كنا نحط البيتادين في الجرح وكإننا بنملى كوبايه ..

المهم عملنا المزرعة والنتيجة الحمد لله طلعت كويسه وقال لنا إن الجرثومة ما كانتش في الأنسجة .. وطبعاً التقرير أظهر أنواع المضادات الحيوية اللي ممكن نستخدمها في مثل هذه الحالات .. حوالي 10 أنواع .. ففضل دكتورنا العزيز يشطب واحد ورا واحد ويقول على ده ثقيل وده حرام على الولد عشان سنه .. وده لأ .. لحد ما خلصهم كلهم ولقيته إنتفض وقالي .. والله العظيم مانا كاتب له على مضادات ... إيه رأيكم بقى ؟ .. خلوا الأجسام المضادة في جسمه تشتغل .. حرام عليكوا ... وأنا وزوجتي بقينا عاملين نتحايل عليه زي المدمنيين عشان يدي الواد أي حقنة أو برشامه مضاد على ما قسم حتى .. وهو راسه والف شوز ما يعمل كده ...

فأخيراً قولنا له طب والعلاج هايبقى إيه بقى ؟

فقال .. محلول ملح فقط ...

وإذكر الله .. وصلي عالحبيب واللي يحبنا ما يضربش نار ..

قولت حلو كده دخلنا على شربة الحاج محمود اللي بتحارب الدود وتورد الخدود ..

وراح مكمل ... وإحنا بإذن الله هانغير له كل يوم بالمحلول ده مع إستخدام مرهم مُعين بيساعد على إلتئام الجروح وبس ، وده لمدة 10 أيام وهاتشوفوا النتيجة ..

قلنا خلينا معاه للأخر وأدي التعهد معانا ويانا يا هو والمحاكم موجوده ..

في هذه الأثناء الحمد لله الجرح إبتدى يلتئم وما فيش حرارة ولا ورم وكله تمام .. وفي كل زيارة كنا نلاقي ما شاء الله عنده طوفان من البشر وهو كان مدي تعليمات للممرضات إن أول ما نيجي بعلي ندخل على طول ومالناش دعوة بالدور .. وفي كل مره عشان أوصل لباب العيادة كنت أشق الصفوف وكإني أمشي على أمواج من البشر ورافع الواد علي فوق عشان يقدر يتنفس من كثر الزحمة العجيبة ..

أول مره في حياتي أشوف عيادة زي كده ... وكل الناس كانت ترمقنا بنظرات الحقد وتلاقيهم كانوا بيقولوا " بلد كوسه بصحيح "

المهم بعد إسبوعين الحمد لله الجرح إلتئم تماماً وكإن جراح ماهر هو اللي خيطه .. ومع إن الجرح الأولاني كان طولة حوالي 15 سنة ومقفول بس الخياطة كان منظرها بشع .. لكن الجديد ده قفل لوحده بفضل الله ثم هذا الرجل المحترم ..

الغريب والعجيب بقى إني زرت العيادة حوالي 12 مره خلال إسبوعين والراجل لم يطلب مني مليم واحد .. وقولت في عقل بالي تلاقيه مرقد لي على حاجه جامده وهايقولي مفاجأة في الاخر ، وفي أخر زيارة قولت أخد صُره من الدنانير تحسباً لأي مواقف بايخه .. وقولت الراجل مكسوف يقولي على المبلغ قدام الممرضات فعلشان كده قررت أكلمه بالانجليزي عشان لما يرد ما يبقاش فيها إحراج أو حاجة ..

فسألته وقولت له : يا دكتور إحنا دفعنا لحد دلوقت 10 ج فقط في أول كشف .. وحضرتك ما سألتنيش عن أي شيء زيارة ولا متابعه ولا تغيير على الجرح اللي كنت بتصمم تعمله بنفسك ( مع إن الملف كله قدامه وعارف إني في السعودية وأسماء المستشفيات كلها موجوده )

فقالي مانا كنت هاقولك .. بس تعالى على جنب .. الحقيقة مطلوب من حضرتك أ أ

قول يابا ..الصُره موجوده والدنانير كثير والحمد لله ..

فأخيراً .. مطلوب من 40 ج تدفعهم بره في الخزنة ..

والله العظيم أنا كان هاين عليه أنط في كرشه ..

وقولت طب ياواد يا س س .. أطبق إيدي باللي فيه نصيب وأقوله خد إشتري لك نص كيلو لحمه لييعال ... لأ ما يصحش ده راجل كُباره وقد والدي وممكن أجرح كرامته ورد فعله يكون إنه يضربني بالمشرط اللي في إيده ويعملي 111 وساعتها هاندم أشد الندم ..

وشكرته على مجهوده وأخلاقه العليا ومهارته الفائقة كطبيب متمكن ..

وقولت سبحان الله يوضع سره في أضعف خلقه ...

وأستشرنا مره أخرى طبيب تجميل لمعالجة الجرح الأول في إيد الولا علي اللي كان شكله بايخ .. وكتب لنا على لزقة طبية معينه مُكونه من السليكون مع مرهم يستخدم لمدة 4 شهور .. ونقطع حته من اللزقة على قد الخياطة ونلزقه بعد المرهم والجلد هايرجع زي ما كان ... والغريب إن اللزقة دي ممكن تستخدم برضوا مع اللي عنده جرح أو خياطة قديمة وتشوه منظر الجلد زي ما بنشوف في بعض الحالات .. حد بيكون وقع أو إتعور وهو صغير والجراحة تلاقيها سايبه أثر .. والحمد لله الأمور تتحسن والجلد بيرجع لطبيعته ..

والحمد لله رب العالمين على كل شيء

[bentmasria]

الف الف سلامة على على استاذنا الفاضل وحمد لله على سلامته

ماتستغربش يا سى السيد ربنا بيكرم الناس دى جدا ولانهم موش طماعين اصلا والحجز موش بالشهرين والكشف موش 300 وكمان عشرين عشان الممرض ما يسيبكش تتلطع بره

ربنا يحفظ اولادك من كل شر انا فوجئت مرة بحكاية مشابهة وطبيبة كبيرة جدا كانت عميدة كلية الطب ورحنا لها بالوالدة ربنا يحفظها وتخيل الكشف 30 جنيه عام 2005 والناس طابور على السلم وتحليل السكر ببلاش ورسم القلب زى المستوصف ب 15 جنيه

وكتب الله التحسن الكبير لى ولوالدتى على يد هذه الطبيبة الفاضلة اللى لغاية دلوقتى بتعاملنى زى بنتها بالظبط

ترد على التليفون اى وقت ولا تتصنع الانشغال رغم مشاغلها الكبيرة

وهكذا هم او ربما هذا ما يميزهم

الانسانية يا سى السيد

اصبحت عملة نادرة جدا فى زمن بلا قلب

تحياتى لهذا الطبيب ومن يحذو حذوه فى تقديم انسانيتهم على اطماع البشر

دمت بكل الخير

[عصام أبوالفتح]

الف حمد لله على سلامة ابنك يا س س

ان شاء الله متشوفش مكروه فيه تانى ابدا

وجزى الله هذا الطبيب العظيم خير الجزاء

الطب لم يتقدم يا أخى الفاضل .. ولكن الاخلاق هى من تقدمت عند هذا الرجل

الطب والاجهزة ربما تكون بالرياض اكثر تقدما .. لكن لان الطب سلعة تجد

اعلانته التجارية تملأ الصحف واصبحت المستشفيات والمستوصفات مجرد بقالات

وللاسف يتفنن الاطباء هنا فى جلب المنفعة لاقسام التحاليل ولشركات الادوية

عن طريق التوصية على ادوية تضر اكثر مما تنفع

وعن تجربة شخصية استمرت ست سنوات كدت ان اسمى نفسى ايوب

ولحر الرياض الذى لا يطاق والذى كان بمجرد ان يبدأ تنتشر اكزيما من نوع نادر

فى كل جسمى واحتار عتاولة الطب فى تشخصيها هنا وفى مصر ايام الاجازات ..

حتى من الله على بالشفاء اللحظى التام على يد دكتور احمد عزالدين

بمستوصف العليا العام والذى تابع علاجى حتى ليلة سفره وجزاه الله كل خير

تشخيص الحالة مهارة لا يتعلمها الاطباء فى الكلية .. وهى متروكة لاخلاص

وفن ومدى خبرة ومهارة الطبيب ..

عافانا الله واياكم من كل شر

ووصية تبوسلى ابنك وتقوله عمك عصام بيقولك طهوراً ان شاء الله يا حبيبى :wub:

[zamzam]

الحمدللة على شفاء علي...

[محمد شلبى]

وأستشرنا مره أخرى طبيب تجميل لمعالجة الجرح الأول في إيد الولا علي اللي كان شكله بايخ .. وكتب لنا على لزقة طبية معينه مُكونه من السليكون مع مرهم يستخدم لمدة 4 شهور .. ونقطع حته من اللزقة على قد الخياطة ونلزقه بعد المرهم والجلد هايرجع زي ما كان ... والغريب إن اللزقة دي ممكن تستخدم برضوا مع اللي عنده جرح أو خياطة قديمة وتشوه منظر الجلد زي ما بنشوف في بعض الحالات .. حد بيكون وقع أو إتعور وهو صغير والجراحة تلاقيها سايبه أثر .. والحمد لله الأمور تتحسن والجلد بيرجع لطبيعته ..

والحمد لله رب العالمين على كل شيء

<{POST_SNAPBACK}>

الحقنى بيها الله يخليك يا باشا , اصلى بعيد عنك وانا صغير شاطتنى عربية متهورة و الدكتور العظيم الله يكرمه اللى خيط الجرح اللى فى دماغى خيطه بطريقة سيئة جدا وسابتلى اثر اعلى الحاجب طوله حوالى 3 سم وطبعا كل ما واحد خفيف يشوفه يقولى ايه ده مين اللى مشرحك كده :sad: ؟

يا ريت تقولى على اسمها الله يخليك يا س س وحمدا لله على سلامة على :)

تم تعديل 20 سبتمبر 2005 بواسطة محمد شلبى

[se_ Elsyed]

يا ريت تقولى على اسمها الله يخليك يا س س وحمدا لله على سلامة على :sad:

حاضر يا دكتور محمد من عيني ..

بإذن الله النهاردة سأضع إسم هذه اللزقة والمرهم كمان .. هي غالية شوية بس بإذن الله فيها الشفا .. أعتقد ثمنها في مصر في حدود 150 إلى 200 ج بس ميزتها إنها بتكفي لجرح كبير حوالي 4 شهور لإنها بتتقطع على قد الجرح وبعدين لم تُستهلك بتقطع غيرها .. وعلى فكرة سعرها في السعودية يعادل 350 ج .. أما المرهم فرخيص .. تقريباً 10 ج ... وصراحة حمايا الله يكرمه لف جامد في مصر على ما لقاها والكل كان بيدله على صيدلية " الِعزبي " وفعلاً لقاها عندهم .

[achnaton]

بداية بانضم للناس الطيبين اللى تمنوا للآبن العزيز .. الشفاء والصحة .. وأسال المولى ان يجنبه آى جروح .. او امراض .. وتفرح به انت والمدام وهو لابس بدلة العريس ..

ومن حق هؤلاء الاطباء الشرفاء المهرة ان لا نغفل اسمائهم او عناوينهم .. وندعوا لهم أن ربنا يكرمهم .. ولن يعتبرها المنتدى إعلان .. فاذكرهم يا ابو عمر وحددهم .. فهذا ثواب .. يكرمك الله به من اجل قراء هذا الباب ..

كرموهم يا ياناس .. وامثال هؤلاء يستحقون منا التكريم .. سلطوا عليهم الاضواء وحتلاقوا بعدها اطباء الافق .. والجزارين .. كل منهم فاق .. وعامل ربنا الخلاق .. وعمار يامصر .. لسه برضه فيكى ناس عندهم اخلاق ..

مع تمنياتى لكل المرضى ومرة ثانية يا حاج .. مبارك

[se_ Elsyed]

مع تمنياتى لكل المرضى ومرة ثانية يا حاج .. مبارك

<{POST_SNAPBACK}>

إنت كنت ماشي كويس يا عم أخناتون لحد الحتة الأخراني ..

عامة أسم الدكتور / مصطفى الهلباوي ... وتليفون عيادته هو 2513383 القاهرة طبعاً ...

بالمناسبة يا دكتور محمد شلبي إسم اللزقة SileGel .. والمرهم إسمه Contractubex

[محمد شلبى]

الف شكر يا باشا :sad:

وربنا يتم شفاء على و يبقى زى الفل ان شاء الله :)