قصاصات عن الوحدة .. الغربة .. وأشياء أخري

[zemanova]

الموضوع بالكامل هو عبارة عن خواطر وأفكار تواردت علي ذهني, وكعادتي منذ زمن كل م ب الاقي موضوع شاغلني كتير بحاول أمسك القلم واترجم حيرتي دي لأفكار علي ورق .. ومن خلال متابعتي للمنتدي وللعقليات المثقفة والواعية لحضراتكم, ففكرت إني أعرض أفكاري هنا طمعا في بعض الدعم النفسي أو المعنوي وطلبا للمشورة من السادة الأعضاء.

 

ملخص الموضوع ف البداية عشان لو حد زهقان ومش حابب يكمل متابعة عن شخص بيطارده الملل وشبح عدم الإستقرار الوظيفي, وبيحاول بشتي الطرق يوفر مستقبل أفضل لنفسه وأسرته مرورا بعدة مراحل حياتية تفصيلها كما يلي:

 

المرحـلة الأولي .. مش طايق نفســـي: (ف المرحلة دي أنا شغال ف شركة كبيرة وبراتب مجزي ولكن هناك وجود للعديد من الإلتزامات المادية والأسرية - أقساط شقة وعربية ومصاريف مدارس وخلافه - بتجعل من المستقبل القريب فضلا عن البعيد معضلة حسابية لا يمكن حلها بسهولة).

 

تعريف سريع بالشخصية: مهندس مدني .. 33 سنة .. متزوج وعندي طفلين.

 

البلد أصبحت بالنسبة لي أضيق من خرم إبرة. كل حاجة أصبحت بتعصبني فيها, بداية من صوت بتاع "الروبابيكيا" علي أول شارعنا المتواضع في بداية يوم صيفي حار وحتي المنظر الكئيب لأكوام القمامة علي بداية نفس الشارع .. طول عمري كنت باحاول أقنع نفسي إني م ارميش زبالة ف الشارع ظنا مني إن لو كل واحد بدأ بنفسه الشارع تدريجيا هينضف والبلد هتبقي أحسن .. لكن الحقيقة إن أكوام الزبالة ظلت باقية, وباقي الناس واضح إن محدش فيهم عايز يبتدي هو كمان بنفسه.

 

تدريجيا فعلا بقيت مش قادر أشم نفسي ف المكان اللي انا عايش فيه, أنا وأسرتي اللي كل يوم باموت من القلق عليهم لمجرد إنهم قرروا ينزلوا من البيت يشتروا حاجة من السوق وأنا مش معاهم, أو يركبوا الميكروباص عشان يروحوا المدرسة. ده أنا حتي بابقي قلقان وهم معايا ف البيت نايمين ف حضني, وحكايات بتطاردني قبل النوم عن فلان أو علان اللي اللصوص دخلوا عليه بيته وسابوه سايح ف دمه هو ومراته لمجرد رغبتهم في سرقة تلفاز أو بعض المشغولات الذهبية.

 

الزحام .. عدم الإحساس بالأمان .. تفكيري المتواصل ف مستقبل أولادي ومدي قدرتي علي توفير تعليم جيد ليهم وظروف معيشية مقبولة, كلها أشياء بتدفعني وبجنون لعدم تقبل حالي. وعلي الرغم من إن معاناتي دي بيعيشها أكتر من 90 مليون مصري لهم نفس ظروفي ويمكن أسوأ, إلا إني كنت شايف نفسي أحسن من ناس كتير .. وإني أقدر أغير من حالي ومن وضعي ده علي عكس ناس تانية يمكن لا تملك هذا القدر من الرفاهية.

 

وبدأت رحلة البحث عن عمل ف الخارج وأنا في كامل الأسي, يمكن عشان فعلا باحب البلد دي ومقتنع إن فيها حاجات حلوة كتير .. ساعتها افتكرت مقولات لبعض من الإخوة الأعضاء هنا ف المنتدي من ضمنها: "اللبنانيين مثلا كل واحد فيهم شايل بلده جوه قلبه ومتغربين وماليين بلاد الأرض" .. "وإن أكثر المهاجمين والمنتقدين لحالة البلد دي, هجومهم ما هو إلا رد فعل لحالة الحب الداخلية العميقة لهذا البلد" .. ومقولات تانية كتير وصلتني لمرحلة إدراك إن الحاجات الحلوة اللي ف البلد غالبا هنفقدها ف الزحمة, وإني مش لازم عشان سافرت أكون ندل أو مش بحب بلدي .. بلدي اللي غالبا أهلـــي بس هم اللي هيفتقدوني فيها لما امشي, في حين إن كل حاجة تانية هتكون سعــيدة وهيكون لسان حالها "مترجعش تاني أحسن لك".

 

 

المرحـلة الثانية .. مش هو ده اللي انا عايزه: (ف المرحلة دي أنا شغال ف شركة كبيرة وبراتب أفضل, مع تمكني ولله الحمد من سداد معظم الديون والأقساط المستحقة في بلدي الأم. بالإضافة إلي مبلغ فائض تمكنت من جمعه ولكنه ف الوقت نفسه غير كافي عشان ارجع مصر).

 

قعدت سنة ف الغربة .. في المدينة المنورة تحديدا .. عملت فيها كل الحاجات اللي كان نفسي اعملها ف مصر ومكنتش باقدر. حاجات بسيطة من ضمنها علي سبيل المثال ترك مفاتيح سيارتي – متعمدا – والغياب داخل السوبر ماركت لقضاء بعض الحاجيات والعودة مرة أخري لأجد سيارتي مكانها ولا ينقصها شئ ! .. أكلت وشربت أفضل أنواع الأطعمة ولأول مرة من سنوات عديدة لقيت نفسي بانام .. وبعمق. نوم لا يعكر صفوه سوي اشتياقي لزوجتي وأولادي وأبويا وأمي. فبدأت بالفعل في عمل الإجراءات اللازمة تمهيدا لجلب الزوجة والأولاد للإقامة معايا بشكل شبه مؤقت.

 

وبعد عام من الوحدة, تدريجيا داء الملل اللعين يبدأ يتسرب لنفسي. وتساؤلات عديدة يبدأ عقلي في طرحها والتحايل بيها علي أعصابي وانا لوحدي في ظلام الغرفة: أنا جيت هنا ليه ؟ وبعد م السنة تخلص هاعمل إيه ؟ هل هينفع ارجع مصر تاني ؟ ولا استني شويه لحد م اعمل قرش كويس وبعد كده ابقي انزل بيه ؟ والقرش ده المفروض يكون ف حدود كام يعني ؟ طب ولو معايا القرش ده هأنزل اعمل بيه إيه ف مصر تحديدا ؟!

 

وتدريجيا أيضا أكتشف إن راحة البال اللي وجدتها ف الغربة مش مطلقة, بيعكرها "كل م افتكر إن حياتي هنا مؤقتة – ولما باكون عايز اشتري حاجه لازم افكر قبلها هينفع أخدها معايا بلدي ولا لأ. ولو مش هينفع اخدها هاعرف ابيعها ولا لأ" كما قالها أحد الزملاء هنا علي صفحات هذا المنتدي من قبل.

 

ناهيك عن المضايقات المستمــرة من الشركة الكفيلة, مضايقات كنت فاكر بحكم عملي كمهندس أو بحكم عملي ف شركة كبيرة إنها مش هتكون موجــودة. تأخير في صرف المرتبات .. تأخير في مواعيد أجازتك الســنوية .. تأخير في صرف أي بدلات أو مستحقات لك من الشـــركة .. تأخــير ثم تأخير ثم تأخير. مع إنها كلها بنود منصوص عليها ف عقد العمل المبرم بيني وبينهم, ولكن واضح إن العقليات في الخليج أبت ومنذ زمن أن تصنف بشئ غير بالرجعية واللا أخلاقية في التعامل مع مكفوليهم. لأجد نفســي ف النهاية مسحــوب علي وجهي كالأعمي في الغربة ومقيد بضوابط وبتشريعات كنت أحسبها لا تلزمني.

 

وعلي الرغم من أني كنت محسود من ناس كتير علي وضعي ده, فالمدينة المنورة لا تعتبر "غربة" من وجهة نظر الكثيرين وأنا باعترف بكده. أوقات كانت بتكفيني صلاة ف المسجد النبوي أو ركعتان في جوار قبر الرسول, كنت أعود بعدها صافي الذهن ومفعم بالنشاط. لكني كنت حزين, وبالليل ترجع شياطين الوحدة تنكد عليا عيشتي, وتفكرني بالمضايقات اللي ذكرتها سابقا من الشركة التي أعمل بها (ساعتها كان بقالنا 90 يوم بدون رواتب, وبعضنا إنتهت رخصة إقامته بالمملكة ومهدد بالترحيل في أي لحظة) .. ساعتها وجدت تفكيري بيتحول تدريجيا لإتجاه أخر.

[AbuZeyad]

حمد الله على السلامة اولا

لسة فاكر موضوعك القديم لما كنت ناوي على السفر وكنت محتار بين دار الرياض وسعودي ديار على ما اتذكر 

شكلك كدا جيت على شركة تالتة طالما فيها تاخير رواتب   عموما الموضوع دا آفة الشركات الهندسية في السعودية بس المفروض يتظبط قريب مع تفعيل نظام حماية الاجور

شوف كل اللى بتحكي عليه دا طبيعي في اول سنة غربة الاحساس بالضياع وعدم وجود هدف والملل وكل اللي بتحكي عليه دا كلنا مرينا بيه وخصوصا انك من غير اولادك

بس بصراحة اللى بيزود المشاعر دي هو تاخير الراتب طبعا لانك مسافر في الاساس علشان السبب دا!! فمش معقول انك تسافر وتتغرب وفي الاخر يتاخر راتبك .. شئ مزعج فعلا

أما عن وجودك المؤقت في السعودية فدا وضع طبيعي وانت اكيد عارف دا من الاول... ناس كتير ادركوا الحقيقة دي من ساعة وصولهم واتحركوا في اكتر من اتجاه

الاتجاة الاول: أنهم يجمعوا مبلغ من المال لتحقيق هدف معين في وطنهم الاصلي (شقة - مشروع - ...)

الاتجاة الثاني: هو جمع مبلغ من المال يساعدهم على الهجرة لبلد آخر ياخدوا جنسيته ويعيشوا هناك بصفة دايمه

الاتجاه التالت: هو الاتجاه العام بين المغتربين انهم عايشين حياتهم من غير خطة للمستقبل على امل اطالة مدة الغربة لطول وقت ممكن علشان لا يضطروا للتفكير فيما بعد الغربة

يا ترى تفكيرك اتحول لاي اتجاه؟ انا برجح الاتجاه التاني

[zemanova]

أبوزياد

 

أنا كمان لسه فاكر نصايحك الغالية اللي زودتني بيها ف موضوعي القديم

تخمينك ف محله فعلا - شركة تالتة. الحقيقة أنا كنت مصمم ع السفر, ولما كان العرض الخاص بسعودي ديار قليل نسبيا + عرض دار الرياض كان محدد العمل ف مناطق نائية شويه ف الشمال والجنوب لو تفتكر .. ساعتها قررت أصبر شويه لحد م جاتلي الفرصة الحالية ف المدينة المنورة.

 

أما عن وجودك المؤقت في السعودية فدا وضع طبيعي وانت اكيد عارف دا من الاول... ناس كتير ادركوا الحقيقة دي من ساعة وصولهم واتحركوا في اكتر من اتجاه

 

أنا فعلا كنت مسافر لغرض وحيد .. وهو الغرض اللي ذكرته حضرتك تحت مسمي "الإتجاه الأول" ..

بمعني كان عندي ديون وإلتزامات ومكنتش قادر اتخلص منها ف مصر وكنت شايف إن الحل الوحيد ف سنة ولا سنتين غربة أقدر بعدهم أرجع واعيش ف بلدي مستور.

"الإتجاه التاني" - حسب التقسيم اللي حضرتك قسمته لنوايا المغتربين - حاليا هو المسيطر علي تفكيري وكنت ناوي شرح ده باستفاضة ف باقي الموضوع (أحييك علي بعد نظرك).

تم تعديل 21 يونيو 2015 بواسطة zemanova

[zemanova]

المرحـلة الثالثة .. مش قاعد لكم فيها:

تفكيري بيتحول هنا من فكرة السفر لمجرد توفير مبلغ من المال - وقد كان - إلي فكرة البحث عن عيشة كريمة لي ولأولادي. وبصراحة كده مش شايف ده ممكن يحصل ف الخليج ولا ف أي دولة عربية. وف ظل نظام الكفالة وتعقيدات العمل ف الدول إياها, ورغبتي ف إن أولادي يحصلوا علي تعليم جيد ومستوي أخلاقي مضمون كعادة أي رب أسرة, وبعد إطلاعي علي منظومة التعليم هنا ف السعودية بالدرجة اللي جعلتني أقتنع إنه غير مناسب - أو علي الأقل مقارنة بالمدارس اللي كان فيها الأولاد ف مصر - كفاية لأن أقوم بنقل حياتهم هنا بشكل دائم علي الرغم من إن ده ساهم بشكل كبير في زيادة إحساسي بالوحدة والغربة.

 

ساعتها فكرت إن فكرة الإدخار ملهاش لازمة, وإن الوضع المؤقت اللي انا عايش فيه من ساعة تخرجي من الكلية من 11 سنة فاتت لابد ييجي وقت وينتهي. إمتي هتصبح الحياة ذات معني إذا كان كل عام بينقضي من عمر البني أدم في حاجه هو مستنيها تحصل, وبيخطط لها وهو عارف إن إمكانياته أقل من إنه يحصل عليها فورا فبيضطر يقضي عمره ف الإنتظار ؟

 

المهم ولكي لا أتهم بالإسهاب, حصرت إهتمامي ف عدة نقاط: مأكل ومشرب وملبس ومسكن وفرصة تعليم جيد ليوسف ومروان, مع محاولة الإستمتاع بالوقت المتبقي لي ف الحياة. الحاجات دي كلها وبعد طول بحث علي صفحات الشبكة العنكبوتية وجدتها متوفرة بره مصر وبره الوطن العربي كافة. فبدأت رحلة بحث مرهقة عن كيفية الوصول لبلد مثل كندا أو ألمانيا أو ما شابه للحصول علي هذه المتطلبات.

 

لحد هنا دوري ف السرد أعتقد إنه انتهي. وما كنت أطمع فيه إن حد من السادة الأعضاء الأكثر خبرة ينصحني إما بالتأييد أو بالتوبيخ مفيش مشكلة. يعني معنديش مانع إن حد يسمعني عبارات علي غرار "ياعم نام علي نعمتك وبوس إيدك وش وضهر .. غيرك مش لاقي النعمة اللي انت فيها" أو مثلا .. "إرجع بلدك أحسن وعيش فيها طالما انت مش محتاج للفلوس" أو .. "إنت إنسان مترف وغير مسئول وتحتاج لتقويم نفسي".

 

مع الأخذ ف الإعتبار إن المحرك الأساسي مش الحصول علي جنسية أو لجوء أو ما شابه + فكرة إن بلدي ووطني لها عظيم الأثر ف الفرد اللي أصبحته أو يمكن أكونه بعد سنين من دلوقتي دي راسخة في ذهني تماما .. فقط أنا أنتظر الوقت والمكان الملائمين لرد الجميل مع الإحتفاظ لنفسي بحق السعي وراء ظروف معيشية أفضل سواء في الداخل أو الخارج إن لم يكن بلدي قادرا علي ذلك.

 

لكم جزيل الشكر, وعذرا للإطالة.

تم تعديل 21 يونيو 2015 بواسطة zemanova

[egyptawy]

مع الأخذ ف الإعتبار إن المحرك الأساسي مش الحصول علي جنسية أو لجوء أو ما شابه + فكرة إن بلدي ووطني لها عظيم الأثر ف الفرد اللي أصبحته أو يمكن أكونه بعد سنين من دلوقتي دي راسخة في ذهني تماما .. فقط أنا أنتظر الوقت والمكان الملائمين لرد الجميل مع الإحتفاظ لنفسي بحق السعي وراء ظروف معيشية أفضل سواء في الداخل أو الخارج إن لم يكن بلدي قادرا علي ذلك.

 

معلش انا يمكن مش هاعرف اساعدك كتير لكن انا قريت الكلام ده مباشرة بعد ما قريت كلام تانى لكائن عجيب قاعد يشتم ويلعن فى البلد ويطالب الاخرين انهم يتنازلوا عن جنسيتهم لمجرد انه اتيحت ليه الفرصة يشتغل ويقيم فى بلد اخر ونسى فضل بلده عليه 

 

انت رجل اصيل

[zemanova]

الله يكرم أصلك

الموضوع بالنسبة لبعض الأشخاص عادي لأنه يمكن ملهوش جذور تربطه أوي بالمكان.

أنا طبعا معرفش الشخص اللي حضرتك بتتكلم عنه, بس انا متأكد إنه بره مصر بيتحمل إهانات ومعاناة كونه عربي أو مضطر يشتغل في وظيفة من الوظايف الدنيا براتب بخس أو ع الأقل عنصرية جار من جيرانه اللي ف السكن لمجرد إنه يفضل هناك وميرجعش. ده إذا مكانش بيغسل صحون أو بيبيع جرايد, وبيقنع نفسه إن ده أحسن من العيشة ف مصر وقادر يتحمل ده. أنا من النوع اللي م بيقدرش يتحمل النوع ده من الإهانات.

[AbuZeyad]

طيب ونويت تروح على فين؟ وليه؟

طالما انك بحثت كتير على النت يا ريت تفيدنا بنتيجة البحث اللى توصلت ليها

[zemanova]

الأخ الكريم .. أبو زياد

بعد بحث مطول عن فرص عمل وإقامة بالخارج وجدت إن فرصي هتكون - نظرا لمجال دراستي وعملي كمهندس - معقولة في بلد زي ألمانيا .. وبالفعل بدأت ف جمع كل المعلومات الممكنة عن كيفية دخول البلد ده بصورة شرعية. وعرفت إن ألمانيا كبلد بيشجع أساسا علي هجرة أصحاب الكفاءات والحرفيين المهرة وبعض الوظائف تحديدا في مجال الطب والهندسة وال IT

 

محاولتش أعرف تاني معلومات عن أي بلد تاني .. معرفش ليه. وإن كان تنامي إلي علمي إن بلاد أخري كأستراليا وكندا أو السويد يمكن بكثير من الجهد إنك تجد فيها فرصة برضه. بس الفكرة إن أنا مش عايز اسافر عشان مجرد فكرة السفر وخلاص, أو لمجرد الهروب من واقع العيش في المجتمع العربي. أنا برضه مش عايز اتبهدل ولا ابهدل أسرتي معايا, وفكرة إن انا أروح وبعدين ربنا يبقي يسهلها لما اوصل هناك أو اقعدلي فترة شغال ف جمع العنب (مع احترامي لكل اللي بيشتغلوا الشغلانة دي) لحد م الاقي شغل, الفكرة دي كانت ولا زالت مرفوضه بالنسبة لي تماما. وبالتالي لقيتني مركز البحث عن كيفية دخول ألمانيا لأنهم كحكومة لقيتهم موفرين عدة طرق وبدائل لدخول بلدهم بصورة أمنة وشرعية .. ملخص الطرق دي ممكن تلاقيه ف اللينك ده:

 

http://www.auswaertiges-amt.de/EN/EinreiseUndAufenthalt/Uebersicht_node.html

 

طبعا مش ده اللينك الوحيد اللي هتلاقيه بيتكلم عن كيفية دخول ألمانيا بصورة شرعية .. ف اسمح لي برضه أكتبلك ملخص الموجود بالصفحة واللي هتلاقيه برضه موجود ف مواقع حكومية تانية كتيرة لو حضرتك حبيت تدور. الملخص إن كيفية الدخول بتكون من خلال:

 

1- إما الحصول علي ما يسمي بال EU Blue Card

وده من متطلباته إنك يكون معاك job offer من شركة بيأمن لك علي الأقل عائد مادي سنوي 48400 يورو وفي حالة إشتغالك في مجال الطب أو الهندسة أو ال IT ممكن يسمحولك إن العائد يبقي في حدود 37752 يورو سنويا. وطبعا لازم يكون مؤهلك الدراسي يسمح لك بشغل الوظيفة المتقدم لها.

 

2- أو تأشيرة بحث عن عمل Job Seeker Visa

ألمانيا بتسمح لك لو انت معاك شهادة من جامعة ألمانية أو ما يعادلها إنك تدخل ألمانيا بصورة شرعية لمدة 6 شهــور تدور علي شغل. بشرط إنك تثبت وجود نفقات كافية للإنفاق منها علي نفسك في خلال هذه الفترة + إنك م تشتغلش أي شغل في خلال هذه الفترة. وف حالة حصولك علي عرض يمكن تحويل هذه التأشيرة إلي تأشيرة عمل والمكوث بصورة شرعية طالما إنك وجدت عرض وظيفي ينطبق عليه الشروط المذكورة ف بند رقم 1.

 

3- أو الدخول عن طريق تأشيرة سائح Schengen Visa

طبعا فيزا "شينجن" بتؤهلك إنك تدخل أي دولة من دول إتفاقية "شينجن" ولها عدة فئات A, B, C & D ولكن بغرض السياحة فقط. وغالبا مدتها بتبقي 3 شهور ممنوع انك تشتغل فيهم إطلاقا. ولو ثبت العكس بيتم ترحيلك فورا. لكن محدش بيمنعك إنك تبحث عن عمل. فقط يلزمك في حالة الحصول علي فرصة مناسبة إنك تخرج من ألمانيا بصورة طبيعية وترجع تاني علي تأشيرة عمل وبرضه لازم ينطبق عليها الشروط المذكورة ف بند رقم 1.

 

4- أو الدخول عن طريق تأشيرة طالب Student Visa

ملحوظة: الموضوع ده كان اتكلم عنه باستفاضة عضو تاني معانا هنا إسمه "شعبان متولي" - لينك الموضوع:

http://www.egyptiantalks.org/invb/index.php?showtopic=151870&hl=%D8%A3%D9%84%D9%85%D8%A7%D9%86%D9%8A%D8%A7

 

الخلاصة إنك ممكن تدخل ألمانيا كدارس أو كباحث وتبدأ بعد فترة الدراسة تدور علي فرصة عمل (القانون بيمنحك فرصة 18 شهر بعد التخرج للبحث عن وظيفة وممكن تشتغل فيهم براحتك بدون حدود)

أما في خلال فترة الدراسة فمن حقك قانونا برضه إنك تعمل في حدود 120 يوم/سنة بدوام كامل .. أو 240 يوم/سنة بدوام جزئي وذلك لتغطية جزء من مصاريفك ونفقاتك الشخصية.

شروط الحصول علي التأشيرة دي خطاب من الجامعة المفترض انك هتدرس فيها + 8000 يورو تقريبا تودعهم في حساب بنكي بألمانيا كغطاء نقدي لمصاريف دراستك ومعيشتك بألمانيا ..

 

بالمناسبة أنا بادور علي أي معلومات للإتصال بالأخ "شعبان متولي" .. رجاء لو حضرتك أو حد من الإخوة الأعضاء هنا يقدر يوصلني ليه لسؤاله عن بعض التفاصيل كونه قد خاض التجربة قبلا, وجزاكم الله كل خير.

 

بس يا سيدي .. إنت مش طلبت تفاصيل ؟ .. إنت اللي جبته لنفسك  hypr:

وقت م تحب تفاصيل تاني عرفني

تم تعديل 30 يونيو 2015 بواسطة zemanova

[AbuZeyad]

لو عندك تفاصيل تاني لا تبخل علينا بها

كل الكلام اللى قلته جميل بس دا كله بيصب في اطار العثور على فرصة عمل في المانيا والاقامة بها بصورة شرعية

هل هذا يؤدي بصورة ما للحصول على الجنسية وبالتالي الاقامة والعمل بشكل دائم؟

[herohero]

ربنا يوفقك  ،فكرتني بمشوار من زماااااااااان مشيت فيه . محدش بياخد اكثر من نصيبه 

بس اللي تبقى عارفه ان غربة الخليج غير غربة دول المهجر ،يعني في الخليج ممكن يكون هدفك تحقيق فلوس انما ف دول المهجر هيكون هدفك تحقيق حياة كريمة وراقية ومستقبل لأاولادك وحط تحت مستقبل اولادك مليون خط 

 

بصراحه العمل في دول المهجر بالمؤهل من اولها مش سهل والاولوية للحاصلين ع مؤهلات من هناك فبتضطر تعادل لكن في النهاية بتوصل ،بس لازم نفسيا تبقى مقتنع بالهدف عشان تتحمل ف مقابله التعب 

 

كل اللي اعرفهم بيقارنوا الراحه ف دول الخليج بوضعهم في الغرب لكن اللي بيصبرهم هو مستقبل اولادهم في ظل ان مجتماعتنا العربية مالهاش مستقبل مبشر كما نرى 

 

وموضوع الانتماء للوطن ، وطنك تقدر تخدمه في اي حته بل ارى كثيرين فادوا الوطن هم خارجه لان البديل انك تبقى عايش ف وطنك وانت قرفان فاقد الامل وبالتالي قدرتك ع العطاء للوطن قليلة 

[zemanova]

لو عندك تفاصيل تاني لا تبخل علينا بها

كل الكلام اللى قلته جميل بس دا كله بيصب في اطار العثور على فرصة عمل في المانيا والاقامة بها بصورة شرعية

هل هذا يؤدي بصورة ما للحصول على الجنسية وبالتالي الاقامة والعمل بشكل دائم؟

 

بص يا سيدي ... موضوع الحصول علي الجنسية وإن لم يكن في دائرة إهتماماتي للأسباب اللي هيرد ذكرها, إلا إنه عرفت عنه بعض المعلومات البسيطة:

 

1- لازم تكون ملم باللغة الألمانية حتي مستوي B2 علي الأقل. (ودي مش المشكلة الحقيقية بالنسبة لي. لأن موضوع تعلم اللغة شئ لا يمكن إنك تمارس حياتك بدونه في المجتمع الألماني حسب م عرفت, وبتعتمد عليه الأنشطة اليومية لك كمقيم. وهو ما كنت أنوي بالفعل )

2- القانون ف ألمانيا لا يسمح بازدواج الجنسية .. وبالتالي تجد نفسك أمام أزمة أخلاقية من العيار الثقيل, ملخصها إنك لازم تتنازل عن الجنسية المصرية في مقابل الحصول علي الألمانية.

3- مرور 8 سنوات من الإقامة الكاملة والعمل بشكل متواصل داخل الأراضي الألمانية (ســنوات الدراسة يمكن عدها ضمن هذه المدة) + ضمان مستوي مادي يتيح الإنفاق علي الأسرة. (في ناس بتقول إن في تعديل لقانون المدة وأصبحت 6 سنوات بدل 8)

4- ضمان خلو السجل الجنائي من أي جنح أو جرائم.

5- الإطلاع على الدستور الألماني. وبيتم إجراء مقابلات مع المتقدمين للحصول على الجنسية، تتضمن أسئلة عن الدستور، وتتضمن حلف اليمين على احترام الدستور الألماني .. لاحظ إنك بيكون عندك حق الإنتخاب بعد حصولك علي الجنسية ودي حاجة كبيرة جدا في ألمانيا لأنك بيها ببساطة بتحدد مصير البلد.

 

طبعا في ناس ناصحة بتحب تفتح موضوع الزواج من ألمانية كوسيلة للحصول علي الجنسية, وفي شركات هنا وهناك ومكاتب بتوفر هذا النوع من "الخدمات". لكن يجدر بي الإشارة هنا إلي إن الشرطة بتتابع هؤلاء بإستمرار (قصدي المغتربين المتزوجين من ألمانيات) لدرجة القيام بزيارات منزلية والتفتيش علي فرش الأسنان والملابس المتسخة لضمان إن الزواج قائم وليس الغرض منه الحصول علي الجنسية وبس .. ناهيك عن إن الموضوع بالكامل بيدخل تحت إطار الغش. غش للحكومة وغش لزوجتك وبيتك وغش لنفسك ف الأول وف الأخر.

تم تعديل 4 يوليو 2015 بواسطة zemanova

[zemanova]

herohero

محتاج ادردش معاك شويه ف بوست مطول عشان شكلك كده مجرب كذا نوع من الغربة   .. بس اسمح لي بعد الفطار عشان ريقي ناشف 

[zemanova]

إسمحلي ببعض الأسئلة لأن كلامك الحقيقة أثار فضولي:

 

ربنا يوفقك  ،فكرتني بمشوار من زماااااااااان مشيت فيه . محدش بياخد اكثر من نصيبه 

بس اللي تبقى عارفه ان غربة الخليج غير غربة دول المهجر ،يعني في الخليج ممكن يكون هدفك تحقيق فلوس انما ف دول المهجر هيكون هدفك تحقيق حياة كريمة وراقية ومستقبل لأاولادك وحط تحت مستقبل اولادك مليون خط 

 

مش فاهم معني المليون خط. أنا فعلا تفكيري اتجه للعيش ف الغرب لمحاولة ضمان مستقبل أفضل للأولاد .. سؤالي هو هل حضرتك شايف أو عارف إن ده ممكن يتحقق ببعض المجهود ولا إحتمالات الفشل أكبر من إحتمالات النجاح ؟

 

بصراحه العمل في دول المهجر بالمؤهل من اولها مش سهل والاولوية للحاصلين ع مؤهلات من هناك فبتضطر تعادل لكن في النهاية بتوصل ،بس لازم نفسيا تبقى مقتنع بالهدف عشان تتحمل ف مقابله التعب 

 

طب ماذا عن فكرة الحصول علي درجة الماجيستير من هناك مثلا, هل بتساعد وتعزز من فرصي ولا قصدك إن الموضوع مرهق بلا داعي. والأفضل إني كنت ابتديت قبل كده من قبل مرحلة البكالوريوس مثلا ؟ وهل فعلا "في النهاية بتوصل" ولا ممكن ارجع من هناك بعد سنتين مثلا من الإنفاق والتعب والوحدة ولامؤاخذه قفايا بيقمر عيش (مع تشديد الميم) ؟ 

 

كل اللي اعرفهم بيقارنوا الراحه ف دول الخليج بوضعهم في الغرب لكن اللي بيصبرهم هو مستقبل اولادهم في ظل ان مجتماعتنا العربية مالهاش مستقبل مبشر كما نرى 

 

برضه اتلخبطت. أنا كنت فاكر إن المعيشة ف دول المهجر مريحة أكثر لوجود نظام وديمقراطية واحترام للغير بصورة أكبر من دول الشرق والمجتمع العربي خاصة .. هل فعلا الراحة النفسية موجودة بصورة أكبر ف الخليج منها ف المجتمع الأوروبي !

 

وموضوع الانتماء للوطن ، وطنك تقدر تخدمه في اي حته بل ارى كثيرين فادوا الوطن هم خارجه لان البديل انك تبقى عايش ف وطنك وانت قرفان فاقد الامل وبالتالي قدرتك ع العطاء للوطن قليلة 

 

الموضوع ده أنا مش مختلف معاك فيه .. أنا طول عمري باعتقد إن الفرد لو أتيحت له الفرصة إنه يلمع أو يخدم بلده من الخارج أحسن 100 مرة من إنه يظل ناقم حاقد ف الوسط اللي هو عايش فيه داخل بلده. طبعا لا أزعم إني أمتلك هذه القدرة علي اللمعان ولكن من حقي إني أحاول.

[AbuZeyad]

عزيزي

اذا كنت رايح على المانيا ومش في راسك فكرة الجنسية هتلاقي نفسك في وضع قريب من الوضع في الخليج

عايش في بلد مش بلدك

عايش بصورة مؤقتة

عايش بتصريح للعمل

اكيد هناك حرية اكثر في الحركة وتغيير العمل لكن في النهاية انت مقيم بصورة مؤقته وأولادك اللى تاعب نفسك علشانهم مش هايستفيدوا من المانيا بشئ بمجرد نهاية عملك فيها ودا ممكن يحصل لاي سبب مثل تغيير القوانين أو حتى ظرف شخصى

وحتى الشروط اللى حكيت عليها للحصول على الجنسية صعبة شوية وخصوصا موضوع الاقامة 8 سنوات دا... مدة طويلة فعلاً

يعني هاتعيش المدة دي كلها في المانيا وانت مش ماسك حاجة في ايدك ولو اضطريت تقطع المدة هاتكون هاتكون ضيعت وقتك مش اكتر وخصوصا سنك 33 يعني لو ابتديت حياة في المانيا بكرة تكون 41 على ما تاخد الجنسية!

بالاضافة الى اللغة ... تعلم لغة واتقانها مش سهل

يمكن تكون محتاج تغير البوصلة الى دولة تانية تكون رايحها من الأساس بتأشيرة هجرة وتاخد جنسيتها في مدة أسرع زي كندا أو استراليا غير كدا مش هايكون عندك مشكلة اللغة لانك اكيد عندك خلفية عن الانجيلزية

تم تعديل 5 يوليو 2015 بواسطة AbuZeyad

[zemanova]

أبو زياد

تفاعلك مع الأفكار اللي أنا كتبتها بالطريقة دي هو ما كنت أرجوه منذ بداية كتابتي للموضوع ف الأساس. بمعني إني كنت محتاج فعلا الطريقة دي ف الحوار لأني ولحد دلوقتي مش عارف إذا ما كان تفكيري ف الإتجاه الصحيح أم الخطأ. ونصائحك دائما بيكون لها صدي جيد في نفسي بجانب نصائح باقي الأعضاء اللي كان نفسي يكون لهم مشاركات أكتر.

 

مقدرش اقولك كلامك غلط .. وإن كانت النبرة والطابع العام لمشاركتك الأخيرة جاء علي حساب الصورة الوردية اللي كنت أنا راسمها. بس فعلا عايش في بلد مش بلدي

عايش بصورة مؤقتة .. عايش بتصريح للعمل هي دي ملخص المرحلة اللي ممكن علي رأيك تستمر لمدة 8 سنين ويمكن تتغير القوانين خلالهم في غير الإتجاه اللي بيصب ف مصلحتي. بجانب إن فكــرة الحياة المؤقتة ف الأساس هو ما دفعني إلي كره المعيشة ف الخليج. كل حاجه بتعملها مرهونة بتوقيت إنتهاء الإقامة أو نهاية العقد وهو ما جعلني نفسيا غير مستقر وإن كنت ماديا في حال جيدة والحمدلله.

 

بصراحة عجبني كلامك وف نفس الوقت دماغي لفت زيادة .. لا سيما إني درست الملف الألماني بكثافة لدرجة إني بدأت ف مراسلة الجامعة اللي المفروض هابدأ معاهم دورة الماجيستير في برلين. وبدأت بالفعل ف القراءة عن برلين وحاجات تانية كتير تخص المجتمع الألماني.

 

موضوع تغيير البوصلة .. فوبيا عدم الإستقرار .. مستقبل أفضل للأولاد .. أنا في مرحلة عمرية لا تسمح لي بكثير من المناورات .. علامات الإستفهام بتتزايد داخل عقلي بصــورة أكبر عما كانت عليه.

أشكرك علي محاولتك إيضاح الأمور ولو عندك أفكــار تاني هات ما عندك

[AbuZeyad]

 

 

أنا في مرحلة عمرية لا تسمح لي بكثير من المناورات

 

كلمة في منتهى الحكمة وبصورة ادق انت في مرحلة عمرية تسمح لك بمناورات محدودة (واحدة او اتنين بالكتير)

علشان كدا وبناء على اولوياتك انت محتاج مكان يحقق لك الشروط دي

بلد يحترم الانسان وادميته

تعليم بمستوى عالي

اقامة دائمة او جنسية

فرصة عمل

 

من الاخر انت محتاج علشان تتحرك من مكانك الحالي في الخليج انك يكون معاك تأشيرة هجرة لأي دولة مثل كندا، أستراليا، نيوزيلندا

حتى لو قوانين الهجرة اتغيرت بعد ما تاخد التأشيرة فدا لن يضرك في شئ لانك معاك تأشيرة هجرة يعني موافقة فعلية على انك تكون مواطن في البلد دي بعد مدة من الزمن

ولو حبيت ممكن بعد كدا تروح ألمانيا بجواز سفرك الجديد

وزى ما قلت لك انت محتاج تغير البوصلة الى بلد تاني

[zemanova]

عزيزي أبو زياد

عملت بنصيحتك الأخيرة بعد اقتناع إن فكـــرة السفر لمجرد الإقامة بالخارج والعمل بدون الحصول علي مزايا البلد اللي أنا فيه كاملة هو مجرد تضييع للوقت. وإن ده هيدخلني ف مرحلة أخــري من العيش المؤقت مما لا يتناسب مع هدف الإستقرار النفسي اللي كنت أطمح إني أحققه.

 

أنا بدأت البحث بالفعل في موضوع كندا وأستراليا. وكخطوة مبدئية حجزت بالفعل لإمتحان ال IELTS يوم 1 أغسطس الجاي ان شاء الله. وتفاءلت بعد م تصفحت قائمة الوظائف المطلوبة ببلد كأستراليا علي موقع الهجــرة الرسمي الخاص بهم .. صحيح الموضوع محتاج لبعض الإختبارات والمعادلات وتقييم لكفاءتي المهنية من قبل هيئات حكومية هناك, ولكن أعتقد الموضوع يستاهل المحاولة.

 

في طبعا تفاصيل كتيرة تخص موضوع الهجــرة, أنا حاليا في مرحــلة جمع البيانات. لك جزيل شكري بالطبع علي نصائحك ومتابعتك, لكن إعمل ف حسابك لو قدرت اهاجر فعلا وحصلت لي مشاكل هناك هافضل ادعي عليك إنك كنت السبب  :old:

[AbuZeyad]

حماسك دا عظيم

طيب استعديت للاختبار؟ يعني ذاكرت او جمعت معلومات او اي حاجة؟

انا من مدة وانا عاوز ادخل الايلتس بس مش عارف السكة

وطبعا لا تبخل علينا بنتيجة بحثك عن كندا واستراليا 

يا ريت توافيني بالخاصة زى ردك عن المانيا

 

انا مش عاوزك تدعي عليا هناك اذا حصلت لك مشاكل لاني حاولت انصحك بما ظننت انه صحيح

بس افتكرني بدعوة في المدينة وانت بتصلي التراويح

[herohero]

حماسك دا عظيم

طيب استعديت للاختبار؟ يعني ذاكرت او جمعت معلومات او اي حاجة؟

انا من مدة وانا عاوز ادخل الايلتس بس مش عارف السكة

وطبعا لا تبخل علينا بنتيجة بحثك عن كندا واستراليا 

يا ريت توافيني بالخاصة زى ردك عن المانيا

 

انا مش عاوزك تدعي عليا هناك اذا حصلت لك مشاكل لاني حاولت انصحك بما ظننت انه صحيح

بس افتكرني بدعوة في المدينة وانت بتصلي التراويح

الاستعداد للايلتس مفيش اسهل منه الان هناك مصادر للكتب كثيرة ، انا كنت مشروع مهاجر لكندا ومعرفتي بالمنتدى كانت لهذا السبب وصديقي حاليا ف كندا 

وهي تجربة جديرة بالتعب وشكلي هفكر فيها تاني بس لاستراليا رغم ان السن حاليا 34 له ظروف مختلفه عن ماكنت 27 سنة لسه

[herohero]

herohero

محتاج ادردش معاك شويه ف بوست مطول عشان شكلك كده مجرب كذا نوع من الغربة   .. بس اسمح لي بعد الفطار عشان ريقي ناشف 

انا بالنسبة لي الغربة كانت الاقامة في مصر انا اتولدت خارج مصر ف بلد خليجي (الكويت ) وبصراحه كان له فضل كبير ف ان من بدري اشوف حاجات كتير وجنسيات مختلفة 

ولكن لما رجعت لمصر اندمجت مع المجتمع اللي كان غريب عليا ويمكن اكون حبيته واستمر هذا الحب لمده 6 سنوات رافضا اي محاولة للسفر او مجرد التفكير فيها لكن مع الوقت بدات اتعب من السلبيات ومش قادر اكبر دماغي واتكيف معاها لدرجه ان اجلت موضوع الارتباط (الزواج ) حتى احدد هستقر فين 

وفعلا سافرت السعودية عشان الهجرة منها الى كندا اسهل كما نصح الكثيرين ،وفعلا بدات المشوار ف 2006 وكانت المعلومات قليلة وكنت بدور ع النت وبتعب ووصلت للايلتس وخدت كورسات ف المركز الثقافي البريطاني وخدت شهاداتCERTIFICATIONS ف مجال عملي هندسة الاتصالات وسافرت السعودية ومشيت انا وصديق ليا ف دبي ف مشوار الهجرة والامور كانت ماشية ع مايرام لكن لظروف شخصية للاسف لم استطع تكملة المشوار ،درجه الايلتس ممكن تجيبها بشوية مجهود وزميلي سافر ف 2010 ومستقر هناك وخلف ابنه الثاني هناك 

 

وكان معاه قرشين وله صحابه هناك وفتحوا شركة متواضعه لخدمات الانترنت والدعم الفني والامور بدات تمشي 

موضوع انك تشتغل بشهادتك مش سهلة زميلي كان مدير مشاريع ف Honeywell ف دبي ولم يتمكن من العمل ف كندا لكن ع كلامه موضوع دراسة الماجيستير او الحصول ع اي شهاده من هناك بيساعد ف الشغل 

 

والمنتدى هنا في كثيرين كانوا بادئين معايا مشوار الهجرة وكثير منهم وفق واستقر هناك ، باختصار شديد تجربة تستحق التعب والمجهود وفي الغالب بتنجح 

 

ما ذكرته في ان السفر والاغتراب خارج مصر له نوعين : سفر الخليج ( دخل سريع ولكن مش مستمر ومافيش اضافة معنوية للشخص وطبعا مفيش مستقبل للاطفال )

                                                                  سفر الغرب "الهجرة" ( تعب ومجهود في الاول ودخل قليل بيزيد مع الوقت مع العديد من المميزات المعنوية من تعامل أرقى من حريات من تطور وظيفي من مستوى تعليم للاطفال من امكانية عمل مشروع خاص مستقبلا )

 

وبالتالي لكل نوع من النوعين شخصيات مختلفة عشان كده سفر الخليج غير سفر الكفاءات للغرب ، لو عاوز فلوس بسرعة الخليج اما لو بتبص ع المدى البعيد ومستقبل للاطفال ( الهجرة )