يحدث فى الإسكندرية : مائدة جينيس .. والزبالة

[أبو محمد]

كل الإحترام لرأيك ووجهة نظرك ...

أما أنا فبكل أسف، لا أرى ماتراة ... وعندما أضع الـــ 3 نماذج (الإيطالي + التركي + المصري ) على طاولة التشريح، واتعاطى معهم بكل تجرد، وبعيداً عن أى أهداف أو عواطف من أى نوع، فبكل أسف، أخرج بنتيجة تتمثل في عبارة: كان من الأفضل أن لا تتورط مصر خاصة في ظل تلك الظروف العالمية الراهنة، في مثل هكذا فعاليات عالمية ...

آسف يا عزيزي أنا لا يُمكن بالمرة أن أحصر الهدف الحقيقي من وراء مثل هذا الحدث في مجرد رقم يُسجل في موسوعة لبرهة من الزمن !!!

 

 

وماله .. رأيك أيضا له احترامه حتى لو بقينا مختلفين

أنا بقى رأيى إن الحدث حقق أهداف أخرى إيجابية إلى جانب السلبيات

وإلى جانب الهدف الرئيسى وهو دخول الريكورد وبقاء اسم اسكندرية فيه لمدة أعتقد ستكون طويلة

اولا : تم عمل المائدة يوم جمعة ودخلت الريكورد لمدينه كثر فيها شغب الأخوانجيه و البلطجيه كل يوم جمعه

ثانيا : كل من سيفتح الركورد (الأكثر رواجا فى العالم) سيرى اسم اسكندرية ويتشوق لزيارة المدينة

اللى فيها إرهاب وفى نفس الوقت 30 ألف بيفطروا على مائدة فى الشارع

ثالثا : على طول امتدادها البالغ 4 كيلو وتلت (الذى من الصعب السيطرة عليه أمنيا) .. مرت الأمور بسلام .. أكرر أمنيا

رابعا : من الغريب استبعاد تدخل البلطجيه سواء متطوعين او مأجورين لضرب الكرسى فى الكلوب

خامسا : مع تأكدى من تواجد قوات خاصة من الجيش والشرطة فلم يشعر أحد بوجودهم ولم يتم القبض على بنى آدم واحد

:)

سادسا : لو فيه حد بيفطر فى بوفيه مفتوح فى فندق 5 نجوم ياريت يوصف لنا المنظر ساعة المدفع

 

[White heart]

 

 

 

 

على سبيل المثال ... هل تعتقد ان صورة مثل تلك، تساهم بالفعل في تحقيق هدف من الأهداف الحقيقية الموضوعة (غير تلك المتعلقة بمجرد تسجيل رقم في موسوعة لبرهة من الزمن) وليكن ما تفضلت وأشرت اليه في مداخلتك الأولى بموضوع حوارنا:

 

ربما يكون لهذا العمل مردود إيجابى على محاولات تنشيط السياحة

 

تم تعديل 27 يونيو 2015 بواسطة White heart

[أبو محمد]

 

 

مش القمامة لوحدها ثروة قومية استاذي الفاضل

 

اللي بيرمي القمامة  وبينبش في اماكن وضعها في الشارع لازم ولا بد منه يعامل كـVIP وليس كمواطن عادي...

 

من رأيي دا زبون سقع ويدر الملايين لخزانة الدولة إذا تم تشديد العقوبات المادية عليه ..  

 

إلى أن ينقرض من تلقاء نفسه على المدى القصير ...

 

 

 

 

حضراتكم طبعا ملاحظين إنى باتكلم عن المائدة ومشكلة القمامة فى موضوع واحد

ده بس قطعا للطريق على "أبطال" التهوين والتقليل من شأن أى شئ إيجابى

وفى الكواليس تم تفادى كارثة (سلبى أهو)

:)

سأحكى عنها بعد قليل

 

 

لن تنسينا الزفة والضجة متابعة الفشل المزمن فى تنظيف المدينة

فاكر يا أستاذ "الترجمان" لما كانت مشكلة الزبالة حتخلص فى 100 يوم مع 4 مشاكل تانية ؟

:)

ما زال رأيى هو العودة إلى أيام الحل والحال عندما لم تكن عندنا مشكلة قمامة

الحل هو جمع القمامة من المنازل والمحلات

ثم استغلال ثروتنا القومية .. والقضاء على الزبالين

ملحوظة :: قلت قبل ذلك إن "الزبال" هو اللى بيرمى زبالته فى الشارع

واللى بيشيلها إسمه عامل "النظافة"

[White heart]

ثانيا : كل من سيفتح الركورد (الأكثر رواجا فى العالم) سيرى اسم اسكندرية ويتشوق لزيارة المدينة

اللى فيها إرهاب وفى نفس الوقت 30 ألف بيفطروا على مائدة فى الشارع

 

 

الاكثر رواجاً في العالم ....

أذن سوف يتحتم على هذا " المسكين " الذي سيقوم بعملية البحث في هذا الموقع " الأكثر رواجاً في العالم " ان يجتهد ويخصص من الوقت ما يلزم حتى يعثر على هذا الإنتصار بعينه من ضمن الـــ 2468 إنتصار مشابه على مستوى العالم  حتى اليوم!!!

 

تم تعديل 27 يونيو 2015 بواسطة White heart

[أبو محمد]

 

على سبيل المثال ... هل تعتقد ان صورة مثل تلك، تساهم بالفعل في تحقيق هدف من الأهداف الحقيقية الموضوعة (غير تلك المتعلقة بمجرد تسجيل رقم في موسوعة لبرهة من الزمن) وليكن ما تفضلت وأشرت اليه في مداخلتك الأولى بموضوع حوارنا:

 

 

بتحصل يا وايت فى أحسن العائلات .. قصدى فى أحسن البلاد

إشمعنى لما تحصل عندنا تبقى دليل على الفشل فى تحقيق هدف تحقق بالفعل

 

إتفرج .. من غير ما يكون فيه ترابيزات فطار فى رمضان

 

 

 

ودى بقى زحمة يا دنيا زحمة ومع ذلك فيها أوتوبيسات TOURISTS

:)

 

[أبو محمد]

الاكثر رواجاً في العالم ....

أذن سوف يتحتم على هذا " المسكين " الذي سيقوم بعملية البحث في هذا الموقع " الأكثر رواجاً في العالم " ان يجتهد ويخصص من الوقت ما يلزم حتى يعثر على هذا الإنتصار بعينه من ضمن الـــ 2468 إنتصار مشابه على مستوى العالم  حتى اليوم!!!

 

 

ليه التسرع ده يا وايت ؟

واضح انك كتبت Longest food table فى البحث بتاعك

ياريت تقرا الصفحات اللى طلعتلك وتجيب لنا كام طاولة اكل

:)

بعد استثناء أطول مفرش واطول طاولة هوكى واطول رحلة بوقود بديل و ............. إلخ

:)

مش كل أطول يا وايت يبقى تربيزة أكل

خد بالك من مقالب محركات البحث

وانت اللى قولت .. مش مهم الرقم 2468

المهم الرقم بتاع إيه

[أبو محمد]

نتقابل بعد الفطار .. بالليل .. إذا كنت حتبقى فاضى

[White heart]

 

لأ خدها منى أنا .. وأنا نوهت عن كارثة أمكن تفاديها امبارح الصبح

 

المائدة كانت من جليم لكوبرى ستانلى فقط

الجزء من أمام فندق المحروسة - بتاع البحرية - إلى جليم تولت مسؤوليته القوات المسلحة

...

تخيل يا وايت لو كان ده حصل .. من جليم للكوبرى .. والجلوس طبقا لكشوفات

 

وأنا يا عزيزي لم انكر مشاركة القوات المسلحة في هذا الحدث .. وانما تسائلت عن سبب "مبادرتك" بوضعك لهم وبمثل هذا الصيغة ( التى لم أستريح اليها) في التعليق المقتبس؟

القوات المسلحة تشارك .. نزلت بثقلها

:)

يسقط يسقط حكم العسكر

 

وهل يا ترى إشارتك لهم ... ومن قبلك محافظ الاسكندرية بنفسه هنا وهناك باللغة المحلية، وبلغة " بتوع بلاد برة:

 

  ( Alexandria Governor Hany el-Meseery said that about 7,500 meals, provided with the help of the Egyptian army, naval and police forces will be donated.)

 

لا يندرج بالمرة تحت بند " الدعاية السياسية " ؟

تم تعديل 27 يونيو 2015 بواسطة White heart

[White heart]

 

بتحصل يا وايت فى أحسن العائلات .. قصدى فى أحسن البلاد

إشمعنى لما تحصل عندنا تبقى دليل على الفشل فى تحقيق هدف تحقق بالفعل

 

 

يا عزيزي انا لم أقصد الزحام !

مدينة الأسكندرية مدينة ساحلية بالدرجة الاولى ... فهل رأيت يا ترى في صورتك كيف هو حال الشاطئ ؟!

هل هذه صورة تشجع على :

 

ربما يكون لهذا العمل مردود إيجابى على محاولات تنشيط السياحة

 

هذا هو ما عنيته ...

تم تعديل 27 يونيو 2015 بواسطة White heart

[White heart]

 

ليه التسرع ده يا وايت ؟

واضح انك كتبت Longest food table فى البحث بتاعك

ياريت تقرا الصفحات اللى طلعتلك وتجيب لنا كام طاولة اكل

:)

بعد استثناء أطول مفرش واطول طاولة هوكى واطول رحلة بوقود بديل و ............. إلخ

:)

مش كل أطول يا وايت يبقى تربيزة أكل

خد بالك من مقالب محركات البحث

وانت اللى قولت .. مش مهم الرقم 2468

المهم الرقم بتاع إيه

 

ياعزيزي صدقني لاحظت ما تفضلت واشرت اليه .. ولهذا السبب تحديداً نعت من سوف يقوم بعملية البحث تلك بالـــ " مسكين " ... لأنه واذا كان السؤال (الكلمة المفتاح) قد تم تحديده بكلمات بسيطة وواضحة Longest food table في محرك البحث الخاص بالموقع " الأكثر رواجاً في العالم "  نفسه - على حد تعبيرك - قد خرج بتلك النتيجة، اذن من وجهة نظرك ما هى يا ترى " الكلمة المفتاح " التى يجب وضعها في محرك البحث ( وبدون تسرع ) حتى يحصل الباحث ( المهتم بهذا النوع تحديداً من الفعاليات ) على نتيجة أكثر حصراً، ودقة وتفصيلاً ؟

 

[White heart]

إشمعنى لما تحصل عندنا تبقى دليل على الفشل فى تحقيق هدف تحقق بالفعل

مهلاً يا عزيزي ... أى هدف هذا الذي تحقق بالفعل؟ أنت الأن الذي يتسرع في إعلان النتائج!

الهدف الذي أختلف معك حوله  ليس مجرد رقم في موسوعة، بل هو من نوع تلك الأهداف الذي أشار اليه السيد محافظ الأسكندرية بنفسه، وأنت أيضاً في أول مداخلة إفتتاحية بالموضوع:

 

"The goal of this table is to restore the honorable tourist side of Alexandria"

 Alexandria Governor Hany el-Meseery said.

 

تم تعديل 27 يونيو 2015 بواسطة White heart

[باهى الطائر الحزين]

 

عن صفحة د محمد البرادعي

 

إسمحولي أتكلم عن ال حصل النهارده في تنظيم أطول مائده طعام في العالم، دي كانت أول مره أنزل وأتعامل مع حدث كبير في الشارع ...... والسؤال إل بيطرح نفسه هو في إية وإية إل بيحصل في البلد و الناس بتعمل كده ليه !!!! أنا دلوقتي تأكدت إن في ناس مش عايزه البلد دي تقوم ولا تظهر بأي مظهر حضارى في أي حاجه وده كان واضح جدا النهاردة لأن فيى ناس بجد كانت عايزه تخرب الايفينت بأي طريقة !!!!!! وكل ده كان باين بالنسبة لي من خلال تجربتي النهارده في المشاركة في هذا الحدث لأني كنت محكم من ضمن ٣ محكمين.

مجموعة شباب زي الورد في سنه ثانيه كليه هندسه (18 - 20 سنه) ، جاتلهم فكره من سنه تقريبا إن هما يعملوا حاجه لبلدهم ويدخلوا موسوعة "غينيس" للأرقام القياسية بأطول ترابيزه في العالم بحيث تتخطي أطول ترابيزه مسجلة قبل كدة في إيطاليا ٢٠٠٠ متر تقريبا،، ومن هنا بدأ المشوار بأن هما قرروا يعملوها ٣٠٠٠ متر و يكون الحضور بالدعوات: (يعني مش مائدة رحمان).

لما الموضوع بدأ يدخل في الجد المحافظة ورجال الأعمال وعدد من مطاعم إسكندرية قرروا يشاركوا، وقالوا نخليها ٦٠٠٠ متر والدعوة عامه، المناطق اتقسمت والمحافظه والجيش والشرطه كان كله بيساعد وعلي إتصال بالتلفونات مع الشباب أنا شاهد علي كده.

التحكيم كان المفروض يبداء الساعه ١ الظهر ولكن بدأ الساعه ٣:١٥ العصر، علشان اللجنة تتأكد من إن الترابيزات كلها موجوده.

واحنا بنحكم نلاقي فجأه ترابيزات اتشالت من مكانها !!! نسأل ياجماعه مين عمل كده علشان بالطريقة دي كده مش ها نعرف نكمل، يقوم الشباب يقعد يجمع في الترابيزاه بسرعه علشان نعرف نكمل، للأسف تلاقى ناس قاعده ومش عايزه تتحرك ولا عايزه حد ياخد الترابيزه بتاعتهم ولا كإنهم جايبنها من بيتهم !!!! 

احنا شغالين متواصل، المشكله زادت لما قرب وقت الفطار والمطاعم اتأخرت ومطاعم استهبلت والنَّاس بدأت تتجنن، نعدي جنبهم يشتمونا ويحسبنوا علينا، وناس تعمل علامات عدم رضا ، وانا اقولهم ياجماعه عيب كده بتعملوا كده ليه، يقولوا مافيش اكل !!اقولهم احنا مالناش ذنب يقولوا برضوا انتو السبب!! شويه وبدأت عربيّات المطاعم توصل، طبعا كل مطعم ماسك منطقه ، وفجأة تلاقى الناس بتهجم علي العربيات وتضرب إلا فى العربيه وكأن الناس دي مش بتشوف الأكل في بيوتها، يقوم الشرطه تبعد العربيه وتخليه تبعد علشان تقلل من التدافع.

المهم وصلنا لحد santos ولقينا ترابيزات كتير اختفت ومش قادرين نكمل والشباب تعب واحنا تعبنا والنَّاس بتتخانق فا قولنا نوقف علي كده وقررنا اننا نسجل الأرقام (٤٣٠٤ متر ) والاعداد و طلعنا علي الفندق نكتب التقرير. 

نيجي بقه للمؤتمر الصحفي ، انا لقيت الصحفيين مستنين يهجموا علي المحافظ وعايزين يتخانقوا وخلاص ، لكن هوا طلع ذكى جدا في التعامل مع الموقف.

ياجماعه الهدف من الموضوع كله اننا ندخل World Guinness Record، والهدف الحمدالله اتحقق و في مشاكل حصلت وده طبيعي لأننا أول مره نعمل حاجه زي دي وما فيش خبره في الموضوع، والمُحكِمه من غينيس قالت كده وقالت متوقع يحصل مشاكل وكانت متفهمه الوضع لأن دة طبيعي

ياريت الناس تشوف الايجابيات في الموضوع وكفايه نظرات سلبيه وانت مش عارف حاجه عن تعب سنه في التحضيرات للموضوع ده. وياريت تقولي انت عملت ايه لبلدك أو حتي فكرت تعمل ايه... العالم اعترف اننا نجحنا النهارده وانت شايف اننا فشلنا علشان الأكل أتأخر !!!

 

دي مشكلة شعب محتاج يتعلم ازاي يحب الوطن

 

د. محمد الشايب

[White heart]

... مجموعة شباب زي الورد في سنه ثانيه كليه هندسه (18 - 20 سنه) ، جاتلهم فكره من سنه تقريبا إن هما يعملوا حاجه لبلدهم ويدخلوا موسوعة "غينيس" للأرقام القياسية بأطول ترابيزه في العالم بحيث تتخطي أطول ترابيزه مسجلة قبل كدة في إيطاليا ٢٠٠٠ متر تقريبا

.... ياجماعه الهدف من الموضوع كله اننا ندخل World Guinness Record، والهدف الحمدالله اتحقق

يا سلام ... بس كدة ؟!؟

بينما هدف " الطلاينة " ( الطرف المُقارن به والمطلوب المُزايدة والإنتصار عليه ) كان:

 

We wanted to organise a really special lunch, and we’ll give all the money we raised to the local hospital Madonna dell’Uliveto,’ said organiser Laurenti Marastoni

 

يا ترى فيه فرق ؟

[White heart]

 

... أنا دلوقتي تأكدت إن في ناس مش عايزه البلد دي تقوم ولا تظهر بأي مظهر حضارى في أي حاجه وده كان واضح جدا النهاردة لأن فيى ناس بجد كانت عايزه تخرب الايفينت بأي طريقة !!!!!!

 

بصراحة وببساطة، وبلا أى تزويق أو تنميق، أو إساقة التبريرات والدفوعات،  يا ترى " الغالبية " (وليس القلة المندسة) من  الناس  اللي بيتكلم عنهم الـــ د. محمد الشايب دول، كانوا قد عقدوا العزم على الذهاب أمس وهم في قرارة أنفسهم مُدركين أنهم ذاهبون الى ايفينت أم الى شئ آخر ؟!؟!؟

تم تعديل 27 يونيو 2015 بواسطة White heart

[أبو محمد]

المشاكل حصلت فى المناطق اللى كان مسؤول عنها مطعمين

حسنى وابو شقرة

عربياتهم اتأخرت .. وأول ما شافوا الناس جايين رموا الوجبات السواقين هربوا بعربياتهم

[أبو محمد]

يا سلام ... بس كدة ؟!؟

 

... مجموعة شباب زي الورد في سنه ثانيه كليه هندسه (18 - 20 سنه) ، جاتلهم فكره من سنه تقريبا إن هما يعملوا حاجه لبلدهم ويدخلوا موسوعة "غينيس" للأرقام القياسية بأطول ترابيزه في العالم بحيث تتخطي أطول ترابيزه مسجلة قبل كدة في إيطاليا ٢٠٠٠ متر تقريبا

.... ياجماعه الهدف من الموضوع كله اننا ندخل World Guinness Record، والهدف الحمدالله اتحقق

بينما هدف " الطلاينة " ( الطرف المُقارن به والمطلوب المُزايدة والإنتصار عليه ) كان:

 

We wanted to organise a really special lunch, and we’ll give all the money we raised to the local hospital Madonna dell’Uliveto,’ said organiser Laurenti Marastoni

 

 

يا ترى فيه فرق ؟

 

طبعا فيه فرق

لما نيجى نقارن نقارن بين تفاح وتفاح أو برتقال وبرتقال

ما ينفعش نقارن تفاح ببرتقال

إحنا السياحة بتعاتنا مضروبة بالنار وبنحاول نفوقها

بلدنا سمعتها إن الناس بتتقتل فى الشوارع والبنات بتغتصب (طبعا مفهوم مين مروج الإشاعات)

أعتقد نبقى هبل لما نفكر نقدم Quality meal ونبيعها وبتمنها ندعم مؤسسة أيتام مثلا

واضح إن فيه نايس طايرة بأحلامها فى سابع سما .. ومش عارفة إيه اللى بيحصل على الأرض

وواضح إن كل واحد ناظر للحدث ده من وجهة نظر مختلفة

والبعض مصمم إن كل الناس تنظر من نفس النقطة اللى هو بينظر منها وممنوع عليها أى وجهة نظر أخرى

ناس كانت متوقعة وجبة 5 نجوم يتلم تمنها من اللى بياكل ونتبرع بالحصيلة

وناس لها وجهة نظر تانية خالص

على العموم سأستعمل حقى - كالآخرين - ولن أتنازل عن وجهة نظرى

الهدف تحقق

والأولاد الباشمهندسين الصغيرين قاموا بعمل ممتاز يستحقون عليه التهنئة والتشجيع

وإن كان هناك نقد فليتم توجيهه لمن لم يكن عندهم من الخبرة ما يقدموه لهؤلاء الشباب

المرة الجاية أحسن إن شاء الله

[White heart]

 

المشاكل حصلت فى المناطق اللى كان مسؤول عنها مطعمين

حسنى وابو شقرة

عربياتهم اتأخرت .. وأول ما شافوا الناس جايين رموا الوجبات السواقين هربوا بعربياتهم

 

 

المعلومات دي مؤكدة؟

يعني المشهد دة يتبع مثلاً مطعم " حسني " 

والمشهد دة يتبع مطعم " ابو شقرة " :

https://www.youtube.com/watch?v=tdumDJ_jvzE

[أبو محمد]

المعلومات دي مؤكدة؟

يعني المشهد دة يتبع مثلاً مطعم " حسني " 

والمشهد دة يتبع مطعم " ابو شقرة " :

https://www.youtube.com/watch?v=tdumDJ_jvzE

 

جايز .. وما تفرقش

يبدو أنك لم تقرأ مداخلاتى السابقة عن تأخر السيارات وهجوم الناس وهروب السائقين

وعن الأزمة التى سببها قائدو السيارات هواة الفرجة

[White heart]

 

طبعا فيه فرق

لما نيجى نقارن نقارن بين تفاح وتفاح أو برتقال وبرتقال

ما ينفعش نقارن تفاح ببرتقال

وهو مين حضرتك أساساً اللي بادر بعقد المقارنات وأشار الى النموذجين الإيطالي والتركي وعمل على الإنتصار عليهما ؟!؟!؟

والمُدهش انه حتى مع كل هذا الدعم المختلف والمُقدم من العديد من الأجهزة الرسمية للبلاد (دعاية سياسية ) وبعض القطاعات الخاصة ( دعاية تجارية ) ... خرجت النتيجة بهذا " المستوى "  ... والذي ترى من خلاله أن:

 

الهدف تحقق

 

 

[White heart]

واضح إن فيه نايس طايرة بأحلامها فى سابع سما .. ومش عارفة إيه اللى بيحصل على الأرض

وواضح إن كل واحد ناظر للحدث ده من وجهة نظر مختلفة

والبعض مصمم إن كل اناس تنظر من نفس النقطة اللى هو بينظر منها وممنوع عليها أى وجهة نظر أخرى

 

:)

ماهو انا حضرتك من " الناس " اللي بأحاول منذ البداية التعرف على كيفية تحقق هذا الهدف المعلن ( تنشيط السياحة ) في ظل وجود ومُصاحبة تلك العناصر المناقضة / الناسفة لذات الهدف نفسه ... اللهم الا أذا كان المطلوب كهدف هو فقط وفقط وفقط مجرد رقم طول ترابيزة في موسوعة لبرهة من الزمن طالت او قصرت ... وهو ما لا يستقيم ومع الهدف المعلن بكل وضوح على لسان المحافظ نفسه !!!