يا رب

[عبير يونس]

متخافش اوعاك من بكرة 
و لا تباتش حامل هم
ده بكرة لسه فكرة
فرفش و ابسطها يا عم
ان كنت خايف م الذكرى 
تتكرر...مش صح بقى على فكرة
تتكدر... وانت ولا عندك فكرة
ازاي بيهون الهم
و نهدى و يروق الدم
خدها وصفة معتبرة
ابعد عن عقل أصم
مفرقش امبارح من بكرة
الاتنين عالم من وهم
حقيقتنا ساكنة اللحظة 
ساكتة كده وملاحظة 
ازاي ماليك الغم
و معشش ... جوة القلب
متخشش... فوضى الطب
تتهري أدوية و دكاترة
و يزيدوا ضغط الدم
ده بيفهم و ده على قده 
حاطط ايده على خده
في عيادته قاعد بينش
و الدوا مستني يقُش
ربنا يكفينا الشر 
و زن الناس و القر
صفي النية في القلب 
و اخلصها لرب كريم
تلقاه وياك على طول
و لقلبك أصفى نديم
بحمده نسبح و نقول
ده ربك فتاح و عليم