كلمة للريس ... وربنا يستر

[ابو صلاح]

كلمة للريس لو كان بيخش على هذا المنتدى ..... او حد بيوصلو الكلام اللى بيتقال على النت ( ودة اكيد بيحصل )

انا شاب ماليش فى السياسة يا ريس ... ولا عمرى فكرت فى الانقلاب ...حتى مجرد تفكير .... ولا عمرى امنت ان الحكم هيجى بالسلاح فى يوم من الأيام ..... او يجى بالخديعة والمكر

بس هقولك كلمة حازة فى نفسى وعايز اقولها ....... لو انت بجد مش هتقدر تتضيف جديد او تحسن المستقبل ... سيب الكرسى لحد تانى ممكن يضيف جديد او على الأقل يغير شئ من السلبيات اللى الناس كلها حاسة بيها ( والشخص دة انت ببساطة ممكن تلاقية ... لو انت عايز )

انا مؤمن جدا ان كل واحد لية ايجابيات وسلبيات

الايجابيات بتاعتك لحد دلوقتى : ممكن الناس تفتكرهالك والتاريخ يشهدلك بيها

السلبيات : ممكن تتلحق من دلوقتى والشخص الجديد والفكر الجديد اى كان نوع هذا الفكر ان يعوض ما فات

لكن البلد لو غرقت على أيديك ..... الناس عمرها ما هتنسالك دة .... ولا كتب التاريخ هيغفرلك اوهيفتكرك ... ولو افتكرك هيفتكرك بكل سوء

دة غير يوم الحساب يوم القيامة .... ودة ما يعرفوش غير اللة

بجد يا ريس احنا مش حمل سلبيات اكتر من كدة ... والفترة اللى جاية دى لو ما وقفناش على رجلينا .. اكيد هتتقطع ومش هيبقلنا قومة تانى

واخيرا

ربنا يقويك : لو كان نيتك فيها خير لينا

وربنا يبعدنا عنك : لو كان الخراب هيجى على ايدك

تم تعديل 23 سبتمبر 2005 بواسطة ma.salah

[mAs]

Aameeennnnnnnn

[se_ Elsyed]

كلمتك وصلت لقائد العبور .. وشكراً على النصيحة يا إبني :unsure:

يابا الحاج صالح هو لو كان بيسمع النصيحة ولا بيفكر في حاجة إسمها إيجابيات وسلبيات وثاني أكسيد الكربون . كان رشح نفسه لتفرة رئاسة خامسة وعاشرة عشان يقعد في نفس المكان اللي حقق فيه فشل منقطع النظير ثلاثين سنة ..

يا عم صلي عالنبي

دول عالم بتوع كراسي وسُلطة .. ومش فاضيين للكلام ده .

[achnaton]

والله يا ابو عمر .. الراجل ده أغلب من الغلب نفسه .. أضاع اكثر من فرصه للحصول على كرسى بانوار فى موسوعة التاريخ .. بفضل مستشارين الشر الذين أحاطوا به من اول يوم .. كان له أخ عايش هنا - الله يرحمه وكان يحكى عن اخلاق حسنى مبارك وكيف حرم على اسرته العمل فى البزنس أو التكسب بأسمه .. او من علاقتهم به .. وهذه شهادة لوجه الله لا يمكن انكارها .. بعد الفترة الاولى والتانية .. وبدأ مفعول السم الذى اعده وزوده به شلة الاشرار حواليه .. وبيفكرنى حاليا بالرجل اللى اسمه " الملوانى " مدرس مدرسة المشاغبين اللى لبسوه التلامذه تاج وملابس الهنود الحمر ..فاكره .. يا الف مليون خساره .. التاريخ لن يذكر فى صفحاته اسماء الثالوث الجهنمى - الحكام حاليا - ولكن كل مساوئ العهد ستلصق به .. صوروا له أن بناء مستشفى .. او رصف شارع مكرمه من الحاكم .. صوروا له أنمد القرى الفقيرة بمياه الشرب يضمن له بمكان فى الجنة ويحسن صورته عند الحساب الاكبر ومن وراء ظهره سرقوا الميزانية واكلوه دون ان يدرى اطباق المهلبية .. اطباق مين يا با .. دى طشوت المهلبية .. واللى زاد وفاض .. تصرفات الهانم والاولاد .. فرغم الحزم والسراط المستقيم اللى كان ملتزم بيه .. كان فى البيت كالزوج - آخر من يعلم - وأؤكد لك أنه لم يعرف بثراء الاولاد الا بعد فوات الآوان .. طمعوهم الاوغاد شله اللصوص اللى حاوطوا عليه وتبرعوا له بالدروس والنفاق المقوس .. واراهن بعمرى لو ابعدتم الثلاثه عن الرئاسة... حتلاقوا الريس حسنى آخر امانه .. ولكن بعد إيه بعد ما خربت المحروسة .. ياريت يختصر الطريق من الوقت ويعلن بكرامه واعزاز .. الاعتزال .. ويسيبها انشالله تولع على رأى فيروزة المنتدى زمان ..

احنا عاوزين نسترد ما نهب من الشعب من اوغاد السلطة .. لنبنى به البلد من تانى .. واذا كان ابراهيم نافع كان بيقيض 3 مليون جنيه فى الشهر وعنده اربع قصور .. غيره زى سى كمال والشريف وسرور قده عشر مرات .. واللى اللى تاجر بديون الشعب اللى استلفها غصب عنه .. واصبح وشقيقة امراء بترول مصر الاحمر .. امراء بحر الدماء الذى نزف وينزف من ابناء الشعب الحيران .. ورحم الله اللى كان .. و ..

يا خسارة يامصر .. مشاكلك بتعصر قلبى عصر

تم تعديل 23 سبتمبر 2005 بواسطة achnaton

[shawshank]

والله يا ابو عمر .. الراجل ده أغلب من الغلب نفسه .. وبيفكرنى حاليا بالرجل اللى  اسمه " الملوانى " مدرس مدرسة المشاغبين اللى لبسوه التلامذه تاج وملابس الهنود الحمر ..ومن وراء ظهره سرقوا الميزانية واكلوه دون ان يدرى اطباق المهلبية  .. اطباق مين يا با .. دى طشوت المهلبية .. كان فى البيت كالزوج - آخر من يعلم - وأؤكد لك أنه لم يعرف بثراء الاولاد الا بعد فوات الآوان ..

طيب ماهي دي صفات المفروض متكونش في رئيس دولة. يعني مينفعش رئيس دولة يكون غلبان ، و لا آخر من يعلم داخل بيته ، و لا عديم الشخصية ينضحك عليه من حاشية فاسدة ...

للأسف هذه صفات للكثير من الموجودين في مناصب قيادية في مصر.

[زيزو]

http://www.almesryoon.com/ShowDetails.asp?NewID=4970&Page=11

لقد قال الرئيس حسني مبارك في حوار تليفزيوني إن أصلح نظام لحكم مصر هو نظام حزب أغلبية ، وطبعا ليس بالضرورة أن تكون هذه الأغلبية ب 90% أو 80% ولكنها أغلبية مطلوبة لإصدار قرارات وقوانين للصالح العام وحتى لا يتشتت أصحاب القرار بين مصالح حزبية وفردية مختلفة ربما تجعل من الصعب الخروج بصيغة توفيقية حول أشياء ينبغي البت فيها وإصدار قرار بشأنها. لذلك فان أفضل نظام لمصر في الوقت الراهن هو النظام الفردي أيا كانت الملاحظات والمآخذ عليه ".

واضح إن الراجل ده مش غلبان، ده مش فاهم أي حاجة في أي حاجة، أو بيستعبط... والحقيقة واضح إنه مش بيقرا ولا فاهم حاجة في السياسة أو مدرك الفكرة من وجود الرأي الآخر. يا سيدي الرئيس، الفكرة من وجود أراء مختلفة هي الوصول إلى القوانين التي فيها الصالح العام، التي يتفق عليها الأغلبية بغض النظر عن إنتمائهم. مش المطلوب إنك يكون عندك القدرة على إصدار القانون التفصيل! والمعروف أن في البلاد المحترمة يوجد من يرفضون من داخل الحزب صاحب المشروع، والموضوع ليس كما يفعل سرور: موافقة موافقة.

والنبي كفاية عليك.... بجد بجد إرحم نفسك!

[ابو حلاوه]

انا مندهش ان لسه الناس عندها امل ....... الريس بقاله خمسه و عشرين سنه و مش هتغيره كلمة .. حتي الصريخ ما بينفعش ....... و مين ده اللي غلبان الرئيس قاعد علي قمة الحكم و مدلدل رجليه و بيعرف الشارده و الوارده اطاح بابو غزاله و احمد رشدي و الجنزوري و عمرو موسي و يقال ايضا بفؤاد محيي الدين و كل من استطاع ان يكسب الرأي العام في صفه بنزاهته و انجازاته ....... هل نسينا زكي بدر و عبد الخالق المحجوب و الشاذلي وصفوت الشريف و غيرهم ممن ابقي عليهم مبارك .... انجاز مبارك الحقيقي انه فضل ياكل الناس مشمش خمسه وعشرين سنه علي وعد ان القمح هيطرح في توشكي ..... و من المشمش لتوشكي يا قلب لا تحزن

[se_ Elsyed]

مازلت عند رأيي

إن الحاكم لو غلبان ومسكين وما بيعرفش اللي بيجرى حواليه ( زي ما كانوا بيقولوا على عبد الناصر ) .. تبقى مصيبة وكارثة ، لإنها دولة مش مؤسسة خيرية .

ولو بيعرف وساكت .. تبقى مصيبتين

وفي حالة حسني مبارك ... الراجل عارف كويس جداً جداً إيه اللي بيحصل في البلد .. وده كله من تخطيطه ... ومبارك من أذكى الحكام اللي جاءوا لمصر .. بس ذكاء في الفساد وفي الشر فقط مش في صالح البلد ومصلحتها .

[Sherief AbdelWahab]

أقول للرئيس :

نعم كثير مما فعلته عظيم..

لكن كان من الممكن أن يكون أعظم..

اسأل الموظفين في الحزب الوطني الديمقراطي ،واحترس منهم.. ومن كتلة الاستمرار من أجل البتاع..

ألا هل قد بلغت؟

خلص الكلام

[ATHENA]

أقول للريس....هل تعتقد أن طموحاتك الشخصية و راحتك اهم من راحة 70 مليون شخص...و هل حقيقي إنت متعرفش حال المصريين وصل لإيه....و لو كنت تعرف فمش حاسس إنه حرام حتى كإنسان؟؟؟؟ :unsure:

تم تعديل 24 سبتمبر 2005 بواسطة ATHENA

[سقراط المصري]

كفايه كلام للريس لانه مش هيسمع

الكلام يكون للشعب

[ابو صلاح]

انا توقعت بعد ما أقول الكلمتين اللى فى نفسى للريس ... انى قبل ما ادوس enter على الكيبورد علاشان اضيف الموضوع فى المنتدى الديمقراطى دة ...... هلاقى امن الدولة بيكسر الباب .. ويسحلونى من قفايا على القسم او أمن الدولة لكن .....

الحمد للة يا جماعة ...... انا لسة ما اتقبضش عليا .... وما اتخدتش على أمن الدولة ولا حاجة ....... والنبى يا جماعة ابقو شقرو عليا كل شويا :unsure:

بس دة هيخلينى اطمع فى كرم الريس وسعة صدرة ...... وسعة صدر أمن الدولة او غفلتها عنى حتى الأن ...... واقول كلمة كمان .... ما انتو عارفين الانسان طماع بطبعة ..........

ياريس والنبى خلى فى هدف عام يجمع ولاد شعبك مع بعض وعلاشان اسهلها عليك ياريس الهدف دة موجود عاندى ومش هتعبك فى انك تدور علية .... وهو هدف ( النهوض بمصر ) وماتخليش الهدف دة كلام وخلاص او عبارة عن كلام انشا .... لأ خلية كلام فعلى ... ومشاريع يشارك فيها الشعب بنفسة وبيدة وبفلوسة

والكلام دة بيعملو الاستاذ الفاضل ( عمرو خالد ) وانا سمعت برضو يا ريس .. انة الاستاذ عمرو خالد خلاص هيسقر فى مصر بعد رمضان ........ والاهى خطوة ايجابية منك ياريس اللى انت عملتة دة ... بس يارب ماترجعش فى كلامك وتعزلو تانى ..... لان عمرو خالد هوا الأمل الوحيد المتبقى للشباب ..... واكتر واحد تستأمن الشباب علية ... لأن الراجل دة مش متطرف ولا حاجة وماشى جمب الحيط ... كل اللى عايزو انة ينفذ الحلم بتاعة وهو ( النهوض بمصر ) وصدقنى مش هتندم على القرار دة ....... على الأقل هتستفيد من طاقة الشباب فى حاجة مفيدة ..... بدل ما يطلعو فى مظاهرة ويعملو حركات قرعة زى ... كفاية ، وشايفنكو ... والكلام الفاضى دة

معلش يا ريس طولت عليك

واخيرا

ربنا يوفقك : لو كان نيتك فيها خير لينا

وربنا يبعدنا عنك : لو الخراب هيجى على ايدك

والنبى يا جماعة ابقو شقرو عليا كل شوية

[ابو صلاح]

دوس على اللنك دة يا ريس وخش برجلك اليمين وسمى وانت داخل

اضغط هنا يا ريس