موقف محرج مووووووووت !!!!

[ابو صلاح]

كل واحد منا تعرض لموقف محرج خلا وشة يحمر ويخضر ويصفر ... ويجيب كل الوان الطيف .. طبعا الموقف دة بيبقا فى ساعتها الواحد عايز الأرض تنشق وتبلعة ..... او عيون الناس تبطل تبصلو ...... او عقارب الساعة تمشى عل سرعة 180 ك/ ث ......... بس فى الاخر مع مرور الزمن بيبقا شئ مضحك.... وتعد تتضحك لما تفتكرة .... وساعات بتحكية لأصحابك او لأى حد علاشان يضحك معاك... وتعدو تضحكو سوا

انا عايز بقا نتكلم عن المواقف دى ...... وقول كدة وما تتكسفش .... وانا عايز اقولكم ان كلنا بنتعرض لمواقف محرجة ... يعنى الكل هيشارك :unsure:

[ابو صلاح]

اقولكم عن موقف محرج حصلى

فى يوم كدة من أيام ربنا ........ اتعزمت على خطوبة واحد صاحبى فى احدى شوارع ( حوارى بولاق )..واحنا مستنين خطيبة صاحبى انا واخو صاحبى دوت من قدام محل الكوافير...، المغرب أذن .... وانتو عارفين ان المغرب عمره قصير ولازم نلحقو فى وقتو علاشان ما نصليهوش قضى .... فبعد شويه من أذان المغرب رحت اصلية ... لقيت الناس خلصت صلاة ومشيت ....... ماكنش فى الجامع غير اتنين كبار فى السن ساندين ظهرهم على الحيطة وأعدين يتكلمو بصوت واطى .... وكام عيل حوالى 4 عيال ما يتعداش عمرهم 11 سنة .... كل التفاصيل دى لمحتها وانا بخش الزاوية .. وانا بقلع جزمتى على باب الزاوية ...... وانا بحط الجزمة فى المكان اللى بيحطو فى الجزم ... جالى هاجس ... ان الجزمة دى هتتسرق ... ولو اتسرقت وانا بصلى ... هعمل اية ... هيبقا شكلى اية ... هروح أزاى ...... هيبقا شكلى قدام الناس اللى انا رايح خطوبتهم عامل أزاى .... وجالى التفكير دة علاشان لمحت عيال صغيرة مافيش فى وشوشهم اى من براءة الاطفال .. يعنى ممكن يسرقو الجزمة ويطلعو يجرو ...... استعذت باللة من الشيطان الرجيم ... وتركت ما أحمل من افكار وهواجس هدامة ... وتوكلت على اللة ...... ونويت الصلاة بعد وقوفى على شريط ابيض من (البلستر الطبى ) لتحديد القبلة ... وفعلا ابتديت اصلى وخلصت الركعة الأولى بسلام وانا بقاوم الشيطان وبقاوم خوفى على الجزمة بتاعتى ... وانا فى الركعة التانية .. لمحت راجل من الراجلين الكبار اللى انا شفتهم وانا داخل الزاوية .... يقترب .... يقترب .... يقترب من الجزمة بتاعتى ... كل دة بطرف عينى وانا بصلى المغرب ...... انا قولت خلاص الرجل دة رايح يسرق الجزمة بتاعتى .... ودقات قلبى تتزايد .... والشك يقتلنى .... ويتوارد فى ذهنى منظرى قدام المعازيم وانا بدور على حاجة تستر رجلى علاشان أروح بيها .... ومازال الرجل يقترب ... ومازلت ازداد شكاَ وخوفاَ ... حتى ابتعد عن مسار الجزمة ... واقترب نحوى ... ثم اقترب ... ثم اقترب .... ومسك كتفى ودورنى وانا واقف 180 درجة .... ساعتها اكتشفت ان انا كنت بصلى والقبلة غلط ... وانى واقف عكس القبلة تماما .... ثم جلس الرجل مرة اخرى بجوار صديقة .. وعادو للحديث مرة اخرى .... وانا بقا اعدت متنح شويا لحد ما ستوعبت الموقف .... بعد كدة قمت خرجت من الصلى بعد تسليمى ... وابتديت صلاة جديدة بالقبلة الصحيحة ... طبعا بأطمئنان اكتر ان الجزمة مش هتتسرق ولا حاجة

طبعا الموقف دة حصلى لأنى كنت مركز فى الجزمة اكتر اكتر من تركيزى فى اكتشاف القبلة الصحيحة

الموقف دة كان محرج جدا بالنسبة لى : منظرى اية قدام الراجل ..... بقا معقولة الواحد ما يعرفش القبلة ... دة كلام :unsure:

[Folana]

انا متهيالى ده موقف محرج امام الله سبحانه وتعالى ...لان انت من اول مادخلت المسجد وانت شاغل بالك بالجزمة ومش مركز خالص فى الصلاة ...وطبعا اكيد كانت قبلتك هى الجزمة ...يعنى اللا شعور عندك وجهك ناحية الجزمة وعملت زى اللى اللى بيحج ويبيع سبح ..اهو منك بتأدى الفرض ومنك بتاخد بالك من الجزمة .....

بعدين جزمة تروح ولا حد يموت فداك ميت جزمة ..بس خلى بالك من صلاتك الله يخليك ....وركز شوية فيها .. :unsure:

ربنا يصلح الحال ...

[ابو صلاح]

اشكريك يا فلانة على مداخلتيك ... وعلى النصيحة الغالية دى ...

بس انا ماكنتش خايف على الجزمة على أد ما انا خايف هروح ازاى من غيرها ..... ولو على الجزمة عاندى كتير .... وكمان عايزيك تتخيلى الموقف يعنى معايا ........ واحد هيروح خطوبة من غير جزمة :unsure:

بس الحمد للة أعدت الصلى وبتركيز اكتر والحمد للة

بس عايز اسمع منِك بقا موقف محرج تعرضيلو يا فلانة .... وماتزوغيش منا من قبل ما تقوليلنا موقف محرج حصليك

[Folana]

السلام عليكم ورحمة الله...

والله ياأخى صلاح ..(مش عارفة الاسم كده صح ولا ايه)......انا حياتى كلها مواقف محرجة ..مش عارفة ممكن احكى لك ايه ولا ايه ....لكن علشان طلبت منى ..انا مش حاردك خاوى اليدين ....

بقى فى ليلة من ذات الليالى الغابرة.....زوجى العزيز اخدنى لزيارة اسرة احد اصدقائه ...وكنت اول مرة اقابلهم ..طبعا ساكنين فى قصر ايه ..حاجة ابهة قوى وفخمة جدا عقبال الحبايب...انا شفت المنظر ..ارتبكت واحتست ..المهم بعد السلامات والطيبون والواجب والذى منه ...فضل صاحب جوزى ده يتكلم عن الشغل وازاى الظروف صعبة والسوق مش زى الاول ..لدرجة ان عينيه دمعت ...انا قلت لنفسى ايه ده يابت يافلانة هو اما بيغزى العين اما صادق ....وعلشان اجاريه فى الكلام ..فضلت اقوله ..والله سعادتك الناس كلها بتشتكى ..ده حتى جوزى ياحرام واحد نصب عليه وادى له شيكات وطلعت من غير رصيد ومش عارف يصرفها خالص....منه لله ...داحنا كل يوم نفضل نشتم وندعى عليه دُعى ..ربنا يجعله من نصيبه ...يعنى ياحاج خد الامور ببساطة وربنا يفرجها انشاء الله ..الرجل سكت ..وجوزى سكت والمدام اخدتنا فى جولة منزلية نتفرج على اركان القصر الفخيم ده ...وبعد كده نزلنا ..وجوزى اول ماركبنا العربية بص لى شظرا وعيونه احمرت وطلع دخان من ودانه ..وقالى ..انت ماتعرفيش تسكتى؟...- انا طبعا عارفة طبعه حامى شطة مايحبنيش اتكلم كتير مع حد - قلت ايه فيه ايه باواسى الرجل ...قال ياهانم ياعاقلة ...الرجل النصاب اللى بندعى عليه كل يوم ..هو نفس الرجل اللى كنا عنده دلوقت وبلغتيه المعلومة ..... :blush:

وطبعا من يومها اتعلمت انى مااردش الا باربع جمل بس ...ازى الصحة ......الجو جميل ......ده شىء عال خالص......ربنا يزيد ويبارك . :unsure:

[ثورة الوادي]

انا مرة لما كنت فالاعدادي رحت درس عربي

المهم وانا مروح وكنت بلبس الجزمة لان الدنيا كانت شتية تئريبا والعنا الجزم برة

المهم انا تئريبا اتاخرت وما كنش في نور بره فزميلة معايا لان الدرس كان مختلط داست علي رجلي وتئريبا ما كنتش شايفاني فافتكرتني فار مثلا

وصوتت

ههههههههه :unsure:

والله .....

وبعدين انا اتكسفت بئي ووشي احمر واخضر ونزلت كملت لبس الجزمة تحت العمارة

[مصرية الهوى]

أنا مرة كنت أنا وبنات خالاتي ثلاث رايحين للمول .. المهم كنا نتمشى في الدور الأول فبنت خالتي قالت : أنا هأطلع الدور الثاني .. فرحوا بنات خالتي اثنين .. وبقيت أنا وبنت خالتي التانية..(يعني اتنين اتنين)

وبعد ما اتمشينا فترة .. كلمت على بنات خالتي اسألهم هما فين .. فردت عليا بنت خالتي وقالت : جالسين نتعشى .. فأنا ولعت :angry: .. احنا كنا متفقين نتمشى وبعدين نروح نتعشى سوا .. فالتفت على بنت خالتي وكانت مدياني ظهرها وقلت : شفتي الخاينات المفجوعات رايحين يتعشوا .. ان شاء الله مطرح مايسري يهري .. :angry:

الست دارت ناحيتي اتاريها مش بنت خالتي :unsure: :blush:

وقالت : استغفر الله العظيم حرااام عليك إن شاء الله بالهناء والعافية

:blink: :D

وموقف ثاني :

كنت مرة بالحرم .. قبل صلاة الفجر .. فكان الدور الثاني هدوء والناس قليلين ... وكنت واقفة عند المغاسل ومافيه إلا أنا وواحد .. فالولد ده مشي هيروح .. ودرررررررررررررردب ... وقع حتة الدين وقعة :o

بعدين قام بسرعة .. وقعد يبص يمين وشمال .. مكانش فيه غيري .. مسكين والله .. وشه جاب أحمر على أصفر على كل ألوان الطيف .. ومشي .. بس والله اتمنيت لو كنت أنا مكانه .. لأنه فعلاً كان موقف محرج على الآخر بالنسبة له

:blush: :blush:

[شاعرالرومانسية]

دة اسمه كلام برضة يافولانة...

مش كان المفروض الاستاذ يقولك على المعلومة دى وانتوا فوق .. كنتى تاخديلك حاجة من التحف اللى فى القصر الابه دة ...( تخليص حق يعنى :blush: واهو احسن من عنيهم :unsure: )

[Folana]

شاعر الرومانسية .........ماتفكرنيش بقى ..انا كل اللى حازز فى نفسيتى انى فوت الفرصة دى ..اتارى جوزى ياسيدى كان رايح علشان يتفاهموا على الشيكات ويوصلوا لحل بينهم لطريقة السداد .....يعنى انا لخبطت الدنيا مع الرجل ..وطينتها على راس المسكين جوزى :wub:)))))) بس ملحوقة انا باخطط لزيارة مفاجئة .....

[se_ Elsyed]

شاعر الرومانسية .........ماتفكرنيش بقى ..انا كل اللى حازز فى نفسيتى انى فوت الفرصة دى ..اتارى جوزى ياسيدى كان رايح علشان يتفاهموا على الشيكات ويوصلوا لحل بينهم لطريقة السداد .....يعنى انا لخبطت الدنيا مع الرجل ..وطينتها على راس المسكين جوزى :wub:)))))) بس ملحوقة انا باخطط لزيارة مفاجئة .....

<{POST_SNAPBACK}>

أنا شايف الموقف ده مُحرج لزوجك مش ليكي ..

بس المفروض في المواقف اللي زي دي .. تتفقوا على سيم مُعين .. يعني اللي بيشوف التاني بيعك في الكلام يقوله مثلاً " طا طا طا " كده يعني . :)

[Folana]

والله ياأخونا الفاضل ..انا اللى متخصصة مواقف محرجة وعك فى المنطقة كلها ..انا جوزى قالى مش حاخدك معايا فى حتة تانى ...والحقيقة هوما قصَر والله ده مسجل لى رباعيات طاطاطاطا ..على سى دى ..بس مين يقرأ ومين يسمع ومين يتعظ بقى.....انا مش عايزة احكى لكم على كم المواقف المحرجة اللى قابلتنى ..بس حانزلها فى ديوان قريب جدا ....

عايزين نقرا برضه مواقفكم المحرجة ..علشان اشعر بالمشاركة الوجدانية ..وأوقف تحويل اوراقى للعباسية.. :wub:

تم تعديل 25 سبتمبر 2005 بواسطة folana

[shahd]

مرة وانا في ثالته اعدادي كنت قاعده قدام في الصف الأول وقال ايه عشان اركز رحت في سااااابع نومه والأبلة سايابني وساكته وبعد ما خلصت شرح وانا صحيت بصتلي وقالت يافرحتي بيكي ناااااااااايمة

بس هي الي غلطانه حد قالها تسيبني ما كانت صحتني من الأول :wub:

:) :sad:

تم تعديل 25 سبتمبر 2005 بواسطة شهد

[ثورة الوادي]

انا مرة كنت فالاعدادي وكنت فالمدرسة فاتلخبط وجيت انادي علي مدرسة العربي واعدت اؤلها :

ماما ماما ماما

طبعا وشي جاب كل الوان الطيف والي مش طيف الي تئدر العين البشرية تشوفها او ماتشوفهاش

:wub: :)

[Folana]

اخوانى....اليكم اخر مواقفى المحرجة ....امبارح حاولت ابعت صورة لمعرض الصور فى منتدى جميل جدا اسمه محاورات المصريين -ابقوا اتفضلوا فيه شوية - وطبعا كالعادة ماعرفتش ابعت حاجة والمشاركة طلعت فاضية ...بس انحرجت جدا اخر انحراج والله..........لولا ربنا وقف لى ولاد الحلال من امثال اخونا الفاضل العزيز العظيم س س ..وانقذ الموقف ...

وساوافيكم باخر انحراجاتى اولا باول ...وكما قال الشاعر وماالدنيا الا موئف كبير