الى العزيز حسين امبابى - فرص الهجرة الضائعة

[Guest محاور]

العزيز حسين امبابى،

قرأت مؤخرا موضوعا للعزيز المدير, يستفسر فيه عن طرق الهجرة المتاحة له, و قرأت ردودك أيضا.

 

لا أخفى عليك إعجابى بحماسك و لهفتك للهجرة و السفر, و إدراكك للواقع العام الذى تشهده مصر فى ايامنا هذه.

 

خلينى اقلب بلدى بقى عشان البساط يبقى أحمدى و يبقى الكلام على مية بيضا و على عينك يا تاجر و اللى ما يشترى يتفرج. :)

بص يا حسين... انت عايز الحق ولا ابن عمه؟ ابن عمه؟ طيب انا هقول لك الحق و لا اسألك عليه من أجر, إنما اجرى على الله.

 

الحماس و الطموح و اللهفة و الشوق كويسين جدا و نصيحة اوعى تفقد شوقك و حماسك لهدفك اللى انت نفسك تحققه, لإن طول ما انت عندك الحماس ده, طول ما فيه امل انك تحقق حلمك و توصل للى نفسك فيه... متخليهمش يكسروك بكلامهم .... xxxxxxxxxx

xxxxxxxxxxxxxxxxxxxxxxxxxxxxx

 

 

 

انا حاسس انك بتتعرض لعملية نصب جامدة و هو ده اللى خلانى ادخل اكتب لك الكلمتين دول, عسى انى امنع مصيبة انها تقع و تحطم كل آمالك و طموحاتك.

 

لفت نظرى انك بتتكلم عن شركة سياحة خارجية هى اللى هتطلع لك التأشيرة بتاعت كندا... مفيش الكلام ده... مفيش حاجة من دى خالص.

آه ممكن شركة سياحة تقدم بالنيابة عنك للتأشيرة, لكن ده ملهوش اى قيمة اساسا فى الحصول عالتأشيرة و مبتفرقش حاجة خالص... زيها زى انك تقدم لنفسك بالظبط.

 

كندا بالذات لو اى حد قال لك انه يقدر يطلع لك تأشيرتها, قل له انت كداب... اصل اللى شغالين فى السفارة اعرفهم و فعلا مفيش الكلام ده, و لو فيه كنت هقول لك.

 

كندا تأشيرتها صعبة جدا و مفيهاش حظ... فيها يا آه يا لأ... يعنى لإما انت راجل متوافق مع شروطها لإما لأ...

عارف لو تأشيرة امريكا، كنت قلت لك ان فيها حظ و ممكن تاخد التأشيرة فى النص من غير ما حد ياخد باله... لكن كندا صعب جدا لإنهم اصلا مش طايقين اى حد ييجى من الدول العربية... ده من الآخر يعنى.

 

و بعدين 10 تلاف جنيه ايه دول يا راجل... ده انت كل حركة هناك بفلوس.. الحياة فعلا صعبة و الموضوع محتاج درجة اجتهاد كبيرة جدا عشان تبقى متميز... و المصريين هناك تعبانين لإنهم متعودين عالأنتخة و الراحة... و بلاش اتكلم عن فضايح المصريين هناك و البلاوى اللى بيعملوها...  اسكت يا بقى... خلينى ساكت احسن.

 

طيب تعمل ايه؟ تعمل الصح.

انت دلوقتى غير مؤهل انك تروح كندا... هل معنى كده انك تيأس؟ لأ ماقلتش كده... لكن تشوف ايه المطلوب و تعمله.

 

عشان تسافر كندا سياحة, لازم تكون سافرت اوروبا و امريكا قبل كده كذا مرة، و بالتالى الموضوع مش مناسب ليك.

 

يبقى انت الحل المناسب ليك دلوقتى انك تحسن من دخلك و من ظروفك و من تعليمك عشان تبقى مؤهل انك تهاجر كندا.

 

يعنى لازم تعرف فرنساوى و انجليزى كويس جدا جدا جدا... انت حتى لو رحت بتأشيرة سياحة و عرفت توصل - و ده مستحيل واقعيا - فانت هتشتغل ازاى من غير لغة؟

لازم تكون بتتكلم اللغة جيد جدا او بطلاقة كإنك ابن البلد... اقعد ذاكر كل يوم ساعتين انجليزى و ساعتين فرنساوى، و الحمدلله النت مليان محتوى تعليمى مالوش اول من آخر بس اللى يقعد و يتعلم.

 

اتعلمت اللغة؟ طيب بالنسبة للمؤهل... انت مؤهلك ايه؟ هل مؤهلك مطلوب فى الهجرة؟ ادخل على موقع الهجرة و شوف.

 

يعنى دلوقتى المطلوب من سيادتك:

1- اتعلم اللغتين الانجليزية و الفرنسية.

2- اتعلم صنعة تفيدك هناك حتى لو معاك مؤهل, لإن الصنعة اليدوية مهمة جدا هناك.. سواء نجارة او حدادة او لحام... و خصوصا اللحام.

3- شوف مؤهلك ايه و شوف اذا كان مطلوب هناك ولا لا.

4- اشتغل و حسن مستواك المادى عشان تقدر تسافر... و لو تقدر تروح الخليج يكون احسن... 

 

موضوع الهجرة هياخد وقت, و لازم تبقى مؤهل ليه.

عندك استعداد تشتغل 16 ساعة كل يوم؟ تقدر تعمل ده؟ روح اعمله هنا فى مصر دلوقتى و اشتغل شغلانتين... تقدر؟ ولا هتكسل و تقول مش قادر؟

 

مرة تانية.. سبب عدم تأقلم مصريين كتير فى كندا هو اللغة اولا و الأنتخة و الراحة ثانيا... ناس مش عايزة تتعب ولا تشتغل يا عم... هما اصلا رايحين فى اواخر التلاتين او داخلين فى الاربعين... يعنى خلاص ميقدروش يغيروا من شخصيتهم و اتعودوا عالأنتخة و شغل الموظفين المقرف بتاع مصر... انت فاهم بقى.

 

بالمناسبة انا بشتغل 18 ساعة... ايون... هغشك يعنى؟ و عايش اهو زى الفل و بينى آدم طبيعى و ربنا.

 

الاجتهاد و المثابرة... المشوار قدامك طويل بس اوعى تفقد ثقتك فى نفسك... هتقدر بس المهم انك متكسلش.

 

ربنا يوفقك.

تم تعديل 19 يوليو 2015 بواسطة Scorpion

[Guest محاور]

احب اضيف كمان انك ممكن تسافر عن طريق الدراسة, بس برضه محتاجة ان يكون معاك فلوس... مش كتير قوى... يعنى حسبة 100 الف جنيه.

 

الدراسة احد اهم طرق الهجرة السريعة بالمناسبة, و يُفضّل انك تقدم على ماجستير, عشان تملا عين السفارة فى الابلكيشن و تقلل نسبة الرفض.

 

الموضوع محتاج فلوس، و بالتالى محتاج انك تكون اسست حياتك قبل الهجرة مش بعدها...

انا عارف انك عايز تعمل العكس، و شباب كتير كمان عايزين يعملوا العكس... يهاجروا و بعدين يحققوا نفسهم, لكن للأسف الأمور اختلفت فى العالم دلوقتى عن زمان, خصوصا مع الانهيارات الاقتصادية اللى عمالة بتحصل, و اللى بيجبر الدول الكبيرة انها ماتقبلش اى حد إلا اللى يكون عنده تاريخ... خبرة او فلوس او مؤهل او كلهم مجتمعين بالإضافة للغة.

 

ربنا يكرمك إن شاء الله.

[حسين امبابي]

الأخ الاستاذ / محاور ...

سلام الله عليك ورحمته وبركاته وكل عام وحضرتك بخير وربنا يسعدك وييسر لك الخير اينما كنت وأشكرك من اعماق قلبي على نصائحك الغالية الصادقة وليس بخافي عنك ولاصدقائي هنا بالمحاورات رغبتي في السفر لدولة اوربية تحديدا دون الدول العربية التي بفضل الله وحده لا اجد اي صعوبات في دخولها سواء زيارة او عمل وقد حدث هذا منذ سنوات غير بعيدة بالسفر لدولة الامارات العربية المتحدة والمملكة العربية السعودية للعمل .

الصدق منجي في كل حال وأصدقك القول بان رغبتي السفر لدولة        اوربية هي السعي بل الحلم بحياة افضل ( ثقافيا - اجتماعيا - ماديا ) وقد اصطدمت بالفعل بالواقع الالئيم فمعظم اصدقائي الذين يعيشون في الدول الاوربية منزعجون مثلك من فكرة السفر دون مؤهلات لغوية او خبرات عملية مطلوبة هناك او قدر من المال يضمن لك تحقيق القليل مما ذكرناه هناك والسبب هو الكم الهائل من المعاناة التي تفوق معاناتي كشاب ثلاثيني مصري الجنسية أعيش في مصر .

لذلك كله وبعد مصارحة مع النفس تساءلت هل أولئك المشفقين من معاناتي عند السفر اذا كتب الله لي السفر صادقون ؟ نعم هم صادقون ويتكلمون بعين الواقع مثلك تماما ايها الصديق الصدوق فأنا لم أملك خبرات لغوية ولا أملك قدر من المال وخبراتي العملية البسيطة يتواجد منها الالاف هناك في اي دولة اوربية .

لقد دعوت الله وادعوه ليل نهار أن يرشدني الصواب وما فيه الخير وأسأل الله ان يعجل بالفرج من عنده فهو سبحانه وتعالى مولى ذلك والقادر عليه وانا على يقين تام بأن الله يقف جانبي دائما وابدا ويرشدني ولكنه سبحانه يمهد لي السبل لأسلك من سأختار على بينة .

كندا ... لك تكن وجهتي المفضلة بل هي دولة اوربية اسعي لها كما اسعي لاي دولة اوربية اخري .

[حسين امبابي]

ما زال هناك موضوعين للنقاش وهما اللجوء الانساني - الزواج من أوربية ؟ ما هي اسهل دولة لعمل لجوء انساني ؟ وما هي الدولة او الدول التي بالزواج من احد مواطنيها  تعطي تسهيلات للاقامة والعمل ؟

لو عند سعادتك اي معلومات واقعية ( من خبراتك ) تفضل بها مشكورا

[Guest محاور]

الصديق المخلص حسين،

تحية طيبة و بعد...

 

كلامك جه عالجرح و واضح برضه انك مصمم تاخد الطريق السهل - و لكنه الاكثر صعوبة و الاكثر التواءا و الاكثر تكلفة و الاكثر مخاطرة.

 

صدقنى الطريق السهل اللى انت بتدور عليه ده لو حصل، تكلفته عالية جدا و فى النهاية برضه مش هتوصل للى انت عايز توصل له.

انا صحيح يا دوب عندى 29 سنة، و لكنى أدركت و تيقنت أن الطريق المستقيم هو الافضل دائما... اسرع طريق بين نقطتين للوصول هو الخط المستقيم... هتشوف انه صعب و فيه مخاطرة عالية و فيه متاعب كتير، لكن الواقع انه الاسهل و الاضمن.

 

انا قلت لك عالطريق المستقيم... اتعلم لغة... ايه المشكلة انك تتعلم اللغتين الانجليزية و الفرنسية؟ فضى نفسك ساعة كل يوم... تتعلم 20 كلمة انجليزى و 20 كلمة فرنساوى... او تركز عاللغة الانجليزية فقط مبدئيا و تتعلم 40 ل50 كلمة يوميا... بعد سنة واحدة بالظبط هتكون عندك محصلة لغوية هائلة ستمكنك من اجتياز اختبار ال IELTS بدرجة تؤهلك للهجرة لكندا.

 

لكنك لو فضلت تدور على واحدة اوروبية تتجوزها، بعد سنة برضه مش هتوصل لحاجة و هتفضل زى ما انت... إذن الأضمن و الافضل انك تتعب و تبذل مجهود.

اه فيه ستات اوروبيات كتير بيتجوزوا مصريين من عالنت... مش هنكر ده لإنه واقع موجود و بيحصل... لكن صدقنى ده طريق ملتوى و غير مضمون العواقب... افرض طلع عندها إيدز؟ :) افرض طلعت مريضة نفسيا و عايشة فى دراما؟ :)

 

ما ربنا مورينا الطريق المستقيم... انا فعلا مش قادر افهم ايه المشكلة انك تتعلم اللغة؟ انت لا زلت فى عز شبابك و تقدر تحقق حاجات كتير جدا.

لو فيه عائق لتعلم اللغة او لتجديد مهاراتك, و هذا العائق ممكن مناقشته هنا و امكانية تجاوزه، يبقى تمام جدا...

لو فيه عائق بس انت مش عايز تناقشه عالعام... ممكن تقول إن فيه عائق بدون توضيحه...

 

لكن انا شخصيا مش شايف اى عائق... انت لسه فى عنفوان شبابك تقدر تغير حاجات كتير فى حياتك... 

المهم انك تتحمل مسئولية نفسك ولا تلقى اللوم على المجتمع و الآخرين...

 

صحيح فيه حاجات مانقدرش نغيرها... لكن شىء زى تعلم اللغة مثلا... ايه الصعوبة اللى فيه؟

شىء زى انك تشتغل بدل الشغلانة اتنين عشان تحسن دخلك... ايه المشكلة؟

 

انك هتتعب و تشتغل ولا فيه حاجة تانية؟

 

بالمناسبة فى اوروبا و الدول المتقدمة، و هى دول رأسمالية متوحشة بكل ما تحمله الكلمة من معنى، إنت لو وقعت مش هتلاقى حد يسندك... 

يعنى لازم تشتغل طول الوقت و تخلى حاجة تسندك لما تكبر و تتقاعد، عشان تعتمد عليها... و ده النظام اللى الامريكان و الاوروبيين ماشيين عليه.

 

فى المداخلة القادمة بإذن الله, هكلمك اكتر عن جزئية العمل, لإنى كتبت فى اول المشاركة ان كلامك جه عالجرح.... لإنى من كام اسبوع كنت بكلم سيدة امريكية - و هى اقرب النساء لقلبى حيث انها تبنتنى منذ اكثر من 15 سنة و هى السبب الرئيسى فى كل ما حققته و ما سأحققه من نجاح, و كنا بنتكلم عن مسألة الشغل و انى بشتغل 12 ساعة... و انى متضايق من الشغل و كدهون... فقامت بعتالى ايميل مديانى فيه كلمتين من اللى قلبك يحبهم.

[Guest محاور]

الست الطيبة دى بعتت لى الرد ده على سؤالى فى مسألة الكفاح و المثابرة و تحقيق الاحلام... و انى متضايق انى بشتغل 12 ساعة و كدهون... فهى قالت لى ده الناس بتشتغل 16 و 20 ساعة كمان...

و من ساعتها و انا مغير النظام و بشتغل 18 ساعة يوميا... مع الوضع فى الاعتبار ان ساعة الشغل بتاعتى 50 دقيقة + 10 دقايق راحة.... و بشتغل 6 ايام بس فى الاسبوع و الاحد راحة مع متابعة مجريات العمل من بعيد لبعيد.

 

اللى عايز اقوله يا حسين - و اللى الست دى كمان بتقوله, إنك عمرك ما هتوصل للى انت عايز توصل له من غير شغل و كفاح و مثابرة و اجتهاد...

للأسف احنا اتربينا عالفهلوة و النصاحة... او طلعنا لقينا المجتمع بتاعنا كده... و إن كنت انا و اصحابى ايام الثانوى كنا بنفكر نعمل فلوس ازاى, لإننا ادركنا ان الشهادات الجامعية مش بتأكل عيش...

و حتى هذه اللحظة لا زلت اتذكر انى ساعة الثانوى لقيت كتاب بيتكلم عن أوناسيس اسطورة الشحن فى العالم - و كان كتاب بالعربى, و كنت انا و الشلة بتاعتى بنقعد نقراه كل شوية و نحاول ننفذ الحاجات اللى فيه - رغم إن الكتاب كان فيه تشجيع على الاعمال الغير مشروعة... ما علينا.

 

I think that its a state of mind that in part is pounded into you as a child. The push to do well in school and in my time, we were motivated to do well in school. Everyone went on to go to college and become what ever it was that was our dream since a child and to be able to make enough money to be able to  pursue the AMERICAN DREAM.  The dream of having a nice home, a good car and clothes and money. That is what motived my generation.  The younger generation here, I don't know that anything motivates them.  They see a declining society with college so expensive only the rich can go to school.  Homes are now so expensive that the average American can no longer afford one. But I think maybe for me, one the main things also was the fact that I was ALONE ! It was FEAR.  Knowing that it was me that was responsible for having or doing what needed to be done. I had no one to help me,  to come home to at night so I worked all the time. That's still true even though Im not working 40 hrs a week anymore there was a time when I worked 60 hrs and more a week. The American work week is 40 hrs a week.  People in this country go to work at least 5 days a week and work 8 hrs per day. Some work 12 hrs per day. Some people that own their own business may work 16-20 hrs per day.  Donald Trump was asked last week  why his first wife divorced him. He said it was because he was working 22hrs a day all the time. He had a lot of responsibility and large assets to handle. Trump is a self made billionaire! He was luckier than most people. Few people that work a lot, unless they are their own boss, NEVER will have even a million dollars.

[حسين امبابي]

عن اقتناع تام يا صديقي كلامك 100% صدق ولي بعض الملاحظات

1- عائق اللغة لم يكن ابدا هو المانع من السفر لانني تعلمت وادركت أن الاحتكاك اللغوي هو خير وسيلة لللتكلم وليس للتعلم واجد خير دليل ومثال على ذلك هو تحصيل اخوانا في اسوان والاقصر والمناطق السياحة بمصر لمرادفات لغوية صحيحة لعدد من اللغات بفعل احتكاكهم باصحاب اللغة .

2- موضوع اللجوء اري ايضا صعوبته الشديدة وحتى في اول الطريق وهو ان تنفذ الي اقطار تلك الدولة التي تود اللجوء اليها وهو اساس الصعوبة ومكمن الخطورة ( الهجرة غير الشرعية او قوارب الموت والتي لا احبذها اطلاقا ) .

3- اوافقك تماما في أن من جد وجد ومن زرع حصد والعمل المجزي في اي بلد مبدأ واحد لا يتجزأ ولكن هل استطيع ان اجد في بلدي عمل مجزي مع الاستعداد التام للعمل 18 ساعة وليس 16 ؟

4- ليست مشكلة شخصية ابدا ولكنها عامة او يعاني منها السواد الاعظم من الشباب المصري واتكلم عن الذي منهم يحمل هدف ولديه الطموح في ان يعيش مستقبل افضل ولكن هل الدولة بمعزل عن هذا كله ؟ لا اريد وظيفة ميري ولكن اعطني قرض لأعمل ! مستحيل في ظل شروط تعجيزية وضعت خصيصا لمن تعد اعدادهم على اصابع اليد !!

5- هنا في مصر ثراء فاحش وفقر مدقع والهوة بينهم فظيعة هل اصبحت دولة فقراء ودولة اغنياء ؟ ما السبب ؟ انه الظلم الاجتماعي لذوي المناصب الذين اجلسناهم على كراسيهم فباتوا يكنزون لأنفسهم ولا يريدون لنا حتى ان نصل للكفاف ( حد سؤال الناس الحاجة ) فهل انا متهم بالفهلوة والانتخة والفشل ؟؟؟ 

6- صدقني يا اخي محاور اقسم برب الكعبة لو وجدت بعد بحثي المضني وأكرر بحثي المضني فرصة عمل في مصر بلدي استطيع منها ان اعيش حياة تكفي متطلباتي الحياتية ولن اقول ادخر منها لغدا لما فكرت ابدا في السفر لاي دولة عربية او اوربية  .

7- اخيرا هل بعد سنوات دراستي في القانون والعمل بالمحاماة الي ا نا وصل عمري 37 سنة مطلوب مني أن اتعلم صنعة ؟ ليس عندي مانع مطلقا ولكن كم من الوقت والجهد سيكلفني ذلك وهل سأجد مقابل ؟

ليس عندي مانع ايضا ان اعمل بغير مهنتي في اي وظيفة اخري ولكن غير مجدية ماديا وهل انتظر سنوات اخري تضيع من العمر لأتقن شئ ادركته بعد عمر طويل ؟ هل انا ضحية او جاني ومتهم ؟؟؟؟؟؟!

[Guest محاور]

الصديق الكريم حسين،

اللغة عائق لو انت عايز تروح هجرة او بشكل قانونى... اللغة هتبقى عائق طبعا، لإنك هيبقى مطلوب منك نتائج اختبار IELTS، بالإضافة إلى انك لو عايز تفتح فرص جديدة لك فى الخارج, فلازم تكون بتعرف لغة عشان تعرف تكلم الناس دول... تعرف تتفاهم معاهم... انا بدأت كده.... بدأت بعمل روابط و صداقات عالإنترنت مستغلا اللغة الإنجليزية التى افنيت عمرى فى تعلمها. :)

 

و موضوع العلاقات ده حدث ولا حرج... العلاقات و المعارف فى أوروبا والدول المتقدمة هى نظام اشبه بالواسطة هنا فى مصر، مع فارق ان هناك بيخليك تشتغل اللى انت فعلا تقدر تعمله من غير كدب، و بناءا على كفائتك و اجتهادك... على عكس الواسطة فى مصر اللى بتعتمد على العلاقات فقط دون اى مجهود يذكر من المستفيد من الواسطة, و اللى ممكن يكون اصلا فاشل و متخلف بس اهو.

 

بص يا حسين... انا اكتر واحد بيكره الدولة دى و القائمين عليها... خلى بالك انا بقول "الدولة" و ليس "البلد" و الفرق كبير... فمصر هى بلدى فى النهاية، لكن "الدولة" ليست دولتى و نظام الحكم القائم فيها نظام فاشل دموى قائم على فقر الناس بالأساس.

 

لكن ده لا يمنع إنى أقول لك طب و بعدين؟

كلنا عارفين ان ده الامر الواقع... بنطلع فى تعليم زبالة مبنتعلمش منه حاجة و شهادات تروح تبلها و تشرب ميتها... هو ده الواقع، لكن هل معناه إننا نستسلم للواقع؟

طيب هل فيه حد مثلا حاول تغيير الواقع ده و نجح؟ او بمعنى أصح استطاع انه يخرج من الواقع المرير ده و إنه يعلم نفسه بنفسه و ينتقل لمستوى افضل؟ آه فيه... نماذج كتير جدا رغم إن نسبتها من المجموع العام قليلة، إلا ان العدد يظل كبير جدا.

 

إذن طالما ان فيه حد قدر يتغلب عالواقع ده و يتعامل معاه، ايه المانع اننا كمان نعمل زيهم؟ احنا مش هنعمل حاجة غير اننا هنقلدهم و هنمشى على خطاهم.... لا اكتر ولا اقل..

 

إذن الواقع المرير اللى احنا عايشينه مش عائق، او بمعنى اكثر دقة إنه عائق يمكن تجاوزه كما تجاوزه عشرات الألوف الآخرين... و المنتدى هنا فيه نماذج كتير قدرت تحقق ده.

انت عندك حلم و عايز تحققه... و انا قلت لك عالطريقة الصحيحة و الطريق المستقيم... اما اللجوء فهو مستحيل.

 

لو انا مكانك مثلا - رغم إنى مش قادر افهم ظروفك بالظبط بشكل دقيق و واضح، و لكن كنت هحط حلم الهجرة بعد 5 سنين من دلوقتى... و كنت هبدأ اشوف الناس اللى حوالية مين اللى يقدر يساعدنى انى الاقى شغلانة تسمح بالتدرج فيها بشكل تراكمى سريع فى خلال ال5 سنوات القادمة، بحيث انى اكون مبلغ من المال يسمح لى اعمل ده.... يسمح لى احقق حلم الهجرة و السفر بالنسبة لى.

 

و بمناسبة موضوع الشغلانة و التدرج... طبيعى ان اى شغلانة هتبدأ فيها إنك هتتدرج فيها، و بناءا على مواهبك و كفائتك و قدراتك هتقدر توصل بسرعة للهدف اللى انت عايز توصل له... المهم الاجتهاد و المثابرة و الانفتاح على الآخرين.. يمكن تلاقى حد يكون سبب فى انك تلاقى شغلانة افضل او يرفع من درجتك فى السلم الوظيفى.

 

و ده بيفكرنى بمقولة لملياردير امريكى مشهور مش فاكر اسمه... إنه سألوه لو كان رجع فى اول حياته كان هيعمل ايه؟ قال كنت هشترى بدلة غالية جدا و اروح اى حفلة من حفلات رجال الأعمال و اكيد كنت هلاقى حد يشغلنى و يساعدنى و يخلينى اختصر وقت كتير...

 

و ده بيبين قوة العلاقات و ازاى انك تحرص انك تكون بالمظهر المناسب فى المكان المناسب.

 

معلش يا حسين... انا عارف ان احنا طلعنا فى عصر مضطرين نعتمد فيه على نفسنا فى تعليم انفسنا و مواجهة الواقع المرير... لكن برضه الحمدلله إننا فى عصر الانترنت... و ما أدراك ما الانترنت و قوته الخرافية الخفية التى لم يدركها البشر بعد والله.

 

يكفى انك تقدر تتعلم حاجات كتير جدا و توصل لمليون شخص بسهولة و تبيع لهم حاجات فى خلال فترة قياسية و تعمل فلوس لوز اللوز.

قوة الانترنت لم يتم اكتشافها بعد، لإن البشر لسه مش منظمين بالشكل الكافى فى مسألة القفزات العلمية و التحصيل المعرفى، رغم وجود الجامعات و المعامل و مراكز البحث العلمى بس لسه البشرية قدامها كتير.

 

احنا لينا كلام تانى كتير لإن الموضوع فعلا كبير و متشعب.

[حسين امبابي]

أخي الاستاذ / محاور

 

والله انا بتعلم منك وان كنت حضرتك اصغر مني في العمر ولا اجد اي موانع او دوافع مرضية تجعلني اقلل من شأنك وأعرض عن نصيحتك التي أجد فيها الصدق .

انا معاك وبستفيد منك ولعل الله استجاب ندائي وارسل لي من يرشدني الي الطريق الصحيح في الحياة الدنيا فكما تعلم الحياة  ما هي الا تجارب ونتائج ....

علمني مما علمك الله وانا آذان صاغية لك وطوع أمرك أخي الحبيب .

تم تعديل 17 يوليو 2015 بواسطة حسين امبابي

[Guest محاور]

الصديق الكريم حسين...

ده بس من ذوقك والله... و انا بقول الكلام بناءا على تجربتى الشخصية و تجارب من حولى و تجارب من تعاملت معهم و قرأت لهم... تجارب حقيقية و لكنها تظل شخصية و اكيد الظروف تختلف من شخص لآخر.

 

بس انا عايز اسألك بقى... افرض انت دلوقتى وصلت اوروبا او كندا او اى دولة... هل دى النهاية؟ لإنى عايز اقول لك ان دى البداية، لإنك هيبقى مطلوب منك تشتغل عشان تصرف على نفسك.

و الشغل هناك شغل بجد مش هزار زى هنا... و كما ذكرت من قبل، إن سبب تعب كتير من المصريين فى كندا إنهم مش متعودين عالشقا...

 

عموما ايه رأيك نخلى الموضوع ده عن فرص الهجرة الضائعة و المتاحة؟ :)

 

بص انا هقول لك على كام حاجة كده انا عملتهم و انا صغير... ايون و انا اصغر من دلوقتى... اصل حلم السفر ده عندى من زمااااااان :D

 

بص يا سيدى... عشان تسافر اوروبا سياحة اعمل الآتى:

1- روح اطلع عمرة

2- استنى كام شهر و بعدين روح تركيا سياحة

3- استنى كام شهر و بعدين روح ماليزيا سياحة

4- استنى كام شهر و بعدين روح دبى سياحة...

 

يعنى الحكاية دى ممكن تاخد لها سنة و نص تقريبا... او سنة لو معاك فلوس.

سافرت؟ طويب... روح قدم على تأشيرة شنجن من سفارة اسبانيا و اطلب من حد يعمل لك ايداع فى البنك بمبلغ 50 الف جنيه عالاقل و يسحبهم تانى عشان تاخد ورقة برصيدك فى البنك... 

 

هتاخد التأشيرة بإذن الله... الناس فى سفارة اسبانيا محترمين جدا و انا فى تواصل معاهم على طول و حتى لحظة كتابة هذه السطور الناس مش متعنتة و مش بترفض الشباب.

 

برضه فيه سفارة مالطا ناس محترمين و بناءا على تعليقات من الناس اللى قدموا عالتأشيرة فى سفارة مالطا انهم بيدوا التأشيرات بسهولة و بدون تعنت.

 

بس لازم تعمل الخطوات بالظبط زى ما انا كتبتها... مينفعش تقدم عالتأشيرة من غير ما يكون باين على جواز سفرك انك راجل بتسافر و كدهون.

 

دى اسهل طريقة آمنة معروفة للسفر لأوروبا... 

تحذير تانى و توكيد... متقدمش عالتأشيرة من غير ما تكون سافرت تركيا و دبى و ماليزيا... لإما نسبة الرفض هتكون عالية جدا.

 

ربنا يكرمك.

[حسين امبابي]

نلتمس من الاخوة المتابعين للموضوع والمشاهدين ايضا ان يدلو بدلوهم ف هذا الموضوع فنحن بأذن الله لن نطلب منهم شئ مطلقا سوى خبراتهم وتجاربهم فقط .

[حسين امبابي]

حتى المنح الدراسية صارت سبوبة !!!

لاحول ولاقوة الا بالله

[حسين امبابي]

ثم ماذا بعد الجولة السياحية صديقي الجميل المحاور ؟

[Guest محاور]

صديقى الوفى حسين امبابى،

حاسس انك تقصد نادر بكار بموضوع السبوبة و المنح الدراسية، و إن كان مجرد تخمين... مش متأكد.

 

بالمناسبة يا حسين مشكلتك هى نفس مشكلة جيل كامل... و عشان كده انا مهتم بموضوعك ليس بشكل شخصى و لكن لإنك تحمل هموم جيل... او جيلين... او حتى ربما 6 اجيال كاملة عاشت اوهام ما كان ينبغى لها ان تعيشها.

 

عشان كده انا برضه عايز افهم انت ناوى على ايه؟

 

أما بالنسبة للجولة السياحية، فأنت بمجرد ما هتاخد التأشيرة خلاص ماترجعش و شوف الدنيا هناك بنفسك... لو اتأقلمت و الحياة عجبتك ماشى... بس يا سيدى. :)

 

و لا أخفى عليك ان الحياة اكيد هتعجبك فى الأول... لكن بعد كده هتحس بملل و مش هتبقى مهتم قوى انك عايش فى جو نضيف او بتركب المترو مع ناس محترمة او كل مظاهر الحضارة دى، لإنها هتبقى شىء طبيعى بالنسبة لك و هتفقد احساسك بقيمتها... و سيظل امامك ان تجتهد و تعمل بكد.

 

و مش هيبقى متاح قدامك غير وظايف البارات و المطاعم فى الأول... عشان كده بقول لك لو انت جد اتعلم صنعة... حتفيدك جدا فى اوروبا و الدول المتقدمة لما ربنا يكتب لك انك تروح بإذن الله.

 

و فى النهاية عايز اقول لك يا ريت تتوكل على الله بجد و اخلص له النية...

اخلص له النية فى التوكل عليه و ان يتولى هو جميع امورك و شئونك...والله هتشوف العجب العجاب.

 

انا لما بتوكل على الله بتحصل معايا معجزات لو قعدت عشرين سنة عشان ارتبها و اخطط لها، عمرى ما كنت هعرف اعمل حاجة ولا احقق اى شىء.

 

ثق فى الله ثقة عمياء.

[MZohairy]

نصيحه صغيره يا حسين  و أخيره.........

اذا كنت مسلم بحق و حقيقي زي مانا عارف ...

و عايز تمشي من مصر لأنها لا تطبق شرع الله....

يبقى ماينفعش تسافر لبلاد تانيه و تخالف قوانينها  بالبقاء فيها  بعد انتهاء تأشيرة السياحه

لأن ده كذب.....و حرام......و خداع

ازدواج المعايير آفه ارجوا الا تصيبك

يا تبقى مسلم و تطبق الاسلام في كل حياتك.....يا تلعب اللعبه بدون ذكر الدين خالص

 

ربنا يوفقك 

[حسين امبابي]

يعني قصدك اكسر الفيزا يا محاور ؟ انا مبحبش كدا خالص

[حسين امبابي]

موضوع كسر الفيزا دا مبحبوش خالص يا محاور

[حسين امبابي]

كابتن مصر ( زوهيري حبيبي ) انت في الزمالك ولا كندا عشان اجي اخد العيدية منك باليورو . الموضوع موش تطبيق الشريعة في مصر الموضوع هو الظلم الاجتماعي والفقر والبطالة .

[MZohairy]

 

كابتن مصر ( زوهيري حبيبي ) انت في الزمالك ولا كندا عشان اجي اخد العيدية منك باليورو . الموضوع موش تطبيق الشريعة في مصر الموضوع هو الظلم الاجتماعي والفقر والبطالة .

 

 

كل سنه و انت طيب يا حسين

انا كنت طول عمري في الزمالك و هاجرت لكندا من 8 سنين

اللي اقصده من كلامي انك ماينفعش تبقى مسلم بصحيح و بتقول قال الله و قال الرسول  و تروح تقدم على تأشيره سياحه و يكون في نيتك كسرها (خداع و كذب)

و بعدين تروح لها و تقعد فيها مخالفا لقوانينها (خداع و كذب)

كل ده مخالف لاخلاقيات المسلم اللي بحق و حقيقي

 

لذلك بقولك طالما مسلم (بحق و حقيقي) يبقى مفروض ماتمشيش في السكه دي اطلاقا

و دعواتي لك بالتوفيق

[حسين امبابي]

خلاص موش همشي طبعا في سكة كسر الفيزا

وكل سنة وانت بالف صحة

وسلامة يا كابتن مصر

تم تعديل 18 يوليو 2015 بواسطة حسين امبابي