الاهلى غمنا وحرق دمنا

[إبن مصر]

تعجبت من شريك النضال والكفاح الرفيق سى السيد انه لم يورد الى الان نتيجه مباراه الامس بين الاهلى .. وال... وال..... ( :) استغفر الله العظيم سامحنى يا رب ) الزمالك.. :wub:

ولكن يبدو انه اصابه ما اصابنى بعد المباره من اغماء وارتفاع فى ضغط الدم ولكن لبنيتى القويه وشخصيتى الرياضيه افقت قبل منه....

وها انا ذا .. اكتبها...

الاهلى غلب نفسه 2-1 وشلنى !!!!!!!!!!!!!!!!!!!!!!!!!!!!!!!!!

[محمد شلبى]

والله يا استاذ احمد انا مش عارف ليه كنت متوقع الماتش بالطريقة دى : :D

لكن والله احنا كنا كويسين جدا فى الشوط الاول لكن الله يجازيه جوزيه قلب الماتش بتغييراته الفشنخارية و كمان حبيب قلبه وننوس عينه اللى هيشلنا بيه الاخ فلافيو كمل علينا وفعلا خرجنا مغمومين :blink:

بس برضه

الاهلى عمهم وحابس دمهم :blink: :D :D :D

[kotoz9]

الكبير كبير........والنص نص نص...........والزمالك مانعرفوش....

ماعلش يا جماعة ......الماتش ده كان دلع كدة .......علشان نرفع الروح المعنوية للزمالك

الضرب فى الميت حرام

[نيرون]

هذه اول مداخله بعد سنه كاملة....

سنه كااااامله.. لم يسأل فيها احد عني ..

وكاني كلب جربان وخاللو بالكم من كلمة جربان!!

حتي حبيب قلبي ومهجة فؤادي واستاذى وملاذى وتاج راسى سي السيد لم يسأل عنى !!!!!! :D

ليييييييييييييييييييييييييييه :blink:

مش عارف؟؟ .

وشكرا للسادة الاعضاء اللي ماسالوش عني فرد فرد كلا باسمه والله اخجلتم توادعى وانشاء الله مردوده فى الغيابات الجايه!!!!!!!! :blink:

والذي دعاني للعوده الي الكتابة مرة اخري شئ اهم من السياسة والانتخابات والاقتصاد .........

متش امبارح بين الاهلي وعواجيز الزمالك (عزبة مرتضي منصورالبلد )

انا شايف ان جوزية يتحمل نتيجة الشوط الثاني ويخصم منه مرتب المتش ده

وكمان يرجع الواد المكسح فلافيو لبلده بعد خصم المكافات والحوافز وبدل اللبس وبدل ما يشحت وتسليمه للسفارة وابلاغ الانتربول عنه وكفايه كده قوى ..

اشى فلافيلو واشى كاستلو

عيال مكسحه ورجليها الاتنين شمال....

صحيححححححححححح

ملوا البلد sdm:

[Sherief AbdelWahab]

وأضيف يا عزيزي نيرون:

الزمالك ما كانش قوي الشوط الثاني ، ما ظهرش إلا بعد ضعف الدفاع الأحمر .. ولازم تكون فيه وقفة مع الأراجوز فلافيو .. اللي باين يقرب لكاستيلو المتخلف..

نفسي نجيب لاعيب أفريقي طبيعي..

خلص الكلام

[se_ Elsyed]

نيرووووووووووووووووووووووووووووون حبيب قلبي ..

ده أحنا من بعدك متلطمين يا ريس

والله العظيم واحشني ...

بس بالله عليك أنا لو كنت فضلت أنده عليك من الصبح كنت سمعتني وإنت في جونتانمو يا مان ؟

على العموم حمد لله عالسلامه يا جاي من جونتانمو ... واحشانا الإبتسامة .. العيال صاحيين ولا نامو :blink: ( دي حته ألفتها كده على الريق )

ما تمشيش بقى تاني وخليك هنا خليك .... ماجبتش الريس أفيونه في إيدك ليه .. وحشني هو كمان الفقري ده ...

نرجع مرجوعنا لتحليل المباراة الإفتكاسية بتاعت إمبارح

ولكن بعد الفاصل ( وش أحمد منصور اللي متعاجب بحواجبه ... أول مره اشوف واحد حواجبه بتوصل لحد شعر راسه )

[KWA]

بسم الله الرحمن الرحيم

السلام عليكم ورحمة الله وبركاته

ما هي سر هذه الفرحة الكبيرة لجماهير الزمالك بعد المباراة رغم الهزيمة ورغم الأداء الضعيف ....وما هو سر حزن جماهير الأهلي رغم فوز الأهلي وهو في أسوأ حالته على الزمالك ؟ فقد كان الأهلي في شوط المباراة الثاني في أسوأ حالاته بالفعل وعلى الرغم من هذا فاز بل وأضاع فوزا كبيرا على الزمالك الغريب في الأمر أن مسئولي الزمالك تمادوا في خداع جماهيرهم وكأنهم فريق من المبتدأين لا يضم بين صفوفه مجموعة من لاعبي الكرة في مصر على رأسهم حازم إمام وجمال حمزة ووائل القباني واينو ووليد صلاح وصاحب الهجمة الوحيدة على مرمى الحضري وعادل فتحي الذي قال عنه فاروق جعفر انه أحسن مدافع أيمن في مصر ....الفرحة التي ظهرت على وجوه الجميع بعد المباراة من جماهير الزمالك تؤكد شئ من الاثنين إما أن الجماهير لا تثق في لاعبيها ولا في ناديها الذي تشجعه وإما أن هذا اعتراف ضمني من جماهير الزمالك أن الأهلي ليس له منافس .. لأن المنافس لا يفرح للهزيمة من منافسه .

[se_ Elsyed]

الأهلاويه زعلانين لإن طموحهم كان إنهما يسحقوا الزمالك ويخلوه يبطل كوره ويسرح بعجوه ...

والزملكاوية فرحانين لإنهم طلعوا بأقل خسائر ممكنة ويكفي تصريح فاروق إبن جعفر اللي قال إنه إستطاع أن يوقف هزائم الخمسات والستات ( قال كده فعلاً ) شوفتوا الخيبة التقيلة ؟ يعني ده أقصى طموحهم ..

وسين سين فرحان لإن نتيجة الأمس أعطت طعم للمباراة القادمة حيث إن الزمالك بقى عنده أمل ( وعمر وحازم ) وبالتالي هايضطر يلعب مفتوح عشان يعوض اللي خسره على ترابيزة إمبارح وهو ده اللي إحنا عايزينه .. هنا بقى نضرب ضربتنا التقيلة ونرجع أمجاد الخمسات والحركات ونستلهم من شهر أكتوبر الإنتصارات والضربات الجوية تحت قيادة ( العبور للمستقبل )

الزمالك عنده مشكلة كبيرة وهي إن دفاعه شوربه .. وما زاد الطين بله هو حصول معتز إينو وأحمد بكري على الإنذار التاني بالأمس ( عايز أقدم إلتماس للحاج عيسى حياتو يرفع الإيقاف عن أحمد بكري .. حبيبي وإبن حبيبي ) .

الاهلي مشكلته بتتركز في طموح جماهيرة وتطلعاته للوصول إلى اليابان ... وبإذن الله هايحصل وده في مصلحة مصر والنادي الزمالك ... ده بجد مش تهريج .. لإن الزمالك لو - لا قدر الله - راح اليابان هايضحك علينا بتوع شرق آسيا .. أما الأهلي ففريق مُنظم ويمتلك القدرة على إنه ينافس في أي بطولة.. وخصوصاً إن أول مباراة لبطل أفريقيا هاتكون مع بطل أسيا اللي غالباً هايبقى عربي ما بين الإتحاد السعودي أو العين الإماراتي .. واللي هايغلب هايقابل سانتوس أعتقد أو ساوبولو البرازيلي .. وفرق البرازيل غير منتخبها شكلاً وموضوعاً واللي هايغلب هايقابل ليفربول اللي مش فلته زمانه ....

وفي اليابان بقى الساعة بخمسة جنيه والحسابة بتحسب .. يعني كل ماتش بتلعبه بتتعكم أرنب ماركة جورج واشنطن .

نرجع مرجوعنا لمباراة الأمس .

مازالت اقول إن دي أسوء مباراة أدارها الخواجة مانولي إبن جوزيه اللي عمل تغييرات إفتكاسية خزعبلية وديتنا في داهية .. والراجل بقى شبه الجهاز المركزي للمحاسبات اللي بيفرض على التليفزيون يذيع الفيلم من دول 100 مره في الشهر عشان يخلص بحقه ... وجوزيه بيعمل كده مع فلافيلو اللي ماشي على نفس خُطا كاستيلو - فاكرينه بتاع السنة اللي فاتت - فالواد لسه ما أتأقلمش مع لاعبي الأهلي مع إنه مُبدع في منتخب أنجولا وكان سبب من أسباب وصولهم لكأس العالم في المانيا 2006 .. ولكن مع الأهلي عنده كُساح وشلل رعاش ... يبقى كان من الأولى يا مانولي إنك تركن أهله وتلعب سيد سيده أسامه حسني ... وعايز أفهم سر تغيير إسلام الشاطر اللي عمل ماتش رائع بشادي محمد وكإنه بيقول والله زمان يا سلاحي وإعمل حيطه يا ولد ... أما خروج حسام عاشور الشهير بحسام خورشيد ( زي ما سماه جدو حماده أمام امبارح ) فهو عين العقل ولكن كان فات الميعاد وفاضل 3 دقائق ومحمد عبد الوهاب اللي في الماتشات الأخرانية برقبة جيلبرتو والواد مالحقش يعمل حاجة وكان المفروض ينزل من بداية المباراة أو على الأقل من بداية الشوط الاثني لتنشيط الجبهة اليسارية ...

محمد أبا توريكه .. بقى له فترة بيشاور عقله يغير إسمه إلى محمد بيبو ( تشابهاً مع خالد بيبو ) يعني شكله عنده اصابه نفساوية أو مشاكل عائلية وشويه شويه هايلاقي نفسة في أقرب صفيحة زبالة جنب خالد بيبو يونسه في وحدته ..

بركات وعماد متعب لعيبه عالميين من غير كلام .

خط دفاع الأهلي واقف على رجله بخطوات ثابتة وممتازين بصراحة .

عصام الحضري جرجر رجل نادر السيد ودفنه في مقبرة الغزاة وتألق على قفاه .

حسن مصطفى .. الواد ده لو عنده أسانس مهارات كان يبقى حكاية ولن أنسى له الجون اللي طفشه إمبارح .

--------------------------------------

أما الزمالك فعبد المنصف ظهر على إنه عملاق مقارنة بالستة اللي شربهم قبل كده وعمل إنجاز إمبارح لإنه مادخلش فيه غير جونين بس .

دفاع الزمالك شوارع من نار وعدي يا ليله .. ثلاثي رهيب مدحت أبو عبهادي والقباني وبكري بدون مبالغة لا يصلحوا إلا في اللعب في مركز شباب منيا القمح .

خط وسط الزمالك ... ضاع واللي كان كان .

الهجوم ... العندليب أنقطعت أحباله الصوتية وكفايه عليه كده ...

وليد صلاح عبلطيف .. بأطمئن جداً لما بيلعب قدام الأهلي لإن لو المرمى مفتوح وعصام الحضري كان بيصلي العشا برضوا مش هايعرف يُحرز أهداف .

حازم إمام .. مهارة فردية عالية بدون لياقة ممارسة لعبة ككرة القدم ولكن بيلعب مع شوية مشاليل .

جمال حمزه .. مالحقش يمثل أي دور على خشبة المرسح إمبارح أو يتملطص في الأرض .

فاروق ومرتضى والجوقه .. في منتهى السعادة حيث إن مباراة الأمس جاءت لهم طوق نجاة قبل إنعقاد الجمعية العمومية في نهاية هذا الشهر وبعد عدة أيام .. حيث انهم جميعاً يتباهون بإنهم إتغلبوا إتنين بس .

خلاص كده أنا تعبت

[sika77]

ياجماهير الأهلي مش كل مرة الأهلي هيدخل 6 أجوال في الزمالك

تم تعديل 29 سبتمبر 2005 بواسطة sika77

[عبده بيه]

مبروك للزمالك وهي دي الكورة مدورة والشاطر يكمل للاخر يا جماعة

[Ahmad Farahat]

إنتوا بتتكلموا ف إيه

[بنت النيل]

الاهلى غمنا وحرق دمنا

:blink: :)

هو ده شعار الاهلى الجديد

انا جايه اهدى النفوس واروق الدم بس :D

انامش قد عمو سين سين :P

[رمضان]

على رأي المثل الخواجة لما بيفلس بيدور في دفاتره القديمة

[ابو ايمان]

على راى المثل الحديث

الاعلى عمكم وحارق دمكم

بمعنى لو حبيتوا تقولوها الاهلى عمنا وحارق دمنا

[Ahmad Farahat]

أنا نفسي أسأل بس............

غمنا وحرق دمنا فإيه بالضبط..........