الفرق بين ان تختلف و ان تتخلف

[MZohairy]

ما الذي يدعوني للكتابه في منتدى يختلف توجهه الديني و السياسي عن توجهاتي 180 درجه؟

 

ايه اللي يخليني انا مثلا اروح اكتب في منتدى اخواني؟؟؟؟؟؟؟؟؟

 

هل لهدايتهم؟ ابدا مش هيحصل

 

هل للوصول الى حلول وسط و نقاط اتفاق؟ ابدا مش هيحصل

 

هل للانتصار الفكري عليهم؟ ابدا مش هيحصل

 

هل علشان اشتم و اجري؟ ابدا مش هقدر و هيطردوني

 

افهم ان اتحاور مع من يجمعني بهم بعض النقاط الفكريه المشتركه 

 

اما ان اسعى جاهدا ان اتحاور مع من يختلف معي اختلافا تاما كل الاختلاف....فهذا يوضح جليا الفرق بين ان تختلف و ان تتخلف!!!

[حسين امبابي]

عيني عليك باردة يا كابتن مصر

بالصلاة على النبي

حضرتك شعلة نشاط وموضوعات

فين الإختلاف مادام سعادتك بـ تجزم بإنتفاء النقاش

ما هــــــو لأبيض لأسود هنتناقش ولا هنتخانق

انا من زمان بقول أن حالنا هنا في المحاورات لا يختلف كثيرا

عن ساحة الملاكمات هناك مكبول ولاعب طليق

الطليق يريد الفوز بالضربة القاضية على المكبول

وفي نهاية المبارة لا مانع مطلقا من التوجه لمصافحة الخاسر

بل ورفع يده بجانب يد الفائز كروح رياضية .

 

نقول تاني يا كابتن مصر .....

[أبو محمد]

ما الذي يدعوني للكتابه في منتدى يختلف توجهه الديني و السياسي عن توجهاتي 180 درجه؟

 

ايه اللي يخليني انا مثلا اروح اكتب في منتدى اخواني؟؟؟؟؟؟؟؟؟

 

هل لهدايتهم؟ ابدا مش هيحصل

 

هل للوصول الى حلول وسط و نقاط اتفاق؟ ابدا مش هيحصل

 

هل للانتصار الفكري عليهم؟ ابدا مش هيحصل

 

هل علشان اشتم و اجري؟ ابدا مش هقدر و هيطردوني

 

افهم ان اتحاور مع من يجمعني بهم بعض النقاط الفكريه المشتركه 

 

اما ان اسعى جاهدا ان اتحاور مع من يختلف معي اختلافا تاما كل الاختلاف....فهذا يوضح جليا الفرق بين ان تختلف و ان تتخلف!!!

 

مش كله يا مايسترو بيكتب لنفس الهدف

 

فيه اللى طبعه غيَّاظ وكيَّاد .. يدخل فى وسط المختلفين معاه عشان ينكد عليهم

على رأى الريحانى .. هو كده .. طبعه كده .. خلقته كده

 

وفيه اللى عاوز يعرف ويتعرف على المختلف معاه

بهدف وضع أفكاره المختلفة مع أفكارهم موضع اختبار

جايز يستفيد .. جايز يراجع أفكاره .. أو جايز يكتشف إنه على حق (أكتر واكتر)

 

وفيه اللى بيدخل فى وسط المختلف معاهم عشان يلعب دور المعارضة والبطولة أو دور المظلوم

(ده فى الغالب بيتفرج على أفلام عربى كتير)

 

وفيه بقى اللى بيدخل فى وسط المختلف معاهم عشان يمارس ماسوشيته (حب تعذيب النفس)

[MZohairy]

انا اقصد لو فيه 10 نقاط و متفقين في 3 بس و مختلفين في 7......ممكن نتناقش 

انما لو مختلفين في العشر نقاط كلهم ....و بشده......هنتناقش فيه ايه؟

و ازاي؟

[Grandma]

الشد و الجذب بيحقق نوع من أنواع المتعة 

[أبو محمد]

انا اقصد لو فيه 10 نقاط و متفقين في 3 بس و مختلفين في 7......ممكن نتناقش 

انما لو مختلفين في العشر نقاط كلهم ....و بشده......هنتناقش فيه ايه؟

و ازاي؟

اللى مختلف فى الـ 10 نقط وبيتناقش بيبقى عنده أمل يجذب الطرف الآخر

وما لا يدرك كله لا يترك جله .. وأكيد هو بيكون حاسب حساب منفعة ما

حتى لو جعل الآخر يوافق على نقطة أو نقطتين من العشرة

بس فى الغالب النهابة بتبقى إما يأس وابتعاد أو كرسى فى الكلوب

ومقولة "اختلافهم رحمة" لها أساس من القرآن

"ولولا دفع الله الناس بعضهم ببعض لفسدت الأرض ولكن الله ذو فضل على العالمين"

[tarek hassan]

هو فيه صنف معين كده تلاقي الواحد فيهم قليل العلم أو عديم الثقافة ولو جبت له معلومه جديدة غير اللي هو حافظه ووجد آباؤه عليه وذويه تلاقيه يتشال ويتهبد ويتنطط وينعتك بأبشع الاتهامات من غير تفكير

فعلا دا مش بيختلف دا عدو ما يجهله

الاختلاف يكون بين فكرين أو بين طريقتين في التفكير أو بين فهمين أو بين اجتهادين

ولا أظنك تختلف مع جاهل أو جامد الفكر أو  متكبر

فمادة اختلف على وزن افتعل فيها مشاركة وهؤلاء لا يشاركون أو يناقشون إلا مع أنفسهم ومن هم على شاكلتهم ومن ثم لا يسمحون بالرأي المخالف

ويكون ردهم عليه الشوشرة واللغو في كلامه أو الاستهزاء به أو شبه أو تكفيره

[herohero]

ممممممممممم منتدانا اسمه محاورات المصريين يعني اكيد احنا مصريين ومعروف اننا كمصريين بنتقبل الاخر بسهولة جداااااااااااااااااااا ، واللي يمشي ف الشارع دلوقت يقدؤ يعؤف اد ايه اننا بنتقبل الاخر وبنسيب كل واحد في حاله ومش مقتنعين ان مفيش زينا واننا احسن شعوب الارض 

 

للاسف اي حد بره مصر لو جرب يتناقش مع حد مش مصري هيحس فعلا بمتعة الحوار والنقاش اما لو كان النقاش مع مصري هيكره الحوار واليوم اللي اتعلم فيه الكلام وهيتمنى ان كان لا يري ولا يسمع ولا يتكلم 

 

الحال عندنا في مصر وبينا كمصريين ،ان لم تكن معي ومتفق مع ارائي فانت ( خائن -عميل - متخلف -رجعي - من الطابور الخامس - ارهابي - كائن لولبي - زومبي )

 

وع فكرة ده في نقاشات كثيرة مش بس ما يختص بالسياسة في كل شئون الحياة 

 

 

حلمي اننا في مصر نناقش الفكرة او الموضوع بعيدا عن صاحبه وشخصه !!!!

 

حللللللللللللللللم صعب المنال 

تم تعديل 27 يوليو 2015 بواسطة herohero

[MZohairy]

مستحيل

[Grandma]

مستحيل

 

ايه اللي مستحيل يا جماعة .!!

 

ما احنا آهو بنتحاور رغم اختلاف افكارنا و توجهتنا و بناقش افكار مش اشخاص لاننا ما تعرفش بعض 

[MZohairy]

بتكلم على المختلفين 180 درجه سياسيا و دينيا

[Grandma]

بتكلم على المختلفين 180 درجه سياسيا و دينيا

 

ما انا كمان بتكلم عليهم 

[MZohairy]

عندنا دلائل عمليه هنا كتير على فشل ربعوميت الف حوار

[Grandma]

عندنا دلائل عمليه هنا كتير على فشل ربعوميت الف حوار

 

مش مهم النتيجة المهم ان فيه حوار 

 

و بعدين مين قال اننا فشلنا ؟!!

 

لابد ان كل طرف أثر في الأخر بطريقة أو أخرى .

 

الموضوع مش يا أبيض يا أسود 

 

و الدليل لو عاش اسلامي متشدد لبلاد الغرب  في الغالب بيرجع أقل تشددا 

[MZohairy]

احنا وصلنا لمرحلة نقاش الشيخ المتشدد مع القسيس المتشدد للاسف

[herohero]

الحوار ليس الهدف منه اقناع طرف من الاطراف ،بل انني ارى ان الاختلاف يثري الحوار. المهم هو احترام كل طرف للاخر ويظل الاحترام هو سيد الموقف

[MZohairy]

ولا فيه احترام كمان

ده بيكفر ده و ده بيغيب ده

ده بيوصف ده بالمطبلاتي و ده بيوصف ده بالارهابي

حوار ايه بس و احترام ايه!!!!

[herohero]

ولا فيه احترام كمان

ده بيكفر ده و ده بيغيب ده

ده بيوصف ده بالمطبلاتي و ده بيوصف ده بالارهابي

حوار ايه بس و احترام ايه!!!!

ماده المشكلة اننا مش عارفين نختلف برقي

[MZohairy]

نرتقي ازاي بس بذمة ابوك يا هيرو؟؟؟؟

شعب نصفه جاهل أمي

و نصفه المتعلم (هو مش متعلم ان جيت للحق بس خلينا نمشيها متعلم) جزء كبير جدا منهم بيكتب اسمه بالعافيه و ثقافته معدومه او مغلوطه او مشوهه

عندنا كمصريين كمية عنصريه مهوله

كمية تحزب و كمية عدم رحمه بغيضه

 

نرتقي ازاي؟

[herohero]

نرتقي ازاي بس بذمة ابوك يا هيرو؟؟؟؟

شعب نصفه جاهل أمي

و نصفه المتعلم (هو مش متعلم ان جيت للحق بس خلينا نمشيها متعلم) جزء كبير جدا منهم بيكتب اسمه بالعافيه و ثقافته معدومه او مغلوطه او مشوهه

عندنا كمصريين كمية عنصريه مهوله

كمية تحزب و كمية عدم رحمه بغيضه

 

نرتقي ازاي؟

لا حضرتك متحامل على المجتمع المصري 

شعب حضارة 7000سنة ، ومتدين بطبعه ،وبيتقبل الاخر . حضرتك مقتنع انه مايعرفش يتناقش ويتحاور