البيت من غير جنس لطيف .. قول يا لطيف ..!!

[achnaton]

من الفجر النهارد التليفون ما بطلش رن .. .. رغم ان النهاردة السبت .. يعنى الواحد ينام براحته .. ويصحى برضه براحته .. صحيح رئيس الحكومة المحلية .. المفترى .. بيخرج ويسبنى طول النهار .. يشترى احتياجاتنا للأسبوع كله .. وانا بأنشغل بلعب الطاولة الحوار مع راوائح الأحبابب .. زملاء الاغتراب .. رحت طبعا جرى لابس هدومى ومن غير فطار على الجمعية .. افطر هناك .. واتلم على الجرايد المصرى اللى وصلت فى طيارة امبارح ..

وهناك اتغميت .. لقيت العشرة بقوا أثنين .. وكثير منهم سايب رسائل مكتوبه .. ومتعلقة على اللوحة .. السبت الجاى حاكون موجود .. بإذن الله .. وسألت المدير .. إيه يا عم بدير ؟؟ رحلة جماعية ..؟؟ رد وقال لأ يا باشا .. دى الرحلة السنويه .. الناس راحت تشوف أهاليها فى مصر فى الطيارة بتاعة امبارح .. وتقضى معاهم أول يوم فى رمضان .. وفى الحقيقة خدت فى الركن بتاعى هناك مكان .. وقعدت لوحدى غلبان .. اتسدت نفسى عن الفطار .. وتذكرت .. ده آخر سبت قبل دخول رمضان .. وفيه فعلا الطيور المهاجرة بترجع بيوت أهاليها .. يسعدوا بيهم ويسعدوا بيها .. وبينى وبينى نفسى دار السؤال فى دماغى .. إشمعنى يعنى حبايينا العزاز فى المنتدى.. راحوا زيارة ومرجعوش تانى ؟؟ وآهو ده تانى رمضان .. اسأل الله أن يقضوه معانا .. وتعود حلاوة المنتدى زى كانت زمان .. ونتمع بفيروزتنا .. وتضئ المنتدى تانى منارتنا .. ونستمتع بسهرات الاوسطى حشيش .. من غير ما ندفع مليم بقشيش .. ومفيش داعى اكرر باقى الاسماء .. :)

واسمحوا لى أن انادى عليهم بأسمكم .. البيت من غيركم فاضى .. واعملوا زى الكتير من الحبايب ..ويا بخت من زار وخفف واهلا وسهلا بيكم .. حتخلونا نقضى السنة دى .. احلى ليالى رمضان .. !!

إياك على الله تكونوا سامعين .. وعلى العموم كل سنة وانتم طيبين ..

تم تعديل 1 أكتوبر 2005 بواسطة achnaton

[محمد شلبى]

عمنا اخناتون

يظهر ما فيش أمل ، حبايبنا خلاص نسيونا و مش راجعين تانى و مش عارف ازاى مطاوعاهم قلوبهم على القسوة دى كلها و احنا عمرنا ما عهدناهم كده

على العموم

نداء اخير لكل الحبايب

يا ريت نلبى دعوة عمنا اخناتون ونتلم هنا فى رمضان وكفاية بقى الغيبة دى كلها

[achnaton]

يا ابو شلبى .. انت اصلا راجل متفائل ..فخليك متفائل دائما والحبيب لا ينسى ابدا .. صحيح ممكن يتقل عليه شوية .. لكن الذكريات الحلوه لا يمكن ابدا نسيانها .. وعشان كده حنكرر النداء مرات ومرات حتى ولو ادى هذا ان نستأذن " الشيخ سيد ملح الطعام " بتاع كله انه يصدر فتوى بجواز نكرار الدعوه عقب شرب شوب قمر الدين فى الافطار .. وبعد كل طبق فول فى السحور.. وابقى شوف الدعوه دى ازاى على الكل حتدور .. ويجى الشيخ بذاته يعلق على الباب فيروزة جنب المناره ..