كيف اصبح رجل اعمال 1000 جنيه 20 سنه (انهرده انا 27 سنه) شكر لكل اللى نصحني

[kotb88]

السلام عليكم

 

مش عارف ابدأ منين .. انا صاحب الموضوع ده الموضوع ده كتبته فى 2008 وكنت عندي حماسه غير عادية وطموح كبير جدا ... كان نفسي افتح من نفس اليوزر بس مش فاكر الباسورد بتاعه وكمان مش فاكر اصلا الايميل اللى عملت منه اليوزر

المهم

انا محمد قطب فى 2008 كنت فى سنه اولى كلية وكنت بشتغل فى سيبر باخد فيه 350 جنيه فى الشهر كنت بصرف على مصاريف كليتي ودراستي وكنت فرحان اوى انى جمعت الف جنيه وكان عندي طموح كبييير اوى برغم ان كل ظروفى كانت صاعبها كان والدى مطنشني انا وولدتي واخويا الصغير من وانا فى اولى ابتدائي ولولا اشتغلت وكملت تعليمي كان زمانى شغال تباع ولا سايس ولا اي حاجه مع كامل احترامى لكل شغلانه حلال بس كنت نفسي اوى اشوف نفسي حاجه كبيرة اوى وكمان اساعد كل اللى مر بظروفى

انهرده انا محمد قطب 2015 اتجوزت وبقضي شهر عسلي بشتغل فى شركة كبيرة فى البلد مرتبي اكتر من 3500 فى الشهر الحمد لله ربنا يعلم موصلتلهاش ولا بوسطه ولا بغيره بالعكس من اول ما اتخرجت وانا روحت قدمت فى مجال السياحه وفى كل حته جاتلى شغلانه فى فندق فى الغردقه روحت اشتغلت ب400 جنيه اغسل صحون مع انى معايا شهاده فى نفس المجال ومدير المطعم نفسه ممعهوش زيها بس ميأستش فضلت ادور على شغل تانى لغاية لما راديو شاك كلمونى روحت واشتغلت سنه فى الغردقه برضو تحويشة عمرى وصلت 20 الف قولت هبدأ البيزنس الخاص وروحت حطيتهم فى البورصه وقولت اتعلم بفلوسي جات الفترة اللى قبل ثورة 30/6 خسرت نص المبلغ واضطريت اسحب النص التانى عشان كنت قابلت بنت حبيتها ووعدتها اتجوزها فرمت فى نفسي وبدات اشتغل وانمى من مهراتى وادرس عالنت لغه واقرا فى بيزنس وحاجات كتير وقدمت فى حتت كتير لانى برضو حسيت انى فى راديو شاك هقف عند حد معين شوية وكلمتنى فودافون وعملت انترفيو والناس كانت مبهورة بالشخص الطموح ده قالولى تحب تشتغل فين قولت فى شرم عشان اكون بمارس شغلانتى اللى المفروض هي التعامل مع الاجانب واكتساب لغات وكمان الوضع المادى هيبقا احسن وقررت اعمل بيزنس بعد ماخدت خبرة كبيرة فى مجالات وطرق واستراتيجيات كتير فى ظرف تلات سنين كان رصيدي من شغلى والبيزنس الخارجي 150 الف جنيه صرفت منهم 100 على الجواز واتجوزت فى نفس معاد خطوبتي بعد سنتين بالظبط باليوم والشهر كل الناس كانت شايفه انه مستحيل انجز اللى وعدت بيه فى الفترة دى سنتين بالظبط مزادوش يوم الحمد لله حتى حمايا كان فخور جدا ازاى واحد محدش ساعده بمليم وعد ووفى وان مفيش حد فى سني عرف يوصل للى وصلتله بدون مساعده من حد الوحيد صحبي الانتيم اللى عمل كده ومتجوز بمساعدات من اهله وكمان مديون للبنك ب30 الف

انهرده انا محمد قطب متجوز شقتي تمليك بنيت بيتي فى سنتين بالظبط معايا راس مال مش بطال ابدأ بيه وانا عندي 27 سنه فى عز ان كل اللى حوليا وكل اللى عرفتهم فى سني منهم اللى لسه اصلا مش عاجبه البلد وحالها وبيدور على شغل

انهرده وانا قاعد مع نفسي افتكرت زمان وايام زمان وافتكرت البوست ده وقولت اخش اشوفه لسه موجود ولا لا ولما شوفته وقريت كلام كل الناس ابتسمت وقولت اللهم لك الحمد على اللى وصلتله وبجد بشكر كل واحد حاول يديني دافعه او يتكلم معايا وربنا يجعله ليكم كلكم فى ميزان حساناتكم

نصيحتي لكل واحد فى الدنيا دي اوعى فى يوم من الايام تيأس الدنيا فى كتيبيييييييير اوى ولسه مستنياك اسعى وحط في دماغك انك تكبر مهما كانت ظروفك وساعتها هتلاقي الدنيا بتسمع كلامك غصب عنها وهتطوع كل قوتها تساعدك لان ربك هو اللى هيأمرها بكده لو شاف منك رجوله واجتهاد

 

 

 

ده لينك الموضوع القديم

http://www.egyptiantalks.org/invb/index.php?showtopic=60041

[أبو محمد]

يااااااااااااه

أحمدك يا رب

من زمااااااان لم أسمع أو أقرأ عن شاب مثلك

تحياتى وتقديرى وإعجابى .. وكل هذه الكلمات لا توفيك حقك

     

ربنا يوفقك يا بنى

[Salwa]

من جد وجد ...ومن زرع حصد.

ربنا يرزقك دايما  ويغنيك بحلاله.

شكرا لأنك تذكرتنا عندما تحققت الأحلام .

[باهى الطائر الحزين]

فخور بك / محمد قطب

كما اثمن اصرارك علي النجاح

فخور بكل شاب مر بتجربتك

سواء حالفه الحظ ام مازال يحاول

لي عتب عليك / محمد

نسبت كل الفضل لنفسك ونسيت امك

متأكد وان السيده الفاضله والدتك كان

لها دور وكبير في نجاحك ..

انتظر منك اعادة الحق لأصحابه ..

تحياتي

[kotb88]

عندك حق انى فعلا مذكرتهاش فى الموضوع مع انها هى اللى بتقف جنبي لغاية دلوقت معنويا جدا وكانت ديما مستعده تضحي باي حاجه عشانى انا واخويا بس انا عارف انى مش محتاج اتكلم عنها قدام حد لان انا عارف انى مهما اتكلمت كلامى ولا هيقدم ولا هياخر فى ثوابها وحبها وتقديرها فى قلبي وانا على فكرة مش كاتب الموضوع عشان اشكر فى نفسي بالعكس والله انا افتكرت قد ايه كنت مصر وطموح ومكنتش عارف هل هوصل لحاجه ولا لا ودلوقت لما الحمد لله اتحطيت على اول الطريق حبيت ادي نصيحه لكل اللى فى سني والشباب كلهم فى مصر اوعى تيأس عمرك ماتخلى اى ظروف خلقها ربنا عشان يختبرك تعطلك ربنا لما هيشوف اصرارك برغم اى ظروف هتلاقيه بيفتحلك طرق تانية للنجاح .... اسعي وتوكل .... دول الكلمتين ملخص وسر النجاح

[باهى الطائر الحزين]

المرأة ؛

تصنع الرجال 

واشكرك بحال ...

[kotb88]

نفسي اقول لكل واحد عاوز يبدأ ابدأ ومتشغلش دماغك بحاجه ابدا ابدأ حتى لو ممعكش ولا مليم متعلقش نفسك باوهام ملهاش لازمه انا اتعرض عليا موضوع السفر كذا مرة .. مرة عن طريق الجواز من بنت اتعرفت عليها مصرية امريكية متجنسه ومرضيتش اولا عشان مسيبش امى واخويا الصغير وثانيا عشان ديما كنت عارف المثل القائل عويل بلاده عويل بلاد الناس وكمان على مدار السنين اللى فاتت عرفت ناس كتير صحابي كان حلمهم السفر ومنهم كتير سافر ولسه شغال بيمسح وينضف لغاية دلوقت ومنهم اللى شهور ورجع ومنهم ومنهم اعرف واحد منهم كنا بنلعب مع بعض فى الشارع وقدم على هجرة امريكا واتقبل والكلام ده من قبل ما اخش الكلية ومن قبل ما اكتب الموضوع الاولانى ولسه مقابله من اسبوعين نازل اجازة بعد حوالى 8 سنين سلمت عليه وسئلته عامل ايه ووصلت لفين قالى شغال فى محل بيتزا فى امريكا والدنيا مش زي ما كنا فاكرين ومحوشتش اى فلوس والعيشه غاليه والمصريف والظروف والجوبات والدنيا اللى كل شباب اليومين دول بقا بيستسهل ويقولها قولتله وهتعمل ايه قالى هرجع تانى وهشتغل زي مانا قولت بيني وبين نفسي انت اللى مش عاوز تكبر مع انك روحت اكبر دوله اى حد بيحلم يروح يشتغل فيها .... العيب بجد مش في البلد العيب في الشباب اللى مش عاوز يسعي ويفكر ... كلنا عاوزين يا نسافر يا اما نشتغل شغلانه قاعدين على مكتب ... صدقني ياللى بتقرا كلامى متفكرش كده ابدا اسعا وقوم اتحرك ودور على شغل اي شغل واشتغل ولما تحس ان طموحك مش هيكمل فى الشغل ده دور على غيره وغيره وغيره انا فى اربع سنين اتنقلت مبين تلات او اربع شركات لان ديما كنت بلاقي خلاص دي سقفها مش هيناسب طموحاتى فبقدم فى اللى بعدها ... وعلى مستوي البيزنس خليك ديما طموح ومثابر انا كنت بشتري حاجات مستعملها من اي حته او من عالنت وابيعها تانى على النت واحيانا كان يطلعلى الف جنيه مرة واحده فى البيعه واياك تخلى حد يهبطك انا فاكر انى مرة كنت واقف مع صحابي فيهم واحد ابوه كان جايبله عربية 127 وهو اصغر مني لسه فى كليه لغاية دلوقت فبيقول انه عاوز يبيعها عشان مبيعرفش يتعامل معاها قولتله تبيعها بكام قالى مش عارف بس ممكن لو ليك هكلملك ابويا على 5000 جنيه انا قولت اتعلم عليها السواقه وابيعها بعد كده وسألت واحد صحبي انتيم وعنده تاكس قعد يهبطني ودي وحشه ودي ملهاش لازمه ودي ودي ودي مع انى قولتله سعرها وان الشغل اللى فيها مش كتير بس كنت حاسس انه عاوز يهبط وخلاص وللاسف انا سمعت كلامه ... العربية اتباعت ب5000 ونص واللى خدها انا اعرفو صرف عليها حوالى الفين جنيه وقعدت معاه شوية ولما جيه يبيعها كان سوق العربيات غلى وكانت عامله 11 الف يعني كسب فيها حوالى 3000 بالميت ... اسعي ديما وتوكل على الله وغامر فى تجارتك بس مغامرة محسوبة جدا يعني لا تكون زي الناس بتاعة المعاشات بيخافو على فلوسهم من اي حاجه ولا تكون شبه العيال الصغيرة اي حاجه تشوفها ترمي فلوسك فيها ادرس واحسب وتوكل وربنا يوفقنا اجمعين

[magedcozaki]

Good job

[processor]

حمدا لله على سلامتك يا بطل

وألف مبروك على تحقيقك ممكن لجزء من اللي بتتمناه وهو إنك تمسك أول طريق النجاح

وتعرف تتعامل مع كل خطوة ازاي

انت شاب طموح وربنا يباركلك في كل خطوة

ولا تنسى صلاتك ودايما ما تنساش تحمد ربنا وتشكره على ما كل خطوة وصلت إليها

[andalusy]

هذا هو الشخص الناجح

لا يلعن الظلام ولكن يصنع النور بنفسه

تحياتي لك وانا متاكد انك سوف تصل لاعلي من هذا ولا تنسي ان تكتب حينها

[Eslam Reda]

اولاا؛ تحياتي ليك يامحمد ولكل الناس اللي نصحوك.. وانا بجد فخور بيك ع طموحاتك

وعايز اقولك اني نفس تفكيرك من 6 سنين..  

انا عندي 21 سنة بشتغل في شركة فضة عالمية مستثمرة هنا ف مصر بس الراتب قليل.. 

انا حبيت مجال الفضة وعايز اشتغل ف المجال دة..

بمعنى اني عايز اشتري فضة وابيعهاا خارج نطاق الشركة يعني وكيل مثلااا للشركة 

بس المشكلة هناا اني عاوز فكرة ناحجة ف مجال تسويق الفضة والمجوهرات..

نفسي اشتغل ف التجارة والتسويق لأنها بجد من أنجح طرق للوصول للقمة..