حضرتك صايم ولا زي كل سنة

[shahd]

الهمسة الأولى

صح النوم

سامح: بيحاول يكلم تامرمن الساعة3 العصر عشان يقولة هو ما جاش الشغل ليه وتامر نايم, يرد تامر بعد ما يزهق سامح

تامر : صباح الخير

سامح: صباح الخير ايه قول مساء الخير ده المغرب فاضل عليه خمس دقايق

تامر: اصحى ليه يعني ورايا ايه بس وبعدين ده اول يوم وانا تعبان ومصدع وواخد اجازة لحد ما يخلص رمضان

سامح: يا اخي كلنا صايمين بس بنصحى ونروح اشغالنا عادي هو انت لوحدك الي صايم

تامر: ياعم كل واحد وليه قدراته انا مش بستحمل الجووع وبنام طول النهار عشان انسى

سامح: تنسى ايه يارايق انت ماهو انت لو بتروح شغلك وتأدي كل الي عليك حيعدي اليوم ومش حتحس بحاجة

تامر : يييييييييييييييييه ياابني انت حد عينك وصي علي سيبني في حالي وكل واحد ينام عـ الجمب الي يريحيه

سامح: ماشي ياسيدي اعمل الي يريحك انا مش حتقل عليك بس والله حرام الشهر يضيع في النوم

تامر: يادي الملل الي احنا فيه بقلك ايه خلاص من بكرة حصحالك من النجمة

سامح: تصحالي انا ماشي يا سامح انا بتكلم عشا ن مصلحتك مش عايز الأجر يفوتك دا احنا لسه في اوله واوله رحمة

تامر: طيب طيب خير خير يلا مع السلامة المغرب اذن حروح اكل

سامح: مع الف سلامة وكل سنة وانت طيب

تامر : اخيرا قفل حاجة تفلق

تم تعديل 12 ديسمبر 2005 بواسطة شهد

[shahd]

الهمسةالثانية

المسلسل ده حلو بشاااااااااااااااكل

رجاء رجعت من صلاة التراويح وبتسأل عن صاحبتها مروة

رجاء : ازيك يامروة كل سنة وانت طيبة

مروة : بخير الحمدلله بالصحة والسلامة .......... رجاء شفتي المسلسل من اول حلقة باين عليه تحفة

رجاء : لاوالله اصلي لسه راجعه من صلاة التراويح

مروة’ اه كان نفسي اروح بس المسلسل جذاب جدا كان مستحيل اسيبه

رجاء: ايوة يامروة بس المسلسل مش حيطير وحيبقى يتعاد بعد رمضان مية مرة بس صلا التراويح حتفوتك

مروة: اصل انا مش بحب اصلي في الجامع

رجاء : ياستي مش ضروري تصلي في الجامع صلي في البيت

مروة: ان شاء الله بعد المسلسل حصلي

رجاء: هو بيخلص الساعة كام

مروة : بصي يارجاء انا مش بتابع مسلسلات كتيرة هما 10 بس واخر واحد بيخلص الساعة 2 صباحا

رجاء: يااااااااه يبقى لا في تراويح ولا أي حاجة ياروح قلبي يامروة الشهر حيضيع في التلفزيون

مروة : اعمل ايه بس كل ما اقول حتابع مسلسل واحد بس الاقي نفسي متسمرة قصاد التلفزيون اصلهم بيجيبوا كل الحاجات الحلوة في رمضان

رجاء: عارفة يامروة بس احنا لينا عقل نفكر بيه ومش كل حاجة لازم نشوفها ودي كلها اغرءات وكلام فاضي

انا مش بقلك ما تشوفيش حاجة خالص بس حاولي تدي لكل حاجة حقها

مروة اوكي اوكي يار جوئة سلام دلوقتي لحسن المسلسل ابتدى اكلمك بعدين بااااااااااااااااي

تم تعديل 12 ديسمبر 2005 بواسطة شهد

[shahd]

الهمسة الثالثة

اختشي على دمك احنا في رمضاااااااااااان

حكيتنا النهردة ما فيهاش لا فلان ولا علان حكيتنا النهاردة بنشوفها قدامنا في شهر رمضان

الي بيسبح وال ما كانش يعرف طريقة القبلة بقى يصلي والي ساكت

ولما تكلمه يقلك اللهم اني صائم

وده يغض البصر والتاني وكل ده جميل وعال العال

ولما يأذن المغرب وبعد ماتملى الماعون ويجي وقت المزاج

ونشرب كباية الشاي ونروق ونخرج بقى وساعتها تشوف العجب

اشي معكسات وشباب على بنات ويا جميل انت ياحلو خد نمرة تليفوني عايزة اكلمك ضروري

على فكرة دي البنت الي بتعاكس الولد والواد مش بريئ يعني ماهو ماشي في الشارع عمال يوزع ابتسامات هنا وهناك

والتاني بيعاكس اخت صاحبه طب ياواد اختشي على دمك وروح شوفلك واحد تانية

ولا الشيشه وقعدات الشيشة ايه مالك ما تحبكياهاش ما فطرنا خلاص سيبونا نفك عن نفسنا هو كبت باليل وبالنهار

وشله فسدانه على تاني خربانه وشوف المنظر وحاجة تمخووووول

ما علينا واشي انتر نت ويا نهار اسود على بيتشاف ومقابلات وخروجات

والي انقح من كده مواعيد غرام في الشهر الفضيل وفين في الحرم

ايه قولك بقى مش حاجة تجنن

تم تعديل 12 ديسمبر 2005 بواسطة شهد

[shahd]

الحلقة الرابعة

اللهم ديمها نعمة

علاء ومحمد جيران وزمله في المدرسة بس محمد من عيلة غنية

عيلة محمد سفرتهم دايمان ملليانة ومن كل الأصناف وهما يادوبك محمد وبابه ومامته اما علاء فعيلة فقيرة ويادوب الي جاي على قد الي رايح ومكونين من علاء واخواته التسعة وباباه ومامته وللعلم بالشيئ دول جيران كمان والباب في الباب

ايه رايكم نشوف حكايتهم

محمد وصل من المدرسة تعبان وهلكان وداخل على المطبخ على طول وبيسأل الطباخ عملت ايه النهارده

الطباخ: كل الأصناف الي حضرتك كتبتها

الام: اهلا يا روح قلبي يلا روح اغسل وشك وغير هدومك علي بال ما الفطار يجهز اهوالمغرب فاضل عليه نص ساعة

علاء يوصل من الشغل مع باباه ماهو اصل علاء بيدرس ويشتغل

علاء: السلام عليكم ازيك ياست الحبابيب عاملة ايه

الأم : الحمدلله رب العالمين

علاء: ها ياست الكل طابخه ايه النهاردة

الأم : تروي علاء صنف واحد مافيش غيره

علاء: فضل ونعمة من ربنا حد لاقي

يأذن المغرب والكل قااعد على السفرة وياكلوا ويحمدوا ربنا والأب والأم ياعيني عليهم يعملو ا شبعانين عشان خاطر الولاد ياكلوا ويشبعوا

مامة محمد تنده عليه يلا ياحبيبي الفطار جاهز

محمد حاضر ياماما وتعالا شوف السفرة دي اصناف اشكال والوان ربنا يزيد ويبارك

ياسبحان الله دي تأكل 10 من زي عيلة علاء

الأكل يفيض ويترمي في الزبالة وفي اللحظة دي يخرج علاء ووالده عشان يروحوا يصلوا التراويح وكمان يخرج محمد ووالده برضه عشان الصلاة

علاء يبص في الزبالة وقول مش حرام كده ربنا ينتقم منكم

الأب : لا ياعلاء قول ربنا يهديهم ويديم نعمته عليهم وقول يارب يسترها معانا ويديم نعمته وما يخليناش نحتاج لحد ولا نبص لأي حاجه في ايد غيرنا

علاء : حاضر يابابا امين يارب

[shahd]

الحلقة الخامسة

بتعبد رمضان ولا رب رمضان

ريهام ورانية اختين بيحبوا بعض موت متفقين في كل حاجة واي حاجة خير وشر حق وباطل كل سنة في رمضان بيتقوا على حاجة ياترى السنة دي حيتفقوا على ايه

ريهام بتفكر قاعده سرحان وبتفكر في تنفيذ قرارها الخطير

رانية: مساء الخير ياجميل ياترى بتفكر في ايه؟؟؟؟؟؟؟؟؟؟

ريهام : في نفس الي بتفكري فيه

رانية : طب انا بفكر اتحجب السنة دي وابطل كذب طول شهر رمضان

ريهام: انا كمان ناوية اعمل كده لكن الحكاية متعبة جدا

رانية : لا متعبة ولا حاجة وبعدين كلها شهر نتحجب ونبطل نكذب وبعد كده كله حيرجع زي ما كان

اما غريبة هما الأختين هناء وشرين قصدي ريهام ورانية بيضحكوا على مين ده ربنا عالم وشايف دول لو مش فاهمين حنقول يلا ربنا يهدي بس دول عارفين والمصيبة كده بقت مصيبتين

وزي ما قال الأمام الشافعي رحمة الله عليه

ان كنت لاتدري فتلك مصيبة

وان كنت تدري فالمصيبة اكبر

تم تعديل 8 أكتوبر 2005 بواسطة شهد

[shahd]

الحلقة السادسة

صلة الرحم

سماح ومنى في المدرسة داخلين الفصل ومستنين لحد ماتيجي الأبلة

منى : تعرفي ياسماح بقالي زمن ما شفتش خالي

سماح: قد ايه يعني شهر شهرين عادي مش مشكلة

منى : قلبك ابيض قولي سنة سنتين

سماح: يا بس دي مده طويلة قوووووووي

منى : اصل احنا بنشوف بعض كل سنة في رمضان بس لينا سنتبن ما زرناش بعض

سماح: على رايك ياستي خير وبركه احسن من غيرك

وتدخل شيماء صاحبتهم التالته السلام عليكم ها بتعملوا ايه

سماح: اصل منى بتقولي انا بقالها سنتين ما شافتش خالهاوانهم مش بيزورا بعض غير في رمضان بس

شيماء: معقوله هي صلة الرحم متعلقة برمضان بس دي حتى صلة الرحم اجرها كبير جدا

منى: ياشيخة كفاية وبعدين احنا كده كويسين ويا بخت من زار وخفف

شيماء : زار وخفف ايه بس يا بنتي انت وهي هو انت بتزوري عيان دول اهلك دمك ولحمك ان شاء الله تليفون مرة كل اسبوع

سماح: أي والله يا شيما احنا فعلا مقصرين

منى: مقصرين ايه يا عبيطة انت انت حتعومي على عومها وبعدين هي فاضية وبالها رايق احنا مش فاضيييييييييييين

شيماء : الله يسامحك بقي انا فاضية وبالي رايق

سماح: معلش يا شيماء انت عارفة منى بتحب تهظر

شيماء: لا ابدا ما فيش مشاكل عموما في شريط بيتكلم عن صلة الرحم حبقى اجيبهولكو تسمعوه

وتجيب شيماء الشريط وتسمعه لسماح منى

سماح تقتنع وتقرر انها بأذن الله مش حتقطع صلة الرحم سواء في ورمضان اوغيررمضان اما سماح فعين في الجنة وعين في النار ولسه بتاكابر رغم انها من جواها مقتنعة تمامااً

[shahd]

الحلقة السابعه

قرأت القرآن بس في رمضان

ياسلام على قراية القرأن في رمضان حاجه تفرح القلب لما تلاقي الكل عمال يقرا وفي ناس بتحاول تختم مرة ومرتين فعلا ده شيئ رائع بس الي يحرق الدم ويرفع الضغط ويفقع المراره وووووووو

يلا ما علنيا المهم الي يضايق في الموضوع انك بتشوف المصحف محطوط على الرف 11 شهر ولما والتراب متكوم عليه ولما يجي شهر رمضان التراب يتفض ويلا بقى نبتدي القرايه رحمتك يارب

مش عارفة فعلا احنا حنوصل لحد فين بالطريقة دي اصل في ناس بتقول اصل انا مش فاضي ومش ولما اروق ابقى اقرا وناس للأسف فاكرة ان القرأن بيتقري بس في العزاء مش الكل طبعا وناس مخصصاه في رمضان ولو مافيش رمضان ايه الي كان حيجرى الله واعلم هاااااا ناوين على ايه السنة دي حنقرا اوكي متفقين حينزل المصحف من على الرف لكن حنستمر ولا زي كل سنة فيها لحسن بجد

معلش دي حاجة صغيرة كده بس مش عايزة اطول مرارتي اتفقعت

يارب يارب ما نكون من دول يارب ونفضل نقرا القرأن ونستوعب معانيه او على الأقل نحاول برضه ما فيش فايدة باين عليها حتعدي زي كل سنة

[shahd]

الحلقة الثامنة

رايح اصلي

شلة جميلة وزي الفل رايحين جاين سوا بيسهروا مع بعض ويصلوا جماعة في الجامع كل فرض بفرض هومافيش حد فيهم بيفوت فرض ولا بيضيع وقت الدنيا رمضان

احمد: بلاش فضايح لازم نصلي في الجامع كل الناس بتصلي ومش عايزين كتر كلام وشيخ الجامع خد على وجودنا لحسن يدعي علينا تبقى مصية ....... مالك ياعمر باين عليك مرهق كده ليه هو انت جعان ولا ايه

عمر: هههههههه ضحكتني لا ابدا بس اصل جاري متسلط علي وكل يوم الفجر بيخبط علي الباب نروح نصلي الفجر حاضروانا بصحا بالعافيه اعمل ايه ببقى مكسوف منه قوي

احمد: هو انت بتصحى الفجر ياعم انت رايق مش حيجرى حاجه لو صليت في البيت وقت ما تصحى زي ما بعمل انا

عمر: ماهوانا حستحمل لحد رمضان ما يخلص وبعد كده لو جالي حطين عيشته ماهو مش معقول يخبط علي وش الفجر دي تبقى قلة ذوق

احمد: اهي كلها ايام وحترتاح من الشقى ده ووقت ما تحب تصحى اصحى وربك غفور رحيم

عمر: ايوة يا احمد بس هو جاري ده محبكها شوية مش بيفوت فرض لا في رمضان ولا غيره

ربنا يهدي بقى الراجل بيتمنالك الخير ومكلف نفسه وجاي يخبط على بابك وياخد بأيدك بدل ما تشكره عمال تشتم فيه حنقول ايه بس اذا لم تستحي فاصنع ما شئت:

[shahd]

الحلقة التاسعة

:wub:

هما راحوا فييييييييين

:wub:

الشركة فاضية وما فيش موظفين هوالنهاردة اجازة ولا ايه

المدير العام: الو اديني مدير الأرشيف يا ابني لو سمحت

الرسبشن: حاضر يا افندم ثواني

المدير العام : ما فيش حد بيرد

الرسبشن: مش عارف يا افندم باين ما فيش حد

المدير العام: الشغل الساعة 9 وادلوقتي الساعة 10 ونص هو احنا بنلعب

الرسبشن: ياافندم بصراحة ما فيش حد بيجي دلوقتي

المدير العام: ليه ان شاء الله مش في شغل!! اسمع اول ما حضرت مدير الأرشيف يجي يشرفني على طول في مكتبي

الرسبشن حاضر يا باشا

المدير العام: ولا اقلك اول ما يوصلوا اديني خبر وحسك عينك تقول اني جيت وسألت

الساعة 12 ينزل المدير العام ويفتش على كل الفروع كلهم موجودين او بمعنى اصح لسه واصلين

المدير العام: حمدلله على السلامة يا حضرات هو الشغل يبتدي الساعة كام

مدير الأرشيف: الساعة 9 يا افندم

المديرالعام: حضراتكو لسه مشرفين

مدير الأرشيف: يا باشا احنا هنا من بدري

المدير العام: وكمان كذاب ايش حال لو ما كنتش انا بنفسي سألت على حضرتك الساعة 10 وانت مش موجود مخصوم منك اسبوع انت والموظفين بتوعك

مدير شؤون الموظفين : يا افندم ده اول يوم

المدير العام: اسمع انت بقالك اسبوع علىالحال ده وكلمة زيادة حخصم منك الشهر كله

ويروح المدير على قسم المبيعات

مدير المبيعات: اهلا يا افندم كل سنة وحضرتك طيب

المدير العام: وانت طيب متأخر عن الشغل ليه ar:

مدير المبيعات: الدنيا رمضان يا باشا والواحد بيسهر راحت علي نومة

المدير العام: راحت عليك نومة ؟؟؟؟؟؟؟ يا استاذا انت ضيعت علي الشركة صفقة مهمة جدا بسبب اهمالك

قال راحت علي نومة قال الو يا انسة اكتبي القرار ده حالا ويتوزع على كل الموظفين يخصم من كل من مداراء الأقسام أسبوع كامل ومن كل موظف بيتأخر عن الساعة 9 اسبوع كامل ويخصم من مرتب مدير المبيعات ثمن الصفقة رقم 666

عاجبكو كده بس والله تستاهلوا ولا انتوا شايفين ايييييييييييه

تم تعديل 13 أكتوبر 2005 بواسطة شهد

[shahd]

صايم يا عاااااااااااالم

واقف ليه يامتخلف انت وهوا امشي خلي نهارك يعدي على خير

مش شايف الدنيا واقفة امشي اروح فين اطلع اصبر حاجة تقصر العمر

بقلك ايه لم نفسك انا مش فيقلك

الله يخرب بيتكوا بدل ما انتوا عمالين تتخانقوا امشوا خلونا نلخق الفطار جتكو القرف

في المطار

اقف في طابورك انت وهو ايه هو انت غبي مش بتفهم

روق ياعمنا وصلي على حيشفع فيك

اللهم صلي وسلم عليه خلصونا بقى

هو ماله ده بيتخانق مع دبان وشه ليه

اصله صايم ما تخدش في بالك

ياسلام هو الصيام بيعمل فيه كده امال لو كان رمضان شهرين كان عمل ايه

اوعي ياست انت وهي مش شايفاني عايز اعدي

الست : ماتعدي حد جه ناحيتك

احترمي نفسك يا وليه لحسن اخد الباسبور بتاعك واشر عليه

وتأشر عليه بمناسبة ايه ان شاء الله ولا اكمن الواحد جاي بلدكوا حتزلوه لا يا يا اخويا الحكاية مش سايبة ده انا اعملك فضيحة وابدهلك بهدلة عمرك ما شفتها

انت بتهدديني

ايوة بهددك جرب كده وانت تشوف الي عمرك ما شفته فين مديرك اندهولي المدير

وشه يحمر ويسكت ويجي المدير ويجبره يعتذر للست

مش كنت تحترم نفسك من اولها بدل ما تتهزأ

[shahd]

الحلقة الحادية عشرة

ضامن عمرك

افرض جالك ملك الموت السنة دي في رمضان حتعمل ايه

سؤال غريب ويمكن يكون !!!!!1 ولا بلاش

طبعا ولا حاجة ها مش ناوي تلحق ولا برضه حنقول بكرة جايز نقدر نحقق احلامنا ونعوض الي فاتنا ياعم انت ميت لو تضمن يوم ماشي طب ساعة اوكي او ثانية ياريت بس يالف خسارة انت عارف وانا عارف وكلنا عارفين ان العمر بيجري جايز نروح بدري

يييييييه ايه السيرة الي تغم دي احنا لسه شباب وحنعيش لحد مايجي مليون رمضان

مش حقلك حاجة ومش حكرر كلام قلته ليك وليا لكن حقول حاجة

ضامن عمرك؟

[shahd]

بس بقى كفاية

لحدامتى حقول بكرة

حعوض اجر امبارح

لحد امتى حفضل اقاوح

هو حضرتك بتقاوح طب ليه مش مهم ليه ؟ طب ايه المهم حقلك

مرة تقول الشيطان شاطر

ومرة اصلي مش قادر

غيرها لأ عيب ده رمضان

والي يشوفني يقول ياااه بسم الله ما شاء الله

ده بيصلي الفرض بفرضه يادي الهنا يادي الهنا

بس يانفسي كفايه مش ناوية تبطلي

مش ناوية تستهدي بالله والي بتعمليه في رمضان

تعمليه في كل شهر وكل سنة

صدقيني مش حتخسري حاجة بالعكس

والله حتكتسبي بس ياريتك تعرفي وتفهمي وتتأدبي

:lol: :sad:

[shahd]

الحلقة الثالثة عشرة

ما فيش حاجة حتتغير

برضه ما فيش فايدة يا خي ارحم نفسك احنا في رمضان وانت لسه سكران

ويعني ايه رمضان مش انا بسكر في رمضان يعني ابطل سكر في غير رمضان ليه

يا خي احترم نفسك على الأقل في رمضان وبطل الهباب الي بتشربو ده

ابطل ليه هو انا منافق انا بعمل في رمضان الي بعمله في شعبان

يظهر ما فيش فايدة فيك انا نصحتك وعملت الي علي ماهو انا زيك بسكر 11 شهر بس في رمضان لازم الواحد يلم نفسه شوية

ياسلام طب انت حر انت منافق انا لو سبت الخمر في رمضان حضطر اسيبها في كل الشهور ومش حينفع

طب ليه بس هو انت تكره انك تسيب السم الهاري دي على طول

لالالالالا مستحيل حموت

مش قلتلكو ما فيش حاجة حتتغير

[shahd]

الحلقة الرابعه عشرة

الشيطان شاطر

الحلقة دي فيها حوار بين اتنين رمضان الشهر الكريم وبين صايم افندي عارفينه

مش معقول رمضان السنة دي عدى علي كده زي كل سنة يعني الصلاة كروته والصيام يادوبك منعت نفسي عن الأكل وبس والقرأن كل يوم اقول حقرا جزء كله كلام في كلام دا انا حتى ما كملتش ربع جزء

قال يعني لو قريت حفهم

ماله اخينا ده عايز يوصل لأيه طب لو زعلان قوي كده ما يتستعين بالله ويحاول ولا في حاجة تانية مخلياه مش عارف يغلب نفسه ولا ايه بالتحديد ؟؟؟؟؟؟ ما علينا نروح نسأله ونشوف حيقولنا ايه

السلام عليكوو ازيك ياصايم افندي

انا كويس الحمدلله يا عم رمضان

امال في ايه بس زعلان وبتلوم نفسك كتير ليه

صايم: اصلي بصراحة مش عارف اقرا قرأن واصلي زي كل الناس

رمضان: كل الناس مين قصدك انت تقصد مين بالضبط ماهو مش كل الناس بتصوم ولا كلهم بيقروا قرأن

صايم: ازاي ده صاحبي قرب يختم

رمضان: اه قولي كده طيب يا سيدي مش بتعمل كده ليه يعني على الأقل اقرا سورة على قد ما تقدر

صيام: اه يعني اصلي مشششش عارف

رمضان : اه انت بتتلكك ياعم ومش عايز تصوم صح روح انا مخاصمك

صايم افندي: لا ياعم رمضان هو بس الشيطان شاطر

رمضان:شيطان ايه وبتاع ايه استعن بالله

صايم : ونعم بالله بس اصل ابن الذين ده مش سايبني في حالي

رمضان:هي دي ثقتك بربنا لا حول ولا قوة الا بالله

صايم: لا ياعم بس اصل هو انا ووووووكمان ابليس لعنة الله عليه كل مرة بيغلبني

وكلام في كلام وكلها حجج واهية وتلا كيك فارغة يلا بقى ياجماعة سلام اشوفكوا الحلقة الجاية

تم تعديل 17 أكتوبر 2005 بواسطة شهد

[shahd]

الحلقة الخامسة عشرة

بتصلي المغرب بس جاي على نفسك ليه

صلاة المغرب بتعاتب مصلي

الأذان

وقت الفطار

وقت الصلاة

صاحبنا مش بيصلي أي فرض غير المغرب بس حنشوف صلاة المغرب حتقله ايه

صاحبنا قايم بكل عزيمة يلا نصلي

صلاة المغرب: حتصلي اايه دلوقتي

صاحبنا: مين الي بيكلمني

صلاة المغرب: انا صلاة المغرب عارفني

صاحبنا: اه طبعا عارفك امال انا بصلي ايه دلوقتي

صلاة المغرب: عارفني انا بس وباقي الفروض مش عارفها

صاحبنا: حقضيها ان شاء الله

صلاة المغرب: طب ما تقضي المغرب كمان جاي على نفسك ليه

صاحبنا: لا ما ينفعش اصل الكل بيصلي المغرب وحيبقى منظري وحش قوي قدام الي حواليا

يا سبحان الله هو مين المفروض تتكسف منه؟؟؟؟؟

[shahd]

الحلقة السادسة عشرة

تيجي نروح محاضرة(لا مشغول/تعبان)

حاجة عجيبة فعلا لما تيجي تقول يلا يا جماعة في محاضرة للشيخ فلان او علان تلاقي مليون حجة وحجة

الي يقول اصلي بصراحة مصدع و تعبان والتاني زهقان والي مش طايق عيشته والي قرفان من اليوم الي اتولد فيه حالة ما يعلم بيها الا ربنا

واحيانا ياقلك مشغول قوييييي وهو اصلا مش بيعمل أي حاجة

يعيني فاضي كده ومش عايز لا يفيد ويستفيد طب ياعم روح فك عن نفسك شوية

ياسلام افك عن نفسي بمحاضرة اجري بلاش تخليني اقول كلام انا مش عايز اقوله

اصل الشيخ ده محبكها قوي واالشيخ العلاني بيسهلها قوي

واالشيخ اسمه ايه بيتكلم في حاجات سهلة

يعني لا ده عاجب ولا ده عاجب عايز ايه حضرتك ممكن تقولي ولا اقلك بلاش تقولي قول لنفسك

على فكرة لسه البقية جاية استنونا للحلقة الجايه

[shahd]

الحلقة السابعة عشرة

تيجي نسهر (هو انا افديك الساعة)

أيه الأخبار يا باشا / يا انسة بقلك ايه حتيجي معانا ولا مشغول السهرة حتحلى ولوش الفجر

مشغول ايه هو انا افديك الساعة

مش كنت بتقول تعبان ومصدع

لا مصدع ولا حاجة ديتها حباية صداع وكله يبقى في اللزيز

ماشي حعدي عليك كمان نص ساعة

اوكي حتلا قيني واقفلك على ناصيةالشارع

سلام

سلام

هو ايه الي بيحصل مش كان لسه بيطلع في الروح ورابط دمغه واه ياضهري اه ياجمبي ومشغول وبعدين مشغول مش مستغربين هي كل الحجج راحت فين وبعدين انا نفسي اعرف هو الواحد يبقى مشغول وتعبان مرة واحدة ازاي وكل ده يبطل في ثواني ازاي فهمونييييي لحسن قربت السع

[shahd]

ميعاد غرام في رمضان وفي الحرم( اختشي على دمك)

لما الا قي حد بيعاكس حقول ماشي مع انه سلوك غير حضاري ولا اخلاقي

ولو شفت واحد بيلمح لواحده او العكس عشان ميعاد غرامي حكتم نفسي واسكت مع ان نفسي اديه على دماغه ولما الوضع يزيد عن حده ونشوف شوية ...........عاملين زي ......... حمشي واسيبهم او حعمل مش شايف الله واعلم هي جايز تبقى سلبيه وفي ناس حتقول المفروض ما تسكتش على مواقف زي دي

بس لما الحكاية تزيد عن عن الحد والميعاد يبقى في رمضان ومش بقول رمضان تحديدا لحسن حد يفهمني غلط لأن الغلط غلط في كل يوم وشهر وسنة لكن لما يبقى في مكة وبمعنى ادق في الحرم يعني خلاص :P والله العظيم عيب بس بقى اختشي على دمك ؟؟؟ ده لو لسه عندك دم :D

[shahd]

الحلقة التاسعة عشرة

بتفطر بسجارة

اذان المغرب

الله اكبر الله اكبر

فين السجارة الحقوني بسجارة دماغي مولعة

طب خد تمر تحافظ على صحتك وتتبع سنة الرسول عليه الصلاة والسلام

طيب طيب بس عايز سجارة الأول بعدين التمر مش مشكلة

بس دي سنة جرب السجارة حتتعب صدرك ؟ يعني معقوله اول ما تفك ريقك

تبتدي بسجاره يا ابني حرام عليك صحتك

مش مشكلة عادي حتغلبوني ليه انا حقوم اجيبها بنفسي

مش قادر تعبان ناوليني السجارة يا امممممممه

[shahd]

الحلقة العشرون

يلا حملة نظافة العيد جاي

يلا يا بنت انت وهي العيد قرب يلا حنضف مش معقول رمضان قرب يخلص وبيتنا كده مش انا قلت لازم البيت يبقى زي الفل عشان في ضيوف جايين

يا ماما ضيوف مين بس الي حيجوا??

يابت قومي اشتغلي بلاش غلبة هو احنا بنضف غير في رمضان

يادي الخيبة ومش مكسوفة هي النظافة من الأيمان في رمضان بس

طب داري على خيبتك داري تلاقيكي حتسيبي البيت زي ماهو لحد رمضان الجاي