هل قرأوا امير ميكافيلي؟؟!

[suma]

            بسم الله الرحمن الرحيم

 

   منذ عقود ونحن نصف من يميل مع مصلحته ويسير في الإتجاه الذي تكون فيه دوما  بانه شخص ميكافيلي نسبة لكتاب الأميرالذي ألفه المذكور والذي ملخصه أن الغاية تبرر الوسيلة..أي إن كانت الغاية نبيلة فلا يهم الطريق إليها كيف يكون ؛يكون صالحا يكون طالحا  بالحسنى  أو بالكذب والتزييف.

 

 هذا ايضاح كان لابد منه,اما عمن أتحدث ومن أقصد هنا فلا تتعجبوا يا سادة إنهم أحفادي  والذي لم يتجاوز عمر الكبيرة خمس سنوات والأصغر توأم في الرابعة من أعمارهما ولد وبنت ..شاءت أقداري أن أكون معهم طيلة ستة اشهر مضت ولكم أن تتخيلوا سيدة في مثل عمري مع هؤلاء،كيف ستكون الحياة وكيف يكون التعامل بيننا وخاصة أن والدتهم .طبيبة.اطمأنت وتركت دفة المركب لي لا أدري لترتاح أو...

 

  بالطبع أول يوم ترحيب بتيته غير عادي وخاصة ذهابي كان لمرضي-ألم الفقرات القطنية والذي أثر على حركة الساق اليسرى.

 

ولم يمر يوما إلا بجديد بيننا -حاولت أعاملهم كما كنت أعامل أمهم .لكن هيهات فهناك فرق توقيت يحول دون ذلك فشلت تلك الطريقة ؛ الكلام معهم والمناقشة ليفعلوا الصواب بإرادتهم ..فشل

 

  أحسست أنني أمام مشروع عصابة صغيرة وكنت أخفي عن أمهم شقاوتهم لأنها لا تتعامل معهم إلا بالشدة -ربما اختصرت الطريق بعد تجربتها- عمر جل همه ترك التلفاز على  ام  بي ثري ويدخل المطبخ بحريته ليسوي الهوايل فيه  ، ولي  لي توأمه تبعه في كل خطوة أغلقت المطبخ بالمفتاح----التلفاز لا يكون الا نصف ساعة ولكم ان تتخيلوا المعاناة في تحقيق هذا--نأتي للبرينسيسة الكبيرة والتي يهيأ لي أنها ولدت بثلاث ألسن وليس لسانا واحدا كل كلمة لازم تناقشني وتقول رأيها .كنت فاكره أنني انتهيت من تلك المعاناة بتزويج الأولاد والبنات !!

المهم الأولاد أيقنوا انه لا سبيل لهم معي لتغير النظام فلجأوا للهدنة الغير المعلنة -- تيته احنا بنحبك هم أنا طيب -تيته احنا بنحب الأكل اللي بتعمليه -طيب ده أنا تيته انا بحب الارز و الخضار -ده عمر طيب يا حبيبي .انا -تيته ممكن تطبخي لنا واحنا حنساعدك؟ يا لهوي دا أنا في بيتي لم أفعل من زمن بس قلبي  حن -حاضر يا حبيبي واترك كل ما بيدي وأدخل المطبخ وهم معي بالطبع واهي فرصة لعمر ليدخل المطبخ ويمارس هوايته .في وقت آخر سأقص عليكم سر هذا الوله بالمطبخ.أشغلهم معي واعمل لهم ما يريدون ثم أمني نفسي بباقي يوم هاديء بلا مشاكل ،ولكن ده من الأحلام ؛على فكرة أنا كنت بالجأ للضرب -ولكنه ضربا خفيفا بحنية على الأرجل أو اليدين للفت نظرهم انهم اخطأوا وليس للإيلام يعني ضرب بحنية .

 

   تيته  إحنا بنحبك ومش حنزعل لما تضربينا يادي الكسوف يا ولاد اخجلتموني ..محدثة نفسي ..وبعدها ممكن تخلي مامي تذهب بينا للحديقة غدا؟يا ربي حاضر وأفعل وأنا فرحة بنهار هاديء بلا دوشة ولا جدال .

  كنت أحمل معي صندوقا به بعص الذكريات ومنها رزمة خطابات خاصة وكان يحلوا لي قراءتها في حجرتي من حين لآخر--ما هذا يا تيته -خطابات يا سارة -يعني إيه.يعني جدك كان يرسلها لي عندما كنت مسافره-وهنا وابل من الاسئلة كيف  ازاي   ليه وبعد هذا العذاب تتهكم علي(ليه مافيش موبايل) بلعت لساني وسكت يعني أقول لها إيه؟؟

 

 

  وهكذا مرت الآيام والليالي معهم لم انفرد بنفسي في حجرتي يوما واحدا --تيته أنا شأشاهد التلفاز معك !يا حبيبتي انا لا أشاهد إلا الاخبار -ماهو يا تيته أنا بحب  أسمع الاخبار والقرآن معك ..يعني أصوت ولا أصرخ ولا أعمل إيه ؟؟؟؟؟

 

  إذا ارادوا شيئا معينا واحتمال أن نرفض أنا وأمهم شوفوا اللي بيحصل:سارة تعالوا نلم اللعب وننظف بسرعة علشان تيته  تفرح  وبسرعة كل اللعب في الصناديق ولا ورقة على الأرض -احنا طبعا حنخجل..شوفوا العيال الأمامير عملوا إيه؟ وما كانوا يبغونه يحدث .

 

 

 سؤالي هنا من علمهم هذا المسلك؟؟؟

 

 

 

 

 

               سومه

تم تعديل 30 أغسطس 2015 بواسطة suma

[عادل أبوزيد]

الواضح انهم فعلا " عيال أمامير" إيه مشكلتهم ؟ المشكلة هي. مع حضرتك أنتي التي تصفيهم بالمكيافيلية

ما سبق كان إستهلالا لابد منه

ربما ما لم تفصحي عنه بعد .... ماذا يفعل عمر في المطبخ .. عندما تحكي قد نسمح لكي باستئناف الهجوم على. "العيال الامامير"

ارى ان المسألة إن العيال سابقين سنهم بالنسبة لتيتة التي كانت تتلقي الخطابات و عليها ورقة بوستة و تستلمها من ساعي البريد. الذي يطرق الباب و بكل صوته ينادي. بووووسطة

[Grandma]

يا تيتة سومة .... ربنا يخليكي لاحفادك و يحفظهم و يجعلهم قرة عين ليكي و لوالديهم 

انتي نسيتي عمايل الأطفال ولا ايه ؟ّّّ!! 

دا انتي حتتعلمي منهم كل نظريات المفكرين و الفلاسفة مش بس ميكيافيلي 

دا غير نظريات الطبخ الحديث و اللعب بالاي باد و البلاي ستيشن و الواي 

و هتتعرفي على كل الشخصيات الكرتونية و علوم الكورة و هندسة اللوجو و الميكانو 

وهتتعلمي طرق جديدة لأكل الايس كريم و الشكولاته و الكيك

هو فيه أحلى ولا أمتع من كدا ؟!!

[Scorpion]

بمعني انك حتشوفي ايام ما يعلم بيها الا ربنا ..

 

انسي بقي قوقعتك و عاداتك و طقوسك ... 

[Scorpion]

ارى ان المسألة إن العيال سابقين سنهم بالنسبة لتيتة التي كانت تتلقي الخطابات و عليها ورقة بوستة و تستلمها من ساعي البريد. الذي يطرق الباب و بكل صوته ينادي. بووووسطة

 

عارف يا استاذ عادل .. الموضوع ده مش حيحس فيه بالفرق الشاسع "العاطفي" الا الجيل بتاعنا ..

 

مش قادر اقارن بين ملمس ورقة الجواب في ايدي .. بين الطابع .. بين خط اللي بعتهولي .. بين الترقب و الأنتظار .. بين صوت الساعي زي ما قلت حضرتك و هو بيزعق بووووسططة .. و الواحد بينزل السلالم قفز .. 3  او 4 درجات علشان يوصل للساعي ده و يستلم الجواب اللي كان مستنيه بفارغ الصبر ..

فيه مقارنة بين الكلام ده و بين كام سطر علي موبايلك .. او زيهم علي مونيتور الكومبيوتر ... الجواب و الا الأيميل ؟؟ 

 

نفس الحكاية مع الصور .. ساعات اقارن الصور بتاعتنا زمان .. محطوطة في البوم .. تكاد تلمس اصحابها .. و ما بين صور تانية ديجيتال علي اسطوانة مدمجة او علي شاشة ..

صحيح جميلة و ملونة و نقية .. لكنها .. عاملة زي .. زي ...  زي البلاستيك كده ..

 

بتوع جيل الأبيض و الأسود .. بس اللي ممكن يحسوا بالفرق .. و قدرنا اننا نستحمل سخرية الجيل الجديد .. ما احنا برضه عملنا كده مع اهالينا ..

يبقي مافيش غير اننا نتأقلم .. و نقبل السخرية دي  بابتسامة ساخرة ..

 

زي ما حصل في الموضوع ده

http://www.egyptiantalks.org/invb/index.php?showtopic=80900&hl=%D8%A8%D9%8A%D8%AA%D9%86%D8%A7

[أبو محمد]

العيال دول بيبصولنا على إننا كائنات هربانة من المتحف

لما باشوف هم بيعملوا إيه فى الأجهزة المتنطورة هنا وهناك

بافتكر أيام ما كان الراديو الكبير محطوط فى الصالون المقفول

ويتفتح بس أيام ما كان والدى الله يرحمه يجيب أصحابه

عشان يسمعوا الاسطوانات الـ 78 لفة على الجرامافون اللى كان بيشتغل بالمانيفلا

أو فى أيام حفلات ام كلثوم لما كان الصالون يتفتح ونقزقز لب وسودانى وناكل رز بلبن

 

أيامها كنت بافتكر المذيعين والمطربين جوه الدولاب ده

وكنت ساعات بادخل لوحدى وابص ورا الراديو ما الاقيش غير لمبات طويلة شكلها غريب

أما بقى الراديو الصغير اللى كان فى صالة المعيشة فكان محطوط على رف عالى

عشان احنا (المساخيط) ما نلعبش فيه

دلوقت العيال 4 و5 سنين بيشغلوا الآى باد بصوابعهم اللى عاملة زى الدود

والواحد ما بيقدرش يتابع اللى بيعملوه

:)

بس سيبك انت يا مدام سومة .. مفيش احسن من أيام الابيض واسود (تقدرى تعتبرى ده قصر ديل منى)

[suma]

بسم الله الرحمن الرحيم

اسعدني تجاوبكم على سطوري تلك فانا اكتب ما يخطرعلي وللاسف قلما اكتب ما اريد مسبقا وعليه فهناك تفوت بين سرعة يدي والكلام بعقلي وللاسف للحين عجزت عن احداث توافق بينهما..

اما عن سي عمر فهو يا سادة من عشاق برامج الطهي!!!اي نعم دائما لو كان هناك برنامجا يعرض يجلس منتبها وكانه سينفذ الوصفة بعدها وحافظ اسماء الشيفات كلهم....لذا عنما يدخل المطبخ ممكن يلهوا بالاواني كانه يطبخ. وممكن //وقد حدث//يخرج اشياءا من الثلاجة..يكسر البيض مثلا ليعل كيك...يضع السمن على الدقيق...وكثير من تلك البلاوي لذا انا اخذت قرارا بغلق المطبخ بالمفتاح لارتاح..اما عن تفوقهم في الاكترونيات فهذا امر مفروغ منه والله سارة علمتني التعامل مع هاتفي الجديد وكنت ناويه اقرا الكتيب حتى انها تطوعت ان تنزل لي الالعاب في التاب..مع اني لم اطلب منها...لا يا تيته لازم يكون في لعب..وانا اختصارا للجدال بسكت اعمل ايه يعني؟؟

هذا هو العالم الجديد لم استطع الولوج فيه ولا الوقوف متفرجة.

سومه