زيارة السيد الرئيس - الجزء 2

[se_ Elsyed]

مش عارف ليه الموضوع بتاع " يوميات مشرف في المنتدى " اللي أتكتب السنة اللي فاتت واللي أتحول إلى زيارة للسيد الرئيس لمنتدى محاورات المصريين .. الموضوع ده هف على بالي إمبارح .. وقررت أعمله جزء تاني أتمنى إنه يعجبكم .....

وكل سنة وإنتوا طيبين

وللتذكرة بالجزء الأول .. ارجو الرجوع له في الوصلة التالية :

الوصلة

[se_ Elsyed]

أسف جداً للجميع وأعتذر عن عدم تكلة الموضوع لإصاباتي بدور إنفلونزا حاد مخليني بأخطرف وحالتي حالة ...

الظاهر إن لعنة الفراعنة أصابتني ...

[وليد صفوت]

:blush: :wub: :P

[ابو صلاح]

سلامتك يا ابو السيد ... انشا الله القطة السوده .. على رأى جديتى لما كانت بتقولهالى وانا صغير

[عصام]

..... مخليني بأخطرف وحالتي حالة ...

<{POST_SNAPBACK}>

انا دا برضه كان رأييى لما انت أعلنت انك هاتكتب الجزء التانى ... :blush:

[se_ Elsyed]

نبدأ الحكاية من واقع الملفات المحاوراتية :

- ذات يوم وتحديداً في أوائل الشهر الكريم .. تلقى أعضاء فريق الإشراف في المحاورات رسالة بريدية على الهاتف المحمول .. وكانت من الأدفايزر وفحواها يقول " ندعوكم لإجتماع على مستوى عالٍ من الأهمية في المكان السري المعتاد "

وهرع الجميع في الموعد المحدد للمقابلة وتوافدوا الواحد تلو الأخر .

الأدفايزر : مرحباً بكم جميعاً وكل عام وإنت بخير بمناسبة الشهر الكريم ، لقد إجتمعت بكم هنا لإخبركم بإننا نمر بمنعطف تاريخي في هذه المرحلة .....

أحمد محمود ( مقاطعاً ) : إنت تاني يا سين سين .. تلاقيك عملت مصيبة من مصايبك سببت المنعطف ده ؟

س س : والله العظيم ما عملت حاجة !! إنت هاتلبسني تهمة يا جدع إنت ؟

أدفايزر : يا أفاضل .. يا إخواني .. ما فيش مصايب ولا حاجة .. أنا بأتكلم بشكل عام ... يا أخ فيولين كنج .. إحنا كنا واقفين فين .

فيولين : إحنا كنا واقفين في المنعطف سيادتك ...

أدفايزر : أيوه ... نكمل ، حيث تمر مصر هذه الأيام بمرحلة تغيير جلد ..

س س : طب يعني المطلوب مننا حضرتك إيه ؟ نودي وشنا الناحية التانية وهي بتغير ولا نخرج بره دلوقت ونييجي كمان شويه ؟

أحمد محمود : بعد إذن الأدفايزر .. أنا بأقترح نعطي حُقنة مُخدره للأخ ده .. ولما يفوق نبقى نحكي له على اللي حصل في الإجتماع .

أدفايزر : أرجو منكم ياسادة عدم المقاطعة ... يا فيولين .. فكرني يا بني إحنا وقفنا فين ؟

فيولين : حضرتك إحنا خرجنا من المنعطف لقينا مصر بتغير فراح سين سين مودي وشه الناحية التانية ..

أدفايزر : فلقد وصلتني رسالة خطية من رئاسة الجمهورية بإن سيادة السيد رئيس الجمهورية سوف يقوم بزيارتنا مرة أخرى في خضم جولاته لدعم مُرشحي الحزب الوطني في إنتخابات البرلمان القادمة .

أحمد محمود : يشرف ويأنس .. هو أحنا هانغلب يعني .. وزي ما ظبطنا اللقاء بتاع المرة اللي فاتت .. فنوعدك إن اللقاء ده هايكون محترم برضوا بإذن الله .

سلوى : طب وإيه المطلوب مننا بالظبط يا مستر عادل .

أدفايزر : والله يا مدام سلوى كلنا هايبقى علينا عبء لا يُستهان به في المرحلة القادمة .. وبالتالي لابد أن نتكاتف جميعاً ونحاول أن نكون عند حُسن الظن ، يعني على سبيل المثال باب إنتخابات الرئاسة والسياسا الداخلية ومحاربة الفساد نقوم بإغلاقهم بشكل مؤقت عشان الريس ما يزعلش من اللي مكتوب فيهم .

أحمد محمود : أيوه وبعد إذنك يا بوص ... في ناس معينة مشاغبة لازم ياخدوا أجازة اليومين اللي جايين دول .. يعني عندك على سبيل المثال " أخناتون " ومواضيعه اللي دايماً بيخبط فيها بالحكومة .. فبأقترح إننا نفسحه ...

س س : لأ ... لأ .. إلا الدم يا أحمد يا محمود ...بقى دي أخرتها ؟.. توصل للتصفية الجسدية ... حرام عليكوا ... حرام عليكوا ..

أحمد محمود : إيه يا بني الهلع والقلق اللي إنت عامله ده .... مين يا بني أدم جاب سيرة تصفية جسدية ولا تصفية صلصة الطماطم حتى ؟... يا بني أنا هاكلم الأفوكاتو يبعت له دعوة يقضي أسبوعين معاه في الريف الإنجليزي لحد ما الليلة دي تعدي على خير ... وبعدين إذا كان فيه شخص نريد أن نصفية جسدياً يبقى أنت ... لإني بصراحة مبقوق من مواضيعك وطولة لسانك ..

أفدايزر : عظيم ... مين عنده إقترحات تانية ...

شريف عبد الوهاب : أنا بأقترح سعادتك إني أقفل على نفسي باب الصحافة والأعلام وأروح جايب كل المقالات بتاعت رواد النفاق الصحافي أمثال سمورة وقطقوطة وأسامه سرايا ولوقا باباوي ومستفيد فوزي .. وأروح رادم بهم باب الصحافة ... وكمان ممكن نطبع الحاجات دي على هيئة بانفلت أو كتيبات صغيرة .. ومتأكد إن الحاجات دي هاتعجب الريس ...

أفدايزر : هايل يا شرشر .. برافو عليك .

س س : بعد إذنك يا أبيه .. أنا بأقترح برضوا نعمل شو عالي قوي المره دي ... فدلوقت عندنا مثلاً جيجي من السعودية وشهد من اليمن ... فجيجي ممكن تقف على باب المحاورات ومعاها دلة قهوة وطبق تمر .. وأول ما تشوف الريس جاي تروح مباصيه فنجان قهوة من اللي هو عشان يعدل دماغه ... كمان شهد ممكن تمسك كام علم صغيرين من بتوع اليمن وتقعد تردد شعارات مثل " سعادة العقيد علي عبد الله صالح بيمسي ويصبح على أخوه قائد العبور وبيقوله كل سنة وإنت طيب " وكده يعني

كمان سيادتك ممكن نكلف الأخت بنت مصرية إنها تلم الشعراء الفطاحل اللي عندها في باب الأدب والشعر ويقوموا بتأليف أغاني وأهازيج بهذه المناسبة ...

أدفايزر : فكره هايلة .. بس هي فين بنت مصرية ؟

عصام شوقي : بترضع الواد مادا في قسم الأسرة والطفل يا باشا وزمانها جايه ..

أدفايزر : والله عال ... طب قوم هز طولك وإنده لها ياخويا .

بنت مصريه : أيوه يا مستر عادل .. اي خدمه ..

أدفايزر : حمد لله عالسلامه يا مدام .. غيرتي للواد .. قصدي رضعتي الواد ؟ كنا بنقول يا ست أم محمد عايزينك تشدي حيلك الأيام اللي جايه دي وتلمي لنا كام حتة وطني على رثاء على تأييد عشان نقولهم قدام الريس ..

بنت مصرية : كام حته ؟ حضرتك أنا ما بابعش كرشه وفشه ... أنا شاعره وأديبة يُشار إليها بالبنان ... وبعدين أنا ما بأشتغلش بالطلبية أو بالقطعة مثلاً ....

أحمد محمود : يا ست أم محمد .. الأستاذ عادل يقصد إننا عايزين كام قصيدة من إيديكي الحلوين دول عشان الريس ينبسط ويرضى علينا ... فماتفهميهوش غلط ؟

بنت مصريه : إن شاء الله سأحاول أن أقدح زناد فكري وربنا يعمل اللي فيه الخير .

أدفايزر : مدام سلوى بقى عليها الجزء الخاصة ببروتوكول مقابلة حريم السلطان .. قصدي الستات اللي هاييجوا مع الريس .

سلوى : جاهزة يا مستر وكله هايبقى تمام .

أدفايزر : الأخ وليد فيولين كنج .. يلم شبيبة المحاورات ويقفوا بره على الباب يرددوا الأغاني الوطنية الحماسية .. مثل " بابا حبيبي ... ماما حبيبتي ... جدو حبيبي .. تيته حبيبتي .. وطني حبيبي " والحاجات اللي من هذا القبيل ...

وليد : طب تحب حضرتك نلبس لبس مُعين ؟ يعني ألبس شورت وفانلة وألون وشي بألوان علم مصر وكده يعني ؟

س س : إيه يا بني إنت في إيه ؟ بنقول الريس جاي يزورنا مش حسن شحاته مدرب المنتخب القومي .... خليك كوول وعادي وإلبس اللي تلبسه وخلصنا .

أحمد محمود : بالراحة على الولد يا سي سين سين .. ده لسه عضمه طري .

عصام شوقي : طب وبالنوسبة لي حضرتك أنا دوري إيه ؟

أدفايزر : إنت هاتبقى من فتوات الفرح ... أو بودي جارد .. وأي عضو يعمل مشاغبة أو شقاوة .. تروح مناوله على طول ...

س س : طب حضرتك بالنسبة للأكل ... فهاتلاقي الريس هايقعد يأنسنا على الفطار هو واللي معاه طبعاً ؟

سلوى : لأ من الناحية دي إطمئنوا .. فعندنا ما شاء الله دلوقت الشيف بودا وطاقم المطبخ اللي معاه اللي إنا متأكده إنهم هايرفعوا راسنا ويعملوا أكل يأكلوا صوابعهم وراه ...

يُتبع

[عصام]

فيولين : حضرتك إحنا خرجنا من المنعطف لقينا مصر بتغير فراح سين سين مودي وشه الناحية التانية ..

[وليد صفوت]

س س

إلى الأمااااااااااااااااااااااااام

[Salwa]

جد الجد يا سى السيد ...

الله ينور ...

انا ضحكت ضحك على نفس الكلام اللى ضحك عليه عصام شوقى ...

لأ وايه ؟؟ ...قلته على لسان فيولين كنج ...

وفى الجول ..خصوصا بعد الخروج من المنعطف ..

استمر ...وكلنا معاك .

مش مفروض برضه حشيش ييجى يكمل الموضوع ده معاك ؟؟

وفين سكوربيون ؟؟

وخصوصا ان دى عزومة تستاهل بصراحة ..

يعنى ممكن ترشيح هذا الموضوع ايضا فى باب الابتسام لجائزة (( نوفل )) التى من المقرر ان يفوز بها باب المطبخ بقيادة الشيف بودا .

فى انتظار باقى الموضوع ...

[se_ Elsyed]

سكوربيون ( غاضباً ) : إيه يا ريس .. حضرتك وزعت المهام والواجبات ونفضت لي .. خير إن شاء الله ... عايز أعرف أنا دوري إيه في الموضوع ده ؟

أدفايزر : لأ إنت كفايه عليك كده يا سكوب .. كتر خير الدنيا .. فأنت قد بلغت من العمر أرذله ويجب أن ترتاح ... يعني دور لك على اي باب تتدارى وراه لحد ما الضيوف يمشوا ..

سكوب : وهو يسمع في الخلفية موال حزين ... بقى كده يا أ / عادل .. بقى دي أخرتها أتعامل زي خيل الحكومة وبعد ما أُفني عمري في خدمة المنتدى يكون نصيبي في الأخر طلقة في قورتي ... معليش يا زهر ... صحيح أخرة خدمة الغُز ... طلقة .... أهيء أهيء أها

س س : ما عاش ولا كان اللي يطخك يا جعيدي طول مانا على وش الدنيا ....

بص يا سكووب وبعد إذنك يا بوص ... أنا عندي لك ترتيب ما بأعملوش إلا للحبايب وبس ..

سكوب : كتر خيرك يا س س .. أنا مش عايز إحسان مين اللي يسوى وإلا ما يسواش .. لا مؤخده يعني .

س س : الله يكرم أصلك يا اصيل ..

أدفايزر : خير يا س س أسمِعنا يا فتى .

س س : شوف يا سكوب يابني .. الريس بعد النيو لوك اللي عمله .. بقى في حاجات بيعشقها ..

سكوب : إخص عليك يا سين سين .. بقى ده ظنك في ؟ يعني بعد العمر ده كله عايزني أشتغل مُحظيه للملك ؟

س س : يا عم إجري .. وهو أنت تطول بشكلك ده ... يا بني إسمعني للأخر ...

بص يا سيدي .. إحنا هانستغل شكلك الصعيدي ده ونبني لك خُص على باب المحاورات .. ونحفظك كام جُمله وحوار تقولهم قدام الريس .. وأنا متأكد إن الريس أول ما هيشوف الخُص هينزل ويعمل معاك شو جامد قوي .. وبعدها يابا ماحدش هايعرف يكلمك .

سكوب : أيوه يعني عايزني أبقى كومبارس مُتكلم ؟

س س : يابني هو أنت تطول ... ده أنا هاخليك أشهر من روبي ..

سكوب : صحيح يا سين سين ؟ وأطلع بعد كده وأعمل فيديو كلاب وأنا راكب العجله ؟

س س : بس إنت سيبلي نفسك وأنا هاظبطك .

سكوب : أوكي يا مان ... وربنا يديم المعروف .

يُتبع

[وليد صفوت]

سكوب : كتر خيرك يا س س .. أنا مش عايز إحسان مين اللي يسوى وإلا ما يسواش .. لا مؤخده يعني .

حكيكى انا دمعت من الموكف المؤثر ده ,........ خصوصاً لما سكوب بص لسين سين بصة بتقول : ( حتى أنت ! ) ,... ثم قال جملته اللى فوق دى .