الدرهم والجنيه

[المرعوب]

حبيت يعني اني اوريكم شويه فضفضه على الماشي كنت كتبتها

اي نعم هيا مش بالمستوى المطلوب وحتواجه انتقادات كتير ممكن

من اللي بيقراها بس ده ميمنعش ان الواحد يستفيد من اراء الناس ويتعلم منها

فاتمنى اني اعرف رايكم فيها ايه اهو ومنكم نستفد

الدرهم والجنيه

قابلت ناس ياما وناس

ومشيت كتير في الدنيا ديه

اني القي حب واخلاص

اهو ده معداش خالص عليا

********************

لقيت وشوش سوده ونفوس

بتقولي متبصش عليا

كلوا بيدور على الفلوس

ونسيوا ليه عايزينها ديه

******************

عايزين فلوس علشان نعيش

ونحب بعض من غير حدود

ازاي رايح تبيع حشيش

واخوك ياخده ولا ليك يعود

******************

فين الضمير مات من زمان

لما انتا سبت اخوك يموت

قولي شبعت طب خدت كام

باكوهين ورزمه بنكلوت

*****************

وانتا يا بياع السجاير

انا جاي افتلحك كتاب

خليت شباب الامه داير

وفاتحيلن في كشكولك حساب

*****************

وكسبت قرش وفوقه قرش

حوشته في خزنه او دولاب

حقوق الناس ومتفتكرش

انك متداري في خرم باب

****************

وفي يوم نسيت تعمل حسابه

ابنك شرب سجاير وبانجو

ضربته حرمته من صحابه

اهدى كده وقولي ايه ذنبه

****************

ذنبه ضحيه اب فاجر

عمال بيقبض على كام نفس

بدل ما يقول ابنه ذاكر

سابه لحد ما دمه اتحبس

****************

سالك ليه بتبيعها وحارمني

اني ادوقها واعيش حياتي

لو كنت صح يبقى تجاوبني

بدل ما تزعقلي وتهاتي

***************

واهو كله منهم ضيعوه

لو اتساب كان حاله اتصلح

والواد طلع برده لابوه

وضيع حياته ولا فلح

**************

قولي جنيت ايه من الفلوس

نسيت ولادك بعتهم

دلوقتي على الرجلين تبوس

مش لاقي تاكل بعدهم

*************

شفتوا يا عالم حالنا ايه

ماشيين بناكل بعضنا

سيبكم من الدرهم والجنيه

وتعالوا نجمع شملنا

تم تعديل 12 أكتوبر 2005 بواسطة المرعوب

[هشام الجنيدى]

فكرتم جميله يا اخ مرعوب بتناقش موضوع مهم هوه ان الواحد لازم يعمل حساب بكره واللى بنعمله فى الناس هيتعمل فينا وكله سلف ودين

اما بخصوص الجوده الشعريه والموسيقى فانا شايف انها محتاجه حبه تظبيط لان الموسيقى حاسس والله اعلم انها مش مظبوطه شويه

بس جميل مجودك فى هذه القصيده جدا

وشكرااااااااااااااااااااااا :angry2:

[soooo]

مييييين ؟؟ المرعوب

:)

انت ايه اللي جابك هنا بس يا عمنا .. مانت مهندس بترول قد الدنيا :blush:

والله يا مرعوب يا اخويا انا كنت زيك برضه مرعوب وهاموت من الخوف لما نزلت أول حاجه لي هنا .. بس بصراحه الاساتذه الأفاضل هنا في المحاورات .. ما بيبخلوش على اي حد بالنصيحه .. ونصيحه ليك يا مرعوب .. اسمع كلامهم .. وحطو حلقة في ودنك الشمال واليمين .. وصدقني والله بيقولو نصايح غاية في الأهمية

ومين قدك يا عم ..

أول واحد رد عليك استاذي الكبير ..

الاستاذ (هشام الجنيدي)

:)

وربنا يوفقك يا مرعوب يا اخويا ..

ونصيحه من خالك ..

خليك مرعوب :D

[صفاء]

عزيزى المرعوب

بالنسبة لأول محاولة .. فلا بأس بها

ان كنت تهوى العامية وتشعر بكلمات تفور بداخلك وتتمنى أن تخرجها على أكمل وجه ..

أنصحك بالقراءة أكثر لعمالقة العامية مثل ..

الأساتذة صلاح جاهين .. الأبنودى .. أحمد فؤاد نجم ... بيرم التونسى وغيرهم

واتوقع ان أسلوبك سوف يتطور بشكل كبير فى فترة وجيزة

أحييك على محاولاتك ..

اقبل تحياتى