ايها المماليك الجهلاء .. ارفعوا ايديكم عن المنحوسه

[achnaton]

فوضت امرى لصاحب الامر .. العادل القهار .. والظاهر مش حيطلع على نهار .. إنتم عارفين المثل اللى بيقول " زى القط بيحب خناقه " آهو انا القط ده .. وخناقى .. وطنى .. بلدى ..

واخبارها .. ولأن ليس أمامى الا أن اقرأ من جرائدها ما هو على النت .. فانا ابدأ بقراءة الصفحات الأولى أطمئن الاول .. قبل ما اتغرز جواها .. وفيه النهاردة خبر فى جريدة حزب " الوفد النعمانى " اللى بيدعى انه بيمثل المعارضة أو الباحث عن مصلحة البلد وانتزاعها من فم ذئاب الحزن الوطنى .. الخبر بيقول إيه .. بكل أسف وحسره ..:

بيع شركة الغزل مقابل 95 مليون جنيه

وأصولها تتجاوز 500 مليون جنيه

المنوفية ـ عبد المنعم حجازي:

وسط حالة من الغليان والتذمر الشديد تظاهر الآلاف من العاملين والاداريين بشركة غزل شبين الكوم احتجاجا علي اتجاه الدولة نحو بيعها الي احد المستثمرين الهنود وتشريد آلاف الاسر والعاملين وطردهم خارج الشركة بعد الاستغناء عن اكثر من 60% من العمالة وكذا طردهم من الشقق السكنية التي يقيمون بها منذ عشرات السنين.. ردد المتظاهرون شعارات معادية للدولة والحكومة والحزب الوطني. اشار العمال والمسئولون بالنقابة الي ان شركة غزل شبين ضمن الشركات القليلة التي تحقق ارباحا سنوية لعشرات الملايين خاصة في مجال التصدير الي اوربا وامريكا وبعض الدول الاسيوية من اجود المنسوجات والغزل

وانه تردد عن بيعها بـ 95 مليون جنيه رغم ان اصولها تتجاوز الـ 500 مليون.

فرضت قوات الامن حصارا كبيرا حول الشركة من جميع الاتجاهات واغلقت الابواب للحيلولة دون خروج المتظاهرين الي الشارع لمقابلة اللواء فؤاد سعد الدين محافظ المنوفية.. كما هرع بعض المسئولين بالشركة القابضة ورئيس مجلس ادارة شركة الغزل الي مقر المتظاهرين الذين رفضوا اي مساومة او اتجاه نحو البيع والاستغناء عن العمالة.. كما هددوا باستمرار التظاهرات والاتجاه نحو تنظيم اضراب عن الطعام.. ولتهدئة ثورة العمال قام المسئولون بالشركة بقطع الكهرباء واغلاق المصنع واعطاء اجازة اجبارية للعاملين ومحاولة احتواء بركان الغضب الذي يعتري 6 آلاف عامل واسرهم خاصة ان شركة الغزل هي الوحيدة التي توجد بالمنوفية وتمثل احد ملامح صناعات النسيج بها.

http://www.alwafd.org/front/detail.php?id=1193&cat=mohafazat

والخبر بقدر ما هو مؤسف .. ومحزن .. لا يدل الا على شئ واحد .. نظار اوقاف المنحوسه - المحروسة سابقا - أصبحوا أشد افتراسا .. وفقدوا تماما الضمير .. وياريت احد اخوانا الزملاء هنا يوضح لنا .. كم تبلغ ضريبة الدخل على دخل قدره 3،5 مليار جنيه .. وكم دفع الكونت ابراهيم نافع من ضرائب من يوم ما تخرج من الجامعة حتى الآن ؟؟ .. يا ريت يحصلوا منه الضرائب المستحقة.. ويفتحوا بها مصانع للشباب ومش شرط تبقى ملك الدوله يقرضوهم بعد دراسة مشارعهم ويساعدوهم فنيا .. وليكن ما يشاء الله لو نجح نصفهم فقط يبقى خير ..نحمد عليه الكريم الرزاق ..

ونافع ده واحد من مئات .. وعلى سبيل المثال .. هامان واولاده .. شرور واولاده .. وغيرهم .. بلاش نتكلم عن دخل علاء وجمال .. الله يبارك للجميع .. ومالناش دعوة بطريفة الحصول على هذا الدخل .. نريد أن نعرف فقط ما تم تحصيله من ضرائب .. منذ بداية عملهم .. ونحصل منهم ما تستحقه خزينة الدولة من ضرائب .. مش عاوزين أكثر من كده .. فالمنتقم الجبار عليه الباقى .. سبحانه

يعنى حكومه النحس الوطنى دى .. حتبيع مصنع شغال وحتحصل 95 مليون ثمن مصنع يستر 6 آلاف عامل واسرهم ..طيب والناس دى تروح فين تحصل الملايين العاطلين ..إن هذا المبلع الذى يمثل جزء من مصرفات عزبه من عزب المحروسة فى ثلاثة او اربعة شهور ..!! العزب المفتوحه للتسبيح بفضل المماليك على الشعب الغلبان .. مين قال أو يقدر يقول أن ده الحل .. ده نموذج من حلول المدمنين ومرضى القمار .. عندما يدفعهم المرض لبيع ما يملكون .. حتى السرير الذى بيناموا عليه .. عشان يشترى الحشيش والبودرة والافيون ..او يلعب ليله وهو يعتقد ان الكسب مضمون .. الله يخرب بيوتكم يا حرامية بشهادات .. الغريبة بقى .. ان فى نفس الجريدة خبر بيقول ايه :

<div align="center">60 مليار جنيه لإزالة الألغام وتنمية الساحل الشمالي</div>

كتبت ـ سحر ضياء الدين:

تبدأ وزارة التعاون الدولي مشاوراتها مع الدول المانحة لتمويل خطة تنمية الساحل الشمالي وظهيره الصحراوي، الذي يمثل »22%« من مساحة مصر، صرحت د. فايزة أبوالنجا وزيرة التعاون الدولي بأن خطة التنمية التي وضعها مجلس الوزراء للساحل الشمالي تقدر استثماراتها بحوالي »60« مليار جنيه، يتم تنفيذها علي مدار عشرين سنة، وتشمل ازالة الألغام، واقامة مشروعات تنموية واستثمارية في كافة المجالات الحيوية والزراعية والري والصناعة والتجارة والسياحة، تتيح آلاف الفرص من العمل للشباب، واشارت ابوالنجا الي انها عرضت علي مجلس الوزراء خطط الوزارة في إزالة الألغام لبدء خطة التنمية.

يعنى اخبط دماغى فى الحيطة .. ما احنا بقالنا اكتر من نصف قرن والالغام دى موجوده وبتأكل أولادنا .. فما معنى ذلك استثمر المبلغ فى تنمية منطقة مفيش غير طريق واحد بيوصل اليها .. وهل التنمية دى حتشمل اقامة مصانع هناك .. وهل سنمد خط سكة حديد لها ولا الناس حتركب حمير .. ؟؟؟ انتم عارفين حضراتكم الحكومه دى عاملة زى مين .. زى الراجل بتاع الاستاذ احمد رجب .. النص عريان وقاعد حاطط رجل على رجل وبيدن سجار وبيقول لزوجته اللى بتغلى الماء عشان تعشى الاولاد عيش وميه سخنه .. انه مصمم يقضى اجازة الصيف فى مارينا .. ؟؟ حافى ومش لاقى حتى بنطلون ولابس فى رجله شبشب زنوبه .. وعاوز يصيف فى مارينا أو شرم الشيخ ..

ياريت الوزراء .. او الخبراء .. اللى بيبيعوا فى املاك البلد فى سوق الجمعة بتلاته مليم تحت ستار التنمية واقامة مشروعات زراعية وصناعية وتجارية وسياحية .. وبص شوف .. كده تسليك وكده توليع !! ياريت الجماعة دول يقرأوا ماكتبه الدكتور جمال حمدان عن عبقرية مصر ..حيلاقوا ملايين الافدنه القابلة للأستصلاح على جانبى وادى النيل الاخضر .. ياريت يطبقوا ما درسوه - إذا كانوا درسوا – كيف يتصرف الفقير فى الثلاثة مليم اللى معاه .. يبيع بيته الاول .. ولا يشتغل الاول ويعمل بيت تانى وبعدين يبيع بيته ..

لقد وقعت البلاد فريسه لعصابه من المماليك .. واعلان العصيان المدنى واجب قانونى وشرعى .. وكيف تسمح لنفسها حكومة المماليك هذه من بيع املاك الشعب وهى تقضى فتره الفراغ الدستورى .. مش كفايه ما نهبته الحكومات السابقه أو ما انهبته للى يسوى واللى ما يسواش تحت بنود واسباب غير مقنعه .. ايها المماليك الجهلاء .. ارفعوا ايديكم عن ميراث الشعب .. وكفايه ما حصل وما حدث .. ونكمل بعدين ..

تم تعديل 14 أكتوبر 2005 بواسطة achnaton

[الأفوكاتو]

عزيزى إخناتون المنتدى و الوجه القبلى:

يبدوا أن معلوماتك غير صحيحة, و لا تصدق كل ما تقوله الصحف, فالمادة الأولى من الدستور المصرى تقول:

المادة (1)

جمهورية مصر العربية دولة نظامها اشتراكى ديمقراطى يقوم على تحالف قوى الشعب العاملة.

و المادة الرابعة تقول:

المادة (4)

الأساس الاقتصادى لجمهورية مصر العربية هو النظام الاشتراكى الديمقراطى القائم على الكفاية والعدل، بما يحول دون الاستغلال ويؤدى إلى تقريب الفوارق بين الدخول، ويحمى الكسب المشروع، ويكفل عدالة توزيع الأعباء والتكاليف العامة.

فكيف تتهم الدولة , بعد كل هذه الضمانات, بأنها تبيع أملاك الشعب؟

إنهم لا يبيعونها, و إنما فقط يسلفونها فقط بعقد "مؤقت", مثل زواج " المتعة".أو مثل عقد " المحلل".

و إنشاء الله , بعد عمر طويل , سيرجع كل شيئ لأصحابه.

و نعيش جميعا فى تبات و نبات , و نخلف جمال و علاء, و يتربوا فى عزنا و فى عز الأغوات و المماليك..

و لا تصدق ما تقوله الصحف المعارضة, و المستقلة, و الدستور,و جميع الصحف المغرضة.

و لا تصدق إلا ما تقوله صحف سمارة و هيمة,

رمضان كريم يا عزيزى, و كل شيئ على ما يرام, و غضبك سببه السحور الثقيل الذى تعاطيته أمس.

تحياتى.

[عادل أبوزيد]

فى عجالة سريعة أرفق قصاصة من جريدة المصرى اليوم عن الجديد فى موضوع شركة شبين الكوم.

و أنا أثق فى مصداقية جريدة "المصرى اليوم"

لم يتسع وقتى للتعليق و لكنى حرصت إرسال هذه المداخلة