تسقط جمهورية شرم الشيخ و مؤسسيها ولصوصها

[Abdulaziz Omar]

الاخ اخناتون

دايما تثري المنتدي بمواضيعك العظيمة......ربنا يبارك فيك ويديك الصحة

انا بس ليه اعتراض صغير علي تسميتك لجماعة 52 بالمماليك

والله المماليك كانوا افضل منهم ميت مرة

كانوا اجانب ومستبدين ومتعطشين للسلطة......لكن قادوا جيش هزم التتار

طومان باي كان مملوك وفضل انه يعدم علي باب زويله عن انه يسلم مصر لعدوه وهو حي

والاستاز صلاح سالم في حرب 56 طلب من عبد الناصر انهم يسلموا نفسهم للسفارة الانجليزية ويسلموا البلد عشان هم ينجوا بنفسهم

محمد علي باشا كان مملوك وكان صانع النهضة المصرية وحتي الان دعائم الاقتصاد المصري هي من صنعه هو واولاده ولم يفسد البلاد والعباد

محمد علي...المملوك صنع لمصر جيشا لم يهزم الا عندما اجتمعت عليه اقوي دول العالم في ذلك الوقت.....انجلترا و فرنسا و النمسا وتركيا....حاربوه معا

وجيش القائد الملهم انهزم من شبه دولة تعدادها ثلاثة مليون في 6 ساعات في مهزلة لم يعرف مثلها التاريخ...اسموها حربا....عام 1967

ح اقوللك ايه واللا ايه....ماانت عارف....

يبقي بالذمة موش حرام نسمي هؤلاء ال............. مماليك

تم تعديل 30 أبريل 2007 بواسطة Abdulaziz Omar

[Ghost]

يا جماعة معقول الكلام دة بيحصل ؟؟؟؟؟؟؟؟؟

[badroora]

يا جماعة معقول الكلام دة بيحصل ؟؟؟؟؟؟؟؟؟

:rolleyes: انفورشنيتلي يس يا سيد غوست

[ابو محمود]

بسم اللة

اخوتى وأخواتى لاتتعجبو مما يفعلة المترفين فى شرم الشيخ انها زائلة فلنرجع الى الوراء بالذاكرة اين من امتلك قبل تحرير سيناء من الدنس الصهيونى انهم فى غيبوبة أخوتى صبرا هل اللة ينسى ؟ هل اللة يرضى بالظلم ؟ هل اللة فقير ؟ هل اللة عاجز؟ حاشا للة انة المدبر لكل أمر فصبرا جميلآ ان تقارير البنتاجون لاتخلى شهريا او سنويا عن أن الدولة العبرية تفكر وتعد العدة لكى تنتزع سيناء من يد المصريين ولن يأتى الصفر بجانب اى عدد بعد الألفين حتى تصير سيناء مع الصهاينة هذا ما تؤكدة تقارير من داخل المخابرات الأمريكية وايضأ روسيا ولاتستهينو بروسيا فهى الأن تعد العدة للقيام من جديد العالم أجمع يقوم بالتسلح اما نحن فنقوم بالتشلح أنا لم اجد اقل تعبير من هذا أعزرونى فلا تيأسو واصبرو ان القادم يحتاج همم الرجال فلنستعد لموقعة اشد من 67اننا مقبلون على وقت لن يكون فية مكان لمتخازل او ضعيف فأتركو من ينهب ويسرق فاللة خير حافظ لهذة الدولة وهو اعلم بالغيب وانى على ثقة بأن لن يغير اللة ما نحن فية الا ان نغير نحن انفسنا فالامتحان قادم والتغيير قادم لا محالة فمن يصبر ينل ومن يهرب خسر الدنيا والاخرة فمصر لها من يدافع عنها ليس حبا فى اموالها او نعمها ولاكن حبا فى عشقها انها تستحق ان ندافع عنها ولاكن الأن ليس بيننا من يحبها الا قليل والباقى اما على عينة غشاوة او مغيب العقل بفعل اعلام او مايشاهدة من ترف المعيشة التى يعيشها المترفين او المفسدين فى الأرض

ان الخلاص قادم لا محالة فأن لم يكن بأيدينا فتأكدو اننا زائلون وانا اثق ان لن يزال الا الفاسدين

[د. السيد عمر سليم]

اسمحوا لى أولا بتعليق بسيط على موضوع النهب.

قلت مرارا وتكرارا وعلى مدى سنوات وعقود أن مصر غنية جدا . . جدا . . جدا

وصرخ أزلام حركة 23 يوليوا كذب . .كذب . . كذب إن مصر فقيرة

وقال أحدهم "إنتم بتخلفوا زى الأرانب . . حا أكلكم منين " - زى ما يكون هو ولى نعمنتا

والآن الإثبات موجود 100% . يعنى لو ما كانتش مصر غنية جدا كان بتوع الحزب البطنى لقوا حاجة ينهبوها؟

ثانيا:

هل خط بارليف نفع أو السور اللى بنته أمريكا على حدود المكسيك أوقف اجتياح المكسيكيين أو سور إسرائيل هز الفلسطينيين؟

بالطبع لأ. الحاجة الوحيدة المفيدة اللى عملتها كل الأسوار دى أنها ملأت حسابات بنوك المقاولين اللى بنوها واللى هم غالبا من اتباع وحبايب الحكومات المعنية. لكن سور شرم الشيخ تفوق على كل ذلك ، لإن مش بس المقاولين خبطوا 20 مليون عشان يبنوه لكنهم خبطوا كمان 10 مليون عشان يهدوه.

ومين عارف يمكن يبنوه تانى!!!!!!!!

وأخيرا اقرأوا تعليق الكاتب اللى قبلى محمود مصطفى بعناية وخلوه فى ذاكرتكم :angry: :rolleyes:

تفضلوا بزيارة موقعى: " العبارة "

[رمضان]

لقد كنت اسمع كثيرا عن سرقة سيناء وبالاخص شرم الشيخ ولكني لامست هذا على ارض الواقع عندما تجرأت وقررت زيارة شرم الشيخ وشاهدت بأم عيني ما يحدث ( للمصريين ) الذاهبين اليها

بدأت الحكاية عندما دخلت الى ارض سيناء الحبيبة وفي كل نقطة تفتيش س و ج كأني وافد مش مصري وكل اللي في الباص معانا نفس الحكاية رايح فين وجاي منين ورايح لمين لحد ما وصلنا لنقطة تفتيش شرم وهنا لاحظت خوف شديد على بعض الركاب ( المصريين ) كان معنا بالباص أجانب لم يسألهم احد عن اي شيء

فسألت احد المصريين لماذا كل هذا الخوف قالي احنا وصلنا شرم الشيخ قلت له وايه المشكلة قالي اخر فكرة وصلت هنا رجعت لبلدي ( كعب داير ) كأني حرامي المهم دخل احد الضباط الباص وبدأ يسأل عن الهويات والاسئلة المعتادة وبالفعل انزل اكثر من 10 اشخاص واحتجزهم عنده طبعا سألني رايح تعمل ايه قلت رايح سياحة مش باين عليه يعني واديته جواز السفر فسكت

الغريب في الحكاية اني لما خلصت اجازتي ورجعت وانا داخل الكويت دخلت بكل سهولة وبدون ان يسألن اي احد عن اي شيء وانهيت اجراءاتي بكل سهولة ويسر

حسبي الله ونعم الوكيل

[achnaton]

[size="5"]

بسم الله الرحمن الرحيم

هجوم تتار المماليك الجدد .. على أملاك الشعب فى غيبة الضمير الوطنى .. أمر يبعث الحسرة والبكاء على الانتماء الوطنى .. وبعد أن اغتالوا الضمير والذمة .. وأدت هذه العصابه التتارية الانتماء الوطنى تحت رمال سيناء كما فعل ابناء القرده مع جنودنا الاسرى هناك يوما ما .. تظاهرنا كشعب بكل اسف بما ليس فينا .. وقبلنا وتقبلنا عمليات السطو المستمرة على أمانينا .. كشعب يكاد ينفرد بين شعوب العالم بالريادة الحضارية .. وما ذكر فى هذا الموضوع من تعليقات ومن وقائع يؤكد أننا سلكنا فى المحروسة بكل اسف طريق الخداع .. وتعودنا على تحمل متاعب المرور فيه .. خدعنا حتى انفسنا بقبول ما فرضه التتار الجدد علينا .. وهذا اقسى ما فى هذا الموضوع .. حتى نجاحات الاجداد والاباء والسابقين من اهل المحروسة المخلصيين والمسجلة تاريخيا وعلميا .. سرق التتار الجدد انجازاتهم ونسبوها لأنفسهم .. رغم وضوح الامور تحت اشعة شمس مصر الحبيبة .. هل يصدق بشر مهما كانوا اننا وصلنا فى المحروسة الى مرتبه من ادنى المراتب فى خداع النفس ؟؟؟ هل يصدق بشر مهما كان نبتهم واصلهم اننا نصل الى مرتبة منافسة الحيوان فى خداع نفسه .. هل هناك اكثر من اننا فى ظل المشاكل التى فرضت على الجميع نتيجة لهذا الخداع الذى بذروه لدينا نصل الى الانانية والفردية وتحقيق المقولة " أنا ثم الطوفان " .. لقد امتلأت حياتنا بالكثير من المشكلات نتيجة لهذا الخداع .. وكانت النتيجة .. الرضا بالموجود .. من سرقة .. وغش .. وجحود ..!!!!!!! والله حرام .. حرام أن تتحول الاوهام لدينا الى درجة من درجات الايمان .. بالنهب والفساد كأحد طرق الاصلاح والبناء ..

أن هذه النماذج من الفساد الذممى الذى تمت وتتم على اراضى سيناء الحبيبة .. سبقها الكثير امثالها منذ نصف قرن .. نفس حكاية .. الاستيلاء المقنن لثروات الشعب .. ووضعها فى ثلاجه " التسقيع " .. ثم التربح والثراء بالمال الحرام .. بدءوا ايام ظهورهم بالاراضى المحيطة بعاصمة المحروسة .. حتى الزراعية منها .. وتمجيد عمليات استيلاء المماليك الجدد على اراضى المحروسة منذ ان تولوا تنظيم المجتمع والاتقاء به - كما يدعون - وتكررت مسرحيات الاستيلاء على ما كان يحيط بقاهرة المعز وغيرها من المدن من اراضى سيان صحرواية او زراعية .. ونهبوا بالاستيلاء الظالم عليها الكثير من ثروات الشعب الغلبان .. ولم يكتفوا بنهب القطاع العام .. واراضى المعسكرات العسكرية فى كل مكان بل تفننوا فى خلق الاوضاع .. واصبحت اللعبة قاعدة والقاعدة نظرية .. نظرية الحرامية فى الاستيلاء على املاك الشعب العقارية .. نفس المسرحية مثلوها فى اماكن عديدة فى الغردقة وفى الساحل الشمالى .. اينما تنظر فى الاماكن الذى لا يتواجد بها المالك بصفة دائمة .. يسرقوها بلا ذمه ولا ضمير ..

وعندما اتذكر المحاولة الاخيرة فى الاستيلاء المقنن على أراضى محمية " نبق " .. أتحسر على الهبات الربانية أتحسر على أشجار " المانجروف " .. معجزة الخالق فى بحار العالم .. أتحسر على اجمل مناطق المحروسة .. واللوحة الفنية الطبيهية للخالق فى ارض البشر .. ارجوكم اقرأوا عنها .. واقرأوا عن محمية " نبق " وغيرها من المحميات الطبيعية بمصر وشبكة النت مليئة بالاخبار والوصف الطبيعى والتاريخى ... واعلنوها فى صراحة واصرار .. تمسكنا كشعب مصر بارض اجدادنا .. ولن نبيعها .. اوقفوا تلك العقود المشبوهة فى " نبق " الشهيدة الجديدة

.. وكفاية يا غجر سرقة لم يبقى للشعب سوى جلباية مقطعة تستر عرضه .. [/size]

تم تعديل 5 مايو 2007 بواسطة achnaton

[achnaton]

بسم الله الرحمن الرحيم

دمى يغلى من يوم ما قرأت حكاية الفكرة الهباب التى فكرت فيها حكومة الخراب الالكترونية لتنمية موارد النهب الدولارية بتصدير 120 الف خدامة الى السعودية .. من بنات حواء المصريات .. رغم ان رئيس الوزارة فى الحقيقة زى ما بتقول الاوراق مصرى .. فئة ممتازة .. من النماذج الالكترونية .. ويمكن ده يكون السبب انه لا يحس بلوعة الانتماء لوطن .. ولا يدرك معنى الوطنية .. آلى بقى .. من الصعب ادانته .. والخيبة الكبيرة .. انه فى مثل حالته بنستعين بعالم يتحكم فيه ويمشيه كأى روبتا ( انسان آلى فى العالم ) .. ولكن اللى له العجب فعلا .. ان العمدة الالكترونى استعان بعالمه لتشغيل كمبيوتر تنمية الموارد الدولارية .. فخرجت علينا بتطبيق المثل العامى القديم محرفا " ما يجيبها غير نسوانها " فافتتحت بكل فخر مكتب تخديم حريمى آخر موده .. وزينت الواجهة بكل الشهادات التى حصلت عليها فى حياتها العمالية .. ما عدا شهادة الابتدائية ..!!!! ولن نتكلم عن مكتب الحاجة " عيوشه " لتوريد الخادمات .. فالكلام ده له موضوع منفصل ..

ولكن اللى يغيظ أكثر .. الجيرة المنيلة بستين نيلة .. للجمهورية الفتية الجديدة .. جمهورية شرم الشيخ .. ولأننا زى القرع بنمد دايما لبره .. ونتفشخر واحنا فلسانين .. خرج علينا النهاردة سيادة اللواء مناع بخبر انتهاء العمل فى مطار الجارة الجديدة بتكلفة 465 مليون جنيه من دم الشعب الغلبان .. والخبر ده نشروه النهاردة فى صحيفة النفاق الوطنى ويقول :

الاهرام

43998 ‏السنة 131-العدد 2007 مايو 24 ‏7 من جمادى الاولى 1428 هـ الخميس

الرئيس يفتتح اليوم مبني الركاب الجديد بمطار شرم الشيخ بتكلفة‏465‏ مليون جنيه

يفتتح الرئيس حسني مبارك اليوم مبني الركاب الجديد بمطار شرم الشيخ بتكلفة‏465‏ مليون جنيه لتصل قدرته الاستيعابية‏7.5‏ مليون راكب سنويا بدلا من‏3.5‏ مليون راكب حاليا‏.‏

وقال الفريق طيار أحمد شفيق وزير الطيران المدني ـ في تصريحات لمندوب الأهرام هشام الشامي ـ إن هذا المبني الجديد تم تصميمه علي أحدث النظم‏,‏ ويأتي في إطار خطة طموح لتحقيق طفرة متميزة في صناعة النقل الجوي في مصر‏.‏ وقال اللواء مهندس إبراهيم مناع رئيس الشركة القابضة للمطارات والملاحة الجوية إن المبني الجديد بمطار شرم الشيخ يقع علي مساحة‏45‏ ألف متر مربع‏,‏ ويتكون من دورين رئيسيين في صالات السفر والوصول‏,‏ كما تم تزويد المطار بأحدث جهاز للكشف عن المفرقعات قيمته‏40‏ مليون جنيه‏.‏

لغاية هنا والكلام حلو .. معالى الفريق نسى بس ان دخول اراضى جمهورية شرم الشيخ الجديد للمصريين محتاج بكل اسف لجهد ووقت وتفتيش وخلافة وعبور للموانع والمتاريس والكمائن .. وكأن المصرين دول من جماعات الارهاب .. وسبحان الوهاب .. الميزانية عمرانه .. والفلوس بالكوم .. طالمنا كانت اهداف الصرف خدمة الاجانب .. !! تمام زى " المعلمة عيوشة " اللى ناوية تصدر 120 الف من بناتنا للخدمة فى البيوت " .. عاوز أسأل معالى الفريق .. ماهو برضه وزير .. دفع كام ثمن 45 الف متر ارض استولوا عليها لبناء مطار هناك .. وما هو العائد على خزينة اصحاب الارض من هذا المطار .. ؟؟ نريد كده بصراحة نعرف العائد المادى لخزينة المحروسة المنحوسة من استثمار 465 مليون جنيه هناك .. وآمل الا يحدثنا معاليه عن ضرورة دعم صناعة السياحة .. المفترض أن تعود بالخير على رعايا المحروسة أصحاب الآرض .. والذين يجنون بكل اسف وحسرة فتات موائد شلة المستثمرين اللى لهفوا الاراضى فى السابق بثلاثة مليم .. او شركات الادارة الاجنبية للفنادق والمنشئات السياحية الاخرى .. من كام شهر .. سمعت من احد الافاضل هنا كيف تعامل كمائن الامن فى مداخل جمهورية شرم الشيخ .. ابناء جارتها الجمهورية المصرية العربية عند وصول وسائل النقل الى الحدود .. وحتى لا يصيبنا القرف ونحن ما زلنا نعانى من قرف مكب التخديم بتاع" الحاجة عيوشة " .. لن اطيل .. فكلنا عارفين .. وبنقاسى الامرين .. ولكن من حقنا اذا كان لنا حقوق فى الجمهورية الجديدة .. نعرف .. دخل الدولة المصرية من ضرائب وايجارات واسعار اراضى وخلافة .. ولا تقل يا معالى الفريق .. ان لنا حجم عماله كبير .. يعمل هناك .. نعرف بكام .. والفرق الرهيب بين مرتب الطباخ الاجنبى والطباخ المصرى .. ابن الجارية .. اللى ناويين تصدروا اخواته البنات للخدمه فى منازل العرب .. ومرة تانية نقول وبصوت عالى .. تسقط جمهورية شرم الشيخ ..

تم تعديل 24 مايو 2007 بواسطة achnaton

[achnaton]

بسم الله الرحمن الرحيم

هو فيه ايه يا سادة ... اول ما افتح النت النهارده واقرأ ماكتبه اخونا الفاضل الاستاذ عادل ابو زيد تعليقا على فضيحة " المعلمة عيوشة " مديرة مكتب التخديم الوطنى .. ابص الاقى مصيبة جديده تحت عنوان " مستوطنات يهودية فى قلب القاهرة " ..

http://www.egyptiantalks.org/invb/index.ph...mp;#entry282005

يعنى ايه .. مش حنخلص من الفضايح .. يعنى اقطع هدومى واخبط دماغى فى الحيط .. طب الوزارة الالكترونية وقلنا دى قادره .. وكمان ف......... واليهود واعمالهم فى هدم الكيان العربى المصرى جزء بسيط من خسة ونداله اللى قاعدين يبيعوا فى املاك البلد حته حته .. وحكاية عواد والاغنية اللى غناها الاولاد عشانه( شوفوا طوله وعرضه ) .. دى قديمة .. فقد تم التفسيم .. وشفنا طوله فى العمدة الالكترونى .. أما عرضه .. او عرض الوطن - كسرة تحت العين - فقد تولته " المعلمه عيوشة " ساهمت به فى تخفيف لوعة المشايخ .. !!!!

انا زهقت .. وسوف اهاجر .. حا اسيب البلد كلها واطلب حق اللجوء الاجتماعى فى الجمهورية الجديدة .. " جمهورية شرم الشيخ " فاضل بس اعرف اسم معالى اللواء اللى اترقى وبقى رئيس احدث جمهورية .. تصوروا أن المصرى .. يعنى مواطن جمهورية مصر العربية .. هو الوحيد بيلاقى امرين التفتيش على الحدود .. أكثر من خمس او سته كمائن بالطريق لابد ان يمر بها المواطن المصرى حتى يجتاز الحدود ويدخل الى جنة الخلود ؟؟؟؟؟

خاصة لو كان من عرب سينا .. دا له فيلم خاص .. ينفع عرضه فى كل سيما .. خاصة سينمات الدرجة الرابعة .. اللى بياخد المتفرج فيها على قفاه .. من اللى يسوى ومن اللى ما يسواش !!!

والحقيقة اتضح لى ان الجمهورية الجديدة فعلا جنة .. وسابقة العالم كله .. وخاصة الدول المتقدمه فيه .. وبتحافط على الميزانية والمصروفات .. فقد ثبت ان السور الذى دفعت فيه 20 مليون جنيه .. المانيا دفعت اصعافه فى عمل سور مشابه له حول القرية التى سيجتمع به مؤتمر الثمانية الكبار لحمايتهم من زحف 100 الف متظاهر ناوين يقضوا نهاية الاسبوع هناك وتعالوا نشوف الدول المتقدمة - زى المانيا - وهى بتقلد الجمهورية الجديدة ..

الصورة دى لجزء من السور اللى لهم اكثر من سنه بيقيموه هناك .. شوفوا حلو ازاى ..

اما حكاية الكمائن البلدى للشرطة فى الطريق المؤدى لجمهورية شرم الشيخ فقد طوروها الى بوابات الكترونية وبجانبها استراحات للزوار او السكان هناك .. بعد عزل المنطقة بالكامل زى ما عملوا فى شرم الشيخ :

اما الكمائن .. فقد اخذوا عن الجمهورية الفتية .. الحائط الالكترونى الغاطس .. زى اللى زرعاه وزارة الداخلية فى شارع نوبار امام الوزارة .. فقط طوره الالمان واضافوا اليه اشارة مرور حمراء كبيرة .. شوفوا كده :

وعندنا فى كمائن جمهورية شرم الشيخ .. ما زلنا نستخدم النظام القديم فى الكشف عن السيارت من تحت .. بواسطة المرايا .. ولكن الالمان فى الحكاية دة وعشان خاظر الثمانية ووفودهم .. عملوا كمين أجمل وانظف .. كاميرات بتنقل الصورة كاملة لاسفل السيارة وما قد يكون معلق بها ..:

شفتم بقى ازاى حا اكون مواطن نشط لو قبلوا التماسى باللجوء الاجتماعى لجمهورية شرم الشيخ ؟؟؟ رغم النداء الصارخ جوايا واللى بيقول ... " تسقط جمهورية شرم الشيخ .. ومؤسسيها .. ولصوصها " ..!!!

تم تعديل 2 يونيو 2007 بواسطة achnaton