المراهقات ... أشرس الكائنات !!

[مصرية الهوى]

من يوم السبت اللي فات بدأت التدريب الميداني في المدارس .. عشان أنا كلية تربية قسم حاسب آلي ... المدرسة اللي بأتدرب فيها هي المدرسة اللي كنت بدرس فيها أيام الثانوية ... أول ما دخلت حوش المدرسة بصراحة خنقتني العبرة :) .. افتكرت الأيام الخوالي الحلوة .. مع صحباتي اللي كلهم في مصر دلوقتي ... واللي زعلني اوي اوي إن الشجرة اللي كنا بنقعد تحتها لقيتها مقطوعة :D ... بصراحة زعلت اوي .. شفت كمان فصولي في اولى وتانية وتالتة ... عديت على كل ركن كان لي فيه ذكرى ...هنا كنت بأذاكر أيام امتحان الفيزياء في ثانوية عامة،، وهنا قعدت بأعيط لما خدت 10 من 15 ( دحيحة) ،، وهنا صاحبتي علياء كانت بتحكي لي عن دمياط والبحر والذكريات .... ( خلاص كفاية أرجوكي .. قلبي تقطع )

المهم ،،،،

الموضوع ده مش موضوعنا إنما لأن الشيء بالشيء يذكر .... ولأني رغاية ... بقي ميتقفلش ...

أنا جايه هنا هأحكيلكو عن البنات اللي بدرسلهم ،،، المدرسة عبارة عن مجمع إعدادي وثانوي ... بس أنا بشرح لثانوي بس .... والإعدادي بدخلهم حصص انتظار ...

بصراحة أنا في ورطة ... البنات في منتهى البجاحة وقلة الأدب ومش عارفه أتعامل معاهم ازاي ؟؟!!!

يعني فعلاً مفيش أي احترام ... لما بعدي من قدامهم بتقعد تبصلي من فوق لتحت .. بصة في منتهى الاحتقار ( حرام عليك يا بنتي هو أنا عملتلك حاجه :) ) ...

بصراحة مش فالحين غير في اللبس والشياكة والتليفزيون والحاجات الهايفة ...

مرة كنت عند تالتة إعدادي وما أدراك ما تالتة إعدادي !!!! قمة المراهقة وقلة الأدب وبسم الله ماشاء الله طول بعرض وأنا يا عيني ضايعة بينهم تقولوا أنا الطالبة وهما الأساتذة ....مرة كانوا كلهم طالعين واقفين عند باب الفصل وبقولهم ادخلوا بسرعة .... فوحده بتبصلي وتقولي : على فكرة أنتي شكلك عيله :wub: ...

والنهارده كمان دخلتلهم مرة تانية ... آخر حاجه بعد ما الكيل طفح نزلتهم للإدارة .. خدوا حتة تهزيئ محصلش ... يارب يكون بفايده ...

وإلا تانية إعدادي .. اللهم صلي على محمد ... بتقولي عايزه أروح الحمام ..( انا مش عارفه ايه حكاية الحمام دي :D ) .. قلتلها : لا مفيش خروج ... قالت : أنتي فاكرة نفسك مين عشان تقوليلي لأه ... قلة أدب ...

ولما يقعدوا يزعقوا .. تقولوا في مزاد (حراج بالسعودي :P ).. بقولهم على الأقل خلي عندك شويه أنوثة .. تكلمي بهدوء !!

ومرة دخلت عند أولى إعدادي ... ياننوسة ... كتاكيت والله العظيم B) .. طولهم يجي شبر ...

كل شويا وحده : ابلا ممكن أروح الحمام .. ابلا ممكن ارمي المنديل في الباسكيت .. ابلا ممكن اودي كراستي لأستاذة مش عارفه مين ...

وانا عندهم بحس نفسي مع عيال حضانة .. منتهى البراءة والسذاجة :P ...

والثانوي .. اولى وتانية ... أنواع وأشكال التلقيح في الكلام .. انما تالتة قمة الأدب والذوق .. يا عيني 24 ساعة معاهم الكتب بيذاكروا ..

مرة كنت أنا وصاحبتي عند تانية فطلعت لنا ورقة من تحت الباب ... لقيت مكتوب فيها ... على فكرة لبسك حلو ولايق عليك .. بس صاحبتك باين عليها عيانة والا بقالها يومين مااكلتش ... فاحنا سخسخنا من الضحك .. بس قمت فتحت الباب وعملت نفسي متنرفزة قلت : مين قليلة الأدب اللي كتبت الورقة دي ؟؟!! فمحدش رد ... رميتها وخرجت ورزعت الباب ..

وإلا بينططوا قدامنا وبيغنوا على ألوان الهدوم اللي احنا لابسينها :D ...

بصراحة أنا كنت فاكره نفسي بعرف أتعامل مع المراهقين ... عشان عندي بنات خالتي في ثانوي واعدادي بحبهم جدا وهما كمان بيحبوني وبحب اتكلم معاهم اوي ... بس التجربة دي خلتني تايهة ... مش عارفة ..

استخدمت معاهم الهدوء والرقة لأني بصراحة برحمهم عارفة انهم بنات مهما كان البنت حساسة وضعيفة .. بس مفادش .. استخدمت الشدة .. برضه مفادش ...

صحيح فيه بنات مؤدبين ومحترمين .. بس اللي مسيطرين على الوضع .. الشرسات ..

مش عارفه بصراحة اتعامل معاهم ازاي

أعمل ايه ؟؟؟

تم تعديل 18 أكتوبر 2005 بواسطة مصرية الهوى

[bentmasria]

مصرية الهوى ربنا يكون بعونك

حقولك حاجة وما تضحكيش لانها حقيقة وواقع تجربة عملية

البنات فى السن ده بيحبوا انك تستقطبيهم وتظهرى صداقة لكن وقت الجد تكونى فى منتهى الشدة والحزم يعنى حتتعبى شوية فى اول الامر وبعدها حيكونوا سهلات القياد

اول شىء انتى بتدرسى مادة ظريفة فيها الحكى لطيف وممكن تبدأى بان كل واحدة بعيدا عن المنهج تعرفك باسمها وشخصيتها وبتحب الحاسوب ولا لأه وبتدخل الام اس ان تعمل ايه الخ ......زومواقع باربى والشات وانتى فاهمة اذا كلمتيهم فى ده ولو بشكل توعية واهتمام مشترك حييجوا يسألوكى لو سمحتى اعمل ايه فى ده او ده وحيتحول اهتمامهم بيكى من شخص غريب موضع فحص واستكشاف لشخصية محبوبة بيثقوا فيها وبيسألوها وكمان بيشاركوها اسرارهم

خلى عقابك بالحرمان وما تدخليش معاهم فى مباريات كلامية غالبا حتخسريها

انتى ممكن تسيطرى بهدؤك ونظرتك الحاسمة وخلال وقت قصير حتتغير كل الامور

هم ببساطة بيختبروا شخصيتك وقوتها ولو فشلتى حتفضل الامور خارج السيطرة

ثقى فى قدراتك عشان يثقوا فيكى ويخافوا منك

اكيد فاهمة قصدى

ربنا يوفقك ياقمر

[se_ Elsyed]

بما إنك بتشتغلي معاهم فترة مؤقتة للتدريب فقط ... يبقى لا مجال للصداقة ... ومن الواضح طبعاً إنهم فاكرينك إنك من سنهم وبالتالي ممكن ياخدوا عليكي أو يُظهروا - سوري في الكلمة - عدم إحترام لكي مع علمهم بإن نتيجة ذلك ممكن ألا تكون العقاب ..

وبالتالي أحسن حل للتعامل مع هؤلاء هو الشدة والعنف إذا تطلب ذلك ... يعني تظبطي الأمور من الأول .. هايمشوا بعد كده على العجين ما يلخبطهوش .. ولكن لو تهاونتي أو خوفتي .. يبقى الأمور هاتفلت من يدك ...

فحاولي تستخدمي العقاب معهم من البداية وتخلي إتنين تلاتة منهم عِبرة للباقي وتهزئيهم أمام الباقيات .. أو تعاقبيهم بصورة علنية ... وبكده يبقى إضرب المربوط يخاف السايب .

[مهيب]

البنت المصرية و نصائحها التى لا تقدر بثمن ... طبعا أنا معاها قلبا و قالبا ... لأنها بتتكلم عن تجربة ... و عن خبرة ... أما س س .. فتعالى يا كابتن وروح مرة مدرسة البنات اللى بتتكلم عنها جيجى و ابقى هزأ و اضرب و اشخط و خلينا نشوف النتيجة .. :wub:

يا كابتن س س .. العينات اللى اتكلمت عنها جيجى عينات مش سهلة ... يردوا على الكلمة بكلمة و تخيل بقى جيجى هانم بجسمها الضئيل الرقيق (زى مانا متخيلها) وحواليها بنات أشكالهم تخض .. أكبر منها حجما و هى عمالة تشخط و تهزأ .. لأ لأ ... لازم تكسبيهم يا جيجى .. أسلملك :D

نصيحة منى ... خليكى مع البنت المصرية و مش هتخسرى ان شاء الله ..

مهيب

تم تعديل 19 أكتوبر 2005 بواسطة مهيب

[Folana]

السلام عليكم ورحمة الله ....

مصرية الهوى...مش كده يعنى حتفضلى تجرينى وراك من موضوع لموضوع كده ...ولا قلتى اما نفتح فى مكان تانى يمكن ترزق برضه

شوفى ياست الكل....انت فى موقف مش سهل ولكن اللى يهون عليك وزى مااشار اخونا س س انك بتقضى فترة مؤقتة ...ولكن الفترة دى لازم تتعلمى منها علشان حياتك الجاية ...

المشكلة مش فى البنات اللى فى المدرسة ....المشكلة فى درجة استجابتك وطريقة تعاملك للمواقف دى لان لسه ياما فى الجراب ياحاوى زى مابيقولوا ....

;رأى الاخت بنت مصرية صح مية فى المية بس علشان ينجح لازم تطعميه برأى س س ...يعنى لازم تكونى انت اللى ماسكة بزمام الامور ..امتى تسيبهم يتكلموا وامتى توقفيهم عند حدهم ...والا.....

والا ايه بقى !!!....اولا لازم تعرفى ان المراهقات دول بتحكمهم سيكولوجية خاصة بهم ...,وطبعا كلنا مرينا بالفترة دى وقادرين نحسها كويس ....كل واحدة فيهم بتحكمها مجموعة من السلوكيات بتختلف عن الاخرى نتيجة لاختلاف البيئة والسن والظروف المحيطة ولكن كلهم بيجتمعوا على حاجة واحدة وهى التمرد ...نتيجة لانسلاخهم من مرحلة الطفولة وانتقالهم لمرحلة اعلى ....طبعا مش موضوعنا دلوقت ...لانك مش مضطرة تعدلى سلوكهم

بالنسبة لرأى بنت مصرية ..حتطبيقه فى حدود ..والا حتلاقى نفسك فى موقف لاتحسدى عليه الا وهو اسلوب تبادل الادوار ..,,يعنى حتلاقى البنت عملت نفسها المدرسة وبتعاملك على انك التلميذة عندها ...وبرضه الشدة الزيادة جدا ممكن تضعك فى مواقف محرجة مش من البنت ولكن ممكن من اهلها باعتبارك نازلة تدريب يعنى ومالكيش حاجة عندهم ....

المهم انت ياجيجى ...بمعنى ...انك لازم تكونى مجهزة ردود افعال لاى موقف تقابليه ..سواء معاهم او فى حياتك عموما ...

بيسموها استجابات توكيدية....

لازم تحضرى ردود لكل موقف بمايتناسب معه ..يعنى كان من المفروض انك تتجاهلى حكاية الورقة دى وكانك ماشفتهيش

واللى قالت لك شكلك عيلة ..تبصى لها باستنكار وتقولى لها تقصدى صغيرة لان لو انا عيلة انت حتبقى ايه

وتحقرى من شانهم بمجرد نظرة صغيرة ..واذا هددتى يبقى لازم تنفذى ...

ى فترة صغيرة طبعا اللى حتقضيها معاهم لكن حتفيدك كتير فى المستقبل حتى مع اولادك ...

ابتكرى طريقة جديدة زى مااشارت الاخت بنت مصرية ...حبيبهم فى وجودك لكن باحترام ولازم تعرفى تتحكمى بمسار الامور كويس .......وماتخافيش منهم ولا تحسيسهم انك خايفة لانهم بيقروا عيونيك وبيتصرفوا من خلالها ....(على فكرة انا باتكلم باعتبارى ام لبنتين تقريبا فى نفس المراحل وحاسة انى بالعب مع ارجوزات يعنى لى خبرة فى معاملة القرود)

ولنا عودة انشاء الله ..................... :wub:

[مصرية الهوى]

بنت مصرية .. سي السيد .. مهيب .. فلانة ...

بصراحة ردودكم فرحتني جدا ... وكلامكم والله كله حكم .. إن شاء الله هاخذ بالنصائح اللي كتبتوها ...

ماهو يابنت مصرية انا كنت عامله لنفسي الصورة المشرقة دي .. بس بصراحة اتصدمت بالواقع :D ،، ياريت يا سي السيد تيجي تظبطهم لي وتمشي B) ،، فعلا زي ما مهيب قال الكلمة ترد عليها بستين كلمة ،، يعني بصراحة التهزئ مينفعش معاهم ...

فلانة .. انا بجرجرك ورايا عشان مبستغناش :) .. والله انتي هتفديني اوي أسأل مجرب ولا تسأل طبيب .. ومستنياكي :D

أنا إن شاء الله نويت إن أنا أول حاجه أحسسهم بالحب والتقدير والاحترام .. بس في نفس الوقت أفرض احترامي عليهم ومسمحش لأي تجاوزات إنها تحصل في الفصل ...يعني ابقى زي ماما تحترميها بس تاخدي وتدي معاها بأدب .. وكمان هأتجاهل أي حركات ،، أو كلام أو حاجه زي كده ... عشان يزهقوا وميعملوش حركات تاني ...

أنا لاحظت إن الكلمة الحلوة الرقيقة بتفيد مش مع الكل بس مع الغالب ... زي وحده كانت عامله دوشه جامدة في الفصل ... وكان معاها كراسة وجتلي قالت أنا عايزه اودي الكراسة .. قمت مسكت ايدها وقلت يا حبيبتي ممكن تقعدي في مكانك لو سمحتي ومتعمليش دوشه تاني ...

البنت وشها اتغير واتكسفت :wub: ورجعت لمكانها وبطلت دوشة ...

كمان انا رجعت اقرا في كتاب علم نفس النمو .. كتاب جميل يتكلم عن مرحلة المراهقة وتصرفات المراهقين ....

بصراحة انا مش عايزه ابقى في نظرهم الشريرة .. وكمان مش عايزه ابقى الغلبانة اللي مالهاش هيبة ولا احترام ...وأنا الحمد لله واثقة من نفسي جدا ولا بأخاف منهم ... بس مش قادرة اتصرف في نفس الوقت مع كذا شخصية ..

نصائحكم ودعواتكم ،،

:)

تم تعديل 19 أكتوبر 2005 بواسطة مصرية الهوى

[se_ Elsyed]

أنا أتكلم عن تجربة شخصية .. فأنا أشتغلت فترة بسيطة مُدرس .. وطلع عيني وأعتزلت ورجعت لمجال عملي الأصلي ...

والتجربة الثانية هي تجربة زوجتي فهي خريجة تربية إنجليزي وكانت بتنزل تدريب لمدارس إعدادي برضوا .. وتعرضت لنفس المواقف تماماً كما تعرضت لها جيجي .. وإتبعت إسلوب التقرب والتودد للعيال دي .. لكن للأسف كانوا برضوا شايفين نفسهم .. راحت قالبه على الوش التاني ولبست لهم الوش البلاستيك لحد ما ظبطتهم .

[Alshiekh]

وبسم الله ماشاء الله طول بعرض وأنا يا عيني ضايعة بينهم تقولوا أنا الطالبة وهما الأساتذة

بما إنك بتشتغلي معاهم فترة مؤقتة للتدريب فقط ... يبقى لا مجال للصداقة

هذان هما السببان الرئيسيان للمشكلة

كونك مدرسة تحت التدريب حيث ان ساعات تدريبك محدودة وصلاحياتك كمدرسة ايضا محدودة

وكونك صغيرة السن والحجم فهم ينظرون اليك باعتبارك مازلت طالبة ( جامعة او مدرسة مش حاتفرق ، المهم طالبة )

والحقيقة ان الطالبات فى هذه المرحلة العمرية تختلف طباعهم وعليك بتجربة عدة طرق لتكتشفى بنفسك اى طريقة انجع لكل فصل على حدة ، قد يتطلب الامر منك ان تكونى صارمة مع احد الفصول وودودة مع فصل آخر وذلك تبعا للاغلبية بكل فصل.

وربنا معاكى.

[ENG. BEHAIRY]

ألف مبروك ( مركز تحليل الشخصيات ) والتدريس ، وقد أحسن الله إليك حين عدت لمدرستك لتجددي تلك الذكريات الجميلة ، وتتذكري عبقًا لا يُنسى ، ولا تسترجعه أقوى ذاكرات الحاسبات الآلية بأنواعها المختلفة ، كما أن ( تحليل العيادة ) سيفيد جدًا في التعرف على الأشخاص من حولك ، لأنه ُيمهد الطريق لمعرفة أفضل الطرق في التعامل مع الغير ( خدمة جديدة ) ، خاصة مع البنات في هذه السن..وأعلم أنك في موقف لا تُحسدي عليه ، ومن هنا أنطلق لأقول :

= هناك فرق بينك كطالبة وبينك كمُعلمة ، وكذلك بين الحياة الدراسية والحياة العملية ، فكل له طبيعته وخصائصه وأهدافه.

= التعامل مع الناس فن ، وله أصوله وأسبابه ، وفطري ومكتسب ، جاء في الحديث : الدين المعاملة ، وفى حديث آخر يقول عليه الصلاة والسلام : إنكم لن تَسعُوا الناس بأموالكم فسَعُوهم بأخلاقكم ، وفى الحكمة : كنوز الأرزاق في سعة الأخلاق ، وقوله تعالى : ( ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ ) فصلت34

= النقطة السابقة أحيانًا بل كثيرًا يُساء فهمها ، هنا لابد من الحزم ، وليس الحزم هنا العنف و الصرامة ، بل البراعة في الموائمة بين الشدة واللين ، فلكل وسيلة وقتها المناسب ، للوصول إلى الهدف : لا تكن لينًا فتعصر ، ولا يابسًا فتكسر.

= في مشوار التهيئة الإلهية الحافل لنبينا عليه الصلاة والسلام رعي الغنم ، فعرف كيف يجمعها وماذا يُطعمها وكيف يطعمها ومتى يُطعمها وكيف يسوقها ويُحافظ عليها ، واشتغل بالتجارة ليعرف تقييم الأمور ، وحساب المكسب والخسارة ، والفرق بين الحقيقي والزائف ، وشهد الحرب والسلم ، فكان بعد هذا وغيره مؤهلا لقيادة أمة مختلفة الطبائع والأهواء والأجناس ، لتكون خير أمة أُخرجت للناس.

= لا تأخذي كل كلمة مهما كانت بأنها قذيفة موجهة يجب صدها أو مُجابهتها ، فهناك أمور عدم الرد فيها أفضل ، وعدم الرد في حد ذاته رد ، وهناك أمور تكفيها نظرة استياء أو تجاهل وعدم اكتراث.

= مهما كانت فترة التدريب قصيرة أو طويلة فالذي أراه هو البراعة في إقامة صِلات ، وتأسيس صداقات وترابط بينك وبينهم ، وستجدي بعد فترة أنك أنت المستفيد الأول من ذلك كله مع مرور الأيام ، وتدركي أهمية اللباقة في التعامل ، وكيفية التصرف في مختلف المواقف وشتى الظروف.

= هناك فرق بين أن تقومي بعملك وأن تُحبي عملك ، فحب المرء لعمله سيدفعه للنبوغ وتحمل المشاق ، ولكن بحب وصبر وعزم ، وهنا تذكري من َدرسَك بكل حب وإخلاص وتفاني ..تذكريهن بالدعاء ، وتذكريهن أمام بناتك كقصة شيقة ، وتذكريهن في نهجهن وطرقهن وأساليبهن.

= البجاحة وقلة الأدب والتعليقات السخيفة وعدم الاحترام ناجمة من لغة الدلال الزائد والفراغ والفضول وأمن العقاب وخواء التربية الذي تعيشه البنات ، ويؤكد ذلك قولك ( بصراحة مش فالحين غير في اللبس والشياكة والتليفزيون والحاجات الهايفة ) ، وأبو العتاهية يُعبر عن هذا المعنى فيقول :

إن الفراغ والشـــباب والجـــدة ::: مفســــدة للمرء أي مفســـدة

= حاولي حل مشاكلك مع البنات بعيدًا عن الإدارة قدر المستطاع ، إلا في أصعب الأمور وأعقدها ، فهذا سيرفع رصيدك لدى البنات ولدى الإدارة معًا ، ولاحظي أن القوة والعنف مكسب محدود ، ويترك ولابد رواسبه في النفوس.

= أختلف مع من يقول : المراهقة سن تمرد ، ولكني أرى أنها فترة انتقالية يغلب عليها البروز وحب الظهور ، وهذه فطرة إلهية في الجنسين ، وفى هذه الفترة نرى فيها بجلاء كل إناءٍ بما فيه ينضح ، ويُظهر التباين الشديد بين قريباتك الرقيقات ومن يشبههن بالمدرسة من ناحية ، وهؤلاء المشاكسات من ناحية أخرى ، ويؤكد حقيقة قل من يعرفها ، بأن أصعب شيء في حياة الأمم هي بناء الإنسان ، وأن التربية هي أعظم وأجل هدية يقدمها الوالدان لأبنائهم ، يقول الله تعالى ( وَقُل رَّبِّ ارْحَمْهُمَا كَمَا رَبَّيَانِي صَغِيراً ) الإسراء24

= خصصي خمس دقائق في البداية دردشة عامة لأي أمور تستحوذ اهتمامك واهتماماتهم ، وتذكري نفسك في هذه السن ، واسمعي رأيهم وليسمعوا رأيك ، فكل هذا يشحذ الهمم وبه تأتلف النفوس ، ثم مقدمة موجزة أو أسئلة محدودة تشوقي فيها الطالبات ، وتشدي الانتباه ، وتتعرفي على مستوياتهن .

= ومع الحزم ، والموازنة بين الشدة واللين ، والرقة والقسوة ، لا بأس من إحضار بعض الهدايا المحدودة والبسيطة جدًا كبعض الأقلام كجوائز لمسابقات أو أسئلة تطرحينها أو لواجبات أجدن الإجابة فيها ، خاصة وقد بسط الله عليك في الرزق من مشروع عيادة التحليل ( ما شاء الله ) ، كذلك استخدام روح الدُعابة والفكاهة من وقت لآخر.

بعد فترة ستستقيم الأمور ، وتتوطد أواصر المحبة ، ويدركوا أنك أختهم الحريصة عليهم ، ويبدأ فريق المشاكسات :P في الانحسار ، ويتحول العنوان إلى : المراهقات أرق الكائنات :D ، وعندها .. وعندها فقط ستتفرغي لمسئولياتك الأساسية ، التي سيخترقها بعض الأمور بين الحين والحين ، لكنها ستكون في هذه الحالة كالملح ، نحتاجه في طعامنا ولكن بقدر ..

أما الدعاء فأعلم أنك لن تضنى به خاصة فى أيام مباركات تتنزل فيهن الرحمات..

تم تعديل 20 أكتوبر 2005 بواسطة ENG. BEHAIRY

[مصرية الهوى]

ايه يا بشمهندس كله ده .......

كلامك في منتهى الجماااااااااااااااال

أنا لسا قارية دلوقتي .. ماشاء الله يقطر حكمة ... ربنا يخليك يارب

بقول لحضرتك ايه ...

الله يخليك روح شوف الموضوع اللي أنا نزلته في نفس القسم ..

انصحني ارجووووووووووووك