مَلِكُ الضَادُ عْلَي كُرّسِيِ الّقَاضُ

[Scorpion]

جرت العادة ان يتم سرد ملابسات انضمام كل فرد جديد الي عائلة المنسقين بمحاورات المصريين .. 

و عليه .. ربنا ما يقطعلنا عادة .. و الدور علي العزيز طارق حسن ..

 

 

المكان ..

غرفة المعيشة الملحقة بادارة محاورات المصريين ..

الشخصيات ..

ابو محمد يتابع علي مونيتور الكومبيوتر تطور موضوع سياسي مبتسمآ في سخرية .. ثم ينهمك في الرد بتركيز شديد

سكوب يكتب و يشطب في ورقة امامه هارشآ في راسه عدة مرات ..

مدام عبير تأخذ مكانها امام النافذة الرئيسية تشاهد غروب الشمس و هي تتكأ بذراعيها علي الأرض ممدة قدميها علي هيئة حرف لا نفهم ما هو ..

 

يتوقف سكوب عن الكتابة و ينظر جهة ابو محمد و يهم بالكلام و لكنه يراجع نفسه و ينظر الي مدام عبير ..

 

- مدام عبير ... مدام عبير ..

لكن مدام عبير لا ترد

- مدام عبيــــــــــــــــــــــــــــــــــــر 

لا رد

- انتي يا ست انتي 

- إفــــــــــف ... يا سكوب .. يا سكوب ميت مرة طلبت منكم اني لما بكون بعمل بيلاتيس ما حبش حد ابدآ يضيع تركيزي .

- بطاطس ؟؟ بطاطس ايه دي اللي محتاجة تركيز ؟؟ انتو كمان حتعقدوا الطبيخ .. دي حيا الله بطاطس .. تتقشر و تترمي في الطاسة 

- بيلاتيس يا سكوب .. بيلاتيس .. دي رياضة روحية .. زي .. زي .... زي اليوجا كده

- ده زبادي ؟

- لأ مش زبادي .. دي .. دي .. مش مهم ... نعم ؟ ... عايز ايه ؟

- شوفي لو كتبت ملك الضاد .. الضاد تبقي بالفتحة و الا الضمة و الا الكسرة ؟ يعني تتنطق ضادآ و الا ضادو .. و الا ضادي

- ما عرفش انا مالياش في النحوي .. إسأل ابو محمد

- لأ بلاش .. حاكم لما بيبقي مركز في الرد بتركبه عفاريت الدنيا لو حد قاطعه اومال انا بسألك انتي ليه

- و انا بقول لك ما اعرفش ..

- طب بلاش دي .. انا حبقي انقرشها بشوية تشكيل و في الزحمة ماحدش حياخد باله ...  شوفي لو انا كتبت

" إنهن نساء الحقول القرمزية في غياهب الغسق المسحول علي أيدي زبانية كهوف جبال الشجن الهادر"

ممكن تتفهم علي انها مرثية .. والا لو غيرت القرمزية و خلتها الحقول الفحلقية حيبان المعني الحقيقي اللي بقصده في تقدير الفلاحة المصرية علي براعتها و هي بتخبز رغيف شمسي من اللي قلبك يحبهم ؟

- نعم ؟

- نعم إيه ؟ .. أنا بسألك سؤال

- أيوه .. اللي هو ايه يعني ؟

- لو انا كتبت إنهن نساء الحقـ ....

- أيوه ايوه .. أنا سمعت القصيدة كلها .. عايز ايه بقي ؟

- أعملها قرمزيو و الا فحلقية ؟؟؟ الله !

- أعملها زي ما انت عايز يا سكوب .. يا رب انا عملت ايه بس في دنيتي علشان ترزقني بالناس دي .. يعني هو انا بعمل بيلاتيس من شوية ..

- تاني البطاطس بالزبادي بتاعك ده 

- حسبي الله و نعم الوكيل .. حسبي الله و نعم الوكيل .. انا ماشية يا سكوب .. ماشية .. حروح اجيب العيال من المدرسة و مش عايزة اتأخر عليهم .. إبقي إسأل أبو محمد عن القرمزية بتاعتك دي .. هو ذوقه حلو في الألوان ..

 

ينظر اليها ابو محمد و يهمهم  : بتدبسيني يا عبير ؟

[عادل أبوزيد]

أتصور فحلقية  تدي المعنى أكتر  و لست أدري كيف لم تدركها ببساطة الفاضلة عبير  ربما عندها تعبير أوقع

[باهى الطائر الحزين]

المشهد ناقص

مدام سلوي والأستاذ محمد واسد

والكبيييييير

ثم ان الفحلق ده لون مش عيش

شكل المسرحيه محكوم عليها بالفشل

وطارق هيكسب وهو ياللي هيضحك

هههههه

[أبو محمد]

فحلوقى إيه بس ؟!

إسمها بُحْلُقى بعقد الياء .. أففففف

 

- ما عرفش انا مالياش في النحوي .. إسأل ابو محمد

- لأ بلاش .. حاكم لما بيبقي مركز في الرد بتركبه عفاريت الدنيا لو حد قاطعه اومال انا بسألك انتي ليه

 

 

ماهو انا مش عارف هلاقيها منك ولا من ام محمد

إنت تقول لى فحلقى وهى تقولى تعالى كسَّر الرقبة بالساطور عشان الشوربة

:)

على العموم مرحبا بعودة كاتب أحلى السيناريوهات

إكتب يابنى اكتب .. خلينا نعيِّد على الأستاذ طارق

بعد ما وجعت له دماغه فى الموضوع بتاع  فعولن فعولن متفاعلن فعلن

[Scorpion]

يعني انت فاكر ان المشرفين بيبقوا قاعدين كلهم في اوضة واحدة و سايبين البيت فاضي يا استاذ باهي .. و الا فاكر انهم بيقضوها نباطشية واحد و بعدين يروحوا ..

عالعموم المسرحية المرة دي مش حتخلص بسرعة كالعادة .. و بما ان الضحكة بقت شحيحة اليومين دول انا قررت اعملها مسلسل ..

 

ايه رأيك بجاااااااااااا  ؟؟

[Scorpion]

 

 

بعد ما وجعت له دماغه فى الموضوع بتاع  فعولن فعولن متفاعلن فعلن

 

 

اهم شوية الفعلة اللي شغالين في رفاعي دول هما اللي ادوني المدخل يا ابو محمد ..

ده احنا حنعك عك ..

[أبو محمد]

اهم شوية الفعلة اللي شغالين في رفاعي دول هي اللي ادتني المدخل يا ابو محمد ..

ده احنا حنعك عك ..

 

التفعيلات بقوا فواعلية ؟ .. طارق مش حيسيبك

هيغرقك فى "بحور" الشعر بلا "قافية"

وهياخدك مشوار لغاية الخبن والزحافات

استلقى وعدك يا بتاع الفحلقى

[أبو محمد]

ما تنساش تطلعنى بمنظرين

:)

منظر وانا باكل هُبر الرقبة ومنظر وانا مركز قدام الشاشة

أستأذن بقى .. معاد الشوربة والفتة أزف

[tarek hassan]

المحاورات من الداخل الجو فيها على غير المتوقع يملؤه المرح وخفة الظل التي لا تجارى ولكن مصطلحات الفاضلين : أبو محمد وسكوب هي المشكلة اللي مخلياني دائما أقول : أنا في عرض المجمع اللغوي 

محتاج كورس أشاكيفي ضروري

مع إني بتاع عربي لكن مش فاهم يا أستاذ : سكربيون أنت عايز إيه 

وعلى رأي دكتور كان عندنا في الكلية كان بيقول : طالما أنت مش فاهم يبقى أنا نجحت 

أنت نجحت يا باشا لأن أنا مش فاهم 

عنوانك جميل وجو القصة حلو والسيناريو ممتع 

عايز بس أعرف مين اللي شكل ليك العنوان 

أكيد شرير وعايز يوقعك فيه 

يا نهار أبيض 

ملكُ الضادِ على كرسِي القاضي 

كده المتهم هيطلع براءة وهيتحبس المحامي 

لأنه قد شوه ترقيش المرقش رقشه 

تحياتي وأشكرك على هذا الموضوع 

[tarek hassan]

المشهد ناقص

مدام سلوي والأستاذ محمد واسد

والكبيييييير

ثم ان الفحلق ده لون مش عيش

شكل المسرحيه محكوم عليها بالفشل

وطارق هيكسب وهو ياللي هيضحك

هههههه

 

معلومة كويسة .....أنقذتني ....  خليك معايا بالمعجم

وأنهي لون أحلى 

الفحلقي 

ولا 

الفستقي 

[Scorpion]

انا قعدت راقد في الدرة مستنيك تخش تديلي كحكة علي عنوان الموضوع ..

 

طبعآ لازم يبقي كده .. انت كنت عايزني اكتبه صح ؟؟؟

يا سلام يا خويا 

اومال انت دورك حيكون ايه بقي ان شاء الله لما من اول حلقة تتظبط المسائل معانا ..

 

خليك انت بس متابع و حتلاقي شغل للصبح ..

[باهى الطائر الحزين]

 

معلومة كويسة .....أنقذتني ....  خليك معايا بالمعجم

وأنهي لون أحلى 

الفحلقي 

ولا 

الفستقي 

 

 

الرموحلي 

ده اذا بتسألني عن نفسي

هههه

[tarek hassan]

انا قعدت راقد في الدرة مستنيك تخش تديلي كحكة علي عنوان الموضوع ..

 

طبعآ لازم يبقي كده .. انت كنت عايزني اكتبه صح ؟؟؟

يا سلام يا خويا 

اومال انت دورك حيكون ايه بقي ان شاء الله لما من اول حلقة تتظبط المسائل معانا ..

 

خليك انت بس متابع و حتلاقي شغل للصبح ..

 

أنا كده فهمت فهمت .....خلي بالك فهمت الأولى غير التانية الأولى من الفهم والتانية من الهيام 

أنا معاك وكنت هستطرد لكن سحقا للدخول عن طريق التليفون أو الكتابة بواسطة اللاب توب للمبتدئين أمثالي في حالة الضرورة

المهم 

قاض ... القاضي .... لهم حكاية نحوية مش هقولها لك علشان متزهقش من الموضوع بدري 

لكن من غير قواعد كده هنقول فلان محام أو قاض ولا نقول محامي أو قاضي

بس ( يعني كفاية كده بالهندي )

متابع بالتأكيد

[Scorpion]

الحلقة الثانية

 

يلملم سكوب شجاعته و يتنحنح و ينادي بصوت منخفض :

- أبو محمد

- (يأتي الرد همهمة غريبة)  : ها..هم..هووه ..

- أبو محمد

- نفس الهمهمة تعقبها كحة ..

يفقد سكوب صبره و يصيح ... يا ابو محمد ..

- يا ابني اصبر.. (يشرب جرعة ماء) .. أصبر .. خليني ابلع حتة الرقبة دي الأول علشان اعرف ارد عليك .. الواحد يِزْوَّر يعني علشان يعرف انت عايز ايه

- و انا إيش دراني انك بتاكل يا ابو محمد .. ما انت مدينا ضهرك و عامل نفسك بتابع تقارير الأعضاء

- هش الله يخرب بيتك .. انت عايز الأستاذ عادل يسمعك و نخش في سين و جيم .. نعم .. عايز ايه ؟

- إيه موقع الفحلقة من الإعراب ؟

- هه ؟

- الفحلقة ... ف ح ل ق ة .. إسم علم يعني و الا جمع مؤنث ثابت ؟

- ثابت ؟؟ ثابت ده الحلاق اللي كان بيحلقلك .. عالعموم  إللي أعرفه ان قواعد اللغة العربية مش ممكن نطبقها علي الكلمات القبطية .. و بعدين إسمها بحلقة مش فحلقة .. بحلق يبحلق فهو بحلاقآ .. ده يعني لو طبقنا قواعد الصرف علي اللغة العامية .

- لأ يا ابو محمد هي فحلقة .. درجة من الألوان بين البني غرغرينا و الأخضر المفقوس..

- لون ؟؟ غرغرينا !!! .. تبقي صفة .. نعت ..

- ما ينفعش تكون نحت يا ابو محمد .. لأن البطيخ عادة بيبقي احمر مش فحلقي

أبو محمد بنفاد صبر :

- نعت يا سكوب .. نعت .. بالعين مش بالحاه .. أرحمني يا ابني .. ارحمني ابوس أيدك .. أنا أساسآ فطسان من الحر .. و صوتي اتنبح مع بتوع الصيانة علشان ييجوا يصلحوا التكييف .. يحولوني علي بتوع الخزنة .. بتوع الخزنة يقولولي عايزين إذن صرف ممضي من الأستاذ عادل .. و الأستاذ عادل يقول :

( يردد معه سكوب هاززآ رأسه ) : الميزانية ما تسمحش ..

يعني الواحد ما يعرفش يصيف و بزيادة يموت من الحر في الشغل ..

- قشطة .. ما تصيفش ازاي يعني .. هو بحر اسكندرية اتقهقر لحد اليونان و الا ايه ؟ ايش حال قدام بيتكم علي طول ..

-  بحر ؟؟  بحر ايه اللي انت جاي تقول عليه .. هو انت ممكن تشوف من اساسه  ريحة البحر عندنا في الصيف ؟ .. احنا بنصيف بس في أمشير .. بقية السنة البلد كلها بتبقي عندنا .. بحللهم و صوانيهم و شماسيهم و دِككهَم .. ده انا ديك النهار لقيت عيلة كاملة عاملة بير السلم عندي كابينة  عادي .. و هوبا قبيلة كاملة خارجة من غير هدوم يا دوب البتاع البفتة ده .. و اللي بفردة كاوتش علي كتفه و اللي بالعوامات علي وسطهم و اللي بحلة المحشي علي راسها .. عادي ..  وتقوللي بحر و مصيف ... يا رااااااااجل ..

- طب ما تروح الساحل ؟

- إجري يالاه .. إجري لعملها معاك .. ساحل ايه يا سكوب .. انا عالمعاش .. انت عارف الأسعار هناك عاملة ايه ..

- بلاها الساحل .. إطلع علي مرسي مطروح .. روعة .. روميل و عجيبة .. و الميه و الهوا ..  تاخدلك شمسية جنب ليلي مراد و حسين صدقي و عيش يا عم ..

- إنت عارف أسعار اللوكاندات هناك بقت بكام يا سكوب ؟

- بلاها لوكاندات .. من كل معارفك اللي بييجوا يصيفوا عندك مافيش حد منهم من مرسي مطروح تردله الزيارة كام يوم من نفسك 

- لأ ما فيش .. تعرف انت حد ..

- انا كبيري بحيرة البرلس .. الوحيد اللي اعرف انه من مرسي مطروح الجدع اللي اسمه طارق ..

- طارق ؟؟ طارق مين ؟؟

- طارق يا ابو محمد .. أستاذ حمام

- حمام ايه و بط ايه يا سكوب .. ايه جو الافلام ده  !  ليلي مراد و صدقي و دلوقتي الريحاني .. يا جدع حرام عليك اللي بتعمله فيا ده 

-  طارق يا ابو محمد .. مدرس العربي اللي بيكتب معانا في المحاورات ..( ثم يقف فجأة و تلمع عيناه و هو يردد ببطء) .. م د ر س   ع ر ب ي ..

- طب بذمتك يعني يا سكوب .. بذمتك .. واحد كل معرفتي بيه انه زميل قلم معانا في المحاورات .. اقوله ايه .. ابعتله رسالة إدارية يعني أهدده باني حلبه انذار لو ما رضيش يستضيفني علشان اصيف .. انت بتتكلم جد و الا رجعت تدخن الموكيت من تاني .. 

- استني بس يا ابو محمد .. الموضوع بقي اكبر من التصييف .. سيهالي الفها في دماغي و انا الاقيلك حل ..

- يا عم رووووح ..

- طب ما ردتش عليا 

- في ايه 

- في الحقول الفحلقية

- إجري العب بعيد يا سكوب

[عادل أبوزيد]

الشباب  يعود للمحاورات   ... إيه فين أيام العصابات .. دنيا

 

   بس فكرة  نميسة  حكاية  إستغلال الأعضاء الجدد دى        ليه ما ظهرتش من زمان ؟؟

 

ممكم نطبقها بأثر رجعي   قول سنتين تلاتة    مين يا ترى  و نستغله في إيه ؟

[عبير يونس]

اديني جيت اهو بعد ما الولاد اتغدوا و سايباهم في التمرين في النادي

خير يا سي سكوب

لقيت حل في الألوان اللي كانت محيراك؟

فحلقي و قرمزي تقريبا؟

هه وصلت لايه بقى؟

هههههههههههههههههههه

و الله زمان يا سكوب

:D

[Scorpion]

و النبي ايه ... ابو محمد حيساعدني يا اختي  .. خليكي انتي في البطاطس بتاعتك   .. الواحد ما يطلعش منكم بعقاد نافع ابدآ ...

[tarek hassan]

طارق : بيقولوا الجو حر قوي في أسكندرية اليومين دول يا أم هنا

أم هنا : هما مين اللي بيقولوا

طارق : والله زمايلي في المحاورات  

أم هنا : أنا خلاص بطلت أقولك عايزة أتفسح في أسكندرية

طارق : أسكتي يا شيخة دا الناس في أسكندرية هما اللي عايزين يصيفوا هنا في مطروح ... اي والله

أم هنا : ما هو الاسكندرانية بيصيفوا هنا .... أنت فاكر صحبك إسلام  المصري لما نزل هنا السنة اللي قبل اللي فاتت

طارق : أيوه أيوه ....إنتي عارفة زمايلي في المحاورات لهم فضل كبير عليه وكمان خلوني مشرف  في أكبر صالون ثقافي في مصر  

أم هنا : انا مش عارفه أنت عمال تحرجم على إيه من الصبح  

طارق :   ... إنتي بنت حلال ... دا كنت بفكر أعزم حد من زمايلي دول ... علشان الطبيخ الحلو بتاعك يسمع في المحافظات التانية ... بس رجعت وقولت يا واد قولها الأول علشان هي اللي عارفة أحوال البط والفراخ ... وما علينا من اللحمة

أم هنا : بس كل اللي اقولك عليه تجيبه وعلى راي المثل : اطبخي يا جارية كلف يا أبو هنا

طارق : إيه  رأيك نفسي أستضيفهم  عندنا كام يوم وتبقى لفتة حلوة منك وأنأ عارف إنك أهل كرم وذوق وهتعملي الواجب وزيادة

أم هنا :  يعني هيسيبوا أسكندرية ويرضوا ييجوا مطروح ومهما هنعمل هنكون غير  مستوى اسكندرية أنا بقولك أهه

طارق : مالكيش دعوة المهم تخلصي نيتك كده

أم هنا : أومال ... أكيد .... بس شوف بس هتبدأ بمين تعزمه يعني .... ؟     

طارق : أنا بقول أبدأ بسكوب على ما أبو محمد يفضى

أم هنا :... أيوه فاهماك .... أكيد العزومة دي لها علاقة بالموضوع الأخير ...

طارق : ... لا ياأم هنا متفهمنيش غلط ... هو كويس معايا من غير حاجه

[Scorpion]

طب ما انت بتكتب عربي صح اهه .. اومال ايه الأوشاعات اللي مالية المحاورات ان وزير التربية و التعليم الجديد متخرج علي ايديك .

[tarek hassan]

طب ما انت بتكتب عربي صح اهه .. اومال ايه الأوشاعات اللي مالية المحاورات ان وزير التربية و التعليم الجديد متخرج علي ايديك .

أنا كده حسب ما أنت عايزني .....

لكن الطبع بيغلب التطبع 

حاجة غريبة إني متمسك بالتقليدي الكلاسيكي في الكتابة والفن ..... حتى في الطعام 

هتلاقي الفضائيات مفتوحة طول النهار على برامج طبخ ولكن الطبيخ زي ما هو مفيش جديد على قديمه 

بعضنا يجده اللذة الحقيقة فيه فقط ....