دستور يا سيادنا

[Grandma]

فيه كلام كدا و ( العياذ بالله ) عن تغيير مواد في بنود الدستور 

 

انت مع أو ضد التغيير و التعديل في الدستور و ليه ؟

[أبو محمد]

أولا .. ده كان قرص فوار (على رأى سكوب) من إنتاج موسى وبكرى

ثانيا .. ليه بقى (والعياذ بالله) ؟ .. الدستور مش كتاب مقدس أو صنم يُعبد

ثالثا .. الدستور نفسه فيه مواد تضع آلية تعديله .. يعنى احنا متفقين إنه ممكن يتعدل

رابعا .. ردا على سؤال الحلقة : أنا ضد تعديل الدستور - حاليا - وده مش معناه إنه Perfect

خامسا .. الدستور ليس مجموعة من المواد التى تحلق فى الفضاء .. لابد من تشريعات لتطبيقه

سادسا .. لا أرى تلك الهواجس التى انتابت البعض من "هرى بكرى وموسى"

سابعا .. من لديه تلك الهواجس فهو "هجاس" أو بالبلدى "هجاص"

ثامنا .. كما قال السيسى : إذا أصبح المجلس - فى وقت ما - عائقا ضد تحقبق مصلحة الشعب .. فبينى وبينهم الشعب

تاسعا .. إيه هى بقى الهواجس ؟ .. خلونا - كشريحة من الشعب - نناقشها ونشوف هى حقيقة ولا "هجس" أو "هجص"

عاشرا .. أنا من الغالبية العظمى التى وافقت على الدستور رغم تحفظى على بعض مواده ولن أطالب بتغييرها إلا إذا نجم عنها مشاكل

:)

حادى بادى .. قصدى حادى عشر .. هل لديك أقوال أخرى ؟

بس قبل ما تجاوبى اتفرجى على مشروع تعديل الدستور اليابانى ؟

 

ننشر صور المعركة الساخنة فى البرلمان اليابانى بسبب "تعديل الدستور"

ودى بعض ملامح التعديلات الدستورية

 

[Grandma]

 

أولا .. ده كان قرص فوار (على رأى سكوب) من إنتاج موسى وبكرى

 

 

أعتقد ان دا اسمه ( جس نبض ) الشارع

 

ثانيا .. ليه بقى (والعياذ بالله) ؟ .. الدستور مش كتاب مقدس أو صنم يُعبد

 

 

احنا نستعيذ ربنا في كل الاحوال 

أنا معاك ان الدستور مش كتاب مقدس 

لكن لازم يكون له هيبة ... مش كل شوية نلعب فيه 

أي تغيير في الوقت الحالي هيعتبر قنبلة موقوتة خصوصا لو كانت تخص صلاحيات الرئيس

 ازاي نغير أي مادة في الدستور منغير وجود برلمان ؟!!

 

 

ثالثا .. الدستور نفسه فيه مواد تضع آلية تعديله .. يعنى احنا متفقين إنه ممكن يتعدل

 

ايوه ممكن يتعدل لكن زي ما قلت مش دلوقتي 

ما حبكتش 

 

رابعا .. ردا على سؤال الحلقة : أنا ضد تعديل الدستور - حاليا - وده مش معناه إنه Perfect

 

دا نفس رأيّ ...معناه اننا متفقين 

 

 

خامسا .. الدستور ليس مجموعة من المواد التى تحلق فى الفضاء .. لابد من تشريعات لتطبيقه

 

ماشي ...فاليشرعوا التشريعات 

 

 

سادسا .. لا أرى تلك الهواجس التى انتابت البعض من "هرى بكرى وموسى"

 

 

معنى كدا ان مافيش حد فكر يغير الدستور ؟

طب الحمد لله 

 

سابعا .. من لديه تلك الهواجس فهو "هجاس" أو بالبلدى "هجاص"

 

زي بكري و موسى و غيرهم 

 

 

ثامنا .. كما قال السيسى : إذا أصبح المجلس - فى وقت ما - عائقا ضد تحقيق مصلحة الشعب .. فبينى وبينهم الشعب

 

كلام جميل ما اقدرش اقول حاجة عنه 

بس المهم الشعب هو اللي يكون له الكلمة

 

 

تاسعا .. إيه هى بقى الهواجس ؟ .. خلونا - كشريحة من الشعب - نناقشها ونشوف هى حقيقة ولا "هجس" أو "هجص"

 

أهم حاجة هاجس هو  الخوف من أن ينفرد الرئيس بالسلطة 

و بعد ان ينفرد ...تنفرد مدة رئاسته 30 سنة 

 

عاشرا .. أنا من الغالبية العظمى التى وافقت على الدستور رغم تحفظى على بعض مواده ولن أطالب بتغييرها إلا إذا نجم عنها مشاكل

 

انا ما وافقتش على الدستور لكن لازم نحترمه 

و لا اوافق على تغيير اي بند فيه الا للضرورة القصوى 

 

 

حادى بادى .. قصدى حادى عشر .. هل لديك أقوال أخرى ؟

 

تمت اقوالي 

 

 

 

 

انا اسمي مكتوب ؟

 

:)

 

بس قبل ما تجاوبى اتفرجى على مشروع تعديل الدستور اليابانى ؟

 

طيب انا جاوبت قبل ما اتفرج

يعني امسح اللي كتبته وبعد ما اتفرج اكتب تاني ؟

 

ننشر صور المعركة الساخنة فى البرلمان اليابانى بسبب "تعديل الدستور"

ودى بعض ملامح التعديلات الدستورية

 

الناس دي معدية يعني تتخانق براحتها 

بس خد بالك التغيير كان في البرلماااااااان 

و البرلمان مافيهوش احمد عز ولا فتحي ( موافقة )

 

 

[Grandma]

عجبني كلام ابو خليل 

 

 

https://www.youtube.com/watch?v=tblM-vDaZcQ

[أبو محمد]

عجبني كلام ابو خليل 

 

 

https://www.youtube.com/watch?v=tblM-vDaZcQ

 

إيه التلاكيك دى ؟

وهو من إمتى السيسى قال إنه عايز يعدل الدستور ؟

هيمة بيعبى دقايق .. الكونتراتو بيقول لازم يقعد يتكلم ساعة أو ساعتين

[Grandma]

 

إيه التلاكيك دى ؟

وهو من إمتى السيسى قال إنه عايز يعدل الدستور ؟

هيمة بيعبى دقايق .. الكونتراتو بيقول لازم يقعد يتكلم ساعة أو ساعتين

 

 

 

يعني هيعبي ساعتين ويعادي السيسي ؟!!

أكيد سامع طراطيش كلام 

فقال الحق انفخ في الزبادي 

[eslam elmasre]

الدستور هايتعدل وها يقلل صلاحيات مجلس الشعب وستزيد صلاحيات رئيس الجمهورية ومش بعيد تتعدل مدة رئاسة الجمهورية الى مدة رابعة وسادسة وثامنة لان الدول لا تدار بالنوايا الحسنة 

[eslam elmasre]

 

إيه التلاكيك دى ؟

وهو من إمتى السيسى قال إنه عايز يعدل الدستور ؟

هيمة بيعبى دقايق .. الكونتراتو بيقول لازم يقعد يتكلم ساعة أو ساعتين

 

ماهو قال انه مش هايترشح ورشح نفسه هي جات على الدستور 

ده حتى تعديل الدستور اسهل ميت مرة من ترشيحه للرئاسة 

افتكر اني نشرت موضوع بعد 30 يونيو بشهر او شهرين عن ترشيح السيسي ووقتها كنت حضرتك اول المشككين في ترشحه 

بردو المرادي بتشكك لكن اللي انا متأكد منه ان الدستور هايتغير ولصالح صلاحيات رئيس الجمهورية 

[Grandma]

 

بردو المرادي بتشكك لكن اللي انا متأكد منه ان الدستور هايتغير ولصالح صلاحيات رئيس الجمهورية 

 

طب و النبي ما تقولها في وشي كدا خبط لزق 

هروح من المش اخوان بس معارضين فين ؟!!

[أبو محمد]

يا أستاذ إسلام .. أنا لا أشكك

أنا أقول رأيى واللى يشك يبقى دبوس

أنا بصراحة أحسدك على تأكدك

:)

ياريت عندى نصه

ما كونتش وجعت دماغى وكل حاجة اقراها آخدها بجدية

زى مثلا يقينك هذا اللى خللى دماغى تلف وقولت لازم "اتأكد"

 

الدستور هايتعدل وها يقلل صلاحيات مجلس الشعب وستزيد صلاحيات رئيس الجمهورية ومش بعيد تتعدل مدة رئاسة الجمهورية الى مدة رابعة وسادسة وثامنة لان الدول لا تدار بالنوايا الحسنة 

 

وكمان الأستاذ باهى - مشكورا -  نقل لنا فى موضوع متابعة الانتخابات البرلمانية

مقال كده من بتوع "إعلام على ما تفرج"

بيقولك يا سيدى إنه "متأكد" إن البرلمان هينعقد من هنا ويتحل من هنا

والدليل قالوله .. لأن المادة 226 من الدستور بتقول كده عشان كده هو "متأكد"

قوم إيه .. عشان الخصلة البطالة اللى فىَّ ..  روحت اقرا المادة 226 عشان "أتأكد"

واشوف فى أى سطر منها بتقول ان المجلس لازم ينحل وتتعمل انتخابات جديدة بعد تعديل الدستور

(شوفت ازاى الراجل متأكد ان الدستور هيتعدل والمجلس هيتحل كمان)

:)

أنا مش ها اعلق على كلام الأخ "المتأكد" لأنه مش هيوصل له .. يعنى مفيش فايدة

أنا بس هانقل المادة 226 بدون تعليق لأن فيها الرد على كلام حضرتك المظلل بالأحمر

 

مادة (226)

لرئيس الجمهورية، أو لخٌمس أعضاء مجلس النواب، طلب تعديل مادة، أو أكثر من مواد الدستور، ويجب أن يُذكر فى الطلب المواد المطلوب تعديلها، وأسباب التعديل. وفى جميع الأحوال، يناقش مجلس النواب طلب التعديل خلال ثلاثين يوماً من تاريخ تسلمه، ويصدر المجلس قراره بقبول طلب التعديل كليًا، أو جزئيًا بأغلبية أعضائه. وإذا رُفض الطلب لا يجوز إعادة طلب تعديل المواد ذاتها قبل حلول دور الانعقاد التالى. وإذا وافق المجلس على طلب التعديل، يناقش نصوص المواد المطلوب تعديلها بعد ستين يوماً من تاريخ الموافقة، فإذا وافق على التعديل ثلثا عدد أعضاء المجلس، عرض على الشعب لاستفتائه عليه خلال ثلاثين يوماً من تاريخ صدور هذه الموافقة، ويكون التعديل نافذاً من تاريخ إعلان النتيجة، وموافقة أغلبية عدد الأصوات الصحيحة للمشاركين فى الاستفتاء. وفى جميع الأحوال، لا يجوز تعديل النصوص المتعلقة بإعادة انتخاب رئيس الجمهورية، أوبمبادئ الحرية، أوالمساواة، ما لم يكن التعديل متعلقًا بالمزيد من الضمانات.