عايز اخد رأيكم في عقد عمل في الرياض و مكان السكن المناسب

[Ahmed ghreeb]

السلام عليكم ورحمة الله وبركاته

عايز اخد رأيكم في فرصة عمل كمهندس صيانة معدات مسئول عن ٧ مصانع

المصانع ٣ في المنطقة الصناعية الاولي بالرياض

مصنعين في المنطقة الصناعية الثانية في الرياض

مصنع في جدة ومصنع في الدمام

انا مهندس كهرباء ٧ سنوات خبرة

المرتب تم الاتفاق علي ٦٠٠٠ ريال

بدل السكن ٤ شهور من الراتب

بدل المواصلات ١٥٪ من الراتب

طبعا بخلاف التامين الصحي والمعتاد من الاجراءات

ايه رأيكم في العقد

وياتري ايه احسن مكان اسكن فيه علشان يكون قريب من المصانع اللي في الرياض

ومتوسط الإيجارات والمواصلات هتبقا ايه وكده يعني

انا حاليا اتبعتلي العقد علي المكتب ومستنيين نتيجة الكشف الطبي اللي هتطلع بكرة علشان نعمل التأشيرة

برجاء المساعدة علشان انا حاسس اني تايه

[AbuZeyad]

يعني الراتب كله حوالي 8900 ريال في الشهربالبدلات

انا ملاحظ ان شغلك محتاج انك تتنقل كتير فيكون من الافضل لو ان الشركة توفر لك سيارة لان الـ 15% بدل مواصلات (900 ريال) مش هايكفوك تكسيات

لاحظ ان التاكسي هو وسيلة المواصلات الوحيدة الفعالة في الرياض بالاضافة الى بعض الاوتوبيسات التعبانة جدا واللى مش هاتخدمك

اقل مشوار للتاكسي 10 ريال

او انك تشتري سيارة بالقسط وممكن تجيب سيارة معقولة بقسط 900 ريال في الشهر زي الاكسنت او السيراتو حسب العروض وقت ما تيجي

الخلاصة ان بدل المواصلات هاتصرفه هاتصرفه

الراتب في المجمل متوسط أو اقل من المتوسط بالنسبة لمهندس بخبرتك ومستوى المعيشة في الرياض وخصوصا لو متزوج وعندك اطفال

الحقيقة لو انت متزوج هايكون من الصعب انك تدخر من الراتب دا غير مبلغ بسيط

شقة العائلة المتوسطة في حدود 1500 - 2000 ريال في الشهر

مصاريف البيت في حدود 3000 ريال في الشهر غير المدارس دا حوار تاني

لو انت اعزب ممكن تعرف تحوش كويس

بس بصراحة انا شايف الراتب قليل على انك تكون مسئول عن 7 مصانع في 4 مناطق مختلفة وشايف ان الشركة دي بتحاول توفر من وراك

باختصار لو بتعرف تعمل نص المبلغ دا في مصر ماتجيش واصبر لما تجيلك فرصة تانية، لكن لو محتاج كاش بسرعة ممكن تقبل العرض وتحاول تدور على فرص احسن

بالنسبة للسكن ممكن تدخل على جوجل وتشوف المناطق الصناعية دي فين بس انا شايف انك ممكن تسكن في مناطق زي الملز - المربع - السلي- العزيزية

طبعا لو معندكش مدارس هاتعرف تسكن براحتك لكن لو عندك مدارس هاتكون مرتبط بموقع المدرسة اكتر من موقع العمل

 

وانت بتخلص الورق اتاكد من الاتي:

التاشيرة بمسمى مهندس او اي مسمى يتوافق مع مؤهلك الدراسي لانها لو مش متوافقه مع المؤهل الدراسي ممكن متعرفش تعمل استقدام لاسرتك

التأمين الصحي يكون Class A

تذاكر الطيران السنوية على الشركة

لو تعرف حد شغال في الشركة دي اساله الشركة بتدفع الراوتب في معادها ولا بتتاخرولو بتتاخر بتتاخر كام يوم؟

ان الشركة هاتوفر لك سكن لما توصل وهاتصرف لك سلفة من راتب اول شهر تمشي بيها حالك

 

وبالتوفيق

[Ahmed ghreeb]

تسلم علي اهتمامك وردك عليا

انا متزوج فعليا لكن هسافر لوحدي لظروف خاصة بالاطفال

فالسكن هيبقا غالبا استوديو عزاب او مشاركة

الشركة بتوفر سكن في الاول لغاية ما تلاقي سكن خاص بك

الشركة هي شركة الجزيرة للأجهزة المنزلية تابعة للمجموعة الراجحي

في مصر انا مرتبي كاملا قبل الاستقطاعات ٣٧٠٠ جنيه يعني اقل من ربع المرتب ده

بالنسبة للمواصلات انا شفت اسعار سيارات مستعملة سواء علي ديبوزيل او بيزات او حراج بحوالي ٦٠٠٠ الي ٨٠٠٠ ريال وابقي ابيعها بعد كده

وللأسف دي الاسعار ااعادية لصيانة المصانع ( ليه مدخلتش مجال المقاولات)

فإيه رأي حضرتك

[AbuZeyad]

يبقى سافر والله يعينك

انا معرفش اسعار مهندسين الكهرباء كام لكن لسه شايف ان الراتب قليل على المجهود اللى هاتبذله في سبع مصانع

بالنسبة للسيارة بلاش المستعمل احسن لك خليك في الجديد

السيارة اللى هاتشتريها بـ 6000 ريال لانك غالبا هاتلبسها وغالباً هاتصرف عليها 12000 علشان تخليها صالحة للركوب ومتضمنش اللى ممكن تعمله فيك من اعطال غير صعوبة بيعها بعد كدا

وزي ما قلت لك انت ممكن تحط بدل مواصلاتك في سيارة جديدة بالضمان والصيانة والتامين وكل دي برضة مزايا مش هاتلاقيها في المستعمل

بس لو ناوى على المستعمل وان كنت لا انصحك بيه اصبر شوية لما تحوشلك مبلغ في حدود 25000 ريال ممكن تشتري مستعمل بحالة معقولة زي يارس او اكسنت او حتي سيارات اكبروطبعا حاول تخليك في التيوتا علشان احسن سيارة بتحافظ على سعرها ومتنساش تجيب رخصة قيادة من مصر لانها بتسهل جدا استخراج الرخصة السعودية وهاتوفر عليك فلوس كتيييير

 

بس نصيحة من واحد قديم

بلاش تطول فترة حياتك بدون اسرتك حتى لو مش هاتوفر

وجودك كاب بجوار اطفالك تساوي كتير اوي

 

نصيحة تانية وانت على اعتاب الغربة

بلاش تخليها تسرقك وتلاقي السنين مرت وانت عايش بعيد . خلى عندك هدف معين لما توصله خد بعضك وامشي وخصوصا ان راتبك مش عالي قوي

[Ahmed ghreeb]

اولا شكرا جزيلا علي اهتمامك

ثانيا بالنسبة لنقطة المرتبات انا لسه كنت مع صديق ليا لسه نازل اجازه فوضحلي ان مرتبات الصيانة اصلا متدنية بالنسبة للي لسه مسافر لكن ممكن وانا هناك اشوفرحاجة احسن خصوصا ان اهم حاجة وهي الاقامة متوافرة

بالنسبة للسيارة انا كنت بحسبها ان المتبقي من مبلغ بدل السكن هو اللي هدفعة فيها بحيث اني المرتب بتاعي يكون خالص للي هبعته للبيت واللي هحوشه ان شاء الله

انا بناتي عندهم حاليا سنتين واربع شهور يعني اخري سنتين كمان لوحدي اكون ظبط اموري وشفت حاجة احسن واجيبهم

وبالنسبة للمجهود انا خاليا مسئول عن ٣ مصانع فعليا ههههههه فتعودت علي الشقي

انا مشفتش اسعار العربيات الجديدة ايه بصراحة فتنصحني اقل حاجة ايه كويسه

[AbuZeyad]

طيب السؤال اللي بيطرح نفسة اذا كانت رواتب الصيانة متدنية بتشتغل فيها ليه؟ 

ليه ماتشوفش حاجة احسن في مجال الكهرباء برضة؟

 

وبعدين حكاية انك تشوف شغل لما تيجي، انت فعلا ممكن تلاقي فرص كويسة بس كلها معتمدة ان الشركة توفق تديلك نقل كفالة ودا طبعا حسب سياسة الشركة فمتحطش عليها امل كبير

الاقامة متوفرة فعلا بس لصالح الشركة اللى انت جاي عليها ومش سهل انك تنقلها على مكان تاني

او انك تروح مصر وترجع تاني بتاشيرة جديدة بس اتاكد ان بنود عقدك مفيش فيها بند عدم منافسة

 

بالنسبة للسيارات انت محتاج تاخد لفة على وكالات السيارات لما توصل بالسلامة لان العروض والاسعار بتختلف من وقت لاخر على مدار السنة

بس انصحك اولا بالتويوتا ثم الهونداي لانها اكتر سيارات ممكن تبيعها ومتخسرش فيها كتير

[Ahmed ghreeb]

للأسف كنت مغفل "بصوت عبدالمعم مدبولي في الحفيد" لما قولت اني راجل بتاع كهربا يبقي اشتغل في الصيانة واتبطرت علي المقاولات والتسويق

وللأسف علشان ادخل مجال  عمل جديد هتعامل زي الخريج الجديد او بدون خبره

 

انا لما بقصد مرتبات الصيانة متدنية كنت بقصد في اول السفر بس لكن بعد كدة بتتغيير بناء علي الشغل الفعلي والكفاءة 

لإن علشان تلاقي فرد كفء بيبقي صعب جدا

وكتير انا نفسي بلاقي المشكلة دي لما بكون بختبر مهندسين او فنيين للعمل

 

بالنسبة للسيارة الجديدة شكلها هتبقي غالية علي امكانياتي

يعني لو حسبنا بدل المواصلات ب 900 ريال يعني 10800 في السنة ودة ميجيبشي حاجة خالص ولا ايه رأيك 

يبقي اكيد شكلي هجيب خاجة مستعملة لإما للبيع أو للتنازل 

[AbuZeyad]

شوف يا عزيزي

انت ممكن تشتري سيارة بالمبلغ دا وباقل منه كمان لكن هاترجع وتقول "كنت مغفل"

لانك ممكن تصرف اكتر من المبلغ دا على صيانة السيارة لانها بنسبة كبيرة هاتكون متهالكة ومستهلكة جدا

 

زي ما قلت لك لو ناوي على المستعمل يبقى اصبر لما تجمع مبلغ من 20 - 25 الف علشان تشتري حاجة معقولة بس طبعا لازم تكشف عليها الاول او ممكن تشتري مستعمل تقسيط من سوق السيارات

 

بس خلى بالك المظهر شئ مهم جدا

لما تركب سيارة قديمة ومتهالكة هاتدي انطباع سئ عنك لكن لما تركب سيارة نظيفة بتدى انطباع افضل

 

دا بياثر بعد كدا على فرص العمل الافضل وحتى زيادة راتبك في الشركة اللى انت فيها

[Ahmed ghreeb]

كلامك والله صح

انا كنت بفكر في حاجة ٢٠٠٥ بحد ادني يعني مش قديم اوي يعني خصوصا لو صبرت لغاية ما اشوف حد بيبيع علشان مسافر يعني

ومان موضوع تقسيط المستعمل دة معرفهوش

وهو سوق السيارات دة موقع ولا معارض ؟؟؟؟؟

علشان مافيش منه عندنا

اه انا مقلتش لحضرتك ان نتيجة الكشف الطبي طلعت النهاردة وبكرة الصبح هسلم الورق و الباسبور للمكتب

ايه اللي تنصحني بيه وانا بخلصه من عنده

[AbuZeyad]

2005 يعتبر موديل قديم بالنسبة للمقاييس في السعودية

المش قديم يعني موديل اقل من 5 سنين

سوق السيارات عبارة عن منطقة كبيرة فيها معارض سيارات كتير معظمها بيتعامل في المستعمل وممكن تشتري منهم بالتقسيط عن طريق شركة تقسيط

زى ما تكون بتشتريها من البنك يعني الشركة تشتري السيارة وتقسط لك سعرها مقابل نسبة طبعا

[Ahmed ghreeb]

موديل 2005 قديم ........... احم احم 

امال الرينو  بتاعتي موديل 86 تبقي ايه ......... من مخلفات الحرب 

والله انا مش عارف اقولك ايه ولا اشكرك ازاي علي اهتمامك

[Eyad]

أ/ ابو زياد لقد ارسلت لك رساله على الخاص برجاء الرد