الآسطى سيد الكهربائي وإستاد القاهرة

[se_ Elsyed]

أولاً أحب أعرفكم بالآسطى سيد .. وده كهربائي شاطر ساكن في حتتنا .. لم ينل قسطاً وافراً من التعليم ويمكن خرج من إعدادي أو ثانوي .. لكنه إمتهن مهنة الكهرباء في سن مبكر وأصبح بارعاً فيها .. وبالتالي لما بيكون عندنا شغل أو شقة بنجهزها بنجيبه علشان يضع اساسات تمديدات الكهرباء .. وهو بنظرة سريعة وفاحصة بيستطيع يحدد سماكة وأطوال الأسلاك اللازمة للتمديد الأساسي .. وبيحدد أيضاً الجهد اللي تستحمله الأسلاك في المستقبل لما يتم تشغيل تكييفات وسخانات وخلافه وبالتالي قلما يحدث ما لا يحمد عقباه بعد ذلك .. لإنه صنايعي ورجل ماهر في عمله .

تذكرت الآسطى سيد مباشرة عندما قرأت خبر بيقول " إن مباراة منتخبنا القومي أمام منتخب الأرجنتين ( الأجرنتين كان هاياخدوا مليون و 100 ألف دولار لمجرد اللعب 90 دقيقة معانا ) والتي كان مقرراً لها في 18/11/2005 للإفتتاح الرسمي لإستاد القاهرة بعد ترميمه وتجديدة قد تم إلغاءها ........ ليه يا عم ؟ مانتوا بقى لكم سنيتن بالظبط شغالين في الإستاد وحلفتوا 100 يمين إنه هايخلص في نوفمبر ...... قالك معليش أصلنا أكتشفنا إن أسلاك تمديدات الكهرباء ساحت وما أستحملتش لما جم يشغلوا الكشافات اللي بتضيء الإستا د "

يا نهار مش فايت !!!!!!!

ليه هما حلاقين اللي جم عملوا التمديدات دي ولا شركة مقاولات كبيرة ؟

وبعدين ده أنتوا صارفين لحد دلوقت طبقاً للمستندات الرسمية مبلغ وقدره 200 مليون جنيه ( مائتين مليون لحلوح ) .... تقوموا بعد ده كله تقولوا الإسلاك ساحت ؟!!!!!

والمخزي في الأمر بقى إن رئيس إتحاد الكرة صرح برضوا ضمن كلامه وقال إن الإنتهاء النهائي من التجديدات هايتم في شهر يناير القادم ... يعني قبل بدء فعاليات كأس الأمم الأفريقية ببضعة أيام !!!!

يا فضيحتنا وسط الخلق ......

وده كله بعد ما وزارة الشباب بجلالة قدرها فشلت في إنجاز أي شيء خلال عام ونصف في موضوع التجديد وأستنجدت بوزارة الدفاع اللي بعثت لها بسرعة سلاح المهندسين والإنشاءات عشان يلحقوا يخلصوا قبل الفضيحة ما تكبر وننكشف على حقيقتنا أمام العالم .....

يا ناس يا هوووووو ... مين يحاسب الناس دي ..... يا ناس يا هووووو ياللي بتقولوا مصر مديونة والبلد بتغرق ... تعالوا شوفوا ......

على فكرة : وزير الشباب اللي زقوه جوا الوزارة وقاعد زي خيبتها ومش فاهم حاجة في أي حاجة هناك قال من 4 شهور إنه راح زار الإستاد فلقى الفئران أكلت أسلاك الكهرباء ... وكان أتصرف بالفعل مبلغ 80 مليون جنية لحد ذلك الوقت على التجديدات ....

حسبنا الله ونعم الوكيل

حسبنا الله ونعم الوكيل ...

حسبنا الله ونعم الوكيل

[Alshiekh]

سى السيد

برضه الاسطى سيد الكهربائى ماينفعش يعمل الشغل اللى حضرتك بتقول عليه

معظم شركات المقاولات بمصر لاتصلح لاداء اعمالها

وياريت تراجع الموضوع ده وقد اثاره من قبل الاستاذ الفاضل الافوكاتو

تنظيم العمل الحرفى أضغط هنا

لالاسف كل شيئ مشاشى بالبركة القاتلة فى مصرنا المحروسة

المقاول يجب ان يدفع المعلوم كى ترسى عليه المناقصة وبعد كده يسندها لمجموعة عمال بيشتغلوا مقاولين من منازلهم لاعلم ولاخبرة ولا اى حاجة ، او تسند بالامر المباشر وتأخذ نفس خط سير مقاول الباطن وكله رشوة ومحسوبية وماتعرفش مين بيشتغل ايه ومين بيعمل ايه. كل شيئ سايح على بعضه زى الاسلاك بتاعة الاستاد اللى ساحت.

وسلم لى على الشفافية

تم تعديل 22 أكتوبر 2005 بواسطة Mohammad