أجهزة تكييف الهواء

[gamalt3]

هذه مشاركة من العضو الجديد جمالات و هى باللغة الإنجليزية و هذا يتنافى مع قواعد المشاركة فى محاورات المصرين.

الفاضلة تطلب المشورة فى إختيار جهاز تكييف هواء و عن المفاضلة بين الأجهزة الشباك و الأجهزة ال "سبليت"

ملاحظة:

بالنسبة للمشاركات بغير اللغة العربية فإنه عادة يتم حذفها مع تنبيه الكاتب

i want to buy an air conditon. can any one recommand a brand for me? also, is there difference between the window air conditon and the one hang on the wall because i notice alhough both have the same power but the window one is cheaper?

than the one which hang one the wall? i  am looking for air conditon which cools  faster , economic in electriciy and have good customer service?

thanks in advance

تم تعديل 24 أكتوبر 2005 بواسطة Advisor

[se_ Elsyed]

الأخت الفاضلة جمالات ( كده الإسم صح ؟ )

عن تجربة شخصية .. فمن أفضل الأنواع الموجودة في السوق المصري هو ( كاريير ) و ( شارب )

حيث إن الواحد لما بييجي يتكلم عن التكييف يبقى لازم يختار حاجة تستحمل وتعيش ولها خدمات وقطع غيار متوفرة وطبعاً يكون لها وكيل مُحترم ....

بس شارب عشان مدة ضمانه 5 سنوات فبتلاقية أغلى كثير من كاريير اللي ضمانه سنة زي كل الميكفات الآخرى الموجودة في السوق ..

وطبعاً هناك فرق كبير جداً بين تكييف الشباك والأخر السقفي أو الحائطي والمُسمى بالسبليت ..

فالشباك مزعج للغاية وصوته لا يُحتمل حتى لو كان جديد .. أما لو قدم شوية فبتحسي إن في كراكه شغالة في الشقة ..

أما السبليت فهاديء وليس مزعج على الأطلاق لإن وحدة التشغيل ( الكمبروسور ) بتبقى موجوده في خارج الشقة وبالتالي فالموجود في الداخل هو وحدة توزيع الهواء فقط ... ومن وجهة نظري إن إستهلاك السبليت اقل في الكهرباء .

وأهم شيء لازم ناخد بالنا منه عند إختيار التكييف هو أن تكون قوتة متناسبة مع المساحة التي سيغطيها ... وإلا لو جبنا مثلاً تكييف قوته 2 حصان وعندي مساحة 40 متر مُربع مثلاً يبقى كده التكييف هايهلك بُسرعة لإنه بيشتغل فوق طاقته وبالتأكيد مش هايفصل عند رجة تبريد مُعينه لإنه مش قادر يوصل المساحة دي للدرجة المطلوبة ... وهكذا

[Proud Muslim]

اسمحوا لي أدلوا بدلوي المتواضع في الموضوع .. حث انني عملت لسنة تقريبا في احدى شركات التكييف الكبرى..

جهاز كاريير جهاز محترم جدا .. سعره جيد مقارنة بجهاز شارب .. شركة كاريير تنتج أيضا أجهزة تكييف وايت وستنجهاوس و أجهزة توشيبا .. طجهاز وايت وستنج هو نفسه جهاز كاريير مع اختلاف العلامة التجارية .. الغرض منه الاستحواذ على نصيب اكبر من السوق المصري .

جهاز ترين trane قد يكون أفضل جهاز في السوق المصري ان لم يكن افضلهم .. مشكلته ان سعره أغلى من كاريير ( مش كثير ) و اعلاناته اقل و بالتالي التعريف به في السوق المصري ضعيف لاعتمادهم على التصدير أولا.

جهاز يونيون اير بصراحة جهاز سيء .. الاهتمام الجودة في مصانع يونيون اير يكاد يكون معدوما .. شهادات الايزو و غيره شهادات تؤخذ بالفلوس .. الاهتمام بالصيانة نقطة هامة يغفلها يونيون اير .

أفضل جهاز على مستوى العالم .. جهار ال جي LG و لكن حسب علمي ليس له توكيل أو موزع معتمد في مصر .. يستورد عن طريق تجار ...

جهاز شارب .. ليس له تواجد قوي في السوق المصري مع انه جهاز جيد جدا .. شبكة الصاينة اظن انها ضعيفة لأنه ما زال حديثا في السوق المصري .. و اللي نعرفه احسن من اللي ما نعرفوش ..

الحسبة البلدي لأجهزة التكييف أن كل 8 متر مربع ( لارتفاع سقف عادي 270 سم ) تحتاج الى 1 حصان .. بشرط عدم وجود احمال كالتعرض لأشعة شمس مباشرة أو الوجود في الدور الأخير .

اتمنى اكون افدت

[سقراط المصري]

الاخ العزيز Proud Muslim

بصراحه انت وبقيت الزملاء تشكروا جداً على الافاده العظيمه دي.

طلب صغير ، ممكن ترتبوا الانواع 1-2-3 على حسب الجوده وسهولة الصيانه .... اصل انا بصراحه تهت منكم.

كل جهاز له ميزه وعيوب.

طبعا انا بتكلم على ترتيب الجوده وليس السعر.

شكرا لك ول " سي السيد بيه".

سقراط

تم تعديل 27 أكتوبر 2005 بواسطة سقراط المصري

[Proud Muslim]

1- جهاز ترين و ينصح بأجهزة سبليت سقفي أو أرضي .

2- جهاز كاريير .. و ينصح بأجهزة الحائطي 4 حصان و الهارموني .. أجهزة الشباك الجديدة صوتها منخفض جدا.

3- جهاز شارب

[se_ Elsyed]

شكراً يا باشمهندس براود

عايز أضيف نقطة .. وهي إني وجدت بعض موزعي كاريير بيوزعوا شارب برضوا .. بس سعره عالي قوي زي ما قولنا .

[سقراط المصري]

الاخ العزيز Proud Muslim

متشكر قوي يا براود على الافاده وسرعة الرد.

شكرا ايضا يابوالسيد.

تحياتي

سقراط

[Tornado]

وماذا عن أمريكول AmeriCool

حد سمع عنه؟

[se_ Elsyed]

بس أحب أنصح الناس اللي هاتشتري كاريير إنها ما تتعاملش مع أكبر توكيل لتوزيع أجهزة كاريير في مصر وهو شركة " شمس " اللي في مكرم عبيد ... بصراحة الصيت ولا الغنى ... الخدمة عندهم زبالة ... وكذابين .. ويعطوك ميعاد وييجوا بعده بأسبوع ... وده ما حصلش مره واحده أو مرتين .. ولكن العديد والعديد من المرات .. لدرجة إني بقيت مشهور عندهم هناك من كثر ما بأروح وأتخانق معاهم على عدم إحترامهم .

يعني شركة كبيرة وقديمة وواخده توكيل توزيع ماركة مُحترمة ومع ذلك مش قادرين يجيبوا ستف فنيين على مستوى أو حتى يكفي الطلبات اللي عندهم ... بصراحة عذبوني عذاب نفسي كما وإني كنت في معتقل ...

والظاهر إن ده شعار شركات كثيرة في مصر وهو " بيع وإجري "

أما خدمة ما بعد البيع اللي بيتشدقوا بها .. فكل سنة وإنت طيب .

[Proud Muslim]

ما يقال عن أمريكول .. يقال عن وايت وستنجهاوس ..

امريكول تنتجه شركة يونيون اير كجهاز أرخص من أجهزتها و تستطيع المناورة به في السوق من أجل الحصول على حصة أكبر .. ممكن تنزل سعره لأقل حد ممكن و هو أرخص جهاز موجود في السوق و أسوأها ..

جهاز Power جهاز عادي و أقل من العادي .. ليس له أصل أمريكاني و لا يحزنون .. الراجل صاحب الشركة فتح مكتب في امريكا علشان يبقى الجهاز امريكاني .. و العلملية خدعة !

[lotfy mohammed]

السلام عليكم ورحمة اللة وبركاتة انا اخوكم لطفى فنى تبريد وتكييف وصاحب شركة تكييف (موزع معتمد لتكييف شارب العربى) اولا احب ارحب باصدقائى الجدد اولا احب اضيف معلومة صغيرة اولا قرات الحديث اللى بينكما ورايت ان من واجبى ان اقول هذة المعلومة لا احكم على جهاز تكييف من اسمة ولكن احكم على شغلة ومكوناتة واداة يعنى مثلا الاخ سى السيد يقول ان كاريير احسن من شارب اولا انت حكمت علية ازاى اقول لك انت حكمت علية علشان اسم كاريير بقالو سنين فى السوق وانا اؤايدك هذا الراى لغاية ثلاث سنوات سابقة بدا يجيب موكوناتة من الصين ولما طلع شارب اثبت كفائتة لماذا لان جهاز يابانى فعلا ومكوناتة يابانى من اليابان علشان كدة شارب فى السوق الاول لان جهاز جيد جدا ولان مبيعاتة اكثر من كاريير وجميع موزعى شارب العربى بيقوموا باداء خدمة ما بعد البيع لان جهاز يستحق هذا ولان اعطالة لغاية الان مش اعطال لية شارب نزلت على الجهاز ضمان حمس سنوات على الجهاز بالكامل يعنى ممكن الجهاز يتغير بالكامل ويركب جهاز جديد بالكرتونة بدون اى مصاريف يعنى (مجانا) وكمان الصيانة المجانية الدورية خلال خمس سنوات هل كاريير يقدر يقدم كل المميزات دى للعميل بلاش دى يقدر كاريير يغيير الجهاز للعميل وياتى باخر جديد بالكرتونة بدون اى مصاريف لا يمكن وشكرا على حسن استماعكم

[mohammedaheg]

السلام عليكم ورحمة الله وبركاته

تحيه طيبه أخواني الأفاضل

أريد أن أسأل حضرتكم سؤال بخصوص شركة تكييفات , وأخص بالسؤال الأخ لطفي فنى تبريد وتكييف وصاحب شركة تكييف

فأنا أريد أن أنشأ شركة للتكييفات وأريد أن أكون وكيل أو موزع معتمد لإحدى شركات التكييفات في مصر

وأريد أن يدلني أحداً على كيفية الحصول على عقد الوكاله أو التوزيع

وجزاكم الله خيراً

mohammedaheg@hotmail.com

تم تعديل 22 فبراير 2008 بواسطة mohammedaheg

[abdulmuttaleb]

السادة الأفاضل

الشركة التي أعمل بها ترغب في تكييف المقر الجديد بالإسكندرية والذي سننتقل إليه بعد العيد بمشيئة الله

المساحة 109متر مربع بارتفاع سقف 3.5م، وتوجد غرفة لن يتم تكييفها مساحتها نحو 25م

جاءني مهندس من شركة شمس موزعي كارير وقال لي إن طالما لديك مساحة كبيرة مثل هذه فتحتاج لمكيف 5حصان وطالما أكثر من 4حصان فلا تلجأ لغير كارير، هل هذا صحيح، وما هي نصيحتكم لي؟ حيث رشح لي 5حصان للاستقبال والانتظار، وآخر 3 حصان للغرف الإدارية (عددها 3 ومساحة كل غرفة لا تتعدى 14مترا مربعا).

مع مودتي

تم تعديل 12 أغسطس 2008 بواسطة abdulmuttaleb

[Egy Guy]

الأخت الفاضلة جمالات ( كده الإسم صح ؟ )

عن تجربة شخصية .. فمن أفضل الأنواع الموجودة في السوق المصري هو ( كاريير ) و ( شارب )

حيث إن الواحد لما بييجي يتكلم عن التكييف يبقى لازم يختار حاجة تستحمل وتعيش ولها خدمات وقطع غيار متوفرة وطبعاً يكون لها وكيل مُحترم ....

بس شارب عشان مدة ضمانه 5 سنوات فبتلاقية أغلى كثير من كاريير اللي ضمانه سنة زي كل الميكفات الآخرى الموجودة في السوق ..

وطبعاً هناك فرق كبير جداً بين تكييف الشباك والأخر السقفي أو الحائطي والمُسمى بالسبليت ..

فالشباك مزعج للغاية وصوته لا يُحتمل حتى لو كان جديد .. أما لو قدم شوية فبتحسي إن في كراكه شغالة في الشقة ..

أما السبليت فهاديء وليس مزعج على الأطلاق لإن وحدة التشغيل ( الكمبروسور ) بتبقى موجوده في خارج الشقة وبالتالي فالموجود في الداخل هو وحدة توزيع الهواء فقط ... ومن وجهة نظري إن إستهلاك السبليت اقل في الكهرباء .

وأهم شيء لازم ناخد بالنا منه عند إختيار التكييف هو أن تكون قوتة متناسبة مع المساحة التي سيغطيها ... وإلا لو جبنا مثلاً تكييف قوته 2 حصان وعندي مساحة 40 متر مُربع مثلاً يبقى كده التكييف هايهلك بُسرعة لإنه بيشتغل فوق طاقته وبالتأكيد مش هايفصل عند رجة تبريد مُعينه لإنه مش قادر يوصل المساحة دي للدرجة المطلوبة ... وهكذا

ا

ستاذنا الفاضل سي السيد ؟؟؟ يارب تكون بخير وسلامة ؟؟؟ بس كنت عايز اسالك لو الوحد خد مكيف معاه هنا من السعودية ونزله معاه مصر ؟؟ هل يلاقي ليه صيانة وقطع غيار ؟؟ وبخبرتك هل العملية مستاهلة أم من مصر أفضل

[se_ Elsyed]

أنا من امبارح والعفاريت السودا بتتنطط قدام عيني ...

التكييف الأسبليت بتاع غرفة النوم فاظ قصدي باظ

هو تكييف جيد وبقى له سنتين تقريباً وماخدتش بالي إن الكبمبروسور عليه ضمان 5 سنوات وبأحسبه سنة بس ...

جبت الفني أمبارح من بره يعني .. قال لي شد حيلك الكمبروسر إتوفى ولازم يتغير

بصراحة ... شركة يونيون إير من الشركات الزبالة اللي مش محترمه حتى في مصر وصناعتها سيئة للغاية ... الواد فك الوحده الخارجية إلا والاقي كمبروسر قد بتاع التلاجة الأتناشر قدم لدرجة الواد فضل يضحك ... وبصراحة خسارة عليه كل حجم الوحده الخارجية وكان كفاية يحطوه في صفيحة ..

مع إن والله ما بأشغله الا عالنوم بس غير باقي مكيفات الشقة اللي بتحرت ليل نهار ..

عكس مثلاً مصر او المكيفات اللي عندي في الشغل .. ماركة كارير او هيتاشي وعماله تحرت ليل نهار .. وده يعتبر بيشتغل 3 شهور في السنة والباقي بنبقى أجازة .. وفي الشتا ما بنشغلش الدافي طبعاً ..

وييجي الكمبروسر بعد سنتين يفيص

يشاء السميع العليم اللي جه ركبه من شركة يونيون زفت .. كان مهندس مصري واحتفظت برقمه معايا من ساعتها وقلت اتصل عليه .. لقيته لسه مسجل رقمي كمان وعرفني .. ولو كنت أتصلت بالشركة مباشرة كنت اخدت ميعاد بعد شهر مثلاً .. لكنه هاييجي بكره إن شاء الله ويغير المحروق ده

ولو إني إتشائمت من الماركة دي وتوبة من دي النوبة ...

والحمد لله إن عندي في مصر كاريير ..

زهيري ... المكيف الصحراوي عندكو بيعمل كام ؟

[sindirilla]

جزاكم الله كل خير..فعلا افدتمونى بمعلومات قيمة جدا

تم تعديل 2 يوليو 2009 بواسطة sindirilla

[se_ Elsyed]

ستاذنا الفاضل سي السيد ؟؟؟ يارب تكون بخير وسلامة ؟؟؟ بس كنت عايز اسالك لو الوحد خد مكيف معاه هنا من السعودية ونزله معاه مصر ؟؟ هل يلاقي ليه صيانة وقطع غيار ؟؟ وبخبرتك هل العملية مستاهلة أم من مصر أفضل

قريت السؤال بعد سنة عشان كنت في أجازة

لأ طبعاً دي غلطة كبيرة أنك تاخد تكييف من السعودية لمصر ... إلا لو مستعمل وبتحبه وعزيز عليك

إنما لو جديد يبقى الضمان هايروح .. بالإضافة غلى أن ما تضمنش طريقة نقله وبالتالي ممكن ياخد له خبطة يبقى ضاع ... بالأضافة إلى الخطورة الاكبر وهي أن ممكن يطلع في عيب صناعة .. يبقى كده إنت سافرت ولا هاتعرف تبدله ولا تتصرف فيه .... ركبت مره تكييف كاريير ولأن قليل البخت بيلاقي العضم في الجبنه ... فطلع الكبروسور مش شغال .. جم بعد 3 أيام بكل هدوء جابوا واحد جديد وأخدوا البايظ .... أخدوا البايظ بعد شهر ونص وكنت ناوي أقفل الشقة وأسيبه سنة كده من كتر ما غلبوني عشان ييجوا شيلوا الجثه ..

[alsaher]

انا طحت في الموضوع ده في الوقت المناسب

أصل ناقل من شقة لشقه وعمال بأركب تكييفات << هما 2 بس

ودخت مع الوكلا ، كل واحد بيصورلي إنه الأفضل على الإطلاق

لغاية ما ربنا ستر وكنت حأدبس بيونيون إير ، وفي آخر لحظة قلت أرجع بكره بعد ما أفكر

ومن ساعتها والمهندس هاريني إتصالات ، وقلت له إنسى انا بطلت

الخلاصه أنا من الأول وأنا مقتنع بان إل جي الأفضل ولكن هل فعلا صيانته صعبة وما فيش وكيل معتمد في مصر ؟؟

وبالنسبة للمساحه لو حوالي 27 متر مربع ، في مكاتب قالوا 3 حصان كويس زي وكيل شارب ، يونيون إير قالولي لازم 4 !!

الفرق بين 3 حصان و 4 كبييير في السعر ، حوالي 2000 جنيه

ولكم تحياتي

[الترجمـان]

مش عارف ليه أول ما دخلت التوبك داه حسيت بطراوه غير عادية ؟؟؟ :)

الأخوه خبراء التكيفات لو سمحتم عندي إستفسار عن التكيفات التي تعمل بالغاز بدل الكهرباء...

هل هي متوافره في الأسواق المحلية او الخارجية .؟؟

أم مازالت محل الإختبار والتصنيع ..؟؟

شكرا :)

[زعلان]

شارب نزلت على الجهاز ضمان حمس سنوات على الجهاز بالكامل يعنى ممكن الجهاز يتغير بالكامل ويركب جهاز جديد بالكرتونة بدون اى مصاريف يعنى (مجانا) وكمان الصيانة المجانية الدورية خلال خمس سنوات

:) معلش يعني يعني اي مجانا امال الفلوس الي دفعت في الجهاز الأول ده ايه ولا حيرجعوها مفيش حاجة اسمها مجانا اللفلوس ادفعت في الجهاز البايض والي طبيعي يتغير :)