أنا خايفة ومرعووبة .. ومحبطة !!

[مصرية الهوى]

هئ هئ هئ هئ :D ...

بصراحة أنا مش عارفه أعمل ايه ...... !!

مطلوووووب مني حاجات كتيرة اوي .. ومش قادرة اعملها ...

عندي ريبورت مبدئي لمشروع التخرج .. ومحتاج شغل جامد اوي اوي ..

وعندي شيتات visual basicياما لسا محليتهاش .. مبطيقش البرمجة .. بحس بكل غباء الدنيا في دماغي لما افكر في برنامج ..

وعندي بحث operating system ...

وعندي التقييم النهائي للتربية العملي .. وعندي .. وعندي .. وكلها آخر موعد ليها 19 / 11 !!

ويوم 21/ 11 هتبدأ امتحانات أعمال السنة .. يالهوووووووووووووووووي ..

بصراحة أنا خايفة ومرعوبة ومش عارفه أعمل ايه :D !!

كل ما اخش المكتب والاقي الكتب والملازم مستنياني ... بتخنق واجري .. ولو حاولت أمسك حاجه عشان أشوف ايه الحكاية .. مقدرش أركز ...

وأول ما يجي في دماغي إني في سنة رابعة .. بأكتئب وبأخاف .. خايفة والله .. خايفة بعد ما تعبت في التلات سنين اللي فاتوا ... أبوظ كل حاجه في آخر سنة !!!

والمشكلة اللي معذباني النوم ... تلاتة ارباع الوقت نايمة ... لو مبروحش المدرسة .. بنام يجي 14 ساعة ... بهرب من خوفي وقلقي بالنوم .. ولو منمتش بأفضل قاعدة على السرير طول الوقت ...

وحتى صلاة القيام والتراويح بكسل أروح لها .. ولو روحت بأفضل سرحانة طول الصلاة .. ومعرفش الإمام بيقرأ ايه ..

حاولت إني أبعد عن الكمبيوتر والنت لحد ما أخلص شغلي .. مقدرتش .. لازم أفتح الكمبيوتر .. وأدخل النت أتصفح أي حاجه .. حتى لو كانت حاجه هايفة .. مش مهم ..

أهم حاجه الوقت يمشي ..

دلوقتي لا أنا عملت اللي عليا .. ولا استعديت للامتحانات .. ولا عملت حاجه مفيدة .. وبمر في حالة من الإكتئاب والهم والقلق والإحباط .. وبحس إن دماغي اتشلت مش قادرة لا أركز في حاجه ولا أفهم حاجه .. حتى لو حد قدامي يكلمني بحس إن أنا مش فاهمة هو بيقول ايه .. والله بقعد فترة اترجم هو بيقول ايه ... بصراحة أنا قرفانة من نفسي وزهقانة ومحبطة ;) ..

الله يخليكو ادعووووووولي ... وانصحوني اعمل ايه !!!

( رب اشرح لي صدري ويسر لي أمري )

[bentmasria]

حبيبتى جيجى ربنا يعينك انتى دلوقتى زى مابيقولوا فى حالة انعدام وزن وينقصك بعض العزيمة والكثير من النظام الوقت لسه مافاتش وممكن تلحقى تنجزى حاجات كتيرة جدا

اولا امسكى ورقة وقلم واتوكلى على الله وابدأى

1- المشاريع المطلوبة او الابحاث

* مثلا الفيجوال بيزك

* الoperating sytem

الى آخره واتركى مكان لتتركى علامة او اشارة الى ماتم انجازه

ثم الصقى هذه الورقة فى مكان تراه عيناكى بجوار الكمبيوتر وقومى توضأى وصلى فرضك وانوى البدء بنية النجاح والتوفيق من الله تعالى ولا تستجيبى لتكاسلك فما هو الا اضاعة للوقت

حددى ساعتين للعمل فى كل مشروع وسجلى انجازك فيه ثم قومى للصلاة والطعام مرة واحدة كل 6 ساعات او حسب احتمالك ولا تجعليهم سببا لاضاعة وقتك بل يمكنك تناول ساندويتشات على المكتب اثناء الاطلاع والعمل

جربى هذا البرنامج وكافئى نفسك بشىء تحبينه بعد الانتهاء من كل مرحلة

انا كنت بحط اكبر شيكولاته من النوع اللى احبه وما المسها الا لما انتهى

ربنا يعينك ونسمع عنك كل الاخبار الحلوة

ام حماده

[se_ Elsyed]

الحل في منتهى البساطة يكمُن في كلمة واحدة وهي " التنظيم "

- نظمي وقتك وأعملي جدول زي بنت مصرية ما قالتلك .. وأهم حاجة تبدأي .. لأنك لو نظرتي لكل الحاجات اللي وراكي على إنها كتلة واحدة ففعلاً هاتيأسي .. أما لو خلصتيها حاجة ورا حاجة فهاتلاقي الحمولة بقت خفيفة ..

- وخلي بالك الشيطان بيعمل أحلى شغل للطلبة في السنوات الأخيرة من دراستهم .. فأفتكر وأنا في ثانوي كنت مذاكر كويس وواثق من نفسي . ولكن جيت قبل الإمتحان وحسيت إني فدت الذاكرة ومش فاكر حاجة أبداً .. ولكن بالتوكل على الله والثقة بالنفس ربنا بيوفق ولا يُضيع أجر من أحسنت عملاً .

[Folana]

السلام عليكم ورحمة الله ...

مصرية الهوى...

بصى ياحبيبتى ...لا بصى هنا ايوه كده:D..انت بتمرى بمرحلة كلنا بنمر بها لما بتتراكم علينا المسئوليات وبنبقى مش عارفين نعمل ايه ولا ايه ....لكن فيه طريقين اما انك تهربى وتكتئبى وتنامى زى ماانت بتتصرفى دلوقت وده مش حيحل شىء بل بالعكس حيزود من حالتك النفسية وقلقك ومش حيحقق لك الانجاز المطلوب واللى لازم تنجزيه فى فترة زمنية محددة ...يا اما تبداى فورا هنا والان ..وتحاولى انك تجتازى الشعور بالقلق ده حتى يتسنى لك تحقيق هدفك ..وانا مش حاضيف كتير على كلام بنت مصرية وس .س ...

,ومادام وصلنا الى اتفاق ضمنى انه يوجد هدف لابد من تحقيقه يبقى كده احنا حلينا نص المشكلة ان لم يكن ثلاث اربعها ..لان وجود هدف فى حد ذاته ممكن يعتبر مشكلة لدى البعض ..المهم ...

خلينا نتناول خوفك ورعبك ..وبلاش نستخدم كلمة محبطة دلوقت ..ليه؟...لانك ماحاولتيش تنجزى عملك وفشلتى والعياذ بالله ..لا ..ده انت لسه مااقدمتيش على اى خطوة فى طريق انجاز الهدف ..يبقى شيلى كلمة محبطة دى من قاموسك دلوقت .....

استخدمى خوفك وقلقك ده - وهم علامة صحية لتحمل المسئولية - استخدميهم كحافز مثير لانجاز عملك ....

,وزى ماتفضل سى السيد واشار انت محتاجة تنظيم ومحتاجة انك تبدأى اول خطوة ..خففى عن نفسك الشعور المخيف ده علشان ده زى الغول حيفضل يحاوطك من جميع الجهات الى ان تسقطى فى براثنه وماتنجزيش شىء ..يبقى اول خطوة ماتكونيش عدوة نفسك

فكرى فى المزايا بدل ماتفكرى فى العيوب ...يعنى ايه ؟..بدل ماتفضلى تندبى حظك ..فكرى فى انك خلاص قربتى تخلصى دراسة وفكرى فى مدى شعورك بالسعادة وانت بتنجزى مسئولياتك دى ..

وقفى افكار القلق اللى بتنتابك ونورى النور الاحمر وقولى ستوب للافكار السيئة وامتازى بروح التفائل واللى طبعا انت بتمتازى بها طبيعى ...حاولى ماتشتيتيش افكارك فى كذا حاجة لان غالبا يكون من الصعب الابقاء على فكرتين او موضوعين بنفس القوة فى وقت واحد ....

جدولى اعمالك زى ماكتبت لك الاخت الفاضلة بنت مصرية .....ابدأى بالسهل علشان ماتحبطيش ولما تلاقى نفسك بتنجزى ..نفسك حتتفتح لاكمال الباقى ..قسمى عملك وممكن الشيتات توزعيها على كذا يوم ..قولى حاخلص النهاردة كذا شيت بجانب جزء من البحث بجانب جزء من الريبورت مثلا يعنى ...

ابدأى بتمارين الاسترخاء وانا قريت هنا لاختنا الجميلة والموفقة دايما فى اختيار مواضيعها بنت مصرية..قريت موضوع عن الاسترخاء ...وعلى فكرة الاسترخاء ده مش حاجة رفاهية كده ..ده علاج ..وضرورى جدا لمواجهة الضغوط النفسية وماينشأ من قلق او مخاوف او تشتت او تزاحم الافكار وماينتج عن ذلك من امراض سيكوسوماتيه.... انا عن نفسى بامارس تمارينه كل مااشعر بقلق او توتر او ضغط نفسى ...

اقتطعى عشر دقايق للاسترخاء قبل البدء فى عمل واجباتك ....صلى ركعتين لله استكمالا للراحة النفسية اللى بداتيها بالاسترخاء ..ثم اشرعى فى متابعة جدول اعملك ....

مش عايزة اطول عليك ..لكن يااختى الغالية مصرية الهوى ..اعلمى اننا كلنا هنا وانا فى المقدمة بنهتم بك جدا ..وبنتابع مواضيعك وبنحب نطمئن عليك ..وعلشان كده ..لى رجاء خاص عندك ..انك كل ماتنجزى شىء فى عملك تبقى تكتبى لنا عليه وتقولى لنا خلصتى ايه وفاضل ايه لسه وراك ...احنا حنكون سعداء جدا لما تفرحينا بانك بداتى تنجزى عملك ..اكتر من سعادتنا من متابعة مواضيعك الجميلة اللى بتكتبيها هنا ......يعنى اصبح عندك هدفين لازم تنجزيهم ..الاول انجاز مهامك وحصولك على شهادتك بنجاح ..والهدف التانى و اسعادنا جميعنا باخبارك الحلوة دايما ...

وفقك الله .................. :D

[Scorpion]

ايه الحلول الديبلوماسية دي ...

بعد البحث و التمحيص .. قررنا ايقاف العضوة مصرية الهوي ايقافآ مؤقتآ حتي نهاية امتحاناتها و بذلك توفر وقتآ ثمينآ لمذاكرتها ...

يالا يا ماما علي البتاع الكاجوال بازيك بتاعك ده .. عايز تخلصيه كله و ما تسيبيش في الطبق و لا لقمة .. المحاورات مش حتنفعك لو دبلرتي ...

ده قرار نهائي لا مجال للطعن فيه .. و اللي معترض يبعتلي عنوانه و صورة عياله ... :D

[mb14]

الأخت العزيزه

هذه فتره عاديه من الفتور كلنا نصاب بها عندما يكون امامنا مسؤليات كبيره ولكنها تأخذ وقتها وبعد ذلك تبدأ العجله تدور ونعود لسابق نشاطنا ولكن الاهم ان نجعلها اقصر ما يمكن وسرعة عودتنا للنشاط .

ولكن خلال فترة الفتور يجب ان نقوم بأى نشاط ونستفيد خلاله من تنفيذ بعض الاعمال المطلوبه منا ولكى ندخل فى حالة النشاط

1-رتيبى المواضيع المطلوبه منكى .

2-ابدأى باحب المواضيع الى نفسك وانتهى منه.

بمعنى ايه شوفى اكتر ماده بتحبيها او موضوع مطلوب منك عمل بحث فيه ابدأى بيه بمجرد انك تنتهى منه سوف تشعرين انك انجزت شئ وسوف تنتقلين تلقائيا الى موضوع اخر من القائمه.

ورنا يوفقك وتخرجى بسرعه من هذه الفتره .

[shahd]

ربنا يوفقك ياجميل شدي الهمة كده وتوكلي على الله ....والله وفكرتيني لما كنت في سنة ثالته وقال ايه راسي والف سيف اني اسيب الكليه نهاااااائي كانت حتبقى حوسة فعشان كده انا بقلك اني اؤيد رأي استاذنا سكوب ويلا لمي عزالك وما ترجعيش غير بعد ما تخلصي الطبق كله على رأي استاذ نا

(هواي نعم حتوحشينا بس مصلحتك اهم يلا يا بنيتي على المذاكرة معتدل مرششششششش)

[Folana]

ايه الحلول الديبلوماسية دي ...

بعد البحث و التمحيص .. قررنا ايقاف العضوة مصرية الهوي ايقافآ مؤقتآ حتي نهاية امتحاناتها و بذلك توفر وقتآ ثمينآ لمذاكرتها ...

يالا يا ماما علي البتاع الكاجوال بازيك  بتاعك ده .. عايز تخلصيه كله و ما تسيبيش في الطبق و لا لقمة .. المحاورات مش حتنفعك لو دبلرتي ...

ده قرار نهائي لا مجال للطعن فيه .. و اللي معترض يبعتلي عنوانه و صورة عياله ... :D

<{POST_SNAPBACK}>

الله ..الله..الله....هو الموضوع كده ......اخت مصرية ..شقى طريقك يابنتى بعيد عننا اليومين دول انا عندى عيال لسه صغيرة ومحتاجين لى ....مش عايزين نشوفك هنا واسمعى كلام عمنا سكوربيون :D :wub:

[daktara]

جميل انى اشوف التعاون الرائع والحب المجرد من الجميع لاختهم او بنتهم

تحيه لاسرة المحاورات

اما الاخت مصريه

مش هاضيف اكتر من اللى قاله اللى سبقونى

بس نفس الاحساس ده كان دايما معايا وكنت دائما ابدا انجح بتفوق حتى فى المذاكره للدكتوراه لو تتصورى كم المراجع وحجمها المرعب لا يمكن تصدقى ان حد ممكن مجرد يقراها لكن الحمد لله كنت باحفظها لانى كنت باعمل اللى على

وايه اللى على واللى على كل طالب علم ؟

فقط يعمل اللى عليه يعنى كنت باذاكر اوقات 20 ساعه فى اليوم اكل على المكتب واعاقب حتى الجيران لو يعلوا صوت الراديو او التليفزيون حتى اولادى كنت باشوفهم خطف

كنت باقرا وما افهمش فى الاول واقرا وافهم واعيد واحفظ

هو ده اللى المفروض تعمليه يعنى تاخدى الموضوع جد اوى واكيد ربنا هيكافئك فى الاخر

اما اقعد اغنى واكتئب واسأل عن حل واستنى الردود عشان اذاكرها وارد عليها فماينفعش

ومادمتى قلقانه اوى كده تبقى اكيد قد المسئوليه

ربنا معاكى

تم تعديل 27 أكتوبر 2005 بواسطة daktara

[ENG. BEHAIRY]

إحساس طبيعي وظاهرة صحية ما تمرين به من فتور وملل وتشتيت للفكر وفقد السيطرة والاتزان ، شريطة عدم الضعف والاستسلام ، والبراعة هنا في سرعة تخطيها لتلحقي بالركب ، وتنتظم عجلات التروس ، لما ينتظرك من واجبات ودروس..

وهذه المشاعر تنتاب المتفوقين أكثر من غيرهم لأنهم يشعرون بالواجبات الملاقاة عليهم ، ويريدون النجاح ، ويتطلعون إلى التقدير :D ، فتتولد ضغوط مختلفة كالتي تذكرينها ، أما سواكم فلا قلق ولا فتور ، لأنه لا حرص يثيره ، ولا همة تدفعه :) .. فاطمئني تمامًا ، وانفضي عن نفسك غبار الهموم والأوهام ، وأملاً في دعوة صالحة ، وأداءً للدين ، واستكمالاً لمن تفضل وسبقني أقول :

 مواجهة المواقف أفضل من الهروب منها وهى تطاردنا ، وهنا لا بد من الصبر والثبات ، ولابد من روح التحدي والإصرار ، وقهر مشاعر الكسل والفتور والقلق والتغلب عليها.

 البدايات لأي عمل دائمًا صعبة ، وكانت العرب تقول في حِكَمها : َويل لي من المطلع ، وجاء في السنة ابتداءُ صلاة الليل والقيام بركعتين خفيفتين ، فنبدأ بنظرة استطلاعية سريعة ثم نُتبعها بمزيد من التكرار والمجاهدة والتركيز ، وهكذا .. ابدئي ساعات المذاكرة بالأمور السهلة أو المحببة عندك كمدخل لما بعدها ( نوع من التهيئة والترويض وتسخين وتنشيط ).

 الصلاة والدعاء لهما أهمية خاصة، يقول الله تعالى ( واستعينوا بالصبر والصلاة ) ، ومن الأدعية : اللهم لا يسير إلا ما يسرته ولا سهل إلا ما جعلته سهلاً ، وأنت إذا شئت جعلت الحزن سهلاً ، اللهم إني أبرء من حولي وقوتي إلى حولك وقوتك ، رب اشرح لي صدري ويسر لي أمري..، اللهم إني أعوذ بك من الهم والحزن ، ومن العجز والكسل ، ومن الجبن والبخل والهرم .

 التطيب ( طالما في حدود المنزل) ، والوضوء بين الحين والآخر ، في مختلف الظروف والأحوال ( وأنت تعرفينها ) ، يجددان النشاط ويبعثان على الحيوية ، و ورد ( الوضوء سلاح المؤمن) ، وقبل وبعد النوم ، وحيث تشعرين بفتور أو كسل.

 تنظيم الوقت من حيث النوم واليقظة مهم للغاية ، فما تعانينه من كثرة النوم ناجم عن طول السهر ، يتبعه إرهاق يحاول الجسم معه استعادة راحته وتوازن ساعته البيولوجية ، والوقت بعد الفجر من أبرك الأوقات ، وهذا يستدعى التبكير بالنوم وعدم السهر ، والنوم المبكر قليله كثير ، والعكس صحيح ، وقد ورد عن رسولنا عليه الصلاة والسلام ( خير أمتي في البكور)

 قَلصي وتخلصي من الارتباطات والمشاغل قدر المستطاع بما فيها الزيارات والنت والهاتف بنوعيه ، قد تكون محرجة خاصة والعيد على الأبواب ، ولكن لابد من تضحيات وقت الشدائد والأزمات ، وعليك العبور ببراعة إلى الجانب الآخر للنهر ، ودعي (مركز التحليل النفسي) تديره أختنا الفاضلة فلانة ، ولا تقلقي ففترة عيد الضحى ستكون من نصيبك :D

 احصري وقيدي الأعمال والواجبات المطلوبة منك ومواعيدها و سجلي ما يحضرك من نقاط تخصها ، ولا تزهدي فى استخدام القلم والكتابة ، ففي الحكمة : قيدوا النعم بالشكر ، والعلم بالكتابة ، ويقول الله تعالى ( نُ وَالْقَلَمِ وَمَا يَسْطُرُونَ ) القلم1

 قومي بتوزيع هذه المهام على الفترة الزمنية المتبقية بصورة تقريبية تاركة مسافة للتعليق ومستخدمة الألوان وبعض الأشكال كالنجوم مثلاً للتعبير عن التفاوت بينها ، ومراعية توزيع الأولويات ، وأهمية التفريق بين الأمور الهامة والعاجلة والعادية ، فتبدئين بالعاجلة ثم الهامة فالعادية.

 ضعي على المكتب ما يتعلق بما أنت بصدده فقط ، واستبعدي ما سواه ، فهذا يريح النفس ، ويحجم القلق ، ويُعين على التركيز ، وتذكري قوله تعالى ( ما كان لرجل من قلبين في جوفه ) ولا لامرأة أيضًا ، أي لابد من التفرغ والتركيز.

 نفسُك مطيتك فترفقي بها ، ولا تحمليها ما لا تطيق ، ولكن أيضًا لا تتركيها ولا تدلليها ، واعرفي ساعات نشاطها ويقظتها ، واجعليها حيث يتطلب الأمر مزيدًا من التفكير والحضور الذهني ، والساعات الأقل للأقل وهكذا ..

 أهمية الترويح ، وأخذ قسط قصير من الراحة بين الأعمال وبعضها، ولاحظي أن عدم الراحة مجهد ، وكثرة الراحة وتقطع العمل مدعاة للتشتيت والكسل وهبوط الهمة.

 ضعي في اعتبارك إن هذا الموضوع ليس محصورًا عليك ، فزميلاتك في نفس الظروف ، وأن الله حباك بمحاورات المصريين ..يسعدون بك ، كما يسعدون ببذل جهدهم ، وإن تخلل ذلك تهديد :D بين الحين والآخر حرصًا على مستوى تلامذته ومعلميه.

 ابذلي جهدك ، واعلمي أن لكل مجتهد نصيب ، والمؤمن المتوكل من نثر حبه ورجا ربه ، وأشعِري نفسك الثقة بأنك قادرة بإذن الله تعالى على اجتياز الموقف بنجاح وكفاءة وجدارة أيضًا ، وتطلعي إلى زميلاتك اللائي سبقنك وكيف اجتزن هذه المواقف ، فلست بأقل منهن .

 الواجبات أو المواضيع التي تشعري أنها مملة حاولي توزيعها على عدة أيام ، إلا إذا وجدت عندك حماس لأدائها فلا تتوقفي.

 اتقني فن تحقيق الهدف ، والحصول على أعلى الدرجات ، بمعنى لا تجهدي نفسك في موضوع قليل المردود على حساب موضوع آخر أكبر تأثيرًا .

وفقك الله ، وشرح صدرك ، وكتب لك النجاح في الدنيا والآخرة .. والآن ابدئي بعزم وهمة وإصرار ، وما أن تبدئي خطوة ..خطوة ..إلا وستجدي معالم الطريق تبدأ في الظهور واحدة تلو الأخرى ، وعندها .. وعندها فقط ..ستستعيدين التوازن والثقة والحماس ، فكوني متفائلة وباسمة ، وواثقة بأن الله لن يترك من قصده ورجاه ، ولن يضيع أجر من أحسن عملا ،

ونراها أو نسمعها قريبًا بإذن الله تعالى :

هئ هئ هئ هئ ....

ولكنها هذه المرة دموع الفرح والتفوق والنجاح

:D :D :D

تم تعديل 27 أكتوبر 2005 بواسطة ENG. BEHAIRY

[shawshank]

أخي البحيري

الآية: "ما جعل الله لرجل من قلبين في جوفه"

إضافة لما قاله الأخوة:

• من أهم ما أنصح به البداية بما هو سهل. أو بما ترينه سهلا. أو بما تحبينه. لأنك ستنتهين منه بسرعة و ساعتها ستشعرين بأن جزء كبيرا من الحمل قد زال. و هذا يساعد كثيرا في انجاز البقية. بالإضافة إلى أنه سيدخلك في الجو العام للعمل.
  
• بمعرفة الأهداف و الأولويات و الإمكانات المتاحة ، المتمثلة في الوقت ، يتم عمل جدول زمني. و لا تبالغي و لا تضغطي على نفسك فيه. اجعليه واقعيا قدر المستطاع.
  
• قد يخفف أحيانا عمن هم في تلك الحالة من المجتهدين ، و الذين لا يرضون بأقل من 100% ، أن يهونوا على أنفسهم قليلا. فكل الموضوع أني أعمل ما علي و ما في وسعي. و لا يكلف الله نفسا إلا وسعها.
  

  اتقني فن تحقيق الهدف ، والحصول على أعلى الدرجات ، بمعنى لا تجهدي نفسك في موضوع قليل المردود على حساب موضوع آخر أكبر تأثيرًا .

<{POST_SNAPBACK}>

دي ظريفة أوي ... من أقوالي المأثورة :) و أنا طالب: احنا المفروض نذاكر طول السنة عشان نفهم و ليلة الإمتحان نذاكر عشان ننجح :D لأن ليلة الإمتحان محتاج تحفظ ، تعرف الدكتور بيجيب ايه كتير ، ايه الحاجات المهمة (من ناحية درجات اكتر طبعا) ... الخ.

[ENG. BEHAIRY]

أود من فريق الإشراف التفضل بتصحيح الآية التى استشهدت بها فى أواخر النصف الثانى من مشاركتى الأخيرة هنا ، وصحة الآية ( مَّا جَعَلَ اللَّهُ لِرَجُلٍ مِّن قَلْبَيْنِ فِي جَوْفِهِ ) الأحزاب4 ، شاكرًا لكم ولأخى الحبيب شاوشنك تفضله بالتنبيه .

تم تعديل 27 أكتوبر 2005 بواسطة ENG. BEHAIRY

[مصرية الهوى]

أنتو عارفين أنا قررت أعمل ايه ؟؟!!

هألم كل الكلام اللي كتبتوه وأحطه في كتاب اسميه ..

طريقك إلى النجـــــــاح

لطلاب السنة الأخيرة في الكلية ..

ومتقلقوش كل واحد هيوصله نصيبه :angry: ..

لابجد والله ...

أنا مش عااااااارفه أقولكو ايه والا اشكركو ازاي !!!...

أنتو هااااااااااااااايلين والله ..

ميررررررررررررررررررسي اوي اوي .. ربنا يجزيكم كل خير .. وينجحكم في الكلية ( ايه يا بنتي دنتي اللي في الكلية :angry: )

كلامكم والله زي العسل .. متتصوروش اثر فيا ازاي .. واداني طاقة خلتني أنفض الكسل والهم عن نفسي !!

خليتوني احمد ربنا مليووون مرة إني سجلت في منتدى زي ده وإنه بقى لي اخوات زيكو قدموا لي نصائح لا تقدر بثمن ... من كتر ما النصائح جميلة ورائعة خجلتني فعلا :angry: :angry:

الحمد لله أنا دلوقتي قطعت مشوار لا بأس به .. تقريبا خلصت تلت بحث operating system

وزيه بالضبط في ريبورت مشروع التخرج .. وفعلا حسيت إن كل حاجه تسهلت لما حطيت رجلي على أول الطريق ..

أنا الحمد لله دلوقتي مبسوووووطة جدا جدا وده كله بفضل ربنا ثم بفضل نصائحكم الرائعة اللي طبعتها عشان اخليها مرجع عندي :angry:

مرة أخرى شكرا لكم ..

وكل سنة وانتم طيبين

والعشاء يوم العيد إن شاء الله عندي .. متنسووووووووووش

(عزومة مراكبيه :angry: )

[se_ Elsyed]

طريقك إلى النجـــــــاح

لطلاب السنة الأخيرة في الكلية

في حاجة مهمة لازم تتعلميها يا جيجي .. وهو إنك لما تيجي تألفي كتاب يبقى لازم إسمه يكون جذاب .. وإلا مش هايتباع وهايبقى مصيره إنهم يعملوه قراطيس ويلفوا فيه طعمية ... ومن غير سمسم كمان ..

فممكن مثلاً يبقى إسم الكتاب " طرق النجاح البرية ... لطلاب السنة النهائية "

أو مثلاً " نصايح زي العسل والسليلوز .. لطلاب البكالوريوز "

وكده يعني ...