مرة تانية .. يسقط رئيس جمهورية شرم الشيخ ..

[achnaton]

إحترت .. واحتار معى دليلى .. مقوله كان الناس فى المنحوسة – المحروسة سابقا – يرددوها عندما تستعصى عليهم مشكله مع من يحادثونه .. واحنا هنا فى المنتدى والله أحترنا .. واحترنا مع الناس اللى اصبح فى ايديهم التحكم فى امر ما .. طبعا على رأسهم حكومه الكساد الألكترونى .. حتى كناس الشارع .. مرورا بجميع الوظائف الخدمية .. حتى بتاع الفول والطعمية الوقت سمعت إنهم بيجيبوا له كارت توصية عشان يراعى ربنا فى عمل السندوتش او تدميس الفول .. والحاجات الصغيرة دى مقدور عليها لكن لما محافظ او رئيس مجلس محلى او حتى رئيس رئيس حى يعمل فيها ابو العريف .. ويمشى الكون على هواه وحسب ما يراه .. يبقى حالنا أصبح عدم يا ولداه ..

وحتى الآن مش عارف افهم او اوصل لسر تعيين الناس اللى بيستغنى عنهم جهاز القوات المسلحه فى شغل وظائف قيادية فى الدولة ..؟؟ إيه المناسبه ؟؟ اجيب واحد كان قائد وحده او قائد جيش حتى واعينه قائدا لمحافظه ؟؟ ورئيسا لكل القطاعات والاجهزة بمختلف فروعها فى جزء من اجزاء الجمهورية .. فتلاقيه رئيس الوحدات المحلية فى جمبع التخصصات من تعليم وصحة وتجارة وتموين ..الخ .. ايه المؤهلات اللى الواحد لازم يحصل عليها عشان يحصل على تلك الوظيفه .. مهندس تلاقيه .. طبيب تلاقيه .. مرشد سياحه تلاقيه ..ناظر مدرسه برضه تلاقيه .. حتى أنى مرة سمعت أن محافظ من المحافظين كان غاوى يمشى على رجليه من استراحته الى مكتبه على الاقدام كل يوم .. والبعض قالوا دا راجل رياضى وبيوفر للدوله مصروفات السيارة .. والحقيقة المؤسفه أن معاليه كان حابب يضيف لوظائفه المتعددة وظيفة رئيس الكناسين .. فكان بيلم بنفسه الورق من الشارع ليبدو نظيف .. ويخصم من الكناس ثلاثة مليم ..

كل هذه المقدمه .. لأن دمى فاير من اللواء ده اللى عمل من نفسه رئيس جمهورية بجد من غير مستشارين ولا معاونين معتمدا على اللى فى رأس معاليه .. ما كناش غلبنا يا سيادة اللواء ..

بالامس القريب أصدر تعليماته باقامة سور زى سور برلين تمهيدا لإعلان جمهورية شرم الشيخ الحرة .. وكانت نكته ضحك عليها العالم .. النهاردة .. طلع ريح تانى رغم ان ريحة الاول ما زالت تزكم الانوف .. فقد جاء بجريدة حزب الوفد النعمانى ما يلى :

قرارات ظالمة ضد بدو سيناء!

المحافظ يعاقب البدو بمنع حفلات العشاء السياحية ورحلات السفاري!

اللواء مصطفي عفيفي

عاقبت محافظة جنوب سيناء البدو علي جريمة لم يرتكبوها

بقرارات غير إنسانية. أصدر اللواء مصطفي عفيفي المحافظ

تعليمات بمنع اقامة حفلات العشاء البدوي للسياح في المناطق

الجبلية التي كان يتجمع السياح فيها، ويتم نقلهم

بالاتوبيسات الي الوديان في مواجهة شرم الشيخ. ويقوم البدو

بتقديم كافة الخدمات والطعام علي الطريقة البدوية للسياح.

كما تقدم بعض فرق الفنون الشعبية البدوية حفلاتها للترفيه

عن السياح. وكان هذا النشاط السياحي يلقي اقبالا كبيرا من

السياح الاجانب والعرب ويطلقون عليه العشاء البدوي.

ويتساءل البدو لماذا يصدر المحافظ قراره بمنع هذا النشاط

السياحي

الذي يعتبر مورد رزق هاما لهم، رغم ان هذه الحفلات كانت

تتم بالتنسيق مع الفنادق.

وتقدم البدو بعدة طلبات الي محافظ جنوب سيناء لعودة هذا

النشاط السياحي، دون جدوي. كما ان العديد من القبائل

الموجودة بالمنطقة تعتبر هذا النشاط السياحي احد اهم موارد

رزقهم. وتعهد مشايخ القبائل بحماية المترددين علي تلك

المنطقة من السياح بالتنسيق مع الامن في شرم الشيخ.

ولم يكتف المحافظ بعقاب البدو بمنع العشاء، وقام بوقف

رحلات السفاري التي يقوم بها السياح علي ظهر الجمال او

باستخدام الموتوسيكلات الجبلية. ويعد هذا النشاط السياحي

الهام احد موارد رزق البدو. واستنكر البدو الاجراءات التي

اتخذتها محافظة جنوب سيناء بشأن بناء السور لعزلهم.

http://www.alwafd.org/front/detail.php?id=9937&cat=smal

طيب .. لن نتكلم عن مشروعية قراراته .. ولكن .. اللى يغيظ فعلا .. ويخلى الواحد يخبط دماغه فى الحيط ميت مره .. مش محاربة بدو سينا فى رزقهم .. ولكن الموضوع اكبر إذا كان معاليه لا يرى ولا يسمع .. ياريت سيادته بستغنى على نص ساعة واحده من وقته الثمين اللى خصصه فى اثار القلق للملايين .. ويذهب الى فندق من فنادق شرم الشيخ .. فيه هناك لوحات خصصها الفندق للشركات العاملة بالسياحة .. وعلى هذه اللوحات برامج شركات السياحة الاجنبيه التى تسوق السياحة فى الخارج لمدينه شرم الشيخ .. مفيش برنامج من الرامج دى قاصر على قضاء الاسبوع على شاطئ البحر والاستحمام .. مفيش برنامج واحد قاصر فقط على قضاء كل فترة السائح فى الغطس .. ما يشوف رئيس جمهورية شرم الشيخ الحكاية بالضبط .. ويشاور فى الاول اهل الذكر .. دا احنا عندنا وزارة ضخمه للسياحة .. يسأل الناس اللى فيها من المختصين .. بلاش الوزير مادام معالى رئيس الجمهورية الوليده مش مطمئن لجنسيه الوزير هو مصرى ولا سعودى !! فيه مساعدين له اسمهم وكلاء الوزارة اعتقد أن كلهم مصريين مائه بالمائة .. وشعرهم كله اسود من قرن الخروب زى حالنا اللى وصلنا اليه عندك يا معالى المحافظ .. قرارك يشبه تمام القذيفه التلاثة طن اللى بيطلقها طوبجى اعمى ..

ان هذا القرار فى تصورى هو حكم بالاعدام على السياحة الاجنبية لجمهورية شرم الشيخ ..

حرام عليك يا راجل .. مصر مش ناقصه .. ومش مصدق .. إسأل " البل مان " فى آى لوكانده

ويا خسارة يامصر .. اللى بيعمله فيكى ضباط المعاشات بيعصر قلبى عصر

تم تعديل 26 أكتوبر 2005 بواسطة achnaton