يا ترى هاتروح فين في العيد ؟

[se_ Elsyed]

المغتربون المحرمون يمتنعون

عايزين بقى من أخواتنا اللي عايشين في مصر يحكوا لنا عن الأماكن اللي مخططين يتفسحوا فيها في العيد أو بلاش كده .. يقولوا لنا عن الأماكن اللي يرشحوها للفسحه ..

يعني نوع من أنواع التحنيس ...

أنا عن نفسي ممكن أعدي على جيجي ونروح ناكل أيس كريم على كورنيش طريق الملك فهد وإنت رايح العُليا كده ... أدي يوم :blush:

أما بقيت الإسبوع فهانام فيه نوم كما لم أنم من قبل .. لإني بأحب أتحدى نفسي وأعمل أرقام قياسية ... ولو شاء العلي الكريم .. ممكن أطلع الخُبر ونرمي الهلب على مانمان ومحمد جرمون .. وأهو نبقى ضمننا أكلة سمك بلوشي على الكورنيش ...

بأمانة يا جماعة .. من الأسبوع الماضي تحولت الرياض إلى مدينة أشباح ... هوووووووووووووووووو وتزداد في العيد خواءً .. فالجو مُظلك كئيب بعد الإجازات ما بدأت والكل فلسع واللي سافر بلده .. واللي مش منم الرياض - وهم كُثر - راحوا قراهم وديارهم الأصلية .. وتركوا بقى من لا مآوى لهم هنا .. فالجناين كلها حفظناها ... مُدن الملاهي بيخترعوا لنا إختراعات غريبة ويقولك الستات لوحدهم والرجالة مش عارف إيه .. وأساساً ممنوع الستات في الرياض تركب أي لعبه حتى لو كانت بسيطة فالواحد بياخدها من قصيرها وما يروحش ... بس عندي فوكيره تانية وهي الذهاب إلى شاليهات اليمامة في مدينة الخرج حيث توجد حماما سباحة العيال الصغيرة بيبلبطوا فيها ويبقى يوم ظريف .

أما مصر بقى ...

يا عيني يا عيني .. ويا مزاجو يا مزاجو ... تبقى عايز العيد يبقى 3 شهور عشان تتفسح وتبرطع براحتك ...

هييييييييييييييييييييييييه سي لا في

إبنكم المُعذب سين سين

[مصرية الهوى]

أنا عن نفسي ممكن أعدي على جيجي ونروح ناكل أيس كريم على كورنيش طريق الملك فهد وإنت رايح العُليا كده ... أدي يوم 

هههههههههههههههههههههه

ده يبقى يوم الهنا ... بس ايه كورنيش طريق الملك فهد :blush: تخيل شكلنا واقفين لوحدنا والعربيات رايحة جايه ... قول نطلع برج المملكة ..نروح منتزه سلام ... يمكن :sad:

وحكاية مدينة الأشباح دي معاك حق فيها ... ماهو كل الحبايب اللي في الرياض هييجوا عندنا البلد ..أنا مش عارفه ايه اللي خلاني ساكنة أرياف :D ما نا برضه عايزه اسافر مش حد يسافر لي ..

والناس برضه بيروحوا الشرقية .. ياسلام والله نفسي أروح الخبر ... وش رأيك يا سي السيد ؟؟!! :blink:

بس أنا عندي لك اقتراح تاني .. أصل احنا بسم الله ماشاء الله بنتلم يوم العيد ( الأعمام والأخوال كلهم ) فبتبقى لمة حلوووووووة .. أنا هأعزمك تيجي معانا وان شاء الله هتنبسط آخر انبساط .. وتتعرف على شعب اخر ( الشعب القصيمي :sad: )

ولغات اخرى وهكذا ... ولو ماتبستطش معانا هأوديك للساحة ( ايه الساحة دي ) الساحة دي أحلى مكان عندي هنا :D .. عشان ايام الاجازات والاعياد بتحس انك قاعد وسط القاهرة .. كل المصريين اللي هنا بيجتمعوا فيها .. بس بتبقى جميلة بشكل ومنتهى الانبسااااط ..

هاه وش رأيك ؟؟

امسك خط القصيم ....... يلا ..

لو مكسل .. اخلي حد من الحبايب اللي جايين يعدي عليك

mfb:

وان شاء الله مش هتكتب ابنكم المعذب س س

هتكتبها ابنك المبسوووووووط اوي اوي من العيشة في السعودية س س :blush:

ربنا معاكم والله خاصة أيام الأعياد والمناسبات .. انا حاسه فيكم .. عشان أحنا عشنا حالات زي كده لما حد من اهلنا بيبقى عايش برا السعودية .. يوم العيد يبقى مناحة يكلمونا ويعيطوا .. ويحسدونا على اللمة والوناسة ..

يلا ربنا يردكم الى بلدكم واهلكم يارب .. وتبقى السعودية ذكريات من الزمن القديم

:D :D

[صفاء]

مين جيجى بقى؟

[مصرية الهوى]

جيجي دي بنت محصلتتتتتتتتتتش

حتة سكررررررررررررررررة

تقول للقمر غيب وأنا اقعد مطرحك مفتي وقاضي ونقيب ..

:blush: :blush: :D

[Alshiekh]

مين جيجى بقى؟

<{POST_SNAPBACK}>

صاحبة الصورة اللى فوقك على طول

شوف ياسيدى

يوم الوقفة : شغـــــــــــــــــــــــل حتى السادسة مساء

اول ايام العيد: شغـــــــــــــــــــــــــــــــــــل حتى السادسة مساء

ثانى ايام العيد : برضه شغــــــــــــــــــــــــــــــــــــل حتى السادسة مساء

أما بقى ثالث يوم العيد: شغــــــــــــــــــــــــــــــــــــــــــــــــــل حتى الخامسة مساء

ايه رأيكم بقى ؟ مش احسن مالواحد يقعد يفكر يعمل ايه ويروح فين؟

[shahd]

حتروحي فين ياشهد حتروووووحي فيييييين :blush:

الي عايزني يجيلي انا ما بروحش لحد :D

اهئ اهئ اهئ حروح فين ياحسرة قاعده قدام العنكبوتر لحد ما حيجبلي احولال في القصبة الهوائيه :blush:

[mb14]

كل سنه وانتم طيبين وكل عام وشعب المحاورات بخير

والله حكاية نروح فين دى بتعمل مشكله عندى لأنى من خارج القاهره وكل الاماكن اللى فى محافظتى روحناها والعيال حفظوها فقررت ارتحل الى القاهره ونزور احلى الاماكن ففى مره سابقه روحنا حديقة الازهر واستمتعنا بس الشمس لسوعتنا ولا كأننا على البحر " لأن ما كانش فيه شماسى على الكراسى " .

المره دى ان شاء الله حاخدهم ونروح دريم بارك بس طبعا بعد اول يومين العيد لأن اول يوم صعب الخروج والسفر وتانى يوم رايح الشغل .

س س لو عندك اقتراحات قلنا عليها وربنا يرجعك المحروسه بالسلامه

[se_ Elsyed]

هلا والله بالجصمان واللي من الجصيم ...

يا ست الكل أنا عارف القصيم كويس ..لإن أصحاب الحلال عندنا من الجصيم .. وكل عيد بيعزموني أقضي معاهم العيد في مزرعتهم لكن طبعاً بيبقى صعب شويه على اساس المسافة وكده .

أما عن الساحة .. فطبعاً عارفها .. ساحة قصر الحُكم اللي بتقام فيها عروض شعبية وفلكلورية في العيد ... وفي كمان العروض اللي بتتعمل في الساحات اللي في الدايري الشرق عند مخرج 9 بتبقى روعة .. خصوصاً عروض السيارات العملاقة وعروض الطيران وفرق الغطس الروسي ..

بالنسبة لموضوع الخُبر .. فمازال في الخطة .

[se_ Elsyed]

س س لو عندك اقتراحات قلنا عليها وربنا يرجعك المحروسه بالسلامه

<{POST_SNAPBACK}>

أنا بقى لي 10 سنين بره مصر يا محمد يا بني .. وخلاص راجل عجِزت ويالله حُسن الختام .. وبالتالي أصبحت مش مُطلع على أخر المستجدات والفُسح العيدية في مصر لإن ربنا ما يوريك بقى لي حوالي 20 عيد لم أرى فيهم مصر إلا مره واحده من 5 سنوات .. وتصادف في الأجازة دي إن زوجتي ولدت أول يوم العيد الواد عُمر .. فمباقتش عارف أنفخ البلالين وأروح أأجر عجلة ولا أقعد جنب مراتي أشربها شوربة الفراخ المسلوقة ؟ بالعربي يعني العيد يومها باظ .. من الأخر يعني .

لكن أنصحك يا مان إنك تزور سيتي ستارز مول اللي بقى تحفة معمارية في مصر وهو يقع في تقاطع شارع النزهة مع طريق النصر قبل ما تدخل مكرم عبيد كده ...وهاتبقى فُسحه حلوه لإن فيه مُجمع سينيمات ومطاعم ومحلات متنوعة وبالتأكيد في ملاهي أطفال ..

كمان ممكن تاخد الأولاد وتأجروا فلوكة في النيل ومعاكم حلة المحشي والخس وكده يعني وتبقى ليلة .

وإذا ماكنتش روحت دريم بارك يبقى لازم أنصحك بها ...

وعندك كمان فُسحة القرية الفرعونية في شارع البحر الأعظم .

[ahmedbd]

انا هاروح (جزيزة القطن) هقضى فيها ثلاث ايام العيد ان شاء الله

و هتوفرلى كتير لانها مش مكلفه و لا محتاجه موصلات

:D :D :D :D

[Osha]

ياجماعة حرام عليكم

ارحموا عزيز قوم سافر بلاد العم سام

:D :D :D

انا حاروح اخد العيال من المدرسة ونروح نصلي صلاة العيد في الجامع

وبابا ان شاء الله جاي بكره يعيد معانا وبكده يبقى العيد له شكل عائلي الى حد ما

بس انا جبت لبس العيد للعيال

المشكلة في العيدية انهم عاوزين يشوفوا ميات وخمسينات زي مصر

:D

حاولت افهمهم ان الميت جنيه تبقى حوالي عشرين دولار راسهم والف سيف ان الميت جنيه هي الميت دولار !!!

يعني ماما كانت بتدي كل واحد 100 جنيه

وبابا شرحه

واختي شرحه

وجوزها شرحه

طبعا بخلاف شوية خمسينات متفرقة من باقي أعضاء العائلة

يبقى العدد حوالي 600 جم لكل منهم

حضراتهم بقى عاوزين نفس الرقم بالدولار الأمريكي الأخضر

:D

ولذا تجد ان العيد هنا منطقة خطرة شوية - ماليا على الأقل

وكل سنة وانت طيبين

[se_ Elsyed]

يبقى العدد حوالي 600 جم لكل منهم

<{POST_SNAPBACK}>

600 ج في العيد الواحد

!! !

يعني في العيدين اعمل لي حوالي 1200 ده غير المناسبات التانية ، يعني بنتكلم في حوالي 5 بواكي في السنة ؟

يبقى سعودية اية وخليج ايه بقى ؟

اوشا ممكن تكلمي لي حسام وتسأليه لو بتدوروا على حد تتبنوه ويبقى خير ولد

يعني خلوني في الكيو وتحت النظر