خاطرة للمغتربين

[shawshank]

هذه خاطرة لكل المغتربين ، كانت مدام سلوى قد أشارت إليها من قبل ...

حتى وقت قريب جدا كنت أظن أن السفر خارج مصر مجرد فترة و تمر و أعود بعدها لمصر و يعود الوضع إلى ما كان عليه ، لكني اكتشفت مؤخرا أن ذلك وهم.

فما مضى لا يعود أبدا ، و ببساطة أنت تترك مصر لعدة سنوات ، فيفوتك في هذه السنوات تغير كل شئ ، فتعود تجد كل شئ مختلفا ، صار الأطفال بالغين ، صار الشباب كهولا ، تغير كل شئ في البلد و لم و لن يعود كما كان ، و لم يبق لك من مصر التي عرفتها و تعودت عليها ثم تركتها سوى ذكرياتك عن كل شئ ، و التي لن تتكرر أبدا. هذه الحلقة المفقودة من السنوات تجعلك تحتاج للتأقلم مرة أخرى مع مصر الآن ، مصر الجديدة التي لم تعرفها من قبل ، فتشعر بالغربة في بلدك التي عدت إليها ، و بفقدك لبلدك التي عرفتها و تركتها. فذاكرة العين لا تأخذ في اعتبارها حساب الزمن !

فسبحان الله ، لو أعلم ذلك لربما كنت أعدت النظر في مسألة السفر. لكني أدركته فقط مؤخرا.

تم تعديل 30 أكتوبر 2005 بواسطة shawshank

[New]

هو ايه الموضوع؟؟؟ اخونا الفاضل اخناتون كتب فى الموضوع ده مش شوية ايام ومدام سلوى ردت عليه.... بصراحه كلامهم اثر فى وكنت عايز اكتب بس اظن ان كلامهم كان كفاية ومش محتاج تعليق...واكتفيت بقراءة مداخلاتهم اكتر من مرة...

بس يا ترى لو كنا فى مصر كان ايه اللى حيتغير... الزمن لا يمكن ايقافه... ما نعانيه هو ضريبة الغربة... تجمد بنا الماضى عند لحظة السفر ... نحس بالاشتياق الى الماضى الذى لن يعود ومع علمنا بانه مضى الا انه لم يغادر خيالنا....

علمتنى الحياة ان ليس هناك شئ بدون ثمن ... وها نحن ندفع ثمن غربتنا... ثمن الحصول على شهادة علمية.. او الارتقاء بالمستوى المادى ....او حتى الهروب من همجية حكومتنا... قد يكون ما ندفعه غاليآ ولكن ما هو البديل!!!

This is the way the life is :excl:

انا كنت عايز اكتب كلام ينسي شوية.... بس شكلى نيلت الدنيا. :D

والنبى يا شوشانك يا خويا بما انك هاوى رياضيات افتكر لنا معادلة تفاضلية من الدرجة السابعة خلينا نفش غليلنا فيها ممكن ننسى الحاجات اللى بنفكر فيها دى.. :D

[shawshank]

بما انك هاوى رياضيات افتكر لنا معادلة تفاضلية من الدرجة السابعة خلينا نفش غليلنا فيها ممكن ننسى الحاجات اللى بنفكر فيها دى..  :sad:

<{POST_SNAPBACK}>

اتصل بـ

- 800 - 1

DERIVE 7

:)

[daktara]

نار مصر ولا جنة غيرها

الجميع هنا بيخوفنى من العودة لكننا سنعود يوما ونواجة الواقع الجديد بكل ابعاده واكيد الدنيا مش هتكون ضلمه اوى

انا باحزم فى شنطى وكراتينى وراجع مصر نهائى ان شاء الله بعد اسبوع بعدما انهيت تعاقدى وخسرت الكثير من مستحقاتى التى وقعت على استلامها ولم استلم شيئا حتى الان

[omtmam]

أنا رجعت فعلا و بقالى 4 شهور عايشة فى مصر و الحمد لله مبسوطة و الأهم من كده ان الأولاد كمان مبسوطين اللى اكتشفته ان اهم حاجة قرار العودة يكون و الأولاد فى سن صغير و الامكانيات تكون معقولة بحيث تسمح لك تعيش فى مستوى مرتاح صدقونى مصر فيها كل حاجة بس محتاجة امكانيات. ارجع يا دكتارا و على ضمانتى و حمد لله على السلامة مقدما

[shawshank]

omtmam

أرجع أنا كمان و على ضمانتك ؟ mfb:

[se_ Elsyed]

أنا رجعت فعلا و بقالى 4 شهور عايشة فى مصر و الحمد لله مبسوطة و الأهم من كده ان الأولاد كمان مبسوطين اللى اكتشفته ان اهم حاجة قرار العودة يكون و الأولاد فى سن صغير و الامكانيات تكون معقولة بحيث تسمح لك تعيش فى مستوى مرتاح صدقونى مصر فيها كل حاجة بس محتاجة امكانيات. ارجع يا دكتارا و على ضمانتى و حمد لله على السلامة مقدما

<{POST_SNAPBACK}>

أختنا أم تمام حمد الله عالسلامه ... وبإذن الله تعدي مرحلة الصدمة الأولى على خير .. حيث إن المُغترب بياخد شوية وقت على ما يلم بالحاجات اللي حصلت وهو بره .. ومنها على سبيل المثال العادات الإجتماعية المستحدثة أو اللي إحنا نسيناها ... ومنها برضوا الحالة المادية والظروف الإقتصادية اللي بكل تأكيد بتختلف عن الحياة اللي كنا بنعيشها ...

أهم خطوة يجب أن يفعلها كل مغترب يُريد أن يرجع ويستقر في بلده هي

" سياسة المراكب المحروقة "

( نظام بقى طارق بن زيدد والبحر أمامكم والبُعبع من خلفكم )

أنا باتكلم جد .. يعني لو رجعت يبقى خلاص لا تنظر للوراء ولا تمسك العصا من النص وترقص على السلالم وتقول إن الطيارة مستنياني وممكن أرجع في أي وقت ..

يعني في ناس تقولك طب أنا أنزل أجرب 6 شهور .. وأشوف هاتأقلم ولا لأ ...

وبأقول لهم ...يا حلو الملامح ... مش هاتتأقلم طول مانت حاطط في بالك إنك زائر ... أو سائح أجنبي مازال لديه خيارات العودة ...

إذاً فلما ترجع يبقى لازم تضرب بلانص في قلب المجتمع .. تاكل زيهم وتشرب زيهم وتعمل زي الناس ( ماحدش يفهمني غلط ) يعني تعيش على إنك مصري زيك زي أي مصري تتنفس نفس الهواء وينطبق عليك ما ينطبق عليهم ...

وبالتالي لا داعي للتأفف من الأجراءات الحكومية الروتينية .. والطُرق اللي زحمه .. والناس اللي إتغيرت ... إلخ من الحاجات الفرافيري اللي أنا أول واحد باعملها لما أنزل مصر .. بس الواحد بيبقى معذور على أساس إنه لسه عايش بفمهوم السائح الأجنبي اللي جاي يومين وهياتوكل على الله ...

وبدل ما تلعن الظلام .. إنزل إشتري لك دستة شمع ونورهم .. وحاول تصلح وتعدل أو لتصمت ..