يوميات سنكوح

[هشام عبد الوهاب]

كنت قاعد على الكرسى ورا الشباك والساعه داخله على اتنين وميعادى مع ابو الزيك قرب والمكتب مافيهوش الا واحد لابس جلابيه وواقف عند اسماعين وانا مستنى ميعادى مع ابو الزيك بفارغ الصبر ،، الراجل عازمنى على السيما وكمان ايه سيما فى وسط البلد وفيلم من بتوع المهرجانات ،،واهى فرصه الواحد يشوفله كام حاجه حلوه من اللى بيقطعوهم فى الرقابه

وانا كمان مادخلتش سيما من يطلع كده عشر سنين

وخلاص هاقوم امشى ودخل عليا الفراش الجديد وقاللى سيادة العميد عاوزك تخلص الورق ده

وبعدين هو ده وقته د ابو الزيك زمانه مستنى ع القهوه وجاب الكشرى كمان ،، طب اخلع ازاى ،، ايوه نطلع فيه اى حاجه ناقصه بس بكره بقى ابقى اتصرف ،، استنيت عشر دقايق وندهت للفراش وقلتله يبلغ سيادة العميد ان فيه كام ورقه ناقصه وبكره هابقى اخلصه

اخدت الدوسيه وحطيته فى الدرج ولميت حاجتى ورحت رايح على السلم قبل ما الواد الفراش يرجع ونزلت اول سلمه وفجأه سمعت صوت العميد ورايا

ياسنوسى ،، تعالى انا عاوزك

طبعا للخلف در وع المكتب بتاع الباشا

العميد : انا بعتلك دوسيه تخلصه ،،فين هو

سنوسى : ماهو سيادتك المراجع مشى

العميد : اسماعين هايروح مشوار وراجع بعد ساعه تكون خلصته ،،يالا قوام وماتعقدليش الدنيا ،،لازم يخلص بعد ساعه بالكتير

سنوسى : حاضر ياباشا

يادى الغلاسه والرخامه ،، طار الكشرى وطارت السيما وطار الكام منظر ،، منك لله يابعيد الاهى ماتدخل السيما ابدا

رجعت الشباك واخدت الملف وقعدت على مكتب اسماعين ابص ف الورق

ياسلام ،، كل الغلبه دى على بطاقه بدل فاقد ،، فين بقى المحضر ،، اهو

عجيبه الورق كله مستوفى ،، اقوم اشوف الملف فى الارشيف

الاستاذ هباب ،، الاستاذ هباب ،، هو غطسان فين بس ،،، ايوه اهو تعالى قرفتنى

فين شهادات ميلاد العيال دول ،،، الله ،، ايه ده ،، الملف بتاع الارشيف مافيهوش اسم ولا عيل

والدوسيه الجديد فيه واد وبت ،، جابهم امتى ان شاء الله ،، د عنده يجى 55 سنه

اما نشوف ،، يانهار ازرق دول عيال كبار ،، انا قلت انه يوم منيل من اوله

ياترى فيه ايه تانى

اهلا وسهلا ،، المهنه نجار مسلح ،، والدوسيه الجديد رجل اعمال ،،دى احلوت قوى وشكلى هابات هنا النهارده ،، والرخم يقوللى ماتعقدليش الدنيا

اسم الزوجه ،، يخرب بيتك هومافيش حاجه واحده مطابقه ،، طيب شهادة طلاق القديمه وجواز الجديده فين ،،، وبعدين بقى فى الراجل الهباب ده ،، هو الرخم ماتجيش من وراه الا المصايب ،، واسماعين راخر اتأخر قوى ،، اعمل ايه اروح للرخم ،، هايقولى اتصرف

طب اتصرف ازاى بس ده الدوسيه كله ملخفن وملغبط

مش كان زمانى فى السيما دلوقتى وشوفتلى كام منظر على كام مايوه بدل القحط اللى الواحد فيه ده ،، الاهى ينكد عليك يارخم وماتشوفش مايوه تانى ف حياتك

يتبع

[هشام عبد الوهاب]

وشويه واسماعين رجع ،، لمحته داخل للرخم وبعدين هما بيعملوا ايه ، اهو جه

يا استاذ اسماعين الدوسيه ده ملخفن ع الاخر وناقص منه ورق كتير ،، يعنى مافيش

اسماعين : استنى بس انت بالع راديو

سنوسى :ماهو الور..ق

اسماعين : اتفضل ياسيدى الورق الناقص كله اهوه

وراح مدينى ظرف كبير لونه بنى

اسماعين: خلص كل حاجه واالختم عند الباشا فى المكتب وهتلاقى فى الدوسيه بطاقه فاضيه املاها ودخلها للباشا هايختمها وابقى امضى بدالى

سنوسى : امضى بدالك ازاى يا عم اسماعين ماينفعش

اسماعين :يابنى ارحمنى بقى ،،انا عاوز اروح للعيال ،،امضى وخلاص ، والباشا جوه لو احتجت حاجه ابقى قوله ،،اف ،،دى حاجه تقرف ....... سلاموا عليكم

واختفى من قدامى وهو عمال يبرطم

اخدت الدوسيه ولأول مره اشوف منظر المكتب فاضىىىىىىىى ،، قعدت على مكتب اسماعين وفتحت الدوسيه البنى الكبير

قسيمة جواز بتاريخ 15- 10-1975 من السيده ايه ،،ايه الاسم العجيب ده

الحمدلله مش مضروبه

شهادة ميلاد بأسم مهند بتاريخ 27 -5-1976 اسم الام انتى تانى ماعلينا اللى بعده

شهادة ميلاد بأسم بأسم بأسم مين مهنده ،،هما بيجيبوا الاسامى دى منين

بتاريخ 27-5-1976 ياعينى ع الحلاوه توأم ،، نفوت دى ،،اللى بعده

صورة عقد مليكة شركه ال..... وصاحبها الاستاذ هباب

طيب مانكتب صاحب شركه ،، يعنى هيا هاتفرق من صاحب شركه لرجل اعمال ،،،نفوت دى كمان ولا ايه

وايه الظرف الصغير ده ،،،اه لازم فيه صور الافندى ،،ورينا ياسيدى خلقتك

وهووووب ،، فلوس ،،مين ،،فين ،،،ليه ،،،كام

دول يجوا متين جنيه ،، طب ليه ،،، ااااه ده كده فيه ان بقى وكان واخواتهم كمان

مابدهاش بقى انا اروح للرخم اقوله

سنوسى لنفسه : ايوه انا اروحله واقوله على كل حاجه

سنكوح لنفسه :استنى ياعبيط هاتعمل ايه ماتبقاش فقرى

سنوسى :يعنى ايه اخدهم وامشى البطاقه ،، ماهو اكيد فى مصيبه وان اللى هاقع فيها

سنكوح: مصيبة ايه وبتاع ايه ،،رزق وجالك ترفصه وتقول مش عايز

سنوسى :ماهو .....اصل يعنى

سنكوح: ياخايب دا انت مافيش فى جيبك الا عشرين جنيه ولسه فاضل على اول شهر خمس ايام

سنوسى :لأ لأ لأ الموضوع ده شكله ملغبط ازى نجار مسلح ويبقى رجل اعمال وازاى مخلف عيال ونسى يسجلهم 25 سنه وبعدين مخلفهم بعد مااتجوز بسبع اشهر بس واساميهم ملغبطه

سنكوح : اقعد حبكها بقى واعملى فيها الواد اللى بيجيب التايهه ،،هاتفضل فقرى

يابنى شوف منظرك ،،هاتلك قميص جديد وكلك اكله حلوه بدل الفول اللى هرا بدنك

سنوسى :لأ لأ لأ لأ ابدا ،،لايمكن انا هاروح للرخم واقوله هه بس

بعد نصف ساعه فى مكتب العميد

سنوسى : اتفضل ياباشا البطاقه خلصت وفاضل الختم

والى يوم اخر

[هشام عبد الوهاب]

داخل القهوه سنوسى جالس على ترابيزه وبيشرب كوباية شاى يدخل احد الاشخاص متجها لسنوسى مباشرة .

سلاموا عليكم

سنوسى : وعليكم السلام . ازيك يا عبده

عبده : كويس ، بقولك ايه مش عاوز لحمه ببلاش

سنوسى : نعم يا خويا لحمه وبلاش كمان ليه بقى ، ازاى

عبده : تعالا معايا وانا افهمك فى السكه ونعدى ناخد مرتضى معانا

وفى الطريق الى اللحمه ام بلاش

سنوسى : انا مش فاهم منك حاجه يا عبده انت بتقول ايه بالضبط

مرتضى : بص يا سنوسى احنا هانقدم لكل واحد فينا طلب والطلب بخمسه كيلو يبقى هناخد 15 كيلو انا وانت كل واحد اتنين كيلو وعبده

11 كيلو عشان هوا اللى جايبنا اصلا ..فهمت

سنوسى : يا سيدى انا بعرف احسب كويس انا بس مش فاهم هما هايدونا اللحمه ببلاش ليه لله يعنى ،، زكة مثلا

عبده : ييييييييه دا انت نيله قوى ما قولنا بعد ما ناخد اللحمه هانقف قدام الجمعيه ونهتف كام هتاف وخلاص صعبه دى.

سنوسى : يعنى نهتف بخمستاشر كيلو لحمه . امال لو خدنا كاس العالم هيدونا ايه كل واحد عجل.

مرتضى : ياجدع كاس عالم ايه بس دى جمعية للشباب سياسة يعنى

سنوسى : خلاص مش عاوز افهم المهم اللحمه.

=====================================

بعد اسبوع فى المكتب

يدخل الساعى متجها لسنوسى ويسلمه جواب ينى اللون

يأخذ سنوسى الجواب ويفتحه.

ايه ده . ايه يجب الحضور امام مقر الجمعيه غدا الساعه الرابعه مساءا لوجود زياره هامه

وايه ده كمان كارنيه ،، جمعيه الشباب العضو ( مشجع ) درجه اولى

يا حلاوه بقى معايا كارنيه ابقى اسأل عبده هو هايفهمنى

بعد الشغل فى القهوه

سنوسى : قوللى ياعبده ايه حكاية الكارنيه ده

عبده : يا ابن الايه ، يخرب مطنك ودرجه اولى كمان من اول مره

سنوسى بقلاطه : هو انت معاك كارنيه زيى

عبده : ايوه بس درجه تانيه ، طبعا باعم مانت قعدت تهتف بحرقه المره اللى فاتت ولا نسيت جمعية الشباب احلى م الكباب

سنوسى ضاحكا : اصل الفرحه باللحمه ماكانتش سايعانى ولا فاكر

او او جمعيه .هاهاها

عبده : ماشيا معاك ياعم

سنوسى : وفيه لحمه المره دى كمان

عبده : لأ اللحمه ايام الانتخابات وتقديم طلبات الاشتراك بس

سنوسى : اه ه ،،الا قوللى ياعبده هو الكارنيه ده ينفع ف حاجه

عبده : طبعااااااااااا ،، الدرجه الاولى يعنى تركب مواصلات ببلاش كل يوم ماعدا الجمعه اما التانيه تركب ببلاش ايام الهتافات بس

سنوسى : يا سلام الله الله ع الجمعيه ياسلام يا سلام ع الجمعيه

==================================

الساعه الرابعه امام الجمعيه يصل سنوسى متأخرا قليلا ويجد حشد من الهتيفه يرددون بقوه ويقف وسطهم عبده

الله الله ع الجمعيه ياسلام ياسلام ع الجمعيه

[Cleo]

برافوووووووووووووووو............ حلوة جدااااااااااااااااا......... :lol:

[هشام عبد الوهاب]

سنكوح لنفسه : كده ياعبده بتلطش الهتاف بتاعى طييييب استنى عليا .

يدخل سنكوح وسط الجماهير ويردد بصوت عالى

يارئيس الجمعية يا أحلى رئيس من غيرك نبقى شوية بلاليص

وهوب يردد كل الجمهور الهتاف ويحملون سنكوح على اكتافهم وهو يردد ياحبيبنا ياحبيب الكل ابن الجمعية زى الفل .

تانى يوم فى المكتب

سنكوح : ياستى هاتى مستخرج من شهادة الميلاد وتعالى بكره .يالا ياماما

يدخل الفراش وهو يحمل ظرف كبير بنى اللون متوجها لسنكوح .

اتفضل يا سى سنوسى واحد افندى باعتلك الظرف ده .

سنوسى : تسلم يا عسل .

فتح سنوسى الظرف ووجد بداخله ورقة فلوسكاب عليها شعار الجمعية ومكتوب فيها .

يرجى الحضور لمقر الجمعية فى السابعة مساء اليوم مع

الأهتمام بالمظهر ( يعنى تستحمى وتلبس نضيف )

---------

ايه ده استحمى والبس نضيف ليه هو فيه ايه .

سنكوح فى الحمام اللى جنب الأوضه تحت الدش .

اما غريبه دى اشمعنى مقر الجمعيه مش امام الجمعيه .ممممم اسأل عبده ، لأ بعد الحركه القرعة بتاعت اخر مره ولا هاعبره .

صوت خبط على الباب

يالا ياسى سنوسى البت عاوزة تدخل بقالها ساعة .

سنوسى : حاضر ياام سيد خارج اهو .

باب الجمعية .

سنوسى :سلاموا عليكم

الحارس: وعليكم السلام .. نعم

سنوسى: انا معايا جواب علشان الحضور الساعة سبعة

الحارس: اول مكتب على اليمين

فى المكتب

سنوسى : سلاموا عليكم . انا جاى بخصوص

الموظف : اهلا اهلا ... تشرب ايه

سنوسى لنفسه ، اشرب هو ايه الموضوع يكونش فاكرنى واحد تانى ، يمكن بعد مااستحميت

سنوسى: يا فندم انا جالى جواب علشان احضر الساعة سب....

الموظف : ايوه يا سيدى انا عارفك طبعا ..بس تعرف انا عجبنى اوى

ياسلام ياسلام جمعيه ولا ف الأحلام هاهاهاهاها

سنوسى لنفسه وهو يضحك . يا أما الراجل د اهبل يا انا اللى عبيط

الموظف : تشرب ايه بقى عندنا مغات ممتاااااااااااز

سنوسى : مغات

الموظف : اااااااه يبقى عاوز حاجه ساقعه .. يا مرضى هات واحد خروب للأستاذ بسرعة.

الموظف يشرب الخروب مع سنكوح : شوف يا استاذ سنوسى انت لفت نظر اعضاء مجلس الأدارة وقرروا يعينوك معانا فى الجمعيه هنا

سنكوح : انا

الموظف : ايوه ياسيدى ..هاهاهاها.. مين قدك هاهاها..بس ابقى افتكرنا بقى

سنكوح : انا

الموظف : هاهاهاها .. ايه رأيك بقى اظن مفاجئة ظريفة قوى هاهاها

سنكوح : يعنى سعادتك قصدك انى اعمل ايه يييييه لامؤاخذه مش فاهم حاجه

الموظف : ماتصحصح معايا ياسونسون .. بقولك هاتتعين فى الجمعية بمرتب شهرى 400 جنيه دا غير البدالات والذى منه

سنكوح احولت عنيه : طيب ممكن واحد مغات تقيل لوسمحت

مكتب عضو مجلس الأدارة.

اهلا يا يااستاذ سنوسى اتفضل .. شربت مغات ولا لسه

سنوسى وهو يتعلثم : شربت يافندم

العضو : مبروك ياسيدى الف مبروك

سنوسى: الله يبارك ف سعادتك

العضو : شوف ياسنوسى الشغلانه اللى عيناك فيها سهله قوىىىىىىى وصعبه جداااااااا

سنوسى : لا مؤاخذه سيادتك مش فاهم

العضو : سهله قوىىىىىىى لأنك اثبت جدارتك فيها امبارح

زى مثلا (يهتف) بص شوف الجمعيه بتعمل ايه ..هاهاها كانت ممتااااازه

وصعبه لأننا عاوزين الهتافات تعبر عن رضا الجمهور باللى بتحققه الجمعيه و طبعااااااا ، انت هاتفهم اكتر لما تعرف اهدافنا النبيلة

سنوسى : يافندم موضوع الهتافات ده بيطلع لوحده كده من غير تفكير .. طيب سعادتك والسجل اللى بشتغل فيه.

العضو : سجل ايه ياراجل انت تقدم على اجازة مفتوحة وطبعاااااااا معانا هناك فرق هاهاهاه . هما عملولك مرتب كام

سنوسى :400 جنيه سعادتك

العضو : لأ ... لأ لأ لأ ... شويه عليك نخليهملك 500 جنية من غير البدالات والذى منه .

سنوسى : موافق سعادتك اعتبرنى قدمت استقالتى م السجل

العضو : هاهاهاهاها ايوه كده يا سونسون.

[الطفشان]

حلوة قوي يا هشام

و معبرة جدا

انا لا اقرأ المطولات الا نادرا

بس المرة دي كانت تستاهل

هي جمعية الشباب دي، مش دي بتاعة اسمه ايه بتاع جمعية المستقبل؟

[optimistic]

ظريفة يا هشام و الله

المهم أرجو ألا أفاجأ بسنوسي عضوا في مجلس الشعب بكرة

تحياتي ... ننتظر البقية

[هشام عبد الوهاب]

هي جمعية الشباب دي، مش دي بتاعة اسمه ايه بتاع جمعية المستقبل؟

لأ يابيه ...ماتودناش ف داهيه .

المهم أرجو ألا أفاجأ بسنوسي عضوا في مجلس الشعب بكرة

كده تبقى قصه هندى وقديمه ...

[هشام عبد الوهاب]

سنوسى : متشكرين يارجاله ..مع الف سلامة

يغلق باب الشقة ... ياسلام اخيرا بقى عندى شقة بدل الأوضة المنيلة ..انا عاوز اقعد فى الحمام يجيى اسبوع ..

منصور: الف مبروك يا استاذ سنوسى .. عقبال العربية والعروسة

سنوسى : الله يبارك فيك ..طيب تتكل على الله انت بقى .. انا عاوز استحمى قد عشر مرات كده .

منصور :هاهاهاها ... ماشى ياسيدى استحمى براحتك .. يلاموا عليكم .

----------------------------------------------

مقر الجمعية صباح اليوم التالى .

سنوسى : يا عم رأفت .. هو الشغل نايم ليه اليومين دول

رأفت : ماهو الشغل هنا كده يابنى .. شوية نايم وشوية ماتلحقش تدخل دورة الميه .

سنوسى : طب هو لما بينام بيبقى ايه السبب يعنى

رأفت : يا استاذ سنوسى .د انت سيد العارفين .. لما البهوات الكبار بيسافروا ..كله بيريح .

سنوسى : وهما دلوقتى مسافرين فين .

رأفت : العلم عند الله يابنى .. أعملك مغات

سنوسى : لأ لأ .. ايه الملل ده .. امال الأستاذ سعيد فين .

رأفت : فى مكتبه

سنوسى: اقوم اروحله .

----------------------------------

سنوسى : صباح الفل يا استاذ سعيد

سعيد : اهلا اهلا بسونسون

سنوسى: الا الواحد بقاله يجيى ست اشهر كده ماشتغل غير كام مرة يعنى

سعيد : ماتستعجلش .. الأسبوع الجاى مش هاتلاحق ع الشغل ..ماهو الموسم هايبدأ .

سنوسى : موسم ايه

سعيد : اجتماعات وزيارات والذى منه . طب د انا كنت لسه هابعتلك عشان توضب نفسك .

شوف ياسيدى الكام ورقة دول فيهم شوية اسماء .مطلوب منك تجهز كام هتاف م الجامدين بتوعك ليهم وتظبط الفرقة بتاعتك عشان الشغل هايهجم ..هاهاهاها

سنوسى : ماشى انا اخدم بعنيا .. انما الملفات الكتير قوى اللى فى مكتب حضرتك دول بتوع ايه

سعيد : هاهاها ... بتوع الشغل طبعا

سنوسى: ايوه يعنى .. هو الشغل ده ايه بالضبط .. تشجيع برضه .

سعيد : هاهاها .. تشجيع ايه ياراجل ..انت بتاع التشجيع كله .دى ملفات الشغل التانى

سنوسى : ايوه يعنى شغل تانى اللى هو ايه بالضبط

سعيد : وبعدين معاك بقى .. خليك فى شغلك وبس ماتسألش كتير .

اتفضل على مكتبك وشوف شغلك .

سنوسى : الله انت زعلت ولا ايه انا ماقصدش

سعيد :ولا زعلت ولا حاجه ..اتفضل بقى ماتعطلنيش

سنوسى لنفسه على مكتبه ... ايه حكاية الملفات دى والجدع بتاع سونسون ده وش قلب ليه لما سألته عليهم ... لأ بقى ..ما انا لازم اعرف ومبقاش سنوسى ان ماعرفت .

[هشام عبد الوهاب]

سنوسى فى القهوة .

سنوسى : يا نبيه انا مش فاهم حاجه .

نبيه : وانت شاغل بالك قوى كده ليه

سنوسى : ماهى حاجة تجنن ، المكتب بتاع سعيد فيه يطلع الفين دوسيه وزياده ، والرجال اول ماسألته عليهم وش بقى شبه السحلية .

نبيه : يخرب عقلك ، سحلية ... يابنى مش قالك بتوع الشغل

سنوسى: شغل ايه ياعمنا ، ده احنا ابيض ، اللى يشوف الملفات يفتكرها وزارة القوى العاملة .

وبعدين انا عاوز افهم وبس . الهبابه اللى انا شغال فيها دى بتعمل ايه بالضبط . طب تصدق بالله

نبيه : لا الاه الا الله .

سنوسى :كل ما اسأل حد فى الجمعيه عن نوع الشغل ولا الجمعية بتعمل ايه بالضبط يقوللى تشرب مغات لما الواحد معدته قفشت .

نبيه : يا جدع افهم بقى ...عمال اقولك م الصبح ، الجمعية دى حسب مابيتكب فى الصحافة يعنى . معمولة لتطوير الكوادر الحزبية فى العمل السياسى .

سنوسى: ياسيدى مانا حفظت الحته دى خلاص ، يعنى معنى كده ان اللى بيشتغلوا فى الأحزاب بتاخدهم الجمعية وتعلمهم احسن عشان يتطوروا ولا ايه .

نبيه : يييييييييييه احنا هانقول تانى انا زهقت ...اهو حاجة زى كده

سنوسى: على كده بقى انا بشتغل فى السياسة ..(يمصمص شفايفه ) يا حلاوة .

( يدخل القهوجى)

تشربوا حاجه تانيه

سنوسى: ماعندكوش حاجه جديده يابنى

القهوجى: طبعا يا استاذ سنوسى المعلم بيجدد على طول

سنوسى: حلو .. زى ايه بقى

القهوجى: مغات .

- - - - - - - - - - - - - - - - - - - - - - -

الجمعية .

يدخل سنوسى متأخر ويقابله الفراش

رأفت الفراش: صباح الخير يا استاذ سنوسى اتأخرت ليه بس

سنوسى: ياسلام .. ليه يعنى ايه اللى حصل

رأفت : البيه عضو المجلس هنا م النجمة وسأل عليك . روحله المكتب بسرعة

سنوسى : طيب اعملى شاى عبال م ارجع

- - - - - - - - - - - - - - - - - - - - - - -

فى مكتب عضو المجلس .

سنوسى : صباح الخير ياباشا.

عضو المجلس : انت فين يا استاذ ..ناموسيتك كحلى ولا ايه .

سنوسى :معلش ياباشا .اسف .اصل

العضو : خلاص خلاص المهم .

سنوسى :أأمر سعادتك

العضو : اسمع ياسنوسى انا بثقك فيك جدا . انت راجل محترم وذكى ومخخخخلص

سنوسى : الله يكرمك ياباشا

العضو: بكرة الساعة سبعة عندنا اجتماع لأعضاء لجنة القرارات و الاجتماع ده بنقرر فيه شوية حاجات خاصة بالشغل زى الميزانية وجدول الأعمال وسير العمل .

وطبعا انت دلوقتى عندك خبرة كبيرة ، يعنى اكيد عرفت الجمهور بتاعنا عاوز ايه وايه اللى عاجبه وايه اللى مش عاجبه .

سنوسى : معلش سيادتك مش فاهم قصدك بالضبط

العضو : يعنى لما بتهتف هتاف معين للجمعية مثلا رد فعل الناس اللى بتتفرج ايه ولما بتهتف لشخصية م الشخصيات الناس بتقبلها ولا لأ .. مهم جدا بالنسبه لنا نعرف نبض الشارع .

سنوسى : طبعا سيادتك باخد بالى م الحاجت دى .

العضو : كووووووويس ..انت كده فهمتنى ... بكرة قبل الأجتماع بساعة تكون كتبتلى تقرير بكل الحاجات اللى اخدت بالك منها واللى ماخدتش بالك منها كمان ،، اتفقنا

سنوسى : حاضر ياباشا الساعة ستة بالضبط التقرير هايكون جاهز .

العضو : يالا شد حيلك ..عاوز همه ..نشاط ..حيوية ..صحصحة .

روح اشرب المغات بتاعك عشان تركز ونتقابل بكره .

[هشام عبد الوهاب]

سنوسى لنفسه: تقرير ايه بس .. الجدع العضو ده باين عليه عبيط ،، يعنى اكتب فى التقرير الجمهور كل اللى يهمه اللحمه ... افففففف

---------

الساعة السادسة موعد تقديم التقرير ...

سنوسى : ياعم رأفت خد التقرير ده وصله للباشا .

عم رأفت : حاضر .

----------

داخل اجتماع اللجنة .

عضو1: يا سادة الوضع الحالى سئ جدا ولابد من اتخاذ اجراءات جديدة تعيد وضعنا الى ماكان عليه واقترح ان يكون هذا الأمر هو هدفنا الأول فلتتفضلو بطرح اقتراحاتكم فى هذا الصدد

عضو2: اعتقد ان اليات الجمعية تسمح بالمرونة فى اتخاذ قرارات جديدة او الرجوع عن قرارات قديمة ولذلك يمكن اتخاذ ما يمكن اتخاذه

عضو مهم :فلتسمحو لى بان اقترح عدة اقتراحات ...

اولا :

الدور الأعلامى الخاص بكسب الجماهير يمكن زيادة فاعليته عن طريق انشاء ادارة مستقلة له تحتوى على مبنى خاص وتعيين رئيسا لهذه الأدارة ومنحه صلاحيات واسعة . هااااا موافقين طبعا

الكل يهتف :طبعا

ثانيا:

تجديد مطالبة الحكومة بمد العمل بقانون الطوارئ عشرة سنوات اخرى وذلك لمصلحتنا جميعا هنا ..همممم موافقين طبعا

الكل يهتف :طبعا

ثالثا:

زيادة تفعيل موارد الجمعية اقتصاديا بتعيين عدد جديد من الموظفين بطريقة المرتبات والبدالات اياها .

ينظر للاعضاء من تحت النضارة

الكل يهتف: طبعا

عضو المجلس:

فليسمح لى السادة الأعضاء بقراءة تقرير مسئول الدعاية فى الجمعية

يفتح ظرف سنوسى ويقرأ

جميع اعضاء الجمعية يحبهم الجمهور ...

ملحوظة .. كمية اللحمة لها دور اساسى فى هذا الحب .

انتهى التقرير

الأعضاء يصفقون .

العضو المهم : مممم يظهر ان مسئول الدعاية ده عنده بعد نظر .. ايه رأيكم نعينه نائب رئيس ادارة الاعلام ... هاااااااااا

الكل يهتف : طبعا

---------

الثامنة مساءا

سنوسى: الا قوللى ياعم رأفت هما الجماعه اللى جوه دول كلهم من كبارات البلد

عم رأفت: ايه يا بنى هو انت مابتقراش جرايد

سنوسى: يعنى على خفيف كده

عم رأفت: لا حول الله ..طبعا يابنى من الكبارات قوى ..عندك العضو المهم مثلا ده ماسك... صوت من الخارج ينده يارأفت

عم رأفت : بعد اذنك ياستوسى يابنى اشوف فيه ايه .

-------

فى مكتب عضو المجلس

عضو المجلس: ها ها ها .. برافو ياسنوسى تقرير وافى ومشفى هاها اقصد شافى.

سنوسى: معلش ياباشا انا كتبت الحقيقة يعنى

عضو المجلس : مبروك ياسيدى .. كام شهر وتبقى نائب رئيس لجنة الأعلام .

سنوسى : بجد ياباشا ... انا .. معقول

عضو المجلس : هاهاها ... ايوه انت .. عاوزك تهتم بمظهرك اكتر وتشتريلك كام بدلة على كام قميص ... هاهاها ماتقلقش هانزودلك المرتب ... يالا يابطل جهز نفسك