الاسلام هو الحل

[Mena0064]

الأخ هادى، أنا مصرى أولا و أخيرا أبا عن جد، و كما هو واضح من إسمى فأنا أيضا مسيحى الديانة. تشرفت بمعرفتك و أى خدمة.

الحقيقة الأخ ماركيز و الأخ مفروس قالوا كل الكلام اللى عايز أقولة.

أوعى تفتكر إنى ضد الإخوان فقط لأنى مسيحى، بالعكس إذا كان الإخوان هيمشوا على نظام تركيا أو ماليزيا فأنا أول من ينتخبهم بس إنت أكيد عارف إن الدول دى أينعم مسلمة الأغلبية لكنها ماشية على قوانين علمانية و يتساوى فيها المسلم مع غيرة أمام القانون بدون أدنى تفرقة و أنا عمرى ما سمعت الإخوان بيقولوا مثل هذا الكلام بجدية و يتصرفوا بناء علية.

فإذا ما كانش إسلام الإخوان هو إسلام تركيا أو إسلام ماليزيا بصراحة كدة أنا لا أتمنى لبلدى الخيارات الأخرى.

الأخ دكتور ضياء، بس حبيت أعلق على جملنك

"الإسلام أكبر من أن يقبع فى الجامع"

أنا معاك فى دى، الإسلام مكانة فى الجامع و فى قلبك و عقلك و تصرفاتك اليومية كمان، لكن دة مش معناة إن الدولة لازم تشريعتها تكون من الإسلام. هل إنت شايف إن لا يمكن تكون مسلم كويس فى مجتمع علمانى شرقى متحفظ يضمن لك حريتك و حقوقك أنت و الآخرين؟ خلينا نبص على أرض الواقع و قوللى كدة أى دول فى العالم يتمتع فيها المسلم - مهما كان مذهبة أو فكرة- بحرية أكبر؟ هتلاقيها الدول العلمانية و هتلاقى المسلمين نفسهم يتركوا بلادهم و يفضلوا يكونوا أقلية فى هذة البلاد. حتى الإخوان يلجأوا لهذة البلاد هربا من بطش الحكومة.

[shawshank]

الأخ  دكتور ضياء، بس حبيت أعلق على جملنك

"الإسلام أكبر من أن يقبع فى الجامع"

أنا معاك فى دى، الإسلام مكانة فى الجامع و فى قلبك و عقلك و تصرفاتك اليومية كمان، لكن دة مش معناة إن الدولة لازم تشريعتها تكون من الإسلام

<{POST_SNAPBACK}>

لا

معناه إن الدولة لازم تشريعاتها تكون من الإسلام.

اقرأ معي قول الله عز و جل: "و من لم يحكم بما أنزل الله فأولئك هم الظالمون"

و قوله: "و من لم يحكم بما أنزل الله فأولئك هم الفاسقون"

و قوله: "و من لم يحكم بما أنزل الله فأولئك هم الكافرون"

الإسلام معناه أن يكون في المسجد و في قلبي و عقلي و تصرفاتي اليومية و في حكم الدولة.

خد الحالات دي - فقط كأمثلة و ليست للحصر - على التناقض اللي يحصل لو الإسلام في المسجد و في قلبي و عقلي و تصرفاتي اليومية و مش في حكم الدولة:

1. دولة علمانية منعت الحجاب و جعلته جنحة. و أنا عايز الإسلام يكون في المسجد و في قلبي و عقلي و تصرفاتي اليومية. أعمل ايه في بنتي اللي الإسلام بيقللي حجبها ؟

2. دولة علمانية تجعل نصيب الذكر مثل نصيب الأنثى في الميراث. و أنا عايز الإسلام يكون في المسجد و في قلبي و عقلي و تصرفاتي اليومية. أعمل ايه لما أبويا يموت و تتقسم التركة بمعرفة الدولة ؟

3. دولة علمانية تحدد قواعد لحضانة الأبناء بعد الطلاق غير شرع الله. و أنا عايز الإسلام يكون في المسجد و في قلبي و عقلي و تصرفاتي اليومية. أعمل ايه في أولادي لما أطلق مراتي ؟

4. دولة علمانية حرمت تعدد الزوجات. و أنا عايز الإسلام يكون في المسجد و في قلبي و عقلي و تصرفاتي اليومية. أعمل ايه اذا كنت عايز اتجوز أربعة ؟

5. دولة علمانية أعطت للأنثى حرية تزويج نفسها بدون ولي إذا وصلت سن 18 سنة. و أنا عايز الإسلام يكون في المسجد و في قلبي و عقلي و تصرفاتي اليومية. أعمل ايه في بنتي اللي هتسبني و تروح تتجوز من ورايا بدون ولي ؟

المقصود: أن مبدأ "الحكم بالاتفاق" - يعني اللي نتفق عليه يكون هوه شرعنا - مرفوض. المطلوب أن يكون شرع الدولة هو شرع الله عز و جل.

خلينا نبص على أرض الواقع و قوللى كدة أى دول فى العالم يتمتع فيها المسلم - مهما كان مذهبة أو فكرة- بحرية أكبر؟ هتلاقيها الدول العلمانية و هتلاقى المسلمين نفسهم يتركوا بلادهم و يفضلوا يكونوا أقلية فى هذة البلاد. حتى الإخوان يلجأوا لهذة البلاد هربا من بطش الحكومة.

<{POST_SNAPBACK}>

لو كانت بلادهم تحكم بما أنزل الله لما تركوها.

و رغم ذلك ، فأنا في أمريكا و لا أرى أنني اتمتع هنا بحرية أكبر عشان الإسلام يكون في المسجد و في قلبي و عقلي و تصرفاتي اليومية.

تم تعديل 17 نوفمبر 2005 بواسطة shawshank

[shawshank]

الآن ...

ما الذي يضيرك من أن تكون تشريعات الدولة من الإسلام ؟

[مفروس]

اخواني صباح الفل...

الأخ ماركيز....شكرا على الموجز الموثق الجميل...

متهيألي مش محتاجين نفكر الناس بأكتر من اللي قلته...أغلب اللي بيقرؤا المنتدى هنا عاشوا أغلبية القصص و التفاصيل دي و عاصروها...يعني دا مش تاريخ غابر...دي أحداث احنا عايشين نتايجها دلوقتي...

د.ألفا...معاك ميه الميه

الأخ هانديكرافت...ما جاتش على زراعة المخدرات اللي فيها قولان...ايه رأيك في الباقي؟؟؟

العزيز د.ضياء....اسمح لي ارد عليك:

أولا أنا ما باقولش ان جميع أعضاء الجماعة سييئين ووحشين ...بالعكس نسبة كبيرة منهم داخلينها حبا في الله وواخدين الموضوع جد...بس هم دول ملح الأرض يا صديقي...و بيعملوا أعمال خير و ليهم من الشباب بالذات مجهودات كبيرة...

و منظمين جدا زي الجيش...

و ليهم رتب و درجات بيتعاملوا مع بعض باحترام و حدود..

أناا باتكلم عن الكبار...اللي بيستخدموا الموضوع ده في السياسة...و حياتهم الخاصة و توجهاتهم الخاصة غير ما بيظهروا تماما...

يعني مثلا ما شفتش الزعيم الاخواني الكبير و هو بيجوز ابنه من بنت عادل امام طلب منهم يبقى حفل الزواج اسلامي بدون اختلاط...بالعكس...العروسة كانت لابسة عريان عادي جدا و الموسيقى المحرمة صدحت و الراقصات العاهرات رقصوا و الكاسيات العاريات لعلطوا و الخمر المحرمة اتشربت و عادى...و ابو العريس كانت ابتسامته هو والحاجة مراته 3 متر في الصور اللي غرقت مجلات الموعد و الشبكة و غيرهم... هل ده هو الزعيم الاسلامي اللي انت عايزه؟؟

أحكيلك بدون ذكر أسامي و ربنا شاهد على صدقي عن زوجه أحد كبارهم...بس كبارهم جدا...لدرجة ان الاخوة و الأخوات بيطلقوا عليها لقب أم المؤمنين...و لدرء الشبهة هو مش المرشد العام بس أحد كبار رجاله...

و بيبوسوا ايدها لما بيشوفوها و بيتعطي دروس دينية في بيتها و بيوت الأخوات لأنها ست بركة...

بنتها اتجوزت من ابناء أحد الاخوان...

وكان بيدرس للدكتوراة بالخارج...

حكمت عليه ان مراته ترجع مصر غصب عنه و منعت أبو و أمه الاخوان برضه من انهم يشوفوا حفيدهم حتى في الأعياد الى أن يرجع الزوج من المانيا...و كانت الجدة الأخرى تبكي بالدموع لتعنت ام المؤمنين معها...ولكن لا مجيب..

طبعا في الدروس بتعطى نصائح أخرى تماما للزوجات عن طاعة الزوج و صلة الرحم...

قربي من الناس دول تعبلي أعصابي يا صديقي...

لو عايز قصص اخرى ممكن احكبلك و الله على ما أقول شهيد...

و بعدين يا صديقي ايه فرقهم عن غيرهم لما يكون مبدا التقية و الغاية تبرر الوسيلة هو اسلوبهم...

مش هم بياخدوا على الشيعه هداهم الله كما تقول انهم بيتقوا؟؟؟

و كون أن الاخوان أعلنوا أي حاجة في وسائل الاعلان ما يخليهاش حقيقة!!!

ما هم كل يوم برأي و على طريقة!!!

و بالنسبة للشيعه يا صديقي فهم برضة أقلية في مصر...

و كالأقليات الأخرى و حتى كالأغلبية مضطهدة في بلدها..

بس انت مش عارف مبدأ تصدير الثورة الايراني؟؟؟

و مشكلة الشيعة انهم زي البهائيين و البهرة و الاسماعيلية اللي عايشين بيننا على انهم مسلمين سنه و ما نقدرش نحدد كمياتهم و أعدادهم الحقيقية...

بس بعد كل أنا مش باتهم أي حد بأي حاجة...المشكلة ان حكوماتنا الرشيدة نجحت في انها تقسم و تفتت القومية المصرية لأقليات بتكره بعض و بتخاف من بعض و حقيقي أنا شايف ان من حقها تدافع عن نفسها ووجودها بأي طريقة...

وهو ده يا صديقي اللي بيخوفني من موضوع الحكومات الدينيه و الدول الدينيه...

مش حيبقى فيه انتماء لوحدة قوميه...

حيبقى فيه انتماء لوحدات عرقية و دينية و اثنية...

حيبقى المسيحي اليوناني و الأمريكي حتى أقرب للمسيحي المصري من المسلم المصري...

و الايراني أقرب للشيعي..

و الاسرائيلي أقرب للبهائي...

و حيفضل المسلم المصري موحود و مكروه من الكويتي و السعودى و الأفغاني ووووووووو

ليه ما يبقاش الموضوع انتماء لمصر...

ليه بقى عيب و حرام؟؟؟

ابقى مصري مسلم عايش مع المصري المسيحي و البهائي و اليهودي و الملحد حتى...

و نلغى حتى خانه الديانه من البطاقة و البسبور...

كلنا مصريين...

مش فاهم ايه الفرق قدام ظابط الشرطة أو موظف حكومة ان يقرأ في بطاقتي ان كنت مسيحي أو مسلم وهو بيخلصلي معاملتي؟؟

لسه و أنا باكتب توكيل أو بابيع أو اشتري عربية أو بيت لازم أكتب الديانه؟؟

ليه الخط الهمايوني؟؟

ليه الشيعي و البهائي و الملحد حتى لازم يتخفوا وراء اسم المسلم؟؟

أيوه الاسلام مش مكانه بس الجامع...

الاسلام مكانه احنا...في تصرفاتنا و كل خطوة في حياتنا...

زي ما المسيحية لازم تظهر في المسيحي...

انا قصدى ان الاسلام مش لازم يتسيس...

نستخدم روحه في السياسة...ما نستخدموش للأغراض سياسية

الموضوع كبير أوي وذو شجن و أنا طولت عليكم قوي قوي

و السلالالالالالالالالالالالالالالالالالام

[dr/alfa]

كتب الاخ الفاضل شواشانك :

كما قلت من قبل ، و كما أوضح الأخ هادي ، هو إسلام واحد و فيه مجال للخلاف ، لكن الخلاف المعتبر بالأدلة من مصادر التشريع. لذلك لم يقولوا: إسلام الإخوان هو الحل. إنما قالوا: الإسلام هو الحل. لكونه إسلاما واحدا. و لأننا لم نصل بعد لوجود مرشحين يتبعون منهج الإسلام في برامجهم ، فكان الإخوان هم أصحاب هذا الشعار العام. فلو ظهر مرشحون آخرون ينوون اتباع منهج الإسلام ، لوجدنا شعارات تحمل أسماء مدارس فقهية مثلا. أو أي وسيلة أخرى نفهم منها قدر اختلافهم عن غيرهم تحت عباءة الإسلام.

نعم اخى الفاضل هو اسلام واحد ولكن بمفاهيم مختلفة ومتدرجة قربا وبعدا عن الصواب .

وعندما قال الاخوان مقولتهم ((( الاسلام هو الحل ))) من الطبيعي أنهم يقصدون اسلامهم الخاص -لا تفهمني خطأ- أقصد مفهومهم الخاص للاسلام هذا هو ما عنوه من قولتهم.وليس اسلام الوهابية كما يحلو للبعض تسميتها وليس

فعندما أقول 00 (الاسلام هو الحل ) 0000 سوف يتبادر الى ذهن سامعي-فورا- انني أقصد فهم الاخوان للاسلام لا فهم السلفيين مثلا أو الصوفييون او العلمانيون .

ولا يمكن أن يكون مفهوم الاخوان للاسلام هو المفهوم الصحيح الخالص من الشوائب, ولو من وجهة نظر الفقير الى الله , لان فى ذلك غبن وظلم لكثير من أهل الاسلام الذين لا ينتمون الى جماعة الاخوان , وهذه الشريحة هى الأغلب والأعم التى لا تفقه شيئا عن فقه الاخوان ولا فهمهم الخاص للاسلام , الذين يفهمون الاسلام على أنه قال الله وقال الرسول وقال الأئمة ولم يقرأوا شيئا للامام حسن البنا ولا يعلمون شيئا عن اصوله العشرين ولا عن تعاليم الجماعة .

لأن لسان حال كثير من الاخوان -للأسف- يقول (( انت معانا واللا مع الناس التانيين)) وإن كانوا يدعون غير ذلك .

وكما عرض علينا أحد الاخوة تعريفا لكثير من المفاهيم الانسانية التى تعاملت مع الاسلام وفهمته بمنطقها الخاص , كتركيا مثلا صاحبة العلمانية الاولى وايران صاحبة الثورة الاسلامية , والسعودية صاحبة الدعوة السلفية والجزائر صاحبة التعريف الاسلامى المسلح وطالبان السلفية .

ولا أستطيع ان أجزم أن أحداها هو الصحيح على الاطلاق .

وإن كنت استطيع ان أجزم مثلا ان المفهوم الاسلامي لتركيا هو الضلال بعينه كونهم يفصلون الدين عن الدولة تمام الفصل وينتهجون منهجا علمانيا جلدا بل أكثر مما يحدث فى أمريكا وكندا .

حتى إن المرأة الموظفة أو الطالبة الجامعية لا تستطيع ان تلبس ثيابها الاسلامية وحجابها داخل الحرم الوظيفى او الجامعي ,

فى حين ان بيوت الدعارة هناك لها تراخيص كما كان موجودا فى مصر فى فترة من فتراتها .

نقلا عن موقع الاسلام اون لاين :- والحديث عن تركيا

((((الجدير بالذكر أن الحكومة الائتلافية الحالية بزعامة الحزب اليساري الديمقراطي (DSP) قد أصدرت قرارات ولوائح صارمة منعت من خلالها دخول وقيد الطالبات المحجبات في الكليات والجامعات التركية، واشترطت على كل فتاة تريد القيد أو الاستمرار في تعليمها العالي، أن تتخلى عن حجابها مهما كان شكله ووصفه ))))

ونقلا عن نفس المصدر :-

((((المعروف أن القوانين العلمانية التركية تسمح ببيوت رسمية لممارسة البغاء مقابل المال في كل مدينة ومحافظة تركية )))

((( وقد تعرّض/ مليح جوكشة رئيس بلدية العاصمة أنقرة (من حزب الفضيلة) لحملة إعلامية سلبية ضده في شهر يوليو الماضي، بسبب مطالبته بإغلاق بيوت الدعارة الرسمية في أنقرة؛ لأن ممارسة البغاء ليست ممنوعة في القانون التركي العلماني، ولكن ممارسة البغاء دون إذن رسمي هي الممنوعة بحجة التهرّب من دفع الضرائب أو حمل الأمراض المعدية.))))

انظروا لهذه العلمانية المقيتة التي يتكلم عنهاالبعض -منهم الاخوان- ويقول ان التجربة التركية تجربة رائدة فى العالم الاسلامى ويجب أن تتخذها الاتجاهات الاسلامية كمنهجا ودليلا ومرشدا للوصول الى سدة الحكم , بطريقة ديموقراطية مقبولة من قبل الغرب .

.

[هادي]

الفاضل (مفروس)

الحقيقة أنك كنت موفق جداً في اختيار الاسم الذي تدخل به في المنتدى

فهو يعبر عن حالة شعورية موافقة تماماً لكتاباتك

ولكن ..

يستوقفني هنا ..

ان الـ(مفروس) يكون بعيد كل البعد عن الموضوعية والحيدة

فهو يمر بحالة غضب مستمر وغليان ورغبة جامحة في قلب الاوضاع

الأمر الذي يخرج بالمرء عن القرارات السليمة التي تحتاج إلى هدوء وسلام نفسي

وهذا ما جعلني الاحظ

ان كتاباتك – من الزاوية التاريخية – بعيدة كل البعد عن أي حقائق نعرفها

لذلك سألتك هل أنت من مصر ، وتعيش فيها ؟

وسؤالي كان للتأكد من ذلك

وحيث أنك – مشكور – قد عرفتنا بتاريخك العائلي

وأشكرك على هذه الثقة الغالية

فقد زادت قناعاتي أن ما تكتبه – من الزاوي التاريخية دعني أكرر-

يشوبه الكثير والكثير من الخلط الرهيب

ومثال ذلك

ماجاء في مداخلتك (12) في قولك :

ساندوا محمد نجيب و باعوه لعبد الناصر لما لقوه هوه صاحب السلطة الحقيقيةفهل لديك دليل من نقل أو عقل أن الاخوان باعوا نجيب !!

وباعوه لمن ؟! لعبد الناصر ..

فهل تدلني من منهم فعل ذلك بالتحديد ؟

ومثال آخر:

لما لم يحقق لهم ما أرادوا قتلوه – المقصود هو السادات

فهل لديك من دليل

أن عطا طايل-خالد الاسلامبولي-عبد السلام فرج وغيرهم من جماعة الاخوان ؟

لانك عدت وذكرت في مداخلتك رقم (16) ما يلي :-

أنا مش محتاج أوثق حاجة لأني مش باعمل بحث تاريخي هنا...

انا باذكر مجرد بعض الأحداث اللي كلنا كمصريين عارفينها...

بالتأكيد محتاج توثق يا استاذ مفروس

وإلا يبقى اطلاق للكلام على عواهنه

ويبقى النقاش لا داعي له ولا طائل من وراءه

ولعلك لاحظت مثال رائع هنا

عندما تكلم الاستاذ (ماركيز) بمغالطة واضحة حول زراعة المخدرات في حكم طالبان

ورد عليه الاستاذ هاندي بمعلومة موثقة وذكر مصدرها

فعرفنا أن الحقيقة أن المخدرات نضبت في حكم طالبان

بل إن احصائيات الامم المتحدة نفسها تؤكد ذلك

حيث ان طالبان حاربت زراعتها وغلظت العقوبة على ذلك !!!

فهنا كانت الافادة لنا ، ولكل قاريء للموضوع ليعرف الحقيقة من الافتراء !!

ومع ذلك حضرتك عدت وقلت (فيها قولان) !!

فهل اعتبر هذا استهزاء

أم إصرار على الخطأ

يعني اقول لك مصادر معلومات غربية وأمم متحدة .. برضه مش عاوز تصدق

طب أعمل إيه ؟!

ومثال آخر

و لو انت يا صديقي عايز تقول ان الاخوان مش هم الجماعة الأم اللي خرج من عبايتها و من افكارها جميع الجماعات العنيفة الأخرى اللي قتلت السادات و عاثت في الأرض فسادا في السبعينات و الثمانينات لغاية ما بدؤا بتحالفوا مع الوهابيين و يستقووا بالمال و النفوذ السعودي يبقى يا صديقي لازم تعرف اكتر من اللي انت عارفه.

فهل اعتبر ذلك الرد معناه أنك مصدر التاريخ الوحيد والمقبول !!!

ولماذا لا تكون انت الذي بحاجه إلى معرفة الكثير والكثير جداً

واعتقد أن في رد الدكتور ضياء الكفاية حول تلك النقاط

اما بخصوص ماذكرت حول (أشخاص)

فهذا لا يعنينا من قريب أو بعيد و لاطائل من وراءه

فالاخوان الذين نناقشهم هنا .. نقصد بهم الفكرة .. فكرة أن يحكمنا الاسلام

ولا نناقش الاشخاص

فانحراف شخص في جماعة في وجه من أوجه السلوك

شيء ليس له أية علاقة بما نناقشه من (فكر) الجماعة الذي تنادي به

وإلا لاختزلنا الماركسية في كاسترو ولحاكمناها كنظرية من خلال تصرفاته كفرد

وتقبل تحياتي وشكري

استاذي العزيز مينا

تحياتي استاذي الكريم

ليس لدي اي حساسية في كونك مسيحي وتشاركنا النقاش حول الاخوان المسلمين

أنت من بادرت بالاعلان عن دينك على الرغم من كون سؤالي حول كونك مصري وتعيش داخل مصر

وأتمنى ألا يكون لديك أنت تحسس من ذلك

وبخصوص الاخوان

فانا (أعلم) أن في صفوفهم مصريون مسيحيون

فكيف لا تعلم أنت ذلك

وانت تعيش في مصر

أما من ناحية لو كانوا سيطبقون تجربة تركيا أو ماليزيا !!!

انا لا اناقش و احاكم النوايا

فلعلك تتفق معي في ذلك

فما اعلنه الاخوان .. هو ما يجب ان نناقشهم فيه

وليست نواياهم

يعني لو في نيتهم أن يفعلوا كذا يبقى كويس

لكن في نيتهم أن يسوا كذا يبقى وحش

ومن أين لي أن اعلم النوايا يا استاذ مينا

فذلك مخبوء النفس ومكنون الضمير

والله وحده هو المطلع عليه

أما بخصوص

خلينا نبص على أرض الواقع و قوللى كدة أى دول فى العالم يتمتع فيها المسلم - مهما كان مذهبة أو فكرة- بحرية أكبر؟

فلو تقصد الحرية في ممارسة شعائر دينه

فاجابتي ليست الدول العلمانية بالتأكيد – شرقية كانت أو غربية –

أنا في كندا محروم من سماع الآذان منذ سنوات طويلة

ولا أصلي الجمعة لظروف العمل منذ سنوات طويلة !!

ازي الحال بقى

تخيل انت عايش ف مصر من عشرين سنة ، وعمرك ماسمعت جرس الكنيسة يوم الأحد !!!

أو أي يوم في الاسبوع

تبقى مصر ساعتها جنة !!

ولو تقصد حرية التعبير عن الرأي

فاجابتي ليست بالتأكيد الدول العلمانية – شرقية أو غربية –

عندنا بيهجوا علينا ف البيوت يالدعارة تحت اسم الفن وخاصة بحملات مكثفة في شهر رمضان !!

وفي الغرب قد يسبون الله والمسيح في (كارتون أطفال) و برامج (حوارية)

فأين حماية معتقداتي هنا !! وهناك !!!

ولو تقصد حرية الخلاعة

فنعم .. يشترك فيه الدول العلمانية – شرقاً وغرباً –

لكن اذكر لي دولة تترك لك ولزوجتك حرية ارتداء ما تراه مناسباً

دول لديها شواطيء للعراة ، ممنوع دخولك فيها بملابس أو بكاميرا

ونفس الدول – مثل فرنسا- لا تسمح لزوجتي أن تغطي رأسها و تلبس الحجاب في المدارس والجهات الحكومية !! فعن أي حرية نتحدث !!

تركيا بعدما نحت الإسلام منذ قرون وآمنت بالعلمانية

لازالت تبوس الأقدام ليتم قبول انضمامها في الاتحاد الأوربي

فأين العدل والمساواة !!

أمريكا ظلت حتى الستينات تمنع الزنوج والملونين من جامعاتها ومن الباصات ولهم كراسي محددة !!

أين مساواة العلمانية بين الناس وعدم التمييز على أساس عرق أو لون أو جنس !!

أتمنى مراجعة كل تلك الامثلة

ثم قارن ذلك بالاسلام ..

وتقبل تحياتي وتقديري

تم تعديل 18 نوفمبر 2005 بواسطة هادي

[مفروس]

الأخ د.ضياء...

اضافة بسيطة...

معرفتي بالفكر الوهابي بسيطة جدا...

عشت و نشأت في دولة خليجية و قضيت 12 سنه في مدارسها بقرأ كتبهم و أحضر دروسهم و كنت من شباب المساجد هناك لأكثر من عشر سنين...

و كنت أخرج في سبيل الله و اعتكف معاهم و مع شيوخهم لمده 4 سنين...

و أطلقت لحيتي و لبست الجلباب القصير...

و تركتهم عندما كفروا ابي و أمي لما طلبوا منى أحلق دقني...

ممكن انت تقوللي مده تعمقك في الفكر الوهابي؟؟

الأخ شاواشانك...

الحل بسيط...

في المسائل الشرعيه ياعمل كل فرد تبعا لديانته...

في الزواج و الميراث و النفقه و غيره...

و ده بيطبق على المسلمين السنه و الأقباط...

العملية تتنظم صح و بس

و الحرية الدينيه لما تكفل يبقى من حق المحجبة تتحجب أو لآ زي ماهي عايزة...

بالعكس...لو حصل تعدي على الحرية الدينيه لأي شخص يبقى فيه قوانين تعاقب بجد المتعدي...

بس ما ينفعش برضه أجبر المسيحي علي اتباع قوانين الميراث و الزواج بتاعتي مثلا...

و ما ينفعش أجبر الشيعي و البهائي على التظاهر بالاسلام السنى و اكبت حريتهم الدينية...

المهم في الآخر الوحدة الوطنبه القومبه الحقيقية...مش بتاعة اليومين دول...

و دي عمرها ما حتيجي الا باذابة جبال الجليد و فك الاشتباك الديني

و ربنا يستر

و السلالالالالالالالالالالالالالالالالالالالالالالالالالالالالالالالالالالالالالال

الالالالالالالالام

[shawshank]

أخي مفروس

ما أوردته كان في معرض الحديث عن الدولة العلمانية. و من الممكن أن يتم منع الحجاب في الدولة العلمانية. فما الحل يا أخي مفروس ؟

الأخ شاواشانك...

الحل بسيط...

في المسائل الشرعيه ياعمل كل فرد تبعا لديانته...

في الزواج و الميراث و النفقه و غيره...

و ده بيطبق على المسلمين السنه و الأقباط...

العملية تتنظم صح و بس

...

بس ما ينفعش برضه أجبر المسيحي علي اتباع قوانين الميراث و الزواج بتاعتي مثلا...

<{POST_SNAPBACK}>

و هذا هو شرع الله. فهل تتفق معي في أن نحكم بالاسلام ليس بالعلمانية.

تم تعديل 18 نوفمبر 2005 بواسطة shawshank

[shawshank]

مش حيبقى فيه انتماء لوحدة قوميه...

حيبقى فيه انتماء لوحدات عرقية و دينية و اثنية...

...

ليه ما يبقاش الموضوع انتماء لمصر...

ليه بقى عيب و حرام؟؟؟

<{POST_SNAPBACK}>

اه ... عيب و حرام لو فيه ما يخالف شرع الله.

مثلا ، عشان انتمائي لمصر ممكن:

- أتفق مع الأمريكان على ضرب العراق عشان مصر تبقى مستقرة.

- أوافق على تصدير غاز طبيعي لإسرائيل عشان تكون حدود مصر مع جيرانها آمنة.

- أتفق مع أمريكا و اسرائيل إن اللاجئين الفلسطينين ياخدوا حتة من سينا عشان ده في مصلحة مصر.

[Mena0064]

عزيزى شوشانك،

نفسى أرد لكن دة هيكون خروج عن الموضوع لموضوع تانى كبير لو حبيت نفتح موضوع جديد معنديش مانع أشترك.

عزيزى هادى، شكرا جدا للتحية الحارة، القلوب عند بعضها يا إبن بلدى.

أنا عارف إن الإخوان فى صفوفهم بعض المسيحيين لكن مش بالعدد الكافى إننا نعتبر الإخوان "إجتذبوا" المسيحيين، مصر 10% منها تقريبا مسيحيين أما نسبتهم فى الإخوان فلا أظن تتعدى 1 فى الألف، أظن نفس الشئ بالنسبة للعلمانيين.

معاك فى موضوع النوايا، هل يا ترى الإخوان عندهم برنامج واضح و متكامل، إذا كان موجود دلنى علية أما لو ما كانش موجود فهل يعقل أنهم يرشحوا أنفسهم من أساسة؟ الحقيقة العيب على المنتخب المصرى إنة يدى صوتة لجبهة بدون ما يعرف هية هتعمل إية بالظبط.

بالنسبة لنقطة الحرية هحاول أدر و آسف لأى خروج عن الموضوع:

مفهوم الحرية يا عزيزى مش إنك بس تعمل اللى إنت عايزة بل إن كل الناس تعمل اللى هى عايزاة علشان كدة حريتك حدودها هى حرية الآخرين.

فى هذا الإطار، إنت عايز تسمع الآدان و المسيحى عايز يسمع جرس الكنيسة إلخ، تفتكر إية العمل؟ أنا مش فى كندا لكن أنا متأكد إن فية قانون موحد للضوضاء فى المناطق السكنية و متأكد إن القانون دة لا يعطى إمتيازات لأى جهة و إن الكنيسة و الجامع واحد، إنت شايف إن دة ظلم؟

من حقك كمواطن كندى إنك تطالب إن يوم الجمعة يبقى أجازة و إذا أقنعت أغلبية برلمانية فدة هيحصل فعلا، طبعا قلة عدد المسلمين هيكون حاجز لكن الآلية المطلوبة لإحداث التغيير موجودة و لا تخالف الدستور، إنت شايف إن دة ظلم؟

أنا مش هقول إن فى مصر يوم الأحد مش أجازة و طبعا مصر لا فيها آليات و لا بقوليات لإحداث أى شئ، و إننا إنتظرنا لحد ما صاحب العزبة يتحنن علينا بعطفة علشان يوم عيدنا يبقى أجازة.

بالنسبة للفساد الإجتماعى و سب الأديان أنا معاك إنة شئ مقرف و أرجوا تكون عارف إن المسيحيين الشرقيين يشاركوك نفس الرأى لكن بصراحة الحل بسيط، لما تشوف حاجة فى التليفزون مش عاجباك غير القناة و لما تشوف حاجة فى الشارع مش ولابد دور وشك، بس كدة سهلة قوى.

أنا بردة مش هقول إن كل هذة القازورات موجودة فى مصر بس من تحت لتحت، أنا عشت فى كذا دولة غربية قبل ما أستقر و شفت بعينى إن الأماكن اللى مش ولابد مليانة عرب.

برضة معاك إن أمريكا لها عيوبها و إحنا المفروض نتعلم و نهدف للأفضل من كدة. أنا شخصيا أفضل النموزج الدول الإسكندنافية للعلمانية و الديمقراطية.

شكرا ليك و لجميع المشاركين على الحوار الممتع.

[Alshiekh]

الإسلام هو الحل !

شعار جميل لو كان قد صدر فى بلد تحكم بالبوذية او الهندوسية ، وإن كنت لاأعنى الإساءة أو التقليل من شأن من يعتنقونهما ، فأنا أحترم معتقدات الجميع. لأن فى النهاية المحاسب هو الله ونحن جميعا نتقاتل على اشياء كلها فى علم الغيب ولايعلمها الا الخالق.

أسئلة للإستيضاح

مالمقصود بهذه العبارة؟

هل سيكون هناك دستور مدنى؟

هل هذا الدستور إن وجد سيستمد مواده من احكام معينة مرجعها ايات من القرآن؟

لو كانت الإجابة بنعم ، هل تقبل فيها تفسيرات وترفض تفسيرات أخرى أقل أو أكثر تشددا؟

ماذا عن الحريات الشخصية؟

ماذا عن الحريات الشخصية التى الغاها البعض فى بتعريفات أخرى مثل درء المفساد والابتعاد عن الشبهات؟

ماذا عن تداول السلطة؟

هل السلطة غير محددة المدة أم محددة المدة؟ وهل هناك شروط لمن يرغب فى تولى السلطة؟ هل يجب ان تكون لديه شهادات دينية معينة؟ أو درجة معينة من التشدد الدينى؟

اسئلة بسيطة وقليلة ، ولكن هى فى غاية الاهمية حتى تتضح الصورة ولا تكون كشعار الإستقلال التام أو الموت الزؤام ، أو ننموت نموت وتحيا مصر.

الحقيقة الأسئلة كثيرة ومتعددة ولكن فقط اردت إثارة بعضها .

الاسلام هو الحل فى نظرى كمواطن بسيط هو العدل ، بغض النظر عن اللون ، الجنس ، الدين ، الأصل ، وأعتقد ان الأخوة هادى وشاوشنك موجودين ويعيشون فى دول المهجر التى لاتدين بدين الاسلام ، ويعلمون ماأقوله عن موضوع العدل بين البشر. حتى ولو كان هناك بعض الحالات العنصرية الفردية ، ولكن لان القانون والدستور يجرمها ، فهى تظل حبيسة ، ولا تظهر للعلن ، لانها ببساطة مخالفة للقانون.

فهل من يرفع شعار الاسلام هو الحل مقتنع بالمساواة والعدل فى التعامل مع كافة المواطنين لايفرق بين احدهم بسبب انتمائه العائلى او الدينى أو لجنسه أو للون بشرته أم لا؟

هل تولى سلطة اومنصب ايا كان حجمه أو موقعه سيكون قصرا على فئة دون غيرها أم لا؟ هل سيكون طول لحيتى أحد العوامل المؤثرة أم لا أم سيكون الامر متروك للكفائة المطلقة؟

أرجو ممن لديه الاجابة أن يفيدنا ، والا يردد كلام يعتقد انه سيحدث بدون سند!

بلاشك ان من يعرف ربه ويخشاه سيكون له مصداقية ، ولكن لايجب ان ان نحصر من يعرف ربه ويخشاه فى المسلم فقط ، فكم من معتنقى الديانات الاخرى من هم فى منتهى التقوى والورع. وهناك من لايعبدون إله أصلا ويشهد لهم بالإخلاص والتفانى والامانة.

ولننظر للعالم من حولنا ولا تعمينا نظرتنا المتعصبة للإسلام الى إغماض اعيننا عن كل ماهو جميل لمجرد الاختلاف فى المعتقد.

[Handicraft]

مفروس كتب:

" لأخ هانديكرافت...ما جاتش على زراعة المخدرات اللي فيها قولان...ايه رأيك في الباقي؟؟؟"

--

العزيز مفروس الموضوع غير مفتوح لمناقشة طالبان ولكنى اردت ان ادفع عن قوم قالوا ربى الله تركوا الدنيا وكان همهم اتباع المناهج الأول احسنوا النيات واغلقوا على انفسهم وتخلوا عن كل ادوات الحضارة حتى يبدؤا من حيث بدء الأوائل - وهذا ظنهم - عندما استضافوا اسامة بن لادن لم يتخلوا عنه حتى عندما هددوا بالحرب كان ردهم ان جمعوا علماء الدين حتى يأخذوا رأيهم فى طرد اسامة بن لادن - هل ترى كيف هى الشورى عندهم كانت - وكان رأى علماء الدين الا يخونوا العهد وقتلوا كلهم وقذفوا بالطائرات ولم يتخلوا عن العهد اما سؤالك عن الباقى فالباقى كله كلام يمكن اثبات خطأه وعدم توثيقة وانما اخترت مثال المخدرات لأنه من ارشيف من يتهمون طالبان بكل ذلك فكان ردهم هو بيناتهم ، يكفى طالبان فخرا انها اقامت أمنا فى افغانستان لم يقم فيها من قبل ولا من بعد ... لم يأكلوا حراما ... قائدهم رجل منهم ... وحدوا الشتات ... كان منهجهم القرآن والسنة ... كان قادتهم علماء الدين - كلمة طالبان فى الأفغانية تعنى طلبة الشريعة - واتهامك لهم انهم صدروا الإرهاب للعالم اتهام بغير دليل لأن العالم جاء بالإرهاب اليهم وان كنت تتهم اسامة بن لادن - رحمه الله - فأقول رأيى فيه انه رجل ترك الدنيا والمال وهو من تعرف من اغنى اغنياء الخليج واقام فى الصحراء فى كهف ... فهل من احد فعل مثل ذلك وهل كان يبتغى من ذلك ان يقود العالم من كهف تسكنه الهوام لا توجد به ادوات حضارة حديثة وبعد ذلك يقوم بمهاجمة دولة عظمى واين!! فى عمقها ...

رحم الله عقول هـُـدت الى الحق ولم تكن مرتعا لكل ما يقال.

اذا كنت تريد ان تقرأ املزيد عن حركة طالبان ومنهجها ولا تردد ما تسمع دون انتعى هذا الموضوع فتح من قبل:

الميزان لحركة طالبان

واعتذر لصاحب الموضوع عن الخروج

وله كامل الحق فى طلب حذف الرد.

تم تعديل 18 نوفمبر 2005 بواسطة Handicraft

[Dr.Diaa]

الإخوة الأفاضل:

تشعب الموضوع و كثر المحاورون و أصبح من الصعب الرد على كل ما قيل لذلك أوجز ما أريد أن أقول فى الاتى:

1) كلنا والحمد لله نريد الخير للبلد و نحسن الظن بكل الإخوة المشاركين فى النقاش.

2) كل المسلمون المشاركون لا ينتقصون من دين بعضهم البعض و كلهم على خير بإذن الله و إن إختلفوا فى المنهج.

3) الحكومة فى الإسلام حكومة ’مدنية’ تحكم بشرع الله (و من أراد التفصيل أو المعارضة فعليه بكتاب الدكتور محمد عماره "معركة الإسلام و أصول الحكم").

4) مبدأ الشورى فى الإسلام ثابت بالقرآن و السنة و لا خلاف فى ذلك.

5) يضع الإسلام فى كثير من الأحيان قواعد عامة و يترك التفاصيل للإجتهاد و الإتفاق.

6) مبدأ المواطنة راسخ فى الإسلام منذ اليوم الأول للحكومة الإسلامية حيث نص أول دستور إسلامى على أن: أهل المدينة من المسلمون و اليهود "أمة" دون سواهم.

7) فشل العديد من المسلمين فى إقامة حكومات إسلامية فى أماكن متعددة ليس فشلا للإسلام و لا يعفى باقى المسلمين من المحاولة و يجب أن نجرب الإسلام (المصرى) الإخوانجى أو غيره.

8) الدستور الإسلامى المعاصر ممكن و لا إشكال فيه (و من أراد الزيادة فعليه بالكتاب الذى يحوى نص هذا الدستور الإستاذ الدكتور محمد أحمد المسير: "نحو دستور إسلامى").

9) فيما يخص غير المسلمين فى ظل الحكم الإسلامى أرى أن عليهم الإلتزام بالقوانين العامة كما أن على المسلمين الإتزام, فلا أتصور مثلاْ مسلماْ أمريكياْ يطالب بعدم تطبيق القانون الأمريكى عليه بحجة أنه لا يتفق و الشريعة. أما فيما يخص الأحوال الشخصية فالإسلام يوكل كل أناس الى دينهم و شريعتهم.

10) بعض النقاط الخاصة بالمسيحيين:

*يوم عيد الميلاد كان أجازة للمسيحيين دون المسلمين و بما أن الدولة لابد أن تعطل العمل فى الأعياد الإسلامية كان للمسيحى أجازات مدفوعة الأجر أكثر من المسلم، و لا غضاضة فى ذلك فمن حقه الإستمتاع بعيده و لا ذنب له فى العطلات الإسلامية. و لكنى لا أرى أى معنى لجعل عيد دينى ل10% من الشعب عيدا قوميا رغم أنوف ال 90% الباقيين.

*وبالنسبة ليوم الأحد فإن بعض الموظفيين المسيحيين العاملين في مقر عملى يحضرون للعمل فى العاشرة صباحا (بعد زملائهم المسلمون بساعتين) ليتسنى لهم الصلاة (و لا غضاضة فى ذلك) بينما قد لا تتاح نفس الفرصة لأغلب المسلمين خارج الدول الإسلامية.

*أوصى النبى صلى الله عليه وسلم بأقباط مصر خيرا و أنا كمسلم أحفظ الوصية و أظن بإخوانى المسلمين خيرا ، فهم أيضا سيحفظون الوصية إن شاء الله.

11) هل من حق كل الشعوب أن تختار طريقة الحكم التى تلائمها بينما تستثنى الشعوب المسلمة من ذلك؟

12) بعض الإخوة عرض ما أود أن أسنفسر عنه أولا برسائل شخصية بينى و بينهم حتى نجتنب سوء الفهم

و... إحترامى لكم جميعا.

[Proud Muslim]

كالمعتاد ..

كلما فتح موضوع له علاقة بالاخوان المسلمين أو غيرهم من التيارات الاسلامية .. عدنا لنناقش العلمانية و الاسلام ..

يا جماعة الخير الله يبارك في حضراتكم .. هذا الموضوع لم افتحه بنية الحديث عن العلمانية و الاسلام .. فالموضوع قد قتل بحثا ..

طرف يبدأ بسرد الأدلة الشرعية في بطلان العلمانية .. و طرف يهاجم و يصفي حسابات شخصية !!

انا فتحت الموضوع من أجل مناقشة شعار الاسلام هو الحل .. هل من الصحيح ان يرفع حزب او جماعة هذا الشعار في الانتخابات ؟؟

لست أناقش مبدأ الاسلام هو الحل .. و لست أناقشه ليس لأنني أحد المقتنعين به .. و لكن لأم محاورات المصريين بها عشرات النقاشات حول هذه النقطة !!

المحكمة كانت قد اصدرت قرارا بأن شعار الاسلام هو الحل لا يتضارب مع الدستور .. يعني المسألة ليست هنا تسخين ناس على ناس ..

من حق أي شخص أن يرفع أي شعار يريد .. ليس لنا أن نحجر على أحد .. و لكن لنا أن نناقشه ..

الأخ الفاضل مفروس ..

مش شايف ان الموضوع تحول الى حكاوي شخصية عن افراد الاخوان ؟؟

أخي الفاضل ..

هذا الموضوع موضوع مفتوح في باب السياسة الداخلية .. بمعنى انني لا أناقش هنا تصرفات افراد الاخوان أو عائلاتهم .. بل أناقش سياسة الاخوان فقط !

الاخوان بشر مثل باقي البشر الذين خلقهم الله .. ليس لهم عصمة و ليسوا ملائكة ..

اذا أخطأ أحدهم فليسوا جميعا ذاك الرجل .. و اذا كان أحدهم ورعا تقيا فلا يعني بالضرورة انهم جميعا هذا الرجل ..

خلينا في الموضوع ربنا يكرمك .

خلونا في الواقع .

الاخوان حتى هذه اللحظة هم الفائزين .. و لا أحد يستطيع ان ينكر انهم افضل من لعب اللعبة السياسية في هذه الانتخابات .. و حازوا على اعجاب الجميع ..

قد يكون لنا تحفظات على بعض النقاط .. و لكن لا يمكننا ان نتهمهم بالفشل السياسي !!

صح ؟

[Dr.Diaa]

الأخ صاحب الموضوع:

اسف إن كنت خرجت عن الموضوع الأصلى

[هادي]

الاخوان بشر مثل باقي البشر الذين خلقهم الله ..

ليس لهم عصمة و ليسوا ملائكة ..

اذا أخطأ أحدهم فليسوا جميعا ذاك الرجل .. و اذا كان أحدهم ورعا تقيا فلا يعني بالضرورة انهم جميعا هذا الرجل ..

خلينا في الموضوع ربنا يكرمك .

خلونا في الواقع .

الاخوان حتى هذه اللحظة هم الفائزين .. و لا أحد يستطيع ان ينكر انهم افضل من لعب اللعبة السياسية في هذه الانتخابات .. و حازوا على اعجاب الجميع ..

قد يكون لنا تحفظات على بعض النقاط .. و لكن لا يمكننا ان نتهمهم بالفشل السياسي !!

صح ؟

صح

شكراً استاذ براود

خلونا في الواقع

[مفروس]

اخواني صباح الفل...

آسف برضه لو خرجت عن الموضوع انما أنا كنت عايز اوضح نقطة...

ان الاخوان سياسيين...بيستخدموا الدين لغراض سياسية بينما هم في حياتهم و تصرفاتهم العامة مش ملتزمين بيه و مش ملايكة...

و هو ده اللي أنا رافضة...التعامل بوجهين...

يعني لما لأنا ضد الحزب الوطني لأنه بيستخدم الشعارات الوطنية و الديموقراطيه و الشفافية علشان يوصل لأغراضه و يغطى على الفساد...

أنا مش موافق على استخدام الاخوان لشعار الاسلام برضه للوصول لأغراضهم.

و زى ما كلنا شايفين و زي ما انتوا قلتوا الواقع انهم بيكسبوا بيه...

و حنشوف حيعملوا ايه فعلا لما يستقروا في كراسيهم..

و السلالالالالالالالالالالالام

[ابو حلاوه]

عصام العريان اعلن ان الحركة ستغير شعارها من الاسلام هو الحل الي عدل و مساواه ومشارك .... الخبر تم نشره في جريدة المصريون الاليكترونيه من عدة ايام

[shawshank]

هل "الاخوان المسملون" حركة سياسية تتاجر بالإسلام ؟

[Alshiekh]

هل "الاخوان المسملون" حركة سياسية تتاجر بالإسلام ؟

<{POST_SNAPBACK}>

ياريت توضح لنا انت من هم الاخوان المسلمون حتى يتضح ماإذا كانوا حركة سياسية هدفها الوصول لكرسى الحكم شأنها فى ذلك شأن الشيوعية والماركسية والليبرالية وكل الحركات السياسية التى ترغب فى اعتلاء مقاليد البلاد فى اى بلد كان ، ام هى مجرد حركة دينية جل همها وشأنها ان ترشد الناس الى طريق الخير والعبادة والتقرب الى الله؟