عربية المطافي

[الحاج محمد]

مش عارف هل الموضوع ده تكرر عند حد تاني واللا لا .. لكنه غريب ..

السنة اللي فاتت زي النهاردة رحنا نصلي العيد كالعادة في مسجد قريب مننا وبيبقى قدامه ساحة كبيرة .. فوجئنا المسجد مقفول وقدامه مية كتيرة .. وقرب المسجد ساحة كبيرة جديدة .. رحنا .. أتاريها للحزب الوطني .. وكمية حرس وناس من المحافظة .. لقيوا الناس لسه ما كتروش راحوا مأجلين الصلاة تلت ساعة كاملة .. وخلالها وزعوا علينا منشورات "هذا بيان للناس" نقراها واحنا مستنيين وبنكبر!

المهم .. عدا العيد على خير .. النهاردة نازل أصلي ورحت للمسجد كالعادة ومش بس ألاقي مية كتيرة مغرقة الأرض .. لأ .. والله العظيم عربية مطافي واقفة في نص الطريق وشكلها بايتة هناك لأن السواق كان نازل منها بيتتاوب وماشي على مهله كأنه بقاله فترة! وقتها افتكرت ان المسئول عن المسجد حكالي السنة اللي فاتت ان عربية مطافي هي اللي غرقت الأرض ..

يعني الجرانين عمالة تتكلم عن أئمة اتحاسبوا عشان عملوا دعاية لناس في الانتخابات وضباط اتحاسبوا عشان مشيوا في مسيرات انتخابية .. بس ما توصلش لأسلوب غير أخلاقي بالشكل ده!

بالمناسبة ما صليتش في الساحة الجديدة دي .. عنداً فيهم طبعا .. والعدد كان أقل من السنة اللي فاتت (أحسن)

[الأفوكاتو]

مرحبا بك يا حاج محمد معنا فى المحاورات,

و لا تزعل كثيرا, فقد عرفنا وجه هذا الحزب القمئ خلال ال 25 سنة الماضية,

و هناك مثل شعبى يقول:

إذا جاءك العيب من أهل العيب, ما يبقاش عيب .

و يعزز هذا القول المثل التالى:

إذا لم تستحى, فافعل ما شئت.

تقبل تحياتى.

تم تعديل 3 نوفمبر 2005 بواسطة الأفوكاتو

[se_ Elsyed]

اللي كثير ما يعرفهوش إن الحزب الوطني إتكشف على حقيقته في الإنتخابات البرلمانية الأخيرة سنة 2000 وحصل على 38 % فقط من عدد المقاعد البالغة تقريباً 442 مقعد وطبعاً لعب لعبته القذرة التي يُجيدها وجذب المستقلين للإنضمام إليه بعد أن فازوا على إنهم مستقلين ، وبالتالي تحققت له الأغلبية .

لذا فهذه المرة سيفعل المستحيل لكي يحسمها من البداية ، تزوير بقى وبلطجة وإستخدام بشع لمرافق ومؤسسات الدولة .. والضرب هايبقى تحت الحزام ... وزي ما قال سفوت اللاشريف إن موضوع الـ 38 % لن يتكرر .

وما حدث يا حاج محمد معك سيحدث مع الجميع ..

لذلك فأتوقع أن يقوموا بتأسيس مساجد للحزب الوطني ويقوموا بتغيير الآذان ويقولوا " اللي يحب ربنا .. ييجي يصلي عندنا " وبدل القرآن يوزعوا منشورات من لجنة السياسات عشان يدعموا مُرشحيهم . ... فهؤلاء الثُلة الفاسدة ليس مستبعداً عنهم أي شيء يفعلوه من أجل التقرب إلى إلههم الأوحد وهو الكُرسي .

[kokowawa1979]

على فكرة موضوع عربية المطافى ده معمم على مستوى الجمهوربة بالكامل وليس حكرا على محافظة واحدة - والحكومة تعمل على إغراق الأماكن التي تقوم الجمعية الشرعية وجماعة أنصار السنة بتجميع الناس لخطبة العيد لإن حكومتنا باعتبارها غير شرعية فهى لاترغب بصلاة العيد الشرعية - وباعتبار أن حكومتنا هي سيدة السنن ( القوانين المسنونة) سيئة السمعة فهي لاترغب في سنة المصطفى صلى الله عليه وسلم - وكفاية الشيخ طنطاوى وفرقته الموسيقية على الحكومة!!!!!!!

[Sherief AbdelWahab]

1-هناك خيار وفاقوس حتى في استخدام الدين للدعاية السياسية ، ومش عايز أتكلم أكثر في النقطة دي..

2-مثال صغير : كل يوم جمعة بتبقى فيه عربية شرطة واقفة في الشارع اللي فيه زاوية صغيرة .. الزاوية صغيرة ومسالمة جداً جداً جداً ..ومش عارف إيه المظاهرة الضخمة اللي ممكن تطلع من شارع ومن زاوية صغيرة ، مش ممكن!

الحذر الأمني مطلوب ، بس مش كدة ..

خلص الكلام

[ENG. BEHAIRY]

كل عام وأنتم جميعًا بخير ، أقولها وأشعر بمرارة فى الحلق وقرحة فى القلب مما أسمع وأرى فى كنانتنا الغالية فضلاً عن سواها ، ويثلج صدرى أن هناك صنفان ، فإلى أيهما نسير ؟؟

الصنف الأول : من وصفهم الله تعالى بقوله ( وَمَنْ أَظْلَمُ مِمَّن مَّنَعَ مَسَاجِدَ اللّهِ أَن يُذْكَرَ فِيهَا اسْمُهُ وَسَعَى فِي خَرَابِهَا أُوْلَـئِكَ مَا كَانَ لَهُمْ أَن يَدْخُلُوهَا إِلاَّ خَآئِفِينَ لهُمْ فِي الدُّنْيَا خِزْيٌ وَلَهُمْ فِي الآخِرَةِ عَذَابٌ عَظِيمٌ ) البقرة114

ومن أظلم : أى لا أحد أظلم ، أو : إن أشد الناس ظلمًا وإجرامًا.

المنع والخراب : تشمل كافة أشكال المنع ، سواء بإعاقة الوصول إليها أو تعطيلها أو تدنيسها أو عدم ترميمها ، أو هدمها ، أو إخافة روادها وإرعابهم أو تحقيرهم ، أوعدم اختيار الأكفاء المؤتمنين على شرع الله ، فكل هذا وما شابه من أعمال يؤول إلى هجر بيوت الله وخرابها .

الصنف الثانى : من امتدحهم الله تعالى بقوله ( إِنَّمَا يَعْمُرُ مَسَاجِدَ اللّهِ مَنْ آمَنَ بِاللّهِ وَالْيَوْمِ الآخِرِ وَأَقَامَ الصَّلاَةَ وَآتَى الزَّكَاةَ وَلَمْ يَخْشَ إِلاَّ اللّهَ فَعَسَى أُوْلَـئِكَ أَن يَكُونُواْ مِنَ الْمُهْتَدِينَ ) التوبة18

وبقوله ( فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالأصَالِ{36} رِجَالٌ لا تُلْهِيهِمْ تِجَارَةٌ وَلا بَيْعٌ عَن ذِكْرِ اللَّهِ وَإِقَامِ الصَّلاةِ وَإِيتَاء الزَّكَاةِ يَخَافُونَ يَوْماً تَتَقَلَّبُ فِيهِ الْقُلُوبُ وَالأَبْصَارُ{37} لِيَجْزِيَهُمُ اللَّهُ أَحْسَنَ مَا عَمِلُوا وَيَزِيدَهُم مِّن فَضْلِهِ وَاللَّهُ يَرْزُقُ مَن يَشَاءُ بِغَيْرِ حِسَابٍ{38} ) النور

تم تعديل 5 نوفمبر 2005 بواسطة ENG. BEHAIRY

[صفاء]

الحقيقة أنا مركزتش هى عربية المطافى عملت ايه بالظبط ؟ يعنى سدوا بيها الشارع ولا غرقوا بيها الجامع ولا ايه بالظبط؟

وليه يعنى ؟ مش عاوزين حد يصلى فى الجامع ؟ معلش انا لسه صاحية من النوم ومش مركزة قوى :blush:

وعجبنى قوى الأذان الجديد اللى قال عليه سى السيد بتاع الحزب الوطنى اللى بيطنطن وبيموت فى هو الوطنطن واللى بيقول ...

اللي يحب ربنا .. ييجي يصلي عندنا

وإليكم أهدى باقى الأذان

الجامع عندنا بريفيكس

سيراميك تحفة وسوبر لوكس

خطبتنا.... أربع دقايق

ولا يمكن هاتقوم متضايق

بنقدم قهوة وبتيفور

وكلام يخللى الدم يفور

ويبكى عيونك يا جميل

تقولش .. محمد جبريل!!!

حى على الإصلاح وطريق مزهزه كله نجاح