شريكك فى الحياة ما بين الخيال والأحلام والواقع

[ابو صلاح]

من اهم القرارات اللى بياخدها الأنسان فى حياته هوا قرار اختيار شريك الحياة . يمكن الواحد ما بيخترش حاجات كتير فى حياته . ما بيخترش اسمه ولا اهله ولا وطنه وساعات الدين بيبقا وراثه ما بيبقاش اقتناع وأختيار .. المهم ان شريك الحياة بيبقا هوا الأختيار او القرار اللى بيبقا الأنسان حر فى اختياره مع حبت اختيارات قليله تانيه .. فى ناس كتير مش مقدره يعنى ايه شريك حياة او قيمة او خطورة هذا الأختيار .. وبيبقا اختيارتهم لشريك الحياة سطحيه جداً .. وناس كتير ما بتفكرش فى الموضوع ده ومهملاه جداً وبتسيب موضوع شريك الحياة للظروف او لما قلبى يختار يبقا هو ده الشريك وخلاص . وناس تانيه عايشه فى بحور الخيال وبتاخد شريك الحياة من قصص خياليه تماماً ( سيندريلا و وسنو وايت و الجميله والوحش ) والحاجات دى . وغرقت فى الخيال اللى مالوش قرار ده

وساعات الواحد لما بيعد مع نفسه كده ويقول ياترى عايز يبقا ايه هوا شريك حياتى بتبقا ايجاباته ايجابات عايمه ومش محدده .. يعنى مثلاً ناس كتير جداً تقولك انا شريك حياتى عايزوه يبقا متدين . طاب ما كلمة متدين دى كلمه عايمه وفروعها كتير جدا ً . فى ناس مفهومها للدين سطحى وتقولك تبقا محجبة ( طبعاً الحجاب شئ عظيم ومن حُسن الدين ) طاب ما فى محجبات اخلاقهم زى الزفت ومافرقتش كتير عن الغير محجبة ( فى اللبس والسلوك كل اللى عملته حاطت طارحه فوق راسها ) . وفى بنات تانيه مش محجبة واخلاقهم وثقافتهم عاليه جدا ً وما ينقصهاش غير متر قماش فوق راسهم بس

وفى ناس متطرفه ف حكاية الدين دى . يعنى مثلاً يقولك الشاب منهم انا عايزها تبقا منقبة وتكون البنت خام وأنا اكون أول واحد فى حياتها وتكون ما كلمتش رجاله خالص ولا حتى صباح الخير .. ولو يطول ان ابو البت ما يكلمهاش برضو كان طلب منها كده

وفى ناس معتدله فى حكاية مفهومهم للدين . ويقولك متدينه يعنى تصونى فى غيابى تراعى ربنا فيا وتكون بتصلى وكده وما يعرفش يقول حاجه بعد كده

وفى ناس بتطلب انا عايز يبقا شريك حياتى يبقا متدين .. وهوا اصلاً ما بيصليش ولا مراعى ربنا فى أى شئ .. طاب هيتقبلو أزاى دول !!؟ حتى لو اتقبلوا دماغهم هتمشى مع بعض أزاى !!؟

معنى الكلام دوت ان حتى القرارات اللى احنا مُخيرين فيها . بنسبها للظروف وعبث الحياة وعبث الفكر المشوش والأيجابات العايمة والغير محددة[/

ف لازم الواحد يقف مع نفسه وقفة ويسئل نفسه ايه هى موصفات شريك حياتى ويجاوب نفسه بأيجابات محدده وصريحه وما يضحكش على نفسه ويكون صادق مع احلامه وطموحاته

وفى نفس الوقت ما تبقاش أحلام وخلاص . لأ تبقا احلام تكون بعديها فعل وعمل . يعنى واحد عايز يتجوز واحده متدينه . يبقا هوا كمان متدين علاشان تتقابل افكارهم مع بعض . واحد مثلاً عايز يتجوز واحدة من عيله وغنية . ما يشتغل ويجيب فلوس علاشان يوم ما يطلبها من عيلتها يبقا فى نفس المستوى المادى بتاعهم ... وهكذا

انا سبب اختيارى هذا الأسم لهذا الموضوع . لأن انا شايف ان اختيارات شريك الحياة بتبقا منقسمه الى الثلاث حاجات دول ( الخيال ، الأحلام ، الواقع )

شريك الحياة بالخيال . بتعيشو كتير من البنات ( وده مش شئ وحش ) بس محتاج يبقا فى واقعية شويه وينتقل الى الأحلام والأمانى بحيث ان يبقا فى أمل لتحقيق هذا الحلم

شريك الحياة بالأحلام : وده الشئ اللى انا بحبذه ان لازم يبقا شريك الحياة يبقا فيه شئ من الطموح ( مش اى حاجه وخلاص ) لأن الشخص ده هيبقا معاك بقية عمرك

شريك الحياة بالواقع : الل هيا الناس اللى بتختار شريك الحياة من المتاح والموجود حالياً ( فى الوقت اللى يبقا حاسس انه عايز يتجوز ومعاه الفلوس ) يختار من المتاح حواليه وخلصت العمليه على كده او البنت اللى بيتقدملها ناس وبتختار واحد منهم وخلاص وتقول هوا ده المتاح

وبرضو الناس اللىمتجوزين اصبحو دلوقتى بيعيشو الواقع :blush: :lol: عايز أعرف منهم ايه الفرق ما بين احلامهم زمان ايام الأحلام والخطوبة وكده ومابين الواقع اللى عايشينو دلوقتى ( طبعاً لو كان شريكك ما بيخشش على هذا المنتدى ) :wub:

فى مخرج للى مش عايزين يتكلمو عن تجريبتهم او عدو المرحلة دى .. ايه هيا مواصفات شريك الحياة اللى ترضيها لبتيك او ابنيك ( طبعاً الكلام ده للأمهات . وايه هيا مواصفات شريك الحياة اللى ترضها لأبنك ولبنتك ( طبعاً الكلام ده للأباء )

احكلنا بقا عن مواصفات شريك حياتك سواء كانت خيال أو أحلام أو واقع

واللهِ وانا بقفل فى الموضوع بتمنى ان كل اللى يخش الموضوع يضيف للموضوع أى فكرة حتى لو كانت بسيطة لأن الموضوع مش بسيط . ده موضوع مهم فى حياة كل أنسان سواء كان ذكر او أنثى كبير أو صغير . غنى او فقير . رومانسى او واقعى . انسان عازب او اب أو ام يبحثون لأبنائهم عن شريكهم فى المستقبل

[بنت شعنونة]

السلالالام عليكم...

شوف يا استاذ صلاح

الموضوع دا مهم جدااااا جدااااا

ها اكلمك عنه من مرحلتين ...

المرحلة الاولى راي فيه قبل الزواج...

البنات عاطفيين جدا وكل واحدا بتدور على النقص اللي عندها عشان الراجل يكمله سواء عواطف و رومانسية او فلوس او حماية وقوة او اي حاجا تانية

والراجل كمان بيدور على اللي ناقص عنده سواء عواطف امومة..غريزة..اكل..استقرار..

!!!

كل واحد فاكر انه هوا بس اللي عنده احتياجات والتاني هوا عفريت العلبة اللي ها ينفذ الأحتياجات و الطلبات دي؟!!

نيجي للجد...

بعد الزواج كل واحد ها يتصدم بواقع انك اتجوزت انسسسسسسسسسسسان!!

كائن حي زيك زييييييه تماااااام له افكار ومنهج واسلوب حياة

عالم بذاته

وعلى ما تيجي تتأقلم مع العالم دا ها تلاقي نفسك بتبذل مجهود شديييد جدا عشان تضاد "خيالك و احلامك" اللي انت قلتهم قبل كدا لآنك دلوقتي في الواقع!

لكن المصيبة الأكبر ان شريك حياتك دا مجرد ربع من اربع اجزاء

شريك حياتك دا = اهل + تجارب شخصية+ حياة حالية وماديات + معتقدات و ردود افعال

وكل ربع من دول صعبببببببب جدااااااااا تفك الطلاسم بتاعته وتفهمها

وعلى ما توصل للشفرة وتحلها

لو حلتها صح

ساعتها يبقى انت عرفت شريك حياتك على اصله وعرفت انت اخترت ايه بالضبط

وممكن الموضوع دا ياخد سنييييييييييييييييين!! mfb:

:D

[ابو صلاح]

البنات عاطفيين جدا وكل واحدا بتدور على النقص اللي عندها عشان الراجل يكمله سواء عواطف و رومانسية او فلوس او حماية وقوة او اي حاجا تانية

والراجل كمان بيدور على اللي ناقص عنده سواء عواطف امومة..غريزة..اكل..استقرار..

!!!

كل واحد فاكر انه هوا بس اللي عنده احتياجات والتاني هوا عفريت العلبة اللي ها ينفذ الأحتياجات و الطلبات دي؟!!

لما فكرت فى الكلام اللى انتِ قولتيه لقيت نفسى فيا العيب ده او مش كده بالظبط بس فيا كتير منه وفى نفس الوقت مش عارف ليه افتكرت مقولة < فاقد الشئ لا يعطيه >

بس هل ممكن فى الحاله دى ان اتنين يكمله بعض ما أكيد طبعاً الأنسان بيبقا عايش حياة قبل الجواز فيها سلبيات وبيتمنى ان السلبيات دى ما تبقاش فى حياته الجديدة وبيدور على الشريك اللى ينشلو من الحياة دى وبيتمنى ان السلوكيات السلبية اللى شافها من البيئة المحيطة بيه ما تتكررش مع شريكة حياته

لكن المصيبة الأكبر ان شريك حياتك دا مجرد ربع من اربع اجزاء

شريك حياتك دا = اهل + تجارب شخصية+ حياة حالية وماديات + معتقدات و ردود افعال

مش فاهم تقصدى ايه بالجزئيه دى وكل جزء من الأربع أجزاء دول محتاج مواضيع مالهاش نهاية تتفتح فيه

فعلا موضوع مش سهل ومحتاج فك تلاسم

[بنت شعنونة]

بص يا صلاح

الواحد لما بيكون لوحده بيعمل فوكس على نفسه جامد جدا

وبيبقى مركز اوي في كل حاجا خاصة بيه او جواه

مزاياه عيوبه..حياته احتيجاته

كدا يعني

انما لما ها ترتبط ها تلاقي كائن غريب توجه نقطة الضوء عليه

بيتصرف كدا ليه

عمل دا ليه

بيفكر في ايه

وتربط كل دا بشخصيتك

ف تبتدي تنسى انت اتجوزت ليه اصلا وكنت عاوز ايه من شريك حياتك دا

وتنسى سلبياتك وتفتكر سلبياته بس

ناس قليلة جدا بتخرج من الموال دا وتقدر تحافظ على افكارها واللي كانت عاوزاة من شريك حياتها

لكن الأغلبية ب تتوه فعلا

ودي مشكلتنا

موضوع الأربع اجزاء

افهمك

انا جوزي ممكن يتخانق معايا مثلا عشان رجع من الشغل و اتخصم منه فلوس في الشغل او عشان والده غلس عليه في كلمه او عشان مالقاش مكان يركن العربية

ف اتخنق

واول حد ممكن ينفجر فيه هوا "انا" بحكم اني الأقل

بمعنى

مش ها يكلم والده لآن القوة مع والده

ولا مديره لآن القوة مع مديره

ولا الشارع لآن الوقة للعربيات اللي ركنت من الأول

انما ها يقدر يكلمني انا عشان القوة ف ايده هوا

فهمت؟

يبى كدا انا قبل ما ازعل منه هوا "شخصيا" لازم احسب الحسبة دي كللللللللللها وبعدين اشوف هوا ك شخص ياخد نسبة قد ايه من زعلي

فهمت حاجا؟ mfb:

[ابو صلاح]

فهمت حاجا؟

بحاول mfb:

[ابو خليل]

اخي صلاح

ساكلمك عن تجربتي الشخصية

كان هدفي في الحياة ولا يزال هدف محدد هو :

دخول الجنة ..

وكثيرا ما فكرت في الزواج من منطلق هذا الهدف ..

ودليل في ذلك أية كريمة وحديث شريف :

الأية :

{الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ} (26) سورة النــور

والحديث :

( تنكح المرأة لأربع : لمالها ولحسبها ولجمالها ، ولدينها ،فاظفر بذات الدين تربت يداك )

تربت يداك .. فعلا ..

إنها عشرة لن تستمر فقط في الحياة .. لكنها ستستمر أيضا في الآخرة .

وكثيرا ما تمثلت قول الله :

{ادْخُلُوا الْجَنَّةَ أَنتُمْ وَأَزْوَاجُكُمْ تُحْبَرُونَ} (70)

سورة الزخرف

فهي حياة أبدية إذن

وكثيرا ما فكرت :

من الذي يستحق أن أتعيش معه هذه الحياة الأبدية !!

من التي تستطيع أن تساعدني في تحقيق هدفي .. من التي تأخذ بيدي لباب الجنة !

من التي ستشد من أزري عندما تأخذني الدنيا ، وتذكرني بالآخرة وثواب الآخرة

من التي ستعينني على عبادة الله .. ؟

واستخرت الله .

فؤجي الجميع انني لم خطبت فتاة بسيطة للغاية ليست طاغية الجمال ، ولا ذات حسب ولا غنية ولا حتى موظفة !!

ولكنها في نظري كانت (جميلة الأخلاق ) ، ( غنية بحفظها لكتاب الله ) ، ( من أسرة طيبة ) …

استخرت الله وقلت يا رب : اجعلها من زوجاتي الحور عين..

والآن : احمد الله على السعادة … والهناء والراحة والود والرحمة والصفاء ..

وإن كنت يا صلاح قد قسمت الشريك إلى خيال وأحلام وواقع ..

فأنا قد انعم الله على بشريك حياة .. عاش في خيالي .. و تمنيته في أحلامي .. و رأيته في واقعي ..

والأن …

الدين يا صلاح ..

قد تختلف طباعي عن طباعها ..

قد تختلف تربيتي عن تربيتها

أخلاقي واخلاقها ..

ولكن يبقي الدين .. (دستور ) يجمعنا سويا .. فنرجع إليه عند كل خلاف … فيرشدنا …

نعم دستور نلتزم به فيدلنا ، دستور رباني ..

يلزم الزوجة بأن تطيع زوجها ……يلزم الزوج بحسن معاملة زوجته واكرامها .. ويلزمهما سويا بأمانة تربية الأولاد ..

حقا قول الرسول _ الدنيا متاع وخير متاعها الزوجة الصالحة

أتمني لك وللجميع أن يوفقكم الله لحسن طاعته …

[ابو صلاح]

ولكن يبقي الدين .. (دستور ) يجمعنا سويا .. فنرجع إليه عند كل خلاف … فيرشدنا …

نعم دستور نلتزم به فيدلنا ، دستور رباني ..

يلزم الزوجة بأن تطيع زوجها ……يلزم الزوج بحسن معاملة زوجته واكرامها .. ويلزمهما سويا بأمانة تربية الأولاد ..

اذن انتم تجمعتم على هدف واحد وهو دخول الجنة وعلى طاعة الله فى حياتكم المشتركة

لما باجى اتخيل صورة البيت اللى بيتجمع على طاعة الله بتخيله فى صورة البيت الهادى المتفاهم اللى كله بركة وبما انكم تجمعتم فى الله فظنى ان الله لن يفرقكم انشاء الله ( وربنا يدمها سعادة وبركة ) انشاء الله

فؤجي الجميع انني لم خطبت فتاة بسيطة للغاية ليست طاغية الجمال ، ولا ذات حسب ولا غنية ولا حتى موظفة !!

ولكنها في نظري كانت (جميلة الأخلاق ) ، ( غنية بحفظها لكتاب الله ) ، ( من أسرة طيبة ) …

استخرت الله وقلت يا رب : اجعلها من زوجاتي الحور عين..

هل اخترتها عن حب فى الأول . ولا عقلك اللى قالك هى دى شريكة الحياة المناسبة . وهل كان فى وسيط ما بنكم فى عملية الجواز والمقابلة والتعرف على بعض ولا اتعرفتم على بعض فى مشوار الحياة

انا عن نفسى ممكن ارتبط بواحدة ما فيش قصة حب زى حب المسلسلات والأفلام بس يبقا فى قبول طبعاً . بس ممكن احكم عقلى اكتر من قلبى فى موضوع الأرتباط ده ( لأن من الواقع ان الحب ما بيدمش ) وناس كتير جداً بتعيش قصة حب عنيفه جداً ايام الجامعة بس فى الأخر ما بيكملوش مع بعض سنتيت تلاته بعد الجواز وتلاقى الحب مات وساعات بينتهى بالطلاق فى المده دى ( طبعاً مش فى كل الحلات )

[ENG. BEHAIRY]

أخى العريس / صلاح

لاشك أن أمر الإرتباط سواء للرجل أو المرأة قرار غاية فى الأهمية والحساسية ، وأهميته فى نفسه هو ، وفيما ينشأ عنه من صلات وإرتباطات ، وإلتزامات ومسئوليات ، وقد سماه الله تعالى فى كتابه العزيز ( مِّيثَاقاً غَلِيظاً ) النساء21 ، وهذا مُخالف تمامًا لما تبثه قنوات الدعارة والفجور ، وتتشنج به عارضات الرذيلة ويتشدق به أشباه الرجال لتخدير الأمة والقضاء على شبابها ، وتعليقهم بسراب لا يقيم دينًا ولا دنيا.

وفى الحديث ( ثلاث حقٌ على الله عونهم ، ..وذكر أحدهم : الرجل يريد العفاف ) ، وفضلُ المولى عز وجل وَعوْنُه فى هذا الأمر له صوٌر شتى منها : بيان الأمور ، والهداية ، والتوفيق فى الإختيار ، وإكبار صورة كلٍ فى نظر صاحبه ، والقناعة والرضا ، والإعانة على النفقة ، .. الخ .. وحصول السكن وهو الألفة والمودة والراحة النفسية والإنسجام لدى الطرفين ، وهذا كله من نعم الله تعالى وآياته ، وهو ما تعبر عنه الآية الكريمة ( وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لأيَاتٍ لِّقَوْمٍ يَتَفَكَّرُونَ ) الروم21

ولعل أمر القدر والترتيب الإلهى فى أمر الزواج اكثر ظهورًا لنا كبشر ، ويشعر الإنسان معه ولا بد بالعجز والضعف والإستكانة أمام مدبر كل شيء سبحانه وتعالى .

وقد أثلجت صدرى تجربة أخى الفاضل ابراهيم أبوخليل وما ذكره من اعتبارات تستحق العرفان والتأمل والإعتبار ، ولا يُفهم من الدين أن تستخير الله بركعتين أو برغبة كيفما كانت أو بدعاء عابر ، بل لابد من إخلاص النية لله والصدق مع الله ، وبحث جوانب الأمر والتحرى فيه ، فالمؤمن كَيْسٌ فَطِنٌ ، ( وليس بكيس قُطن) ، كما ذكرت لك د / شنا تجربتها ، وهى حديثة عهد بزواج ، ولعلى أرى من المناسب الإطلالة على موضوعات عامة فى باب ( حلال المشاكل ) المشاركات 15،13 ، 21، 23 لارتباطها بالموضوع ، راجيًا لك وللجميع التوفيق والسداد.

بالمناسبة : هل هذه هى المرة الأولى ؟؟؟ :sad:

تم تعديل 7 نوفمبر 2005 بواسطة ENG. BEHAIRY

[ابو خليل]

هل اخترتها عن حب فى الأول . ولا عقلك اللى قالك هى دى شريكة الحياة المناسبة . وهل كان فى وسيط ما بنكم فى عملية الجواز والمقابلة والتعرف على بعض ولا اتعرفتم على بعض فى مشوار الحياة

انا عن نفسى ممكن ارتبط بواحدة ما فيش قصة حب زى حب المسلسلات والأفلام بس يبقا فى قبول طبعاً . بس ممكن احكم عقلى اكتر من قلبى فى موضوع الأرتباط ده ( لأن من الواقع ان الحب ما بيدمش ) وناس كتير جداً بتعيش قصة حب عنيفه جداً ايام الجامعة بس فى الأخر ما بيكملوش مع بعض سنتيت تلاته بعد الجواز وتلاقى الحب مات وساعات بينتهى بالطلاق فى المده دى ( طبعاً مش فى كل الحلات )

راحع ما كتبته له في أول رد ..

قلت :

{الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ} (26) سورة النــور

فاهم يعني ايه ؟

يعني حاول تكون من "الطيبين "..

التزم بالعبادات وابتعد عن المحرمات

اخلص لله

وستجد الله سبحانه وتعالى قد وضع في طريقك الفتاة الطيبة ..

وفقك الله

[ابو صلاح]

برضو ما ردتش على السؤال اللى سائلتهولك وحاولت تتهرب منه

هل اخترتها عن حب فى الأول . ولا عقلك اللى قالك هى دى شريكة الحياة المناسبة . وهل كان فى وسيط ما بنكم فى عملية الجواز والمقابلة والتعرف على بعض ولا اتعرفتم على بعض فى مشوار الحياة

ولكنى محترم رغبتك فى عدم الرد .. واشكرك على الرد لأن انت ضفتلى مبدأ رائع فى اختيار شريك الحياة