فساد المستشفيات الحكومية

[se_ Elsyed]

إحالة أطباء وممرضات عظام مستشفي دمنهور للتحقيق

البحيرة حامد البربري:

قرر د. عثمان عسل محافظ البحيرة احالة الأطباء والممرضات والعاملين بقسم العظام بالمعهد الطبي القومي بدمنهور للتحقيق بمعرفة الادارة العامة للشئون القانونية بالمحافظة لاهمالهم في علاج المواطنة نسمة أحمد المغربي 17 سنة واخراجها من المعهد قبل استكمال علاجها بالقسم.

تضمن القرار ايقاف الدكتور محمد محسن أبوطالب طبيب العظام بالمعهد عن العمل والتحقيق معه لسوء استقباله ومعاملته للحالة.

كانت المريضة قد استغاثت بالمحافظ وحضرت له بديوان عام المحافظة لعرض حالتها عليه استدعي المحافظ سيارة الاسعاف لنقلها للمعهد الطبي ورافقها شخصيا وأصدر تعليماته لمدير المعهد بعدم خروجها إلا بعد استكمال علاجها.

أصدر تعليماته لادارة المعهد بضرورة تخصيص طبيب اداري نوبتجي باستمرار بقسم الاستقبال للحالات فقط وحل أية مشاكل تعترض المرضي وارشادهم لأماكن علاجهم والتيسير علي المرضي وسرعة علاجهم فوراًً وعمل كشف بأسماء الأطباء والممرضات الموجودين بالنوبتجيات صباحاً ومساءاً بكافة الاقسام والمواعيد واعلانها بقسم الأستقبال مع إرسال صورة بالاسماء لمكتب المحافظ يومياً للمتابعة.

الموقف ده لو كان إتحكى لي .. كنت ممكن ما اصدقش

ولكن أنا شاهدته بعيني في مصر ... فقبل أيام الأعياد تقوم الإدارة بتنظيف المستشفى بشكل تام ... ولا أعني هنا تنظيفها بالماء والصابون .. ولكن تنظيفها من الوغش .... اللي هما المرضى يعني من عامة الشعب ....

للأسف يا سادة ذلك يحدث تحت سمع وبصر وزارة الصحة ورئيس الجمهورية والبشر كلها ...

فعلشان دي مستشفى حكومي فبالتالي بينظروا للناس على إنهم رعاع لا يستحقون الشفقة ولا الرحمة .. وكل جريمتهم إنهم غلابة ..

وكل جريمتهم إنهم بيتعالجوا على حساب الدولة ...

وحاشا لله أن يكون للدولة أموال خاصة بها .. أو إنهم مثلاً آتوا بها من بيوت أمهاتهم وأباءهم ..

ولكنها فلوسنا المقتطعة من دمنا ولحمنا ...

أو زي ما بيقولوا عليها بره " فلوس دافعي الضرايب "

طب يا ترى المستشفيات بيعملوا كده ليه ؟

بمنتهى البساطة .. عشان الدكاترة والممرضات وطاقم الأدارة يعيدوا مع عائلاتهم بكل هدؤ وسكينة .. وينسوا بقى النبطشيات والمرور على المرضى والقرف ده ..

يبقى كلفت يا جدع العيانين وإرميهم في الشارع ويبقوا يعدوا علينا بعد العيد ..

وأهو الأعمار بيد الله .. واللي مكتوب له حاجة لازم يشوفها ..

وأقسم بالله قد رأيتها بعيني في زيارة لأحد المرضى من كام سنة في مستشفى الدمرداش اللي تعتبر ثاني أكبر مستشفى حكومي في القاهرة بعد القصر العيني .. وشوفتهم وهما بيخرجوا المرضى المتنومين في السراير ... وبيخيروهم إما الخروج أو المكوث في المستشفى الهوووووو ايام العيد حيث لا رعاية ولا علاج اللهم إلا عيل دكتور صغير ولا ممرضة ولا حاجة يمر عليه كل كام يوم .... وما أدراك بالوجود في مكان مهجور ينعق فيه البوم بالليل مما يجعل المريض يموت في جلده في الظلام والسكون وبالتالي يُفضل إنه يموت وسط عياله على أن يتواجد في مثل هذا المكان .

برضوا بنرجع ونلف وندور ونقول " مبدأ الثواب والعقاب "

فكل طبيب أو ممرضة أو إداري عارف إنه لو بلطج وأستفحش فيها .. عارف هاترسي على إيه في الأخر ... يومين خصم يابا ومشي حالك .. والموضوع ده يتعوض في غمضة عين بسرقة دواء أو التواطؤ مع الموردين أو التزويغ والعمل خارج المستشفى ...

وتحيا جمهورية مصر العربية ..

وعاش الرئيس القائد المُعلم حسني مبارك .. زارع القيم في الشعب المصري خلال ربع قرن .

[الأفوكاتو]

وعاش الرئيس القائد المُعلم حسني مبارك .. زارع القيم في الشعب المصري خلال ربع قرن

مبروك عليك يا ابو السيد, فقد تقرر تعيينك مديرا للعلاقات العامة بوزارة الصحة.

ألف مبروك. :blush:

[ابو حلاوه]

عزيزي سي السيد من ناحية اخري اؤكد لك ان في مرضي بتحب تقعد في المستشفي علشان بياكلوا كويس و علشان يعاكسوا الممرضات ده ما يمنعش ان كل اللي قلته مش غلط المستشفيات العامة في مصر حالتها مذرية بدءا من المباني مرورا بالتجهيزات و انتهاءا بتدريب الممرضات و الاطباء .........العلاج المجاني اصبح اكذوبة في مصر تفوق بمراحل اكذوبة التلعليم المجاني

[بنت شعنونة]

و من ناحية تالتة الطبيب دا بشر برضه!!

من حقة انه يعيد وينبسط هوا كمان زي بقية البشر؟؟ والا ايه؟؟

ف لما يجي البشر الطبيعي اللي تحت رئاسة بشر مش طبيعي عاوز حد نبطشي والسلام

وطبعا المحاسيب يعيدوا و اللي مالوش ضهر يترمي على بطنه نبطشي في المستشفى يبقى لازم تتوقع منه انه معاملته زفت للعيان لأنه بشر

او على الأقل يمشي العيانين عشان ينام في المستشفىف بدون شغل

من خبرتي في الشغل بالاعياد

والله في ناس بتيجي تعييييييييييييييد في المستشفى فعلا!!

مالقوش حتة يروحوها

الست جوزها مش راضي يوديها حتة في مزاجها تعمل نفسها مغمى عليها وتجيلنا!!

طب وانا مااااااااااااااااااااااااااااالي

وفي الأخر هيا حلقة مفرغة

على راي دريد لحام

الحكومة تضربني وانا اضرب مراتي ومراتي تضرب العيال و العيال يضربوا عيال الجيران

وهكذااااااااااااااااااااااااااااا

[سقراط المصري]

و من ناحية تالتة الطبيب دا بشر برضه!!

.

.

.

.

وفي الأخر هيا حلقة مفرغة

.

.

.

.

على راي دريد لحام

الحكومة تضربني وانا اضرب مراتي ومراتي تضرب العيال و العيال يضربوا عيال الجيران

وهكذااااااااااااااااااااااااااااا

<{POST_SNAPBACK}>

اتفق مع شعنونه، في ان الفساد اكبر من ذلك بكثير

موضوع العيد والاطباء والمرضي ............. مثال صغير للفساد وعدم التخطيط وانعدام الإداره والمسئوليه.

سقراط