أنا لاأكذب ولكنى اتمكيج ....

[صفاء]

لو قررت تتجوز .. واحده جميلة زى ما انت شفتها قدامك

وطاير بيها من الفرحة

وفى ليلة العمر اكتشفت ان المية كدبت الغطاس بجد

يعنى طلبت منها تغسل وشها و اكتشفت ان بدل ما تتجوز باكينام ..

طلعت سلومة الأقرع ... :blink:

تعمل ايه ؟

تطلقها .. و لا ترضى بنصيبك ..

ولا ترفع عليها دعوة غش و خداع ..

فى مثل بيقول .. لبس البوصة تبقى عروسة

بس بردو فى مثل بيقول ..

ايش تعمل المشطة فى الوش العكر

هما طبعا متناقضين .. لكن انا بقول انه ممكن المكياج يخبى كتير طبعا و يعالج عيوب كتير

لكن ميخفيش دمامة " الا اذا عملوا عمليات صب و نفخ و صقل "

فى الحالة دى ممكن الدميمة تتحول الى ملكة جمال

القصة اللى هاكتبها النهاردة دى حقيقة

اتكتبت فى جريدة مصرية رئيسية من فترة

تعالوا نشوف ايه اللى حصل ..

العنوان ..

طلب الزوج من العروس الوضوء فاكتشف انها دميمة و مريضة نفسيا !!!

فوجىء الزوج العريس ليلة زفافه ان عروسه الحسناء ما هى الا امرأة دميمة وتكبره بخمسة عشر عاما , وذلك عندما طلب منها الوضوء لأداء ركعتى الشكر لله , وعندما غسلت المساحيق التى لطخت بها وجهها اكتشف قبح منظرها , وعندما حاول الهروب و الفرار منها , ضربته علقة ساخنة !!!!!

ههههههههههههههههههههههه

لا حول و لا قوة الا بالله

يعنى يا ربى مش كفايه الغلب اللى هو فيه .. و كمان بتضربه ؟

تعالوا نكمل ...

وحاولت قذفه من شرفه الشقة " أكيد متجوز هيركيوليز "

فأسرع الى المحكمة واقام دعوى لبطلان عقد زواجهما لانها استخدمت الغش و التدليس

همممم

ههههههههههههههه

والله هم يضحك و هم يبكى

انا مكنتش مصدقة بصراحة الا بعد ما شفت بعض الصور

اللى أكدت انه فعلا ممكن يحصل

استعدوا للمفاجأة و اللى هانشوفها بالتدريج

شوفوا دى بقى

صحيح الماكياج يعمل من الفسيخ شربات

أما دى بقى فلا تعليق

يا ترى لو حد فيكو حصل معاه الموقف ده .. هايتصرف ازاى ؟؟؟

[Salwa]

ياصفاء ....ياعزيزتى ...لا تتعجبى .

تصدقينى لو حكيتلك حكاية حصلت معايا انا شخصيا ؟؟

من وقت للتانى بتيجى هنا واحدة مصرية محترمة ومبسوطة ( مبسوطة ماديا يعنى ..مش مبسوطة يعنى بتضحك كتير ! ) ..تحضر لشراء ( كسوة الصيف والشتاء والربيع والخريف !!) ..

وكل واحد حر فى حياته ....مش ده موضوعنا ..

هى زوجة صديق لزوجى .........

هى حاجة وتعرف ربنا .. وسيدة ذكية جدا ومحترمة فعلا ......ممكن نقول ان عمرها فى حدود تلاتة وخمسين سنة ..

ظلت حوالى عام لاتحضر ..

فى يوم وانا فى بيتى فى امان الله ..

الباب خبط ..

فتحت ...

فوجئت بسيدة بتترمى عليا ....وتقول وحشتينى ياسلوى وحشتينى ..ايه رايك فى المفاجأة دى ؟؟

وانا شكلى كدة زى اللى فجأة فقدت الذاكرة ...وبقى عندى زهايمر مؤقت ..

انا بقول ...اهلا ..

وانا فى حالة تراجع ....

وفجأة ....( اللمبة نورت ) ....نظرت لها جيدا ..( على فكرة انا طبيعى مش بلبس نظارة فى البيت ..) يعنى تخيلى بقى ؟

وقلت : الحاجة ع...؟

قالت لى : طبعا امال يعنى خيالها ؟؟ ايه مالك ياسلوى ؟؟ انتى عيانة والا حاجة ؟؟

مالك ( متنحة لى كدة ليه ؟؟) ...

قلت لها ابدا اتفضلى اصلى كنت فى الشمس وعلشان كدة مش شايفة كويس ..

طيب حقول لها ايه ؟؟ حقول لها انتى غيروكى ....وركبوا لك قطع غيار كتير قوى ؟؟؟

العينين بقت زرق .............بدل اسود .

الشعر بقى قصير واصفر ..........بدل الحجاب اللى كان مغطى الشعر الاسود الطويل .

الجسم بقى ولا صوفيا لورين فى زمانها ........( بس هى على فكرة طويلة ) ..

عملت كذا عملية شفط للدهون ..

ايضا... .عملت ماكياج ثابت ..

يعنى حددت الشفايف ....وضعت ظل ثابت فى العيون ..

شالت اربع ضروس الأخرانيين علشان تبان خدودها عالية ...

شالت ( ريشتين من الصدر ) ..

طبعا .....ده غير زيادة ونقصان فى اماكن اخرى .

انا كنت بسمع على الحاجات دى بيعملوها الممثلات بس ...لكن ؟؟ زوجات رجال الاعمال كمان ؟؟؟

ايه الافترى ده ؟؟...انا بعتبر ده افترى على النعمة اللى ربنا عطاها لنا ...تغيير كدة فى خلقة ربنا ؟؟؟

على فكرة ...

رغم كل تبريراتها ( بينى وبينها ) ان الراجل زوجها كبر وبقى من وقت للتانى يقول هو مفيش تغيير فى حياتنا ؟؟ وبيقعد قدام التلفزيون طول النهار يبحلق فى قناة روتانا ومش عارف ايه ؟؟

ورغم انى قلت لها .معرفش ايه دى روتانا ؟؟ وانا معرفش القنوات دى لأنها مش موجودة عندى ؟؟

لكن هنا .فيه حاجات لا يتخيلها مخلوق ....والناس عاقلة وبلاش تتحججى لكن عموما انتى حرة فى نفسك ولو انتى مرتاحة كدة خلاص ...

لكنى شعرت بشئ غريب ...

اذا كانت دى ....جدة ...وحفيدها عنده اربعتاشر سنة .

امال سابت ايه للبنات ؟؟ وازاى تكون قدوة لاحفادها ؟؟

اللى فهمته وفوجئت بيه ان بناتها عاملين كدة برضه ...

من يومها بحذر لما بتعامل معاها ...بحس ان خلاص ..

الست بتاعة زمان ....ماتت .

يعنى بس بجاملها .....بصراحة يعنى ..

يالله...

ربنا يهدى ..

[Folana]

السلام عليكم ورحمة الله ...

بتعجبنى مواضيعك جدا ياصفاء لانك بتدخلى عرين الاسد على طول من غير احم ولا دستور وبتمتاز كلماتك بالجرأة مما يدل على انك بتمتازى بشخصية مستقلة..معتدة بنفسها...(حلوين الكلمتين دول ؟؟ايديك بقى على عنوان الماشطة دى

..او ايا ماكانت دلينا عليها :)) :blink:

الاخت الفاضلة الحبيبة سلوى ..لاتتعجبى ..لان اللى بيحصل ده من علامات القيامة ربنا يحسن خواتيمنا جميعا....بس صاحبتك دى مافكرتش فى جوزها خالص وهى بتعمل طقم الصيانة ده ....لانها لو فكرت شوية حتلاقى ان هى وجوزها بيكبروا مع بعض ..وان كل سن له جماله وجاذبيته ....ده فى رأئى بيكون فيه خلل نفسى وكره للذات وعدم تقبل الامر الواقع...ربنا يهدبنا ويرضى عنا ....

(صفاء..ماتنسيش بقى هه!)

:D :lol: :lol:

[Alshiekh]

اليكم هذه الصور لسيدة امريكية تبلغ من العمر 51 عاما ، ورغبة منها فى خداع نفسها وخداع الزمن والناس ، ذهبت الى المكسيك لعمل عملية تجميــــــــــــــــــــــــل أو عملية كـــــــــذب تجميلية. علما بانه كان قد رفض اجراء تلك الجراحة لها فى تكساس بالولايات المتحدة بسبب مشاكل فى القلب ، ولكنها قررت ان تجرى العملية لان شكلها لايعجبها ، ستجرى شد وجه ، شد عيون ، شفط دهون ، تغيير حجم الثدى وما الى ذلك من اشياء !

يتبع

تم تعديل 8 نوفمبر 2005 بواسطة Mohammad

[Alshiekh]

اليكم باقى الصور

كما ترون فى الصورة رقم 9 ، كيف حال المستشفى الذى تجرى فيه العمليات ، ذكرنى ذلك ببعض المستشفيات فى مصر !

يتبع

تم تعديل 8 نوفمبر 2005 بواسطة Mohammad

[Alshiekh]

واليكم آخر صورتين

يقولون " الجنون فنون "

وأقول " ومن الفن ماقتل "

[صفاء]

ياصفاء ....ياعزيزتى ...لا تتعجبى .

هى زوجة صديق لزوجى .........

هى حاجة وتعرف ربنا .. وسيدة ذكية جدا ومحترمة فعلا ......ممكن نقول ان عمرها فى حدود تلاتة وخمسين سنة ..

العينين بقت زرق .............بدل اسود  .

الشعر بقى قصير واصفر ..........بدل الحجاب اللى كان مغطى الشعر الاسود الطويل .

الجسم بقى ولا صوفيا لورين فى زمانها ........(  بس هى على فكرة طويلة ) ..

عملت كذا عملية شفط للدهون ..

ايضا... .عملت ماكياج ثابت ..

يعنى حددت الشفايف ....وضعت ظل ثابت فى العيون ..

شالت اربع ضروس الأخرانيين علشان تبان خدودها عالية ...

شالت ( ريشتين من الصدر ) ..

طبعا .....ده غير زيادة ونقصان فى اماكن اخرى .

لكنى شعرت بشئ غريب ...

اذا كانت دى ....جدة ...وحفيدها عنده اربعتاشر سنة .

امال سابت ايه للبنات ؟؟ وازاى تكون قدوة لاحفادها ؟؟

اللى فهمته وفوجئت بيه ان بناتها عاملين كدة برضه ...

ربنا يهدى ..

<{POST_SNAPBACK}>

مش عارفة أقول غير لا حول ولا قوة إلا بالله

عشان كده الدعوة اللى دايما أدعيها لنفسى هى الرزق بحسن الخاتمة

الست عاشت فترة طويلة من حياتها وقورة وتحاول التقرب لله لكن من الواضح انها فشلت ...

أنا فى رأيي ان كل سن وله حلاوته وجماله .. وعمر الشباب ما كان بالشكل أبدا

الشباب إحساس

والست اللى بتعمل فى نفسها البدع عشان تحافظ على شبابها وده مستحيل انها تعاند سير الطبيعة .. تتحول إلى مسخ دميم ... مثلا نبيلة عبيد وصفية العمرى وصبااااااااااااااااااااااااااااح والعياذ بالله من غضب الله تحولوا إلى مسخ

وكأنهم عرايس بلاستيكية

والله ده احساسى فعلا انهم بلاستيك .. حاجة مقرفة ومقززة

كتير بقارن أى واحدة خصوصا بعد الخمسين تكون وقورة .. بواحدة مجنونة معرية نفسها وعاملة روحها ننوسة مراهقة وبتعمل مواضيع !!!

شتان ما بين الاتنين

الشباب فعلا شباب القلب والحلاوة حلاوة الروح

دى حقائق وليست شعارات وإلا كانوا كل الرجالة خاصة اللى عينيهم زايغة تحديدا أو اللى نفسهم يجددوا شبابهم .. كانوا طلقوا ستاتهم أما يكبروا ويمشوا فى سكة هيفا وروبى :blink:

والله المستعان :D

عزيزتى الأستاذة سلوى

أسرنى وجودك وأسعدتنى مشاركتك

تحياتى واحتراماتى

[صفاء]

السلام عليكم ورحمة الله ...

بتعجبنى مواضيعك جدا ياصفاء لانك بتدخلى عرين الاسد على طول من غير احم ولا دستور وبتمتاز كلماتك بالجرأة مما يدل على انك بتمتازى بشخصية مستقلة..معتدة بنفسها...(حلوين الكلمتين دول ؟؟ايديك بقى على عنوان الماشطة دى

..او ايا ماكانت دلينا عليها :)) :blink:

(صفاء..ماتنسيش بقى هه!)

:D  :lol:  :lol:

<{POST_SNAPBACK}>

فلانة ...

حلوين الكلمتين دول .. خلاص انا من هنا ورايح هاستعين بيكى فى الحملة :D الانتخابية بتاعتى

تم تعديل 8 نوفمبر 2005 بواسطة صفاء

[صفاء]

اليكم هذه الصور لسيدة امريكية تبلغ من العمر 51 عاما ، ورغبة منها فى خداع نفسها وخداع الزمن والناس ، ذهبت الى المكسيك لعمل عملية تجميــــــــــــــــــــــــل أو عملية كـــــــــذب تجميلية. علما بانه كان قد رفض اجراء تلك الجراحة لها فى تكساس بالولايات المتحدة بسبب مشاكل فى القلب ، ولكنها قررت ان تجرى العملية لان شكلها لايعجبها ، ستجرى شد وجه ، شد عيون ، شفط دهون ، تغيير حجم الثدى وما الى ذلك من اشياء !

يتبع

<{POST_SNAPBACK}>

يا محمد انت متأكد انعمرها 51 سنة ولا 151 ؟

ركز الله يخليك ..

بس أحلى حاجه عجبتنى فيها أظافرها :D أكيد مشتركة فى جمعية المرأة المتوحشة

طب يا ربى دى عاوزة قصقصة 20 متر جلد

الترزى هايتعب قوى فيها

ويا ترى بقى احساسها الداخلى بعد العملية هيكون شكله ايه ؟

هاتبقى زغنونة ولا نأبها هايطلع على شونة ؟

شوفوا دى كمان صورة واحدة زغنونة وشحرورة

وبتقول انها مستنية تخلف بيبى من عريسها اللى معاها :blink:

بردو العلم اتقدم أمال ايه

أكيد هاتخلف عن طريق الاستنساخ :lol:

تم تعديل 8 نوفمبر 2005 بواسطة صفاء

[ابو صلاح]

انا مش هاقول غير جملة واحدة < ما فيش حاجة مضمونة الأيام دى >

وربنا ما حرمش الموضوع ده من فراغ ... على حد علمى بالموضوع ده وأرجو ان تصححو كلامى لو غلط

ان ربنا لعن اللى تنتف حواجبها ( نص الحديث مش عارفه قوى )

وبرضو ربنا لعن اللى بتوصل شعرها بشعر مستعار

اشحال دول بقا دول بوظو الدنيا خالص وبيغيروها نهائياً .. طبعاً الموضوع واضح ومش محتاج كلام ولا فتى

طاب والنبى عايزكم فى استشارة

الواحد لما بيجى يشترى عربية جديدة لو مش واثق فى اللى بيشترو منو العربيه بيروح لميكانيكى علاشان يعين العربية ويقولو ايه الناقص والزيادة فيها

كذلك الموبايل . بتروح لواحد بتاع موبايلات علاشان يكشفلك على الموبايل ويشوفو اتفتح قبل كده ولا لأ

لكن بقا لما تيجى تتجوز هتروح بالمدام بتاعتك ( مستقبلاً ) فين

وكان الله بالسر عليم

[صفاء]

انا مش هاقول غير جملة واحدة  < ما فيش حاجة مضمونة الأيام دى >

وربنا ما حرمش الموضوع ده من فراغ ... على حد علمى بالموضوع ده وأرجو ان تصححو كلامى لو غلط

ان ربنا لعن اللى تنتف حواجبها ( نص الحديث مش عارفه قوى )

وبرضو ربنا لعن اللى بتوصل شعرها بشعر مستعار

اشحال دول بقا دول بوظو الدنيا خالص وبيغيروها نهائياً .. طبعاً الموضوع واضح ومش محتاج كلام ولا فتى

طاب والنبى عايزكم فى استشارة

الواحد لما بيجى يشترى عربية جديدة لو مش واثق فى اللى بيشترو منو العربيه بيروح لميكانيكى علاشان يعين العربية ويقولو ايه الناقص والزيادة فيها

كذلك الموبايل . بتروح لواحد بتاع موبايلات علاشان يكشفلك على الموبايل ويشوفو اتفتح قبل كده ولا لأ

لكن بقا لما تيجى تتجوز هتروح بالمدام بتاعتك ( مستقبلاً ) فين

وكان الله بالسر عليم

<{POST_SNAPBACK}>

ههههههههههه

والله ضحكتنى

لعن الله النامصة والمتنمصة والواصلة والمستوصلة ;)

ده معنى اللى انت قلته فوق

عجبنى جدا تشبيهك بتاع الميكانيكى والموبايل

انا هقوللك الحل عشان متتدبسش

المفروض طبعا حتى دينيا انك تشوف وجه عروستك

اما تيجى تشوفها وانت عندهم فى البيت تشترط عليهم انها تقوم تغسل وشها حالا

انا هاحط صورة دلوقت لأشهر مذيعة فى أمريكا

أوبرا .. طبعا كلنا عارفينها وبنشوف برنامجها الساخن جدا

شوفوا المكياج بيعمل ايه ..

Thank God for make-up

تم تعديل 9 نوفمبر 2005 بواسطة صفاء

[se_ Elsyed]

يا محمود يا صالح يابني .. إنت لو رايح تخطب أو تتجوز لازم يكون معاك واحده ست .. سواء نينه الحاجة .. أو حد من إخواتك البنات ... وسيب إنت إيدك ومالكش دعوة وهما هايقوموا باللازم ..

إنت ما أتفرجتش على طنط ماري منيب لما كانت واخده معاها عدة الشغل من بندق وفزدق وكلام من ده وهي راحه تخطب أبله لُبنى لعمو يحي شاهين ...

وبعدين لا مؤخذه ما هو الواحد فيه عينين برضوا .. يعني بنظرة فاحصة تقدر تعرف اللي قدامك دي أصلي ولا تايواني ...

خبره يابني خبره .

[رؤوف]

الاخت صفاء

هذه الظاهرة بدأت تطفو على السطح من فترة مش كبيرة والسبب راجع للعادات والتقاليع الجديدة التي دخلت بلادنا مع الطبقة الجديدة من هؤلاء الناس انتي فاكرة نفسك زيهم لا والف لا هما مش هايسمحولك انك تكوني زيهم وان بقيتي زيهم هما هايدوروا على حاجة تانيه علشان يكونوا مختلفين بس ربنا يهدينا ومانقلدهمش لانها دايما تبدا كدا الطبقة الغنية جدا في اي مجتمع بيكون ليهم تقاليع ومع مرور الزمن وترخص التقليعة يبدا يتناولها الطبقة التي تليهم وهكذا

بس اقول كلمة في ودنك الفلوس تعمل اكتر من كده ......... والفاضي يعمل قاضي

احكيلكم حكاية حدثت لابن عمي

جائنا يوما بنبأ عظيم قرر الزواج وهو يعمل عمل مرموق وفي مكان مرموق

وفرحنا كثيرا لما عرفنا انه سيخطب فلانة بنت فلان بك لالا باشا لان ابوها كان في مكانة كبيرة جدا والحق يقال انه رجل محترم بمعني الكلمة والكل يشهد له بذلك ولا يعمل للمال حساب فهو قنوع وعلشن كده كان عنده مال كتير بغير حساب

وفعلا تمت الخطبة كلنا فرحنا وحسدنا ابن العم على المال والجمال وكان غشيما

لايعرف ان يتعامل مع النساء وكنا دائما ننصحه بما يفعل ومرة بعد اسبوعين من الخطبة اتى الينا وقال انا مش هاكمل ليه قال اللي خطبتها واحدة مش موجودة

انا رحت لهم الصبح وهي اللي فتحت لي الباب ولقيت واحدة مختلفة تماما ولما راتني جرت ورفضت مقابلتي الا بعد انت اتزوقت ولقيتها رجعت لصورتها الاولى فجاء يتسائل انا هاعيش مع اي صورة منهم الجميلة ام القبيحة .

ولم يتحمل الموقف وتم الانفصال والاعتذار

فلا عجب......... مع تحياتي

[رؤوف]

الخت صفاء

على فكرة انا من خلال عملي بيجيني الاصدقاء والصديقات بيجيبوا لي صور ليهم ولاقاربهم ولاد وبنات ويطلبوا مني اعمل لهم معالجة للصور وتغيير لون العيون وتصغير الانف وتبييض الوجه وتحمير الوجنتين وتلوين الشعر وتنعيمه بل اكثر من ذلك هندمة الملابس حتى لو اضطررنا لتغيير الملابس وطبعا عاوزين الخلفية تكون الحديقة الدوليه في لندن اوشئ من هذا القبيل.

فلا عجب

[صفاء]

يا محمود يا صالح يابني .. إنت لو رايح تخطب أو تتجوز لازم يكون معاك واحده ست .. سواء نينه الحاجة .. أو حد من إخواتك البنات  ... وسيب إنت إيدك ومالكش دعوة وهما هايقوموا باللازم ..

إنت ما أتفرجتش على طنط ماري منيب لما كانت واخده معاها عدة الشغل من بندق وفزدق وكلام من ده وهي راحه تخطب أبله لُبنى لعمو يحي شاهين ...

وبعدين لا مؤخذه ما هو الواحد فيه عينين برضوا .. يعني بنظرة فاحصة تقدر تعرف اللي قدامك دي أصلي ولا تايواني ...

خبره يابني خبره .

<{POST_SNAPBACK}>

وابقى جنب البندق والفستق خد معاك صابونة بريحة :D وإزازة كلور

[صفاء]

الخت صفاء

على فكرة انا من خلال عملي بيجيني الاصدقاء والصديقات بيجيبوا لي صور ليهم ولاقاربهم ولاد وبنات ويطلبوا مني اعمل لهم معالجة للصور وتغيير لون العيون وتصغير الانف وتبييض الوجه وتحمير الوجنتين وتلوين الشعر وتنعيمه بل اكثر من ذلك هندمة الملابس حتى لو اضطررنا لتغيير الملابس وطبعا عاوزين الخلفية تكون الحديقة الدوليه في لندن اوشئ من هذا القبيل.

فلا عجب

<{POST_SNAPBACK}>

بتفكرنى بـ محمد عيد فى فيلم شورت وفانلة وكاب

أما حولوه من برص لهركيوليز ومجانس وعضلات :D