ألفاظ تولد ... و تموت

[shawshank]

تتطور اللغة ، مثل أي شئ آخر.

فتولد ألفاظ و تشيخ ألفاظ ، و تموت ألفاظ لتحل محلها غيرها.

هذا الموضوع عن ألفاظ اللهجة المصرية العامية ، التي ولدت و ما زالت حية ، أو شاخت و ماتت.

مثلا:

ماشي ... مش عارف اتولد امتا و لا أسباب ولادته :D بس لسه عايش.

فـ الهجايص

كماننا

كبر دماغك

يا شقيق (لسه واحد صاحبي هنا قايل لي عليه طازة)

و في انتظار مشاركاتكم بالمزيد ...

[se_ Elsyed]

أخر 5 سنوات ظهرت بقوة ألفاظ ومصطلحات غريبة فرضت نفسها على الجميع حتى المثقفين منهم .. مثل :

- نفض

- إحلق ( يعني طنش .. مش يعني قص الشعر )

- مان ( يعني راجل بالإنجليزي بس كلمة بقت شائعة قوي )

- ياكل ( يعني يمشي معايا أو ما يخيلش عليه )

- كبر دماغك بقت لغة عربية فُصحى وبالتالي وجد مجمع اللغة الروشة تغييرها إلى كبر الجُمجمة .. ولما أنتشرت قوي ولقوا الجمجمة كبيره غيروها إلى كبر الدال عشان تريح الجيم ( سيم بقى وإختصارات لابد منها الناس ما بقتش فاضية )

لكن مازلنا برضوا نقاوم الألفاظ الهابطة أو اللي فيها إيحاءات جنسية أو قباحة لإنها عيب على جميع المستويات سواء مثقفين أو غيرهم ...

[سقراط المصري]

الفاظ ماتت

من فضلك........... لو سمحت........... شكراً..........شكراً جزيلاً............... العفو...... عفواً......... ممتن جداً.........

الفاظ او عبارات سمجه

فخامه سعاده السيد الاستاذ الدكتور...............................

وتفضلوا سيادتكم بقبول وافر التحيه والاحترام والتقدير.........................

تحياتي

سقراط

[shawshank]

فيه كمان

يا برنس ... دي جديدة جدا

شغال ... جديد نسبيا

اوعى وشك ... قديمة شوية

يا عم ... قديم جدا

يا عم الحاج ... قديم برضه

يا باشا ... قديم برضه

[shahd]

ماشي دي عندنا في اليمن برضه بس معناها لأ

shawshankموضوع لزيز بجد

[se_ Elsyed]

shawshankموضوع لزيز بجد

أهي دي كمان إتغيرت وبقت

shawshank موضوع روش بجد :ninja:

يا برنس ... دي جديدة جدا

يابني دي قديمة قدم التاريخ .. من أول عم أحمد مظهر ما ظهر في فيلم الأيدي النعمة ... ولكنها تطورت إلى .. يا نجم ...

[shawshank]

يا برنس ... دي جديدة جدا

يابني دي قديمة قدم التاريخ .. من أول عم أحمد مظهر ما ظهر في فيلم الأيدي النعمة ... ولكنها تطورت إلى .. يا نجم ...

<{POST_SNAPBACK}>

لا ماهو اعادة ظهورها تاني هو التجديد :D

يعني موضة الشتاء ده مثلا: "يا برنس" - "يا إنس" - كده يعني

اصطباحة

انسى

[bodi]

ياه فكرتونا بايام زماأأأأأأأأأأأأأأأأأأأأأأأأأأأأن

ما اعرفش الاحوال ايه دلوقتي بس انا فاكر ايام ما كنا في الجامعه كانت

اشطه

يعني حاجه كويسه حصلت

ولما الموضوع رطرط وبقت الشباب بيقولها عمال علي بطال غيروها وبقت

اشطه اتجوزت

:D

[الرافعي]

على رنات بقى .. ها..

(من فيلم الباشا تلميذ - لكن ماشية جداً في مصر الآن)

يا بوب (مش عارف منين)

على فكرة إشطه جات بعدها (إشطات) يمكن بقت قديمة نسبياً

تم تعديل 20 نوفمبر 2005 بواسطة حلاوة العنتبلي

[Salwa]

آخر اليصطا...................يعنى كله تمام . ( كلمات اسكندرانية وقليلة التداول الآن )

هيلا هيلا ليصة .............( كان يقولها البنايين او الصيادين ) حلت محلها غناء تقليدى.

نهارك سعيد ...............( اصبحت الآن ) ....صباح القشطة .

ممنون لسعادتك...........( اصبحت الآن ).....ربنا يخليك لنا .( وتقال فك مجالس ).

مليش دعوة .................( اصبحت الآن ) اخلع من نافوخى ...( يعنى سيبنى فى حالى ).

اتركنى فى حالى .........( اصبحت الآن ) ..اشارتك خضراء ..

[Guest النسر المصري]

بعض الكلمات العرايشية

خيبة جوية ساعة عصرية (يعني يادي الخيبة)

ام جرص طصك في حبة عينيك (يعني بلا عبط)

ينيم ريحيك انشاالله (ربنا يهدك)

والله اليوم مارجغنة (يعني اليوم فرحة)

تطور كلمة الناداة في المصرية

أيها الولد-ياولد -ياولا-ياد-ياااااااا

ايتها البنت - يا بنت - يابت -يابههه

[mohamed]

بما ان انا من اصغر شباب المنتدى وكل يوم بسمع في الجامعة وفي المكروباصات كل ما هو جديد فإليكم اخر الاصدارات:

كله في اللالاز

اوعى الجمبري يعضك

الحوار ده فاكِس... يعني الموضوع ده تعبان

صباح الكنافة :sad:

من الالفاظ التي تطلع على الاشخاص وملهاش معنى او يعني كلها تحمل معني ان الشخض ده اي كلام او تعبان في دماغه:

شنِحف

خبؤ

سِرس

من الالفاظ التي تدل على الضيق من شيء

يقولك مثلا "يا اخي دي بقت حاجة مٌخنقة" :wub:

من الالفاظ التي تدل على التعب او الصداع

انا جبت جاز...والجديد بقى انها تجيب بترول :)

دماغي مطرملة

دماغي فصلت شحن

دماغي ساحت

ولنا عودة ان شاء الله :P

[shawshank]

ايه النظام - بقت دلوقت: ايه النيز

إنجز

البنت زمان كانت بتقول مش عارفة - دلوقت بتقول مش عارف

واد سِو - يعني واد مخلص

فـ السكرتة - يعني في السر (من secret)

تم تعديل 21 نوفمبر 2005 بواسطة shawshank

[se_ Elsyed]

أنا فرحان بيكم يا ولاد ..

وشكراً لإثراءكم القاموس اللغوي الحوارتي ... :sad:

بس في جُمل عجبتني بصراحة وعايز أكتب بعض التعليقات عليها لو سمحتوا .. عشان كل شيء يبقى على نور

اوعى الجمبري يعضك

يابني الجمبري الكيلو دلوقت بـ 150 ج .. يعني يابخت اللي الجمبري يعضه .. تبقى مكتوبه له .

على رنات بقى

وفي أحد القواميس الخنفاشرية " ميسدات " جايه من ميسد كول يعني ... أنا بالذات بأتعرض للموقف ده كثير في مصر .. فبحُسن نيه والله اللي بيرن عليه من الموبيل .. من الطبيعي إني أرُد .. فأول ما بأجي أعمل كده تنهال عليه عبارات التوبيخ لإني فتحت عليه الخط وأثرت في رصيده .. وساعات واحد من أصحابي يتكلف عناء المشوار عشان ييجي يوبخني وجهاً لوجه ... وأخيراً يختمها بـ " آه من أنت مش حاسس بنا وقاعد في السعودية بتاكل في قته محلوله " فحرمت بقى أفتح على حد إلا علية القوم زي أ /عادل أبو زيد أو الشاب الرووش إبن مصر ودول باتكلم معاهم بالساعات - شاكلهم سافروا لاسعودية قبل كده - .

يا بوب (مش عارف منين)

ده تاني تحذير لك يا معلم تابلي ..

يا حبيبي لو مش عارف حاجة .. إسألني على طول ..

دي يا عم من فيلم التجربة الدنماركية ... فبدل الواحد ما بيقى يقول لأابوه يا أبتاه .. أو دادي أو بابا ، أو ابوي ... إلخ أخره بقت تُختصر لبوب .... زي البوب يوحنا بولس كده ...

ودلوقت بقى تطورت إلى إن اي حد إسمه إيهاب بيتقاله يا بوب .

ياه فكرتونا بايام زماأأأأأأأأأأأأأأأأأأأأأأأأأأأأن

ما اعرفش الاحوال ايه دلوقتي بس انا فاكر ايام ما كنا في الجامعه كانت

اشطه

يعني حاجه كويسه حصلت

ولما الموضوع رطرط وبقت الشباب بيقولها عمال علي بطال غيروها وبقت

اشطه اتجوزت

ولا يهمك يا بودي ... إنت قولنا بس إنت وقفت لحد سنة كام وإحنا وراك على طول ..

يعني مثلاً إنت هاجرت بره مصر في العصر الحجري ( عبناصر )

واللي النُحاسي ( الزعيم المؤمن )

ولا العصر الجاهلي ( عصر مارينجوس وأولاده ) ؟

لإن كل عصر من دول كان له مفرداته .. ورجاله .. ومصطلحاته :wub:

[shawshank]

على رنات بقى

وفي أحد القواميس الخنفاشرية " ميسدات " جايه من ميسد كول يعني ...

<{POST_SNAPBACK}>

بصراحة يا سي السيد انت كده هتبوظ اللغة :sad:

اسمها: على رنات بقى .. ها

"ها" دي أهم من الرنات نفسها :)

يا بوب (مش عارف منين)

ده تاني تحذير لك يا معلم تابلي ..

يا حبيبي لو مش عارف حاجة .. إسألني على طول ..

دي يا عم من فيلم التجربة الدنماركية ...

<{POST_SNAPBACK}>

واحد هنا قاللي إن بوب يعني brother

هما السود هنا بيقولوا bro على brother

فيمكن عبال ما وصلت مصر بقت بوب :wub:

[mohamed]

يا مبهلش...ملهاش اي معنى mfb: ، بس بتتقال للشخص اللي تعبان في دماغه

[mohamed]

هارش؟؟؟

يعني فاهم؟؟

اوكشي دوكشي mfb:

والموضة الجديدة اضافة حرف الزاي في اخر الكلام

سلامز

[shawshank]

اوكشي دوكشي  :blink:

<{POST_SNAPBACK}>

اكيد دي تعريب: Okay Doky

:)

فيه كمان:

صبح صبح يا عم الحاج

[هادي]

صبح صبح دي ف توقيع اخوكوا اسكندراني

وأنا فتان .. وهاروح اقول له دلوقت انكوا ملمومين هنا

وعاوزين تسحبوا منو التوقيع

هييجي يقطع وشكوا

أقطع وشك دي قديمة برضه

حلت محل (أخلي وشك شوارع)

وبعدين راحت عليها

وحل محلها : العب ف وشك البخت (مش شايف لها أي معنى)

لكن فيه قاموس نزل السوق

ويمكن ف مكتبة مدبولي بسعر معقول

ده فيه آخر الافتكاسات الفنية

قرأت فيه أشعار !!! و زجل !!! وحبشتكانات من النوع ده

يا روش و آخر روشنة .. يا طبيعى من غير تنشنة ..

عيش عالناس كلها و متعش عليا انا

والحقيقة الشاعر المجهول هنا تفوق على نفسه

وسنجد أكتر من كلمة جديدة وكلها ايقاع و كحرته .. مثال

روش = ؟؟؟

تنشنه = ؟؟؟

عيش = ؟؟؟

وكده يعني

[shawshank]

يا سلام عليك يا هادي

و كمان عند أخونا الاسكندراني: يا برنس

اللي سي السيد بيقول عليها قديمة قال ... اهي طلعت جديدة طحن :wub: