هل هناك علاج للأكزيما ؟؟!!

[مصرية الهوى]

أنا بعاني من الأكزيما من وأنا عندي يوم واحد إلى الآن ...

طول فترة الصيف .. يعني تقريباً 6 شهور في السنة .. بأعاني من الحساسية والهرش .. أفضل أهرش لحد ماجلدي يتدمى :sad: ..

وخصوصاً إن الأجواء عندنا في السعودية في الصيف .. يا سلام سلم .. درجة الحرارة تصل 50 .. !!

وفي عز الصيف تشتد اوي .. لدرجة إن بصحى من النوم من شدة الألم .. مع إن التكييف يكون شغال .. والغرفة ثلج !!

رحت لتقريبا ً 5 دكاترة جلدية .. كل واحد يصرف لي مراهم كثيرة .. ومفيش فايدة !!

مرة سألت دكتور إذا كان فيه علاج يقطع الأكزيما نهائياً .. وقال :

لحد دلوقتي مفيش علاج للأكزيما .. لأنها مزمنة .. وعلاجها عبارة عن مراهم مسكنة بس..!!

ومرة صرف لي دكتور مرهم اسمه (كورتيدرم) فيه نسبة كورتيزون .. خفت الحساسية مدة أسابيع بعدين رجعت .. واستخدمته مرة ثانية .. وقل مفعوله .. وبصراحة خفت استخدمه تاني لأنه دكتورة قالتلي إن الأدوية اللي فيها كورتيزون مضرة جدا .. وبتسبب هشاشة العظام :o ..

أنا بصراحة باتعذب من الحساسية .. وطول عمري بادور على علاج ومش لاقيه ..

ياريت لو حد يعرف علاج لو حتى مش كيميائي يقولي ..!!

في جانب مشرق في الحكاية .. فيه دكتور بيقول إن الأكزيما مرض العباقرة ..

مش العبقرية باينه برضه :D !!؟؟

[Folana]

السلام عليكم ورحمة الله ....

أختى فى الله جيجى .....بالنسبة لمرض الاكزيما فهو مرض مناعى زى ماانت عارفة اكيد....زيه زى امراض جلدية كتير مثل الصدفية وغيرها ...بمعنى انه بيحدث تفاعل ذاتى بين جهاز المناعة وبين الجسم ويحدث به الاضرار دى من غير اسباب واضحة ..بيرجعها الاطباء عادة للحالة النفسية او الوراثة او زواج الاقارب الى اخره من اسباب للامراض الغير معروفة المصدر ..ولكن انا اعتقد انها بترتبط بصفة مباشرة بالحالة النفسية ...

واللى بيحصل فى حالتك انه بيحدث التفاعل ده ويظهر فى صورة اكزيما مزمنة تظهر على شكل بقع فى منطقة معينة من الجلد مثلا وتسبب فى هرش شديد جدا حتى تدمى على حد تعبيرك...

ومش بيكون السبب اتى من الخارج اكتر منه من داخل الجسم وعن طريق جهاز المناعة ..بس ايه اللى حصل واللى بيحصل ماحدش عارف على وجه التحديد والا كانوا وجدوا علاج للامراض الجلدية المزمنة مثل الصدفية والاكزيما ..الى اخره....وعلشان كده دايما الاطباء بينصحوا بتناول ادوية منشطة لجهاز المناعة ويوصوا باستقرار الحالة النفسية وعدم التعرض لانفعالات وضغوط عصبية ....

وفيه نوعين من الاكزيما ...1-حساسية الجلد المزمنة 2- الاكزيما العصبية

والنوعين غالبا مايستخدم فى علاجهم مراهم الكورتيزون لكن ده بيكون علاج مؤقت وسرعان ماتعود الحالة مرة اخرى ناهيك عن مضاعفات الكورتيزون ومنها كما ذكرت هشاشة العظام...

انت طبعا عايزة من الاخر:sad:..من الاخر ياستى انك لو اطلعتى على موضوع سى السيد الرائع العلاج بالماء حتلاقى فيه الجواب الشافى ..لان احد الدكاترة اكتشف علاج معظم الامراض بالماء الساخن ...

هى فكرة علاجه مبنية على اساس ان الطفيليات تصيب الطبقة الموجودة فوق الادمة من الجلد ففكر فى وسيلة للقضاء على الطبقة دى ..واختار الماء المغلى لاجراء تجربته ..ونجحت معاه التجربة واستنتج ان هناك اجساما مضادة لابد وان تكون قد تكونت ضد الطفيل ده وحيث ان الماء مركب طبيعى وليس كيميائى يبقى هى تأثيرها موضعى ومش بتمتص فى باقى الجسم يبقى لابد من انها أثارات جهاز المناعة بشكل او اخر فكون اجسام مضادة للفطر....

هو بيقول كمان انه جرب الاسلوب ده فى علاج الاكزيما المزمنة ونحج ...

بيقول ايضا انه بيلجا لغلى الماء لدرجة 95 درجة مئوية او يعنى نقول لدرجة الغليان ةبيحطها على مكان الاصابة بعد نزع القشور والطبقة القرنية ..واعتقد ياجيجى فى لحالة دى لازم يتم العلاج تحت اشراف طبيب متخصص ....

تعتمد طريقة العلاج واللى بتخضع لعدد من الجلسات حسب الحالة الى نزع الانسجة المصابة حتى لا تكون عازل بين حرارة الماء ةانسجة الجسم السليمة

ومما يذكر ان الطبيب ده بيقول ان الماء الساخن ممكن يستخدم فى علاج امراض مستعصية كتير جدا ...وده بيؤكد مقال الاخ الفاضل سى السيد عن العلاج بالماء وبيكمله ....

اهم شىء انك تبعدى عن الضغوط النفسية وتحاولى تاخدى ادوية مناعة طبيعية حتى زى حبة البركة والعسل الى اخر القائمة اللى بها مواد تقوى المناعة ...ومرة اخرى باوصيك بتمارين الاسترخاء اللى ذكرتها اختنا الفاضلة بنت مصرية ...واخيرا اعرضى الموضوع على الطبيب المختص وشوفى رأيه ايه ..وانا حاحاول ابحث لك عن اسم الطبيب والكتاب واكتبه لك لو حبيتى ....

,شفاك الله وعفاك .....

"اللهم انى اسألك باسمك المخزون المكنون الطاهر المقدس الحى القيوم الرحمن الرحيم ذى الجلال والاكرام أن تصلى على سيدنا محمد وان تشفينى من عندك بشفاء ليس بعده مرض من غير حول لى ولا قوة برحمتك يا أرحم الراحمين "

[مصرية الهوى]

ربنا يخليك _ مش هأقول يا طنط _ ايه رأيك في تيته .. مش حلوة برضه mfb:

ربنا يخليك يا فلانة ..

بس بصراحة انا مفتكرش ان الضغوط النفسية هي العامل الرئيسي .. لأنه حتى وحالتي فل الفل .. بأهرش ..

يمكن يكون زواج الأقارب .. لأن بابا وماما أولاد عم :D

أنا اعتقد ان العامل الرئيسي الحر .. والدكتور مرة قالي متأكليش : السمك، الموز، الفراولة ، اللبن ، الشوكولاته :sad: وحاجات كتير .. بس بصراحة مشفتش نتيجة .. حتى لو مكلتش الحاجات دي ..

وبرضه في الشتاء .. وانا باكل الحاجات دي .. بس الحساسية تروح !!

عالعموم أنا إن شاء الله هأعرض الطريقة اللي قولتيها على الدكتور .. وهأشوف رأيه ايه ..!!

وكذا مرة استخدمت العسل وزيت الزيتون بس منفعش ..

عالعموم ربنا يسهل وازور الدكتور ..

ومعليش ياحبيبتي تعبتك معايا ..

:o

[Folana]

السلام عليكم ورحمة الله .....

لا ياستى يا اما تقولى لى يانيينا يااما مش لاعبة ...يعنى كل مرة تشوفينى تدينى وردة وانت ماشية وتقولى لى مساء الخير يانينا ...

انا طبعا بالنسبة لك طنط ونص وتلات ترباع كمان بس انا باحب العلاقة تكون طبيعية وجميلة زى ماهى بينا جميعنا مادام فيه مبدأالاحترام بين الجميع يبقى خلاص مافيش داعى تكلفى نفسك كل مرة وتشترى لى طنط وانت جاية خلى البساط احمدى يعنى .....ادينى قرشين فى ايدى واانا اسكت ...واديك شايفة سى السيد عمال يديى الباجور نفس هناك فى موضوع نفسك تعمل ايه..طبعا هو نفسه يولعها ... :lol:

ندخل فى المفيد ..بصى ياحبيبة تيزا....اى مرض مالوش سبب بيقولوا انه بسبب جواز الاقارب او حالة نفسية ..وبالاخص امراض الجلد مثل الاكزيما والصدفية والبهاق..اما الحر والموز واللبن والشيكولاتة ..الخ ..فدى عوامل مساعدة لاثارة الحالة ...وبما انها حساسية فمن الواجب ان الدكتور يمنع عنك مثيرات الحساسية ..لعل وعسى تكون احد الاسباب ..اما الضغوط النفسية والحالة المزاجية ...فمحدش بيقول او بيحس اصلا انه بيمر بحالة نفسية او مزاجية مش مظبوطة او انه عنده ضغوط نفسية ...الا اللى عندهم استبصار بالمواضيع دى ...يعنى يعرفوا ازاى يمسكوا نفسهم متلبسين وهم عرضة للضغط العصبى او القلق الى اخره ...انا باقولك بس علشان تكونى ملمة بابعاد الموضوع ...الحر عامل بيساعد على ظهور الحالة ...على العموم تابعى مع الدكتور وربنا معاك ............ :wub:

[se_ Elsyed]

انت طبعا عايزة من الاخر:lol:..من الاخر ياستى انك لو اطلعتى على موضوع سى السيد الرائع العلاج بالماء حتلاقى فيه الجواب الشافى ..لان  احد الدكاترة  اكتشف علاج معظم الامراض بالماء الساخن ...

إحم إحم

هات يابني السماعة والبالطو ومفتاح 14

في الواقع ومن خلال خبراتي الطبية العريضة - قوي - أحب أقول إني فهمت من مقالي اللي نشرته مؤخراً في كل المجلات الطبية والفنية عن العلاج بالميه إن العلاج بالمياه بيكون عن طريق الشُرب ...

أما إننا نسخنها على البتوجاز - المياه مش جيجي طبعاً - لحد درجة 95 ونقوم جايبين الطشت ودلقين الميه وهي بتغلي وتفور على جيجي .. فده لسه ما أعرفوش .. وهانشوف النتيجة بعد ما نُجري تجربة عملية علىها .. فإذا إلإكزيما راحت وإيدها كمان راحت .. يبقى التجربة فشلت ..

أما إذا الإكزيما ما رحيتش بس إيدها هي اللي راحت .. يبقى هانستعوض ربنا ونعتبر الإصابة دي من نسبة الـ 25 % وهو الفاقد المسموح به طبياً .

ألف دال سين سين

[Folana]

السلام عليكم ورحمة الله ............

ايه ده بقى ده بقى ده ..ايه ده ده...يعنى انا كدابة ياس.س. ..انت حتطير منى الزبونة ولا ايه ...خليك معايا ياجيجى يابنتى ...هو فعلا سى السيد بيعالج بالشرب بس انا باعالج بالكى ....

طب والله تالله بالله انا باتكلم صح ..حتى بالامارة الدكتور ده اسمه سمير عبد الرحيم ....وعلشان مانزعلش مننا الناس اللى فوق فى الادارة يعنى ..كلام سيدنا س. يمشى على راسنا فعلا العلاج بشرب المياه برضه وارد واساسى ...يعنى لازم تشربى لك 8 اكواب مياه فى اليوم على الاقل ...ولازم تاكلى اطعمة غنيه بافيتامينات والاملاح المعدنية...زى الخس والخيار والفجل والبصل والمكسرات ...وانواع الاجبان والعنب والاناناس ....

وانا حانقل عيادتى من هنا ..والرزق على الله :lol:

[ام البنات]

سلامتك يا جى جى

الف سلامه

انا زيك وبناتى حبيباتى واخدينه منى

الاكزيما عندى من غسيل الصحون وايضا" اول ما الحاله المعنويه تبقى محتاجه الشؤن المعنويه لجيوش العالم

بتبقى الاكزيما مقولش لك وطبعا بتبقى ساعات زى الجرح بالسكينه

بس انا ساعت اطنشها لغايه ما ابقى هتجنن

ومره استعملت زيت الزعتر حامى جدا" وخلى ايدى زى المحروقه بس بعد كام يوم راحت خالص والميزه الوحيده انى مستعملتش كورتيزون

علشان مش بيعالجها فى ساعات غير دواء اسمه ديبرزون

اما ابنتى الكبيره فبيجى لها على شكل بقع حمراء جافه وبعدين وشها يبقع زى العيال الى مش بيكلوا من سنينن وكل الى يشوفها

يقول لها حرام عليكم اكلوها وشها مبقع

ومهما افهمهم انها إكزيما مفيش فايده واصل البنت معصعصه علشان كده محدش بيصدق

آجى بقى لصروخ الارض جو ابنتى الصغيره عندها إكزيما وكمان صدفيه

شوفتوا

مستشفى الجلديه عندنا فى البيت

الاكزيما بتاعتها والصدفيه مرتبطين بالتهابات الحلق وده من الدكتور مباشرة دون تحريف

والخلاص هى مولوده بدرى وعندها جهاز المناعه فى اعطال مستمره وصيانه دوريه لذا التهابات الحلق مستمره وبالتالى ايه

تمام

جى جى قلبى عندك والله ادعى لى معاك

فولانه اوعى تمشى وتسيبينا بلاش الميه المغليه العيال صغيرين

وخليها ميه فاتره

وربنا يخليك لينا يا ايتها الطبيبه المداويه

اختكم ام البنات

تم تعديل 24 ديسمبر 2005 بواسطة ام البنات

[Folana]

السلام عليكم ورحمة الله .......

ام البنات ..استنى بس ..انت بتتكلمى فى موضوع مهم ويهمنى شخصيا ....اولا ربنا يشفيليك بناتك يارب ..بس بالنسبة لبنتك اللى عندها صدفية ...بتعالجيها ازاى ؟....انا اصلى بنت اخويا كده من وهى عندها تلات سنين ...ولقينا بها عند جميع اصناف دكاترة الجلدية ...حتى انا شخصيا كشفت عليها ;) وطبعا انت عارفة كل الادويى فيها كورتيزون ...لكن كانوا قرأوا فى مجلة عن دكتور بيعالج البهاق والصدفية ..هو اصلا كان مريض بهاق وشفى منه ...وهو بيعمل تركيبة خاصة بها ...بس للاسف لا فاكرة اسمه ولا عنوانه ...التركيبة دى جابت نتيجة كويسة لكن الصدفية بتعاود الظهور تانى وخصوصا فى الشتا او لو البنت اتضايقت او تعرضت لضغط نفسى ......انت بقى بتعالجى بنتك ازاى ومع مين ...معلش ان كنت بادخل فى خصوصيات بس احنا بنساعد بعض ..وربنا يشفى مرضانا جميعا ....ان شاء الله :)

[سهيلة]

الأكـزيمــــــا

الأكزيما عبارة عن اضطراب جلدي يتميز بالحكة والالتهاب وتكون البشرة أحيانا ملتهبة وجافة ومتورمة، ومكسوة بقشرة أو تنضح بالسوائل، وللأكزيما أشكال متعددة ويمكن تصنيفها الى قسمين رئيسين هي. التهاب الجـلـد الأكزيمي الخارجي، والتهاب داخلي المنشأ او ما يسمى الالتهاب البنيوي.

ويسبب التهاب الجلد الأكزيمي عوامل خارجية، مثل التأثير التهيجي لمنظفات الأوساخ على البشرة، وليس للأكزيما الداخلية سبب ظاهر، وتنقسم الأكزيما الداخلية المنشأ الى خمسة انواع فرعية هي: الأكزيما التأتبية، واكزيما بوومبفيكي، والأكزيما المثيه، واكزيما الدوالي، والأكزيما القرصية.

والأكزيما التأتبية والتي تسمى ايضا الجلد التأبتي تميل الى الانتشار في العائلات،وتبدأ معظم حالاتها في مرحلة الطفولة، وتنمو بسرعة فائقة عند الثالثة او الرابعة من العمر، ويستمربعضها خلال مرحلة البلوغ او الرشد، وتتهيج من وقت لآخر خصوصا حين يكون الضحية مضطربا أو غاضبا او قلقا.

اما الأكزيما المعروفة بالنوع البومبفيكي فيمكن رؤيته على الأيدي والأقدام، وينتشر عادة بين الأشخاص الذين في العشرينات او الثلاثينات من اعمارهم، اما الأكزيما المثية فتكون على هيئة صفيحات قشرية على الوجه وفروة الرأس وتكون الصفيحات في الأكزيما القرصية الشكل على هيئة قطع معدنية، وتبدو واضحة المعالم، أما أكزيما الدوالي فتظهر بسبب ضعف الدورة الدموية في الأرجل وهي كالازيما القرصية تحدث غالبا عند المسنين من الناس..

الاعراض

رحلة الانسان مع الأكزيما الجلدية تبدأ بظهور احمرار مع قشور في الخدين ‏ ‏في سن ثلاثة اشهر وتمتد الحالة إلى الرجلين على شكل احمرار وقشور وتسلخات سطحية ‏ ‏مصحوبة بحكة شديدة وتمر الحالة بنوبات تحسن مع بلوغ الطفل ثلاث سنوات ولكن بعض ‏ ‏الحالات قد تستمر في المعاناة طوال فترة الطفولة والمراهقة والشباب

علاجهـــــــا

أما علاج الأكزيما فيتوقف على معرفة السبب ويشتمل العلاج على استخدام مراهم الكورتيزونات او الكريمات،

وعلى فكرة يا جماعة مافيش خوف خالص من استخدام مراهم الكورتيزون لفترة طويلة بشرط استخدامها تحت اشراف طبيب وبانتظام يعنى بجرعة مناسبة هوة الخوف اكتر بيكون من استخدام الكورتيزون عن طريق الفم او الحقن بيكون على االاقل حقنة كل ستة اشهر ولا تكرر قبل ذلك

يستخدم ايضا اقراص مضادة للهستامين للتقليل من الاحساس بالحكة الجلدية

" نصائح للمصابين بالأكزيما "

ـ عند الاستحمام استخدم الماء الدافئ قليلا ولا تستخدم الماء الساخن ويفضل ان تضيف الى الماء قطرات من زيت اللاونده او زيت البابونج وبعد الانتهاء من الحمام أدهن جلدك المصاب باي من زيت الزيتون او زيت اللوز.او اى مرطب للجلد

ـ كما يفضل لبس الملابس القطنية حيث ان ألياف القطن تسمح للجسم بالتنفس.

ـ مارس الرياضة حيث ان الرياضة تزيد من دوران الدم جيدا ولكن عليك بغسل العرق مباشرة بعد الانتهاء من التمارين.

ـ عليك التقليل من الأكل المقلي والأكلات المضافة لها السكر والألوان الاصطناعية والمنكهات

**اختيار الملابس القطنية

**التقليل من مرات الاستحمام وذلك لان الماء والصابون يجفف الجلد ويساعد على الحكة

**التقليل من المجهود ‏ ‏العضلي في الجو الحار لان العرق يسبب حكة جلدية

**الابتعاد قدر الإمكان عن ‏ ‏الاستحمام بالماء الساخن باعتباره أحد العوامل المساعدة على احتمالات زيادة ‏ ‏التهاب الجلد.‏ ‏

**الإبتعاد عن الحيوانات والطيور لان ريشها وشعرها يسبب‏ ‏الحساسية

**تجنب ملامسة الأشجار المزهرة وخاصة في موسم حبوب اللقاح

‏ أن تكون غرفة الشخص المصاب قليلة المفروشات وأرضيتها خالية من السجاد والموكيت .‏ ‏

**تجنب التعرض للحرارة أو ‏ ‏الرطوبة الشديدتين .

**استخدام الألبسة القطنية دون غيرها.

**المحافظة على جلد المصاب‏ ‏رطب بأحد الدهانات المعروفة.

**عدم استعمال المستحضرات والمنظفات التي تسبب تهيج ‏ ‏الجلد.

**الالتزام بإرشادات الطبيب.

**استعمال المستحضرات التي توصف عادة لعلاج هذه ‏ ‏المشكلة.

اتمنى للجميع الشفاء العاجل

[مصرية الهوى]

أهلا بيكي يا أم البنات ..

ربنا يشفيكي أنتي وبناتك ويخليهم لك وتشوفيهم عرايس ان شاء الله ..

أنا الأكزيما اللي عندي بتتركز تقريبا في منطقة الساقين أكثر حاجه ، احيانا بتجيلي في منطقة الذراعين بس على خفيف ..

تشتد عندي في الصيف اوي اوي ، في الشتاء بتجيلي أحيانا على خفيف يعني اهرش بس من غير مااتدمى ..

وغسيل الصحون بيسببلي حساسية في كفي وقدمي ، بس يعني فترة بسيطة ويروح ، .. وأحياناً لما باستخدام بعض الكريمات المعطرة بتهيج الحساسية ، عشان كده بأحاول ابعد عن كل الحاجات دي.. لعل وعسى .. وزي ما قلتي حضرتك احيانا باطنشها بس مش اتجنن وبس ، والله العظيم ساعات اقعد اعيط زي البيبي :) وخاصة لما باصحى من النوم من شدة الالم ..

يعني على كده هتبقى الاكزيما وراثية ؟؟!!

يلا الحمد لله على كل حال ، كله بثوابه ..

فلانة الحمد لله على السلامة نورتي عيادتك :) ..؟؟ . أنتي قلتي هأنقل العيادة .. باين كده ان الموقع اللي روحتي له مكانش فيه زباين .. ورجعتي لمكانك الاولاني .. ياستي ماهي الاولى تحلى لو كانت وحله ;)

سهيلة ،، ربنا يخليكي على نصايحك الجميلة ..

وربنا يشافي كل المرضى يارب ..

[وجهة نظر]

الاخت الفاضلة : :)

شفاك الله وعافاك وكل المسلمين من كل داء ,

اسأل الله ان يوفقنا لما فيه الخير واستعيني بالله وجربي العلاج البديل ارشدك بعد الاستعانة بالله الي موقع جميل متخصص في العلاج بالاعشاب وحاولي لعله فيه خير وقد جربته في امور اخرى وكانت التجربة اكثر من رائعة لذا احب ان تتطلعي عليه وتجربي وقد يفيد في اي اشياء اخري كثيرة لكافة الاخوة الرواد للموقع وانصحوا به وسلامتكم ;)

http://www.khayma.com/hawaj/sickness/aqzaima.htm

[سهيلة]

بصراحة يا جماعة انا لا انصح باستخدام الاعشاب ف الامراض الجلدية

على فكرة دة تخصصى انا دكتورة امراض جلدية والنصائح اللى قولتها ليكو دى من كتب طبية

فكرة معارضة الاعشاب هنا ان اللى بيوصفها غالبا عطار ومالوش ف اى حاجة يعنى مرة جابت نتيجة مع عيان فبيوصفها ودة مش معناة انها تجيب نتيجة مع التانى لان الحالات عمرها ما كانت متشابهة

بصراحة يا جماعة انا اخالف الراى مع وجهة نظر ف موضوع لالاعشاب دة

لان لا اتعمل عليها تجارب ولا ابحاث

ويا ما بنشوف حالات بتسوء مع استخدام الاعشاب

فخدوا بالكم جيدااااااااااااااااااا

تحياتى

[ام البنات]

السلام عليكم ورحمة الله .......

ام البنات ..استنى بس ..انت بتتكلمى فى موضوع مهم ويهمنى شخصيا ....اولا ربنا يشفيليك بناتك يارب ..بس بالنسبة لبنتك اللى عندها صدفية ...بتعالجيها ازاى ؟....انا اصلى بنت اخويا كده من وهى عندها تلات سنين ...ولقينا بها عند جميع اصناف دكاترة الجلدية ...حتى انا شخصيا كشفت عليها  :) وطبعا انت عارفة كل الادويى فيها كورتيزون ...لكن كانوا قرأوا فى مجلة عن دكتور بيعالج البهاق والصدفية ..هو اصلا كان مريض بهاق وشفى منه ...وهو بيعمل تركيبة خاصة بها ...بس للاسف لا فاكرة اسمه ولا عنوانه ...التركيبة دى جابت نتيجة كويسة لكن الصدفية بتعاود الظهور تانى وخصوصا فى الشتا او لو البنت اتضايقت او تعرضت لضغط نفسى ......انت بقى بتعالجى بنتك ازاى ومع مين ...معلش ان كنت بادخل فى خصوصيات بس احنا بنساعد بعض ..وربنا يشفى مرضانا جميعا ....ان شاء الله  :huh:

<{POST_SNAPBACK}>

اختى فلانه

الحكايه زى بنت اخوك بنتى عندها الآن 4 سنوات ونصف واكتشفنا المرض من سنتين تقريبا"

وبدات ببؤرة صغيره فى آخر راسها افتكرتها اكزيما لانها جت لها قبل كده وهى عندها شهو ر( الاكزيما) فكانت شبهها

لغايه مابدأت تنشف والبنت تهرش رحت لدكتور ممتاز قال لى دى صدفيه وان شاء الله ربنا يقدرنا ونسيطر عليها

المشكله ان الدكتوره ده فجأة اختفى ومش عارفين نوصل له

رحت لدكتور تانى قال ان الصدفيه عندها مرتبطه بالتهابات الحلق وطبعا ابنتى اميره والتهابات الحلق عندها كده زى النفس الخارج والداخل

اهم شئ فى الموضوع ده انه ادانى تركيبه من الصيدليه فعلا بتساعدها وةبتقف خالص

ولكن الحقيقه المشكله لما يجى عندها الالتهاب الحلقى وانا بدأت معاها علاج طب بديل اسمه الهيمويوبثى

ممنوع اخد مضادات حيويه فيه هو بيجيب نتائج رائعه بس الدكتور بتاعه قالى مش مشكله التركيبات وطالما مفيش كورتيزون ولا مضادات عادى

وطبعا بيجى فى بطنها على شكل حبايه رفيعه صغيروه

وفى فروة الراس هو الى بينشط ويهدا

وده مرتبط فعلا بالزعل والشتا والحموم اللكتير

مش عارفه يعنى مزعلهاش ازاى ومحمياهاش ازاى وازاى الشتا ميجيش

بس فى الآخر وانا مش طبيبه انا محاسبه معتزله الفن اقصد العمل

سمعت انه بيجى من نقص المناعه

اسم التركيبه ااقدر اقول عليها بس اجيب الروشته

وكماان اسم الدكتور

بس عيادته فى مكان لطيف مش زحمة ولا دوشه

ولا اى حاجه فى ميدان حلمية الزيتون

وأى تفاصيل تحبى تعرفيها أهلا وسهلا بيك فى الخاص مع كوباية قهوه محوجه وقرقوشتين

ايه رأيك

[Folana]

السلام عليكم ورحمة الله ...

ام البنات العزيزة ....والله انا شايفة ردك من السنة اللى فاتت بس كل مااجى ارد عليك يكون جالى حول من الكتابة اروح قايمة ...ياستى ربنا يجازيك خير انشاء الله ويشفى لك بناتك ....معلومات جميلة بس ياترى ممكن اسم الدكتور ؟

هم اصلهم لفوا بها عند كل دكاترة الجلدية ...بس هى البنت متوترة على طول فعلا ...انا مش فاهمة اطفال ايه دول اللى عتدهم ضغط عصبى ...وراها طبيخ مثلا ولا متخانقة مع جوزها ولا ايه مش فاهمة ؟؟؟ :) نسأل الله السلامة ...

بخصوص القرقوشتين ...انا فى الخدمة ..اى وقت محتاجة مساعدة فى قرقشتهم ابعت لى على طول ...انا احب القراقيش جدا وخصوصا اللى محشية عجوة ..بس البيتى ..لو بتعرفى تعمليها ادخلى المطبخ واكتب لى وصفتها ...

كل سنة وانت طيبة ...بوسى لى بناتك .... mfb:

[ايناس احمد]

الى دكاتره المنتدى الكرام

ابنى عمره 4 شهور ويعانى من الاكزيما منذ حوالى 3 شهور احنا مقيمين فى السعوديه فى المنطقه الوسطى وطبعا ظروف الجو وحشه جدا وطبعا عرضته على دكتور جلديه وشخص الحاله انها إكزيما وتظهر على شكل احمرار شديد فى الجلد وخصوصا فى منطقه خدوده ورجليه واايديه وبيهرش فى وشه لحد مايجيب دم وطبعا الدكتور كاتب له كريم الفا كورت ودا طبعا فيه نسبه كورتيزون وكريم تانى ملطف للبشره ومضاد للهيستامين نقط فينيستيل بس اليوم اللى محطش فيه مرهم الكورتيزون وشه يلتهب جدا وطبعا مدوخنى طول اليوم صريخ لانه مش عارف ينام ومبقاش ينام دلوقتى الا بنقط الحساسيه واللى قالقنى راسه بتعمل قشور بشكل رهيب الدكتور قالى متستعمليش على رأسه الا زيت جونسون وتزال القشره لما بسرحها له وترجع تانى يوم وزادت حالته واصبحت رأسه فجأه تشقق وتجيب دم واحيانا ماده لزجه فأنا مش عارفه اعمل له ايه وخصوصا ان الدكتور اللى متابعه نزل مصر أجازه واحنا فى منطقه تبعد حوالى 500 كيلو عن الرياض او جده فمش عارفه أعمل ايه

فأنا طالبه مساعدتكم اللى عنده معلومه أوخبره فى الموضوع دا أو عنوان دكتور جلديه فى جده أو مكه أعرضه عليه لاننا نازلين نعمل عمره قريب ان شاء الله وانا بحاول ان لبسه يكون أقطان معلشى طولت عليكم لكن والله الولد تاعبنى جدا ومتعشمه فى مساعدتكم وجزاكم الله خيرا

[ايناس احمد]

ايه ياجماعه مفيش اى حد فى المنتدى عنده معلومه هو السؤال صعب قوى كدا ولا ايه افيدونى الله يخليكم

[crossfield]

دى نفس حالة ابنى... معلش ربنا يشفي ابنك

أنا ابنى الدكتور كتبله على كريم غالى شوية لكن مفيهوش كورتيزون خالص اسمه elidel انبوبة صغيره كده ب 120 جنية و بادهن له كمية صغيرة قوى و تدلكيها كويس على المناطق المصابة (بلاش اهدار للكريم لانه غالى و هتستعمليه على طول) لما الاكزيما تختفى توقفى و لما ترجع تانى ترجعى الدوا و هكذا.

بالنسبة للقشور اللى فى راسه دى غالباً فطريات و الدكتور الجلدية بتاعه كتب له على مطهر اسمه Cyteal

للحموم و جاب معاه نتجة رائعة الولد كان زى مايكون مبطوح فى قورته و جرح مفتوح و صديد لكن بعد المطهر ده راحت خالص و الحمد لله (المطهر ده للشعر و الجسم على فكرة) لكن احذرى يلامس العين.

الايليدل (الكريم اللى فوق ده) مرة واحدة الصبح و بالظهر وبالليل باستعمل له كريم اسمه كاميزان Camisanده طبيعى برضو و خالى من الكورتيزون و الأنبوبة ب 6 جنية هنا فى مصر , ده برضو خلاصة زهرة البابونج...

جربى الأدوية دى و خدى بنصايح الدكتورة سهيلة اللى موجودة فى الصفحة اللى فاتت و زودى عليها الآتى

لما تحمى الولد بلاش تحكى الجلد جامد بشوييييييييش خالص و بسفنجة ناعمةةةةةةةةةةةة و بشويييييييييش و بلاش الصابون العادى استعملى السيتيال المطهر اللى فوق لفترة لحد ما الفطريات تختفى و بعدها ممكن تستعملى صابون Pearl و عموماً بلاش النظافة عمال على بطال علشان الجلد مينشفش بزيادة يعنى مرة فى الأسبوع رضا ده لسه أربع شهور لكن لما الحر يهل كل يومين حميه

بعد الحمام بماية فاترة نشفيه بشويييييييييييش باللمس مش بالحك تشيلى الفوطة و تحطيها و بعدين تدهنى جسمه (الجسم فقط مش الوش بكريم اسمه Atoderm po zinc)هنا بحاجة و ستين جنيه

الفنيستل و مضادات الهستامين متكتريش منها جربى الأدوية و الارشادات اللى فوق دى و هتدعيلى بعد اسبوع من دلوقتى.

دكتور ابنى اسمه حامد عبد الله فى شارع مراد (دكتور جلدية) و اللى فى السعودية يقولوا لك على حد هناك و ربنا يشفيلك ابنك علشان تعرفوا تناموا انتوا الاتنين. تحياتى

تم تعديل 1 أبريل 2010 بواسطة crossfield

[ايناس احمد]

الف الف شكر ليكى يامدام crossfield والف سلامه على ابنك انتى كمان معلشى اتأخرت عليكى فى الرد بس والله شاغلنى جدا وتاعبنى وانا حاولت اجيب الادويه اللى قلتيلى عليها بس للاسف ملقتهاش هنا عموما متشكره قوى وربنا يشفى اولادنا جميعا

[Alrefaey]

الف الف شكر ليكى يامدام crossfield والف سلامه على ابنك انتى كمان معلشى اتأخرت عليكى فى الرد بس والله شاغلنى جدا وتاعبنى وانا حاولت اجيب الادويه اللى قلتيلى عليها بس للاسف ملقتهاش هنا عموما متشكره قوى وربنا يشفى اولادنا جميعا

elidel متوفر هنا بالمملكة يامدام ايناس وهو علاج ممتاذ للأكزيما بس يصرف تحت اشراف طبى ويستخدم بكميات قليلة وبعدعمر ثلاثة شهور

عموما اتبعى الاتى قدر الامكان

لو كان البيبى بيرضع حليب صناعى اوقفيه وغيرة بحليب اخر يكون مضاد للتحسس وهنا انواع كثيرة بيكون مكتوب عليها HA

لو كان بيرضع طبيعى حاولى ان تبتعدى عن الوجبات التى من الممكن ان تسبب حساسية للبيبى والتى بخبرتك عاهدتيها بتسبب له حساسية بعد تناولك لها

ابتعدى تماما عن العطور والروائح النفاذه والصابون واستخدمى للطفل صابون بدون روائح وبدون مواد مستحسة زى سيباميد وجونسون

استخدمى بالبيت جهاز منظم للرطوبة لحماية جسم الطفل من الجفاف الشديد

ممكن ان تستخدمى كلامينا لوشن لجسمة للتخفيف من الحكة والاحمرار

استمرى على المرهم الذى وصفه لكى الطبيب ولكن بكميات اقل

واخيرا نسأل الله لكم الصحة والعافية

[ام محمد]

مرحبا الاكزيما ممكن علاجها باستعمال ورق الملفوف على المكان المصاب اكتر من مرة في اليوم