مُحاكمة علنية للزميل سُقراط المصري بتهمة التوقيع

[se_ Elsyed]

وهنا يدلُف إلى داخل القاعة شاب في الأربعينات من عمره ضخم الجُثة .. قصير القامة .. يرتدي ملابس الطباخ وفوق رأسه زمبيلاً أبيضاً من اللي الطباخين بيلبسوه عشان يخبو فيه السمنة واللحمه والحاجات من دي ...

بودا تيبك الأصل

بودا : أنا بودا يا سعادة القاضي

آدفايزر : إسمك وسنك وعنوانك .. أما وظيفتك فباينه من ريحة البصل والتقلية ..

بودا : بودا عبد الحق بودا .. 53 سنة ... صاحب ومدير محلات " كُل وبعدين أُشكُر " ... كل اللي أعرفه يا سعادة الباشا إني كنت قاعد مره في المطبخ بأشوح حتيين لحمه للزملاء الجعانين ودخل عليه هذا المتهم اللي إسمه سين سين وطلب مني وصفة صينية الرقاق باللحمة الضاني .. بس خلاص .

آدفايز : يعني لم يطلب منك في أي مرة من المرات طريقة عمل الفول أبو كمون ولمون ؟

بودا : ما حصلش يا باشا ولو حصل كنت أقول حصل لكن ما حصلش حقيقي .. ريلي .

آدفايزر : شكراً .. إتفضل روح إستحمى .. قصدي روح روح . .. شد يا متولي اللي بعده .

متولي : شاعر الرومانسية .. الشهير بمرات قيس ...

شاعر الرومانسية : ما تحترم نفسك يا جدع إنت بدل ما أخبطك قصيدة هجاء أجيبك الأرض ... مرات قيش مين وخالتي أم محمد مين ؟ .. إسمي إمرؤ القيس يا جاهل ......

أفندم يا سيادة الآدفايزر ..

يُتبع بعد وجبة الغداء .. أحسن سيرة بودا وشاعر الرومانسية جرت ريقي ..

[إبن مصر]

يدخل الى قاعه المحكمه وهو يرتدى بيجامته الشهيره المخططه بالطول ويحمل صينيه على رأسه ويتوجه فورا الى سى السيد...

أحمد : سى السيد حبيبى انا جبت لك المعلوم وكمان فيه طبق دقه زياده لزوم لطعميه يعنى وطرشــــ...... هو في ايه... انت ممسوك ليه .......انت رجعت للسياسه تانى؟؟؟؟

سقراط: الله اكبر ظهر الحق أهو ..... أحمد جايب له دقه وطعميه يعنى مش محروم واين يا سياده المستشارين فى قاعه العداله .... هنا فى بيت القانون...

أحمد: بيت الأنون!!!!!! ايه يا سق...فى ايه يا عم ايه الكلام الكبير ده !!!!!!

الادفايزر محدثا نفسه: لا حول ولا قوه الا بالله... الاعضاء بيتساقطوا زى الذباب .... اييييييييييه فين ايام زمان كان كل واحد منهم بيتاقلوا يا بو مخ الكترونى... دلوقتى مخهم بقى حلزونى....

الادفايز:انت يا زفت يالى اسمك سى السيد... يعنى مانتش محروم ولا حاجه؟؟؟؟؟؟؟

كل هذا الوقت وسى السيد ينظر فى دهشه الى احمد والجميع وهو فاغرا فاه

سى السيد: الله يخرب بيتك .. الله يخرب بيتك من يوم ما لسعت بعد امتثال وانت مودينى فى داهيه... انا طلبت منك يا راجل انت تيجبلى حاجه ...!!!!!!! انا قولت لك تجيب لى حاجه ؟؟؟

أحمد : لأ.....بس قولتلى حصلنى على المحكمه عشان سقراط ها نلبسه فى الحيطه بسبب الفول خفت على سقراط حبيبى وعارفك طفس قومت جايب لك فول بالزيت الحار وطعنيه اسكندرانى ودقه على بتنجان مقلى وعيش بلدى سخن من ابو شلم......

سكوب: أه يا ناقص ما انت عارف ان معايا سميط كان لزمته ايه العيش ..

سقراط: حرام عليكم حرام عليكم ...... والنبى يا سى السيد لقمه واحده ... يا بنى انا كنت باكتب عنه بس .... بلاش العذاب ده؟؟

أحمد: عذاب..... ايه العيال الناقصه دى...... انت ياد يا عصام ....... يا عصااااااااااااااااام

عصام: ايييييييييييه سورتنى عايز ايه؟

أحمد: هات قفص العيش وحصلنى نعمل سندوتشات أحسن......

يتبع بعد قليل .....

( أه يا سى السيد انت وسقراط لو تعرفوا عملت انا ايه عشان اكتب الكلمتين دول هاتعرفوا انت غليين عندى قد ايه)

[سقراط المصري]

يالههههههههههههوي يالههههههوي

بهذا النغم الاصيل ، دخلت شعنونه قاعه المحكمه

سقراط: بس بس كفايه ، هو انت ماشيه في جنازة ديك مسلوخ.

شانا: سقرااااط ، حصل إيه بس ، هو مش لازم اجاملك وعملك منظر واخليك سيما وقيمه.

احمد محمود: سيما وقيمه ، إيه كلام المثقفين ده ، ماتكلمينا عربي يا هانم، الله يرحم عربيه الرش.

شانا: انا بتاع عربيه رش ، كيف تجرؤ يا هذا على مثل هذا القول؟

عصام شوقي: اااااااه اهي قلبت على مختار الصحاح

هادي: ياجماعه صلوا على النبي ، امشي من وشها يا احمد يا ابن محمود الساعادي ، دي شانا يابني وانت مش قدها.

احمد محمود: لا لا لا انا قدها وقدود كمان ، يا ربي هو انا كده هفضل مظلوم في البيت وفي الشغل وحتى في المحاورات.

سكوب: معلش يا ولدي ، خد صميته مني مع شويه دقه وهدي اعصابك.

تقترب شانا من اذن سقراط وتقوله : اسمع ، انا اتفقت مع بنت مصريه ، وفولانه، وصفاء ، وجيجي ، على حاجه خطيره قوي.

سقراط : استر يا ستار ، اهو انا مابخافش غير من ودودة الحريم مع بعض.

شانا: اسمع بس ، احنا هنخطف سي السيد.

عصام : إيه ، نخطفوا مين ، يانهار ملحوس.

سقراط: يا ابونا خليها تكمل كلامها

شانا: هنخطفه ، ونحطه اودة الفيران اللي هنا ، وهنجين مقص ونحلق له زي حسام حسن، وندهن راسه بكبريت ، ونعلق على صدره ورقه مكتوب عليها توقيع احمد محمود.

سقراط: لا لا ، انا طالبت بالفول بس ماتوصلش لدرجه ان اركب سي السيد حمار وامشي اجرسه في الشارع.

عصام شوقي ببلاهة وعبط : هيء هيء وانا امسك طبله وازفه في المحاورات واقول ، من ده بكره بقرشين.

سكوب: ياعالم الرحمه

سقراط: خلاص يا سكوب مش هنعمل كده فيه خلاص اتنيل واسكت.

سكوب: لا انت فهمتني غلط ، انا بقول الرحمه عشان معايا صابعين موز عاوز ابعهم عشان اكمل على حق خمس سجاير فرط

عصام يضع يده في جيبه ويخرج عقب سجاره ويعطيه لسكوب ويقوله: خد مشي حالك بالخرطوش ده.

سكوب ممسكاً بالعقب: خرطوش ، بتسمي ده خرطوش، شكلك كنت مدفعجي في الجيش.

عصام: وحياتك وغلاوتك يا سكوب، انا شربت نص العقب في العيد الصغير وكنت مخلي النص التاني للعيد الكبير ، بس مش خساره فيك ، واهو عيدك قرب ، روح ظبط بفس بالعقب على ماتكمل حق السجاير الفرط.

يالههههوي يالهووي

مره اخرى تطلق شعنونه السينفونيه الخمستاشر للخنفنجي مجاملة لسقراط.

[se_ Elsyed]

طب معليش ... حقك علينا يا سي إمريئو القيس ...

آدفايزر : إسمك وسنك وعنوانك ..

شاعر الرومانسية : شاعر الرومانسية .. الشهير بإمرؤ القيس .. بأشتغل مساعد شيف في نفس المطعم اللي شغال فيه بودا وكده ...

آدفايزر : تعرف إيه عن الحادثة .. وخلي كلامك ني في ني .. يعني خلص بسرعة أنا مش فاضي ورايا عيال ..

شاعر : يا أفندم معلوماتي كلها تنحسر في تعاملي في بعض الأحيان مع الأخ سين سين لما يكون له طلب في المطعم وبييجي ياخد طلبه ويمشي وساعات ما بيدفعش الحساب ويبلطج على أساس إنه مشرف ... فِرده يعني وكده ... لكنه لم يسألني في أي مرة عن وصفة الفول بالرغم من إننا حطينها في كتاب الوصفات بتاعنا ... لكن الشهادة لله ما سألينش قبل كده ولو كان سألني كنت جاوبته .. لإن الفول بالذات له معزه خاصة عندي .. لدرجة إني كتبت ديوان شعر مخصوص وسميته " الفول صديقي " وبأقول فيه ... إحم إحم .. 1 2 3 ألو ألو ...

آدفايزر : ما تخلص يابني إنت في فرح ..

شاعر : يا باشا بأسلك زوري ...

بأقول فيه

يا قدرة الفول .. يا متخنه العقول ..

ومربربة المسلوع ... ومخففه المعلول ..

ياريتني كنت كبشه .. أو حتى أكون ساطور

علشان أفضل بجنبك .. إن شاله أموت مقتول

وعجبي / بقلم شاعر الرومانسية ...

آدفايزر : اللهم طولك يا روح على الشهود غريبي الأطوار دول .... شيله يا متولي من هنا ونزل اللي بعده .

متولي : مدام صفاء السلاموني ... مدام صفففففففففففففففففففا ء

صفاء : مدام مين إللهي تنطس في نواضرك .... ما تبص كويس يا جدع إنت بدل ما أجي أنط في كرشك .

س س : خلاص يا صفاء .. صلي عالنبي .. دخلي المطواه في جيبك عيب إحنا في محكمة .. مهما كان ده راجل كبير ونظره على قده .... يالله بقى إديها .. وقولي شهادة على مزاجك كده ..

آدفايزر : إسمك وسنك وعنوانك ووظيفتك وتعرفي إيه عن القضية محل النزلع .

صفاء : صفاء السلاموني ... ليسانس أداب قسم مكتبات ... وحالياً بأعمل طبيبة إمتياز قسم نسا وتوليد في مستشفى الدمرداش بمدينة تورنتو بكندا ... وأنا جايه النهاردة لأُدلي بشهادة علمية معملية مطعمية بحتة ... يا سيادة القاضي من خلال تجاربي الطويلة بمعامل كلية الحقوق .. أستطيع أن أؤكد بإن هناك علاقة وثيقة بين الفول من ناحية وبين اللمون والكمون من ناحية تانية .. لإن علمياً الفول بيُصنف على إنه من الفلزات المتفجرة المتحجرة .. وبالتالي لو ما فيش حاجة تكسر سمه .. يبقى عليه العوض ومنه العوض ..

آدفايزر : يعني ده علاقته إيه بموضوعنا .

صفاء : إزاي يا هندسة ... ده له علاقة وثيقة ... الأخ أبقراط كتب في توقيعه من غير ما يقصد – لإنه كان أدبي – معادلة علمية صحيحة ( فول + كمون + لمون = واحد شاي بالنعناع ) يعني لم يقصد بشكل مباشر أو غير مباشر تحنيس أو إذلال سي السيد .

سقراط : ينصر دينك يا دكتورة ... يحيا العدل .. يحيا العدل ..

آدفايزر : بس يا متهم .. إكتم خالص . كملي يا باشمهندسة ...

صفاء : وعايزة أضيف نقطة مهمة جداص جداً .. هاتغير القضية وتطلع الراجل ده من القفص ويروح لعياله سالم غانم ..

سقراط : قولي أنا في عرضك .. أحسن أنا حمضت هنا .

صفاء : سيادتك أنا عندي عيادة نسا وتوليد في منيل شيحه ... يعني ولاده متابعة حمل .. قيصري طبيعي ... كله كله ... وعامله اليومين دول سبيشيل أوفر .. يعني أول خمس ولادات هايبقى السبوع من عندي من دق هون لهز مُنخل لفشار .. ... والسلام عليكم ورحمة الله وبركاته .

س س : إيه يا عم القاضي ده ؟ .. جايبين لي داية تشهد عليه وتوديني في داهية وعمالة تولد ناس وإحنا في قلب المحكمة ؟ لأ مش لاعب ... أنا مش عايز الشاهدة دي ...

آدفايزر : هو بمزاجك ؟ .. مش إنت اللي طلبت إنها تشهد معاك .. ولا هانحمرق ...

س س : طب أنا عايز أكلم ماما ... ممكن .

آدفايزر : أسكت يا بني ... إنده يا متولي على اللي بعده .

متولي : ما فيش شهود تاني يا باشا .. نقفل ونروح بقى ؟

آدفايزر : يابني إنت مش هاتنسى إنك كنت عجلاتي .. نقفل إيه .. مش في قضية لازم تتستف .

سقراط : إيه يا جدعان هو أنا هافضل كده كومبارس صامت كتير .. مش أنا اللي متهم برضوا ولازم أتكلم وأبعبع ...

آدفايزر : آه صح يخرب عقلك ده أنا نسيتك ... إتكلم يا سقراطيس .. إتكلم وإنجز

يُتبع

[مصرية الهوى]

بقول ايه يا جماعة

حد شامم .. فيه ريحة في الموضوع ..

ريحة فول ..

وطع 100 :D

وريحة ظلم واعتداء على الحقوق الفكرية والأبعاد اللامتناهية المنبثقة من الايدلوجيات المرئية المتباعدة :angry:

يالهووووووووي يامصيبتي ..

ربنا عالظالم والمفتري ...

متقلقش ياسقراط .. كلنا معاك .. وإن شاء الله هأقوملك أكبر محامي في البلد ..

إنت بس جمد قلبك .. وخلك راجل .. وتعلق بأهداب الفول .. آآآ.. قصدي أهداب الحياة ..

والمرة الجاية إن شا الله هأجيبلك أكبر حلة فول .. وسندوتشات طعمية .. وشوال بصل وليمون ولب !!

وبلاش فضايح يا سي السيد .. لم حاجتك وتنازل عن الدعوى واتكل على الله ..

وسوق عتيقة فاتح ابوابه على مصراعيها .. اشتريلك ترولا بطيخ وابسط بها :D

وياسيدي قولتلك مية مرة قصيمية ... مش جنوبية من الباحة (آل رغدان )

يعني قولي جيجي الراجحي مثلا والا العثيم ... حاجة مفيده يعني :D

:P

[se_ Elsyed]

وياسيدي قولتلك مية مرة قصيمية ... مش جنوبية من الباحة (آل رغدان )

تصدقي بالله إني ضربتها كده بالحظ .. وما أعرفش أساساً إن فيه قبيلة هنا إسمها كده ..

ولما جيت أكتب إسم العيلة .. جه على بالي دهانات حوائط رغدان .... هأ هأ هأ ...

على العموم .. يالله حصل خير ..

نكمل المحاكمة عشان داخلين على التقيل والبهاريز كلها والنطق بالحكم النهائي ...

الكلمة الآن مع المتهم الآثم سقراط الإغريقي

سقراط : حضرات القٌضاة ... حضرات المستشارين .. قضيتنا اليوم ..

آدفايزر : بأقولك إيه مش عايزين فلسفة وهطرشه كتيرة .. ما أنت شايف إني متنيل وقاعد على المنصة لوحدي .. يبقى إيه لزوم اللت والعجن ؟

سقراط : يا سلام ؟ يا سليم ؟ يعني أنا لما أتكلم كلمتين تقولي لت وعجن !!!! .... وسين سين عشان مُشرف ينزل كلام من أول إمبارح وعمال يصول ويجول وده على قلبك كان زي العسل !!!!! حتى الكوسه في المحاكم كمان يا ربي .. فين العدالة .. فين إستقلالية القضاء .. فين ابويا ييجي يلحقني ؟

آدفايزر : خلاص إنت هاتعملي فيها فيلم أنا يتيم .. إتفضل إرغي يا خويا وإحنا سامعينك ..

سقراط : من غير حضرات القضاة .. ومن غير حضرات المستشارين ... قضيتنا اليوم هي قضية شاب مصري أصيل .. يُعتبر ممثلاً لكل الشباب المغتربين والمرميين في آتون الغُربة ... لا تنظرن يا سيادة القاضي إلى هيئتي الحالية .. وملابسي الممزقة ...وشبشبي اللي فرده وفرده .... وشعري المنكوش ... فلقد كنت من خيرة الشباب .. وش إيه وصحة إيه وخدود محمره إيه .. من الآخر كنت من أشيك 10 شباب في عزبة النخل ... ولكن ... وآه من لكن دي ... إضطرتني ظروف البحث عن لقمة العيش في السفر إلى لندن .. وبالتحديد في 10 داوننج ستريت - مشوها المرة دي - وهنا بدأت المأساة .. فقد فقدت يا سادة طعم الحياة .. وأصبح يومي لا طعم له ولا رائحة ..

آدفايزر ( مقاطعاً ) : آه وعشان كده ما بقيتش تستحمى وسيبت نفسك لحد ما وصلت لدرجة التعفن عشان تعوض الريحة .. صح ؟

سقراط : يا سيادة القاضي ما تضحكنيش وسيبني أركز وأندمج في المشهد الدرامي ده ... ما علينا ، وأصبح الطعام يا سيادة القاضي أتناوله كما أتناول التوسيفان بتاع الكحه .. أو البنادول بتاع الصُداع أي مكرهاً مجبراً لكي أعيش وأقوى على العمل .... وأصبحت أوقات فراغي أقضيها في أحلام اليقظة ... فساعات أحلم بإني لابس البيجاما الجديدة المخططة ورايح أصلي العيد مع أبويا وانا شايل البلالين الحمرا والصفر ... أو أحلم إني واخد العيدية وروحت أأجر عجلة 24 وأسابق بها العيال بتوع الحارة عندنا ... أو أحلم إني شايل صاجات الكحك اللي عملاه ماما ورايح جاي من الفرن ... أو أحلم إني واقف في بلكونة شقتنا في تالت دور وبأعاكس بنت الجيران اللي طالعة تنفض الكليم في بلكونيتهم وأنا بأستهبل وأرمي لها ورقه وأعمل نفسي بأبص الناحية التانية ... وتطورت حالتي ... وأنعدمت صحتي .... وأُصبت بالهُزال وبقى شكلي عامل زي الخروف الصومالي اللي من غير ليه واللي جلد على عضم .... وبالتالي تطورت أحلامي إلى أن أصبحت متمركزة في حلمي بتناول طبق فول بالكمون واللمون على أي عربية فول في الشارع المصري إن شالله يجي لي دوسنتاريا بعدها ...

فهل كفرت حين صرحت بذلك علانية إلى صديقي العزيز سين سين ؟

وهل في هذا عيبٌ يا سادة ؟

وهل أصبح الفول بالزيت جريمة نكراء يُعاقب عليها القانون ؟

فوالله الذي لا إله إلا هو لن يختلط الزيت بالماء ... لن يختلط الزيت بالماء .. لن يختلط الزيت بالماء .... إهيء إهيء إهيء

آدفايزر : خلاص يابني يخرب بيت سنينك قطعت قلبي ... طب مانا عندي حل ... طب ما تخلي والدك كل فترة كده يبعت لك طبقين فول بالدي إتش إل أهو تصبر بهم نفسك لحد لما تيجي أجازتك ؟ أو تلاغي أي صاحب مطعم شرقي عندكو يظبط لك كل يوم طبق فول الصبح تضربه قبل ما تنزل الصبح ؟

سقراط : طب وصلاة العيد أعمل فيها إيه ؟

آدفايزر : وأنا هاقطع نفسي بقى ؟ إتصرف وشوف لك حل إن شالله تنزل أجازة مرتين في السنة تصلي العيد وتدنك راجع

سقراط : على حساب مين إن شاء الله ؟

آدفايزر : ولا .. باقولك إيه إطلع من دماغي أنا مش فايق لك .... هو أنا هاصرف عليك كمان ولا إيه ؟ .....

المُدعي سين سين الزنكلوني .. هل لديك أي تحفظات أو تعليق على أقوال المُتهم؟

س س : لأ بصراحة يا سيادة القاضي .. فأقواله لمست الوتر الحساس عندي .. ودي تقريباً نفس أحلامي .. ما عدا الحلم بتاع بنت الجيران فكان مختلف عندي شويه لإني كنت ساكن في خامس دور مش في التالت ... وبعدين جيراننا كانوا مركبين باركية .. فما كانش عندهم كليمه بينفضوها ... أما باقي الأحلام بتاعت الفول وصلاة العيد وتأجير العجل فأتفق معاه فيها ... وأنا مكتفي يا باشا بمبلغ 25 قرش على سبيل التعويض مقابل الجرح الغائر الذي سببه لمشاعري المرهفه .

سقراط : روح يا شيخ .. وتعالى بسرعة ... بقى مجرجرني للمحاكم وداخل القفص ولافف كعب داير على الإقسام عشان رُبع جنية ؟ .. يا أخي كنت قولي من الأول وانا أدفعلك 5 جنية بحالهم ومش عايزهم تاني - يعني هي أول مرة أسلفك - ...

س س : إيه يا أبو السقاريط إنت هاتسيح لي ... خلاص بقى عفا الله عما سلف وإحنا ولاد النهاردة .. ونفتح صفحة جديدة .. وصافي يا لبن .

آدفايزر : إذاً .. صافي يا لبن .. قصدي رُفعت الجلسة .. على أن يتم إطلاق سراح المُتهم سقراط من سراي النيابة بعد أن يتم إجباره على الإستحمام وتمشيط شعره .. وأخذ تعهد عليه بعدم التصريح بأحلامه على الملأ ..

سقراط: يحي العدل ... يحي العدل .....

وهنا تدوى أصوات الزغاريط والتهليل والتكبير في القاعة .. ويقوم سكوربيون بفتح قزايز الحاجة الساقعة لأكثر من 1500 مدعو في قاعة المحكمة ( على أن يتم تحصيل الثمن وهما خارجين بره - هي مافيش حاجة لوجه الله أبداً ؟ - ) ويسقط سقراط مغشياً عليه من الفرحة ويتم إفاقته بدلق جردل مياه على وجهه كعربون إستحمام .... وينصرف سين سين إلى بيته بعد أن أنتصر في المعركة وحصل على مبلغ التعويض ليبدأ به حياة جديدة ومشروعات ناجحة .

تمت

[Scorpion]

- الو... ابو السيد ...ابقي عدي عليا خد عمولتك ... 1534 ازازة ببس ... 11 الف 242 سميطة ... 345 كيس لب من الحجم المتوسط و 612 من الحجم الصغير .... 16 كيلو جبنة بيضا .... و 3 بيضات ... نصيببك في العملية 311 جنيه و 40 ساغ ... بس قوللي الزبون المرة الجاية حيكون مين و حترفع عليه القضية في أي محكمة علشان أجهز نفسي . حاكم ...

- اخرس يا بني آدم .. وديتنا في داهية .. احنا عالهوا و الميكروفون لسه مفتوح و كلهم سمعوا ....

- أحمم ... مين .. بتقول مين حضرتك ... لأ هنا بنك السعادة ..

:angry:

[se_ Elsyed]

والله عيب كده بجد .. والموضوع زاد عن حده ..فبعد ما ناس ولاد حلال إتدخلوا وطلعنا سي سقراط من القفص بكفالة وعلى ضمانة الناس الطيبين دول .. يقوم يتمادى في طغيانه وغيه ويستفزنا بتوقيعات تودى اللُمان ..

أنا مش هاتكلم كثير ولا أترافع وسايب الحُكم للجمهور ولعامة الشعب .. إللي متأكد إنهم مش هايرضيهم ما يفعل هذا الإنسان الأنوي وهايعدموه رمياً بأقراص الطعمية في ميدان باب الشعرية ..

وإليكم يا سادة توقيع السقراط الأخير

زوجتي الحبيبه ، امي الغاليه ، حماتي الطيبه

برجاء تجهيز مايلي يوم وصولي لأرض المحروسه :

باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.

سقراط المصري

أنا ما أستفزنيش في التوقيع المذكور أعلاه غير البتاعه الي جايه دي ..

موزه مشويه على الفحم

شفتوا ظُلم الإنسان لأخيه الإنسان ؟

ده حتى ربنا ما يرضاش بالزوووولم .

[Scorpion]

قشطة .. السويقة حتتنصب من تاني .. اما الحق اجيب الشندوشتات و السميط ....

علي فكرة يا سي السيد .. سقراط حويط و انا متأكد انه كان عامل حسابه .. علشان النقطة ديه بالذات حيتفلفص منك ... و رده ببساطة حيكون : ايه .. هي الموزة دي كانت متشكلة ؟ ماهو حسب التشكيل ممكن تكون موزة من اللي بتتشوي في جزر المكاكا ... او من اللي بتتاكل في الحسين .. او ظلم الأنسان لأخيه الأنسان زي ما قلت ...

و زي ما بيقولوا اللبنانيين : يا حفييييظ .. الأدب العربي شو عويص ...

ايوه ببس ... حاجة ساقعة

[New]

انا بعتله رسالة خاصة امبارح وقلت له حرام عليك اللى بتعمله فينا ده ... انا جات لى صدمة عصبية من توقيعاتك.... فرد وقال لى كلام كبير معناه ...وانتم لسه شوفتوا حاجة!!!؟؟؟

:angry:

[صفاء]

برجاء تجهيز مايلي يوم وصولي لأرض المحروسه :

باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.

ايه الأكل الكحيتى اللى فى ليستتك ده يا اكسيلانس !!!

[صفاء]

عندكوش حاجة حرشة حاجة كرشة

حاجة تموع النفس وتسدها وتساعد على التوفير وشد الحزام وربط اللجام والذى منه

بعدين احنا لازم نترفع عن الكماليات دى

ماله الفووووووووووووووووووول

[سقراط المصري]

عندكوش حاجة حرشة حاجة كرشة

حاجة تموع النفس وتسدها وتساعد على التوفير وشد الحزام وربط اللجام والذى منه

بعدين احنا لازم نترفع عن الكماليات دى

ماله الفووووووووووووووووووول

انا قلت إيه ، يادكتوره ، انا قلت حضروا الحاجه دي " الاكل يعني" يوم وصولي........... وبقية السنه هيكون الفوووووووول ................................................ صديقي

سقراط

[Proud Muslim]

بالأمس فقط دققت في توقيع أخونا العزيز سقراط المصري .. و لقيته مثير للمتاعب النفسية و المعدية ( فتح الميم و كسر العين و الدال ) ..

:blush:

بس بيني و بينكم .. أنا أول مرة آخذ بالي من بطة راقدة على صينية بطاطس .. ازاي يعني ؟

البط يا اما محشي .. يا اما محمر .. او بط صيني و البط الصيني سيطير خارج السرب الذي حوله من الأرانب الى الأوز الى حتت الموزة ..

لخلاصة .. هذه الوصفة تحتاج نفسا قوية .. و معدة عفية .. و مهضمات صحية .. و قيلولة تحت شجرة في غيط ساعة العصرية .. و الله أعلم !

[Alshiekh]

أنا بقى حاتجنن واعرف المنتدى ده ماشى ازاى

منتدى كله كوسة

واحد بكل بجاحة يحكى على الاكل اللى اشتراه من طعمية على طرشى على بدنجان ، ويطلع لسانه للكل وماحدش يقدر يقول له تلت التلاتة كام ،

والمحكمة منصوبة للغلبان اللى كان بيحلم ومازال بيحلم ، يعنى لسه ياولداه ماهوبش ناحية بتاع الفول والا الطعمية.

واذا كان المطلوب حبس سقراط ، فاعتقد انه من باب اولى المطالبة بالمؤبد او انزال العقوبة القصوى لمن قام فعلا بالتنفيذ الا وهو س²

والا هو الموضوع شغل تلفيق وأمن دولة على كوسة محشية ، عايزين نعرف ايه القصة بالظبط لامؤاخذة.

وانت يابو السقاريط قول واحلم زى مانت عايز لانى باحلم زيك كده بس مدكن ومخليها فى السر.

شوفوا المدعى كاتب ايه تحت علشان تعرفوا اد ايه الراجل ده مفترى ، وشوفوا كمان قاعد ياكل لوحده والوله ابنه عمال يبص عليه ويقول لك انا صعبت على الوله وجه اكل معايا مجاملة ، مجاملة والا بعد ماديته النور الاخضر بعد ماقربت تشبع؟ وعامل حجة ان المدام مالهاش فى الاكلة دى ، وهى تلاقيها ياحول الله كانت واقفة بتبص عليه ونفسها تخطف طعمياية بس مش قادرة غير انها تقول باهنا والشفا يا se_ Elsyed مطرح مايسر يمرى وطبعا هو ماقلش ان كان ساب لها طعمياية والا لا ، لكن واضح انه ماسابش حاجة والا كان فضح الدنيا وقال ان ساب لها طعمياية ، واعتقد واضح هو ليه اختار اسمه ، آل ايه se_ Elsyed ، يعنى ماحدش عاجبه ، أو يمكن لسه عايش فى القاهرة 30!

دي مش رواية ليوسف إدريس ..

ولكنها قصة واقعية من الفول كلور الشعبي حدثت لي بالأمس .

والظاهر يا ولاد إن الواحد إتفرفر وما بقاش زي الأول ... وعلى رأي خالتي أطا طا .. مافيش حاجة يابني بتفضل على حالها ...

وبعد ما كان الواحد بيفوت في الحديد ويشرب المحيط ولا يتبلش .. أصبحت الآن بادوخ من قرص طعميه ..

وإليكم القصة ..

إمبارح بعد الشغل  نفسي - اللي هاتوديني في داهية في يوم من الأيام - هفتني على طعمية مصرية محشية ... ولإن ما فيش حواليه إلا مطاعم بتعمل الطعمية على الطريقة الشامية ( بعجينة الحمص مش الفول المدشوش المصري ) فإنني لا أقتنع بها ولا أقرب لها بتاتاً .. لذا شددت الرحال إلى منطقة لدينا تُعرف بالمنفوحه وبيني وبينها قد 10 أو 12 كيلو .. وهناك مطعم مصري كنت بأتعامل معاه أيام الصبا والشباب ..

والراجل أول ما شفني إستغرب وقالي ياااااااه فينك يا عم سين سين ده أنت داخل على السنتين دلوقت ما فيش حد شافك .. فقلت له مشاغل بقى يا ريس والإنتخابات والتزوير وكده يعني .... المهم إنت جاهز ؟ فقالي : طبعاً .. فقلت له : طب دلعني يابو أشرف ..

راح مجهز لي شوية طعمية محشية من اللي يتاكلوا بالورقة الملفوفين فيها .. على بعض طرشي .. على طبق بابا غنوم ( غنوج سابقاً ) على ثالثة الأسافي واللي جابت داغي  وهو البتنجان المخلل اللي فيه خلطة سرية لو رشناها على خط بارليف كان إنهار لوحده من غير خراطيم المطافي ... والحمد لله ربنا ألهمني في اللحظات الأخيرة وما طلبتش فول وإلأ كنت زماني في العالم الآخر دلوقت ...

وقولت الأكلة المتفجرة دي لازم لها سفن آب عشان تُطفيء ما يمكن إطفائه .. ووأنا مروح روحت محود على الفرن بتاع الفينو ( صامولي بالسعودي .. وأموت وأعرف الأصل التاريخي للكلمة دي إيه ؟ وإوعى حد يقولي أصل السعوديين شافوا  الصوماليين ا بياكلوا العيش ده فسموه صامولي ؟ )

وروحت البيت وأنا متبت في الحاجات دي وكأني راجع ومعي أكاليل الغار ..

الغريب بقى إن مدام سين سين مالهاش في الكلام ده لإن القولون عندها مخاصم تلك المتفجرات المحرمة دولياً .. ولا الواد عمر كمان ... بس شكلي وأنا قاعد بأكل زي ما أكون صعبت على الولا علي وجه أكل معايا كنوع من المجاملة لواحد زي أبوه برضوا  :blush:

المهم حبست بعدها بما تيسر من السفن آب .. وقلت مش هادخل انام لإن ده في خطر على حياتي .. وقعدت أقرأ يمكن لحد الساعة 12 وقولت أنام بقى زي البني آدميين ..

وتمر الساعات وأنا أتقلب في السرير على جمر من النار من كم الشطة والبهارات والنابلم اللي اكلته .. وآخيراً جالي النوم ..

ولكن حدث ما كان متوقعاً وما حذرت منه المراصد وبيوت الخبرة ومراكز الدراسات .. قمت من النوم مفزوع وأنا مش عارف الساعة كام وعلى الحمام عدل ولم يبقى في جوفي أي أثر من ذلك الطعام من كثر البهدلة اللي إتبهدلتها ..

وياريت على كده .. ده  أكثر من 10 مرات رايح جاي على الحمام لدرجة إني فكرت أجيب المرتبة وأبقى قريب من موقع الحدث ..

ولم أذق طعم النوم حتى الآن وبالفعل يا ولاد كانت ليلة حالكة السواد ولم يطلع لها شمس ..

والظاهر إنكتب علينا المسلوق وأكل الفرافير ...

والله يسامحك يا سقراط يا مصري ...

<{POST_SNAPBACK}>

[سقراط المصري]

بس بيني و بينكم .. أنا أول مرة آخذ بالي من بطة  راقدة على صينية بطاطس .. ازاي يعني ؟

البط يا اما محشي .. يا اما محمر .. او بط صيني و البط الصيني سيطير خارج السرب الذي حوله من الأرانب الى الأوز الى حتت الموزة  ..

<{POST_SNAPBACK}>

معاكم برنامج: مطبخ ام الخير

لك يا سيدتي هذا البرنامج:

احضري خمسه كيلو بطاطس مصريه تشجيعاً للفلاح المصري.

قشريهم بسكينه كبيره ، وطلعي منهم يجي تلاته كيلو قشر بطاطس ، عشان تخربي بيت جوزك الشقيان التعبان.

احضري طشت الغسيل وضعيه على وابور الجاز يسخن .

ضعي معلقة سمنه فلاحي ، في الطشت ، وسيحيها.

ارمي البطاطس في الطشت ، وادلوءي عليها شربة البطه.

قشري شوال بصل ، وادلوءيهم على البطاطس اللي في الطشت.

طن من الطماطم.... بعد تقطيعها شرائح.... كبيها في الطشت.

هاتي البطه وضعيها على وش الطشت.

نادي على جارتك ام اسماعيل عشان تساعدك في حمل الطشت.

مع بعض دخلي الطشت في الفرن على نار هاديه ولمده عشرين ساعه بالضبط.

ولاتنسي ان تضعي كبد وقوانص البطه ايضاً ، وبلاش طفاسه ، ومتشوحهمش وتدلقيهم على بؤك.

لحسه سمنه ، على وش الطشت والبطه قبل ان تضعيهم في الفرن.

.

تشمي شياط ولايهمك، الفرن يدخن، ولايتهز شعرك.

بعد العشرين ساعه ........ طلعي الطشت......... وارميه في الشارع.

واتصلي بالدليفري واطلبي بيتزا ، وطفحيها لابو العيال ، او ابعتيه ياكل عند امه.

تحياتي

سقراط

تم تعديل 16 ديسمبر 2005 بواسطة سقراط المصري

[عادل أبوزيد]

محاكمة للفاضل سقراط لأنه حلم مجرد أن يأكل سندوتش فول

ماذا كنتم فاعلين لو قرأتو. توقيعه الجديد

زوجتي الحبيبه ، امي الغاليه ، حماتي الطيبه

برجاء تجهيز مايلي يوم وصولي لأرض المحروسه :

باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.

سقراط المصري

[عادل أبوزيد]

منذ إحدى عشر سنة  تجرأ العضو "سقراط المصري"  و وضع توقيعا مستفزا  ليس للمغتربين المحرومين فقط و لكن لكل خلق الله  آل إيه  بطة راقدة على صينية بطاطس  ده مين يقدر يحلم بكدة 

ما سبق كان إستهلالا لابد منه

أنظروا إلى توقيعه  و تصوروا مشاعر الحرمان التي إعترت جمهورا كبيرا  ..... فكان لابد من المحاكمة