كل سنة و أنت طيب يا سي السيد

[أشرف حليم]

يالله معلش .... بالرغم إنى مش واخد على التهريج

و خايف دمى ..... يطلع فى البرواز تقيل .....

لكنه العزيز سى السيد ...... إذا" كان لابد من تحيته بحته شبه كدة

اللى بيعملوه فى قهوة المحاورات هو و صحابه

واد صغير بيخبط على الباب ( على فكرة هو قدك 34 بارده ... بالرغم إن صورة

الشيخ ياسين كانت مديانى إنطباع إنك أكبر من كدة ... و أيضا" عشان كتاباتك كلها حكمة ! )

الواد : أنا عايز أكلم سى سيد شخصيا" ...... هو موجود و لا نايم :blush:

( طبعا" سى السيد نايم و لا صاحى كتاباته منورة و بعدين تلاقيه و هو نايم بيفكر هيكتب إيه لما يصحى )

( شخص 1 تخيلى فى ذهن الواد ) : إيه يا واد إنت مش خايف تيجى و تخبط كدة لوحدك

الواد : لأ أنا عارف ده سى السيد طيب و بعدين ده قدى من سنى

( حتى أنا جايب صورته معايا ..... مش هو ده .... مش هى ده )

.................................................

كفاية كدة .... بصراحة أنا تعبت من التخبيط

و بعدين هما الشوية دول اللى أنا إفتكرتهم لما صحيت من النوم :sad:

و عشان دمى لو تقيل و ده أكيد يبقى ذنبهم إيه صحابك اللى بيحبوك

على العموم ...... مبروك

قصدى عقبال ميت سنة ديجيتال على النت 100.00

بس عندى خبر ليك أوعى يزعلك أصل عارف إنك مابتحبهوش

إمبارح فى برنامج هو فيه إيه

كانو جايبين عبد المعطى حجازى علشان عيد ميلاده

مش عارف ليه أنا حاسس أنك مولود معاة فى نفس اليوم

هل هذا الأمر يسبب لك أى فخر أو أى ضيق :wub: > معلش حتة غلاسة كدة<

و يا سيدى ربنا يجعل كل أيامك و حياتك هناء و فخر و سعادة

و مفيش ضيق يكون إلا من السياسة طبعا"

سلام

[se_ Elsyed]

يا أستاذ أشرف .. أنت زميل وأخ عزيز وأنا شخصياً متابع كل كتاباتك وبأتعلم منها .. بدون مجاملة يعني ..

الشيخ ياسين كانت مديانى إنطباع إنك أكبر من كدة ... و أيضا" عشان كتاباتك كلها حكمة ! )

يا فندم أنا بأعتبر السن يُقاس بالعمر العقلي للإنسان .. بجد

يعني لما نبص كده على نهضة الأمم من قبلنا .. وحتى الأمم الحالية .. هانلاقيها مش مرتبطة بشريحة معينة أو بناس من أعمار معينة ..

أما الحكمة التي تصفني بها - وهو وصف لا أستحقه لإني بأحس إني ساعتها عامل زي محمود مُرسي في مسلسل أبو العلا البشري - فهي مُكتسبة من الشارع المصري .. وهو المُعلم الأول لكل المصريين بغض النظر عن المدارس والجامعات .

بس عندى خبر ليك أوعى يزعلك أصل عارف إنك مابتحبهوش

إمبارح فى برنامج هو فيه إيه

كانو جايبين عبد المعطى حجازى علشان عيد ميلاده

أنا أختلف مع أفكار وليس مع أشخاص ... وكل واحد لديه ما هو مقبول وما ليس مقبولاً فلا يوجد بين ملائكة لا يُخطئون .. والعاقل هو من يُميز بين الأثنين ...

وشاكر وممتن لتهنئة سعادتك .

[أشرف حليم]

و الله أنا بدأت التحية ضحك و نهيتها كمان( بالرغم من الحتة الغلاسة ) لكن بنية الضحك بارده

يعنى يبقى ليه .... ليه بقى بترد على جد :sad: كل ردك جد :blush:

كله كدة جد .... جد .... مفيش ولا حتة هزار ( علاء ولى الدين )

أصلا" إنت مش مفروض تتكلم جد فى يوم ميلادك .... فاهم :wub:

ياه اليوم قرب يخلص ....

لكن و إيه يعنى .... ربنا يجعل كل أيامك أعياد ميلاد و سعادة على طول

يا أستاذ أشرف .. أنت زميل وأخ عزيز وأنا شخصياً متابع كل كتاباتك وبأتعلم منها .. بدون مجاملة يعني ..

على العموم أنا كتبت تانى مخصوص علشان أشكرك على كرمك و مجاملتك

اللى أنا ماستاهلهاش

لكن لو أصريت .... تبقى ده شهادة كريمة .... أعتز بها بشدة جدا"

معلش أوعى أكون تقلت عليك

و أعتذر لو الكلام كدة فية ريحة ( كما لو كنت أخدت عليك يعنى )

لكن و الله ده محبة و معزة ( ده الحتة الوحيدة الحقيقة و الجد )

على العموم اليوم هايخلص ... و مش هاكلمك بعد كدة

إلا زى تلميذ لأستاذه المشرف ( أبو فانلة زرقاء )

حقيقى كل سنة و إنت طيب

[Salwa]

كل سنة وانت طيب يابو حميد ..

...يابو عمر ...يابو على ..

كل سنة وانت هنا ....تفضل كدة زى ماانت ...مش عاوزينك تتغير .

على فكرة الصورة جميلة جدا ....بتفكرنى بصورة تانية ...ادعى بس انت وقريب حاتلاقيها هنا .

انهاردة انت الملك ..

اكيد محضرين لك تورتا كبيرة واكيد اكيد محضرين لك هدية .........تاج جديد .

بس اوعى يكون تاج الجزيرة ..

اللى كل شوية لما بتزهق ( تضعه على رأسك ) ..

..وآدى السلطانية .....بضمان تغطية الأذنين ..

انا انهاردة بحسد والدتك ( حسد صحى ) ....وبشكرها ...واهنيها قبل منك ..انها زى انهاردة من اربعة وتلاتين سنة اهدت مصر ولد صالح فى كل شئ ....احمد وهو احمد ..

ربنا يخليها لك ويخليك لها ولكل اسرتك ويخليك لنا..

كل سنة وانت طيب ..

كل سنة وانت طيب يااحمد ...

[Alshiekh]

34 سنة بس؟؟؟؟!!!

وانا كل ماشوف الاسم ( se_ Elsyed ) ينط فى بالى على طول يحيى شاهين والطربوش الاحمر وعياله اللى كل واحد منهم عنده ييجى 50 سنة

أنا كنت مفكرك من دور جدى ياجدع !!!

عموما كل سنة وانت طيب وربنا يديك الصحة وطول العمر وتعيش ونشوفك ابو الجدود كمان وسلامنا لكركر المنتدى

الحقيقة دورت على شمع علشان اجيب 34 شمعة لكن الجماعة بتوع الشمع على الانترنت ماعندهمش غير ال 3 شمعات اللى جايين مع التورتة ، وماكانش عندى وقت كنت اشتريهم لك من الـ eBay .

عيد ميلاد سعيد Happy Birthday Mr. Seesaied

[abofasad]

الابن الغالي سي السيد

اضم صوتي الى كل الأصوات بالمنتدى، واقول معاهم وهم بيقولوا:

يالله حالا بالا نهني سي السيد

وانا موافق سقراط ان شهر نوفمبر هو شهر ولادة العظماء

الكلام ليك يا جارة

كل سنة وانت طيب ي أجدع سي السيد

[Proud Muslim]

كل سنة و انت بألف خير و سلامة :wub:

بس 34 سنة بس ؟؟

يا راجل انا تخيلتك عندك 45 سنة مثلا و لا حاجة .. :D

[وليد صفوت]

سىىىىىىىىىىىىىىى السييييييييييييييييييييييييييييييييييييييد !!!!!!!

ألف ألف ألف حمد الله عالسلامة

لا مش دى !

ألف مبروك بمناسبة عيد ميلادك :)

ربنا يجعل كل أيامك فرخة فى فرخة :D ( فرحة بس باليونانى ! )

وسسسسسسسسسسسسسع يا جدعععععععععععع شوية تورت من اللى س س بيموت فيييييييييهم :D

كل ثانية و انت طيب ........ :)

يا فندم أنا بأعتبر السن يُقاس بالعمر العقلي للإنسان .. بجد

عمو ........ عمو ............ تدينى كام سنة ؟ ( وش طفل و البزازة فى بقه ) :wub:

[وليد صفوت]

سيداتى و سادتى ,....

أنقل لكم من قناة ( حبة فوق حبة تحت ) وقائع الإحتفال بميلاد س س الأشكيف الأزرق الشهير , صاحب الآراء المستفزة و الأفكار المثيرة للجدل , صاحب اشهر الخناقات فى تاريخ المواقع , المشاكس ...... المقداد ........ إلخ إلخ :wub:

هنا سيادتى نشاهد س س من خلف الكواليس و فى يديه تورتة مسكينة ترقد كالضحية بينما س س نازل إفتراس فيها , و تقريباً بيمصمص فيها دلوقتى

و ها نحن نقترب من المتهم ..... قصدى من نجم الحفلة لنسأله عن شعوره بهذا اليوم الحافل اللافح الفاحل الافح ...

- س س تسمحححححححححححححححححلللللللللللىىىىىى أعرف إيه شعورك و انت كل أصدقائك اليوم بيكرموك فى يوم تأبينك ....... يووووووووه قصدى ميلادك ؟؟؟

- همممممممم همممممممممممم همممممممممممم هممممممممممممم هممممممممممم . :)

- جمييييييييييل , طب تحب تقول إيه لكل الأصدقاء اللى مقدروش يحضروا النهاردة ؟

- همممممممممممممممممم هممممممممممممممممم هممممممممممممممممم همممممممممممم . :)

- طيب و هل كنت تتوقع المفاجأة دى و لا الأصدقاء كانوا قايلين لك من قبل كده ؟

- همممممممممممممممم هممممممممممممممم هممممممممممممم همممممممم . :D

- إيه الهدايا اللى كنت عاوزها و جاتلك النهاردة و إيه الهدايا اللى كان نفسك فيها و مجاتلكش النهاردة ؟

- هممممممممممممم هممممممممممممممممم همممممممممممممممم هممممممممممممممم . B)

- ميرسىىىىىىىىىىى على الدايلوج الظريف ده و عيد سعيد و عقبال عيد الأضحى و أشوف وشك بخير ( من غير لحوسة ) . :D

كان معكم فايولن من أمام مقر الإحتفالية .. حارة الكوبانية , منشية ناصر :D :)

[مصرية الهوى]

ايه ده .. عاملين عيد ميلاد ..

وجايبين تورتات كمان .. ومحدش عزمني :angry:

طب الحمد لله إن أنا عديت بالصدفة .. وشفت البلالين والشموع وقلت لازم اجي اشوف ايه الحكاية ..

سي السيد ..

كل سنة وأنت طيب ...

وربنا يجعلها من أحلى سنوات عمرك .. ولما تنزل مصر ان شاء الله تأكل فول وطعمية لحد

ما ينقلوك المستشفى من التخمة :P

وعلى فكرة .. اشتريتلك 1000 سهم من أسهم الاتصالات وموبايلي ..

والنهارده بالليل تعال لفورسيزونز المملكة عشان نوقع على العقد ..

عشان تعرف إني صاحبة واجب .. وبعدها نطلع على القرموشي .. نفوول لحد ما نتهري :D

يلا باي هأروح أشوف المصيبة اللي انت عاملها مع الواد الغلبان سقراط ..

[se_ Elsyed]

وعلى فكرة .. اشتريتلك 1000 سهم من أسهم الاتصالات وموبايلي ..

..

<{POST_SNAPBACK}>

أهو ده بقى نوع من ضرب المطاوي ..

وهاشرح لك يعني إيه بالمصري عشان ما تضيعيش ..

يعني كلام في الهوا ...

أهو قدامكم يا جماعة الخير ..

جيجي بتقولي إنها إشترت لي 1000 سهم كوكتيل إتصالات على موبايلي .. وثمنهم عشان تبقوا عارفين ...... بالظبط 100 ألف دولار ( 380 ألف ريال )

يا ستي هاتي 100 سهم بس وأنا راضي والمكسب بعد 3 شهور نقسمه فيفتي فيفتي ...

والنهارده بالليل تعال لفورسيزونز المملكة عشان نوقع على العقد

وطبعاً أول ما أخبط على الباب وأقول يا أهل الله ياللي هنا أبله جيجي عندكو ألاقي بتوع الهيئة محوطيني من كل ناحية وهاتك يا ضرب ..

عشان تعرف إني صاحبة واجب .. وبعدها نطلع على القرموشي .. نفوول لحد ما نتهري

أهي دي حلوه ..

عامله زي اللي كان عايش في أسكندنافية وبعدين راحوا ساحبينه موديينه الكونغو برازافيل ..

يعني بعد قاعدة الفور سيزون .. نقوم متحركين 180 درجة ورايحين الفورقرموشي :angry: ... دي عيبه حتى في حق الوليد بن طلال .

[الرافعي]

س.س

يعني كل التهاني والتورتات والجاتوهات والشرابات والفانلات اللي في الرسائل السابقة كلام، أو عزومات على الهوا... خلينا في الجد

إنزل دلوقتي إركب عربيتك ... لو عربيتك عطلانة اركب حافلة الرياض الصاروخية التي تطلق أصوات الصواريخ وهي ماشية .. (كانت تفزعني وأنا في الطريق عندما كنت في الرياض- كنت أظن أن هناك تفجيرات في الشارع)

إمشي في شارع التحلية وانت جاي شارع العليا

هيايجيلك تقاطع شارع التحلية مع شارع عبد الله بن سليمان الحمدان (هاتقول لي إشمعنى ده لسه فاكره - أصل مدرسة ابني كانت فيه :angry: )

أدخل شمال هتلاقي محلات دش على اليمين والشمال

إمش لآخر الشارع هاينسد بشارع مش فاكر اسمه وبالتالي في يمين وشمال بس، المهم

ادخل يمين

إمشي شوية

حاسب الواد الصغير اللي راكب جمس على يمينك هايكسر عليك

على شمالك هاتلاقي مطعم عـــــــــــــــــم حمـــــــــــــــــزة للأسماك

ادخل واطلب اللي انت عايزه

وابعت الفاتورة على المحل عندي :P

تم تعديل 16 نوفمبر 2005 بواسطة حلاوة العنتبلي

[se_ Elsyed]

دي وصفه سهلة ... دي وصفة هايلة ..

ده أنا على ما أروح وأقعد ألف حوالين نفسي وأرجع من مطرح ما دخلت أكون جوعت .. ما كنت تقولي إدخل في شارع تلاتين السليمانية وخلص ؟

أدخل شمال هتلاقي محلات دش على اليمين والشمال

على فكرة بيسموه هنا " شارع الشيطان " لإنه كله محلات دشات وحركات .

وابعت الفاتورة على المحل عندي

يعني حضرتك أتحرك في budget حدود كام يعني ؟

على العموم .. هي دي أخلاق الجزارين ولاد البلد

[se_ Elsyed]

عمي أبو فصاد ، محمد حماده ، براود مُسلم ، إبننا فيولين ... ألف شكر لكم جميعاً .. وإتفضلوا على البوفيه لقمه على ما قُسم ..

مدام سلوى .. والله كنت منتظر مداخلت حضرتك .. عاشن تفرقي التورتة بمعرفتك ..

وخلي بالك من العيال الصغيرة اللي بتزروط نفسها

فالله يخليكي تأكليهم إنت .. نونو نونو ..

والناس بقى اللي حجمها عائلي ييجوا على جنب عشان عدالة التوزيع

وعلى فكرة .. هاتلاقي في جيب الجاكيتة اليمين اللي متعلقة هناك دي بعض الهدايا للبنات الأمامير بتوع المنتدى .. فرقيها بمعرفتك

والصبيان الخناشير ما نسيتهمش برضوا .. مهما كان دول ولادنا

دي على فكرة صورة سين سين وهو بيطفي الشمع

ده مش بيطفي .. ده بيشفط الشمع

يالله بقى قولوا تشييييييز عشان الصور الجماعية

ودي صورة واحد غلس بيحاول يزنق نفسه عشان يطلع في الصورة

[se_ Elsyed]

دي صورة إبن مصر بعد ما خطف ربع التورتاية وخرج بها للجنينة ( حسبي الله ونعم الوكيل )

عصام شوقي متنكر في صورة تورتاية عشان ما نعرفوش

ما ننساش الجنود المجهولة في المطبخ .. بودا وشاعر الرومانسية

وأخيراً س س لف حتتين جاتوه في ورقة عاشن ياكلهم هو والعيال في البيت على رواقه

[Scorpion]

بقالي يوم بليلة مش عارف ادخل بالهدية من باب المنتدي ..عمالين يقولولي دي كبيرة يا خواجا و ما تخشش .. و بعد ما انقطع نفسي و بصراحة زهقت من المحاولة .. رجعت تاني للمحل و سيبتهالك هناك تروح تاخدها لما تبقي فاضي ... و وصل الأستلام حتلاقيه في آخر الصفحة... لكن قبل ما أخش عالتورتة ... شوية سكوت من فضلكم و اسمعوا القصيدة دي :

تدفق في البطحاء مبارك بعد تبهطل

وقعقع في البيداء اسطواتآ غير مؤركل

وسار بأركان العقيش المقرمش مقرنصا

وهام بكل القارطات بدمعة و صوص بشنكل

يقول وما بال البحاط في عيدنا مقرمطا

ويسعى دواما مشحوق المجانص بين هك وهنكل

اذا اقبل محاوراتها اططاح بهمة

وان أقرط داخلية البحطوش ناء بكلكل

يكاد على فرط الموس بقرعة يبقبق

ويضرب بمقص ما بين الهماط وكندل

فيا أيها الحنكوش لست بقاعد

ولا أنت في كل البحيص بطنبل

و العتبة جزاز و الأسانسير نني في نني

هديتك يا أسطي

أوعي تفتكر أني نسيت .... كل سنة و أنت طيب يا صديق :) ...

فين بقي الهُبر ؟؟؟؟؟ :)

[سقراط المصري]

وسار بأركان العقيش المقرمش مقرنصا

وهام بكل القارطات بدمعة و صوص بشنكل

عجبني جداً بيت الشعر ده :)

تحس ان فيه شجن ومشاعر واحاسيس و "شعر".

شوفوا إزاي سكوب قدر يولف بين "العقيش " و "القارطات " في بيت شعر واحد.

وشوفوا كمان الاحاسيس المتدفقه في "بدمعة و صوص ".

اما العبقريه الشعريه فكانت في كلمه "بشنكل"

وكمان الدلاله التعبيريه لكلمه "مقرنصا" ، جات توضيح مفسر ضمني لكلمة "المقرمش "

والافعال جاءت متناسقه بشكل غريب ، فهو يبدا البيت بفعل " وسار" ، ثم ينهي البيت الشعري بفعل " وهام".

كما استعان بكلمه فريده ونادرة الاستخدام وهي " بأركان" ليكتمل التوضيح الضمني لبقية بيت الشعر.

والابداع كان في تكراره لحرف ال "الواو" فقط ثلاثة مرات وليس اكثر ، بالرغم من ايجازه الصوره التعبيريه للبيت كاملاً في (11) كلمه فقط.

وفي النهايه ، بيتضح عبقريه وابداع سكوب في اخراج صوره شعريه موجزه ، تشتمل على بلاغه ضمنيه وبلاغه صريحه ، بالإضافه الي العديد من الكنايات لتوضيح المعني بشكل حسي وشاعري.

تحياتي

سقراط

[عصام]

يقول وما بال البحاط في عيدنا مقرمطا

ويسعى دواما مشحوق المجانص بين هك وهنكل

ولفظ "بال" هنا ليس للتساؤل وإنما هو ماضى الفعل "يتبول" :) والكلام عائد على حيوان "البحاط" وهو لمن لا يعرفه صغير البطريع الوحشى .. أما "هك وهنكل" فهم أعمامه غير الأشقاء لأبيه الساعة تسعة ونص .. :D

اذا اقبل محاوراتها اططاح بهمة

وان أقرط داخلية البحطوش ناء بكلكل

و"البحطوش" هو الصوت الذى يصدره "البحاط" أثناء الأكل :)

يكاد على فرط الموس بقرعة يبقبق

ويضرب بمقص ما بين الهماط وكندل

ويتجلى الارتباط الوثيق بين الشاعر ووظيفته الأساسية من خلال لفظى "الموس" و"قرعة" وذلك بعد أن أردف بلفظ "بمقص"

فيا أيها الحنكوش لست بقاعد

ولا أنت في كل البحيص بطنبل

طبعا تلك الأبيات لا تحتاج لأى شرح وسوف يكون استخفافا بعقول القارئين مجرد محاولة شرحها.

و العتبة جزاز و الأسانسير نني في نني

وهنا مربط الفرس .. فقد بحثت كثيرا فى العديد من المراجع عن معنى كلمة "العتبة" فلم أجد .. فهل أطمع من المؤلف فى قليل من التوضيح :D

[سقراط المصري]

QUOTE(عصام شوقى @ Nov 17 2005, 04:46 PM

[color=darkred)

فيا أيها الحنكوش لست بقاعد

ولا أنت في كل البحيص بطنبل

طبعا تلك الأبيات لا تحتاج لأى شرح وسوف يكون استخفافا بعقول القارئين مجرد محاولة شرحها.

طبعاً طبعاً، الابيات واضحه جداً :D ،هو انت مفكرني غبي :D :) ، وكنت هزعل لو وضحتها :) .

سقراط

[Salwa]

تدفق فى البطحاء مبارك بعد تبهطل ..........

ايه الحلاوة دى ؟؟

ايه النبوغ ده ؟؟

هو فيه كدة ؟؟

شعر رائع يحكى لنا ( كفاح البطل )...وكيف تدفق فى البطحاء بعد تبهطل ..

تسلسل منطقى للاحداث ...لكن يعيبه البساطة التلقائية التى تقلل من شأنه لدى بعض الاجانب ..ولدى بعض من لايفقهون لغتنا العربية ...

وانا ايضا وقفت فى حالة ازبهلال ...اتعمق الى العبقرية فى خلط الدمعة والصوص ...و اتعمق لتمازج الحضارات فى كلمتين كانت سببا لتقارب المشارب ..

الى الامام ..نحن معكم ..لقد اصبحتم جيلا يشار اليه بالجنان ...آسفة ..اقصد البنان ..

كلنا هذا الرجل ...الذى يصرخ بالشعر ويعبر عن سعادته المطلقة بكل ما يحيط به .

وسوف تتفتق قريحتنا عم قريب (( بس يارب نلاقى اللى يلحمها بعد كدة )) ..وسوف نشارككم فى بناء ملحمة تتلقفها الاجيال المقبلة ..

هدية مقبولة ...يتسلمها سى السيد بكل فخر واعتزاز ...ويضمها لباقى التحف اقصد الجوائز التى حصل عليها نتيجة مجهوده فى انه .....حلق لهم كلهم ..

اليس كذلك يابنى العزيز ؟؟

مش انت برضه حلقت لهم ؟؟

وسوف اشارك المجموعة فرحتهم بمولد شاعر عظيم وسوف استسمحه فى اطلاق اسم على هذه القصيدة العصماء ..

ضربة مقص..

اسعدتم مساء ..