اسطورة أيمن نور

[مفروس]

اخواني العزاء

السلام عليكم

موضوع أيمن نور من المواضيع اللي بتبين مدى الانحطاط اللي وصلناله في هذا العصر المبارك...

يعني لما يبقى بعد سعد زغلول و النحاس و مصطفى كامل آخرة أملنا و زعيمنا المنتظر و مخلصنا هو أيمن نور يبقى يا خيبتنا و غطيني و صوتي يا زينب!!!!

فعلا يقاس العصر برموزه...

لما يبقى رموز الرياضة في عصرنا مرتضى منصور و حسن حمدي و ابراهيم سعيد و امثالهم..

و رموز الفن يسرا و نادية الجندي محمد عطية و غيرهم...

و رموز الثقافة الكاتب الكبير سمير رجب و أنيس منصور و ابراهيم نافع و اسامة سرايا و اشكالهم...

و رموز السياسة كمال الشاذلي و فتحي سرور و نعمان جمعه و الاضيشهم...

يبقى لازم المستقبل بتاعنا رموزه تبقى جمال و علاء و عز و محمد كمال و سي ايمن نور...

بركااااااااتك يا بركة يا زعيم الزمان و المكان و باني وكستنا....

طبعا قبل ما ابتدي واضح جدا اني لا حزب وطني ولا غد ولا وفد ولا حاجة خالص....

و لولا قرفي و زهقي و فرستي من انكسار كل رمز باحاول احترمه و اتبعه كنت طلعت في مظاهرات كفاية بنفسي...بدل ما باساندهم بأضعف الايمان... بس يا خوفي لو طلعت وراهم و انضربت وانسحلت واتخرب بيتي و اتشردت بنتي و يطلعوا في الآخر زيهم زي غيرهم...

للأسف انا وصلت فعلا لنقطة ما فيش فايدة...

و آخر قشة كسرت ظهر البعير كان سي أيمن نور...

فعلا احترمته لبعض الوقت و صدقته و سجلت في حزب الغد...بس مع الوقت لقيت ان أيمن زي سيدي ايمن...

مش فارقة كتير...

هو سياسي ناجح و بيعرف يعمل بروباجاندا كويس...و ظروفه ساعدته ووالده سانده...

بس من الآخر هجااااااااااااااااااااص كبير...

سيبكوم من الكلام الكبير و الصريخ و التشنج...المواقف هي اللي بتحكم...

يعني لما راجل محترم يقبل يتشتم بامه تحت قبة مجلس الشعب و يتقاله يابن ال... و يهدد و يتوعد و بعد كده يفوت و يطرمخ الموضوع بقعده و عشوة عند المعلم كمال الشاذلي و ينسى الموضوع باتفاق غير معلن.... يبقى فعلا ابن...

و لو انا اديته ثقتي و باعها باتفاق آخر غير معلن برضه يبقى أنا استاهل اللي يجرالي.

و موضوع عماد الجلدة مثلا... لما منى الشاذلي سألته في برنامجها عليه و عمل نفسه مش عارف هى بتتكلم على ايه...اسمه ايه ده؟؟؟البلد كلها عارفه القضيه و البيه شكله ما بيقراش جرايد...

طب ما تفتح الموضوع و تدافع عن نفسك و تزيل الشبهات عنك...

بس ماهو خريج عصر الشفافية طبعا...

و بمناسبة الشفافية كان مؤثر جدا كلامه عن شقته المتواضعة و العربيتين الكحيانين و اليادوبك 80000 جنيه اللي طلع بيهم من الدنيا...

ليه ادعاء الفقر بقى من متطلبات السياسي الناجح؟؟؟

وماله لما يقول الحقيقة...

الشقة الغلبانه اللي هي في الحقيقة فيلا من دورين في عمارة على النيل في الزمالك...

مش حاقول اني دخلتها ولكني أعرف ناس دخلوها و سمعت عن البذخ اللي فيها و شفت صور ليها...و شفت اللوحة الجدارية الفخمة لمجلس الشعب اللي هوه نفسه قال انها كلفته 150000 جنيه.

و العربيتين الغلابة اللي معاه نوعهم ايه و ثمنهم كام؟؟؟

الغنى مش عيب لكن ادعاء الفقر هو اللي مقلق...

ده غير قصص الفساد المالي في حزب الغد و موضوع تمثال محمد عبد الوهاب و ديكتاتوريته و نرجسيته....

و ما خفى كان أعظم....

و الأهم من كل ده...

القصة البايخة بتاعة المستندات المهولة اللي بيملكها عن فساد الأسرة الحاكمة و الحكومة و كل الناس الكبيرة اللي في البلد و دايما بيهدد بكشفها لو لتحبس او خسر أو ظفره انكسر...

ما هو حاجة من اتنين...

يا انت هجاص و كداب و ماعاكش أي مستندات و بتهوش و خلاص...

يا اما انت فاسد برضه زيك زيهم لأن المستندات دي لو فعلا عندك يبقى مش من حقك تخبيها و تساوم عليها بأي شكل و بالذات لأسبابك الشخصية...

لأن المستندات دي مش ملكك...دي ملك الشعب و ما أظنش الشعب مضالك توكيل للتصرف بها كما تريد...

المستندات دي ملكي و أنا عايز أشوفها وأقدمها للمدعي العام و أنشرها في جميع الجرايد و أولع الدنيا بيها على كل المفسدين و الفاسدين...

الا في حالة ان فيه مستندات ممسوكة عليك برضه و انت سايبها علشان تهد بيها المعبد على راس الكل...

يبقى لو انت فعلا وطني و عايز مصلحة البلد هده...و لو مت تحت انقاضه معاهم و خلصتنا منهم أوعدك اننا حنعملك تمثال كبير فوق انقاض المعبد ده و نعترف بيك زعيم...

و السلالالالالالالالالالالالالالالالالالالالالالالالالالالالالالالالالالالالالالال

الالالام

[أسد]

قل ...

أكذوبة أيمن نور

ولا تقل ...

اسطورة أيمن نور

الحقيقة .. وكما أشرت سلفاً في أكثر من مداخلة... أن هذا الرجل للأسف .. كغيره كثيرون .. من رجال العمل السياسي في مصر ..

لا يحمل المصداقية الكافية ..

ويركب الموجة .. ويستغل كل الفرص التي تحقق له مصالحه ومكاسبه هو ..

وهو ككثيرون غيره ..

أصاب الناس بالإحباط وخيبة الأمل ..

وانشغل عن الحق بالمحاربة في كل الإتجاهات ..

والطبيعي أنه .. خسر في كل الجبهات ..

ولا أسف عليه ...

[Alshiekh]

ايه رأيكم ايها الاخوة الافاضل ان يتغير عنوان الموضوع

بدلا من اسطورة أيمن نور

أو أكذوبة أيمن نور

أن يتغير إلى:

الطعن فى أيمن نور

وان يكون من شروط المداخلة فى هذا الموضوع ان يلتزم كاتب المداخلة بالهجوم وبالهجوم العنيف على ايمن نور دون غيره من ال 4000 مرشح

تحياتى

[أسد]

لا ياسيد محمد ...

لم يكن هذا طعناً .. أو غدراً ...

ولن يكون ..

فأيمن نور هو الذي عرض نفسه علينا نحن كمواطنين كمرشح عن الشعب .. وكمرشح لرئاسة الجمهورية ...

وبهذا فقد بدا للجميع كشخصية عامة ..

ومن حق الجميع أن يقول رأيه وينتقد أو يعارض أو يؤيد هذا الشخص أو ذلك ..

وإلا لكان من يعترض على حسني مبارك وسياساته طعناً في حسني مبارك ..

أو لكان من يقيم وينتقد جمال عبد الناصر .. أو السادات .. أو الملك فاروق .. يحسب أنه ينهش في لحوم الأموات ..

أما أن يقال لماذا أيمن نور دون عن الـ 4000 مرشح الآخرين ...

فإجابة ذلك واضحة ...

فهو الذي عرض نفسه منقذاً لمصر والمصريين .. وأن لديه البرنامج للحل .. وأن الشعب معه .. ومعه فقط ...

والحقيقة كانت غير ذلك ...

الأصوات التي حصل عليها في إنتخابات الرئاسة .. لم تكن لشخص أيمن نور .. بل كانت لما يرمز إليه طرحه.. من أن الشباب هو الأمل في التغيير ..

وأخيراً ...

إذا جاء غيره مدعياً عن نفسه ما لا يستحقه ..

فيجب علينا أن نرد عليه .. سواء كان أيمن نور أو غير أيمن نور ...

[مفروس]

الأخ محمد...

صديقي يا ريت نوصل لنقطة...

مش معنى اني باهاجم شخص أو باقول وجهة نظري فيه اني باجرح فيه أو اني /اجور أو مدفوع من جهات خفية أو أو أو أي من هذه الاتهامات اللي اتعودنا برد بيها على أي شخص يخالف وجهة نظرنا...

زي ما الأخ اسد قال...

أيمن نور وضع نفسه في المكان ده...

هو دلوقتي مش ملك نفسه انما ملك العامة...

لازم يوضح موقفه تماما حيال كل التساؤلات المثارة حوله...

هو النهارده عرض نفسه للجميع وطلب منا اننا نصدقه و نسانده...بالعكس فهو كمان نصب نفسه كزعيم الشباب و المتحدث الرسمي عن جيلنا...أنا شخصيا ما افتكرش اني وكلته يتكلم عن لساني...

فمتهيألي اني على الأقل من حقي انه يجاوبني عن تسا}لاتي دي و غيرها...

و مش يجاوبني بكلام و خلاص انما يثبتلي ده...

يعني أنا مش عايز أدي صوتي لشخص تاني يكدب و يخبي عليا و يتعامل معايا من منطلق الشفافية العمياء اللي احنا عايشين فيها من خمسين سنه...

الموضوع مش بس اني أغير اسم أو شكل...أنا عايز أغير الأسلوب نفسه...

و نروح بعيد ليه ياسيدي...

طالما انت مقتنع بيه و مصدقه ما تسأله عن الاتهامات دي و تعرف رده عليها و و تتأكد من حقيقة الرد ده و ترد علينا بالحقائق بنفسك...متهيألي الحقيقة هى افضل رد على التجريح و الكذب...

و ساعتها أكون أول واحد يعتذر له...

تقدر توصله و تسأله؟؟

ولو مافيش طريقة لأنصاره و اتباعه أنهم يوصلوله و يعرفوا منه حقائق عن تهم تخل بالسمعة و الشرف زي دي يبقى ايه الفرق بينه و بين غيره؟؟؟

ولو انت ما يهمكش تعرف الحقيقة و مستعد تتبع أي حد يعرف يقول كلام حلو و خلاص يبقى ليه التعب...مهم موجودين و قاعدين وخلاص

و السلالالالالالالالالالالالالالالالالالالالام

[dr/alfa]

تحياتي لك استاذ مفروس

[fayrouz]

جميل جدا يا جماعه الرؤية الجديدة دي لايمن نور

وقد وضعتها في الاعتبار حين انظر له ..............

ولكن ؟؟؟

ايمن نور كان بمثابة الامل للكثير ..........وبالنسبة لي انا شخصيا

اي نعم لا يتمتع بالمصداقية الكافية من وجهه نظر البعض ......ولكنه ان كان فاسدا كليا .......لماذا سجنتة الدولة الا اذا كان يشكل خطرا او تهديدا علي النظام الحاكم ......ام خوفا من شعبيتة التي تزداد ؟؟

انا حقيقي لا ادافع عنه ولكني اريد ان افهم ؟؟

[محمد الطاهر]

اولا يا جماعه لازم ناخد بلنا اننا فى مصر

يعنى الفاسد اللى زمته كذا وكذا ووحش ومش عارف ايه والكلام ده أكيد مش هيدخل السجن

يا جماعه خلينا نتعامل شويه مع الموضوع بمنطقيه

واحد زى دكتور ايمن ضيع ثروته وبعد عن بيته وولاده ليه؟؟؟ علشان ايه؟؟؟؟؟

أكيد لانه شخص بيحب البلد دى

حرام عليكم لما يكون واحد زى دكتور ايمن فى السجن علشانى وعلشانك وانت تقول عليه كده.

ادعوله ربنا يخرجه سالما وبعدين نشوف اللى الكلام اللى بقوله

[nemr111]

الاخ محمد الطاهر ايمن نور .. لعبة و نطت فى وش اللى عملها و صدقنى ايمن نور لا يستحق كل هذا الاهتمام بالرغم من كراهيتى لتصرفات اسرة مبارك..الا ان مصر لا تستحق كل هذا من اولادها الغير أمناء عليها

[عبدالخالق ابوزينه]

اذا يا سيدى من يحمل المسؤليه كل من يشرئب عنقه تشار اليه اصابع الاتهام كى ينزل به هنيهة او يحنى رأسه للرياح

والرجل لم يدعى الفقر المدثع لكنه بالنسبة الى غيره فقير وفقيرا جدا فالعمليه نسبيات ايه يعنى فيلا او اتنين فى قصور

وايه يعنى سيارتان فخمتان او ثلاث فى اسطول عند آخرين

واصبح احمد زويل والبرادعى ساقطين علميا وقليلى العقل وان اتى سعد زغلول فى هذا الزما فسينعتوه بالخائن

وان عاد عرابى من اندونسيا مرتجلا بعد موته سيكون فاشل .... الله علينا شعب ويا بخت حكامنا بينا

[اغابي]

انا فى صف ايمن نور و بعتبر ان ايمن نور صاحب اول صحوة للشعب المصري

ولفت انتباه الشعب المصرية الى كلمة مهمة كانت مش موجودة فى قاموسه اويمكن موجودة بس خايف ينطق بيها وهى كلمة

كفاية

كفايه للظلم

للعبودية

للجهل

للتعصب الديني

للتخلف

للفقر

للمرض

للتعليم الفاشل

للعلاج الفاشل

لاحتلال مبارك -

مبارك بيفكرنى بالاحتلال لما كان دولة تحتل شعب كان اهم حاجة عندها ازاى تخلى الشعب جاهل وفقير ومتخلف علشان ما يطلبش بحقوقه وتستعبدهم - مبارك عامل زى الاحتلال

كفايه كفاية

وشكرا يا ايمن نور للفت انتباهنا

حتى لو شايفين فيه صفات وحشة

لكن نفتكرله انه دفع خمس سنين من حريته فى السجن علشان يطالب بحريتنا

اللى مش قادرين نطلبها بصوت عالى من زمااااااااااااااااااااااااان

كفاية

تحياتى

:rolleyes:

[ابوهنا]

مع احترانى للجميع

لو اى شخص دخل الانتخابات امام رئيسنا الحالى اطال الله فى عمره فسوف انتخب هذا الشخص بلا تردد

ساعتها اكون غيرت

ويكون هناك امل انى سوف اغير الشخص الجديد

[capitshino]

http://www.youtube.com/watch?v=D2Vuo1gfohg&feature=player_embedded

[eslam elmasre]

النقض تؤيد الحكم السابق بإدانة أيمن نور فى تزوير توكيلات "الغد"

قضت محكمة النقض، برئاسة المستشار طلعت الرفاعى، برفض الطعن المقدم من الدكتور أيمن نور، المرشح المحتمل لرئاسة الجمهورية، وتأييد الحكم الصادر من محكمة الجنايات بإدانته فى قضية تزوير توكيلات حزب الغد.

عقب إصدار الحكم خيم الحزن على أيمن نور وأنصاره، الذين انسحبوا فى هدوء تام من قاعة المحكمة، التى اكتظت بهم منذ الصباح، وعلق نور على رفض الطعن بأنه كان يتوقع هذا القرار ولم يتفاجأ به.

بدأت الجلسة فى تمام الثانية عشرة صباحاً بحضور أيمن نور وأنصاره قبل ساعة من بدء الجلسة، واستغلوا قاعة المحكمة وتجمع المواطنين داخلها لتوزيع الدعاية الانتخابية الخاصة بترشيحه لانتخابات رئاسة الجمهورية.

وفى موقف مثير للدهشة أثناء مرور مرتضى منصور داخل مبنى دار القضاء التف بعض أنصار أيمن نور حوله وتبادلوا معه التحيات والتقطوا معه الصور، بالرغم من وجود خلاف بين منصور ونور.

كان نور قدم التماسًا للنائب العام، مطالبًا بإعادة محاكمته فى القضية المعروفة إعلامياً بـ"تزوير توكيلات الغد"، التى صدر فيها حكم بحبسه ٥ سنوات فى شهر مايو ٢٠٠٦ وأيدته محكمة النقض فى سبتمبر ٢٠٠٩، وقامت محكمة النقض بتشكيل لجنة سباعية من مستشارى المكتب الفنى لفحص الالتماس المقدم من أيمن نور.

يذكر أن قرار محكمة النقض يتوقف عليه رد الاعتبار لأيمن نور، وبالتالى تمكينه من الترشح للانتخابات الرئاسية.

افتكر كده ايمن نور اتيحت له الفرصة اكثر من مرة قبل الثورة وبعدها لإثبات براءته ولم يفلح في ذلك وثبت بكل الطرق انه مدان

على كده مش هاينفع يرشح نفسه في انتخابات الرئاسة او ينشيء حزب سياسي

[أسد]

قل ...

أكذوبة أيمن نور

ولا تقل ...

الحقيقة .. وكما أشرت سلفاً في أكثر من مداخلة... أن هذا الرجل للأسف .. كغيره كثيرون .. من رجال العمل السياسي في مصر ..

لا يحمل المصداقية الكافية ..

ويركب الموجة .. ويستغل كل الفرص التي تحقق له مصالحه ومكاسبه هو ..

وهو ككثيرون غيره ..

أصاب الناس بالإحباط وخيبة الأمل ..

وانشغل عن الحق بالمحاربة في كل الإتجاهات ..

والطبيعي أنه .. خسر في كل الجبهات ..

ولا أسف عليه ...

هذه كانت مداخلة لي قبل أكثر من ثماني سنوات .... توصف حال الرجل وصفته

[Advisor]

في ١٥‏/١١‏/٢٠٠٥ at 15:54, مفروس said:

وضوع عماد الجلدة مثلا... لما منى الشاذلي سألته في برنامجها عليه و عمل نفسه مش عارف هى بتتكلم على ايه...اسمه ايه ده؟؟؟البلد كلها عارفه القضيه و البيه شكله

هذه القضية وحدها  كانت القاصمة بالنسبة لي   وضعته في صورة المحام الفاسد سبانخ