الترعة بتضحك ليه .. وأنا نازلة أدلع أرمي الورق

[se_ Elsyed]

الرئيس مبارك يا جماعة بيقود مصر بجدارة إلى كارثة مُحققة تتمثل في حالة من الفوضى .. وصدام متوقع بين الشعب الذي مل وطلع عينه من قلة الأدب والتزوير والبلطجة طوال ربع قرن .. وبين الشرطة والجيش التي تُنفذ أوامر أسيادها بدون نقاش وهم يعلمون تماماً بإن ما يفعلونه هو جرائم لا شك فيها ..

- إمبارح في برنامج " الساعة العاشرة " على قناة دريم 2 أنا ذُهلت مما أرى واسمع .... منتهى قلة الأدب والفوضى ومنتهى إحتقار السُلطة للشعب اللي هما شغالين عنده وبياخدوا مرتبات من عرق جبينه وفاتحين بيوتهم على قفانا أحنا ..

المهم البرنامج إستضاف أحد المحامين وهو عضو في منظمة حقوق الإنسان المصرية - المغلوب على أمرها ... قصدي المنظمة وحقوق الإنسان المصري مع بعض - والراجل كان مُعين من قِبل المنظمة كمراقب للإنتخابات في الصعيد في محافظة قنا وتحديداً في مدينة " قفط " المهم .. الراجل خلص تقريباً مراقبة على العصر كده وكان رايح يركب القطار ليذهب إلى مدينة الأقصر لمتابعة باقي الدوائر الإنتخابية هناك وكتابة التقارير اللازمة عن سير حركة العملية الإنتخابية ... ففوجيء بإتصال تليفوني من بعض الفلاحين المصريين الشُرفاء اللي شاربين من مياه النيل وتشبعت بشرتهم بطميه .. وقالوا له تعالى حالاً عند اللجنة الرئيسية للفرز أحسن في كارثة ... الراجل لغى رحلته للأقصر وراح جري لحد الجنة اللي كانت عابرة عن مدرسة مُلاصقة تماماً لقسم الشرطة

نصحى بقى مع بعض شويه ونطرطق وداننا الإتنين

الراجل شاف عجب العجاب وكأنها خرافات أو أساطير من ألف خيبة وخيبة ... لقى يا جماعة صناديق الإقتراع ونماذج الإنتخابات مرمية في الترعة المقابلة للجنة الفرز ... والشرطة أخدت خبر فبعثوا بجحافل التتار من قوات الأمن المركزي اللي ما بيعرفوش أبوهم عشان يحاصروا الترعة وما يخلوش الفلاحين يقربوا منها ويصطادوا الورق .... لكن الراجل بفطنته قال للفلاحين .. طب روحوا شمشموا كده حوالين اللجنة وشوفوا في إستمارات إنتخاب تانية ولا لأ ؟

وبالفعل جاء له الخير كله ... آلاف الإستمارات المختومة بختم النسر .. والمملؤة برغبات الناخبين مُلقاه على قارعة الطريق وحوالين اللجنة ...

يا سلام يا سي سين سين .. طب ما هو ممكن يكون الورق ده إتفرز والقَضاة كسلوا يحرزوه كالمعتاد فرموه للفلاحين لكي يستخدموه وقوداً لمدافئهم في الشتاء القارص ... بطل ظُلم بقى ؟

- هذا مردود عليه يا أخي الكريم .. فمن ضمن الأوراق اللي العيال الفلاحين العكاريت لقوها كانت ... أظرف ( مُغلفات " كاملة محرزة ومختومة بالشمع الأحمر وموقعه من قضاة اللجان الفرعية والمفروض أن تُنقل إلى اللجنة الرئيسية للفرز ... يعني لسه بكر وماحدش جه ناحيتها .. ورموها من بره بره بلا وجع دماغ زي الصناديق كده ما أترمت...

برضوا لسه ظالم يا سين سين .. طب ما هو مونكن الصناديق والمغلفات ( مُغلفات يعني إينفيلوبز بالإنجليزي ) تكون النتيجة بتاعتها لصالح الحزب الوطني ؟ صح ولا أنا غلطان ؟

- لأ غلطان يا فالح ... لإن رجال الحزب الوطني الممثلين في جهاز الشرطة .. مش هايقرفوا نفسهم ولسه هايفحصوا ورقه ورقة وصندوق صندوق ويشوفوا مين لصالح الوطني ومين لصالح المعارضة .... فريحوا نفسهم وجهزوا صناديقهم المتقلوظة وخدوها على اللجنة الرئيسية ... وبمنتهى الغباء تخلصوا من الجثة الرئيسية بطريقة غبية .. زي الواد الصعيدي اللي في فيلم همام في أمستردام ما أتخلص من ريش البط اللي سرقه من الترعة الهولندية وقال لمحمد هنيدي " تاويته " وأتفضح بعد كده فضيحة الحزب الوطني في الإنتخابات البرلمانية ...

وقد عرض هذا المحامي الشريف كل المغلفات التي حصل عليها أما الكاميرا .. وهي اللي بشوكها أم أختام ... أما الإستمارات الفرط فأعطى منها شويه بالزوفه للمذيعة علشان تعرضها على شاشات التلفاز وعرض صور الصناديق والورق وهو عايم على وش الترعة وزمان البلهاريسيا كلته .. على موقع المنظمة في النت ..

ولكي لا نُلقي باللوم على مبارك أو حزبه وننعتهم بأقصى العبارات .. لابد لنا أن نكون مُنصفين ... فالحكومة مشكورة قامت بحملة شعواء في الثمانينات وكلفتها الملايين ومصر إتداينت عشان الحملة دي وإستلفنا من اللي يسوى واللي ما يسواش عشان الحكومة تقولنا كلمتين بس وهما " طول ما ندي ضهرنا في الترعة .. عمر البلهارسيا في صناديق إقتراعنا ما ترعى "

فالحكومة عملت اللي عليها .. وحذرتنا .. ولكننا شعب عنيد .. لا يعرف مصلحة نفسه .. وسايب نفسه للبلهاريسيا والإنكليستوما تاكل في جتته .. ويقولك ديمقراطية وحرية وملوخية ... طب روح إتعالج الأول وبطل حُمى في الترعة يا فلاحلار ..

ولا حول ولا قوة إلا بالله ...

[أبو حميد]

فعلا أغبياء الحزن الوطني دول مفروض يتشالوا كلهم لآنه فعلا غبائهم نادر الوجود ومش فاهمين ان الدنيا اتطورت وبقى فيه فضائيات وأنترنت وكاميرات رقمية وتليفون محمول كل الناس شايلاه وبيصور صور عادية وفيديو كمان ومش فاهمين أن في منظمات غير حكومية والعالم كله عينه علينا والخبر بيطير للعالم كله في ثانية ومع كل ده شغاليين تزوير لسه بنفس الإسلوب اللي كان شغال أيام الملك.

[النووي]

بطل ظُلم بقى يا سين سين ...

يا اخي يكفي السلطه انها بتعطي المواطن حق إبداء رأيه وانتخاب المرشح وكتابة اسمه في استمارة الإنتخاب بكل يسر وسهوله وبدون أي ضغوطات ، حتقولي مصيرها الترعه ، طب ومالوه! أهم شيء ان المواطن الغلبان قال رأيه ، ده منتهى الديموقراطيه ، واذا كان السلطويين في المحافظات الأخرى بيستخدموا منطق العصا وقرن الغزال بدون أي جزره ، حنلاقيهم في (قنا) عندهم حس عالي تجاه المواطن وبيستخدموا معاه منطق الجزر بدون أي عصا. يعني يكتب اللي هو عاوزوه ومش مهم بعد كده يفتحوا المغلفات والا ما يفتحوهاش ماهو كله واحد ، لا والله ده كده أرحم ، تخيل بقى تطلع النتيجه زي نتيجة آمال عثمان والا مصطفى الفقي وتيجي السلطه بعد إعلان النتيجه وتنجح مرشحيها بالقوة ، بزمتك مش الحركات دي هيه اللي بتجيب ضغط وسكر وحموضه!

هي المشكلة الوحيده زي ما قلت انتا انك ما سمعتش انت وبتوع حقوق الانسان كلام الحاج/ محمد رضا (الله يرحمه) واديتوا ظهركو للترعه ، وسلمتوا من الضغط والسكر والبلهارسيا والديسونتاريا...

[yasovinas]

طييب وايه رايكم ادام الله فضلكم فيما قاله المجلس الاعلى للقضاه الذي لم يجد سبب او وسيله لعقاب القضاة الشرفاء الذين قالوا كلمة حق فيما يحدث في الانتخابات فاتهمهم بالعمل بالسياسه وهي جريمه كبرى في حق القضاة

واستمرارا في البجاحه وتنفيذ اوامر شاه مصر فقد طالبت من المدعي العام التحقيق مع هؤلاء القضاة

يا سبحان الله هذا هو المجلس الاعلى للقضاء