زواج البنت من مطلق .. ما موقفك منه؟؟!!

[مصرية الهوى]

الحكاية وما فيها ..انه فيه واحد قريبنا بس من بعيد .. اتجوز.. بعد كذا شهر طلق مراته ...

سبب الطلاق .. مفيش نصيب !!

طبعا البيوت أسرار واحنا منعرفش مين الصح مين الغلط .. وأنا بصراحة مبحبش اتكلم في حياة الناس الخاصة .. لأنه يمكن يكون فيه حاجات احنا منعرفهاش ..وبرضه احيانا الراجل بيبقى كويس والست كويسة .. بس مع بعض ميقدروش يعيشوا .. ولو كل واحد راح في حال سبيله واتجوز تاني .. بتلاقي كل واحد مبسوط في حياته الجديدة !!

المهم ...

ابن خالتي مرة قابل قريبنا ده .. فقريبنا .. لمح لابن خالتي انه عايز يخطبني .. يعني قال انه عايز يخطبني .. جد بهزار .. عشان شكله كان حاسس إني هرفضه ...!!

أنا قلت لابن خالتي .. لو فتح معاك الموضوع تاني .. قوله معليش آسفين ..!!

أنا رفضته على طول .. حتى من غير ما أعرف عنه حاجات كتيرة ...وحتى كمان بابا وماما وأهلي كلهم قالوا لازم ترفضي ..!!

طيب .. أنا رفضته ليه ؟؟

مش عشانه مطلق يعني وحش لا والله ... مش شرط الناس لما يطلقوا يكونوا وحشين .. لا .. يمكن يكون الانسان ده انسان كويس .. وابن حلال .. بس مفيهوش حاجه الا انه مطلق ..

ومطلق دي هي المشكلة ..!!

أنا لما ابقى عايزه اتجوز .. ابقى عايزه ارتبط بإنسان جديد ( متغلف كده زي الشوكولاته:D ).. عايزه حياتي الجديدة دي تبقى جديدة بالنسبة لي وبالنسبة له ..

مش عايزه واحد جرب الحياة دي قبل كده .. لأن أكيد شعوره وإحساسه أيام الخطوبة أو بعد الزواج .. مش هتكون زي أحاسيسي أنا اللي أول مرة اتجوز ... ومش هتكون برضه زي احساسه لما ارتبط بمراته الاولانية ..

حاسه إن ذكريات التجربة الاولى هتبقى أحلى ... !!

ولما يبقى عنده أولاد من زواجه السابق .. تبقى مصيبة !!

وكمان خايفة لو قابلت مراته الاولانية .. يحصل كلام والا حاجه منها والا من الناس.. ومهما كان هيكون فيه مشاعر غيرة .. !!

وبرضه خايفه إنه لسا يشيل في قلبه مشاعر ناحيتها .. والا يمكن يجيب سيرتها عندي بحاجه حلوة ..

عشان أقوم اقتله :P .. حتى لو كانت نيته كويسة .. وحتى لو كنت واثقة انه يحبني اكثر منها طبعاً ..

بس يعني الست عايزه تبقى لوحدها ووحدها فقط !!

لو مثلا الحكاية كانت فسخ خطوبة .. نقول مش مشكلة ناس كتير يحصلها كده ..

انما جواز بعدين طلاق ..مش عارفه .. حاسه انها صعبة شويا !!

طبعاً فيه بنات كتير عادي جدا .. متفرقش معاهم مطلق .. لو الراجل أعجبها وحبته .. عادي ترتبط بيه ..!!

وأنا أعرف وحده اتجوزت وعندها 20 سنة بواحد مطلق عنده 36 وسنة وله ولد عمره 12 سنة ...

طبعا دي حياتها وهي حرة فيها .. بس انا قلتلها أيام خطوبتها .. ايه يا بنتي هما الشباب خلصوا عشان تتجوزي الراجل ده .. وعنده ولد كمان !!!

قالت : عادي انا مبسوطة معاه .. انا عايزه اتجوز واحد عارف الحياة كويس .. مش عيل عنده 25 سنة :D ..!!

اختلاف آراء ..!!

وحتى كمان فيه شباب متفرقش معاهم انهم يرتبطوا بإنسانة مطلقة ..وبرضه انا شفت الحكاية دي شاب ارتبط بوحده مطلقة ولها ولد ..

عادي .. ربنا يوفقهم .. لما الواحد يبقى مقتنع احنا مالنا ربنا يوفقه !!

والحاجه اللي تغيظني اوي في الناس انه لما ابنهم هو المطلق يقولوا عادي .. ما هو راجل كويس .. وليه ميتجوزش وحده بنت !!

بس لو بنتهم اتقدملها واحد مطلق ... على طول يرفضوه .. !!

ولو بنتهم المطلقة .. تقدملها شاب ... يقولوا أصل بنتنا كويسة بس جوزها الاولاني هو اللي كان وحش !!

بس لو ابنهم الشاب قرر انه يتجوز وحده مطلقة .. الدنيا تقوم ولا تقعد ..!!

القضية هذه قضية شائكة في المجتمع .. والكلام فيها كتير جدا .. وكل واحد له رايه ..

أنا عايزه اسالكم لو بنتك ولا اختك .. اتقدملها شاب كويس وابن حلال .. بس مطلق ..

توافق؟؟!!

طيب وزواج الشاب من مطلقة .. ايه رايك فيه ؟!!

[felfel]

طيب .. أنا رفضته ليه ؟؟

مش عشانه مطلق يعني وحش لا والله ... مش شرط الناس لما يطلقوا يكونوا وحشين .. لا .. يمكن يكون الانسان ده انسان كويس .. وابن حلال .. بس مفيهوش حاجه الا انه مطلق ..

ومطلق دي هي المشكلة ..!!

أنا لما ابقى عايزه اتجوز .. ابقى عايزه ارتبط بإنسان جديد ( متغلف كده زي الشوكولاته ).. عايزه حياتي الجديدة دي تبقى جديدة بالنسبة لي وبالنسبة له ..

مش عايزه واحد جرب الحياة دي قبل كده .. لأن أكيد شعوره وإحساسه أيام الخطوبة أو بعد الزواج .. مش هتكون زي أحاسيسي أنا اللي أول مرة اتجوز ... ومش هتكون برضه زي احساسه لما ارتبط بمراته الاولانية ..

حاسه إن ذكريات التجربة الاولى هتبقى أحلى ... !!

طب جدلا لو انك اخترت شريك الحياة بكرا على ان تكونى اول أمرأة فى حياتة ( واللة أعلم طبعا بهذا ) ولم يحدث نصيب بعد الزواج كما يحدث كثيرا اليومين دول وانتهى الموضوع بالطلاق ؟؟؟ هل توافقين ان ينظر للك الرجال كأمرأة Second Hand

هل فكرت تحطى نفسك فى الناحية التانية ؟؟؟؟

فى رأى الموضوع مرتبط بعقليتنا الشرقية السلبية ويجب ان نغير كثير من هذة الأفكلر طالمت انها لاتحتلف مع الدين

[Alshiekh]

الآنسة جيجى

الموضوع ده شخصى بالدرجة الأولى

والمتبع فى كل المجتمعات والعربية منها بالذات هو تقارب السن ، وعدم وجود تجربة سابقة.

لكن فيه مثل مصرى بيقول "مرآة الحب عمياء " بس بيقولوها " مراية الحب عميه "

لكن عن نفسى لا أفضل ان يأتينى ابنى او ابنتى فى احد الايام ليبلغنى او تبلغنى عن شيئ كهذا ، وان كان رأيى سيكون استشارى فقط ، ولكننى افضل الا يضعونى فى هذا الموقف.

[Guest النسر المصري]

من زمن بعيد مش كتير كان العالم العربي والاسلامي مابتفرقش معاه الحاجات دي...لانه اساسا كان يقدر الراجل يتجوز اربعة ويشتري جاريات كمان (طبعا دة المقتدر)....وكانت الناس بتنظر للموضوع دة نظرة عادية لانه شرع ربنا شرعه لنا في القرآن الكريم...وووقتها ماكانش فيه مشكله تتجوز مطلقة او حتى تشتري جارية فلان

لكن الدنيا اتغيرت والغكر اتغير من ساعة التفكك للدول العربية واللي بوظولنا الدنيا والدين وخربوها علآخر

يبقى الموضوع مش غلط ...المشكلة اننا احنا اللي استحدثنا الأفكار دي

بالعكس انا لو شفت انسانة مطلقة ولقيتها مظلومة وتستاهل كل خير ولقيتني بتودد اليها هتجوزها لما يحصل اية...وحتى الأمر بالنسبة لبنتي او اختي طالما هو اثبت حبه واقتداره...

نهايته ....انا اقصد اني ماجتش جديد من عندي...وان في الاصل ان احنا كنا بنوافق على المواضيع دي زمان..طالما هي مابتعارضش الشريعة

هي مش دعوة للتحرر..بل هي دعوة لتصحيح مسار افكانا المستحدثة

هي مش دعوة لتعدد الزوجات ورجعة الجاريات...بل هي دعوة للايمان بالشرع في اي وقت واي زمان

سهلوا الامور ياجماعة...وماتنسوش ان ربنا سهلها اساسا في احكامه المطلقة

مهر غالي ...البنت مش عاجبها كرافتته ولبسه...اصل شعره مش عالموضة...اصل مشعارف اية اي حاجة...

ليييه كدة...انا كنت خاطب واحدة من باب البيت واقسم بالله ماشفتها قبل كدة ....وخطبتها تاني يوم ماشفتها اول مرة في بيتها لاني سمعت انها من بيت طيب بس الاسرة واجهتها مشاكل مادية طاحنة وخسفت بيهم للارض...وتسبب الموضوع دة في انهم يبيعوا مسكنهم...واتوزعت الاسرة على بيوت اسرهم...وخطبتها لانها مظلومة في الدنيا دي...وان دة مش نصيبها..بل لقيتها فرصة ذهبية ان واحدة شافت المر والحلو عشان تعيش معايا عالحلوة والمرة ونحب بعض بجد وتبقى مثال للتضحية الشريفة

لكني اتصدمت فيما وجدته بعد كدة...حيث ان اي عريس بيحاول يجيب هدايا ويعمل مفجآت لخطيبته عشان يزيد من حلاوة الجو...لكن اني أفجأ بانها بتقلل من شأنها وبتقول انها مش هدايا غالية..؟؟؟؟؟!!!...دة كلام هايف ياجماعة ....دة شيء سخيف لان الهدية هي حبنا وبس ودي مالهاش تمن....الهدية في المعنى مش في التمن....ولكن اصريت اني ادي الفرصة حتى لو عشرين مرة...وفضلنا مخطوبين لمدة سنة...ولم يفلح الامر رغم انه كان الحوار هاديء جدا ولم تتخلله العصبيه او الصوت العالي ولو لمرة....وانفصلنا...بسبب تركيزنا على الهيافات...

ياجماعة الحب دة نتيجة...نتيجة للتوددد والاحترام...اي لو انا اتوددت لاي حاجة واحترمتها هينتج عن دة حب

كلام ربنا ياناس ...المودة والرحمة وبس.... هو دة شرط استقرار بيت الزوجية...مش انه او انها مطلقان

بما ان الحب والود والاحترام دخلوا العلاقة بين اتنين يبقى حرام عليكم تمنعوها من ان تزدهر

وهتبقوا انتم الجناة في الآخر

والله غفور رحيم

ويجعله عامر

ملحوظة....انا لسة مستني نصيبي وربنا يستر واشوف ولادي قبل مااموت

[صفاء]

أنا عن نفسى أؤيد من يبحث عن السعادة فى أى مكان

ان كنتى ترغبين هذا الشخص فلا مانع ابدا من الارتباط به طالما يعرف دينه وما له وما عليه

ولا ضرر أبدا ان يكون مطلق ... الحياة الزوجية حياة معقدة مليئة بالمشاحنات والاستمرار فيها يتوقف على قدرة الزوجين على التفاهم والتغاضى عن المنغصات اليومية التى تأتى بروح النكد المتواصل

فقط اجلسى وتحدثى معه .... حاولى ان تكتشفى خباياه وصلى لله ركعتى استخاره وتوكلى على الله ان كان هناك قبول ورغبة

ايضا لا ضرر ابدا فى ان يتزوج رجل لم يسبق له الزواج من مطلقة ....

" معلش انا تعبانة وهاكمل بكرة ان شاء الله ... تعبت من الكتابة :P "