في غرفة العمليات

[Diab]

كلمات و جمل ماتزعلش حد ، إلا لو سمعتها من دكتور و انت فى أوضة العمليات

- يالهوى!

- هيييييه النور جه!

- طيب اذا كان ده البنكرياس ، أمال اللى طلعناه ده يبقى ايه؟

- حد شاف الدبله بتاعتى؟

- طب أقوله ايه لما يفوق؟ و زعلان انى سقطتك 3 مرات فى الماجستير!

- إلحق يابنى القطه اللى جريت بالعضمه دى ، خلينا نرجعها للراجل من سكات!

- ياما ربنا بيخلق عجايب ، ماحدش معاه كاميرا يا اخوننا؟

- ولا حركه ماحدش يخيط ، أنا مش لاقى الكونتاكت لنسز بتاعتى!

- ياجماعه تعرفوا إذا كان حد عاش بعد ما خد 500 مللى من الهباب ده؟

- شيل ايدك ، الحاله دى بتاعتى أنا ، ولا هى الكحكه فى إيد اليتيم عجبه؟

- آه ياعينى! والله مانا سايبك!

- حد يسكت الزفت اللى بيدق ده ، مش مخلينى عارف أركز!

- لأ حاشتغل ، أنا صحيح نسيتها ، بس يعنى باعرف اشوف طشاشا من غيرها

ياأخى سيبك من دلع الخواجات ده، المشرط مش تلم ولا حاجه!

- أنا مش عارف ده ايه بالضبط، بس حطه فى التلج و هات لنا واحد بتاع جراحه أوعيه بسرعه!

- ياللآ يابنى خلص ، الماتش هايبتدى بعد ربع ساعه!

- ياجدع انت شيل الملايه من على وشه ، ده لسه له نفس و بيتكرع!

- إنت متأكد إن الحاله عارفه ان شكلها حيبقى كده بعد العمليه؟

- ريحة شياط؟ ...حريقه......حريقه....!!

- سدوا مناخيركوا، خلاص حاتتفقع!!

- طيب ده شريان ، وده وريد ، وده عصب ، أمال ده يطلع ايه؟ حبل غسيل؟

- مسمار بلاتين مين يابه، شوف له أى مسمار من الوكاله ، عياله أولى!

- ياراجل توكل على الله ، ماهى الأرضيه برضه معقمه!

- عقمى السباك و دخليه بسرعه ، النيله ده بيخر!

- يابت مش وقته ، العيان قرب يفوق!!

- الله يخرب بيتك ، ده عصب يابنى مش أستك بتاع نبله!!

- يووووه ، روحى وانتى طالق!!

- يامامى، دم؟

- اطلب البت بتاعة الحسابات خليها تدفع أهله قبل ما يعرفوا !!

- هوه فيه عصفوره برتقانى واقفه على الروب ولا دى تهيؤات بسبب سهرة امبارح؟

- هو كل واح يسافر له شهرين بره يرجع يقول لى طلع القطط من أوضة العمليات؟

- متخدر؟ خلينا نتفق على النسبه وما تحاولش تغير الموضوع ، يعنى هو هايهرب!

- لأ ياست الحكيمات ، مش أول مره أعمل النوع ده من العمليات ، ليه بقى السؤال ده؟

[ATHENA]

:ph34r: :blink: :blink:

حلوين اوي يا ..nubian_eng

خصوصا دي... B)

يسكت الزفت اللى بيدق ده ، مش مخلينى عارف أركز

[ELSHARIF]

الأخ الفاضل nubian_eng

هو سيادتك دكتور ولا مهندس؟

أصل الكلام ده بنسمعه بإستمرار في غرف العمليات .... و كنت فاكر إنه سر ما حدش يعرفه غير أهل المهنة :ph34r:

الشريف

[صفاء]

بيحصل

تم تعديل 2 ديسمبر 2005 بواسطة صفاء

[صفاء]

فكرتونى بموقف ربنا لا يعيده تانى

كنا فى أحد المصايف وتعرض ابنى وكان عمره ثلاث سنوات لحادث فظيع ..

وقع من فوق مكان عالى ولسوء الحظ فكيه قفلوا على لسانه وحصل قطع رهيب للسان لدرجة انه كان شابك على مجموعة عروق بسيطة .. وكانت صدمة رهيبة

جرينا على المستشفى لقينا هناك طبيب امتياز :ph34r: والفكيس اقترح اننا نخيط لسانه وبدون بنج بدون تخدير بالمرة ...

طبعا انا عارضت وبشدة وقاللى لازم نخيط عشنا النزيف يقف ...

انا مش طبيبة لكن اعرف ان اللسان صعب خياطته وانه ممكن يلتئم وحده أسرع من أى نسيج تانى واللى يساعد على كده اللعاب..

المهم لقيته بيقول للمرضة الفكيسة اللى معاه ...

هاتيلى خيط نمرة كذا واذا ملقتيش هاتى نمرة كذا

والا ابص الاقى الخيط اللى هايخيط بيه سمكه يخللى الواحد يغمى عليه

وقال لإبنى افتح بؤك وطلع لسانك ... والولد طبعا كان فى حالة انهيار واعياء منكتر الدم اللى فقده ... بالإضافة إلى الخوف والرعب والألم

لقيت نفسى بشخط فيه وقلتله ايه هو اللى يفتح بؤه .. طب افتح انت بؤك كده وهات الهباب اللى فى ايدك اغرزه فى لسانك وشوف هاتتحمل ولا لا

طبعا المكان كان فى منتهى القذارة ولا تعقيم ولا نيلة وهو بكتيره كده كان لاحس صوابعه بلسانه بعد ما انتهى من أكل سندويتشات الطعمية

وأصريت انه ميلمسش ابنى وتحملت المسئولية والحمد لله لسانه التئم ورجع زى الأول

فى نفس الأسبوع قريت فى الأخبار .. موت طفل فى الرابعة من عمره أثناء خياطة جرح فى جبهته والسبب ان الطبيب قام بهذا العمل دون أن يبنج الطفل مما أدى إلى موته بصدمة عصبية

بلعت ريقى واتشاهدت وحمدت ربنا

[Diab]

أنا يا أستاذ ( الشــــريــــف ) مهندس بس بقي الحاجات دي أي حد بيتعرض لها

في دكاترة بتتعامل مع المريض زي الصنايعي الخيبان يفضل يدي المريض أدوية قد كده واللي يلضم معاه يبقي يشيفيه ده غير أنه بينفع أخو مراته ولا إبن خالته الي فاتح صيديلية تحت عيادته و أهه كله ماشي يا حلاووووووووووة ولا هه :ph34r:

[se_ Elsyed]

تحضرني في هذا الموقف نُكته إفتكاسية

- واحد بيقول لزميله : بقى يا مجنون حد يسيب أوضة العمليات ويطلع جري بره المستشفى من غير هدوم ؟

- فزميله قال له : ما أنت لو كنت سمعت اللي أنا سمعته كنت عملت أكثر من كده .

- فقال له : سمعت إيه ؟

- قال له سمعت الممرضة بتقول : ما تخافش مالك مرتبك وبتترعش ليه كده .. إنت أول مره تعمل عملية ولا إيه.. إمسك أعصابك أومال عيب كده ؟

- فقال له : طب وفيها إيه دي يا فكيك ؟.. ما هي الست كانت بتحاول تطمنك أهي .

- قال له : ما هي ماكنتش بتقولي أنا .. دي كانت بتقول للجراح اللي هايعمل العملية .

[daktara]

مش شايف انك بتبالغ شويه

شويه صغيره يعنى

[se_ Elsyed]

بعيداً عن النُكت والمبالغات .. فعلاً أخطاء الأطباء يترتب عليها كوارث .. فأنا بأعتبر مهنة الطب والقضاء من أكثر المهن قُدسية في الدنيا كُلها فهما يتوقف عليهما حياة الناس والغلطة منهمم بجون على طول ..

- ولكن جمييع البشر بتخُطيء .. لكن خطأ عن خطأ يفرق .. فعلى سبيل المثال الطبيب ممكن يُخطيء دون قصد بعد أن يفعل كل ما في وسعه .. وبالتالي فلا لوم عليه ..

أما لو أخطأ نتيجة جهل وقلة خبرة وفتاوى غير شرعية زي الأخ المُفتي اللي عايز يخيط لسان الولد .. فدي مُصيبة وجريمة يجب أن يُعاقب عليها ..

فمش عيب أبداً إن الإنسان يقول لا أعلم ... ولا ينتقص من قدره أن يرفض قبول الحالة لقلة خبرته ..

ولكن في كثير من الأحيان بيتم التعامل مع المرضى بمبدأ " التجربة والخطأ " وفي كلتا النتيجتين المريض بيدفع الثمن .. وكثير من الأحيان بيكون الثمن غالي .

[Diab]

يا دكترة إنها مبالغة مقبولة :rolleyes:

[احمد هادي]

كلما سمعت كلمة غرفة العمليات تذكرت هذه القصيده للراحل الرائع أمل دنقل

ضد من ؟

في غُرَفِ العمليات,

كان نِقابُ الأطباءِ أبيضَ,

لونُ المعاطفِ أبيض,

تاجُ الحكيماتِ أبيضَ, أرديةُ الراهبات,

الملاءاتُ,

لونُ الأسرّةِ, أربطةُ الشاشِ والقُطْن,

قرصُ المنوِّمِ, أُنبوبةُ المَصْلِ,

كوبُ اللَّبن,

كلُّ هذا يُشيعُ بِقَلْبي الوَهَنْ.

كلُّ هذا البياضِ يذكِّرني بالكَفَنْ!

فلماذا إذا متُّ..

يأتي المعزونَ مُتَّشِحينَ..

بشاراتِ لونِ الحِدادْ?

هل لأنَّ السوادْ..

هو لونُ النجاة من الموتِ,

لونُ التميمةِ ضدّ.. الزمنْ,

***

ضِدُّ منْ..?

ومتى القلبُ - في الخَفَقَانِ - اطْمأَنْ?!

***

بين لونين: أستقبِلُ الأَصدِقاء..

الذينَ يرون سريريَ قبرا

وحياتيَ.. دهرا

وأرى في العيونِ العَميقةِ

لونَ الحقيقةِ

لونَ تُرابِ الوطنْ

[عبده بيه]

الاخت صفاء برافوا عليكي وعلي قوة شخصيتك وبديهتك

لان اي حد في الموقف ده مش هياخد باله ايه اللي بيحصل ويسكت وفي الاخر يندم علي اللي حصل ودي اكبر مشكلة بتقابلنا في المستشفيات

لابد وان يكون فيه رقابة عن المستشفيات وعلي الاطباء وخصوصا ذوات النوايا السيئة