ماذ سيحدث في مصر في الفترة ما بين 7 إلى 13 ديسمبر؟

[se_ Elsyed]

من المعروف إن الجولة الثانية من المرحلة الثالثة والأخيرة سوف تُحسم يوم 7 ديسمبر الحالي .. ووقتها سوف يَكتمِل عقد مجلس الشعب لمدة 5 سنوات قادمة ..

المثير في الموضوع بقى .. إن أول جلسة رسمية ستكون بتاريخ 13/12 وساعتها الريس بييجي بنفسه يقص الشريط مُعلناً بدء دورة جديدة للمجلس ... حلو الكلام ؟

- اللي مش حلو بقى وزمان الشغل في مطبخ لجنة السياسات شغال على ودنه هو إن في الفترة من 7 إلى 13 لازم مبارك يُعلن تشكيل الوزارة الجديدة اللي هاتكمل معاه المرحلة .. لإن الوزارة الحالية مقدمة إستقالتها من اليوم اللي أُعيد فيه إنتخابه كرئيس لفترة 6 سنوات .. وقد مدد مبارك في عمرها 3 شهور إلى حين الإنتهاء من صُداع مجلس الشعب ..

طب مبارك دلوقت تقريباً فقد الثقة في إختيارات جمال اللي جابتهم ورا في الإنتخابات والأمور كادت أن تفلت من إيدهم وهيبتهم إتهزت والناس كلها بقت تستهيف عاشور الناجي ورجالته بعد ما الأخوان عفقوهم وأدوهم علقه تمام في الحارة وكمان الحرافيش وقفوا وقفت رجاله وقالوا لعاشور لأ لأول مره من ربع قرن ... وصاحوا بأعلى صوتهم .. يسقط عاشور وفتواته البلطجية ...

وفي نفس الوقت الوزرا اللي نزلوا الإنتخابات ونجحوا - اياً كانت الطريقة - أحرجوا مبارك برضوا زي أحمد الليثي ومحمد إبراهيم سليمان ويوسف بطرس غالي .. ومش معقول بعد المجهود اللي بذلوه في الإتتخابات يروح راكنهم على الرف ويديهم إستمارة ستة في التغيير الوزاري ..

وكمان الراجل النظيف ده عامل له خده مداس وبيعمل المستحيل عشان جيمي يرضى عنه ...

وكمان مبارك خد على نفسه وعود جامده والعملية بهؤت منه وإتكلم عن 4.5 مليون فرصة عمل وإستصلاح مليون فدان وكلام كبير قوي الناس منفضه له لحد دلوقت بالرغم إن مبارك طلع ناصح زي كل مره وما حطش تايم فريم أو ديد لاين لتنفيذ وعوده بإعتبار إن ده كلام إبن عم حديت ... لكن اهو كلمه وقالها وكلام الملوك لا يُرد - على إعتبار إن مصر ملكية وليست جمهور ... كل الشواهد اللي شايفينها بتقول كده - فيبقى لازم يختار ناس أباضيات ينفذ بهم الكلام ده ولو حتى ربع العمى .. وأهي الناس مش هاتنزل الشوارع تعد العواطلية اللي على اقهاوي عشان يتأكدوا من الرقم المُفزع بتاع 4.5 مليون ده .. وكمان مش هايجيبوا قياس يمتر الأرض اللي إستصلحت .. لكن على الأقل لازم نثبتهم ونخليهم يشوفوا شوية طحين قدامهم مش جعجعة وخلاص ...

والنقطة الأخيرة دي بالذات نركز عليها .. لإن الحكومة دي برضوا المفروض - ربنا يدينا ويدكوا طولة العمر - هاتكمل مع مبارك 6 سنين - هيييييييييه مين يعيش .. دُنيا الإنسان فيها ضيف - وهي ستكون الحكومة الإنتقالية في حالة نقل السُلطة إلى جمال اللي زمان المطبخ برضوا حاططها في المنيو بتاعته وعمالين يحركوا ويفركوا ويسألوا نفسهم ( يا ترى هانقول إيه للناس .. وهانشربها لهم إزاي .. طب وشكلنا قدام المجتمع الدولي ومجلس الأمن والأمهات المتحده وقبل ده كله ماما أمريكا ؟ ) ... وبالتالي لازم شكلهم وريحتهم تبقى حلوه عشان يقدروا يقنعوا الناس إن الحزب الوطني عليه سُكر وهو الأجدر بالحُكم بلا إخوان بلا أخوات ... ده أحنا اللي فيهم والباقي سلطة ...

فيا ترى يا هل ترى كيف سيتجاوز مبارك تلك المطبات الصناعية المتعددة ؟

وهل سيفعل مثل كل مره ويموه ويعمل إنه هايشوط الكوره في اليمين ويروح راكنها لنا شمال ؟

هذا ما ستفسر عنه الأيام القليلة الماضية ... فلقد تعود الشعب المصري على إسلوب فتح عينك تاكل ملبن وبص شوف الساحر العجيب هايعمل إيه ...

أ وكما قالت خالتي بهانه ... ( قال يا خبر بفلوس بُكره يبقى فري أوف تشارج )

[هادي]

عزيزي ابو عمر

هل تتصور ان هذه صورة لجنة انتخابية

الناس بتحاول تدلي بصوتها عن طريق سلالم نقاشين ياباشا

وعادي وكده يعني

في النهاية

اللي نبات فيه

برضه

نصبح فيه

تصبح على وطن حلو و جديد

[wagdi]

الصورة دي بتفكرني بحروب القرون الوسطى وهما بيحاولوا يقتحموا أورشليم....

كويس إن مافيش حد بيدلق عليهم زيت مغلي من فوق...

تم تعديل 4 ديسمبر 2005 بواسطة wagdi

[bodi]

صبح الفل يا ابو عمر

و الله اظن انه لن يحدث اي شي جديد

مبارك هيكون الوزاره من الاشكال العكره الجديده و هيزود نسبه الننوس و الاضيشه وقبل كده المرحله الثالثه هتقفل و لو الاخوان اخدوا اي مقاعد هتبقي بخلع الضرس

تكوين الوزاره مش مشكله عند مبارك لانهم سكرتاريه وشي شي حا حا يعيني مش عايزين حد له رؤيه بس المهم انه مع الوقت يبقي يصد و يرد وادي دولاب العمل شغال لوحده و علي راي حسب الله الكفراوي لما قال لابراهيم سليمان ان سايب لك مشارع مفتوحه و اخري مخطط لها لمده عشرين سنه يعني كل الانجازات الموجوده دبيفتتحوا فيها عاره عن شغل و فكر ناس في اخر عصر السادات

المهم ما بعد تكوين الوزاره

مبارك وراءه بلاوي

1- شعب ابيتدي يتحرك و ينفض غبار السلبيه

2- صحافه مشاغبه و لا تتواني عن نشر بلاويه هو العائله المالكه و الحاشيه

3- معارضه قويه من الاخوان لن تعيق عملهم لكن سوف تفضحهم

4- صحته المعتله

5- وضع اقتصادي سئ للغايه وعجز هائل في الموزانه مع فلس فكري مناظر من الساده القائمين علي الحكم وعموما هما هايلجوا الي رفع الدعم و اعتقد ان الموضوع ده هو اللي هيكون القشه الاخيره

فيما يخص الوعود اللي اطلقها اكد اجزم ان الموضوع ده لا يحتل اي مساحه في فكر مبارك و الحشايا و اعتقد هما يعملوا معه كما كانوا من قبل بنظام الغلوشه يعني ارفع الدعم وبعدين اطلع قول في كل وسائل الاعلان ان ده تم علشان محدودي الدخل

طب مبارك هيعمل ايه في البلاوي اللي دكرتها سابقا

هيعمل ولا حاجه لانه من ساعه ما مسك الحكم و سايب العمليه تمشي لواحدها و لو انه بيبص لقدام و بيحاول يحل اي مشكله مكناش وصلنا للوضع اللي البلد فيه الان

[سقراط المصري]

الصوره المعروضه دي خطيره جداً:

1- طبعاً الناس دي عملت كده مش بسبب الزحمه ..... اصله مش طابور عيش.... ولكن بسبب منع الامن او الداخليه لهم.

2- طبعاً الداخليه او البلطجيه ........ مش هيمنعوا واحد رايح يصوت للحزب الوطني........ ولكن هيمنعوا اللي رايح يصوت للإخوان او لمرشح مستقل.

3- من رأيي الشخصي ان اللي رايح ينتخب المرشح المستقل.......... رايحه ينتخبه ليس حباً فيه.......... ولكن عشان يطلع ب 100 جنيه او كيلو سمك او بطانيه........... وفي الحاله دي فأن معنى كده.......... ان الشعب بدأ يعمل اي حاجه مهما كانت في سبيل ................. الفتات.

4- اعتقد ان الاخوان المسلمين........ لايدفعون للمرشح عشانت ينتخبهم........... بل المنتخب للإخوان ذاهب عن عقيده في ذهنه تجاههم او نكايه في الحكومه.......... وعليه من يفعل ذلك من اجل عقيده...... معناه انه ممكن يفعل اكثر من ذلك ......... لانه ببساطه انكسرت حده الخوف الداخليه.

لو لم يكثر ذهب المعز في الفتره القادمه........ والتي ممكن ان تطول بعض الوقت................... هتظهر انياب الشعب................. ولو الشعب المصري بدأ يتحرك ...................... لن يتوقف إلا في قصر عابدين.

تحياتي

سقراط

[Doofy]

================================================================

والله الواحد مش متفائل خير لا من الحكومه....ولا من الشعب

وعود وشعارات مكملتش شهرين وهيه هيه نفس الوجوه القبيحه التي عكرتها مفاسد السلطه والظلم والطغيان على خلق الله نجدها في البرلمان تتسلل اليه ليس من باب الشعب طبعا ولكن من سرداب الحكومه...

النيه لو كانت خير كنا حسينا بالتغير فعلا مكناش شفنا يوسف والي وصفوت والشذلي واسياد البلد لسه قاعدين على تللها وبيقشروا موز وبيرموا القشر علينا... عارفين ليه..؟

عندما دعت الحكومه للتغير مكانش علشان خاطر عيون الشعب المصري لأن المخطط الشيطاني كان مستمر في هدوء إلى ان رفعت امريكا الشبشب فكانت نقطة المطر الأولى التي عكرت صفو البحيرة العَطِنه...

الرئيس ساب لجام البلاد شويه معتمدا على قانون الطوارئ ولكن الشعب العطش لحريته وآدميته هجم في جميع الأتجاهات وتشتت صوته بين يمين ويسار دا غير اللي باع صوته في اول كانتين للحكومه وخد بداله صندل وجلبيه...

وبذلك لم يستغل الشعب هذه الفرصه التي اهدته اياها الحكومه الأمريكيه ليتم التغير السلمي ويخرج الشعب بكامله بدون انتخابات بدون ندوات بدون حوارات وخطب وكلام فارغ ويقف امام قصر الرئاسه ويطلبوا من الرئيس التغير الكلي وعلى الفور...

فالشعب مازال غير مؤهل ليصل ألى آدميته وتحقق المثل اللي بدعناه فينا واللي بيقول : " اللي بيجي بالساهل بيروح برضوا بالساهل "

وحصل المراد و ابتلع معظم الشعب طعم الحكومه واتجه لصناديق الأنتخابات فاكرين ان الحكومه المصريه هاتعاملهم كبنآدمين فعلا وهتلعب لعبة الديمقراطيه ومش عارفين ان البلد دي بقت بتاعتهم من اكتر من عشرين سنه - راح الملك رجع الملك - وبالتالي كمل الشعب بقية المسرحيه وطلع الرئيس نسبيا من مأزقه امام الأمريكان ..

قادة ووزراء الفتره القادمه هتكون من طبقة الأسياد برضه واللي بيدعمهم المنتفعين واللي عاملين خدهم مداس ليهم...

هنلاقي أصلاحات هلاميه ورَش الفلوس هيبقى كتير ,ياعني كبري هنا كبري هناك ,شارع ينور هنا يضلم هناك مصانع شوكلاته وسوداني وبنبون وبرضه مش علشان خاطر الشعب الجاهل للمكانه اللي المفروض يكون فيها لو قدر يوصل لخير هذه البلاد...

الدوره الأخيره لمجلس الشعب بتقفل وبتفق مع الزميل bodi ان الحكومه لن تسمح للأخوان بوجود قانوني مادامت تخالف مصالحها..

فالطرق كلها تـُعبـّد لجيمي الآن هو وأولاد الأسياد في المرحله القادمه, ولن يكون التغير وقتها سلمياً.. وذلك لسببـيـن:-

1- لأن الناس دي هتكون صرفت كتير قوي علشان الشعب يعيش يومين ويرضى بالمقدر والمكتوب اللي هتفرضه عليه الحكومه ..

2- الناس دي لا يمكن يفكروا ولو للحظه انهم يصحوا الصبح من غير سلطه ولا حراسات ولا رصيد على المكشوف لأنهم عارفين ان تاريخهم اسود قاتم زي قلوبهم وايديهم يما لطخت بدماء هذا الشعب ومتأكدين ان ملايين مستنين القصاص ممن شردوهم وسرقوا قوت يومهم وسمموا اطفالهم..

ومـن قتـل يقتـل ولـو بعـد حيـن

:

: