تقاليدنا البالية...

[بنت شعنونة]

الدول العربية

واولها مصر

مليانا بكثييييير من التقاليد

التى لا هم لها الا تحطيم معنويات الناس

او ربطهم في مقاعدهم محلك سر

اود من كل واحد منكم

ان يكتب لنا ما يراه تقليدا باليا في بلده او البلد التى يعيش فيها

فربما لو شفنا هموم غيرنا تهون علينا بلوتنا  

سأبدأ انا

اول تقليد سخيف  في بلدنا

اسمه تقليد

عيب!!!!!!! او ما يصحش؟؟؟!! او مش من مستواك؟؟ ازاي تعمل كدا!!!

لا اله الا الله!!!

مثلا....

يا جماعا الصين ما وصلتش للي هيا فيه الا لما الناس حطوا همهم كله في الشغل

واصبحت الحياة = العمل

يعني

العمل من اجل متعة العمل ثم يأتي بعد ذلك الناتج المادي

اللي اكيد ها يتحسن ما دام هما بيبذلوا مجهود

تعالوا نشوفهم عايشين ازاي

زي ما فيه ناس راكبة عربيات وبتاع

في ناس راكبة عجل

اه والله عجل

وتعتبر اعلى نسبة راكبي دراجات في الصين...

يبقى دكتور ومحترم رايح شغله بعجلة

عادي جدا

وليها مواقف وطرق مخصصة

ماحدش كلمه.....

جربوا بقى هنا نعمل كدا.؟؟!!

يالهووووووووووي

ايه دا دا بيركب عجله؟؟؟؟

يا دي الفضيحة!!

هوا ما معهوش يركب تاكس او متروا؟؟

تؤ تؤ تؤ

مش "عيب" دكتور محترم يركب بسكلته؟!!

او "ما يصحش" مهندس زيك يركبها يعني مش من مقامك؟؟؟؟؟!!

وقيسوا على كدااااااااا كتيـــــــــــــــــــــــــر

الشباب يسافر "قبرص" والله قبرص  يمسحوا ارضيات وينظفوا حمامات و يغسلوا صحون

عااااااااااااادي

انما يشتغلوا هنا جوا بلدهم كدا!!!!!!!!

 

عيييييييب!!!!!

ازاي ما يصحش.....

دا طالب في تجارة محترم ازاي يغسل صحون مثلا؟؟

والا مخلص حقوق ازاي يشتغل ديليفري يعني؟؟؟؟؟

امال يسرقوا؟؟؟؟؟؟؟

بطلوا  بقى يا عالم

وفوقوا شوية

و الأفظع من دا

بصوا النموذج الهاااااااااااااايل دا

اللي بيتكرر كل يوم الف الف مرة

بنت عادية جدا

واقفة مع مجموعة من الزملاء الصبيان في مكان عام بيتبادلوا الحوار شوية جد و شوية هزار

بس المشكلة انهم 4 صبيان وبنت

تبقى مش محترمة على طوووووووول!!!!  

طب ليه يعني؟؟؟؟

يقولك ازاي بنت محترمة تقف مع 3 او 4 صبيان لوحدها كدا؟!

طب يا سيدي ما هي واقفا باحترامها اهيه!!!

و واقفا في مكان عام يعني

قدام عين الناس " في عين الشمس يعني"

لا برده

عيــــــــــــــــــــــب!!!!!

ولو البنت دي بنته يقولك عيب ازاي دول زمايلها وانا عارفهم والبنت واقفا بتتكلم معاهم حبة ومروحة .........فين المشكلة!!!!!!!

مجتمع شيزوفريني متخلف فعلا

بيبص بعين واحدا فقط للأشياء

او بالأصح

يحب ينضرب على قفاه

يعني قدام الناس ارسم الوش المحترم 100 100

ومن تحت الترابيزة اعمل اييييييييي حاجا

ساعتها بس تبقى محترم وابن ناس جدا جدا....!!!!!

آآآآآآآآه

وعجبي..........

مستنية اسمع تقاليد تفرح منكم كدا

[Byte]

الموضوع كويس،

ولكن التصرفات المتخلفة غير ما ذكرتيه

فانتي مثلا شايفة ان خريج الجامعة يجب ان يقبل ان يغسل صحون في بلده زي ما بيغسل صحون بره بلده

وانا اري ان خريج الجامعة لا يجب ان يغسل صحون لا في بلده ولا خارج بلده

فهذا اهدار للاستثمار في التعليم، ويبق بلاش منه احسن!

فهذا الشاب اضاع 16 سنة من عمره مستثمرا في التعليم وغير منتج حتي يستحق العائد الاكبر ممن لم يكمل تعليمه !

وعلي هذا فغسيل الصحون مش من مستواه، الا اذا كانوا فتحوا شعبة غسيل صحون في الجامعة!

بل ان غسيل الصحون ليس من مستوي من لا يعرف فك الخط، لانها وظيفة الماكينة!

اما موضوع البنت اللي واقفة تهرج مع 4 شباب ، فليه ما تقفش تهرج مع 4 بنات؟

انا فاكر فيلم زمان لسعاد حسني ان  كان شعارها طول الفيلم ان البنت ممكن تعمل كل اللي هي عايزاه مادامت محافظة علي شرفها! لغاية ماخسرت شرفها آخر الفيلم لأنها بالسمعة اللي كونتها عن نفسها طمعت الشياطين فيها!

طبعا كلنا فاكرين حقبة الافلام دي ، والاراء الجميلة من تلك العينة اللي كانت سبب في تغيير الكثير من قيمنا الجميلة، واصبح شرف البنت كلمة لها معني غريب واقتصر علي البكارة!

فهل بكارة البنت هي شرفها؟

بالرغم من اني كانسان انوي نادر من العصر الحجري مازلت احتفظ ببعض الاشياء التي في سبيلها الي الانقراض مثل : النخوة ، الغيرة.. الخ ولكن لغرض اكمال المناقشة نفترض اننا وضعنا المعيار في بكارة الانثي فقط؟

فهل بعد عمليات الترقيع يصبح لدينا معيار آخر لشرف الانثي؟

وماذا يصبح المعيار للبنت المحترمة الغير مستهترة؟ شهادة من اتنين موظفين حكومة؟

لقد توحشت البنات في المجتمعات الغربية الي درجة اننا احيانا لا نميز الانثي، لا من الشكل ولا من اسلوب الكلام ولامن اسلوب التفكير ولا من اي شئ!

عموما ، البنات المتحررات يقبل بهم احيانا الشباب المتحررين ، ودائما الشباب المراهق

اما البنات اللاتي يعرفن حدودهن كأنثي ، يتمناهم كل رجل ، والخيار للبنت : ماحدش بيختارلها!

وقد اعجني موضوع في هذا المنتدي يناقش مشكلة مشابهة

وهي ان البنت "عيب" انها تكون متحررة

اما الولد، فمسموح له ، وربما يفخر اهله بانه "بتاع بنات

وهذا ليس من ديننا في شئ!

فمن تلك الناحية ، يستوي البنت والولد: الاتنين عيب

[بنت شعنونة]

اخي الفاضل

كنت اتكلم من منظور انه البلد فيها حالة بطالة فظيعه جدا

فرضا الشاب خريج الجامعة ملاقاش اي شغل

يقعد على القهوة؟؟؟؟

والا يمشي في الشوارع؟

وفرضا انه لقى وظيفة من دون المستوى كما تقول

يسيبها عشان دون المستوى ويقعد عاطل دا افضل؟؟!!

يا سيدي الفاضل

العمل عبادة

مادام عملا شريفا فلا عيب على من يقوم به ان يقوم به

ولو كنا بنفكر بمقياس العيب يبقى هانفضل زي ما احنا فعلا

محلك سر!!

اما موضوع البنت

اخي الفاضل

هل يعني هذا انك لم تقف في كليتك ابدا مع مجموعة صبيان وبنات

تتحدثون في مجالات من العلم والجد وبعض المزاح؟؟

هل هذا عيب؟؟

اما استوقفتك احدى زميلاتك ابدا خارج باب الجامعة ببضعة امتار تسئلك بعض الأسئلة لفترة وجيزة من الوقت

ما الحرام في هذا او ما العيب فيه؟؟

[ragab2]

موضوع عملى ومفيد

وتعليقى أن غاسل الصحون بأوروبا يتقاضى مرتب أكثر من مرتب رئيس مجلس ادارة

طبعا أتكلم عن المرتب وليس المخصصات واللهف الذى يصل أضعاف المرتب بعشرات المرات

أعرف جرسون مصرى فى لندن منذ عشرون عاما والآن هو مليونير

تحياتى

[Byte]

بالنسبة لموضوع اهدار خريجي الجامعات ، نناقشه في المنتدي في هذه الصفحة

My Webpage

ووجهة نظري واضحة ، وليس غسيل الصحون او توصيل طلبات التيك اواي للمنازل هو الحل، ولكن الحل في عدم تخريج مئات الالاف ليغسلوا الصحون في النهاية، وبالتالي، عندما نخرج طبيبان ، يكون مصير احدهما غسيل الصحون ، والآخر ان يكون طبيب غير كفؤ!

بالنسبة لموضوع نظرة المجتمع للبنت وتصرفاتها ، فيجب علينا فهم الثلاث مرجعيات التي تحكم تفكيرنا:

1. الدين

2. المنطق

3. العادات والتقاليد

الأخير هي الضعيفة ، والتي يجب علينا تغييرها ماوضح لنا خطأها : مثال ذلك : موضوع ختان البنات

ويبقي التصارع بين المرجعين الاولين، وانا دائما اراهما يعضدان بعضهما ، فان وجدت تعارض، ارجح رأي الدين، لماذا؟

احكي لك قصة حقيقية وقعت في تورونتو منذ 4 سنوات لشرح وجهة نظري:

في كندا لا توجد المرجعية الدينية، بل العقل والمنطق فقط.

والقصة ان في يوم كان شديد الحرارة، فخلعت احدي الطالبات بلوزتها التي لم تكن ترتدي شئ تحتها، وهذا شئ عادي يفعله الطلبه الذكور هنا، ولكنها كانت اول طالبة تفعله ، وكانت حجتها انه لا يجب ان يكون هنا تفرقة بين الولد والبنت، وجسم الولد مثل جسم البنت!

قبض عليها وتمت محاكمتها

ودافعت عنها المحامية بنفس الدفاع ، وهي ان صدر البنت مثل صدر الولد ولا يزيد الا في تجمعات دهنية!

وهذا ، منطقيا ، حقيقي! وهو ما اخذت به المحكمة ، بالمنطق!

وبناء علي حكم المحكمة اصبح من حق اي فتاة ان تفعل مثلها، ان ارادت ، واطلقوا يومها علي مدينة تورونتو ، بسخرية ، علي مدينة تورونتو Topless Toronto

فهل ، منطقيا، كان تصرف البنت خاطئا؟

وهل منطقيا ، كان قرار المحكمة خاطئا؟

ما هو الخطأ؟

اننا لو استخدمنا نفس المنطق فربما لا يوجد شئ يمكن اب يكون خطأ بعد ذلك!

وهنا يأتي دور الدين

انه الناموس الذي يقدمه لنا الخالق ، وهو اعلم بعقول وغرائز خلقه، ليقدم لنا الاطار المرجعي الذي نستطيع  استخدامه كفلتر عندما لا نكون متأكدين : هل هذا التصرف صحيح ام خاطئ!

فقد كانت البنات منقبات حتي مجئ هدي شعراوي، ومن يومها والتطور والتطوير مستمر،

ويمكن ان يستمر الي مالا نهاية

وهي في النهاية مسألة وعي واختيار

[بنت شعنونة]

خليني اخصص موضوع التوظيف الأول :bored:

دا سياسة شعب و دولة

تبتدي من اول الأهل وكلمة لا حرام المجموع

او لا لازم ابني يطلع كذا

وفي الأخر يطلع دكتور جاهل او مهندس مش فاهم حاجا او او او....

وبعدين نيجي للتنسيق المقزز

الذي يقذف باحلام وطموحات الشباب الى الهاوية

فيجبر من يجبر على دراسة مالا يتمنها ولا يطيقة

وبرضه ها نوصل لنفس النتيجة

لو غيرنا الأهل

يبقى ها نعمل ايه في التنسيق

ونظام الثانوية العامة المميز!!!!

واللي بيعتمد على قهر النوابغ و ذبح المواهب و تفطيس العقول!!!

يبقى بعد ما يطلع البيه دكتور جاهل او مهنجس فاشل ويتسبب في موت الألاف بجهله

لا والله

عندي اكرمله انه يغسل صحون

ومايضرش الناس

مادام مش ها ينفعهم

يبقى على الأقل ما يضرش!!!!

سيدي الفاضل

بحكم عملي ك دكتورة

اعرف من الأهوال عن الأطباء ما يشيب له الراس

كفايا اقولك ان 60% من الدكاترة هنا

دكاترة بالوراثة

واقصى علاقتهم بالطب ورقة وقلم واسم والده الدكتور او والدته الدكتورة

والطب منهم براء والله

و 30% التانين نجحوا في الكلية بالكوسة او غيرها

يتبقى الغلابة ال 10% اللي بكونوا تفقوا بجد

بدراعهم يعني

دول بيكونوا بجد دكاترا شاطرين

انما اسماء الأساتذة اللامعة فلا تثق فيها

واظن ان حالات المرضى وحالات الوفاة في عيادات كبار الأطباء ابسط دليل :nervous:  ???

[متسائل]

في المتوسط: من 30% إلى 50% من مساحة الشقة مهدرة في صالون و سفرة..

الصالون قد يستغله الضيوف 6 ساعات في الأسبوع (4% من الوقت)

و السفرة؟

كثير منا يتناول الوجبات الثلاث في المطبخ إذا كانت مساحته جيدة...

نحشر أنفسنا و أولادنا في 25% إلى 35% فقط من مساحة المنزل الذي أصبح صغيراً في مصر بالفعل..

من أجل ماذا؟

الوجاهة الاجتماعية أيضاً و أيضاً.

تقاليد سخيفة    :alien:

البنت الشعنونة... أرق تحياتي  :inlove:

Edited By متسائل on June 16 2002 1:43pm

[بنت شعنونة]

هههههههههههههههههههههههههههه ;)  :cry:

الله يسعدك متسائل مثل ما ضحكتني :)

بجد بجد

انا اول مرة في حياتي افكر في الموضوع دا

ههههههههههههههههه

بس والله عندك حق فعلا

طب بالمرة بقى

ازود على كلامك

الناس اللي بتشتري انتريهااااات جميييييلة جدا وغالية

وفي الأخر يغطوها بكسوة معفنننننننه بحجة الأطفال  وبتاع وعشان الطقم ما يتبهدلش

؟؟؟؟؟؟؟؟

وما تتشالش الكسوة دي الا وقت الضيوف بس

يعني كل مية سنة مرة

ونموت احنا والطقم زي ماهوا

زي الفللللل

لا مننا استمتعنا بيه

ولا مننا خدنا معانا تحت :nervous:

ااااااااااااخ ياني

ربنا يستر علينا بس  ???

[MuslimaEgyptian]

موضوع هام جدا يا ريت نفعل به اكثر من القراءه فقط ....ولكن نفعل ثوره على تلك العادات، وان كان على المستوى الشخصى...ضحكت كثيرا على نقطه غطاء الأنتريه :) والإستخدام القليل للصالون والسفره ;) :cry:

لانهم شئ ملموس جدا...مثلا...لنا أقارب لهم اولاد كثيره..

فأغلقوا مساحه البلكونه الصغيره جدا لتحويلها لغرفه نوم....ويا عينى مفيهاش مجال للتنفس...وفى نفس الوقت، عندهم حجره سفره بأكملها وبها اجمل الديكورات..ولكن لا يزورهم احد إطلاقا ...إطلاقا...

(حد يفهمنى هذا المنطق)   :bored:  :bored:

ملحوظه:  نقطه البنت والأربع صبيان دى موضوع لوحده شويه...فأتفق مع اخى بايت، فمهما كان نحن مجتمع شرقى...حياء البنت به معزز... وديننا به قواعد عن علاقه المرأه بالرجل ولسنا كالغرب المفتوح على مصرعيه...ولكنك مصحه، فمجتمعنا يعرضنا للإختلاط ...

ولا أظن ان الكلام فى اطار الدراسه والعمل والشراء قد يثير الأقاويل كمواقف اخرى تستحق الف تقويله وعلينا تجنبها...وما اكثرها اليوم....ولكن فى النهايه، يجب الا نحكم ونتهم كده كده...والأن...كنت

لسه بتحدث مع اخت عزيزه عن ذلك...مين اللى قرر ان وقت الجواز، العريس عليه السجاد  والعروسه النجف (حاجه زى كده) ...طيب هل لو العروسه هى اللى جابت السجاد، يبقى الزواج باطل؟ :) مين إخترع الحاجات دى؟ :)

[Byte]

بالنسبة لموضوع الخريجين، ممكن نكمل النقاش في الصفحة الاخري، ونحتفظ بموضوع تقاليدنا البالية لمناقشة تقاليدنا البالية فقط :)

اما بالنسبة لحكاية كسوة الانتريه، فما تفكرونيش :D

انا كام رأيي زيكم كلكم من 10 سنوات، وبدأت بنفسي وقلت لا كسوه للصالون، هو احنا جايبين صالون فخم علشان نغطيه؟ :)

طب ماكنا نجيب صالون رخيص طالما كده كده هايتغطي!

وقد قام الاهل والخلان بالواجب لاقناعي بخطأ وجهة نظري عمليا!

كل واحد يزورني لازم يسيب بصمة! عصير يندلق، العيال العفاريت ياكلو ويمسحوا فيه!

وكل بصمة تظل للذكري الي الابد!

وهنا عرفت قيمة الكسوة، يمكن غسلها!

فلنتخلص من تلك العادة، اما ان نشتري صالونات رخيصة ونغطيها، لو ان يكون القماش الخارجي للصالون قابل للفك والغسيل(بسوسته او فيلكرو)

اما موضوع النجف والسجاد ومين عليه ايه، فده موضوع شرحه يطول!

بداية احب اوضح ان الرجل هو المسئول عن تجهيز كل شئ ، وهذه هي السنة، بل ويدفع ايضا مهرا!

ومع ازدياد تكلفة الزواج ، ورأفا بحال الشباب، ورغبة من الاباء ان يسهلوا جواز بناتهم ، قام الاباء بصرف المهر علي تجهيز بناتهم، وده ليس بالشئ السئ، وليس ضد الدين، وان كان لا يفضل!

ثم اصبحت عاده، وصار الاباء يدفعوا فوق المهر للوصول بمستوي العفش المناسب لبناتهم ، حتي وصل الامر الي ان القاعده هي ان ابو العروسة يجب ان يدفع مثل المهر في الجهاز، واي شئ يزيد عن العفش (اجهزة كهربائية، سجاد، خلافه ، يجب ان يقسم بينهم، )

والتقسيمة الحالية هي احد التقسيمات ، وهي متطورة، وتختلف من محافظة الي اخري( اسمع مثلا ان بنات دمياط اقل من يتحملون تكاليف في جوازهم، ولهذا ايضا فهم اصحاب اعلي نسبة عنوسة)

وطبعا تطور موضوع (القائمة) وهو ايضا من تقاليدنا البالية كان مصاحب لتلك التطورات!

وبصراحة ، الموضوع بقي كله فصال ، وبقي مقرف جدا لاي واحد بيحترم نفسه!

والحل: قليلا من التنازلات عن الكماليات التي يبدأ بها الزوجان

التخلص من الاعباء الاضافية التي نتفنن لنبلب نفسنا بها :( الخاتم الالماس اللي اصبح شرط اساسي، الفرح اللي بيكلف من 5 الي 25 الف..)

هو احنا ناقصين!

قارنوا بين تكلفة الزواج الآن والتكلفة من 50 سنة، اقصد التكلفة الحقيقية وليس نتيجة التضخم: اراهن ان ما يتكلفه العريسان الآن لن يقل عن 10 مرات ما كان يتحمله العرسان وقتها

يعني دي عادات جديده علينا ، مش تقاليد ولا حاجة،

[بنت شعنونة]

من تقاليدنا البالية ايضا

واللي ها امووووووووت وافهم سببها ايه :devil:

انه تلاقي وقت المغرب والصبح بدري

كل صاحب محل

او حلاق او كوافير او ميكانيكي او او او........

ماسك خرطوم المية

وتششششششششششش

عمال يرش ارض الشارع؟؟؟؟؟؟؟؟؟

وياريت رشة كدا عشان تاخد حرارة الجو زي ما بيقولوا

لالالالالالالالا

دا بيغرق الدنيا مية

الله؟؟؟؟

طب مش حرام المية دي اللي رايحا على الارض!!!!!!!

حاجا تفرس :)  ???

[متسائل]

وياريت رشة كدا عشان تاخد حرارة الجو زي ما بيقولوا

هذا ليس السبب، بل حقيقة هو لتحويل التراب إلى طين، كي لا يتطاير الغبار في الهواء.. و هو شيء هام.. نظراً لقذارة شوارع مصر و امتلائها بالتراب.

[disappointed]

مثال حى من واقع الحياه اليوميّه

=================

متحدّث أ : انت اسمك ابراهيم؟؟؟

متحدّث ب :ان شاء الله

:dozingoff:  :dozingoff:

ياترى أنا اللى منحل وكافر وزنديق و....و....و.... أم المتحدّث( ب) هو اللى يغيظ ويفرس؟؟؟؟؟

???

[متسائل]

لا يا أخ محبط.. مالكش حق:

كل شيء بمشيئة الله..

و بعدين.. ذس إز أ فيجر أوف سبيتش

بالعربي أهه علشان محدش يزعل  :)  :inlove:

Edited By متسائل on July 01 2002 3:24pm

[disappointed]

مثال حى من واقع الحياه اليوميّه

=================

متحدّث أ : انت اسمك ابراهيم؟؟؟

متحدّث ب :ان شاء الله

:dozingoff:  :dozingoff:  

ياترى أنا اللى منحل وكافر وزنديق و....و....و.... أم المتحدّث( ب) هو اللى يغيظ ويفرس؟؟؟؟؟

???

بمعنى آخر.....هل استخدام البعض لتقديم المشيئه الالهيه (وهو شيئ واجب بالنسبه لما ينتظر حدوثه فى المستقبل) عند الحديث عن شيئ حدث بالماضى أو حقيقه واقعه بالفعل يعتبر ايمان أم تقليد بالى أم دروشه أم ضعف فى استخدام أدوات اللغه العربيّه أم......غباوه ومخ مظلم؟؟؟؟

:)

[متسائل]

أختلف معك في هذا المثال.. و كذلك لا يمكن أن نتهم بالغباء من يفعل ذلك.. فهو تعظيم لله تعالى، و لا خطأ في ذلك.

و لكن يمكنني أن أقدم مثالاً آخر..

مذيع في التلفزيون مثلاً أو أي شخص: "يمكن إنهارده العيد و كلنا فرحانين"

"يمكن.." لماذا؟ أأنت غير متأكد؟

و مثال آخر.. الفواص و الحواشي بدل فترات الصمت: "آآآ آآآآ آآآآآ و و و آآآآ آآآ"

هل ملأ الفراغ بالصوت يدل على أننا نعاني من الفراغ الفكري؟

[disappointed]

أختلف معك في هذا المثال.. و كذلك لا يمكن أن نتهم بالغباء من يفعل ذلك.. فهو تعظيم لله تعالى، و لا خطأ في ذلك.

ومن منّا لايعظّم الله؟؟؟

من منّا لا يقدّم المشيئه؟؟؟؟؟

وجهة نظرى واضحه : يجب (تقديم المشيئه) أى ربط حدوث ماتبتغيه وتأمل بحدوثه مستقبلا بمشيئة الله ولهذا سمّيت "تقديم المشيئه" وليس "تأخير المشيئه" فماحدث بالماضى حدث بالفعل وصحيح أنّه حدث بمشيئة الله ولكنّك عندما تتحدث عنه فلتتفكّر وتنتقى اللفظ اللغوى المناسب للحوار وليس اللفظ اللغوى الذى تمت برمجتك عليه فاللغه عمليّه عقليّه وليست بغبغه وتقيّئ أكلاشيهات....فاذا سألك أحد عن اسمك فقل : متسائل "بمشيئة الله" ولا تقل " متسائل "ان شاء الله" لأن كلمة "ان" كلمه شرطيّه تربط مايحدث بالمستقبل بمشيئة الله ولا تستعمل فى اللغه  للتعبير عن فعل ماض أو حال قائم وكائن

 :dozingoff:

يحكى عن جحا أنّه أراد الذهاب للسوق لشراء حصان فقال لأحد أصدقائه : أنا ذاهب لشراء حصان.....فقال له صديقه : طيب مش تقول انشاء الله؟؟؟ فقال جحا : وأقول ان شاء الله ليه؟؟؟؟ الحصان فى السوق والفلوس فى جيبى

وأثناء ذهاب جحا للسوق هجم عليه لصّان فسرقا مامعه من نقود....فعاد محسورا مهموما لبيته وفى طريق عودته قابله صديقه فقال له : ايه ياعم جحا.....ما اشتريتش الحصان ليه؟؟؟؟؟ فقال له جحا : الفلوس اتسرقت ان شاء الله

:lookaround:

أنا رأيى ببساطه أن جحا كان ضعيف الايمان فى مقولته الأولى فاستحق الحسره والهم عندما سرق ليعرف أنّه لا شيئ سيحدث الاّ بمشيئة الله ....وكان أحمق وأخرق كما عهدناه فى مقولته الثانيه

   :)

لماذا لا نسمّى الأشياء بمسمّياتها ونضع اللغه فى قواعدها ونكوّن الجمل حسب أزمنتها؟؟؟؟؟

:dozingoff:

[disappointed]

وبالمناسبه

نسيت فى غمرة الحوار انّى أقول لك : صباح الفل

:inlove:

[متسائل]

صباح الفل يا باشا.. :)  :inlove:

وجهة نظر معتبرة و لا شك.

أنا مؤمن أننا مازال أمامنا الكثير.. حتى نتخلص من موروثاتنا المتأصلة حتى أصابتنا بأمراض نفسية تستعصي على الشفاء بلا علاج جماعي.

Edited By متسائل on July 01 2002 4:21pm

[disappointed]

أنا مؤمن أننا مازال أمامنا الكثير.. حتى نتخلص من موروثاتنا المتأصلة حتى أصابتنا بأمراض نفسية تستعصي على الشفاء بلا علاج جماعي.

باختصار.....كلمه ورد غطاها

ربّنا يسامح الخلافه الفاطميّه

:(