كان نفسك تطلع إيه؟

[Sherief AbdelWahab]

إلى الجميع ..

كل واحد فينا وهو صغير كان بيحلم يبقى دكتور أو مهندس أو سياسي أو ممثل أو كاتب أو رياضي أو... الخ..

كان نفسك تبقى إيه وانت صغير؟

خلص الكلام

[صفاء]

كان نفسى اطلع ممثلة :blink:

وبعد ما كبرت شوية بقيت نفسى ابقى عضو مجلس شعب عشان دايما كنت بشوفهم فى الأفلام عايشين الدور بقى وسيادة النائب وحصانة وكده:)

وبعد ما اتعينت فى الجامعة بقى نفسى اكون عميد الكلية وبعدين أول رئيس جامعة

من الجنس الطيب الغلبان اللى هو احنا

دلوقت بحلم اقعد فى البيت وابقى ست بيت متستتة كده هنومة وستوتة وملو هدومى :D

[bentmasria]

كنت اتمنى

اكون شىء مختلف موش محدد الهوية فى عمر 15 كنت عاوزة اكون مهندسة كمبيوتر كان حلم الاتصالات كبير وف اوله بالتحديد عام 1985 ولسبب خارج عن ارادتى لم التحق بها والتحقت بملامح حلمى الاخر الفن

بشكل ما كنت احس بالموهبة فى دمى وعشقت القلم وضربات الفرشاة وهى تلامس الاوراق بمختلف الوانها وملامسها وتعلمت كل ما يلزمها من تقنيات لاجيدها حتى الجرافكس

وتمنيت ان اتميز فى هذا المجال وحلمت اننى حين ابلغ الاربعين ساكون حفيدة بيكاسو :blink: وسأكون اقمت مئات المعارض واقمت مئات الامسيات ومزجت الحروف بالوجوه ............... ياااااااااااااااااه

المهم انا سعيدة بما انا فيه برغم انه تحول 360 درجة

اجمل معرض هو صور محمد

واجمل احساس لما يقوللى ماما بوسة

واسعد لحظة لما يطلب ان شاء الله حتى عنيا

وكده تبقى كل احلامى اصبحت حقيقة لحظة سعاده فى عنيه

موضوع تحفه يا استاذ شريف

ربنا يسعدك ويوفقك يارب

وانتظر بقية الاحلام

[Folana]

:السلام عليكم ورحمة الله ....

ياه ياجماعة الموضوع ده حيرجعنى لايام ثورة عرابى :rolleyes: :blush: ....بس علشان نكمل السؤال ..كان نفسك تطلع وياترى انت سعيد باللى حققته دلوقت ولو رجع بك الزمن حتمشى فى نفس الخط ولا حتحاول تحق امنيتك....

انا مش بأعدل فى سؤال الاخ شريف حاشا لله ..انا بس بسال وارد على نفسى ...زيى زى معظم الاطفال فى تلك الحقبة البعيددة من الزمن ...كان نفسى اطلع دكتورة طبعا ...لدرجة ان كان عندى عروسة كبيرة شويتين ...وطويلة كده ولها هيبة ...كنت بأشرحها ياعينى كل يوم ...وانا لابسة بالطو التدبير المنزلى ورابطة فوطة بيضا على راسى ...هرتها عمليات وحقن ...واخر مرة عمللتلها عمليتين فى نفس واحد ...تربنة فى المخ وخرم عين ...طبعا امى الله يرحمها زهقت منى ومن ريحة البنج :sad: :wub: وتخلصت من العروسة دى ...وقالت لى انها ماتت ....وشعرت بالذنب طبعا لانى حسيت ان العملية الاخيرة بتاعة التربنة فشلت مما ادى الى موتها ....ولما كبرت بقى غيرت رأئى فى موضوع طب ده ....ودخلت كلية تانية خالص ..واتخطبت وانا فيها واتجوزت اول مااتخرجت وزوجى رفض انى اشتغل وانا ماصدقت الحقيقة ...كل شلتى اتعينت فى الجامعة ..بافكر فيهم واضحك انا باقول انهم فلحوا وهم بيقولوا ان انا اللى فلحت ..لان لسه فيهم مااتجوزوش لحد النهاردة ...سبعين سنة اهو واكتر :wub: ورزقت والحمدلله بالذرية الصالحة ...وخلاص على كده ...تقولوا لى سعيدة ..اقول الحمد لله جدا ..ولو الزمن رجع بى حاتمنى نفس نمط الحياة ...وحالغى فكرة الدكترة دى من دماغى خالص ..خصوصا بعد اللى جرى للعروسة بقى نفتكر لها الرحمة .....

[مصرية الهوى]

كان نفسى اطلع ممثلة

ياسلاااااااام يا صفاء .. ياريتك بقيتي ممثلة ...

وتمثلي مع روبي في فيلم ..

ده شكلك هيبقى جميييييييل :P

بس حلم الممثلة كثيراً ما يراود المراهقات .. وأنا منهم :D

كنت عاوزة اكون مهندسة كمبيوتر

يابنت مصرية .. تقريبا الحلم ده بيراودني حالياً ..

ياه ياجماعة الموضوع ده حيرجعنى لايام ثورة عرابى

يا نينه فلانة .. عرابي ايه وبتاع ايه ..

ده عرابي - الله يرحمه ويبشبش الطوبة اللي تحت راسه - لسه دافنينه امبارح ..

قولي ايام رمسيس ايام اخناتون حاجه كده قريبة للواقع :P

لا بجد ...

أنا حلمت كتير كتير جداً ...

وانا صغيرة في ابتدائي يعني مكانش ليا احلام طموحة يعني ..

في اعدادي وثانوي حلمت اننا ابقى في يوم من الايام دكتورة في علم الحيوان .. الله ولو علم الحشرات ده يبقى حاجه mfb:

حاولت احقق حلمي لكنه تحطم على صخرة قاسية جدا :D فتحاولت مش احلامي وبس لا حياتي كلها 180 درجة بعد فشل الحلم ..

دلوقتي بأحلم اننا ابقى دكتورة في التربية في المناهج وطرق التدريس والا في علم النفس التربوي المهم ابقى تربوية .. واحيانا احلم اني اكون مهندسة شبكات وصيانة :blink:

فمش عارفه اي الحلمين سيتحقق !!!

بس بيتهيألي أنه هيجي يوم من الأيام وابقى زيك يا مدام فلانة .. ويبقى حلمي ست بيت وام عيال وبس :)

من يدري ماذا يخبئ لنا القدر !!!!

القدر اللي من كم يوم خطف بنتين أعرفهم في نفس سني .. كانوا مثلي .. بيحلموا .. ويتخيلوا ..ويلونوا المستقبل بلون بمبي .. وفي لحظات فقدوا حياتهم ..

الموضوع ده خلاني انهار بصراحة :D ..

ربنا يرحمهم يارب ..

[Scorpion]

كان نفسي اطلع عالمعاش ... :blink:

[بنت شعنونة]

اهو انا الوحيدة اللي في الدنيا اللي عمرررررررررررررري ما اتمنيت اطلع اييييييييي حاجا !!!!!!!!! :)

مش عارفا ليه صحيح mfb:

يمكن دا سبب التوهان اللي انا فيه!!

انما انا كان نفسي ادخل هندسة عشان بحب الرياضيات.....؟؟ " الرياضيات المعادلات مش الهندسة كمان!!!" :blink:

وكان نفسي ادخل اعلام

وبس!

[kokowawa1979]

بصراحة أنا اكتفيت بالإعداية علشان ماتسألش السؤال ده :)

[الرافعي]

إيه يا جماعة بقى ، كل واحد هايقول لي كان نفسي أطلع ظابط ، والبنات كان نفسي أطلع دكتورة عشان أشفي العيانين ؟؟

خلينا واقعيين .. أنا كان نفسي أطلع سواق حنطور ... اتفسح طول اليوم مع الجوز الخيل .. والعربية

بلا دوا بلا عيا بلا غم

[صفاء]

إيه يا جماعة بقى ، كل واحد هايقول لي كان نفسي أطلع ظابط ، والبنات كان نفسي أطلع دكتورة عشان أشفي العيانين ؟؟

خلينا واقعيين .. أنا كان نفسي أطلع سواق حنطور ... اتفسح طول اليوم مع الجوز الخيل .. والعربية

بلا دوا بلا عيا بلا غم

<{POST_SNAPBACK}>

امال ايه اللى حصل يا حلاوة بيك ؟

التنسيق بهدلك ورماك فى الكلية السلخانة قسم ذبح وسلخ وتشفية؟

[shahd]

كان نفسي ابقى عازفةبيانو وابتديت فعلا بس سبت لقناعه شخصيه

كان نفسي ابقى دكتورة جراحة قلب بس بصراحة كان لعب عيال

كان نفسي ابقى مترجمة زي بابا وفعلا درست ترجمةوحبيتها جداااااا بس هيا الي سابتني مافيش شغل وااااااحسرتاه :D

المهم في الأخر مابقيتش لا الي انا عايزاه ولاالي مش عايزاه :)

تم تعديل 19 ديسمبر 2005 بواسطة شهد