أرغب فى العمل فى الغرب هل من مشورة

[wael_hashish]

بسم الله الرحمن الرحيم

الاسم /وائل , السن /19 سنه , المهنه / طالب فى اكادميه الدلتا لعلوم الحاسب فى المنصوره

طبعا كله مستغرب من عنوان الموضوع متستغربوش هى دى الحقيقه انا شاب مصرىمن ملايين الشباب اللى عاوز يسافر بصراحه يا جماعه البلد انا مش هتكلم عليها لان الكل عارف وضعها طبعا الكل هيقولى متستعجلش وكمل درستك والرد علشان محدش يسائل السؤال ده هل كل واحد معاه شهاده ايا كانت شغال فى الوقت الحالى انا مش هندم على دراسه او اى حاجه بس حد يساعدنى اسافر امريكا واى دوله غربيه كويسه ويبقاله الاجر والصواب وعلى العموم ده الايميل بتاعى انا عارف ان مفيش حد هيعبر بس اهو يمكن حد يصعب عليه حالى :blink: :) :D

alone_fe_elb3ntlon@yahoo.com

تم تغيير العنوان ليعبر عن محتوى الموضوع

تم تعديل 14 ديسمبر 2005 بواسطة عادل أبوزيد

[khedr]

يارب

يارب

اين نحن... ...

اين القائمين علي ذلك الوطن... ...

اين الحكومه.... ...

اين المعارضه... ...

اين الاخوان... ...

اين الاقباط... ....

اين رجال الاعمال.... ...

اين المثقفين... ...

اين السياسيين... ...

اين الكتاب... ...

اين الصحفيين... ...

اين القضاه... ...

اين المفكرين... ...

اين اصحاب الرأي... ...

ماذا تنتظروووووووووووووووووووووووووووووووووووووووووووون...!!!!

يارب

يارب

[الرافعي]

بسم الله الرحمن الرحيم

الاسم /وائل , السن /19 سنه , المهنه / طالب فى اكادميه الدلتا لعلوم الحاسب فى المنصوره   

طبعا كله مستغرب من عنوان الموضوع متستغربوش هى دى الحقيقه انا شاب مصرىمن ملايين الشباب اللى عاوز يسافر بصراحه يا جماعه البلد انا مش هتكلم عليها لان الكل عارف وضعها طبعا الكل هيقولى متستعجلش وكمل درستك والرد علشان محدش يسائل السؤال ده هل كل واحد معاه شهاده ايا كانت شغال فى الوقت الحالى انا مش هندم على دراسه او اى حاجه بس حد يساعدنى  اسافر امريكا واى دوله غربيه كويسه ويبقاله الاجر والصواب  وعلى العموم ده الايميل بتاعى انا عارف ان مفيش حد هيعبر بس اهو يمكن حد يصعب عليه حالى  :blink:  :)  :D

                                                                                          alone_fe_elb3ntlon@yahoo.com

<{POST_SNAPBACK}>

ليه بس مفيش حد هايعبر .. بالراحة علينا يا عم وائل

هانتناقش في الموضوع بالراحة ونشوف حل ، بس بجد الايميل بتاعك خلاني أضحك بصوت عالي جداً في الشغل ،

يعني انت يا ابني لوحدك في البنطلون ، هو في حد ممكن يسكن معاك فيه ؟؟؟ رهيب

[هادي]

صحيح يا وائل

انت باين عليك غلباوي ومشكلة

الون ف البنطلون !!!

ده اسمه كلام يا راجل :blink:

هو انت كنت عاوز تقلبه تاكس ولا شقة مفروشه

مش تهدى كده يا وائل

وتحكي لنا من الاول

الاستاذ حلاوة بيسمعك وأنا معاه برضه هاسمعك وصوتك هيوصل للكل

بس انت صلي ع النبي .. و فضفض .. احنا اخواتك .. متخبيش حاجه ..

وكل اللي نقدر عليه . باذن الله راح نعمله

[se_ Elsyed]

الأخ وائل ربنا يوفقك يارب في إيجاد فرصة عمل جيده .. وثق تماماً إن جميع الزملاء هنا كلهم مصريين جدعان ولو لدى أحد إمكانية للمساعدة فلن يبخل بها وشوف كده في باب الخدمات العامة هاتلاقي إعلانات كثيرة يضعها البعض لطلب موظفين ..

ولكن لي رجاء بسيط ...

أرجو عدم النظر إلى منتدى محاورات المصريين إنه بالبلدي كده ( مغسل وضامن جنة )

يعني اللي جاي يدور على وظيفة .. يا مرحبتين به .. لكن ما يضعش أمل مليون المية إن كلنا محوشين الوظايف في الدرج وبنطلعها وقت ما نحب ..

أنا بأقول الكلام ده ليه ؟

لإن في أخ من الزملاء سجل في المحاورات من حوالي شهر كده ..

وكل مواضيعه البالغة حوالي 4أو 5 كانت بنفس العنوان أو المضمون وهو إنه موجود في الإمارات وعايز شغل وياريت نساعده ..

وبالرغم من إن لنا أخوة زملاء أعزاء في الإمارات لكن ده مش معناه إنهم وزراء عملأو أصحاب مكاتب توظيف وبالتالي لدينا الوظائف بالزوفه .. وحدث إن ماحدش رد عليه لإن ماحدش أمامه فرصة عمل تناسبة حالياً ..

وما كان منه إلا إنه فتح موضوع ليخبرنا فيه بإن وجد فرصة عمل بالفعل وإنه مش محتاج لنا .. وإننا جميعاً مصريين ....... ونعتنا للأسف بأقذر الألفاظ التي لا تصدر من يهودي حتى مش من مصري ...

ليه ؟

لإنه نظرنا لنا بإننا مغسلين وضامنين جنه .. وبلإنه مجرد ما ينضم لمجتمع زينا فهايلاقي على طول شغل بالهبل .. ومش مهم بقى يعرفنا بنفسه أو هو مين أو تكون له مشاركات قيمة أو يتذكره الزملاء .. إلخ

على فكرة دي كانت من أكثر المواضيع التي أثرت في في الفترة الأخيرة وفعلاً حزنت جداً إن في ناس بالعقلية دي وبالسوقية دي ...

[shawshank]

حتة على جنب كده

بغض النظر عن الواقع ، فمن العجيب فعلا - في رأيي الشخصي - أن ترى إنسانا يعرض خدماته باحثا عن عمل و لا يجد ، فهو لا يطلب إحسانا مثلا ... لكنه يطلب أن يقوم بعمل و يأخذ عليه أجرا ... هذا على مستوى العالم كله ...

معنى هذا إن فيه حاجة غلط ...

و هي نظرية الـ 20% و الـ 80%

20% من العالم يستحوذون على 80% من الموارد. و في الغالب هذه النسبة صحيحة على مستوى المجتمعات كذلك.

و لو كانت النسبة عادلة ، لما وجدنا من "يتسول" العمل.

أنا لا أقصد أي أحد ، لكنها مشكلة عامة و سببها عدم عدالة التوزيع البشري.

[wael_hashish]

بسم الله الرحمين الرحيم

انا بصراحه يا جماعه مش عارف ابتدى منين , انا بصراحه مكنتش انتظر ان حد يرد عليه ولا يعبرنى زى ما قولت انا مش عارف اقول ايه

وبشكر طبعا الاخوه اللى عبرونى ولو حتى كانوا بيهونوا عليه الاخ هادى انت اللى زى العسل والله صحيح المصريين دمهم زى السعل والله امال الحريم عماله تترمه علينا ليه المهم يا جماعه انا والله بموت ودماغى عماله تجيب وتودى فى مواضيع فاشله وعاوز واحد جادع يساعدنى على قد ما يقدر اى مكان بعيد عن دول الخليج والعرب اللى مبيطقوش بعض بس انتوا عرفين ان دول الخليج مبيحبوش المصريين ليه :blink: المهم لو حد فعلا عاوز يساعدنى الايميل عندكم امريكا ,كندا , استراليا , تحت الارض حتى اى حاجه فى رغيف تبقى سندوتش وكفايه كده علشان انت لسه هتصدعوا منى كتير الايميل اهو علشان انا عارف انه شاذ

alone_fe_elb3ntlon@yahoo.com

no_why_not_17@hotmail.com

[الأفوكاتو]

الأخ وائل حشيش,

أرحب بك أولا,

ثانيا, لقد قمت بالرد على الأخ أشرف بخصوص الهجرة إلى أستراليا, و تجد الموضوع فى هذه الوصلة:

الهجرة إلى أستراليا

تقبل تحياتى.

تم تعديل 12 ديسمبر 2005 بواسطة الأفوكاتو

[wael_hashish]

بسم الله الرحمن الرحيم

الاخ الافوكاتو الف شكر على المعلومات بس انا مفيش حاجه بصراحه منسبانى من المعلومات دى يعنى انا لا معايا شهاده يعنى لسه فى التعليم ولا ينفع انى ابقى لاجىء سياسى علشان مفيش زلازل ولا بركاين ولا اى بتنجان والله يا جماعه اللى عاوز يساعدنى يحاول يفهم موقفى كويس انا عاوزاسافر زياره واقعد هناك او منحه دراسيه او اى حاجه بس مساعده بس منكم وكل حاجه هتباه تمام باذن الله

[سقراط المصري]

الاخ الجديد وائل

سيقوم الزملاء بإرشادك بالخطوات اللازمه للخروج من مصر ، ولأي دوله ترغبها.

اما انا فسأوضح لك ما يجب ان تفعله في مصر قبل السفر.

1- حاول تنام وتستمتع بالإستغراق في النوم بدون توتر في مصر...... لانك هتفتقد النوم بدون توتر في الغربه.

2-ابتعد عن حمل الساعه في يدك في مصر........ لانك ستتنقل بعد ذلك حاملاً منبه يخبرك بتتالي المواعيد التي وراءك.

3- امتنع عن شرب القهوه والشاي في مصر......... لانك هتتعلم شربهم بكثره في الخارج.

4-اجلس مع والديك اكبر قدر ممكن.

5- تذكر وجوه الصبيه الصغار في اسرتك....... لان الصغير سيبقي قريباً كبير.

6- متفكرش كتير في المشكلات الصغيره في مصر........ مخك هيهنج في الغربه من الضغط ، فوفر طاقتك العقليه.

7- اسهر على قد ماتقدر .......... لانك قد تضطر لبدء يوم عملك بعد ذلك في الثالثه فجراً.

8- حافظ على صحتك في مصر.......... لانك بعد كده هتنام مدغدغ.

9- مارس هوياتك المفضله............ لانك في السنوات الاولى من الغربه هتكون مشغول ببناء اساس المستقبل.

10- لاتتعصب................. لازم تكون هادي في الغربه لان السلوك البسيط لنا كمصريين قد يفسر بأنه نوع من العدوانيه.

11- عود نفسك تتكلم بصوت واطي، وهادىء النبره ..... وعلى فكره دي قد تكون صعبه شويه.

12- عود نفسك على تلقي الصدمات بهدوء................... لان الاحباط قد يكون صديقك الوفي في البدايات.

13- ماتجنيه عينك ويدك وحسن تفكيرك في مصر........... هيساعدك في الغربه

ارجوا ان تتفهم كلامي على انه مساعده وليس لإحباطك ............ بس حدد الهدف بدقه ، مافيش حاجه اسمها:

انا عاوزاسافر زياره واقعد هناك او منحه دراسيه او اى حاجه

تحياتي

سقراط

[wael_hashish]

الاخ سقراط ,

الف شكر على نصيحك الجميله , انا عارف ان الغربه تمنها صعب بس بالنسبه ليه والله حاجه سهله هتقولى ازاى هو اه انا عمرى ما طلعت من مصر بس الحمد الله انا عندى طوله بال وصبر مهول بس انا بقالى بالظبط سنه و 9 شهور متعكنن ديما وكل شويه صدمه شكل ولا بياثر فيا خلاص زى ما يكون الواحد اتعود علشان كده انا قررت السفر من سنه تفريبا بس اللى شيفه كل حاجه بالنسبه لينا كمصريين مش سهله خالص وياريت كلامك يطلع صح والاخوه الاعضاء يقولولى ايه الخطوات اللى انا ممكن اعملها او اى حد ابن حلال فاتح شركه ولا كفاتيريه يقولى هبعتلك يوفر عليه العناء ويسبلى العناء اللى هشوفه فى الغربه والف شكر لجميع الاعضاء اللى ردوا عليه فى موضوعى

alone_fe_elb3ntlon@yahoo.com

[mb14]

الاخ الجديد وائل

سيقوم الزملاء بإرشادك بالخطوات اللازمه للخروج من مصر ، ولأي دوله ترغبها.

اما انا فسأوضح لك ما يجب ان تفعله في مصر قبل السفر.

1- حاول تنام وتستمتع بالإستغراق في النوم بدون توتر في مصر...... لانك هتفتقد النوم بدون توتر في الغربه.

2-ابتعد عن حمل الساعه في يدك في مصر........ لانك ستتنقل بعد ذلك حاملاً منبه يخبرك بتتالي المواعيد التي وراءك.

3- امتنع عن شرب القهوه والشاي في مصر......... لانك هتتعلم شربهم بكثره في الخارج.

4-اجلس مع والديك اكبر قدر ممكن.

5- تذكر وجوه الصبيه الصغار في اسرتك....... لان الصغير سيبقي قريباً كبير.

6- متفكرش كتير في المشكلات الصغيره في مصر........ مخك هيهنج في الغربه من الضغط ، فوفر طاقتك العقليه.

7- اسهر على قد ماتقدر .......... لانك قد تضطر لبدء يوم عملك بعد ذلك في الثالثه فجراً.

8- حافظ على صحتك في مصر.......... لانك بعد كده هتنام مدغدغ.

9- مارس هوياتك المفضله............ لانك في السنوات الاولى من الغربه هتكون مشغول ببناء اساس المستقبل.

10- لاتتعصب................. لازم تكون هادي في الغربه لان السلوك البسيط لنا كمصريين قد يفسر بأنه نوع من العدوانيه.

11- عود نفسك تتكلم بصوت واطي، وهادىء النبره ..... وعلى فكره دي قد تكون صعبه شويه.

12- عود نفسك على تلقي الصدمات بهدوء................... لان الاحباط قد يكون صديقك الوفي في البدايات.

13- ماتجنيه عينك ويدك وحسن تفكيرك في مصر........... هيساعدك في الغربه

ارجوا ان تتفهم كلامي على انه مساعده وليس لإحباطك ............ بس حدد الهدف بدقه ، مافيش حاجه اسمها:

انا عاوزاسافر زياره واقعد هناك او منحه دراسيه او اى حاجه

تحياتي

سقراط

<{POST_SNAPBACK}>

د.سقراط احييك على نصائحك الغاليه وهى لن تفيد وائل فقط بل افادتنى انا ايضا مع انى مقيم فى مصر واحتاجها جميعا .

شكرا مره اخرى .

وبالنسبه للأخ وائل مصر لسه بخير

نصيحتى ليك أكمل دراستك فى مصر اولا وبعد ذلك فكر فى السفر والامور سوف تسيير افضل مما تتوقع انا كنت افكر مثلك بالضبط وانا فى آخر سنه دراسيه لى ولكن بعد ذلك الامور سارت افضل مما كنت اتوقع .

اصبر شويه .

[الرافعي]

يا وائل باشا ، بعد كلام أخي الحبيب جداً هادي ، وعم سقراط المفتكس، لا سلام ولا كلام بصراحة ... بس أحب أزيدك نصيحة صغيرة من أخ أكبر - لو سمحت - وسمح بقية الأخوة الأفاضل

أن فقط أرجو ألا تتخيل أن السفر هو الحل السحري لمشاكلنا، لأنه كما قال سقراط مثلاً فيه كثير من المشاكل والصعاب والبهدلة التي لم ترد على بالك، أنت فقط قاعد في بلدي المنصورة التي تعتبر من أكثر بلاد مصر تصديراً للقوى البشرية (بالذات لمنطقة الخليج) وبتتفرج على الناس اللي نازلين إجازاتهم ملمعين ومبسوطين وحياتهم وردي وراكبين عربيات جمرك ، ولا إيجار، وبتظن إنهم عايشين في الجنة بس نازلين إجازة يومين عشان نفسهم هفتهم على الطعمية (الكلام ده غلط) وفي في الغربة صور كتيرة لا تتخيلها لحياة كثير ممن تراهم وتذهل بحالهم في أيام قليلة، فلا تنخدع بالمظاهر.

كما أكرر، ليس السفر هو الحل السحري، ولا تنس أن أغلب من يكتب لك وهو خارج مصر، شاف مرمطة في مصر وبهدلة أكثر مما تتخيل وضيف عليها مرمطة تانية بره ، وبعدين ؟؟؟؟؟ الموضوع مش بسيط كده (OK يا ولاد مخزن ستة بونبون سيما) مين فاكر الإعلان ده ؟؟

وزي ما قال لك الأخ MB14 انه دراستك أولاً وبعدين ييسرها الله، مفيش واحد فاتح كافيتيريا فجأة في المحاورات جاهز بالفيزا وهايبعتها لك بعد ساعتين وربع ...

اتعب واتحمل شوية يا جدع .. وانت أكيد عم الجدعان كمان

مش كده ولا إيــــه

[wael_hashish]

الف شكر يا جماعه على نصايحكم الغاليه , انا معاكم فى الكلام ده على فكره انا سمعتوا من ناس كتير انا مش رافض النصيحه ومش كبير لسه على النصايح بس كل واحد فى الزمان ده عارف هو عاوز ايه وانا لما عرضت الموضوع بتاعى على الموقع كنت واخد قرار السفر من زمان بس مش عارف اعمل ايه او اتصرف ازاى وكنت عاوز مساعدتكم وبكرر يا جماعه اللى عنده ليه اى وسيله للسفر ياريت ميبخلش عليا بيها وانا طبعا هقدر اللى عملهولى يعنى تعبه محفوظ واتمنى انكم تفدونى اكتر :blush: :excl:

مع الشكر لجميع الاعضاء

[New]

الاخ وائل

فى نظرى افضل شئ ممكن تعمله فى الوقت الحالى هو الاطلاع على امتحانات اللغة الانجليزية ال TOEFL و امتحانات القبول (واعتقد بالنسبة لك حتكون ال GRE) والتمرن عليها... برضة ما تنساش تعمل اللى عليك وزيادة فى دراستك دلوقتى...

الامتحانات اللى قلت لك عليها ان شاء الله مع التمرين عليها حتجيب درجات كويسة وتساعدك باذن الله فى الحصول على منحة دراسية لتبدأ دراساتك العليا فى امريكا...

وبكده تكون دخلت البلد بشكل قانونى وما تعيش حياة المهدد بالترحيل فى اى لحظة..

الحصول على شهادة عليا من جامعة امريكية ان لم تساعدك فى الحصول على عمل فى امريكا فاعتقد انها حتساعدك فى الحصول على عمل كويس سواء فى الدول العربية او حتى فى مصر..

وبالتوفيق.

[wael_hashish]

يا جماعه مفيش اى وسيله اسرع من انى اخد التوفل يا اخونا هو ده اللى قدركم عليه ربنا وبعدين المشرف عام ليه غير اسم الموضوع(الى اصحاب القلوب الرحيمه) انا قصدى ان اسم الموضوع يلفت نظركم هو انا هشحت يعنى

[سقراط المصري]

يا جماعه مفيش اى وسيله اسرع من انى اخد التوفل يا اخونا هو ده اللى قدركم عليه ربنا

العزيز وائل

الاخ new اشار الي نقطه مهمه ، وهي امتحان التوفل. وهو يقصد ان يضعك على اول السلم الصحيح.

طبعاً عشان تاخد منحه لامريكا او لغيرها ، فأكيد كل منحه لها شروط.

ادني درجات هذه الشروط ان تكون متمكن من اللغه.

امريكا تحتاج التوفل ، بريطانيا تحتاج امتحان ... (حد يفكرني يا جماعه)، المانيا تحتاج عشان تقول ياهادي يارب المستوى السادس .... وهكذا.

فلازم لأي منحه تكون على الاقل مستوفي شرط اللغه.

اللغه ، لو اجتهد جداً ، هتاخد حد ادنى سنه (دراسه في مصر)، واحتمال تحتاج كورسات تقويه اضافيه بعد المنحه.

وكمان التوفل مثلاً ، كحد ادني له درجه 550 لازم تحصل عليها.

(برضه حد من الزملاءيأكد او يصحح المعلومه القادمه دي ...عشان الذاكره مش مساعداني)....... التوفل ممكن تسأل عليه في هيئة اميدست .... بالدقي.

بعد كده هيجي امتحان GRE ,وده امتحان استدلال ومنطق............ على حد تذكري.......... ويفيدك عنه الزملاء بأمريكا.

الحصول على منحه دراسيه ، بتعطيك تأشيره مضمونه ، واقصد بمضمونه انها بتعطيك تأشيره بتكون بيها طالب ، والطالب له مميزات كتيره في الغربه ، مثلاً في المانيا من حقك العمل 3 شهور فقط في السنه سواء متصلين او متقطعين ، وال 3 شهور دول كافيين للمعيشه قول مثلاً 6 شهور.

............

المهم زي ماقلت لك ان فيه شروط للمنحه كحد ادنى لازم تستوفيها.

بعد ذلك نشوف المنحه هتيجي منين وعلى حسب البلد اللي عاوز تروحها.

عامةً، فيه منح بتقدم عن طريق الاتي:

1- سفارة البلد في مصر.............. ممكن تكون منحه او اثنين في السنه.

2- الجامعه المستضيفه........... ودي بتكون محدوده ، وبتزداد مع زياده ميزانيه الجامعه.

3- الشركات والمصانع والمؤسسات و (الهيئات المسيحيه والكنائس........... وهذه غالباً لاتفرق بين مسلم او مسيحي).............. ودي هتلاقيها كتير ، بس عيبها انها بتشترط تخصصات، يعني مثلاً شركه زي سيمنز تقول ان هدي منحه لخمس طلاب بشرط دراسه الهندسه او تخصص كيت وكيت.

4- الهبات من الافراد........ زي مثلاً....زمان كان فيه دليل معي ، وكان فيه واحد سعودي حاطط وديعه في البنك ومن فوائدها بيعمل هبه لتعليم 3 طلاب عرب في معهد MIT المشهور في امريكا.

5- مؤسسات دوليه ....... بس خليك مع المؤسسات المضمونه احساً. فمثلاً هيئة اومنظمه الامم الافريقيه (كمثال لاسم فقط) بتعطي منح لطلاب افرقياً..... والله انا فاكر ان المنظمه دي كان مكانها "غانا". اما المؤسسات اللي بقولك ابعد عنها مثل "حلف الناتو".. فمثلاً كان على النت اعلان تبع "حلف الناتو" لمنح دراسيه في تخصصات ظاهرها طيب ومضمونها خبيث ، فابعد عن الكلام ده.

وعليه ان حاولت اوضح لك الامور بتمشي ازاي.

والقرار طبعاً قرارك.

تحياتي

سقراط

[New]

الاخ وائل..

انا عاوزاسافر زياره واقعد هناك او منحه دراسيه او اى حاجه بس مساعده بس منكم وكل حاجه هتباه تمام باذن الله

طلبت فى مشاركتك معرفة كيفية الحصول على منحة دراسية واحببت ان اوضح لك الشروط الاساسية للمنح الدراسية.. و اظن ان الاخ العزيز سقراط قام بشرح العديد من انواع هذة المنح..

يا جماعه مفيش اى وسيله اسرع من انى اخد التوفل يا اخونا هو ده اللى قدركم عليه ربنا

هذة النصيحة توجهت بها لواحد من احب الناس لى وعمل بها وربنا كرمه بعدة منح دراسية واختار الافضل منها وسافر... وهى نفس النصيحة اللى باقولها لك واقولها لأى واحد بيفكر فى السفر.

احب ان اوضح بعض النقاط

1- ليس هناك شئ بالمجان فى هذة الدنيا ولو مش حتتعب مش حتلاقى نتيجة..

2- مش دايمآ اسهل الطرق او اسرعها هو الافضل... فقد يكون اسهل الطرق بالنسبة لك هو دفع مبلغ مالى و خلاص واظن اننا دايما بنسمع عن ناس بيتنصب عليهم.

3- بعد اللى حصل فى 11 سبتمبر الاجراءات الامنية بقت صارمة واللى بيجى زيارة ويقعد بيبقي مهدد وبصراحة لا احب ان تكون انت و لاغيرك فى هذا الموقف.

4- من الصعب ان حد فاتح شركة والا كافيتريا يبعتلك عقد عمل لاسباب كتيرة ومعقدة.

5- جرب الهجرة العشوائية فقد تكون اسرع بس احتمال الفوز فيها ضعيف نظرآ للاعداد الضخمة المتقدمة بالطلبات..

6- اهم شئ ممكن يساعدك على تحديد الاتجاه الصحيح هى صلاة الاستخارة... اعملها قبل اى قرار وربنا حيرشدك للاختيار الافضل.

تحياتى

[egyption]

فى نظرى افضل شئ ممكن تعمله فى الوقت الحالى هو الاطلاع على امتحانات اللغة الانجليزية ال TOEFL و امتحانات القبول (واعتقد بالنسبة لك حتكون ال GRE) والتمرن عليها... برضة ما تنساش تعمل اللى عليك وزيادة فى دراستك دلوقتى...

الامتحانات اللى قلت لك عليها ان شاء الله مع التمرين عليها حتجيب درجات كويسة وتساعدك باذن الله فى الحصول على منحة دراسية لتبدأ دراساتك العليا فى امريكا

استاذ نيو ممكن استفسر منك علي امتحانات الTOEFLو GRE واقدم فيها ازاي واقدم قيها فين بالظبط ومصاريفها ايه وكل حاجة عنها

في حفظ الله

[New]

الاخ الفاضل Egyptian

الامتحانات دى بتتعمل من هيئة اسمها ETS اختصار Educational Testing Service ولهم موقع فيه معلومات كتيرة

www.ets.org

امتحان ال TOEFL اختصار ل Test Of English as a Foreign Language وزى ما قال الاخ سقراط فالامتحان بيختبر المامك باللغة الانجليزية..

الامتحان كان بيتعمل فى اماكن مخصصة (فى مصر AMIDEAST) بالورقة والقلم وبعدين بقي على الكمبيوتر وحاليا متاح على الانترنت ويمكن الاتصال بالAMIDEAST ومعرفة اى نوع من انواع امتحان بتتعمل فى مصر ومصاريفه.

عنوان الAMIDEAST كما هو مكتوب على الانترنت هو:

AMIDEAST

23

MOSADDAK STREET, DOKKI

Phone: 02 337 8973

ال GRE اختصار لGraduate Record Exam وده بيكون له عامل كبير فى تقييمك كطالب ..وده اصعب شوية من ال TOEFL وعادة بيكون 3 اجزاء Verbal و Analytical و Quantative. خلى بالك ان الامتحان ده للناس بتوع العلوم والهندسة الناس اللى هم متخصصين فى التجارة امتحانهم اسمه GMAT. المهم قبل ما انسى بعض اسماء دور النشر اللى بيعملوا الكتب المفيدة فى المجال ده:

ETS (المركز بتاع الETS بيطلع دايما كتب للTOEFL وللGRE برضه..)

Barron

Peterson

KAPLAN

اخيرا الامتحانات دى عايزة مذاكرة كويسة ومجهود وباذن الله تعرف تجيب درجات كويسة فيهم.

وتحت امرك فى اى استفسار

تم تعديل 15 ديسمبر 2005 بواسطة New