يوم من حياة عبد الفتاح وعنايات

[ام البنات]

السلام عليكم ورحمة الله وبركاته

دى من أول مشاركاتى واتمنى ان تعجبكم :blush: :D

شويه خربشه بسيط يارب تعجبكم واتمنى ان تدخل السرور على قلوبكم

اختكم ام البنات وعندى منهم اتنين :wub:

بسم الله الرحمن الرحيم

يوم من أيام عبد الفتاح وعنايات

ندخل نشوف

من أول ما نفتح الباب

نسمع صوت

الراديو مفتوح على اعلى درجه

والحنفيه فى المطبخ مفتوحه على الآخر

البراد عمال يصفر والماء غلى وفار

والبنت الصغيره عماله تصرخ وتعيط :

والولد الوسطنى بيشد فى الشراب من اخوه الكبيير

والأب واقف يحلق دقنه

عمال يفكر فى اليوم الجديد والقرف الى منتظره

معندهوش اى لمحة تفاؤل :D

كتلة تشاؤم وعكننه :

والأم واقفه فى بلكونة المطبخ تنده على بتاع الفول

الأب موظف

والأم مدرسه

والعيال

ولدين وبنت

الأب انت يا ست هانم فين الشبشب والفوطه

الولد الصغير

ياباب ااقولك هما فين

الاب فين يا أخى

الولد طيب يا بابا فكر شويه ثغيرين

الاب امشى يا واد انت انجر من هنا

يا عنايات ياعنايات

فى ايه ياراجل على الصبح

الاب صبح انتم خليتوه ليل

عاوز الشبشب والفوطه

هو انت دخلت الحمام حافى

عبد الفتاح هو انا لقيت الشبشب وقلت لاء عاوز اتوضى

عنايات مش سامعنى وانا عماله انده على المخفى بتاع الفول

الاب فول ايه هو انت كل يوم تطفحينا فول

عنايات يا فتاح يا عليم

هو انت عاوز تاكل بسطرمه وبيض ولانشون

وجبنه رومى بالمصروف المقشف

الى انت بتديه لى أول كل شهر

عبد الفتاح

مصروف مقشف انت الى ست ايديك سايبه

عنايات ايدى سايبه ياراجل اتقى الله دا لولا ماما

عبد الفتاح يا دى الصباح الى بدأ بماما

مش عاوزه اطفح وبلاش سيرة امك على الصبح

عنايات اسمها امك برضه ياراجل يا متعلم

عبد الفتاح هو انا شتمتك دانا بقول امك باللغه العربيه

والله حاجه غريبه طيب عاوز الشبشب والفوطه

عنايات والله أمال ايه الى فى رجلك وعلى إيدك

عبد الفتاح يفتح عينيه على الآخر هم جم أمتى

الواد الصغير

انا ياأبتى

أبتى فى ايه يا واد

الواد الصغير مش انت بتتكلم باللغه العربيه وقولت على ستو امك

نهارك إسود يا وله

هو انت بتتصنت على كلامنا

يادى نهارك يا عبد الفتاح

خلاص ضعت يا تيحه الواد الفتان ده هيقول لامها

عنايات بتقول ايه ياعبد الفتاح

عبد الفتاح مش بقول

خلى نهاركم يعدى على خير

امشى يا واد انت انجر من هنا

سمعا" وطاعه يا والدى :D

عنايات تضحك وتمشى تجر فى رجلها اصلها من المقاس الإكس لارج :o

عبد الفتاح يلبس هدومه ويبدأ تانى فى الصراخ

يا عنايات انت يا هانم يا دى الصبح الى مش هيعدى

عنايات

انت يارجل خلينى اروح احضر الفطار

انا قلت مش هاطفح :o

عنايات مش ليك الطفح ده للعيال

عبد الفتاح طيب الله يكرمك :wub: عاوز شراب مفيهوش قطع :huh:

عنايات وانا أجيب منين مانت مش بتشترى وآخر الشربات كان جايبه

لك بابا من العمرة السنه الى فاتت

قطيعه تقطع الشربات على الفانلات

هو انا إيه عايش عواله على أهلك

الواد زيزو يجى جرى

وبكره ان شاء الله نشوف زيزو عاوز إيه تحياتى

تم تعديل 16 ديسمبر 2005 بواسطة ام البنات

[بقايا أمل]

أختي الحبيبة أم البنات

بارك الله فيكي وأضحك سنك

قصة لطيفة وأسلوبك رااااااااااائع بالكتابة

في انتظار الجزئين الباقيين

لا تتأخري علينا

ولا تحرمينا من كتاباتك الجميله

[ام البنات]

أختي الحبيبة أم البنات

بارك الله فيكي وأضحك سنك

قصة لطيفة وأسلوبك رااااااااااائع بالكتابة

في انتظار الجزئين الباقيين

لا تتأخري علينا

ولا تحرمينا من كتاباتك الجميله

<{POST_SNAPBACK}>

السلام عليكم ورحمة الله وبركاته

اختى بقايا أمل

انا عندى من البنات اتنين

ولم أقصد ان لليوم جزئين

اعتذر لعدم وضوح كلماتى

واشكرك على الإطراء الذى لا استحقه

ونورتينى

اختك أم البنات

[bentmasria]

مرحبا بك ام البنات قلما ظريفا واعدا بيننا

ربنا يخلى لك البنات ووالدهم وننتظر حلقات جديدة من حكايات عنايات

نورتينا يام البنات :rolleyes: :blush:

[ام البنات]

السلام عليكم يا اختى بنت مصريه

اشكرك على كلامك الرقيق واتمنى ان يعجبم اليوم مازال فيه الكثير بإذن الله

بابا عاوز شراب سليم

الاب وله هو انت كل شويه تطلع امشى انجر ياود من هنا

زيزو ايوه هاجيبلك شراب ماما مخبياه فى درج المطبخ

عنايات الله يخرب بيتك وانت نكشت فى المطبخ ليه يازفت

زيزو أبدا" كنت بدور على مفك اصلح كرسى العجله بتاعى

الاب امشى هات الشراب وانت يا اختى ايه الشراب ده

أبدا"

دا شراب اخويا مصطفى جابه ومش قده قلت أخده لك

نهارك إسود انا آخد بواقى أخوك

انا قلت اليوم ده بدأ بأم عنايات هينتهى ازاى

عنايات تقصد إيه

عبد الفتاح هو انت هتقلبى الموضوع الى أمك

انت يا اختى حد قالك ان جوزك شحات

بابا بابا

فى إيه يا زفت

دا مش شراب خالو مصطفى

امال ايه يا واد

زيزو ده شراب ااقول يا ماما

وله امشى الله يهديك

زيزو بابا ده شراب ماما لقيته واقع على السلم

عبد الفتاح انت يومك مش هيعدى

تجرى عنايات وراء زيزو كل جسمها يهتز والولد يجرى منها

عبد الفتاح يلبس الشراب المقطوع ويجيب الجزمة ويبص يلاقى فيها

خرم يلبسها وهو مكتوم وقبل ما ينزل تقوله عنايات الواد زيزو كداب

والله يا عبد الفتاح الشراب بتاع مصطفى وقع منى

وانا داخله رجعت أجيبه كان المخفى

زيزو ورايا

عبد الفتاح لما ارجع ابقى اشوف الموضوع

جتكم البلاوى

ينزل عبد الفتاح وعلى باب العماره

يلاقى البواب قاعده وفى ايديه كوب شاى وسندويتش

طعميه رائحته واضحه وطبعا عبد الفتاح مفطرش

فالجوع مصوره له الطعميه كباب

رغم اعتراضه عليها بس الجوع امبراطور اكتر

من النوم الى هو سلطان

البواب

استاذ عبد الفتاح

عاوز ايه انت كمان نهارك مش باين

البواب ليه كده بس يا استاذنا

عبد الفتاح اتصبح انا مش استاذ حد وقول يا غراب البين عاوز ايه

ايه الكلام الغريب ده د

سبحان الله انت كمان يا معفن هتقولى اتكلم بإيه طيب امشى غور

البواب يا استاذ عبد الفتاح صاحب العماره

عبد الفتاح يقاطعه

انا قلت اليوم ده إسود وفيها كمان الراجل النكد صاحب العماره

عاوزه ايه صاحب المخروبه

بيقولك الميه جات الشهر ده عاليه ولازم تدفع زياده

قوله مش هادفع ولا مليم ومش عاوز ميه

البواب

بس هو بيقول ان حضرتك اكتر واحد بتستهلك ميه

وطول النهار الحنفيات مفتوحه

والميه سايبه وبتخر عليهم

روح قوله عبد الفتاح هايجب زير ومش هيدفع الميه

جاتكم القرف

البواب يقوم جرى على صاحب العماره

[بقايا أمل]

أختي الحبيبة أم البنات

أولا ربنا يخليلك بنوتاتك

أنا كنت فاكراكي بتقولي على باقي أجزاء اليوميات اللطيفة دي

ثانيا شوفيلك حل بقى لأنها عجبتني

أنا دخلت امبارح علشان اشوف الباقي ولم تكوني أنزلتيه

تعرفي بتفكريني بايه ؟

لما كنت أصحى الصبح بدري علشان أتابع عيلة مرزوق أفندي اللي بتيجي في برنامج ربات البيوت في الراديو

بصراحه انتي كده في ورطه لأن بصراحه عايزاكي تستمري في يوميات الست عنايات دي على طوووووووووووول

ايه رأيك ؟

[ام البنات]

أختي الحبيبة أم البنات

أولا ربنا يخليلك بنوتاتك

أنا كنت فاكراكي بتقولي على باقي أجزاء اليوميات اللطيفة دي

ثانيا شوفيلك حل بقى لأنها عجبتني

أنا دخلت امبارح علشان اشوف الباقي ولم تكوني أنزلتيه

تعرفي بتفكريني بايه ؟

لما كنت أصحى الصبح بدري علشان أتابع عيلة مرزوق أفندي اللي بتيجي في برنامج ربات البيوت في الراديو

بصراحه انتي كده في ورطه لأن بصراحه عايزاكي تستمري في يوميات الست عنايات دي على طوووووووووووول

ايه رأيك ؟

<{POST_SNAPBACK}>

السلام عليكم ورحمة الله وبركاته

جزاك الله خيرا" على هذا الكلام

بس أختى بقايا أمل

اسمك لماذا حزين هكذا

ربنا يجعل ايامك كلها أمل

شئ آخر غالبا" انت الوحيده الى معجبه باليوميه

لانه الواضح انها معجبتش حد والمشرفه كتر خيرها جبرت بخاطرى وردت على

وانت

عموما" علشان انتم جبرتم بخاطرى

هاكمل ان شاء الله

جزاك الله خيرا

تم تعديل 18 ديسمبر 2005 بواسطة ام البنات

[shahd]

اختي الفاضلة مين قال انها ما عجبتش حد انا عن نفسي عجبتني جداااا ومش معنى ان ما فيش ردود كتيرة انها ما عجبتش حد :wub:

تعرفي انك ضحكتيني بجد وانا كنت فاكرة ان الضحك خلص

يلا ياستي كملي مستنين الباقي

[الآسر]

أهلا بكي يا أم البنات .. لقد جذبني الاسم كثيرا وتوقعت أن أقرأ شيئا لذيذا لا أعلم لماذا

وبالفعل أعجبتني جدا قصة الأستاذ عبد الفتاح المكتئب وزوجته عنايات التي أستشف فيها رائحة الطيبة والصبر والجلد مثلها مثل كثيرا من الستات يا أم البنات !!!

وأنا أضم صوتي لصوت شهد في أن تستمر هذه الحلقات الجميلة

كل يوم حلقة وأنا أثق في أن لديكي المقدرة علي استمرار تدفق هذا الشلال من الأفكار

.. لا ليست أفكار .. انها واقع .. انها صور جميلة من الواقع فقلمك واقعي حي ينبض

وأهلا بكي من جديد

أم البنات عاوزاهم يعيشو في تبات ونبات

هتكتبلنا قصة عبد الفتاح ومراته عنايات

[Reham]

السلام علكم اختي العززه ام البنات

ربنا يخليهم لك ويخليكي ليهم وتفرحي بيهم

لأ.....بجد مسلسل اجتماعي رائع والله

انتي ماتعرفيش انا اصلي بحب الحكايات الشعبية الواقعيه دي اوي

اصلها بتفكرني بمصروالموظف الكحيان... والعيال بتجري في الشوارع... وبتاع الفول ..والانابيب.. وعم إمام بتاع اللبن لما بينده علي الزباين ويقول لبـــــــــــــــــــــــــــــــــــــــــــن بصوت عالي مره وبصوت واطي مره مش عارفه ليه ؟؟؟؟؟ :wub:والستات واقفه في البلكونات مدلدله السبت.... وزحمة المواصلات والناس علي المحطه اللي بياكل واللي بيبصبص واللي بيقرا الجرنان لغاية ما الاوتوبيس ييجي وفي الآخر ييجي الاوتوبيس ويجريهم وراه كام كيلو كده :D

والله لازم تكمليها واحنا معاكي اهه

ضحكتينا وشوقتينا لبقية المسلسل

وجزاكي الله خيرا ياأم البناتيت الحلوين

[Salwa]

ربنا يخللى ويبارك للبنات وامهم ...

يوميات لذيذة جدا وبتفكرنى بيوميات كانت كتبتها زمان د.شانا .

يعنى زى ما بيقولوا دى يوميات (( حارة جدا )) يعنى بتقولى على لسان الشخصيات تعبيرات لاتصدر الا من شاهد عيان .(( يعنى شاهد كأنه رأى وسمع مش مريض لاسمح الله )).

برافو بجد...

خصوصا ان فيها (( تهويل لواقع مرير صادق )) ..موضوع الشراب ...وياترى صاحبه الحقيقى اخوها والا ....الشراب ..وقع من بلكونة حد وهى اخدته وسكتت!!!؟؟

تصدقى يام البنات ؟؟ عندك حق والله ...اكتر طبقة مطحونة هى الطبقة المتوسطة العادية .

(( بلاش نقول الفوق متوسطة رغم انها برضه مطحونة ))..

يعنى موظف وزوجته مدرسة .يعنى مرتبين بيدخلوا البيت ومع ذلك الظروف يعلم بيها ربنا .

(( من برة هالله هالله ومن جوة يعلم الله ))...

انا اتابع ما تكتبين...وما تكتبونه جميعا بصراحة ... لكن نظرا لضيق الوقت فانى اكتفى فى كثير من الاحيان بالقراءة فقط ...

فى انتظار باقى اليوميات ....

[هشام الجنيدى]

ام البنات اولا مرحبا بك فى منتدانا الجميل الذى هو بيت لنا

واحب ان اقول ل كى كما قال الاعضاء مشكورين انه ليس معنى انه لا يوجد ردود كثيره ان الموضوع مش حلو بس انا عن نفسى كنت منتظر اكتمال الدراما والمسلسل عشان ارد عليه

وبجد اسلوبك رائع وسلس وبيوصل الفكره على طول وبنت مصريه مبتقولش حاجه جبر خواطر صدقينى

بجد انتى لك اسلوب مميز

واعتقد انى ساكون من متابعين ابداعك دوما باذن الله

ومرحبا بك مره اخرى :wub:

[ام البنات]

السلام عليكم ورحمة الله وبركاته

شهد

الآسر

ريهام

سلوى

هشام جنيدى

نورتونى بدخولكم الموضوع وكمان شرفتونى بكلامكم

وانا لا استحق هذا الكلام

وكلام فى سركم

اوعو تفتكروا ان بتقمص ولا الكلام ده أبدا" والله

انا كنت هاكمل هماكل يعنى غلاسه

بس الحقيقه خفت اكون بايخه علشان كده قلت استنى

يا اما يخبطوا كرسى فى الكلوب والجهاز عندى يفرقع وبلاش منه تأليف وخلينى اطبخ للبنات وأبوهم

وسيبنى من الكومبيوتر الى هيخسرنى العالم

بس بصراحه ولان معظمكم مغتربين بالجسد

فطبعا" تحنوا لكل الحكايات الى بيعيشها معظم الناس

فوالله علشان كده كتبت فى منتداكم ومنتدانا الظريف

وبعدين انا كنت داخله النهارده علشان اقول لواحده صديقتى بتقول انى بكتب كويس

ونفخت في لغاية ما البيت هيقع من نفختى كنت هاقول لها ابعدى عنى خلينى اعرف

اطبخ للعيال وابوهم بدل ما اتعامل معاه على أنى أمينه الصاوى ولا فتحيه العسال

وبعدين دخلتم جبرتم بخطرى ربنا يكرمكم

بس عاوزة منكم تدعو للبنت الكبيره مغلبانى ومش عاوزه تذاكر وعندنا مرحله جديده صعبه

اصلها فى أولى ابتدائى يلا معلش طولت عليك

بس بجد فرحتوا قلبى وشمتوا صديقتى فى

جزاكم الله خير

[ام البنات]

وهو ماشى لأول الطريق يلاقى بتاع الفول يقف

وياخد سندويتش هيموت من الجوع

وهو ماشى فى الطريق لغاية محطة الأوتوبيس

يتذكر شبابه قبل ما يتزوج ولما كان فى الجامعه وكان بيحب

فتحيه زميلته بس هى مكنيتش حاسه بيه بتحب زميلهم الواد التخين

المكعبر قال بتحبه علشان رقيق وبيقول شعر وهو منظره

زى يونس شلبى وعبد الفتاح كان شبه محمود ياسين هم بيقول كده

ويذكر لما كان يشوفها قلبه يرفر من الفرحه

من كام يوم شافها وهو راجع البيت وهى عرفته وهو لاء

اصلها بقت شبه عنايات مراته فضحك قوى

وقال فى النهايه كلهم زى بعض

يفوق من الذكريات على صوت فرمله شديده

اتاريه وهو سرحان مشى فى وسط الشارع وكانت هتدوسه عربيه

بيبص مين فيها يلاقيه الواد زميله الى كانت بتحبه فتحيه

بس إيه الشياكه دى والالاجه

هو اتغيير كتير رفع وبقى سمباتيك

ومتجوزش فتحيه

هو عرف من فتحيه لما قابلها

اصل ابوها مرضيش وهو اشتغل بالفن واشتهر

سعد ايه مين عبد الفتاح ازيك ياراجل كده كنت هتخلينى ادوسك

عبد الفتاح كنت دوستنى وخلصتنى من العيشه الهباب

سعد تعالى تعالى يا راجل

عبد الفتاح مش فاضى الاوتوبيس هيفوتنى

يلا سلام

سعد يلا سلام ايه استنى انا هاوصلك

فى سره

اصل اليوم بدأ بام عنايات

وفى العربيه سعد عمال يرغى ويتذكر ايام الجامعه

وعبد الفتاح عمال يفكر فى مديره

الى هيعكنن عليه لو اتأخر

وسعد عمال يرغى

وانت إيه رأيك يا عبد الفتاح

عبد الفتاح فى ارتباك رأى فى ايه ان شاء الله معلهش مكنتش

سامع من صوت الكلكسات

ايه رأيك نتقابل الشله القديمه انا على اتصال ببعضهم

عبد الفتاح معلهش انا معنديش وقت ياريت تنزلى هنا شغلى خلاص الشارع الجاى

سعد طيب ممكن تليفونك المحمول

عبد الفتاح الزفت ده بيستعبط هو انا لاقى تمن جزمه لما اجيب محمول

عبد الفتاح مابحبهوش بيخلى الناس تجيبنى من قفايا وانا أحب أكون براحتى

طيب تليفون البيت

عبد الفتاح فى سره ايه اليوم الاغبر منك لله يا أم عنايات طالما اليوم بدأ بإسمك

اتعكر لونه خلاص

طيب معاك قلم

لا لا قول بس وانا هاسيفه على الموبايل

ويطلع التليفون ويسجله

و ويقوله سى يو

عبد الفتاح ان شاء الله وهو نازل

وفى سره ابقى سى مى فى المشمش

اصله اداله نمره غلط

وينزل عبد الفتاح ويدخل من بابا المصلحه

شغال فى مصلحه حكوميه

ميصبحش على حد

والكل متعود على كده

عادى عبد الفتاح مقفل على طول ومفيش كلام

يدخل مكتبه ضارب بوز يقابل مديره قبل ما يتكلم

عبد الفتاح يقوله أه متأخر 3 دقايق ابقى أخصمهم من الإضافى

علشان المرتب مفيهوش نفس

المدير فى ايه انا جيت جنبك

انا بس كنت عاوز أسألك انت تعرف سعد ابو السعد منين

عبد الفتاح انت الى تعرفه منين

[ام البنات]

المدير ازاى دا شاعر ومؤلف أغانى مشهور

طيب وانت عاوز تغنى عبد الفتاح يقوله بغلاسه

يضحك بثقاله وغتاته

ههههه لاء دى المحروسه بنتى

عبد الفتاح بنتك مينفيهم الكبيره ولا الصغيره

لاء لاء الصغيرة الكبيره ملهاش فى الفن

الصغيره اصلها فنانه زى

عبد الفتاح

انا معرفش سعد قوى

مجرد معرفه طيارى

المدير وازاى وصلك لغاية هنا

عبد الفتاح انت أصلا" عرفت منين انى كنت معاه وهو وصلنى

بخبث يضحك المدير لى مصادرى

عبد الفتاح أه الزفت الساعى انا شفته كان داخل قبلى

طيب وهو الزفت ده يعرف سعد منين

يابنى عارفه من كتر ما بيشوف صوره انت بس الى مش فى الدنيا

عبد الفتاح طيب بعد إذنك

المدير على فين

عبد الفتاح

أروح الحمام

ولا تحب تيجى نكمل كلام فى السكه

المدير يستغرب من عبد الفتاح

هو آه رخم بس مش بالشكل ده

يقوله لاء اتفضل ربنا معاك

عبد الفتاح ايه ربنا معاك هو انا رايح احارب

انا رايح أغسل ايدى كلها تراب وبواقى الفول سبحان الله مدير هم صحيح

ويرجع عبد الفتاح المكتب ويتعمد طول الوقت يبقى مشغول وميديش المدير فرصه

يتكلم معاه

وهو شغال افتكر مراته وحكاية الشراب اتحرق دمه قال امها وابوها

هما لاقيين علشان تقولى كده

هى الى بتخنصر من المصروف --- مصروف ايه يا عبد الفتاح هو بيكفى

متلم الدور

يقوم عبد الفتاح بعد انتهاء العمل وهو ماشى يجد مديره يقول له

متنساش يا استاذ تيحه

عبد الفتاح انت بتكلمنى انا

المدير امال مين يا ُعُبد الورد

عبد الفتاح والدلع ده لى انا فى حاجه انت حاسس بشئ

المدير ليه علشان بدلعك محبه والله اه والله محبه

عبد الفتاح يقوله طيب

المدير فى سره الراجل ده مفيش فايده فيه قفل مش عبد الفتاح ده بنى آدم عجيب

المدير استاذ عبد الفتاح متنساش

عبد الفتاح حاااضر هاجى بدرى مانا عارف

المدير لاء موضوع بنتى الفنانه

عبد الفتاح وانا مالى هو انا متعهد حفلات

المدير لاء افهمنى ويغمز له

عبد الفتاح انت بتغمز ليه

المدير يحمر

ويقول له سعد سعد

عبد الفتاح ايه هو احنا فى ايام ثورة 19 وسعد سعد يحيى سعد

المدير خلاص مفيش حاجه ربنا يريحنى من الى انا فيه

عبد الفتاح وبتدعى على نفسك ليه

طالما انت ثورجى كده مفيش حاجه تزعل

المديرطيب خلاص مفيش مع السلامه

عبد الفتاح ميردش مش متعود لا يسلم على حد ولا يرد

على حد طبعه كده اخصائى نكد وعكننه ده رأى مراته فيه

[daktara]

والله كلامك جميل يا ام البنات

كملى

[ام البنات]

والله كلامك جميل يا ام البنات

كملى

<{POST_SNAPBACK}>

كتر خيرك يا دكتره

وان شاء الله هاكمل

ويارب يعجبكم الباقى اصل كده اتزنقت كنت هاكتب كلمتين وأجرى دلوقتى هاكمل ان شاء الله

[ام البنات]

وهناك فى البيت

وبعد مانزل عبد الفتح للشغل

دخلت عنايات تحضر الفطار للأولاد والواد زيزو واقف معاها ماما ماما

فى ايه يا وله

زيزو جعان

عنايات هو انت مش واكل رغيف جبنه وانا بنده على بتاع الفول

زيزو جبنة ايه ياماما خليها فى سرك

امال ايه

أبدا" دول شوية لحمه مفرومه لقيتهم فى حله صغيره

فى التلاجه قلت انتى نسيتيهم ولا هترميهم

عنايات

الله يهدك ولا يهديك هو انت يا واد متسلط على روح انجر الله يقرفك

اكلت اللحمه بتاعة المسقعه

زيزو ابدا" والله يا ماما انا مأكلتيش لحمة المسقعه

أنا أكلت اللحمه بتاعتنا

عنايات امشى يا وله انت فعلا متسلط على

وتنده على أخوه الكبير

واد يارضا انت يا واد

طبعا" هى مدرسه ولكن اسلوبها ملوش دعوة بالتعليم ولا التدريس

وفى المدرسه مسمينها ابله قنبله

يجيى رضا نعم يا ماما البنت اختك سماح بتعيط ليه

عاوزه تاكل

عنايات هو انتم ايه عيله مفاجيع

روح هاتها

وتيجى سماح عنيها حمرا ومناخيرها حمرا وسايحه

وشعرها منكوش

ايه ده يا بت انت كنت بتكنسى الشارع مالك مبهدله كده

مفيس يا ماما انا حاوسه اتل

عاوزه تاكلى حاضر بسخن الفول

سماح لاء مس حايسه فول ده انا حاوسه ملبه وبسطلمه

الى تنت بتقولى لبابا عليها

مربة ايه الى كنت بقول لبابا عليها هو

انت كمان يا مفعوصه بتتصنتى زى اخوك المضروب

مفيش غيرالفول

سماح مليس دعوة والله ياماما عسان حطلى

عنايات أول الشهر هاجيب لك بسطرمه يلى روحى مع أخوك يشطفك

رضا ايه هو ده هو انا الداده بتاعتها لاء طبعا" مش رايح

واد يارضا انت يا واد

يسيبها ويدخل اوضته يكمل لبس

رضا طالب فى اولى ثانوى صنايع

بس ملزق شعره وصابغه بالاوكسجين زى عمرو دياب

وشايف نفسه وميحبش حد يوجه طلبات

بس البنت الصغيره سماح الوحيده الى ساعاتها يخدمها

مصلحه

اصله لما بينزل معاها الشارع البنات بتفضل تلاعبها وهو بيتنفخ

وسط صحابه ان البنات ملمومين عليه

اصلها جميله وعامله زى العروسه اللعبه

حتى يوم ما ولدتها قالوا انهم اتلخبطوا فى المستشفى وادوهم عيله تانيه

بس عنايات حلفت لهم بنتها علشان عمة ابوها حلوه كده

والعيال اخوات سماح من عينة أحمد زكى وشعبان عبدالرحيم

فطبعا البنت غريبه فى وسطهم

نرجع لعنايات

دخلت تشطف سماح وتلبسها

عنايات بتكلم سماح

سموحه يا حبيبتى هنروح الحضانه خليك شاطره

سماح يا ماما الميس هنات بتتلبنى

وبتسعق فيا

بتتضرك وتزعق فيك ليه ضربه فى ايديها

علسان بتون جعانه

عنايات هو انا يا مضروبه مش بديك سندويتشات تكفى

سماح تول مسح سول

مسح زور ليه هو انتى زورك زور الفيل

سماح مليس تحوه انا حاوسه اتل اتتل

اكل ايه الى اكتره

ابوك هيصرف عليكم منين وانا اعمل ايه

سماح مليس دحوه

عنايات تعالى خلينى البسك هدومك

ايه الى فى دراعك ده

سماح مفيس

عنايات مفيش ازاى وانت جسمك ازرق

ابدا" دا الواد اسلف حضنى

يخرب بيته عضك ليه

علسان انا ضلبته واديته بالبوتس

ضربته واديتيه بالبوكس ازاى يا مزغوده

ايه يا ماما مس لاضى يدينى حتتة تفته من معاه

كفته يا صعرانه يا مفجوعه

حلام عليتى يا ماما بلاس تضلبينى جامد تتده

دانا هاوريك يا مفجوعه يا فتوه

حلاص حلاص مس هاضلبه تانى وابقى احد الاتل من حد تانى

اياك يا مضروبه تاخدى أكل من حد تانى وعلشان كده المدرسه ضربتك

ابدا يا ماما تلبتنى علسان حطفت السندويتس بتاعها وبلحت باللبن بتاع البت الثحيله الى فى اللفه

يخرب عقلك حتى البت الى بتبلعى ب لبنها

طيب قولى لى اعمل ايه انا مع المدرسه فى الحضانه

سماح متحمليس حاته

عنايات روحوا كلكم منكم لله بما فيكم ابوكم عبد الفتاح ابن شفيقه

تم تعديل 29 ديسمبر 2005 بواسطة ام البنات

[هشام الجنيدى]

ههههههههههههههههه :) :) :D

يااااه من زمان مضحكتش من قلبى

بجد اسلوبك رائع ............. :)

[الطيار المصرى]

من زمان ماضحكتش كده.....الواحد نسي الضحك في الثانوية........

بس الصراحة .... سبحان مين لم عبد الفتاح و عنايات........ولا ولادهم.......؟؟؟؟؟؟؟؟؟؟؟

بس اسلوب سلس رائع....و طريقة حضرتك في سرد يومياتهم تهلك من الضحك...

و اخيرا ربنا يخليلك ويبارك في البنات.....يا ام البنات......

الطيار المصري........ثانوية عامة ( الله يجحمها ) :)