يوم من حياة عبد الفتاح وعنايات

[ام البنات]

السلام عليكم ورحمة الله وبركاته

حبيبتى ريهام نورتى فى أول الموضوع وبرضه منوره فى اوآخهره

الحمد لله ان اليوميه عاجبتك وانها مكنيتش ثقيلة الظل اى نعم هم ناس مش مؤدبيين يعنى بيشتمو كتيير

بس ساعات المعاناة تخرج يا إما فى قلة أدب

أو صمت رهيييب

عموما" يارب تكون عاجبتك

اصلى بصراحه قربت اخلص اليوميه وان شاء الله لو فى جزء جديد ابقى ابعته لك

تحياتى لك

وبلغى الرسول منى السلام فأنت اقرب اليه

احبك فى الله

[ام البنات]

ويجى الميكروباص زحمه وتدخل عنايات تنحشر هى وسماح

والست الى قاعده جنبها تقول لها وسعى مش عارفه اقعد

عنايات تقول لها اوسع لغاية فين انا لازقه فى الباب

الست تقول لها معرفش وسعى وخلاص

عنايات تسكت ومترديش عليها مجهدة من الخناقه الاخيره وطبعا اليوم من

أوله خناقات بدأ بعبد الفتاح واهى بنته مطلعه عنيها

ترجع الست تقول لها وسعى مش عارفه اقعد

عنايات تقول لها حاضر وتروح مريحه عليها خالص وتخليها مش عارفه تتنفس

تقوم الست تشاور وتحاول تفلفص زى الى بيغرق

نفسها اتكتم

فتروح عنايات باعده عنها وتقول لها ها وسعت ولا لاء

تكح الست جامد وتقول لها اه ووسعى انا نازله هنا

وبعد ما يقف الميكروباص تقول لها منك لله دانت عامله زى العربيه

ام مقطوره الله يكون فى عون الى عايشين معاك

عنايات لسه هترد عليها تلاقى الناس فى الميكروباص خلاص يا ست

خلصنا بقى والسواق يجرى علشان يلحق ربع واقف على الارض

المنيره المنيره

يجى المساعد بتاعه يقول له فى ربع اهه واقف

يقف يقوله المنيره يقوله لاء

ويكمل السواق فى طريقه وعنايات عماله تفكر فى موضوع الناظره وهتعمل ايه معاها

والبنت الصغيره بهدلت الدنيا

وعبد الفتاح الى مستحلف لها

وبعدين تقول فى سرها بلا خيبه ولا هيعمل حاجه

هيرجع يا كل وينام

يلا ربنا يهون العيشه دى امتى الاعاره تيجى واسافر

وتفوق عنايات من تفكيرها على ضربه فى وشها

تلاقى ولد صغير قاعد على حجر امه هو الى ضربها

ولما تفوق من الضربه تلاقى سماح كمان بتعيط والولد بيصرخ

وام الواد تقول لها البت المحروسه بنتك خطفت البسكويت من ايده ولما مرضيش عضته

عنايات ايه يا سماح ده

سماح ايه حاوسه حتة وهو ملضيش

عنايات هو انا مش هاخلص من عمايلك

ام الولد يا ست ابقى اعملى حسابك وخلى فى شنطتك حاجات

من دى العيال برضه بتبص

يعنى ايه بتبص هو بنتى هتبص للى فى ايد ابنك هو انتى صدقتى

سماح لاء يا ماما انا مبصيتش والله

عنايات شفتى

سماح انا اخدت اطمه بس منه بس هو حطفها بعيد

وانا ضلبته مس انت قولتى يا ماما التدب حلام

كدب ايه الى حرام وخطفتى ايه منك لله

خلاص يا ست حاضر هاعمل الى بتقولى عليه

ويقف الميكروباص قبل بيتها تنزل وتقول افوت اشترى شوية طلبات

طالما روحت بدرى النهارده

وتمسك سماح فى ايديها خايف عليها من العربيات

وتوصل عند البقال الى متعوده تشترى منه أسعاره رخيصه

وبيتهاون معاها فى الدفع

السلام عليكم يا عم مرسى

تم تعديل 24 أبريل 2006 بواسطة ام البنات