دليلك للدراسه بالخارج

[سقراط المصري]

بدون مقدمات

فتحت هذا الموضوع بغرض وضع معلوماتنا عن الطريق الذي من المفضل إتباعه عند النيه الجاده للدراسه بالخارج. وهو يشتمل على خبرات الاعضاء الدارسين بالخارج.

برجاء مساهمة الاعضاء لإفادة اخواننا وابنائنا في مصر.

هذه المداخله تحتوي على تجميع مبدئي لمدخلات سابقه (كفهرسه)، كتبها بعض الاعضاء من واقع خبراتهم.

وبعد هذه المداخله يمكن تسيير الموضوع في سياقه الطبيعي.

العضو New وضح التاتي:

فى نظرى افضل شئ ممكن تعمله فى الوقت الحالى هو الاطلاع على امتحانات اللغة الانجليزية ال TOEFL و امتحانات القبول (واعتقد بالنسبة لك حتكون ال GRE) والتمرن عليها... برضة ما تنساش تعمل اللى عليك وزيادة فى دراستك دلوقتى...

الامتحانات اللى قلت لك عليها ان شاء الله مع التمرين عليها حتجيب درجات كويسة وتساعدك باذن الله فى الحصول على منحة دراسية لتبدأ دراساتك العليا فى امريكا...

وبكده تكون دخلت البلد بشكل قانونى وما تعيش حياة المهدد بالترحيل فى اى لحظة..

الحصول على شهادة عليا من جامعة امريكية ان لم تساعدك فى الحصول على عمل فى امريكا فاعتقد انها حتساعدك فى الحصول على عمل كويس سواء فى الدول العربية او حتى فى مصر..

وبالتوفيق.

اضاف العضو سقراط التالي:

الاخ new اشار الي نقطه مهمه ، وهي امتحان التوفل. وهو يقصد ان يضعك على اول السلم الصحيح.

طبعاً عشان تاخد منحه لامريكا او لغيرها ، فأكيد كل منحه لها شروط.

ادني درجات هذه الشروط ان تكون متمكن من اللغه.

امريكا تحتاج التوفل ، بريطانيا تحتاج امتحان ... (حد يفكرني يا جماعه)، المانيا تحتاج عشان تقول ياهادي يارب المستوى السادس .... وهكذا.

فلازم لأي منحه تكون على الاقل مستوفي شرط اللغه.

اللغه ، لو اجتهد جداً ، هتاخد حد ادنى سنه (دراسه في مصر)، واحتمال تحتاج كورسات تقويه اضافيه بعد المنحه.

وكمان التوفل مثلاً ، كحد ادني له درجه 550 لازم تحصل عليها.

(برضه حد من الزملاءيأكد او يصحح المعلومه القادمه دي ...عشان الذاكره مش مساعداني)....... التوفل ممكن تسأل عليه في هيئة اميدست .... بالدقي.

بعد كده هيجي امتحان GRE ,وده امتحان استدلال ومنطق............ على حد تذكري.......... ويفيدك عنه الزملاء بأمريكا.

الحصول على منحه دراسيه ، بتعطيك تأشيره مضمونه ، واقصد بمضمونه انها بتعطيك تأشيره بتكون بيها طالب ، والطالب له مميزات كتيره في الغربه ، مثلاً في المانيا من حقك العمل 3 شهور فقط في السنه سواء متصلين او متقطعين ، وال 3 شهور دول كافيين للمعيشه قول مثلاً 6 شهور.

............

المهم زي ماقلت لك ان فيه شروط للمنحه كحد ادنى لازم تستوفيها.

بعد ذلك نشوف المنحه هتيجي منين وعلى حسب البلد اللي عاوز تروحها.

عامةً، فيه منح بتقدم عن طريق الاتي:

1- سفارة البلد في مصر.............. ممكن تكون منحه او اثنين في السنه.

2- الجامعه المستضيفه........... ودي بتكون محدوده ، وبتزداد مع زياده ميزانيه الجامعه.

3- الشركات والمصانع والمؤسسات و (الهيئات المسيحيه والكنائس........... وهذه غالباً لاتفرق بين مسلم او مسيحي).............. ودي هتلاقيها كتير ، بس عيبها انها بتشترط تخصصات، يعني مثلاً شركه زي سيمنز تقول ان هدي منحه لخمس طلاب بشرط دراسه الهندسه او تخصص كيت وكيت.

4- الهبات من الافراد........ زي مثلاً....زمان كان فيه دليل معي ، وكان فيه واحد سعودي حاطط وديعه في البنك ومن فوائدها بيعمل هبه لتعليم 3 طلاب عرب في معهد MIT المشهور في امريكا.

5- مؤسسات دوليه ....... بس خليك مع المؤسسات المضمونه احساً. فمثلاً هيئة اومنظمه الامم الافريقيه (كمثال لاسم فقط) بتعطي منح لطلاب افرقياً..... والله انا فاكر ان المنظمه دي كان مكانها "غانا". اما المؤسسات اللي بقولك ابعد عنها مثل "حلف الناتو".. فمثلاً كان على النت اعلان تبع "حلف الناتو" لمنح دراسيه في تخصصات ظاهرها طيب ومضمونها خبيث ، فابعد عن الكلام ده.

وعليه ان حاولت اوضح لك الامور بتمشي ازاي.

والقرار طبعاً قرارك.

تحياتي

العضو New اضاف التالي:

احب ان اوضح بعض النقاط

1- ليس هناك شئ بالمجان فى هذة الدنيا ولو مش حتتعب مش حتلاقى نتيجة..

2- مش دايمآ اسهل الطرق او اسرعها هو الافضل... فقد يكون اسهل الطرق بالنسبة لك هو دفع مبلغ مالى و خلاص واظن اننا دايما بنسمع عن ناس بيتنصب عليهم.

3- بعد اللى حصل فى 11 سبتمبر الاجراءات الامنية بقت صارمة واللى بيجى زيارة ويقعد بيبقي مهدد وبصراحة لا احب ان تكون انت و لاغيرك فى هذا الموقف.

4- من الصعب ان حد فاتح شركة والا كافيتريا يبعتلك عقد عمل لاسباب كتيرة ومعقدة.

5- جرب الهجرة العشوائية فقد تكون اسرع بس احتمال الفوز فيها ضعيف نظرآ للاعداد الضخمة المتقدمة بالطلبات..

6- اهم شئ ممكن يساعدك على تحديد الاتجاه الصحيح هى صلاة الاستخارة... اعملها قبل اى قرار وربنا حيرشدك للاختيار الافضل.

العضو New اضاف التالي حول توضيح اين يمكن عمل امتحانات الTOEFLو GRE :

الامتحانات دى بتتعمل من هيئة اسمها ETS اختصار Educational Testing Service ولهم موقع فيه معلومات كتيرة

www.ets.org

امتحان ال TOEFL اختصار ل Test Of English as a Foreign Language وزى ما قال الاخ سقراط فالامتحان بيختبر المامك باللغة الانجليزية..

الامتحان كان بيتعمل فى اماكن مخصصة (فى مصر AMIDEAST) بالورقة والقلم وبعدين بقي على الكمبيوتر وحاليا متاح على الانترنت ويمكن الاتصال بالAMIDEAST ومعرفة اى نوع من انواع امتحان بتتعمل فى مصر ومصاريفه.

عنوان الAMIDEAST كما هو مكتوب على الانترنت هو:

AMIDEAST

23

MOSADDAK STREET, DOKKI

Phone: 02 337 8973

ال GRE اختصار لGraduate Record Exam وده بيكون له عامل كبير فى تقييمك كطالب ..وده اصعب شوية من ال TOEFL وعادة بيكون 3 اجزاء Verbal و Analytical و Quantative. خلى بالك ان الامتحان ده للناس بتوع العلوم والهندسة الناس اللى هم متخصصين فى التجارة امتحانهم اسمه GMAT. المهم قبل ما انسى بعض اسماء دور النشر اللى بيعملوا الكتب المفيدة فى المجال ده:

ETS (المركز بتاع الETS بيطلع دايما كتب للTOEFL وللGRE برضه..)

Barron

Peterson

KAPLAN

اخيرا الامتحانات دى عايزة مذاكرة كويسة ومجهود وباذن الله تعرف تجيب درجات كويسة فيهم.

اضاف العضو سقراط التالي:

الامتحانات دي هتاخد مش اقل من سنه.

بس الاول تعرف انت عاوز تروح فين ، وتخصص إيه.

عشان زي ماقال new كل تخصص وله امتحان قبول خاص به .

لو رحت العنوان اللي كتبه new ابقي اسألهم على اسطوانه التوفل ............. دي اسطوانه فيها نماذج للامتحان........ من خمس سنين كانت بتعطي مع كتاب بتشتريه من اميدست. وبرضه رسم الامتحان من خمس سنين كان 100 دولار امريكي..... مش عارف دلوقت بقى بكام.

اسأل في المكتب الثقافي... للدوله اللي عاوز تروحها...... عن كتالوج الجامعات والمنح.

وعلى فكره النت ممكن يكون اسرع.

لو بدأت العمل الجاد النهارده ......... بالبحث عن المنحه ..... واللغه والامتحانات...... هتسافر كمان سنتين من تاريخه ..... بحد ادني.... العمليه بتاخد وقت.

ولكن اعتقد في وجود النت العمليه تكون اسرع.

وخد بالك ، الكثير من جامعات امريكا بتاخد رسوم لمراجعة الابلكيشن بتاعك.

من زمااااااااان بعت لجامعة كاليفورنيا.... فرع سان دييجو....... بغرض الدراسات العليا....... وردوا بعدها بشهرين بجواب ظريف......... بس مكانش فيه نصيب...... بالرغم ان كنت مستوفي الشروط المطلوبه. وكان سبب الرفض ان بعد فحص الاوراق ، واستبعاد الغير مستوفي للشروط .... بيرتب المرشحين تبعاً لنقاط ، وتختاروا العدد المطلوب من اعلى القائمه.......... وزي ماقلت لك ، المنافسه شديده جداً.

ربنا يسهلك امورك

انوي واصبر وحدد وابدأ

واضاف العضو new التالي:

حبيت اضيف موقع جميل عن الجامعات الامريكية وبعض الجامعات الكندية.... وبيقلل وقت بحثك عن برنامج دراستك والجامعة اللى عايز تختارها.....

الموقع اسمه

http://www.petersons.com

و ده الجزء الخاص منه بالطلبة الاجانب

http://www.petersons.com/college_home.asp?...ertype=NUS_COLL

الموقع ده فيه معلومات اساسية عن معظم البرامج الدراسية والجامعات اللى بتدرس البرامج دى والدرجات العلمية اللى الجامعات دى بتيدها ومعلومات عن المنح والمساعدات المالية ....

والان تحياتي

سقراط

تم تعديل 17 ديسمبر 2005 بواسطة سقراط المصري

[khedr]

الاستاذ سقراط ....

فعلا كتر خيرك...وتشكر علي تفهمك لاهميه الموضوع

[New]

المساعدات المالية الرئيسية اللى بتقدمها الكليات بتندرج تحت جزئين رئيسيين

النوع الاول

RA-Research Assistantship

ودى بتكون مبلغ مالى متواضع شهريا بالاضافة الى تغطية معظم مصاريف الدراسة والتأمين الصحى فى مقابل العمل مع دكتور او اكتر (مشرف/مشرفين) فى ابحاث علمية..

النوع التانى

TA-Teaching Assistantship

نفس مميزات التانى تقريبا بس فى الحالة دى بتبقي زى المعيد عندنا فى مصر... بتدى sections للطلبة ال undergraduates وتصحح ورقهم ... الخ.

لو فرضنا انك رحت جامعة فيها الاختيارين... لو فيه دكتور كويس بيشتغل فى بحث انت بتحبه يبقى اختار الRA لومش عارف تختار ايه والا لو عايز تستنى فترة وبعدين تقرر يبقي تختار الTA وبعدين ممكن تغير للRA

على مواقع الاقسام فى الجامعات حتلاقى ايه الابحاث اللى القسم بيشتغل فيها واسماء الدكاترة اللى فى كل بحث.

وممكن مراسلتهم للتعرف على الابحاث وخلافه

يتبع...

[دكتور صلاح]

اية الموضع دة اتقفل لية واللة حرامممممممم

الموضع ضاع مع الزمن مع انة مهم

الدراسة فى الخارج لانة لايوجد دراسة فى الداخل ياجماعة

عيب علينا شوفوا السعودين والخليجين عملين اية مواقع كاملة وقف على الدراسة بالخارج

ليةةةةةةةة

اعيط

[الباشا المصري]

اخواني في هذا الموضوع الرائع

انا نفسي اكمل دراستي برة ياريت لو نساعد بعض نفسي مصر ترجع زي زمان الدول العربية هتسبقنا قريبا الجيل الطالع الصغير مع الامكانيات المادية هيوصلوا وحنا في النازل ياريت نتعاون العلم هو اللي كنا بنتميز ببيه المصريين ياريت لا نبخل على بعض بالمعلومات\

شكرا للجميع

[دكتور صلاح]

السلام عليكم ورحمة اللة وبركاتة

بصراحة ياجماعة احنا محتاجين فى منتدى محاورات المصرين موضوع مستقل بذاتة ومثبت

بعنوان الدراسة بالخارج ويشمل التالى

مميزات الدراسة بالخارج والعيوب والعقبات الى ممكن تقابل الشخص الى ينوى الدراسة بالخارج

افضل الدول الغربية لكل مجال

الاجرأت المطلوبة والاوراق ونصائح من الاخوة الى درسوا او استقروا

تجارب كل واحد من حضرتكم انا متاكد انة كل واحد منكم عندة تجارب شخصية ارجو انة لايبخل علينا بيها

انا طرحت الموضع لسببين اولهم دخلت فى النت ومش عارف ابداء من اين

تانى حاجة واللة العظيم مكسوف من الى احنا فية

حضرتكم تقدروا تزوروا موقع

اتحاد الطلبة السعودين او البحرنين او الكوتين واللبين فى كندا وبريطانيا وامريكا والمانيا وكل دول اوروبا منتديات متخصصة فقط فى الدراسة

مشاء اللة عليهم واللة يساعدوا بعض ويحكوا مايبخلوا على بعض

الهدف يجماعة اننا نتبادل المعلومات ولى وصل لشىء يبقى نكمل بعدة مش نبداء من جديد

انا عارف انة ممكن احد الاخوة يرد يقول انة المنتدى غير متخصص بس اظن انة مفيش منتدى بيناقش قضاية المصرين بشكل جاد

لقيتة اطرحة فية الموضوع غير هنا

وكمان المنتدى مش وزارة خارجية ولاسفارة هنا صح واللة بس

اظن انة فيى حاجات بيعجز حتى المسؤلين عن شرحها وفية حاجات شخصية واحاسيس وتجارب ونتائج لشخص جرب وتعب

صحيح

يجماعة عاوزين مشاركتكم ارجواااااا انة الى عندة معلومة ولو كلمة الى عندة موقع الى عندى اى شىء ميبخل علينا

لانة الى لحظتة انة فى مصر الى بيوصل بيخفى معالم الطريق الى مش فية علشان محدش يعرفة ولا يوصل لة

ارجو انة الكلام دة يكون غلط

[waelenany]

شكرا

[deemuck]

السلام عليكــم ورحمـة الله وبركاتــة ،،

لمن يريد MBA

[MalazMadani]

أخوتي الكرام بالحديث حول الدراسة في الخارج, لقد زرت مؤخرا موقع الدراسة في الخارج حقيقاً و بدون مبالغة فيه كمافة المعلومات حول الدراسة في المرحلة الجامعية و مرحلة الدراسات العليا. أتمنى لكم التوفيق و انشاء الله تكة هالمعلومة فيها الإفادة

تم تعديل 31 مايو 2011 بواسطة MalazMadani