الى المبرمجين فى المنتدى الدارسين و الممارسين

[~Heba~]

السلام عليكم و رحمه الله و بركاته

اولا انا مش متأكده اذا كان فى المنتدى مبرمجين لكن احط موضوعى و خلاص واللى يحس انه يقدر يفيدنى لا يبخل على بالرد

بدايه انا درست برمجه بلغه ++c و #c لكن طبعا زى ما انتوا تعرفوا التعليم عندنا استحاله يخرج مبرمجين بمستوى الاحتراف

لذلك انا عايزه ازيد خبرتى فى البرمجه و محتاجه اخد دورات مايكروسوفت لكن دى تتطلب السفر للقاهره

فيه خيار تانى و هو انى اتعلم مع نفسى عن طريق النت و باستخدام الكتب الالكترونيه ده انا شايفاه شويه صعب

ارجو من احد يدينى من خبرته و احسن طريقه اقدر انمى به موهبتى البرمجه

بشكل عام طبعا دون تحديد لغه برمجه معينه

طبعا انا مش بعمل دا كله للشغل انا واخده الموضوع هوايه لذيذه لانى بشعر بالتميز عن غيرى لانى بفهم فى البرمجه دا غير ان البرمجه شئ جميل يحفز التفكير و تخلى الواحد يبدع فعلا

اسفه على الاطاله و ان شاء الله لا تردونى خائبه

[سقراط المصري]

طبعاً بالتوفيق ..... مادام تبغي طلب العلم والاجتهاد.

هقوم من على الكرسي الان عشان زميل اخر يقدر يرد على طلبك.

تحياتي وبالتوفيك

سقراط

[~Heba~]

اشكرك جدا على سرعه ردك

حتى و ان كانت دعوه بالتوفيق اقبلها بكل ترحاب و اشكرك عليها

انتظر من بقيه الاخوات و الاخوات يحكوا لى عن تجاربهم مع البرمجه

طبعا لا تؤاخذونى انا جديده و بحاول ارسل موضوع فكررته مرتين

[IUnkown]

مرحبا بك

البرمجة بالنسبة لي هي امتع عمل يمكن القيام به وما دمت بدأت بها كهواية تحبينها فبإذن الله سوف تجيدين فيها

C# غالبا هو افضل ما يمكن البدء به لأن C++ معقدة لمبتدئ

يمكن للكورسات ان تكون ذات فائدة ولكن اذا كانت بغرض الشهادة فلا انصح بها اطلاقا في البداية. الشهادة ستعلمك كيفية استخدام اللغة كما تريد مايكروسوفت ( وهو شيء جيد ولكن افضل ان اجرب طرق اخرى)

الكتب والكتب ثم الكتب هي من افضل ما يمكن ان يساعد في اتقان لغة برمجة

ويبقى التطبيق وايجاد استخدام لكل ما تتعلميه

موضوع آخر وهو ضرورة الاحتكاك بمن هم أكثر خبرة للتعلم من خبرتهم او حتى مراجعة الاكواد التي قاموا بكتابتها

يجب اتقان قاعدة بيانات بجوار لغة البرمجة وذلك لأن 99.99% من برمجنا في المنطقة العربية تستخدم قاعدة بيانات بصورة او بأخرى

[asm504]

بسم الله الرحمن الرحيم

بصراحة دى أول مشاركة ليا فى المنتدى ده و فى اى منتدى عموما لأنى ببساطة كنت شايف ان الامور دى كلها تفاهات, بس فعليا انا شفت هنا إفادة وجدية من الناس ما شفتهاش فى أى منتدى وده اللى خلانى اغير فكرتى..المهم:

برمجة يعنى حل مشاكل :Problem Solving

وده الأصل فى اى مبرمج ؛ انتى مش بتعملى البرنامج اللى انتى عايزاه, انتى بتعملى اللى بينطلب من, لذلك حاولى تنمى فى نفسك الملكة دى على قد ما تقدرى

بتقولى انك درستى برمجة وفى فقرة تانية بتقولى هواية ومش حتشتغلى فيها, ودى محيرانى انا, مش عارف اقوللك ايه او ... مش عارف. طيب انتى كان مجال دراستك ايه او ناوية على ايه عشان اللى يكلمك يقدر يفيدك؟

بس على العموم : بعد ملكة حل المشاكل, اتعبى شوية فى انك تفهمى فكرة البرمجة عموما لأن الاختلافات بين اللغات وبعضها مش كبيرة فلو تعبتى فى الاول حترتاحى اوى بعد كده

variables, data types, loops, functions, procedures, modules أعرفى كويس الافكار اللى فى الحاجات دى حتلاقيها تقريبا واحدة , والاختلافات بينها فى اللغات طفيفة

بدايتك مع الC++ جميلة اوى ,احسن من بداية ال visual basic كتير , لأن من ناحية السى لغة صعبة وبالتالى ما عداها حيبقى سهل, ومن ناحية تانية ان السى ++ مبنى عليها ال C#, java و دول أقوى اللغات دلوقتى

فى حاجات فى ال Data Structure يفضل اوى انك تعرفيها وممكن تقولى انه لازم كمان , زى: stack , queue, linked list, binary tree وطبعا قبلهم وهى اهم حاجة الpointers

لو على الاقل عرفتى الحاجات دى يعنى ايه وبتعمل ايه تبقى خطوة كويسة

بعد كده خشى على ال Object Oriented Programming وده بقى هو الكل فى الكل , اهم من انك تتعلمى اى لغة , لأنه ببساطة كل اللغات دلوقتى قايمة على الفكرة دى , يكفى انك تعرفى عن اى لغة جديدة عايزة تتعلميها اذا كانت أوبجيكت أورينتيد ولا لأ - وفى الغالب حتبقى أيوة - وتبقى قطعتى فيها نص المشوار تقريبا, بس ما يبقاش فاضللك غير ال syntex بتاعها والnew features اللى فيها ويبقى خلص الموضوع على كده

وطبعا الأوبجيكت أورينتد ده فكرة مش لغة برمجة , ولا هو مرتبط بواحدة معينة , ده معظم اللغات دلوقتى قايمة عليه ان لم تكن كلها , ومن خلاله حتعرفى ال(Object, Class, inheretance, interface,..)

بتقولى انك درستى C# , فأكيد انتى عارفه كتير من الكلام ده ان لم يكن كله, فأتمنى انك ما تستخفيش بكلامى لأنى ما اعرفش انتى واصلة لحد فين , ومن ناحية تانية كلامى ده ممكن يفيد الناس اللى ما تعرفش - عشان الفايدة تعم - وتأكدى انى مش باستخف بيكى

وتبقى حاجة جميلة اوى لو كان تمرينك على الحاجات دى على ال turbo c ++ بصراحة ؛ انا من خلاله اتعلمت الأدب, قصدى يعنى شفت الويل , وده المطلوب, حيبقى شئ جميل اوى لو كنتى متميزة فى ال debugging , يعنى ازاى يبقى فيه غلطات فى البرنامج وانتى تصلحيها

بعد كده لو جيتى تتعاملى مع اى حاجة فيها GUI(Grafical User Interface ) حتلاقى الحياة سهلة وجميييييلة وحتبقى المشاكل بتنحصر فى نطاقات ضيقة مش حتبقى بتقول انك ضعيفة فى اللغة او المجال بقدر ما حتقول انك قليلة الخبرة , ومن هنا حنروح لنقطة التطبيقات

وانتى بتطبقى ؛ لو حتعملى بروجيكت كبير احسن ما حتكتبى 10 برامج صغيرين, لأنه حيعودك على الحمل العالى فى الشغل وازاى الدنيا ترتبط ببعضها

بعد كده حيبقى الكلام على ال DataBase Connectivity لأنه حسب كلام الاخ الفاضل الربط مع قواعد البيانات هو اللى ماشى فى السوق, حيلزمك تعرفى حاجة اسمها SQL(Structured Query Language )

ودى شوية أوامر ماشية مع كل قواعد البيانات اللى فى الدنيا من أول الاكسيس لحد الاوراكل

وما تنسيش مجال الويب(HTML, JAVA Script,ASP,PHP,ASP.NET, ...), لأن برمجة الويب مطلوبة اكتر فى السوق

أسف للأطالة واتمنى تكون مشاركتى ذات قيمة

[asm504]

أنا أسف يا جماعة ... فى مشاركتى انا استطردت كتير وبعدت عن نقطة الأصل فى الأصل فى الموضوع :)

بخصوص الكورسات وكيفية التعلم ؛ انتى مش محتاجة دلوقتى للكورسات خااااالص .

فى وجهة نظرى ان الكوسات مطلوبة فى حالتين:

1- فى حالة المبتدئ اللى ما يعرفش حاجة خالص ؛ لأنه حيبقى من الصعب عليه انه يفهم الدنيا ماشية ازاى لوحده فهيحتاج حد يكون معاه يشرحله , والكورسات اللى بتبدأ بالدارس من الصفر دى صعب أنها توصل الدارس للنهاية . محدش حيقدر يلم كل حاجة فى كورس , لا الدارس حيفهم كل حاجة ولا المدرس هيدى اللى قدامه كل حاجة , و كده بيبقى المدرس بيعمل الصح لسببين : انه يريح نفسه, وانه ما يغرقش اللى قدامه. وفى الحالة دى ما يفضلش ان اللى ياخد الكورس ياخده فى مكان كبير او معتمد اللى بيها ما يكونش غالى اوى , وهنا الدارس المفروض يفهم اللى ربنا يقدره عليه , وما يخليش حاجة تعدى كده من غير ما يفهمها, ويسأل وما يتكسفش انه مش فاهم لأن ببساطة حيبقى فيه ناس كتير مش فاهمين , حتى لو دخل فى مرحلة الغلاسة

ودى ممكن نستغنى عنها لو كان الدارس يقدر يذاكر لوحده وفيه حد معاه بيفهم فى الموضوع اللى بيها لو احتاجله فى حاجة يبقى يساعده , بس فى الحالة دى يبقى يراعى انه مش بيعامل مدرس فى كورس هو دافع فلوسه -انا بيتحرق دمى فى الحاجات دى - , ممكن يكونمشغول او مزاجه مش رايق . يعنى من الآخر ممكن يديله فردة جزمة على انها ساندويتش . :wub:

2- فى حالة الواحد اللى واقف على رجليه كويس وعايز يعمل شهادة - للشغل او للسفر - , فى الحالة دى الموضوع كبييييير . محتاج مكان كويس, معتمد ,مكان كبير وليه مصداقية كبيرة وطبعا حيبقى غالى , بالإضافة ان الدارس حيبقى محتاج يكون فى مرحلة متقدمة فى الانجليزى , يا إما يبقى ياخد مترجم معاه وهو داخل الامتحان , وعلى فكرة صياغة الاسئلة مش بتبقى صعبة عشان انجليزى وبس دى بتبقى أسئلة محترفين , دى شركات عالمية مش حتتاجر بمصداقيتها

من ناحيتك انتى بقى, فانتى مش محتاجة تسافرى القاهرة دلوقتى غير لسبب حاقولهولك , المهم انه مش فى المرحلة دى, انتى دلوقتى محتاجة تعملى self study , مع نفسك وواحدة واحدة معاكى ربنا اولا وبعدين انتى والكتاب والانترنت

وفعلا انا اقصدهم بترتيبهم : انتى -> الكتاب -> الانترنت

التعليم بالتعلم والتعلم بالادراك , وطبعا دى حاجة متوقفة عليكى , تركيز + جهد + صبر = ان شاء الله توصلى

الكتاب بقى : نصيحتى " احترمى عقلك عشان يحترمك " فى المجال ده بلاش الكتب العربى خالص

احنا عندنا دكاترة واساتذة كبار فى المجال ده وانا مش باقلل من شأنهم, بس المشكلة فى اللغة , العربى ما ينفعش خالص , وعلى النقيض كمان ده ممكن يهد كلى اللى انتى بتبنيه فى دماغك

تخيلى لما الكتاب يبقىبيقول " نخلق كائن ..." بمعنى "to create an object.."

ولا لما يقوللك : ننقر بزر الفارة الايمن. بتبقى لهجة غريبة ومضحكة لكن مش بتأدى الغرض . من الاخر طريقها سد

انتى حتبقى محتاجه مراجع references , كتب حلوة كده كبيرة وعليها القيمة ,1000 صفحة ,1500 حاجة كده تملى العين mfb:

بجد مش بهزار , المراجع دى بتبقى منظمة وجيدة الاعداد ومقدمة بأسلوب شيق وبيبقى فيها امثلة كويس وبتبقى صادرة من جامعات او مراكز عالمية او على الاقل كتابها بيبقو من اكبر دكاترة العالم , يعنى مش نظام اطبع وبيع

وطبعا الكتب دى بتبقى غالية شوية , بس لو حتراعى النقطة دى يبقى عليكى وعلى عم سعد فى هندسة القاهرة , حتبقى الكتب فى متناول يد الجميع ,الكتاب اللى حينضرب على قلبه مش هيحصل 100 جنيه , وده السبب اللى ممكن تروحى القاهرة عشانه, وما تقلقيش لو سألتى عليه هناك حتوصلى لأنه معروف, ولو الفقرة دى حتسبب إزعاج لإدارة المنتدى يبقى تتشطب وأكون اسف جدا

بعد كده النت بقى ممكن يفيدك لو بتعملى بحث عن حاجات معينة, وفيه مواقع ومنتديات متخصصة فى الموضوع ده ممكن تفيدك اوى , بس طبعا مش حتغنيكى ابدا عن الكتاب لأن الكتاب هو اللى حيصقلك, وفيه ادوات كويسة فى البرمجة والمجانى منها كتير , وفى حالتك زى ما بتقولى انك بتدورى على التميز والحاجات اللى زى كده حتلاقى فى المنتديات وفى المواقع اكواد بتعمل حاجات فيها افكار كويسة (ازاى تعملى شعاع ليزر بالفلاش.., او امر مثلا بيفتح ال سي دى روم ويقفلها بالفجوال بيسك .., وحاجات كده يعنى)

الموقع ده مثلا http\\www.w3schools.com فيه كل ما يخطر على بالك فى مجال الويب

لاحظت من كلامك انك مش من القاهرة , فلو كان الموضوع كده يبقى مفيش داعى للقاهرة ولا الكورسات طالما انك بتقولى هواية مش شغل لأن الامور دى مكلفة برده إلا اذا غيرتى رأيك طبعا , او عشان الكتب , او عشان دريم بارك ;)

وفى الاول وفى الاخر كل حاجة ترجعلك

ولو كنت قدمت ليكى قدر بسيط من الافادة يبقى يا ريت تدعيلى عشان عندى امتحان بكره

ادعولى يا جماعة والنبى عشان انا من غير الدعاء ما بانجحش, لأنى رغم كل شئ لسه " طالب جامعى فاشل " :wub: mfb: