إيهاب، مفروس، وائل، و كل الحبايب :إسلام بلا مذاهب

[مفروس]

الله يكرمك يا د.ضياء...أنا حاسس ان الدنيا ابتدت تهدا...

الأخ براود...نفسي أقعد معاك

الأخ الصغير سناوائل...بالراحة كده الكلام يبقى جميل...

يا جماعة اسمحولي اقول وجهة نظري اللي وصلتلها و آمنت بها و استرحت لها بعد كل تجاربي و قراءاتي...و أنا عارف ان الكثير قد يجدها خطأ لاعتبارات كثيرة و لكن حاولوا تفكروا فيها بهدوء...

ربنا سبحانه و تعالى فرض علينا الخلاف و الاختلاف في الرأي لحكمة...لأنه لو كان عايز يخلينا كلنا فئه واحدة كان قال كن فيكون...يببقى لازم فيه سبب...و أكيد ربنا سبحانه و تعالى مش عايزنا نختلف علشان نتحارب و نتقاتل و يكره بعضنا بعضا...

الآية بتقول انا جعلناكم شعوبا و قبائل لتعارفوا...مش لتباغضوا أو لتمايزوا أو لتحاربوا

أكيد مش مقصود بيها بس الخلاف في اللون أو الأصل أو الجنسية...بس كمان الفكر و المذهب و الفلسفة...

اختلاف وجهات النظر و التفاسير رحمة من بعض الجهات...

المشكلة تأتي عند نقطة احتكار أحقية الفكر و الحقيقة...و التعدي على حرية الآخر في الفكر و الاعتقاد...

يعني لو انت شايف انك تفتح عينك في الصلاة و أنا شايف اني اقفلها احسن فده ما يؤثرش على علاقتنا ببعض...

لو واحد اقتنع بأن القرآن قديم و الآخر اقتنع بأنه محدث فلا أنا و لا انت عارفين الحقيقة...دي اجتهادات و كل منا ارتاح لرأي...و سواء كانت دي الحقيقة أو دي فده مش حيأثر برضه على العلاقات الدنيوية بين العباد...

الاعتقاد نفسه أو الفلسفة نفسها مالهاش دعوة بعلاقاتنا ببعض...حتى الفقه و التفسير....و لو نظرنا للاختلافات بين المذاهب و الأفكار حنلاقيها كلها ما تؤثرش على العلاقة بين الناس و بعضها...

التأثير بييجي لما واحد يقول أنا صح و انت غلط...و يا تبقى زيي يا تبقى حمار و أهبل و عبيط و كافر...

هنا يبدأ الخلاف الحقيقي بين الناس...لما الناس بتتدخل في حياة و معتقدات الناس التانية...

الدين النصيحة أنا معاكم...بس للي يطلبها أو يتقبلها...بس لما تنصح واحد و تتدخل في حياته و تجبره على اتباع رأيك أو تقوله انك عاصى أو كافر لو ما أخدتش برأيي هنا تبدأ العداوة...

من الأسباب اللي خلتني أخرج من مجموعات شباب المساجد في الكويت الموضوع ده...

انهم شايفين انه من حقهم بل واجب عليهم انهم يتدخلوا في كل كبيرة و صغيرة و يصححوا لي شخص سلوكه حتى لأو أظهر اعتراضه و لم يقبل منهم ذلك...و ساعتها يبقى عدو و عاصي و كافر...

أنا والدي علمني حاجة و كان عنده حق فيها...انت مش عارف ايه ظروف غيرك و ايه أسراره و ليه هو بيعمل كده...

مثلا في يوم الشباب صمموا يخلوا واحد يصلي معانا الظهر في المسجد مع انه كان بيحاول يتهرب منا يومها...و اجتمعوا عليه و ابطلوا كل حججه...و بدأوا يضيقوا عليه الخناق و لم يتركوا له مخرج...

و بعد أن توضا و احسست بانه في قمة الاحراج و قبل أن تبدأ الصلاة اضطر أن يخبرنا بالحقيقة و هي أنه كان جنبا و حدث شيء اضطره للخروج من بيته قبل أن يغتسل...و كان يحاول أن يهرب منا ليذهب لبيته و يغتسل و يصلي..و انقلب عليه الموضوع ازاي تخرج من بيتك و انت جنب و بقت حكاية...الراجل اتفضح و انكشف سره و كل ده لأن فيه ناس بتتدخل في حياة الناس التانية و تضغط عليها...فاهمين قصدي ايه يا جماعة؟؟

أنا قصدي من الآخر ان ليه ما نتقبلش فعلا اختلافات بعضنا و نتفهم ان لكل حياة خصوصيتها و لكل شخص ظروفه...

ظروفه العقلية و الاجتماعية و النفسية و التاريخية اللي جعلته يرتضى باعتقاد معين لنفسه غير اللي انت بترتضيه لنفسك...

و في الآخر اللي بيحاسب ربنا...ممكن الوهابي و الشيعي و الأشعريو المعتزل ربنا في الآخر لما يحاسبهم يخليهم كلهم زي بعض بميزانه الخاص...لأنه برضه في الآخر بيحاسب بالنيات...

يبقى أنا مقتنع في الآخر ان العلاقة بيني و بين ربي هى علاقة خاصة جدا هو بنفسه اللي حددها و كتب على حياتي و تجاربى اللي كونت فكري و عقليتي و حيحاسبني بميزان خاص بحكمته و كرمه....و لا شيخ ولا امام ولا جن أزرق يقدر يعرف ميزاني ايه ولا الطريقة اللي رب العالمين حينظر لي بها يوم الدين...

انما الفكرة الرئيسية في التعامل بيننا كبشر هى المعاملة...و الرسول الكريم قال الدين المعاملة...مش المظهر ولا اللحية ولا المذاهب حتى...الدين بين الناس هو التعامل بينهم...افشوا السلام بينكم..تحابوا توادوا...

كل الفرق و المذاهب و الطرق جاءت عن طريق اجتهادات ناس ما جاتش عن طريق الكتاب أو السنه...

و كل الناس دول بشر يؤخذ منهم و يرد عليهم...

أنا حقيقي معتقد ان الدين يقوم على عقيدة هي التوحيد...و مبدأ دنيوي هو لا ضرر ولا ضرار

و من أكبر الضرر العداوة و البغضاء بين ناس يعتقدون في التوحيد

أتمنى أكون وضحت وجهة نظري

و السلالالالالالالالالالالالالالام

[ايهاب سالم]

ده حتى أنا دورت عيل صغير يدور عليك الصبح... :D

<{POST_SNAPBACK}>

شربات

وحشتنا يا راجل :wub:

إنت أوحش